Þingeyjarsveit hefur tekið fyrir erindi Framsýnar um breytingar á gjaldskrám. Eftirfarandi var bókað:
„Lagt fram erindi frá Framsýn stéttarfélagi þar sem þar minnt er á samkomulagið sem gert var samhliða síðustu kjarasamningum um aðhald hvað varðar gjaldskrárbreytingar til hækkunar hjá sveitarfélögunum og fyrirtækjum í þeirra eigu. Framsýn óskar eftir við Þingeyjarsveit að virða áðurnefnt samkomulag.“
Byggðarráð Þingeyjarsveitar þakkar erindið og tekur undir mikilvægi þess að hækka ekki álögur á barnafjölskyldur og viðkvæma hópa. Jafnframt telur byggðarráð að hófs sé gætt í öðrum gjaldskrárhækkunum.
Árleg Kvennaráðstefna ASÍ verður haldin dagana 14. – 15. nóvember nk. á Hótel KEA á Akureyri. Yfirskrift ráðstefnunnar er: Ryðjum hindrunum úr vegi – kvenfrelsi og stéttabarátta
Ráðstefnan er opin félagslega kjörnum fulltrúum stéttarfélaganna og starfskonum hreyfingarinnar.
Markmið Kvennaráðstefnu í ár, eins og endranær, er að virkja samtakamátt ASÍ-kvenna til að styðja og hvetja konur til áhrifa í hreyfingunni, ásamt því að fræðast, brýna verkalýðshugsjónina og hafa gaman saman. Einnig að setja málefni er lúta að velferð, öryggi og réttindum launakvenna rækilega á dagskrá. Helstu jafnréttisáherslur frá 45. þingi eru að leiðrétta skuli vanmat á kvennastörfum, taka skuli enn betur á móti þolendum kynferðislegrar áreitni og ofbeldi í vinnu og vinnutengdu umhverfi og að beina þurfi sjónum að stöðu foreldra og þrýsta á aðgerðir sem draga úr umönnunarbilinu sem myndast hefur milli fæðingarorlofs og leikskóla. Þessar sömu áherslur verða til grundvallar á ráðstefnunni. Fyrirkomulag ráðstefnunnar verður með þeim hætti að sérhverju félagi býðst að halda utan um 45 mínútna málstofu um málefni sem á því brennur og er því dagskrá ráðstefnunnar í höndum þátttakenda. Fulltrúar Framsýnar á ráðstefnunni verða Ósk Helgadóttir, Agnieszka Szczodrowska og Nele Marie Beitelstein. Á meðfylgjandi mynd eru þær samankomnar til að undirbúa sig fyrir ráðstefnuna.
Fjölmargir gerðu sér ferð í Hraunholtið síðasta sunnudag til að skoða nýjar og glæsilegar íbúðir stéttarfélaganna, það er að Hraunholti 26 til 28. Almenn ánægja kom fram hjá gestunum með íbúðirnar sem þegar hafa verið teknar í notkun en þær fóru í leigu í september til félagsmanna. Það eru ekki allir sem gera sér grein fyrir því, að aðeins hluti félagsmanna Framsýnar og Þingiðnar býr á Húsavík, þess vegna ekki síst eru þessar íbúðir kærkomnar þeim félagsmönnum sem búa fjarri Húsavík. Þá eru þegar dæmi um að félagsmenn á Húsavík, sem eru að taka sýnar íbúðir í gegn, leigi íbúð á vegum stéttarfélaganna meðan þeir standa í framkvæmdum. Sjá myndir frá opnu húsi í Hraunholtinu:
Hraunholtið í byggingu, í dag eru íbúðirnar glæsilegar í alla staði.
Framsýn og Framhaldsskólinn á Laugum hafa átt gott samstarf um fræðslu er tengist vinnumarkaðinum og starfsemi stéttarfélaga og lífeyrissjóða fyrir nemendur skólans. Í gær var komið að kynningu fyrir nýnema í skólanum. Formaður Framsýnar, Aðalsteinn Árni, fór yfir tilgang stéttarfélaga og vinnumarkaðinn. Jóna Finndís Jónsdóttir forstöðumaður réttindasviðs Lsj. Stapa fór yfir gagnlegar upplýsingar er tengjast markmiðum lífeyrisjóða. Nemendur Laugaskóla voru áhugasamir og spurðu frummælendur út í hitt og þetta sem tengdist viðfangsefnum dagsins.
Jóna Finndís Jónsdóttir forstöðumaður réttindasviðs Lsj. Stapa fór yfir gagnlegar upplýsingar er tengjast markmiðum lífeyrisjóða.
Á dögunum sendi Framsýn erindi á Norðurþing varðandi fyrirhugaðar hækkanir á gjaldskrám sveitarfélagsins og fyrirtækja í þeirra eigu. Var sveitarfélagið hvatt til að sína hófsemi og virða samkomulag aðila vinnumarkaðarins, þar á meðal sveitarfélaganna, um hækkanir á gjaldskrám.
Byggðaráð Norðurþings tók erindið fyrir á fundi 24. október og gerði eftirfarandi bókun:
„Fyrir byggðarráði liggur erindi frá Framsýn stéttarfélagi þar minnt er á að sveitarfélögin virði samkomulagið sem gert var samhliða síðustu kjarasamningum um aðhald hvað varðar gjaldskrárbreytingar til hækkunar hjá sveitarfélögunum og fyrirtækjum í þeirra eigu. Byggðarráð þakkar erindið og telur þær tillögur að gjaldskrám sem nú eru til umræðu vera til samræmis við samkomulag sem gert var samhliða síðustu kjarasamningum.“
Til fróðleiks má geta þess að þetta er tiltekið í yfirlýsingu stjórnvalda:
Gjaldskrárhækkanir ríkisins og sveitarfélaga
• Til að stuðla að verðstöðugleika munu gjaldskrár ríkis almennt ekki hækka umfram 2,5% á árinu 2025.
• Sveitarfélögin lýsa yfir vilja til að hækka ekki gjaldskrár fyrir árið 2024 umfram 3,5% og endurskoða gjaldskrár ársins hafi þær hækkað meira. Sérstaklega verði horft til gjaldskráa er varða barnafjölskyldur og fólk í viðkvæmri stöðu. Þá verði gjaldskrárhækkunum stillt í hóf eins og nokkur kostur er á samningstímanum.
Framsýn og Þingiðn verða með opið hús í Hraunholti 26-28 sunnudaginn 27. október frá kl. 14:00 til 16:00. Boðið verður upp á kaffi og kleinur. Áhugasömum gefst kostur á að skoða tvær glæsilegar orlofsíbúðir sem þegar hafa verið teknar í notkun fyrir félagsmenn. Sjáumst hress og glöð í hjarta yfir þessum glæsilega áfanga.
Síðar í dag klárast reglulegt þing Alþýðusambands Íslands en það hófst síðasta miðvikudag. Þing ASÍ eru haldinn á tveggja ára fresti. Á meðfylgjandi mynd má sjá fulltrúa Framsýnar, Þingiðnar og Verkalýðsfélags Þórshafnar á þinginu. Þetta eru þau Aneta Potrykus, Guðný I. Grímsdóttir, Ósk Helgadóttir, Aðalsteinn Árni Baldursson, Jónas Kristjánsson, María Jónsdóttir og Torfi Aðalsteinsson.
Nú er unnið að því að setja upp nýja útihurð á Skrifstofu stéttarfélaganna. Eldri hurðin var orðin ansi léleg enda yfir 40 ára gömul. Næstkomandi mánudag koma viðskiptavinir stéttarfélaganna, Sjóvá og Sparisjóðs S- Þingeyinga til með að geta gengið um nýju rafmagnshurðina.
Sjóvá og Sparisjóður Suður-Þingeyinga hafa sameinast um þjónustuskrifstofu að Garðarsbraut 26 á Húsavík, það er í húsnæði stéttarfélaganna. Sparisjóðurinn var þar áður en nú hefur Sjóvá jafnframt fengið aðgengi að húsnæðinu. Á þessum tímamótum var rýmið allt tekið í gegn og er nú orðið allt hið glæsilegasta. Starfsmenn segjast afar ánægðir með breytingarnar um leið og þeir bjóða Þingeyinga sem og aðra velkomna í viðskipti.
Bjarg íbúðafélag er húsnæðissjálfseignarstofnun stofnuð af ASÍ og BSRB. Félagið er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að öruggu íbúðarhúsnæði í langtímaleigu. Um er að ræða svokölluð leiguheimili að norrænni fyrirmynd, „Almene boliger“. Fyrstu íbúðir voru afhentar leigutökum í júní 2019 á höfuðborgarsvæðinu. Framsýn hefur lengi barist fyrir því að Bjarg komi að því að byggja leiguhúsnæði fyrir tekjulága á Húsavík og víðar á félagssvæðinu enda sé grundvöllur fyrir því. Það er í fullu samstarfi við sveitarfélgin og verkalýðsfélögin í Þingeyjarsýslum. Nú ber svo við að hafnar eru framkvæmdir við sex íbúða raðhús á Húsavík að Lyngholti 42-52. Um er að ræða sérbýli með litlum garði og allar íbúðir með tveimur bílastæðum. Allar íbúðirnar eru 4ra herbergja (3 svefnherbergi). Reiknað er með að íbúðirnar verði tilbúnar í apríl 2025. Íbúðirnar eru ætlaðar fyrir félagsmenn Framsýnar, Þingiðnar og Starfsmannafélags Húsavíkur sem eru á leigumarkaði og standast þær reglur sem gilda um úthlutun íbúðana. Þá hafa félagsmenn innan aðildarfélaga ASÍ og BSRB sem búa utan félagssvæðið stéttarfélaganna í Þingeyjarsýslum einnig aðgengi að íbúðunum. Full ástæða er til að fagna þessum áfanga. Norðurþing kemur að þessu verkefni með Bjargi íbúðafélagi. Hér er hægt að lesa frekar um starfsemi Bjargs íbúafélags: https://www.bjargibudafelag.is/. Opnað var fyrir umsóknir 14. október 2024 og úthlutun hefst 15. nóvember 2024. Hérmá sjá staðsetningu íbúðanna.
47. þing BSRB var haldið á Hilton Hótel Nordica í byrjun október. Um 220 þingfulltrúar frá öllum aðildarfélögum höfðu seturétt á þinginu. Þing BSRB eru haldin þriðja hvert ár og fara þau með æðsta vald í öllum málum bandalagsins. Þingið tekur til umfjöllunar öll þýðingarmikil málefni og mótar stefnu BSRB. Þá er kosið í helstu embætti bandalagsins á þingum þess. Starfsmannafélag Húsavíkur átti tvo góða fulltrúa á þinginu, það er Hermínu Hreiðars og Bergljótu Friðbjörns. Þær voru ánægðar með þingið.
Starfsfólk Skrifstofu stéttarfélaganna fór til Egilsstaða í gær í náms- og kynnisferð. Tilgangur ferðarinnar var að skoða orlofshús STH á Eiðum sem tekið var í gegn í sumar, heimsækja lögmenn félagsins sem starfa hjá Sókn lögmannstofu og Héraðsprent sem sér um að prenta bæklinga, dagatöl og Fréttabréf stéttarfélaganna. Heimsóknin tókst í alla staði mjög vel og móttökur heimamanna voru frábærar.
Gunnhildur og Þráinn fara yfir starfsemina hjá Héraðsprent. Nafnarnir fylgjast vel með en þau hjónin hafa lengi komið að rekstri prentsmiðjunnar.Eva Dís Pálmadóttir lögmaður Framsýnar fer yfir starfsemi lögmannsstofunnar á Egilsstöðum. Sökn lögmannsstofa sér um slysa og vinnuréttarmál fyrir stéttarfélögin í Þingeyjarsýslum þurfi þess með. Aðilar hafa átt mjög gott samstarf. Bústaður STH á Eiðum hefur verið tekinn í gegn, verkinu lauk í sumar. Starfsfólk stéttarfélaganna kom við á Eiðum og skoðuðu framkvæmdirnar sem lofa góðu.
Fræðslusjóðurinn Landsmennt hefur ráðið Solveigu Ólöfu Magnúsdóttur til starfa hjá sjóðnum. Hún tók við starfinu 1. október 2024.
Solveig hefur viðtæka reynslu af menntamálum og hefur starfað sem kennari frá árinu 1993, það er á Siglufirði og í Varmárskóla í Mosfellsbæ. Þar hefur hún lengst af verið deildarstjóri miðstigs með kennslu.
Þegar Solveig bjó á Siglufirði kom hún m.a. að því að halda utan um komu flóttamanna til Siglufjarðar sem verkefnastjóri. Auk þess starfaði hún á sínum yngri árum við almenn störf á bæjarskrifstofu Siglufjarðar, blaðamennsku, verslunarstörf, heimilisþrif, fiskvinnslu og við símsvörun á leigubílastöð.
Solveig hefur því víðtæka reynslu úr atvinnulífinu og góða tengingu við landsbyggðina sem kemur til með að gagnast henni vel á nýjum starfsvettvangi.
Samhliða því að vera í krefjandi störfum hefur Solveig verið virk í félagsmálum og starfað m.a. fyrir sitt stéttarfélag. Hún var um tíma trúnaðarmaður og formaður Skólastjórafélags Reykjaness, auk þess að sitja í fræðslunefnd félagsins.
Stjórn Landsmenntar býður Solveigu Ólöfu velkomna til starfa og væntir mikils af hennar störfum í þágu Landsmenntar og þeirra fræðslusjóða sem eru með þjónustusamning við sjóðinn, Ríkismennt, Sveitamennt og Sjómennt.
Á 38. þingi Alþýðusambands Norðurlands sem fram fór fyrir helgina var samþykkt samhljóða að færa Kvennaathvarfinu á Akureyri kr. 500.000 til starfseminnar.
Hvatning til sveitarfélaga
Sveitarfélögin á Norðurlandi eystra voru um leið hvött til að tryggja samtökunum öruggt húsnæði sem mætir þörfum þeirra. Það á enginn að þurfa að efast um mikilvægi starfsemi kvennaathvarfsins og brýna nauðsyn þess að tryggja aðgengi að þjónustu þess.
Starfssvæði Alþýðusamband Norðurlands er Norðurland og er hlutverk þess að vinna að alhliða hagsmunum aðildarfélaga og félagsmanna þeirra. Aðildarfélög Alþýðusambands Norðurlands eru eftirtalin ellefu stéttarfélög:
Framsýn, stéttarfélag
Þingiðn, félag iðnaðarmanna
Aldan, stéttarfélag
Eining-Iðja
Byggiðn, Félag byggingamanna
Félag málmiðnaðarmanna Akureyri
Félag verslunar og skrifstofufólks Akureyri og nágrenni
Skrifstofa stéttarfélaganna verður lokuð miðvikudaginn 9. október þar sem starfsmenn verða bundir á námskeiði yfir daginn. Beðist er velvirðingar á því.
38. þing Alþýðusambands Norðurlands fór fram í gær og í dag á Illugastöðum í Fnjóskadal. Mörg fróðleg erindi voru flutt á þinginu auk þess sem ályktað var um heilbrigðismál. Þá var samþykkt að færa Kvennaathvarfiu á Akureyri kr. 500.000,- frá sambandinu um leið og þingið beinir þeim tilmælum til annarra félagasamtaka, sveitarfélaga og einstaklinga að styðja við bakið á þessari mikilvægu starfsemi. Þá var ný stjórn kjörin. Ósk Helgadóttir varaformaður Framsýnar stéttarfélags hlut rússnenska kosningu þar sem hún var kjörin formaður sambandsins til næstu tveggja ára.
Ályktun um heilbrigðismál
„38. þing Alþýðusambands Norðurlands krefst þess að stjórnvöld tryggi jafnt aðgengi að heilbrigðisþjónustu fyrir alla landsmenn, óháð búsetu, aldri eða efnahag. Hver vill ekki hafa aðgengi að lækni og öðru heilbrigðisstarfsfólki í sinni heimabyggð? Öflug heilbrigðisþjónusta eru sjálfsögð mannréttindi.
Stjórnvöld hafa lengi talað fyrir hagræðingu í heilbrigðiskerfinu en þar hafa hljóð og mynd ekki farið saman. Hagræðingartillögur stjórnvalda hafa miðast við að draga úr útgjöldum ríkissjóðs við almenna heilbrigðisþjónustu á kostnað almennings í landinu.
Áhrifin sjást einna best á landsbyggðinni þar sem dregið hefur verið markvisst úr sérfræðiþjónustu og skurðstofum sem og fæðingardeildum lokað og læknaskortur er viðvarandi á svæðum utan höfuðborgarsvæðisins. Afleiðingarnar eru að sjúklingar og aðstandendur þeirra þurfa að ferðast langar vegalengdir, oft við erfiðar aðstæður, með óheyrilegum kostnaði og óþægindum. Þetta á ekki síst við um barnshafandi konur og fjölskyldur þeirra sem í mörgum tilfellum þurfa að flytjast búferlum milli landshluta þar sem sérhæfð fæðingaraðstoð er ekki til staðar nema á fáeinum stöðum á landinu. Slík staða er einfaldlega ekki boðleg.
Hagræðing og aukin samþjöppun heilbrigðisþjónustu á landsbyggðinni má ekki felast í því að kostnaður sé færður yfir á sjúklinga, aðstandendur og stéttarfélög meðan ríkið losar sig undan ábyrgð. Að mati AN kemur ekkert annað til greina en að bæta úr þessari stöðu, enda markmið laga um heilbrigðisþjónustu að allir landsmenn eigi kost á fullkomnustu þjónustu sem á hverjum tíma eru tök á að veita til verndar andlegu, líkamlegu og félagslegu heilbrigði.
Á sama tíma og heilbrigðiskerfið er vanfjármagnað stendur þjóðin frammi fyrir stórum áskorunum í heilbrigðismálum. Lífaldur lengist, lýðheilsuvandamál breytast, vaxandi þörf er á öflugri geðheilbrigðisþjónustu, sálfræðiþjónustu og forvörnum. Þá kallar breytt samsetning íbúa með fjölgun innflytjenda og vaxandi ferðamannastraumur á nýja nálgun í þjónustu. Forgangsraða þarf opinberu fé til að tryggja að heilbrigðiskerfið standi undir þessum áskorunum.
38. þing Alþýðusamband Norðurlands krefst þess að stjórnvöld fylgi eftir markmiðum laga um heilbrigðisþjónustu og bæti þegar í stað aðgengi allra þegna landsins að viðunandi heilbrigðisþjónustu og tryggi þannig jafnan aðgang að heilsugæslu, sérfræðingum, hjúkrunarheimilum og nauðsynlegum lyfjum í heimabyggð. Til dæmis með því að auka verulega rekstrarfé til Sjúkrahússins á Akureyri og annarra heilbrigðis- og hjúkrunarheimila á Norðulandi. Auk þess verði greiðsluþáttökukerfið endurskoðað, þar með talið kostnaður sjúklinga og aðstandenda, vegna vinnutaps, ferðalaga og dvalar í takt við útgjöld þeirra á hverjum tíma.
Alþýðusamband Norðurlands er reiðubúið til að koma að þessari vinnu með stjórnvöldum, enda um mikilvægt hagsmunamál að ræða fyrir félagsfólk, ekki síst í hinum dreifðu byggðum landsins.“
Ósk Helgadóttir einn okkar öflugasti verkalýðsforingi var í dag kjörinn formaður AN sem var að ljúka rétt í þessu. Ósk er jafnframt varaformaður Framsýnar.Fallegustu þingfulltrúarnir komu að sjálfsögðu frá Framsýn. Félagið átti rétt á 14 fulltrúm en tæplega 100 þingfulltrúar sátu þingið frá stéttarfélögum á Norðurlandi.Jónas Kristjánsson formaður Þingiðnar var einn af riturum þingsins. Hann var jafnframt næst fallegasti formaðurinn á þinginu.Kristján Önundarson sem var einn af fulltrúum Framsýnar lét menn heyra það á þinginu. Meðan talað væri um að færa Reykjavíkurflugvöll um einhverja kílómetra með óheyrilegum kostnaði fyrir ríkisjóð væri vegakerfið á Íslandi í rúst. Varaði hann við þessari vegferð stjórnvalda.Örn Heimir Björnsson var að sitja sitt fyrsta þing sem fulltrúi Framsýnar en hann er trúnaðarmaður starfsmanna hjá Mývatn-Berjaya Iceland hotels.
Í morgun fór bréf frá Framsýn til þingmanna Norðausturskjördæmis þar sem kallað er eftir stuðningi við að koma aftur á áætlunarflugi milli Húsavíkur og Reykjavíkur. Líkt og er með nokkra aðra áfangastaði á Íslandi er kallað eftir ríkisstuðningi við flugið sem er forsendan fyrir því að hægt verði að hefja aftur flug til Húsavíkur, sjá bréfið:
Ágætu þingmenn
Framsýn hefur lengi barist fyrir áætlunarflugi milli Húsavíkur og Reykjavíkur, því miður lagðist flugið af 1. apríl 2024 þar sem ríkisstyrkur var ekki lengur til staðar sem er forsendan fyrir því að hægt sé að halda úti flugi milli þessara áfangastaða líkt og er með nokkra aðra áfangastaði á Íslandi sem flogið er til. Áður hafði Flugfélagið Ernir verið í góðu samstarfi við heimamenn um að halda úti flugsamgöngum milli þessara áætlunarstaða frá árinu 2012. Fyrr á þessu ári bauð Vegagerðin út flug til Húsavíkur, tilboðið gerir ráð fyrir flugi til Húsavíkur í aðeins þrjá mánuði á ári í þrjú ár, des-jan-feb. Þrátt fyrir útboðið hefur ekki verið gengið frá samningi við það flugfélag sem bauð í leiðina, Reykjavík-Húsavík-Reykjavík. Hvað tefur er ekki vitað og veldur áhyggjum heimamanna. Forsvarsmenn Framsýnar og sveitarfélagsins Norðurþings funduðu á dögunum með innviðaráðherra, Svandísi Svavarsdóttur sem tók gestunum vel frá Húsavík. Sagði hún málið til skoðunar í ráðuneytinu, hjá Vegagerðinni og þá væru fjárlögin til umræðu á þingi sem mörkuðu í hvað peningarnir færu. Á fundinum með Svandísi var farið yfir mikilvægi þess að flugsamgöngum til Húsavíkur verði komið á aftur. Horft væri til þess að stuðningurinn verði á ársgrundvelli eða að lágmarki í sex mánuði enda verði flugið rekið á rekstrarlegum forsendum yfir sumarmánuðina. Í ljósi þess hvað málið er mikilvægt fyrir íbúa í Þingeyjarsýslum, það er allt frá Raufarhöfn, biðlar Framsýn til þingmanna kjördæmisins um að koma að verkefninu að fullum krafti. Reyndar er það forsendan fyrir því að hægt verði að tryggja flug til Húsavíkur á ársgrundvelli. Ekki skemmir fyrir að formaður Fjárlaganefndar Alþingis er þingmaður Norðausturkjördæmis. Forsvarsmenn Framsýnar eru reiðubúnir að mæta á fundi með þingmönnum kjördæmisins til að ræða málið frekar, þá eru þingmennirnir ávallt velkomnir í heimsókn á Skrifstofu stéttarfélaganna á Húsavík. Framsýn kallar eftir afstöðu þingmanna kjördæmisins til málsins. Vinsamlegast hafið samband vanti ykkur frekari upplýsingar.
Undanfarin misseri hafa komið upp á yfirborðið nokkur mál á íslenskum vinnumarkaði sem sýna að vinnumansal þrífst í íslensku samfélagi. ASÍ og SA lýsa sameiginlega yfir áhyggjum sínum af því að slíkt geti þrifist hér á landi og finna til ábyrgðar sinnar um að gera allt sem er á þeirra valdi til að vinna gegn vinnumansali.
Íslenskur vinnumarkaður er að mestu leyti vel skipulagður enda hafa aðilar vinnumarkaðarins viðhaft mikið og virkt samtal um allt það sem lýtur að sameiginlegum hagsmunum. Stjórnvöld verða svo eðli málsins samkvæmt einnig að axla ábyrgð á samstarfinu sem þar með verður þríhliða sem er sérlega mikilvægt hvað varðar baráttuna gegn brotastarfsemi og markmiðið um að hér á landi þrífist ekki vinnumansal.
Vinnumansal er að mati ASÍ og SA ólíðandi og nauðsynlegt að allt sé skoðað með það að markmiði að uppræta slíka háttsemi.
Áhyggjur ASÍ og SA lúta ekki síst að stöðu erlendra ríkisborgara á vinnumarkaði enda sýna dæmin bæði hérlendis og erlendis að einstaklingar í viðkvæmri stöðu sem hafa lagt mikið á sig og flutt um langan veg í leit að betra lífi eru sérstaklega berskjaldaðir fyrir vinnumansali. Sameiginlegir hagsmunir allra eru að tryggja heilbrigðan vinnumarkað sem tekur vel á móti því fólki sem hingað kemur til að vinna.
Með vísan í allt framangreint skora ASÍ og SA á stjórnvöld að grípa svo fljótt sem verða megi til eftirfarandi almennra aðgerða:
Tryggð verði aðgerðaáætlun sem tekur sérstaklega til vinnumansals, þá sérstaklega viðbragðs- og eftirlitskerfis enda til lítils að sinna eftirliti ef niðurstaða fyrir þolendur er jafn slæm eða verri en var meðan á vinnumansalinu stóð.
Þolendum vinnumansals verði tryggð nauðsynleg félagsleg úrræði, eftir atvikum.
Koma þarf upp sérstöku ferli til að bera kennsl á þolendur vinnumansals.
Tryggja þarf fullnægjandi þekkingu á málaflokknum í réttarkerfinu og forgangsraða fræðslunni til að geta betur sinnt málaflokknum. Enda eru slík mál alla jafna flókin og viðkvæm bæði í rannsókn og saksókn.
Lög um atvinnuréttindi útlendinga verði endurskoðuð og eftir atvikum lögum um útlendinga í því augnamiði að takmarka líkur á vinnumansali.
ASÍ og SA lýsa því yfir að auk þess að vinna sameiginlega að framgangi framangreinds munu þau vinna að markvissum aðgerðum á borð við;
Hvetja fyrirtæki til þess að taka ábyrgð á virðiskeðjunni í rekstri sínum. Aðilar munu m.a. útbúa fræðsluefni um hvernig best sé að gera það.
Búa til fræðsluefni um einkenni vinnumansals í samstarfi við önnur samtök fyrir almenning og atvinnurekendur.
Formaður Framsýnar í umboði stjórnar félagsins hefur undanfarið gengið milli ráðamanna til að kanna vilja þeirra til að beita sér fyrir því að áætlunarflug hefjist aftur til Húsavíkur og verði ríkisstyrkt með sambærilegum hætti og er í dag til nokkurra áfangastaða á Íslandi. Í gær átti hann fund með innviðaráðherra, Svandísi Svavarsdóttur auk starfsmanna úr ráðuneytinu. Með á fundinum var sveitarstjóri Norðurþings, Katrín Sigurjónsdóttir. Lögðu þau bæði áherslu á aðkomu stjórnvalda að áætlunarflugi til Húsavíkur. Ráðherra og starfsmenn ráðuneytisins tóku erindinu vel og eru tilbúin að skoða málið frekar með hlutaðeigandi aðilum innan stjórnkerfisins. Á næstu dögum mun formaður Framsýnar einnig setja sig í samband við þingmenn kjördæmisins og formann Fjárlaganefndar þingsins með von um stuðning við verkefnið. Nánar um það síðar.
Formaður Framsýnar hefur undanfarið gengið milli ráðamanna til að kanna þeirra vilja til að stuðla að áætlunarflugi til Húsavíkur með ríkisstyrkjum eins og þekkt er með flestar aðrar flugleiðir á Íslandi, það er til smærri staða. Aðalsteinn Árni segist m.a. hafa átt góðan fund með Svandís Svavars ráðherra um málið.
Íslandsbanki í samstarfi við Framsýn stóð fyrir opnum fræðslufundi um mikilvægi þess að hafa allt á hreinu við undirbúning starfsloka. Meðal þess sem tekið var til umræðu var: Hvenær og hvernig er best að sækja lífeyri og séreignarsparnað, skattamál, skipting lífeyris með maka og greiðslur og skerðingar. Frummælendur á fundinum voru Magnea Gísladóttir, lífeyrisráðgjafi hjá Íslandsbanka og Haraldur Gunnarsson, viðskiptastjóri fyrirtækja og fjárfesta hjá Íslandsbanka. Mætingin var rosalega góð, fullur salur af fólki og góðar umræður.
