kuti

Heimasíða stéttarfélaganna óskar landsmönnum öllum gleðilegra Mærudaga sem eru við það að hefjast á Húsavík, bara gaman. Bein útsetning frá Mærudögum verður í kvöldfréttum Ríkissjónvarpsins, það er í kvöld.

Við gerum betur og betur við okkar félagsmenn. Aðild Framsýnar að fræðslusjóðum í gegnum kjarasamninga, Landsmennt, Sjómennt, Sveitamennt, Ríkismennt og fræðslusjóði verslunarmanna gerir félaginu þetta kleift.

Þannig er leitast við að mæta þörfum þeirra félagsmanna sem vilja bæta þekkingu, ná í aukin réttindi og mæta morgundeginum með þá hæfni sem nauðsynleg er.

Félagsmenn sem ekki hafa nýtt sér rétt sinn síðustu tvö ár eiga rétt á styrk allt að kr. 260.000,-  eða síðustu þrjú ár eiga rétt á allt að kr. 390.000,-  fyrir eitt samfellt nám eða námskeið samkvæmt nánari reglum sjóðanna sem eru reyndar aðeins mismunandi. Tveggja ára reglan kom ný inn um síðustu áramót. Uppsafnaður réttur skerðist ekki hafi félagsmaður fengið styrk undir kr. 50.000,- á tíma uppsöfnunar. Sá styrkur kemur þó til frádráttar fullum rétti.

Almennt er endurgreiðsluhlutfallið 90% af námskeiðsgjaldinu, þó að hámarki kr. 130.000.- á ári. Til viðbótar má geta þess að fullgildir félagsmenn Framsýnar eiga rétt á extra styrk kr. 130.000,-. stundi þeir kostnaðarsamt nám. Já, það er best að vera í Framsýn sem veitir hærri námsstyrki en önnur sambærileg stéttarfélög.

Um þessar mundir eru í byggingu tvær glæsilegar orlofs- og sjúkraíbúðir á vegum Framsýnar og Þingiðnar á Húsavík. Áætlað er að þær verði klárar í byrjun næsta mánaðar og fari í útleigu til félagsmanna í síðasta lagi 1. september. Fyrirspurnir eru þegar byrjaðir að berast varðandi íbúðirnar, það er hvenær þær verði klárar í útleigu en eins og fram kemur í fréttinni er áætlað að svo verði 1. september 2024. Um er að ræða góða viðbót við orlofseignir félaganna í Reykjavík, Kópavogi og Akureyri. Þá á Framsýn tvö orlofshús, annars vegar í Dranghólaskógi í Öxarfirði og hins vegar á Illugastöðum í Fnjóskadal.

Andrea Fáfnis Ólafs og Viðar Breiðfjörð halda samsýningu í Hlyn við Garðarsbraut yfir Mærudagana. Listamennirnir eiga bæði ættir og barnæsku að rekja til Húsavíkur. Þau héldu samsýningu í Vestmannaeyjum á Sjómannadaginn og þá var ákveðið að sýna líka á Húsavík á Mærudögum. 

Listsköpunin kom í kjölfarið á miklu ölduróti lífsins og því kalla þau samsýninguna ÖLDURÓT. Þau eru sammála um að listsköpunin veki með þeim mikla hamingju og sálarró sem þau miðla áfram á strigann og vonast til að skili sér áfram til þeirra sem á horfa. Viðar sækir innblástur í náttúruna og mannfólkið á meðan Andrea sækir innblástur frá ýmsum viðfangsefnum, eigin hugarheimi og umhverfi. Hugarheimurinn og tengingin við sköpunarbylgjulengdina er gríðarstór gnægtarbrunnur fyrir hið listræna sköpunarflæði. Andrea er einstaklega heilluð af ýmsum listamönnum frá Bauhaus tímabilinu á fyrri part síðustu aldar. Frumkvæðið og krafturinn sem einkenndi Bauhaus hreyfinguna breytti því hvernig fólk leit á listsköpun. Á þeim tíma urðu til frumkvöðlar í bæði geometríunni og abstraktlistinni.

Bæði náttúran og geómetrían bera með sér ákveðið tímaleysi og mætti því segja að listaverk þeirra Andreu og Viðars séu sígild og tímalaus. Andrea tekur fram að hún hefur líka virkilega gaman að því að mála einhvers konar kosmísk ferðalög, eins konar leik að hreyfingu, litum og bylgjum sem leika við augu áhorfandans þannig að ímyndunaraflið fari á flug og veki spurningar. Einnig laumar hún stundum tilvísunum frá fornum menningarheimum í verkin. 

Sýningin opnar á laugardaginn 27. júlí kl. 14:00 og bjóða þau Húsvíkinga og aðra gesti Mærudaga velkomna.

Atkvæðagreiðslu er lokið hjá 17 aðildarfélögum Starfsgreinasambands Íslands, vegna nýs kjarasamnings SGS og Sambands íslenskra sveitarfélaga sem undirritaður var 3. júlí síðastliðinn. Framsýn á aðild að samningnum fyrir sína félagsmenn. Rafræn atkvæðagreiðsla meðal félagsmanna SGS stóð yfir dagana 5.-15. júlí. Á kjörskrá voru 3972 manns og var kjörsókn 17,45%. Já sögðu 84,27%, nei sögðu 10,39% og 5,34% tóku ekki afstöðu. Samningurinn var því samþykktur með yfirgnæfandi meirihluta hjá þeim 17 aðildarfélögum sem eiga aðild að honum.

Kjarasamningur SGS og Sambands íslenskra sveitarfélaga 2024-2028

Vegna forfalla er inn okkar besti sumarbústaður í Mörk í Grímsnesi laus í næstu viku. Það er frá komandi föstudegi 26. júlí til 2. ágúst. Hægt er að nálgast frekari upplýsingar um bústaðinn inn á heimasíðu stéttarfélaganna. Áhugasamir hafi samband við Skrifstofu stéttarfélaganna.

Framsýn óskaði nýlega eftir fundi með stjórnendum Kjarnafæðis Norðlenska vegna sameiningar fyrirtækisins við KS. Eins og fram hefur komið í fjölmiðlum hafa hluthafar Kjarnafæðis Norðlenska, stærsta kjötvinnslufyrirtækis landsins, samþykkt tilboð Kaupfélags Skagfirðinga um kaup á fyrirtækinu. Kaupin eru möguleg vegna breytinga sem gerðar voru á búvörulögum í vor þar sem kjötafurðastöðvar voru undanþegnar samkeppnislögum og fengu heimild til að sameinast. Hópur félagsmanna Framsýnar starfar hjá KN. Stjórnendur KN urðu við ákalli Framsýnar um fund og funduðu með formanni félagssins í gær. Þar skiptust menn á skoðunum um sameininguna og framtíðaráform fyrirtækisins. Ekki var annað að heyra en að starfstöð fyrirtækisins á Húsavík stæði sterk við sameininguna.

Framsýn óskaði í gærkvöldi eftir fundi með stjórnendum Kjarnafæðis Norðlenska þegar í stað. Þess er vænst fundurinn geti farið fram í vikunni. Fram hefur komið í fjölmiðlum að hluthafar Kjarnafæðis Norðlenska, stærsta kjötvinnslufyrirtækis landsins, hafa samþykkt tilboð Kaupfélags Skagfirðinga um kaup á fyrirtækinu. Kaupin eru möguleg vegna breytinga sem gerðar voru á búvörulögum í vor þar sem kjötafurðastöðvar voru undanþegnar samkeppnislögum og fengu heimild til að sameinast. Hópur félagsmanna Framsýnar starfar hjá KN. Hafa þeir snúið sér til félagsins enda hafa þeir töluverðar áhyggjur af stöðunni og sínu starfsöryggi. Þá er það ámælisvert að starfsmenn skuli fyrst frétta af kaupum Kaupfélags Skagfirðinga á fyrirtækinu í fjölmiðlum. Til skoðunar er einnig að óska eftir fundi með forsvarsmönnum Kaupfélags Skagfirðinga enda um að ræða mikið hagmunamál fyrir félagsmenn Framsýnar, bændur  og samfélagið allt í Þingeyjarsýslum.

Áslaug Arna Sigurbjörnsdóttir háskóla-, iðnaðar- og nýsköpunarráðherra leit við hjá formanni Framsýnar í gær en hún var á ferðinni hér fyrir norðan. Aðalsteinn Árni var mjög ánægður með heimsóknina og sagði að þau hefðu skipst á skoðunum um þjóðmálin og málefni er tengjast vinnumarkaðinum. Hann sagði að það væri full ástæða til að hæla Áslaugu Örnu fyrir að gefa sér tíma til að líta við en heimsóknin var að hennar frumkvæði.

Atkvæðagreiðslu er lokið hjá aðildarfélögum Starfsgreinasambands Íslands, vegna nýs kjarasamnings SGS og fjármálaráðherra f.h. ríkissjóðs sem undirritaður var 25. júní síðastliðinn. Rafræn atkvæðagreiðsla meðal félagsmanna stóð yfir dagana 1.-8. júlí.

Á kjörskrá voru 1.309 manns og var kjörsókn 22,84%. Já sögðu 87,96%, nei sögðu 7,69% og 4,35% tóku ekki afstöðu.

Samningurinn var því samþykktur með yfirgnæfandi meirihluta hjá þeim 18 aðildarfélögum sem eiga aðild að honum, þar á meðal hjá félagsmönnum Framsýnar sem starfa hjá ríkinu. Félagar, innilega til hamingju með nýjan kjarasamning!

Kjarasamningur SGS og ríkisins 2024-2028

Þurfum að losna við góða og lítið notaða iðnaðaruppþvottavél í góðu standi. Gerðin er COMENDA RF 324. Fæst fyrir lítið. Frekari upplýsingar gefur Alli eða Kúti á Skrifstofu stéttarfélaganna.

Rafræn atkvæðagreiðsla um nýjan kjarasamning SGS og Sambands íslenskra sveitarfélaga hefst í dag kl. 12:00.  Með því að fara inn á þessa kosningslóð geta félagsmenn Framsýnar sem starfa hjá sveitarfélögum greitt atkvæði. Miðað er við þá sem voru í vinnu hjá sveitarfélögunum, Norðurþingi, Þingeyjarsveit og Tjörneshrepp í apríl/maí.

Kosningaslóðin: https://kjosa.vottun.is/home/vote/501?lang=IS

Hægt er nálgast allar helstu upplýsingar um samninginn á upplýsingasíðu um samninginn sem nú er komin í loftið: https://www.sgs.is/kjaramal/kjarasamningar/kjarasamningur-vid-sveitarfelogin-2024-2028/

Rafræna atkvæðagreiðslan stendur til kl. 09:00 mánudaginn 15. júlí og verða niðurstöðurnar kynntar sama dag. Um er að ræða sameiginlega kosningu meðal aðildarfélaga SGS, það er þeirra félaga sem skrifuðu undir kjarasamninginn við Samband ísl. sveitarfélaga.

Atkvæðagreiðslu er lokið um nýjan kjarasamning Starfsgreinasambands Íslands og Landsvirkjunar sem undirritaður var 25. júní síðastliðinn. Samningurinn nær til félagsmanna innan aðildarfélaga SGS, þar á meðal félagsmanna Framsýnar, sem starfa hjá Landsvirkjun vítt og breitt um landið og vinna við rekstur, viðhald og aðra þjónustu í dreifikerfum og aflstöðvum sem eru í rekstri.

Á kjörskrá voru 16 manns. Atkvæði greiddu 9, eða 56,25%, og var samningurinn samþykktur með öllum greiddum atkvæðum. Nýjan samning má nálgast hér.

Rafræn atkvæðagreiðsla um nýjan kjarasamning Starfsgreinasambands Íslands  og ríkisins sem Framsýn á aðild að fyrir sína félagsmenn hófst kl. 12:00 í dag. Meðfylgjandi er kosningaslóðin sem viðkomandi félagsmenn geta notað til að kjósa.

Kosningaslóðin: https://kjosa.vottun.is/home/vote/500?lang=IS

Hér er hægt er að nálgast allar helstu upplýsingar um samninginn á upplýsingasíðu um samninginn.

Rafræna atkvæðagreiðslan stendur til kl. 09:00 mánudaginn 8. júlí. Afar mikilvægt er að félagsmenn Framsýnar kjósi um samninginn.

Fréttabréf stéttarfélaganna kom út í morgun fullt af efni og því verulega efnismikið. Fjallað er um starfsemi stéttarfélaganna og þá er viðtal við formann Framsýnar sem fagnar um þessar mundir 30 ára formennsku í Framsýn. Auk þess hefur hann verið forstöðumaður Skrifstofu stéttarfélaganna í þrjá áratugi. Blaðið er komið í allar helstu verslanir á Húsavík, eftir helgina verður það aðgengilegt í verslunum utan Húsavíkur og á Skrifstofu stéttarfélaganna.

Sameiginleg rafræn atkvæðagreiðsla félagsmanna aðildarfélaga Starfsgreinasambands Íslands sem starfa skv. kjarasamningi Landsvirkjunar og aðildarfélaga, þar á meðal Framsýnar, hófst kl 12:00 þann 28. júní og lýkur 4. júlí kl. 09:00. Afar mikilvægt er að félagsmenn Framsýnar sem starfa hjá Landsvirkjun kjósi um samninginn en þeir starfa við Laxárvirkjun, Þeistareykjavirkjun og  Kröflu.

Félagsmenn kjósa hér:

https://kjosa.vottun.is/home/vote/499?lang=IS

Eins og fram hefur komið hefur Starfsgreinasamband Íslands gengið frá kjarasamningi við ríkið fyrir aðildarfélög sambandsins, þar á meðal Framsýn stéttarfélag. Atkvæðagreiðsla um samninginn verður rafræn og hefst kl. 12:00 mánudaginn 1. júlí – rétt áður en opnað verður fyrir kosningu mun kosningaslóðin birtast á heimasíðu Framsýnar. Slóðin verður einnig aðgengileg á upplýsingasíðu á sgs.is. Atkvæðagreiðslu lýkur kl. 09:00 mánudaginn 8. júlí. Niðurstaðan ætti að liggja fyrir í síðasta lagi um hádegi sama dag.

Kynningarefni:

• Búið er að opna upplýsingasíðu á sgs.is og þangað verður efni bætt inn jafnóðum og það verður til, sjá hér: https://www.sgs.is/kjaramal/kjarasamningar/kjarasamningur-sgs-og-rikisins-2024-2028/
• Fyrir helgi verður kominn þangað inn:
  • Einblöðungur með helstu atriðum samnings (sem verður þýddur á ensku og pólsku)

Framsýn skorar á félagsmenn að taka þátt í atkvæðagreiðslu um samninginn en hún hefst kl. 12:00 mánudaginn 1. júlí

Starfsgreinasamband Íslands hefur undirritað kjarasamning við Fjármála- og efnahagsráðherra f.h. ríkissjóðs. Skrifað var undir í gær, þriðjudag. Kjarasamningurinn nær til aðildarfélaga sambandsins, þar á meðal Framsýnar stéttarfélags. Innan sambandsins eru 1.306 félagsmenn á kjörskrá, þar af eru 139 á kjörskrá hjá Framsýn. Félagsmennirnir starfa m.a. hjá HSN, Skógræktinni, Vegagerðini, þjóðgörðunum og í framhaldsskólunum í Þingeyjarsýslum. Núgildandi kjarasamningur aðila, framlengist frá 1. apríl 2024 til 31. mars 2028 með þeim breytingum og fyrirvörum sem felast í samkomulaginu og fellur þá úr gildi án frekari fyrirvara. Unnið er því að taka saman kynningarefni og frekari upplýsingar um samninginn. Félagsmönnum Framsýnar stendur til boða að greiða atkvæði með rafrænum hætti. Nánari upplýsingar hvað það varðar verða aðgengilegar á heimasíðunni um leið og þær liggja fyrir.

Rétt í þessu var að klárast rafræn atkvæðagreiðsla um kjarasamning Starfsmannafélags Húsavíkur og Sambands íslenskra sveitarfélaga. Innan Starfsmannafélags Húsavíkur voru 49 á kjörskrá. Þar af kusu 24 eða samtals 49% félagsmanna sem starfa eftir kjarasamningnum.

Niðurstöður:

Já = 23 eða samtals 95,83%

Nei = 1 eða samtals 4,17%

Tek ekki afstöðu = 0 eða samtals ,0%

Sjá myndrænar niðurstöður:

Starfsgreinasamband Íslands (SGS) telur einsýnt að ekki verði komist lengra í viðræðum við Samband íslenskra sveitarfélaga vegna endurnýjunar kjarasamnings sem rann út 31. mars 2024. Samningsaðilar hafa átt fjölmarga fundi á undanförnum vikum og mánuðum þar sem SGS hefur komið kröfum sínum málefnalega á framfæri við samninganefnd sveitarfélaganna, en því miður hafa þau fundahöld ekki skilað niðurstöðu sem SGS getur sætt sig við.

Starfsgreinasamband Íslands var og hefur verið leiðandi í mótun á launastefnu í yfirstandandi kjarasamningslotu og leggur sambandið mikla áherslu á að sú launastefna sem mótuð var við undirritun kjarasamninga á almennum vinnumarkaði 7. mars sl. haldi sér.

Í ljósi þess hversu langt er á milli aðila lítur SGS svo á að ekkert annað sé í stöðunni en að vísa deilunni til ríkissáttasemjara. SGS bindur vonir við að ríkissáttasemjari boði til fundar eins fljótt og auðið er, enda óásættanlegt að launafólk bíði mánuðum saman eftir sanngjörnum kjarabótum. Eins og staðan er í dag er allt í hnút. Framsýn á aðild að kjarasamningi SGS fh. félagsmanna sem starfa hjá Norðurþingi, Þingeyjarsveit og Tjörneshreppi.