Aðalfundur Fiskifélags Íslands var haldinn síðasta föstudag. Í ljósi aðstæðna í þjóðfélaginu var fundurinn rafrænn. Aðilar að Fiskifélaginu eru hagsmunaaðilar í sjávarútvegi, það er sjómanna, landverkafólks, útgerðar og fiskvinnslu. Það eru alls sex heildarsamtök innan FÍ. Seturétt á fundinum höfðu 39 fulltrúar. Fundurinn fór vel fram og umræður málefnalegar. Í lok fundar var gengið frá kjöri á nýrri stjórn. Meðal stjórnarmanna er formaður Framsýnar, Aðalsteinn Árni Baldursson. Hann er tilnefndur af Starfsgreinasambandi Íslands ásamt einum öðrum en sambandið á rétt á tveimur fulltrúum í stjórn FÍ. Aðalsteinn Árni hefur verið fundarstjóri á þessum aðalfundum síðustu ár sem yfirleit hafa verið haldnir á Grand Hótel Reykjavík. Eins og fram kemur í fréttinni var fundurinn í ár rafrænn og var formaður Framsýnar beðinn um að stjórna aðalfundinum frá Húsavík í gegnum tölvu sem gekk afar vel. Ljóst er að tæknin hefur komið að góðum notum á tímum heimsfaraldurs.
Halldór Grönvold, aðstoðarframkvæmdastjóri ASÍ, lést á Landspítalanum þann 18. nóvember sl. eftir stutt veikindi. Hann var 66 ára gamall. Halldór helgaði verkalýðshreyfingunni starfsævi sína eftir að hann lauk námi í vinnumarkaðsfræðum við University of Warwick á Englandi. Fyrst starfaði hann hjá Iðju, félagi verksmiðjufólks í Reykjavík, en frá árinu 1993 á skrifstofu Alþýðusambandsins. Þangað var hann ráðinn sem skrifstofustjóri en frá árinu 2001 var Halldór aðstoðarframkvæmdastjóri ASÍ auk þess að leiða deild félags- og vinnumarkaðsmála hjá sambandinu.
Halldór vann alla tíð ötullega að réttindum launafólks. Hann sat í stjórn Vinnumálastofnunar frá 1996 og beitti sér mjög í fræðslumálum innan verkalýðshreyfingarinnar og þá einkum starfsmenntamálum. Hann tók þátt í samningum á Evrópuvísu um fjölskylduvænni vinnustaði og breytingu á vinnutímatilskipuninni ásamt fæðingar- og foreldraorlofi. Hann barðist fyrir breytingum á fæðingarorlofslöggjöfinni sem náðust árið 2000, þar á meðal rétti feðra til töku fæðingarorlofs. Á síðustu árum hefur Halldór sérstaklega beitt sér fyrir aðgerðum til að uppræta brotastarfsemi á vinnumarkaði.
Það má fullyrða að fáir hafi haft eins mikil áhrif á mótun íslenska vinnumarkaðsmódelsins og Halldór Grönvold. Hann var einlægur verkalýðssinni og jafnaðarmaður, traustur og góður félagi með yfirburða þekkingu á vinnumarkaðsmálum. Óhætt er að segja að stórt skarð sé höggvið í raðir starfsmanna ASÍ, bæði sem hreyfingar og vinnustaðar, við fráfall Halldórs.
Eftirlifandi eiginkona Halldórs Grönvold er Greta Baldursdóttir fyrrverandi hæstaréttardómari. Þau eignuðust tvö börn, Evu og Arnar, og eru barnabörn þeirra nú þrjú.
Stjórn og starfsfólk Framsýnar stéttarfélags vottar þeim sína innilegustu samúð.
Halldór er hér með samstarfsfólki sínu hjá Alþýðusambandi Íslands og formanni Framsýnar í kynnisferð sem ASÍ skipulagði til Palestínu á síðasta ári. Í gegnum tíðina hefur stjórn og starfsfólk Framsýnar átt afar gott samstarf við Halldór Grönvold. Blessuð sé minning hans.
PCC Bakki mun ráða til sín fleiri starfsmenn að nýju upp úr áramótunum, gangi áætlanir eftir, en vonir standa til að verksmiðjan verði ræst á nýjan leik að vori.
PCC greip til tímabundinnar stöðvunar á ofnum verksmiðjunnar í ágúst sl. til að gera nauðsynlegar endurbætur á reykhreinsivirki hennar. Vegna erfiðra heimsmarkaðsaðstæðna sem sköpuðust í kjölfar COVID-19 heimsfaraldursins var ákveðið að endurræsa verksmiðjuna ekki að svo stöddu.
Í kjölfarið þurfti óhjákvæmilega að grípa til hópuppsagna, en enn starfa þó ríflega 50 manns hjá fyrirtækinu sem vinna markvisst að frekari endurbótum á búnaði og undirbúningi endurræsingar.
Undanfarna mánuði hafa markaðir aðeins rétt úr kútnum, þó ekki svo að verð geti enn talist viðunandi. Vonir standa þó til að með vorinu munum við bæði sjá fram á lægri framleiðslukostnað sem og betri markaðsaðstæður og miðast nú vinnan á Bakka við að endurræsing verksmiðjunnar hefjist næsta vor.
Gangi þessar áætlanir eftir er ljóst að upp úr áramótum mun ráðningaferli starfsmanna hefjast. Jafnframt eru nú í gangi viðræður við birgja verksmiðjunnar varðandi endurræsinguna, það er ljóst að til að verksmiðjan geti talist samkeppnishæf á heimsmarkaði þá er gott samstarf við birgja lykilatriði segir í tilkynningu frá fyrirtækinu í dag.
Forstjóri PCC hefur þegar gert formanni Framsýnar grein fyrir áformum fyrirtækisins sem eru mikil gleðitíðindi fyrir atvinnulífið á svæðinu en um þessar mundir eru tæplega 200 manns án atvinnu í Þingeyjarsýslum.
Vestfirðingar hafa í áranna rás treyst mjög á flugsamgöngur. Ástæðurnar eru fyrst og fremst hinar krefjandi náttúrufarslegu aðstæður í faðmi fjalla blárra. Þar getur náttúran verið hörð í horn að taka. Oft eru veður erfið og stríð, samgöngur stopular að vetrarlagi, vegalengdir miklar, strjálbýli og talsverð einangrun.
Eins og við þekkjum hafa Vestfirðingar verið afar heppnir með þjónustuaðila í hálfa öld. Sama flugfélag hefur þjónað kjálkanum og ferjað fólk og frakt á milli staða og raunar um landið allt, sinnt sjúkraflugi og bráðaþjónustu innanlands og utan.
Þess vegna er ekki að undra að búum, sveitastjórnarfólki og fulltrúum fyrirtækja hafi brugðið í brún á dögunum þegar kvisaðist út að búið væri að bjóða út flugþjónustu við íbúa á sunnanverðum Vestfjörðum og að Gjögri og nýr aðili myndi mæta til leiks innan fárra daga.
Vegagerðin annast útboð fyrir hönd ríkisins á styrktu flugi á nokkra staði landsins. Viðbrögð stofnunarinnar voru einfaldlega á þá leið að svona væri lífið; lægsta boð skyldi gilda, ekki væri svigrúm í skilgreindum útboðsskilmálum til þess að taka tillit til annarra þátta.
Þrír flugrekstraraðilar buðu í tilgreindar flugleiðir. Þegar upp var staðið komust Ríkiskaup, sem annaðist úrvinnslu tilboða, að þeirri niðurstöðu að enginn bjóðendanna uppfyllti í raun skilyrði útboðsins, ýmist af fjárhagslegum ástæðum eða að búnaður reyndist ekki í samræmi við þær kröfur sem settar voru í útboðinu.
Á því stigi hefði verið eðlilegast að staldra við, endurskoða forsendur, meta að nýju útboðskröfur og bjóða út að nýju. Vegagerðin taldi hins vegar að tímaramminn væri orðinn mjög naumur, samevrópskar skyldur væru á þann veg að ekki væri hægt að veita þjónustuna lengur á skammtíma undanþágum.
Vegagerðin kallaði til sín verkefnið sem var í höndum Ríkiskaupa. Byrjað var að hnoðast með forsendur og skilyrði sem endaði með því að kærunefnd útboðsmála sagði: Nei, svona gerum við ekki og lýsti því yfir í skriflegu áliti sínu að Vegagerðin hefði brotið lög í vali sínu á lægstbjóðanda, átelur vinnubrögð og staðhæfir að mistök hafi verið gerð.
Nokkuð virðist misvísandi hversu miklu munar á niðurstöðum tilboða, allt frá 20 milljónum á ári að 185 milljónum, allt eftir hver segir frá og hvaða forsendur eru lagðar til grundvallar. Þessar upplýsingar þurfa að liggja fyrir með óyggjandi hætti.
Íbúarnir vita ekkert hvaðan á þá stendur veðrið. Ekkert annað en að þeir sjá nú að öllu óbreyttu á bak þrautreyndum þjónustuaðila sem gjörþekkir aðstæður og býr yfir flugflota sem er raunar sérbúinn og valinn fyrir vestfirskar aðstæður.
Það er ekkert skrýtið að kurr sé á meðal almennings á sunnanverðum Vestfjörðum. Íbúar telja þjónustuna í uppnámi, atvinnulífið er uggandi vegna þeirrar mikilvægu þjónustu sem veitt hefur verið varðandi aðföng, t.d. með varahluti og frakt. Sannfæring íbúanna um öryggi, samfellu og staðkunnáttu er ekki fyrir hendi með þeirri kúvendingu sem fyrirhuguð er.
Krafist er samráðs og upplýsingamiðlunar um þessa mikilvæga þjónustu sem veitt hefur verið í mikilli sátt, af þekkingu og fagmennsku í ríflega 50 ár.
Sú spurning er áleitin hvort ríkisstjórnin og ráðherra samgöngu- og byggðamála muni una vinnubrögðum sem komið hafa í ljós í þessu máli, hvort ráðherra muni skrifa upp á þvílíkt fúsk í opinberu útboði sem hér hefur vitnast.
Samkvæmt kjarasamningum við sveitarfélögin er gert ráð fyrir því að starfsmenn sem nái 70 ára aldri láti af störfum án sérstakrar uppsagnar. Gildissvið þeirra ákvæða hefur nú verið þrengt með dómi Félagsdóms í málinu nr. 5/2020 frá 17.11 2020.
Verkalýðshreyfingin hefur byggt á því, að sé ákvæði kjarasamningsins ekki nýtt og haldi starfsmaður áfram störfum eftir það, sé réttarstaða hans hin sama og annarra starfsmanna þ.e. ráðningunni verði að ljúka með hefðbundinni uppsögn. Þetta hefur Félagsdómur nú staðfest í máli Verkalýðsfélags Vestfirðinga gegn Reykhólahreppi.
Gild rök má einnig færa fyrir því hvort ekki sé löngu tímabært að afnema þessi aldursákvæði kjarasamninga og þar sem þau er að finna í lögum enda mismunun á grundvelli aldurs bönnuð nema ríkar málefnalegar ástæður réttlæti annað. Þetta er nú tekið fram í lögum nr. 86/2018 en bann ákvæði laganna hvað aldur varðar tóku gildi 1.7 2019. Þó Félagsdómur vísi ekki sérstaklega til þessara laga eða reglna um bann við mismunun er hann gott innlegg í þá umræðu.
Stjórn Framsýnar samþykkti samhljóða í morgun að senda frá sér svohljóðandi ályktun er varðar vinnubrögð Vegagerðarinnar/Ríkiskaupa og viðkemur útboði á flugi til Gjögurs og Bildudals. Flugfélagið Ernir hefur um árabil séð um áætlunarflug á þessa staði samkvæmt útboði. Ekki er ólíklegt að áætlunarflug til Húsavíkur sé í hættu vegna þessa, nú þegar liggur fyrir að Ernir mun ekki halda ríkisstyrktu leiðunum til Gjögurs og Bíldudals.
Ályktun:
„Framsýn stéttarfélag deilir áhyggjum sínum með sveitarstjórnarmönnum og Samtökum atvinnurekenda á sunnanverðum Vestfjörðum (SASV) vegna flugmála. Samtökin hafa sent frá sér yfirlýsingu vegna samnings Vegagerðarinnar við Norlandair um áætlunarflug til Bíldudals og Gjögurs, sem þýðir að Flugfélagið Ernir hættir flugi á þessa staði á Vestfjörðum.
Flugfélagið Ernir hefur þjónað Vestfirðingum í 50 ár við afar krefjandi aðstæður og nýlegar fréttir um að nú eigi félagið skyndilega að hverfa af vettvangi eftir umdeilt útboð er reiðarslag fyrir svæðið, segir í yfirlýsingu SASV.
Samkvæmt fréttum liggur fyrir að Vegagerðin hefur viðurkennt að Ríkiskaup hafi gert mistök við mat tilboða. Eins hefur komið fram hjá kærunefnd útboðsmála að Vegagerð/Ríkiskaup hafa brotið lög um opinber útboð við val á tilboði Norlandair, sbr. ákvörðun kærunefndarinnar frá 30. október sl.
Vinnubrögð sem þessi kalla á sérstaka skoðun á meðferð málsins í stjórnkerfinu og að hlutaðeigandi aðilar verði dregnir til ábyrgðar. Menn eiga ekki að komast upp með svona stjórnsýslu í umboði stjórnvalda.
Framsýn stéttarfélag hefur átt afar gott samstarf við Flugfélagið Ernir um að byggja upp flugleiðina Húsavík-Reykjavík. Með samningum við flugfélagið hefur tekist að bæta búsetuskilyrði í Þingeyjarsýslum auk þess sem flugsamgöngur hafa eflt ferðaþjónustuna og atvinnulífið í heild sinni á svæðinu.
Vissulega hriktir í stoðum Flugfélagins Ernis, sem nú missir ákveðnar ríkisstyrktar flugleiðir. Samningur Vegagerðarinnar/Ríkiskaupa við Erni hefur án efa leitt til þess að flugfélagið hefur náð að byggja sig upp á undanförnum árum með því að bæta flugvélakost og fjölga áfangastöðum, eins og til Húsavíkur.
Verði þessari ákvörðun ekki hnekkt gæti það leitt til þess að dregið verði úr flugi til Húsavíkur eða það leggist jafnvel af, með ófyrirséðum afleiðingum fyrir íbúa í Þingeyjarsýslum.
Það er eitthvað sem má ekki gerast, Framsýn stéttarfélag mun berjast fyrir því að svo verði ekki og krefst þess að útboðið verði endurskoðað.“
Fyrir helgina setti Alþýðusamband Íslands í loftið sérstaka upplýsingasíðu fyrir þá sem misst hafa vinnuna, glíma við erfiðleika og vilja bæta stöðu sína á vinnumarkaði. Sérstök áhersla er lögð á að ná til útlendinga á íslenskum vinnumarkaði þar sem skortur hefur verið á greinargóðum upplýsingum fyrir þann hóp. Hér er hlekkur á vefsíðuna: https://www.asi.is/atvinnulaus/
Vefráðstefna Vinnueftirlitsins „Meira vinnur vit en strit“ verður haldin 19. nóvember næstkomandi. Ráðstefnan er liður í tveggja ára samstarfsverkefni Vinnueftirlitsins, félagsmálaráðuneytisins, samtaka aðila vinnumarkaðarins og VIRK sem ber yfirskriftina „Vinnuvernd er allra hagur. Hæfilegt álag – heilbrigt stoðkerfi 2020-2022, “ en verkefnið er keyrt samhliða samnefndu vinnuverndarátaki Vinnuverndarstofnunar Evrópu (EU-OSHA).
Áherslan kemur til af því að stoðkerfisvandi er algengasta orsök fjarvista frá vinnu í Evrópu og ein algengasta orsök örorku.
Markmið ráðstefnunnar er að varpa ljósi á þann víðtæka stoðkerfisvanda sem vinnandi fólk glímir við og benda á lausnir.
Ásmundur Einar Daðason, félags- og barnamálaráðherra, ávarpar ráðstefnuna.
Lykilfyrirlesari er Andreas Holtermann, hjá Dönsku rannsóknarstofnuninni í vinnuvernd en erindi hans ber yfirskriftina „From non-harmful work to healthy work – what would it take?
Flugfélagið Ernir gerir athugasemdir við fréttilkynningar Vegagerðarinnar og Norlandair frá í gær.
Flugfélagið Ernir ehf. telur að Norlandair hafi með yfirlýsingu í gær (12/11‘ 20) staðfest að tilboð þess síðarnefnda í flugleiðina Bíldudal/Gjögur hafi verið ógilt og að fullyrðingar Vegagerðarinnar um hið gagnstæða standist ekki. Þar með er ljóst að mótmæli Vestfirðinga vegna „stökks niðrávið í þjónustu“ eiga við rök að styðjast. Flugfélagið Ernir ehf. hefur kært niðurstöðu útboðsins til Kærunefndar útboðsmála sem birti m.a. þetta í greinagerð með ákvörðunarorðum sínum, en þar segir orðrétt:“Eins og mál þetta liggur fyrir nú verður því að miða við að varnaraðili hafi brotið gegn lögum um opinber innkaup við val á tilboði Nordlandair ehf. ”
Beechcraft King Air vél sú sem Norlandair hyggst aðallega nýta í flugið er skráð hjá Samgöngustofu sem 7 sæta en ekki 9 sæta, eins og fullyrt er í tilboði. Ljóst er að þessi flugvél uppfyllir ekki skilyrði útboðsins um 600 kg. flutningsgetu fyrir frakt auk farþega og farangurs. Þessi skilyrði voru meðal annars sett vegna slæms ástands vega á Vestfjörðum og í Árneshreppi sem oft kallar á mikla flutninga.
Flugvélar Norlandair eru ekki sambærilegar við þær rúmgóðu vélar sem Flugfélagið Ernir hefur notað til þjónustunnar undanfarin ár þótt slíkt sé fullyrt af Vegagerðinni og Norlandair. Þær eru eins og Samtök atvinnurkenda á sunnanverðu Vestfjörðum hafa bent á „gamlar og litlar“ og geta vart sinnt þörfum íbúa og fyrirtækja á svæðinu. Þrjár 45-50 ára Twin Otter vélar Norlandair eru hægfara og án jafnþrýstibúnaðar til þess að fljúga yfir veður. Kjarni málsins er sá að á tíma útboðsins var Norlandair að bjóða afturför um áratugi í flugþjónustu á Vestfjörðum eins og Vestfirðingar óttast réttilega. Fyrir íbúa á Vestfjörðum er lítið hald í því að fyrirtækið geri nú tilraun til þess að gera ógilt tilboð gilt með því að láta í veðri vaka að „til standi að nota stærri vél þegar og ef þörf krefur“.
Næstkomandi mánudag, 16. nóvember 2020, lýkur þjónustu Flugfélagsins Ernis ehf. á flugleiðinni á milli Reykjavíkur og Gjögurs og milli Reykjavíkur og Bíldudals samkvæmt ákvörðun Vegagerðarinnar. Það ríkir sorg og eftirsjá í félaginu við þessi þáttaskil, sem eru tilkomin vegna ógildrar stjórnsýslu, en um leið er Vestfirðingum þakkað fyrir samstarfið og óskað alls hins besta með vonum um að úr rætist.
Starfsgreinasambandið hefur unnið að því undanfarið að þýða helstu kjarasamninga sambandsins yfir á ensku og pólsku sem er mikið gleðiefni. Sjá meðfylgjandi slóðir varðandi aðalkjarasamning SGS og SA sem Framsýn á aðild að. Fljótlega verður einnig búið að þýða ferðaþjónustusamninginn yfir á ensku og pólsku en þessir tveir kjarasamningar eru mest notaðir af félagsmönnum Framsýnar.
Samtök atvinnurekenda á sunnanverðum Vestfjörðum (SASV) hafa sent frá sér yfirlýsingu vegna samnings Vegagerðarinnar við Norlandair um áætlunarflug til Bíldudals og Gjögurs, sem ýtti Flugfélaginu Erni út úr þjónustunni eins og greint hefur verið frá á vef Bæjarins besta.
Samtökin lýsa yfir þungum áhyggjum og segja að breytingin sé reiðarslag fyrir svæðið. Það verði stökk niður á við í þjónustu og getur stjórn SAVS ekki samþykkt svona vinnubrögð og mótmælir þeim harðlega.
Ályktunin í heild:
„Samtök atvinnurekenda á sunnanverðum Vestfjörðum (SASV) lýsa yfir þungum áhyggjum vegna skyndilegra frétta af innanlandsflugi til og frá Bíldudal. Fréttirnar bárust að morgni 10. nóvember um að nýtt félag á að hefja flug á Bíldudal 16. nóvember nk.
Flugfélagið Ernir hefur þjónað Vestfirðingum í 50 ár við afar krefjandi aðstæður og nýlegar fréttir um að nú eigi félagið skyndilega að hverfa af vettvangi eftir umdeilt útboð er reiðarslag fyrir svæðið. Ernir hafa veitt afbragðs þjónustu og eru með flugvélar sem henta þessari þjónustu afar vel. Í staðinn á að bjóða helmingi minni flugvél sem búin er jafnþrýstibúnaði og 50 ára gamall Twin Otter án jafnþrýstibúnaðs. Í samanburði er þetta stökk niður á við í þjónustustigi og með ólíkindum að í útboði þar sem munar svo litlu sem raun ber vitni skuli þjónustustig og gæði flugflotans ekki hafa meira að segja. Í útboðum í vegagerð er lægsta tilboði ekki alltaf tekið eins og raun ber vitni í nýlegu útboði Vegagerðarinnar.
SASV bendir á að fraktflug s.s með varahluti fram og til baka, sýni frá fyrirtækjunum, framleiðsluafurðir og ýmislegt annað sem mikilvægt er að komist á milli staða með litlum fyrirvara er risavaxið atriði fyrir atvinnulífið á sunnanverðum Vestfjörðum. Með þeim flugflota sem boðið verður upp á er ekki mögulegt að sinna þessari mikilvægu þjónustu sem atvinnulífið getur ekki verið án.
Ekki sér fyrir endann á óboðlegri þjónustu á sunnanverðum Vestfjörðum. Vegir á svæðinu og inn á það eru meira og minna ónýtir. Vetrarþjónusta hefur verið í lamasessi miðað við þá umferð og þá sérstaklega verðmæta þungaumferð sem er um svæðið. Nýlega tókst að koma í veg fyrir að nýjum snjóblásara væri skipt út fyrir gamlan snjóblásara til að þjónusta svæðið. Ferjan yfir Breiðafjörð er eldgömul og getur stoppað hvenær sem er með tilheyrandi áhættu. Nú eiga sunnanverðir Vestfirðir að sætta sig við minni og eldgamlar flugvélar í stað þeirra sem nú þjónusta svæðið.
Á sama tíma og mikill uppgangur hefur verið í atvinnulífinu á svæðinu undanfarin ár og útflutningstekjur margfaldast og eru orðnar þær hæstu per íbúa á landinu, getur stjórn SASV ekki samþykkt svona vinnubrögð og mótmælir þessari ráðstöfun harðlega.“
(Þessi frétt er tekin af þeim ágæta vef bb.is, mynd Framsýn)
Verulegur tími fer í það um þessar mundir hjá starfsmönnum stéttarfélaganna að funda með forsvarsmönnum og starfsmönnum stofnana á vegum ríkis og sveitarfélaga hvað varðar vinnutímabreytingar og endurnýjun á stofnanasamningum. Þannig er að vinnutímabreytingar koma til framkvæmda um næstu áramót hjá starfsmönnum sveitarfélaga og hjá stofnunum ríkisins. Þó ekki hjá vaktavinnufólki, þar taka breytingarnar gildi 1. maí 2001.Vegna breytinga á launatöflu ríkisins þarf að taka upp alla stofnanasamninga sem gilda fyrir félagsmenn Framsýnar. Sem dæmi má nefna að fulltrúar Framsýnar funduðu í gær með skólastjórnendum Framhaldsskólans á Laugum um þetta málefni og munu viðræður aðila halda áfram eftir helgina. Þá töku fulltrúar Framsýnar þátt í fundi Starfsgreinasambands Íslands með Vegagerðinni um sama málefni í gær auk þess að eiga fund með sveitarstjóra Norðurþings um hugmyndir sveitarfélagsins sem eru til skoðunar og tengjast vinnutímabreytingum. Þessi vinna heldur áfram eftir helgina með fundi með starfsmönnum Öxarfjarðarskóla.
Framsýn stéttarfélag tekur heilshugar undir með þeim aðilum sem ályktað hafa um kröfur Öryrkjabandalags Íslands um að endurhæfingar- og örorkulífeyrir verði hækkaður svo að hann fylgi kjarasamningsbundnum taxtahækkunum. Ekki er hægt að samþykkja að stórum hópi fólks sem býr við skerta starfgetu sé haldið í fátækt. Slíkt er ekki sæmandi á landi sem kennir sig við velferð og jöfnuð. Einnig er mikilvægt að samstundis verði dregið úr skerðingum í örorkulífeyriskerfinu svo að fólk með skerta starfsgetu eigi möguleika á því að vera á vinnumarkaði og bæta kjör sín með launaðri vinnu.
Allt fólk á rétt á að lifa frjálst undan efnislegum skorti. Fólk með örorku, fjölskyldur þeirra og börn hafa þurft að bíða allt of lengi eftir réttlæti. Að mati Framsýnar ber stjórnvöldum að axla ábyrgð og mæta kröfum ÖBÍ af sanngirni.
Félagsmönnum Framsýnar stendur til boða að fara frítt á námskeið á vegum Dale Carnegie „Dale á milli starfa – LIVE ONLINE.“
Um er að ræða sérsniðið Dale Carnegie námskeið fyrir þá sem eru á milli starfa eða í leit að nýjum atvinnutækifærum. Settu eldmóð í atvinnuleitina, virkjaðu styrkleikana þína og stækkaðu tengslanetið.
Tveir alþjóðlega vottaðir Dale Carnegie þjálfarar leiða þetta 6 skipta námskeið sem er einu sinni í viku í tvo og hálfan tíma í senn. Webex þjálfunarumhverfið býður upp á þátttöku í rauntíma þar sem verkefnavinna, coaching og umræður fara fram á líflegan máta. Sérstakur tæknilegur aðstoðarmaður sér um að lágmarka tæknitruflanir og að enginn lendi í vandræðum með tengingar.
Þátttakendur skrá sig á síðu Dale Carnegie og setja í skilaboð hvaða fræðslusjóði þeir tilheyra. Reikningur er sendur beint á skrifstofu fræðslusjóðanna.
Félagsmenn aðildarfélaga Landsmenntar, Sjómenntar, Ríkismenntar og Sveitamenntar fá námskeiðið að fullu niðurgreitt.
Samtök sjómanna og Samtök fyrirtækja í sjávarútvegi (SFS) hafa í samráði við embætti landlæknis gefið út endurbættar leiðbeiningar um smitgát og viðbrögð vakni grunur er um smit um borð í fiskiskipum. Leiðbeiningarnar eru sambærilegar þeim sem gefnar voru út eftir að Covid kom upp fyrr á þessu ári. Leiðbeiningarnar hafa nú verið uppfærðar og yfirfarnar að landlæknisembættinu. Þeim hefur nú verið komið á framfæri við útgerðir innan SFS.
Starfsmenntasjóðirnir Landsmennt, Ríkismennt, Sveitamennt og Sjómennt hafa gert tilraunasamning við NTV skólann um starfsmiðað fjarnám fyrir félagsmenn sína á landsbyggðinni, þar á meðal félagsmenn Framsýnar.
Eftir áralanga baráttu BSRB fyrir styttingu vinnuvikunnar er loksins komið að því vinnutími félagsmanna fari að styttast. Samtal um hvernig eigi að stytta eru farin í gang á fjölmörgum vinnustöðum og á nokkrum vinnustöðum er vinnunni lokið og búið að ákveða útfærsluna.
Styttingin á að taka gildi í síðasta lagi 1. janúar 2021 hjá þeim sem vinna dagvinnu og þar á starfsfólk að taka virkan þátt í því að ákveða útfærsluna. Á vaktavinnustöðum styttist vinnuvikan frá 1. maí 2021 og verður útfærslan miðlæg enda getur hún kallað á ýmsar breytingar, til dæmis á vaktakerfi og mönnun.
Á vinnustöðum þar sem unnið er í dagvinnu er mikilvægt að standa vel að samtali starfsfólks og stjórnenda þar sem farið er yfir starfsemina og hún í raun endurskipulögð. Markmiðið er að ná gagnkvæmum ávinningi fyrir starfsfólk og vinnustaðinn þannig að þjónusta og afköst verði óbreytt á sama tíma og heilsa og líðan starfsfólks batnar.
Starfsemin á vinnustöðum ríkis og sveitarfélaga er mjög fjölbreytt og því munu ólíkar leiðir henta mismunandi vinnustöðum. Á einhverjum stöðum er hægt að loka fyrr einn dag í viku án þess að þjónustan skerðist. Á öðrum getur starfsfólk skipst á að fara fyrr eða mæta seinna og á enn öðrum er staðan þannig að útfærslan getur verið mismunandi eftir starfsfólki.
Heimilt verður að stytta vinnuvikuna hjá dagvinnufólki í allt að 36 stundir. Styttingin verður að lágmarki fjórar stundir hjá vaktavinnufólki og allt að átta stundir, niður í 32 tíma vinnuviku, hjá þeim sem ganga þyngstu vaktirnar.
Til að auðvelda starfsfólki jafnt sem stjórnendum að undirbúa styttinguna á sínum vinnustað hefur verið útbúið mikið af kynningarefni sem gott er að skoða. BSRB hefur opnað vefinn styttri.is þar sem hægt er að finna greinargóðar upplýsingar. Þá er hægt að finna kynningarmyndbönd, upptökur af kynningarfundum og fleira hér á vef BSRB. Þá má benda á vefinn betrivinnutimi.is þar sem hægt er að sækja ýmsan fróðleik.
Stytting vinnuvikunnar verður stærsta breytingin á vinnutíma launafólks í nærri hálfa öld, frá því 40 tíma vinnuvikan var tekin upp hér á landi. Tökum öll þátt í því að gera drauminn um styttri vinnuviku og fjölskylduvænna samfélag að veruleika. (Tekið af heimasíðu BSRB en þess má geta að félagsmenn Starfsmannafélags Húsavíkur eru innan sambandsins)
Samtöl um styttingu vinnuvikunnar fara fram þessa dagana á fjölmörgum vinnustöðum. (Mynd Skrifstofa stéttarfélaganna)
Samkvæmt vefmælinum er mikil umferð um heimasíðu stéttarfélaganna á hverjum degi, framsyn.is. Sem er um margt mjög merkilegt enda um heimasíðu stéttarfélaga að ræða. Greinilegt er að menn fara bæði inn á síðuna til að afla sér upplýsinga um réttindi og kjör auk þess að fylgjast með starfi stéttarfélaganna í gegnum fréttir á síðunni. Sé tekið mið af síðustu viku, frá 26. október til 1. nóvember fóru um 900 gestir inn á síðuna daglega. Á sama tímabili voru notendur 1.648, það eru þeir sem heimsóttu síðuna á tímabilinu sem mælingin nær yfir. Áhugavert er að sjá að fólk sem býr ekki lengur á svæðinu og flust hefur erlendis er duglegt að fylgjast áfram með starfi félaganna samkvæmt úttektinni. Til stendur að bæta síðuna enn frekar og gera hana aðgengilegri fyrir félagsmenn. Vonandi klárast sú vinna á næstu mánuðum. Áfram verður lagt upp úr því að vera með fréttatengda heimasíðu enda núverandi form vinsælt meðal félagsmanna og annarra sem skoða síðuna reglulega og síðasta samantekt ber með sér.
Eins og fram kemur í fréttinni er áhugavert að sjá að fjölmargir heimsækja síðuna reglulega og koma heimsóknirnar víða að. Hér má samantekt fyrir síðustu viku.
