Fulltrúar frá Framsýn voru á ferðinni í Kelduhverfi í dag. Að sjálfsögðu var komið við í Ásbyrgi þar sem rekin er myndarleg verslun og þjónusta við ferðamenn. Eins og víða í Þingeyjarsýslum vantar fólk til starfa. Fram kom hjá verslunarstjóranum í Ásbyrgi að þau væru að leita að starfsmönnum sem gætu byrjað um 6. september. Hafi menn áhuga eru viðkomandi aðilar beðnir um að hafa samband við Ísak verslunarstjóra í síma 54652260.
Þingeyjarskóli í Aðaldal er með um 100 nemendur á leik- og grunnskólaaldri, þar af rúmlega 30 leikskólanemendur á tveimur starfsstöðvum.
Við Þingeyjarskóla eru lausar stöður frá 1. ágúst 2023:
– Stuðningsfulltrúa við leikskóladeildina Barnaborg í 80-100% starf.
– Leikskólakennara/leikskólastarfsmanni við leikskóladeildina Barnaborg á Hafralæk í 100% starf.
– Leikskólakennara við leikskóladeildina Krílabæ á Laugum í 60-80% starf.
Möguleiki er á húsnæði á staðnum. Nánari upplýsingar veitir Jóhann Rúnar Pálsson skólastjóri í síma 4643580 /8990702 eða í gegnum netfangið johannrunar@thingeyjarskoli.is
Laus staða Matráðs í Reykjahlíðarskóla | Þingeyjarsveit (thingeyjarsveit.is)
Heimasíða stéttarfélaganna býður lesendum upp á skemmtilega getraun sem tengist Mærudögum. Vegleg verðlaun eru í boði s.s. ferðatöskur, jakkar/peysur og húfur með merki félaganna. Það eina sem þú þarft að gera er að finna út hvar þessi bekkur er staðsettur á Húsavík og mynda hann með símanum þínum og senda hana síðan á netfangið kuti@framsyn.is. Einnig er í boði að koma með myndina í símanum á Skrifstofu stéttarfélaganna á opnunartíma. Veitt verða verðlaun fyrir bestu myndina, frumlegustu myndina og fyrstu myndina sem berst í hús. Ekki er verra að þáttakendur séu sjálfir á myndinni með bekknum eða vinir eða vandamenn. Þessi stórmerkilegi bekkur stendur við malarveg, sem áður var fjölfarinn milli landshluta. Í dag stendur þekkt fjárbú á Húsavík við veginn sem er í dag afleggjari frá nýlegum vegi sem tengir Húsavík betur við Mývatnssveitina og skíðasvæðið í Reyðarárhnjúk. Skilafrestur er til kl: 17:00 á laugardaginn. Úrslitin verða tilkynnt á heimasíðunni strax í kjölfarið. Koma svo!
Hvar er þessi bekkur, vegleg verðlaun í boði????
Allt stefnir í glæsilega Mærudaga um helgina. Boðið verður upp á fullt, fullt af skemmtiatriðum. Sjá meðfylgjandi dagskrá:
Fyrr á árinu samdi Hvammur heimili aldraðra á Húsavík við Heilbrigðisráðuneytið um að Heilbrigðisstofnun Norðurlands (HSN) taki yfir rekstur hjúkrunar og dvalarrýma í Hvammi. Heilbrigðisstofnun Norðurlands og þar áður Heilbrigðisstofnun Þingeyinga hafa verið með samning um stjórnun og hjúkrunarþjónustu á heimilinu frá árinu 2011. Mikil samlegð hefur verið í þessum rekstri og fagleg þjónusta hefur verið stórbætt undafarin ár samfara aukningu í fjölda hjúkrunarrýma. Þessi breyting er eðlilegt framhald af þessu farsæla samstarfi.
Undanfarna mánuði hafa staðið yfir viðræður milli HSN og Framsýnar um flutning starfsmanna milli stofnana hvað kjör og önnur réttindi varðar. Í morgun var komið að því að undirrita samkomulag milli aðila sem tryggir starfsmönnum óbreytt kjör við yfirtöku HSN á rekstri hjúkrunar og dvalarrýma í Hvammi. Samkomulagið nær til um þrjátíu starfsmanna. Það voru þeir Jón Helgi Björnsson forstjóri HSN og Aðalsteinn Árni Baldursson formaður Framsýnar sem skrifuðu undir samkomulagið.
Byggðaráð Norðurþings fjallaði nýlega um ákvörðun Vinnumálastofnunar um að loka þjónustuskrifstofu stofnunarinnar á Húsavík í byrjun júlímánaðar. Framsýn hafði áður mótmælt ákvörðun Vinnumálastofnunar.
Niðurstaða Norðurþings: „Byggðarráð mótmælir þeirri ákvörðun Vinnumálastofnunar að loka þjónustuskrifstofu sinni á Húsavík sem hefur verið þar endurgjaldslaust í húsnæði stéttarfélagsins. Ráðið hvetur stofnunina til að endurskoða ákvörðun sína hið fyrsta.“
Eins og áður hefur komið fram er unnið að því að HSN taki endanlega yfir rekstur Hvamms. Við það flytjast starfsmenn Hvamms milli stofnana og munu framvegis taka kjör eftir kjarasamningi SGS/Framsýnar og fjármálaráðherra fh. ríkisjóðs. Fram að þessu hafa starfsmenn starfað eftir kjarasamningi sveitarfélaganna og SGS/Framsýnar. Framsýn hefur boðað til fundar með starfsmönnum Hvamms næstkomandi mánudag, 17. júlí kl. 16:00 í fundarsal stéttarfélaganna. Tilefni fundarins er að fara yfir réttindi og kjör starfsmanna við yfirfærsluna á HSN. Þess er vænst að starfsmenn fjölmenni á fundinn en Framsýn hefur átt í viðræðum við HSN undanfarna mánuði um yfirfærsluna ásamt trúnaðarmönnum starfsmanna með það að markmiði að tryggja stöðu starfsmanna við flutninginn milli kjarasamninga.
Kópavogsbær hefur innleitt nýtt flokkunarkerfi sem samanstendur af fjórum flokkum, lífrænn úrgangur, plast, pappi og almennur úrgangur. Uppi á bílaplaninu eru þrjár rennur og eru þær nú merktar plast, pappi og almennur úrgangur. Lífrænn úrgangur fer svo í tunnurnar í sorpgeymslu sem eru jarðhæðinni. Hurðin að geymslunni snýr að blokkinni við hliðina og er ólæst. Hurðin er hægra megin við akstursdyrnar inn í bílakjallarann. Þangað þurfa menn að fara með lífrænan úrgang. Pokar fyrir lífrænan úrgang eru í anddyrinu á 1. hæð og verður komið fyrir í íbúðum stéttarfélaganna. Þar verður einnig komið fyrir betri flokkunarílátum. Stéttarfélögin, Þingiðn og Framsýn, leggja mikið upp úr því að félagsmenn sem leigja íbúðir stéttarfélaganna gangi vel um og flokki allt rusl sem fellur til meðan þeir dvelja í íbúðum félaganna. Frekari upplýsingar eru í boði á Skrifstofu stéttarfélaganna.
Tunnum fyrir lífrænan úrgang hefur verið komið fyrir í sorpgeymslunni.
Hagstofan hefur tekið saman áhugaverðar upplýsingar um heildartekjur einstaklinga árið 2022 sem nálgast má á heimasíðu stofnunarinnar https://hagstofa.is/utgafur/frettasafn/laun-og-tekjur/tekjur-skattframtol-2022/
Heildartekjur einstaklinga á Íslandi voru tæpar 8,4 milljónir króna að meðaltali árið 2022, eða rétt tæpar 700 þúsund krónur á mánuði. Það er um 9% hækkun frá fyrra ári, sé horft til verðlagsleiðréttingar var raunhækkunin um 0,6%. Miðgildi heildartekna var um 6,6 milljónir króna á ári, sem sýnir að helmingur einstaklinga var með heildartekjur undir 554 þúsund krónum á mánuði. Hækkun miðgildis heildartekna var 10,7%, en með tilliti til raunhækkunar var hækkunin 2,2%. Miðgildi heildartekna var hæst í Garðabæ, eða tæpar 7,9 milljónir og rúmar 7,8 milljónir króna á Seltjarnanesi, tæpar 7,4 milljónir króna í Fjarðarbyggð, 7,3 milljónir í Kópavogi og í Reykjavík rúmlega 6,9 milljónir króna. Fjórtán sveitarfélög höfðu miðgildi heildartekna undir 6 milljónum króna og eitt var undir 5 milljónum króna. Norðurþing skorar nokkuð hátt á landsvísu, þar eru árstekjur einstaklinga/miðgildi tæplega 6,7 milljónir. Sé miðað við Norðurland eru heildartekjur einstaklinga á Norðurlandi þær hæstu meðal íbúa Norðurþings. Tvö önnur sveitarfélög eru á félagssvæði stéttarfélaganna á Húsavík, það er annars vegar Þingeyjarsveit þar sem miðgildið er um 5,9 milljónir og Tjörneshreppur þar sem miðgildið er um 5,1 milljón á ársgrundvelli.
Vinnumálastofnun hefur ákveðið að loka fyrir þjónustu við atvinnuleitendur á Húsavík. Vinnumálastofnun heyrir undir félagsmálaráðuneytið og fer m.a. með yfirstjórn vinnumiðlunar í landinu og daglega afgreiðslu Atvinnuleysistryggingasjóðs, Fæðingarorlofssjóðs, Ábyrgðarsjóðs launa auk fjölmargra annara vinnumarkaðstengdra verkefna. Í tilkynningu kemur fram að þjónustuskrifstofu stofnunarinnar verði lokað frá 3. júlí 2023. Atvinnuleitendum og atvinnurekendum er bent á að hafa samband við þjónustuskrifstofuna á Akureyri. Í október 2020 óskaði Framsýn eftir samstarfi við Vinnumálstofnun sem byggði á því að stéttarfélögin legðu til aðstöðu fyrir starfsmann stofnunarinnar á Skrifstofu stéttarfélaganna endurgjaldslaust og Vinnumálastofnun bæri ábyrgð á starfsmanninnum og greiddi honum laun sem stofnunin samþykkti. Frá þeim tíma hefur starfsmaðurinn verið við störf á Húsavík auk þess að gegna störfum á Akureyri með starfinu á Húsavík. Hér á árum áður hélt stofnunin úti þjónustu á Húsavík sem síðar lagðist af. Að frumkvæði Framsýnar opnaði Vinnumálastofnun aftur formlega skrifstofu á Húsavík í október 2020 eins og fram kemur í fréttinni sem nú hefur verið samþykkt að leggja af sem eru mikil vonbrigði. Stjórn Framsýnar hefur samþykkt að fela formanni félagsins að hafa samband við Vinnumálastofnun og gera alvarlegar athugasemdir við ákvörðunina um að leggja af þjónustu á Húsavík við atvinnuleitendur, fyrirtæki og stofnanir á svæðinu. Eðlilegra hefði verið að efla starfsemina í Þingeyjarsýslum og auka jafnframt vinnustaðaeftirlit með öðrum hagsmunaaðilum sem koma að þessum málum enda atvinnulífið í mikilli sókn á Norðausturhorninu.
Starfsfólk Norðursiglingar kom saman í gær til að fræðast um kjarasamninga, lög og reglur sem gilda á íslenskum vinnumarkaði, starfsemi stéttarfélaga og réttindi þeirra hjá Framsýn og lífeyrissjóðum. Fundurinn var haldinn af frumkvæði trúnaðarmanns starfsmanna, Alberto Delmalo. Mjög góð mæting var á fundinn og voru fundarmenn mjög ánægðir í fundarlok með upplýsingarnar sem þeir fengu á fundinum enda starfsmenn með mismunandi reynslu á íslenskum vinnumarkaði. Formaður Framsýnar, Aðalsteinn Árni, var á fundinum og svaraði fyrirspurnum fundarmanna.
Félagsmönnum í Þingiðn er velkomið að koma við á Skrifstofu stéttarfélaganna og þiggja félagspeysu að gjöf. Koma svo kæru félagar.
Í vikunni kemur út nýtt Fréttabréf stéttarfélaganna. Að venju er það fullt, fullt af fréttum úr starfsemi félaganna sem vakið hefur athygli víða um heim og rúmlega það. Þeir sem geta ekki beðið eftir bréfinu góða geta lesið það inn á heimasíðu stéttarfélaganna. Hér er slóðin:
https://framsyn.is/wp-content/uploads/2023/06/Frettabref_2.tbl_._juli_2023_vefur.pdf
Framsýn fékk þá Þorvald Inga Björnsson og Bjarna Þór Björgvinsson sem eru fagmenn góðir til að fara og laga nokkur atriði í bústað félagsins á Illugastöðum í Fnjóskadal. Settar voru upp nýjar gardínur, þakrennur og gengið frá nýjum húsgögnum í bústaðinn. Þorvaldur og Bjarni eru verkmenn góðir en þeir byrjuðu nýlega að starfa sjálfstætt sem smiðir. Að sjálfsögðu eru þeir félagsmenn í Þingiðn. Það er full ástæða til að mæla með þeim enda drengir góðir í alla staði. Á meðfylgjandi myndum má sjá ný húsgögn og gardínur. Bústaðurinn er óvenjulegur glæsilegur um þessar mundir enda félagsmenn duglegir að nota þennan glæsilega bústað.
After the successful meeting last year, we present our new Know your rights workshop!
On Tuesday 4th of July, at 8pm, in the Framsýn headquarters at Húsavík there will be a workshop about basic working rights on the whale watching industry for North Sailing workers (together with Húsavík Adventures and Slippurinn). All the workers are wellcomed!
We will learn how to understand contracts and payslips, we will go over general and specific collective agreements for the different positions, and we will talk about our current situation and share our ideas for future improvements.
Happy crew, happy boat! See you next Tuesday!
Þessar þrjár frábæru konur koma að Kaffi Kvíabekk í Skrúðgarðinum á Húsavík þar sem
boðið er upp á heimsins bestu vöfflur og kaffi á góðviðrisdögum.
Þetta eru þær, Valdís Birna Daníelsdóttir, Bryndís Edda
Benediktsdóttir og Anna María Bjarnadóttir. Skorað er á fólk að
líta við hjá þeim og njóta veitinga í fallegu umhverfi og í góðum
félagsskap.
Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Starfsmannafélagi Húsavíkur og Þingiðn. Þar starfa 6 starfsmenn í 5,4 stöðugildum. Að auki starfa 5 starfsmenn í hlutastörfum hjá Framsýn við að þjónusta orlofsíbúðir í Reykjavík, Kópavogi, Akureyri og í Öxarfirði. Starfshlutfall þeirra er um 30% að meðaltali. Þá er einn starfsmaður í 5% starfi á Raufarhöfn. Þess ber að geta að Linda M. Baldursdóttir hætti störfum hjá stéttarfélögunum í lok síðasta árs. Í hennar stað var Kristján Ingi Jónsson ráðinn. Hann var valinn úr hópi 21 umsækjenda um starfið. Þá var jafnframt ákveðið að ráða Agnieszku Szczodrowska í hlutastarf við almenn skrifstofustörf, þýðingar og vinnustaðaeftirlit frá og með 1. febrúar 2023. Agnieszka verður í 50% starfi. Hugmyndin með hennar ráðningu er ekki síst að bæta þjónustu við erlenda félagsmenn sem fjölgar ár frá ári á félagssvæðinu. Full ástæða er til að þakka Lindu fyrir vel unnin störf í þágu stéttarfélaganna, Linda var góður liðsmaður. Skrifstofan tók að sér að halda utan um Félagsmannasjóð fyrir starfsmenn sveitarfélaga sem starfa eftir kjarasamningi Starfsgreinasambands Íslands og Sambands íslenskra sveitarfélaga sem Framsýn á aðild að fyrir sína félagsmenn sem starfa hjá sveitarfélögunum Norðurþing, Þingeyjarsveit og Tjörneshreppi. Sjóðurinn var áður í vörslu SGS en vegna óánægju aðildarfélaga sambandsins með rekstur sjóðsins var ákveðið að stéttarfélög starfsmanna tækju yfir starfsemi sjóðsins. Framsýn tók yfir sjóðinn fyrir sína félagsmenn 1. október 2022. Félagsmannasjóður varð til við undirritun kjarasamninga 16. janúar 2020. Sveitarfélög greiða 1,5% í sjóðinn til viðbótar launum starfsmanna á ársgrundvelli. Greitt er úr sjóðnum einu sinni á ári, það er 1. febrúar ár hvert. Félagið heldur úti öflugri heimasíðu og Fréttabréfi sem tengir hinn almenna félagsmann við stjórn félagsins, starfsmenn og félagið í heild sinni. Full ástæða er til að hvetja félagsmenn til að fylgjast með starfi félagsins inn á heimasíðu stéttarfélaganna sem reglulega er uppfærð með fréttum og tilkynningum til félagsmanna auk þess sem hægt er að nálgast þar aðrar þarfar upplýsingar inn á vefnum er snerta s.s. kjaramál. Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla. Ekki eru fyrirsjáanlegar breytingar á rekstri skrifstofunnar. Góð nýting er á félagsaðstöðunni enda mikil starfsemi í gangi á vegum stéttarfélaganna.
Hér með er lokið umfjöllun um aðalfund Framsýnar sem fram fór í maí 2023.
Rekstur Hrunabúðar sf. hefur gengið mjög vel. Um þessar mundir eru öll skrifstofurými í notkun og rúmlega það þar sem fundarsalurinn er einnig í fastri útleigu. Hrunabúð sf. er félag í eigu Framsýnar og Þingiðnar. Eignarhluturinn á efri hæðinni skiptist þannig: Framsýn á 84% og Þingiðn 16%. Félagið var stofnað á árinu 2017 utan um sameiginlegt eignarhald og rekstur á efri hæð Garðarsbrautar 26 sem snýr að Árgötunni þar sem félögin töldu mikilvægt að eignast hæðina enda húsnæðið komið í töluverða niðurníðslu. Árið 2021 fjárfesti Hrunabúð síðan í íbúð á efri hæð Garðarsbrautar 26. Íbúðin sem um ræðir er alls 232,2 fm. Búið er að innrétta um 180 fm. af íbúðinni. Hafin er vinna við að innrétta þann hluta sem er ófrágenginn. Íbúðin er í útleigu um þessar mundir.
Framsýn stéttarfélag hefur komið að mörgum málum frá síðasta aðalfundi. Ástæða er til að gera aðeins grein fyrir nokkrum þeirra.
Framsýn sendi frá sér 5 ályktanir og yfirlýsingar milli aðalfunda sem eru meðfylgjandi skýrslunni.
Þann 2. mars 2023 stóð Framsýn fyrir opnum fundi stjórnar og trúnaðarráðs um lífeyrismál í samstarfi við Lsj. Stapa.
Framsýn stóð fyrir opnum starfslokanámskeiðum með Þekkingarsetri Þingeyinga á Húsavík og í Breiðumýri í Þingeyjarsveit.
Framsýn hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn.
Þó nokkuð er um að forsvarsmenn félagsins séu beðnir um að flytja erindi á fundum og ráðstefnum auk þess að taka þátt í umræðuþáttum um velferðar og verkalýðsmál enda greinilegt að starf félagsins nýtur mikillar virðingar í samfélaginu.
Framsýn hefur komið að því að styðja við bakið á ungmenna- og íþróttafélögum á svæðinu. Þá hefur félagið einnig komið að því að niðurgreiða leikhúsmiða fyrir félagsmenn á sýningar hjá Leikfélagi Húsavíkur og Leikdeild Eflingar.
Töluverð ásókn er í félagið frá starfsfólki sem starfar ekki á félagssvæði Framsýnar. Stundum er hægt að verða við óskum viðkomandi aðila en almenna reglan er sú að menn greiði í þau félög sem eru starfandi á því svæði sem viðkomandi starfar á enda séu menn að vinna eftir kjarasamningum sem gilda fyrir félagsmenn Framsýnar.
Framsýn hefur í gegnum tíðina lagt mikið upp úr góðu samstarfi við stjórnmálamenn sem gefið hafa kost á sér til starfa á Alþingi eða í sveitarstjórnir á félagssvæðinu. Alþingismenn, ráðherrar og sveitarstjórnarmenn hafa átt það til að líta við á Skrifstofu stéttarfélaganna til að taka stöðuna um málefni líðandi stundar.
Landsfundur VG fór fram í mars 2023 á Akureyri. Formaður Framsýnar var fenginn til að flytja ræðu um stöðu verkalýðshreyfingarinnar á fundinum. Í ræðu sinni ræddi hann m.a. átökin innan hreyfingarinnar, sem ekki sér fyrir endann á og tók þar helst til framgöngu Eflingar í tengslum við nýyfirstaðna kjarasamningagerð. Hvatti hann jafnframt VG til að standa vörð um verkalýðshreyfinguna og beita sér fyrir því að fyrirhugað frumvarp Sjálfstæðismanna um félagafrelsi á vinnumarkaði nái ekki fram að ganga. Ræða formanns fékk afar góð viðbrögð fundargesta og í fjölmiðlum.