kuti

Það er tilvalið fyrir fyrirtæki og stofnanir að gefa starfsfólki sínu Húsavíkurgjafabréf í jólagjöf. Þannig eflum við verslun og þjónustu í heimabyggð, það er í Þingeyjarsýslum. Þá er ekki síður viðeigandi að menn íhugi almennt að gefa sínum nánustu gjafabréf í jólagjöf, þannig geta þeir notað gjöfina til að kaupa sér eitthvað nytsamlegt um leið og þeir styðja við samfélagið.

Bréfin sem eru á vegum Húsavíkurstofu eru til sölu í útibúum Sparisjóðs Suður Þingeyinga á Húsavík, Laugum og Mývatnssveit. Bréfin gilda hjá neðangreindum verslunum og þjónustuaðilum á Kópaskeri, Raufarhöfn, Húsavík og nágrenni. Bréfin eru til útgefin í 3.000, 5.000 og 10.000 krónum.

Verslanir:

Nettó, Garðarshólmi, Ísfell, Skóbúðin, Penninn/Eymundsson, Heimamenn, Verslunin Urð Raufarhöfn, Skerjakolla Kópaskeri.

Veitingastaðir:

Salka, Húsavík Öl, Gamli Baukur, Hlöðufell, Lemon, Jaja Ding Dong, Hérna kaffihús, Pizzakofinn.

Klipping:

Toppurinn, Hárform, Háriðjan.

Gisting:

Árból Gistihús, Kaldbakskot, Cape Hotel, Skógar Sunset Guesthouse, Hótel Norðurljós.

Þjónusta og afþreying:

Sjóböðin, Garðvík, Norðurvík, Þyrnishóll, Bílaleiga Húsavíkur, Fatahreinsun Húsavíkur, Travel North – bílaleiga og ljósmyndaprentun, Norðursigling, Gentle Giants.

„Þetta út­spil hjá Seðlabank­an­um er stórund­ar­legt á sama tíma og menn sitja í Karp­hús­inu og reyna að ná fram samn­ing­um,“ seg­ir Aðal­steinn Á. Bald­urs­son, formaður Fram­sýn­ar, í sam­tali við mbl.is spurður út í stýri­vaxta­hækk­un­ina.

„Ég velti því fyr­ir mér hvort að Seðlabank­inn sé kom­inn í sömu stöðu og verið er að saka versl­an­ir í land­inu um núna, að byrja á því að hækka vör­una og lækka hana svo aft­ur á föstu­dag­inn þegar öll til­boðin eru í gangi. Það er verið að saka þær um að vera að hækka vör­una og lækka hana svo aft­ur og því velti ég því fyr­ir mér hvort Seðlabank­inn sé að gera þetta núna, til þess að geta svo spilað út ein­verri lækk­un síðar til að koma til móts við þá sem sitja að í Karp­hús­inu. Þetta er bara bein árás og al­var­leg­ur hlut­ur að ein­hverj­um skuli láta sér detta þetta í hug,“ seg­ir Aðal­steinn um stýri­vaxta­hækk­un­ina.

„Er Seðlabank­inn að búa sér til stöðu svipað og versl­an­ir? Eða eins og einn verkamaður sagði við mig; er þetta bara orðin svona hips­um­haps fjár­mála­stjórn í land­inu?“ bæt­ir Aðal­steinn við.

https://www.mbl.is/frettir/innlent/2022/11/23/storundarlegt_utspil_hja_si/

 

 

Samkvæmt kjarasamningum ber atvinnurekendum að greiða starfsfólki sínu desemberuppbót í byrjun desember ár hvert. Uppbótin er háð ákveðnum skilyrðum sem varða t.a.m. starfstíma og starfshlutfall á yfirstandandi ári. Desemberuppbót skal greiða í einu lagi og ofan á hana reiknast ekki orlof. Uppbótin er föst krónutala og tekur ekki hækkunum skv. öðrum ákvæðum kjarasamninga. Við starfslok á að gera upp áunna desemberuppbót.

Upphæð desemberuppbótar samkvæmt kjarasamningi við ríkið og samkvæmt kjarasamningum á almennum vinnumarkaði er kr. 98.000, miðað við 100% starfshlutfall. Starfsmenn hjá ríkinu eiga að fá desemberuppbót greidda 1. desember og starfsmenn á almennum vinnumarkaði eigi síðar en 15. desember.

Upphæð desemberuppbótar samkvæmt kjarasamningi við Samband íslenskra sveitarfélaga er kr. 124.750, miðað við 100% starfshlutfall. Starfsmenn sveitarfélaga eiga að fá sína desemberuppbót greidda 1. desember, skv. kjarasamningi.

Starfsmenn PCC BakkiSilicon eiga rétt á kr. 200.000,- í desemberuppót m.v. fullt starf og hlutfallslega miðað við starfshlutfall og starfstíma.

Félagsmönnum stéttarfélaganna er velkomið að hafa samband við Skrifstofu stéttarfélaganna varðandi frekari upplýsingar um uppbótina.

Húsa­vík er á lista ferðavefs­ins Tra­vel Lemm­ing yfir bestu áfangastaðina til að heim­sækja á næsta ári. 50 áfangastaðir eru á list­an­um og eru þeir jafn fjöl­breytt­ir og þeir eru marg­ir, en Húsa­vík er í 17. sæti list­ans.

Tra­vel Lemm­ing er vin­sæll ferðavef­ur sem gef­ur út leiðar­vísa um ólíka staði um heim­inn. Vef­ur­inn nýt­ur mik­illa vin­sælda og á ári hverju lesa um sex millj­ón­ir manna hann.

Seychelle Thom­as, ferðablaðamaður Tra­vel Lemm­ing, mæl­ir með því að ferðalang­ar skelli sér í hvala­skoðun á Húsa­vík og láti ekki lund­ana í Lundey fram­hjá sér far. Þá seg­ir enn frem­ur að þrátt fyr­ir að fjöldi ferðamanna leggi leið sína til bæj­ar­ins til að fara í hvala­skoðun sé bær­inn enn heill­andi og haldi í ræt­ur sín­ar sem sjáv­arþorp.

Þá er einnig mælt með því að fara í Sjó­böðin, sem séu betri en Bláa lónið að því leyti að færri heim­sæki böðin.

Efst á lista Tra­vel Lemm­ing er Lafayette í Louisi­ana-ríki í Banda­ríkj­un­um. Í öðru sæti er Bút­an og í því þriðja er Utila í Hond­úras. (Heimild mbl-mynd Framsýn)

Nýlega auglýstu stéttarfélögin eftir þjónustufulltrúa á Skrifstofu stéttarfélaganna á Húsavík. Gleðilegt er til þess að vita að alls bárust 21 umsókn um starfið sem sýnir vel áhuga fólks á því að starfa fyrir félagsmenn aðildarfélaga skrifstofunnar. Um er að ræða mjög áhugaverðar og góðar umsóknir sem flestar standast kröfur stéttarfélaganna um starfið.

Félögin hafa komist að þeirri niðurstöðu að ráða Kristján Inga Jónsson í starfið en hann er fæddur árið 1973. Kristján Ingi hefur starfað við Öxarfjarðarskóla í rúmlega 20 ár við kennslu og leiðsögn auk þess að vera trúnaðarmaður starfsmanna skólans til fjölda ára enda áhugamaður um verkalýðsmál. Þá hefur hann haft yfirumsjón með tölvu- og kerfisstjórn skólans. Áður en Kristján Ingi hóf störf í Öxarfjarðarskóla starfaði hann við krefjandi verslunar- og þjónustustörf auk þess að starfa m.a. hjá Geflu á Kópaskeri, Landssímanum og Silfurstjörnunni. Þá hefur hann komið að kennslu fyrir Þekkingarnet Þingeyinga er varðar almenna tölvunotkun. Hann hefur því viðtæka reynslu af vinnumarkaðinum og komið víða við.

Kristján Ingi hefur góða tölvu- og tungumálakunnáttu sem á eftir að reynast honum vel í starfi enda fjölgar erlendum starfsmönnum hratt sem koma til vinnu á félagssvæði stéttarfélaganna. Þá hefur Kristinn Ingi verið mjög virkur í félagsstarfi sem er mikill kostur. Sem dæmi má nefna að hann er formaður björgunarsveitarinnar Núpa og sat í stjórn Öxarfjarðardeildar Rauða kross Íslands til margra ári. Í dag situr hann í Neyðarvarnanefnd Rauða krossins í Þingeyjarsýslum auk þess að vera á útkallsskrá hjá slökkviliði Norðurþings. Kristján Ingi útskrifaðist á sínum tíma frá Menntaskólanum á Akureyri sem stúdent af félagsfræðabraut. Síðar stundaði hann nám við Iðnskólann í Reykjavík og við Kennaraháskóla Íslands auk þess sem hann kláraði grunnnám í sjúkraflutningum frá Sjúkraflutningaskólanum árið 2018. Stéttarfélögin bjóða Kristinn Inga velkominn til starfa um leið og þau þakka öllum þeim fjölmörgu sem skiluðu inn starfsumsóknum til félaganna fyrir áhuga þeirra að starfa fyrir stéttarfélögin í Þingeyjarsýslum.

 

Formenn Starfsgreinasambands Íslands hafa setið á fundi í morgun um kjaramál. Þar á meðal formaður Framsýnar. Eins og áður hefur komið fram eru kjarasamningar lausir á almenna vinnumarkaðinum. Það er frá 1. nóvember. Ekki er ólíklegt að menn horfi til þess að gera skammtímasamning. Í máli formanna kom fram að mikilvægt væri að ljúka samningagerðinni á næstu dögum og vikum. Ef ekki yrðu menn að skoða aðra aðferðarfræði. Formennirnir munu funda aftur um stöðuna í næstu viku. Milli funda mun samninganefnd SGS funda með fulltrúm frá Samtökum atvinnulífsins með það að markmiði að leita leiða til að klára gerð kjarasamnings.

Iðnaðarmenn eiga rétt á verkfæra- og fatagjaldi. Þessar greiðslur hækka reglulega. Þær hækkuðu síðast 1. apríl 2022. Hér má lesa frekar um breytingarnar sem orðið hafa á þessum gjöldum á árinu 2022.

 

Verkfæra- og fatagjald

1. apríl 2022

Trésmiðir, málarar og múrarar:	Pípulagningamenn:
Verkfæragjald pr. Klst. 48,35 kr.	Verkfæragjald pr. Klst. 59,34 kr.
Fatagjald pr. Klst. 27,66 kr.	Fatagjald pr. Klst. 27,66 kr.

Verkfæra og fatagjald reiknast á alla unna tíma.

Fatagjald greitt inn á fatareikning kr. 15,42

Fatagjald er greitt inn á sérstakan reikning við hverja launaútborgun og reiknast á allar unnar stundir.

1. janúar 2022

Trésmiðir, málarar og múrarar:

Verkfæragjald pr. klst. 47,64 kr.
Fatagjald pr. klst. 27,25 kr.

Pípulagningamenn:

Verkfæragjald pr. klst. 58,46 kr.
Fatagjald pr. klst. 27,25 kr.

Verkfæra og fatagjald reiknast á alla unna tíma.

Fatagjald greitt inn á fatareikning kr. 15,19

Fatagjald er greitt inn á sérstakan reikning við hverja launaútborgun og reiknast á allar unnar stundir.

 

 Á stjórnarfundi Framsýnar í gær urðu umræður um gjaldskrárhækkanir sem komið hafa til og eru í farvatninu hjá stofnunum ríkisins og sveitarfélaga. Höfðu fundarmenn miklar áhyggjur af stöðunni. Eftir miklar umræður samþykkti stjórnin að senda frá sér svohljóðandi ályktun:

„Framsýn stéttarfélag skorar á ríki og sveitarfélög að gæta hófs í hækkunum  á opinberum gjöldum s.s. þjónustugjöldum fyrir almenna þjónustu, heilbrigðisþjónustu og sköttum á eldsneyti. Eins ber að nefna gjaldskrárhækkanir eins og hækkanir á fasteignagjöldum, sem vega almennt mjög þungt í vasa þeirra sem minna hafa á milli handanna.

Heimilin í landinu hafa þegar tekið á sig miklar verðhækkanir s.s. á eldsneyti, flutninga, matvöru í skugga stríðs og heimsfaraldurs, svo ekki sé talað um hækkanir stýrivaxta sem hafa bein áhrif á leigugreiðslur og lánaafborganir.

Það hjálpar ekki við gerð yfirstandandi kjarasamninga þar sem lagt er að verkalýðshreyfingunni að leggja fram hófstilltar launakröfur, haldi opinberir aðilar ekki að sér höndum varðandi hækkanir á gjaldskrám og íþyngjandi sköttum. Slíkt er olía á eldinn.  Verkafólk á Íslandi getur ekki eitt haldið samfélaginu gangandi, það kallar því eftir sanngirni og jöfnuði í þjóðfélaginu.

Að mati Framsýnar stéttarfélags er mikill ábyrgðarhluti að ganga frá endurnýjuðum kjarasamningum á vinnumarkaði nema fyrir liggi skýr afstaða opinberra aðila að þeir ætli sér að halda niðri öllum kostnaðarliðum sem áhrif hafa á afkomu heimilanna í landinu. Aðeins þannig er hægt að tryggja sátt á íslenskum vinnumarkaði á komandi árum enda séu Samtök atvinnulífsins jafnframt tilbúin að koma til móts við verkalýðshreyfinguna um sanngjarnar launahækkanir til handa verkafólki.“   

 

 

Félagsmenn Framsýnar og Þingiðnar eru velkomnir í heimsókn á Skrifstofu stéttarfélaganna. Þar geta þeir nálgast húfur fyrir veturinn sem voru að koma í hús. Miðað við góða veðrið síðustu daga er eitthvað í það að veturinn komi í heimsókn. Reyndar fagna flestir því en hann mun koma því miður. Þá er gott eiga góða húfu frá stéttarfélögunum.

Dagatöl stéttarfélaganna vegna ársins 2023 eru komin á Skrifstofu stéttarfélaganna. Í ár eru myndirnar á dagatölunum eftir Hafþór Hreiðarsson og Atla Vigfússon. Um er að ræða  glæsilegar myndir. Áhugaamir geta nálgast dagatölin á skristofuninni. Allir velkomnir.

Ríkissáttasemjari hefur opnað gagnagrunn á vef sínum www.rikissattasemjari.is þar sem hægt er að nálgast texta allra gildandi kjarasamninga á Íslandi og margskonar tölfræði um samningana og kjarasamningsgerðina. Tilgangurinn er að auðvelda  launafólki og launagreiðendum og öðrum sem  áhuga hafa á að fræðast um kjarasamninga aðgang að ítarlegum upplýsingum um gildandi kjarasamninga, að veita yfirlit yfir hvenær mismunandi samningar renna út og gefa innsýn í margskonar tölfræði varðandi kjarasamningagerðina. Gagnagrunnurinn er mikilvægur m.a. vegna þess að stundum kann að vera snúið að nálgast  gildandi kjarasamninga og í mörgum tilvikum breytir nýjasti kjarasamningur aðeins hluta af kjörum þeirra sem hann nær yfir – og í gagnagrunninum er hægt að lesa gildandi kjarasamninga í samhengi við fyrri samninga.  Upplýsingar í grunninum byggja á kjarasamningum sem til eru hjá ríkissáttasemjara, en skv. lögum er aðilum vinnumarkaðarins skylt að senda ríkissáttasemjara alla gerða kjarasamninga.

Fjórir nemar í Háskóla Íslands unnu að gagnagrunninum með starfs fólki ríkissáttasemjara. Tveir nemendur í tölvunarfræði, Alexander Guðmundsson og Einar Páll Pálsson, og tveir nemendur í mannauðsstjórnun, Hanna Lind Garðarsdóttir og Karitas Marý Bjarnadóttir. Verkefnið fékk styrk frá RANNÍS.

„Ég er sannfærður um að gagnagrunnurinn muni nýtast launafólki, einstaka launagreiðendum, verkalýðshreyfingunni og samtöku atvinnurekenda frábærlega vel þar sem það hefur til dæmis verið erfitt að nálgast fullnægjandi upplýsingar um alla gildandi kjarasamninga, hvenær þeir renna út og hvernig þeir tengjast fyrri samningum. Það hefur verið ævintýri að vinna að þessu skemmtilega verkefni með fjórum algerlega frábærum háskólanemum“, segir Aðalsteinn Leifsson ríkissáttasemjari.

Á tölfræðisíðu gagnagrunnsins kemur fram að á Íslandi eru 353 kjarasamningar í gildi og í 99,4% tilvika voru samningar útrunnir áður en nýjir samningar voru undirritaðir.

Ríkissáttasemjari áformar að bæta smám saman eldri samningum inn í gagnagrunninn uns hann inniheldur alla samninga sem embættið hefur í vörslu sinni, allt frá árinu 1905.

Þau sem hafa áhuga geta fengið kynningu á gagnagrunninum, vinsamlegast sendið línu til elisabet@rikissattasemjari.is

 

 

Íslenskt atvinnulíf stendur styrkum fótum og staða fyrirtækja hefur sjaldan verið betri. Hvert fyrirtækið á fætur öðru skilaði methagnaði á síðasta ári og allt bendir til þess að árið í ár verði ekki síðra. Útflutningsgreinarnar – undirstöður atvinnulífsins – standa afar vel. Sjávarútvegurinn skilaði tugmilljarða króna hagnaði í fyrra og ferðaþjónustan hefur náð flugi á nýjan leik eftir Covid.

Vinnuframlag launafólks, þekking þess og kunnátta liggja að baki þessum gríðarlega góða árangri og launafólk á kröfu á umbun í samræmi við það. Um það snúast kjarasamningar – réttláta skiptingu.

Lífskjarasamningurinn, sem undirritaður var árið 2019, rann út um síðustu mánaðamót. VR, Landssamband ísl. verzlunarmanna og Starfsgreinasamband Íslands hafa staðið þétt saman í viðræðum við Samtök atvinnulífsins síðustu vikur og freistað þess að ná nýjum samningi. Fundað hefur verið stíft en nú blasir við að of mikið ber í milli.  Samningur er ekki í sjónmáli og engar forsendur til að halda viðræðum áfram að óbreyttu.

Hrina kostnaðarhækkana skellur nú á launafólki; húsaleiga hefur hækkað, vextir, bensín, matvara og þjónustugjöld svo fátt eitt sé nefnt. Stéttarfélögin krefjast kaupmáttaraukningar launa á samningstímanum en atvinnurekendur segja ekkert svigrúm til þess. Stéttarfélögin kalla eftir markvissum aðgerðum til að ná niður verðbólgu en atvinnurekendur hafa ekkert fram að færa. Það er holur hljómur í málflutningi atvinnurekenda þegar þeir halda því fram að launahækkanir keyri upp verðbólguna – það er búið að sýna fram á að svo sé ekki.

VR/LÍV og SGS eru í forsvari fyrir stóran hluta launafólks á almennum vinnumarkaði og gera kröfu um sanngirni. Á meðan atvinnurekendur hlusta ekki á raddir tugþúsunda einstaklinga sem fyrir þá starfa í samningaviðræðum eins og þeim sem staðið hafa yfir síðustu vikur verður að leita annarra leiða. Því hafa stéttarfélögin tekið þá ákvörðun að vísa viðræðum VR/LÍV og SGS við Samtök atvinnulífsins til ríkissáttasemjara.

14. nóvember 2022

Ragnar Þór Ingólfsson, formaður VR
Eiður Stefánsson, formaður samninganefndar LÍV
Vilhjálmur Birgisson, formaður SGS

 

Stjórn Framsýnar auk stjórnar Framsýnar-ung kemur saman til reglulegs fundar miðvikudaginn 16. nóvember kl. 17:00 í fundarsal félagsins. Nokkur mál eru á dagskrá fundarins.

Dagskrá:

1. Fundargerð síðasta fundar
2. Inntaka nýrra félaga
3. Starfsmannamál
4. Kjaramál
5. Stofnanasamningar
6. Jólafundur félagsins
7. Ljósmyndasýning
8. Félag bókhaldsstofa- erindi
9. Fundur- vinnutímastyttingar
10. Erindi frá Félagi heyrnalausra
11. Önnur mál

 

Félag bókhaldsstofa á Íslandi hélt fjölmenna haustráðstefnu á Hótel Örk í dag en ráðstefnan stendur yfir í tvo daga.  Nokkur áhugaverð erindi voru flutt á ráðstefnunni, s.s. um málefni starfsmannaleigna, peningaþvætti og félagafrelsi á Íslandi. Formaður Framsýnar, Aðalsteinn Árni, var beðinn um að flytja erindi um verkalýðsfélög, kjarasamninga og félagafrelsi á ráðstefnunni. Formaðurinn fékk góðar viðtökur hjá fundarmönnum sem sáu ástæðu til að syngja fyrir hann afmælissönginn enda átti hann afmæli í dag, 11. nóvember um leið og honum var þakkað fyrir að eyða afmælisdeginum í það að ferðast landshorna á milli til að flytja erindi í Hverragerði.

Þann 23. nóvember næstkomandi verður hinn árlegi fræðsludagur félagsliða haldinn á Fosshótel í Reykjavík, en þetta er í sjöunda skipti sem fræðsludagurinn er haldinn. Hann var fyrst haldinn á Akureyri haustið 2014 og svo árlega fram til ársins 2019, en hefur hins vegar ekki farið fram síðastliðinn tvö ár vegna Covid.

SGS og Félag íslenskra félagsliða halda daginn í sameiningu og er fræðslan opin félagsliðum um allt land óháð stéttarfélagi. Nauðsynlegt er að skrá mætingu fyrir 20. nóvember næstkomandi. Félagsliðar um allt land eru hvattir til að nýta þetta tækifæri til að fræðast og ekki síst hitta aðra félagsliða. Dagskrána má nálgast hér.

Í gær lauk umsóknarfresti til að sækja um starf þjónustufulltrúa hjá Skrifstofu stéttarfélaganna á Húsavík. Greinilegt er að gríðarlegur áhugi er fyrir starfinu þar sem tuttugu og ein umsókn hefur borist um starfið sem er virkilega ánægjulegt og sýnir áhuga fólks á því að starfa fyrir ein öflugustu stéttarfélög landsins. Aðilar að skrifstofunni eru; Framsýn, Þingiðn og Starfsmannafélag Húsavíkur.  Um er að ræða mjög góðar umsóknir sem erfitt verður að velja á milli. Farið verður frekar yfir umsóknirnar í vikunni. Reiknað er með að ganga frá ráðningu á nýjum starfsmanni í næstu viku. Starfsmaðurinn mun koma í stað Lindu M. Baldursdóttur sem lætur af störfum hjá stéttarfélögunum á komandi vikum.

Fyrir helgina gengu stéttarfélögin Framsýn og Þingiðn formlega frá sérstöku Hæfniálagi 2 og bónussamningi við PCC BakkiSilicon. Áður var búið að semja um Hæfniálag 1 fyrir starfmenn fyrirtækisins sem falla undir sérkjarasamning aðila frá árinu 2019. Á meðfylgjandi mynd eru fulltrúar frá PCC og Framsýn. Með þeim eru trúnaðarmenn starfsmanna, þau Sigrún og Ingimar.

Samkvæmt samkomulaginu greiðist Hæfniálag 2 fyrir verk sem að krefjast aukinnar þjálfunar og kunnáttu. Hæfniálagið færir almennum starfsmönnum allt að 7,5% launahækkun og í ákveðnum tilvikum getur álagið farið upp í 15% á grunnlaun.

Þá er ljóst að nýja bónuskerfið sem stuðst hefur verið við síðustu mánuði til reynslu hefur verið að koma vel út.  Því er ætlað að færa starfsmönnum töluverðar launahækkanir til viðbótar föstum mánaðarlaunum. Áfram verður unnið að því að þróa kerfið til hagsbóta fyrir fyrirtækið og starfsfólk. Þrátt fyrir að bónuskerfið taki mið af ákveðnum þáttum s.s. orkunotkun, framleiðslumagni og fínefnahlutfalli er áhugavert til þess að vita að bónuskerfið er einnig tengt EBITDU fyrirtækisins á hverjum tíma. Það er, gangi rekstur fyrirtækisins vel munu starfsmenn fá sérstaka greiðslu einu sinni á ári, það er eftir að endurskoðaðir ársreikningar fyrirtækisins liggja fyrir á hverjum tíma.

Til viðbótar má geta þess að viðræður aðila um endurskoðun á gildandi sérkjarasamningi  aðila munu væntanlega hefjast á næstu vikum en núverandi samningur rann út um síðustu mánaðamót líkt og aðrir kjarasamningar á almenna vinnumarkaðinum.

Eftir langar og strangar samningaviðræður milli Starfsgreinasambands Íslands og þjóðgarðana var skrifað undir sameiginlegan stofnanasamning fyrir helgina sem nær yfir alla starfsmenn þessara stofnana sem eru innan aðildarfélaga Starfsgreinasambands Íslands; Það er innan Umhverfisstofnunar, Vatnajökulsþjóðgarðs, þjóðgarðsins á Þingvöllum. Áður voru í gildi tveir stofnanasamningar sem voru sameinaðir í einn. Einn af þeim sem tók þátt í viðræðunum var formaður Framsýnar enda með félagsmenn sem starfa í Vatnajökulsþjóðgarði og hjá Umhverfisstofnun í Mývatnssveit.  Að hans sögn er afar ánægjulegt að samningar skyldu takast að lokum. Eftir atvikum væru menn ánægðir með niðurstöðuna. Samningurinn fer nú í kynningu hjá landvörðum og öðrum starfsmönnum þjóðgarðana. Þar sem um stofnanasamning er um að ræða þarf ekki að greiða atkvæði um hann.

Skrifað undir stofnanasamninginn í húsnæði Umhverfisstofnunar. Aðalsteinn Árni formaður Framsýnar skrifaði undir fyrir hönd félagsins.

Þann 2. nóvember var haldin vinnustofa með þjóðfundarsniði í Reykjavík með hagsmunaaðilum sem komu að innleiðingu og eftirfylgni betri vinnutíma í vaktavinnu sem samið var um í síðustu kjarasamningum. Í fylgiskjali með samningnum er gert grein fyrir því að fyrir lok samningstímans sem rennur út á næsta ári skuli aðilar leggja sameiginlegt mat á áhrif breytinganna og hvort núverandi framsetning falli best að framtíðarskipulagi og starfsumhverfi stofnana ríkis og sveitarfélaga. Fyrir lok samningstímans skulu aðilar jafnframt leggja sameiginlegt mat á áhrif breytinganna og hvort núverandi framsetning á neðangreindum ákvæðum í kjarasamningi falli best að framtíðar skipulagi og starfsumhverfi stofnana ríkis og sveitarfélaga. Innleiðingarhópar og matshópur hafa verið virkir á tíma innleiðinga og eftirfylgni og er framlag þeirra afar mikilvægt sem og annarra hagsmunahafa.

Markmið vinnustofunnar var að fara yfir nokkra þætti er varðaði innleiðinguna: • Draga fram kosti verkefnisins. • Finna helstu áskoranir og tækifæri til breytinga. • Efla samvinnu og samstarf hagsmunahafa. • Efla sameiginlega sýn á verkefnið. • Draga lærdóm af verkefninu í heild og einstökum þáttum þess.

Sigurveig Arnardóttir og Guðný Reykjalín Magnúsdóttir voru fulltrúar Framsýnar á fundinum. Í samtali við þær eftir fundinn sögðu þær að fundurinn hefði gengið ágætlega. Þær hefðu hins vegar viljað sjá fleiri sem störfuðu eftir samningnum. Meira hefði verið um stjórnendur og mannauðsstjóra. Þá væri greinilegt að stjórnendur hefðu fengið mun betri fræðslu um breytingarnar á sínum tíma en fólkið á gólfinu.  Kannski mætti kenna covid um að einhverju leiti að upplýsingaflæðið hefði ekki verið betra.  Helstu vankantarnir tengdust  vaktahvatanum að mati fundarmanna. Hann hefði þvælist fyrir fólki og flestir sammála að hann væri ekki nægjanlega vel útfærður.  Þær voru einnig á því að mörgum spurningum væri enn ósvarað eftir þessar breytingar. Vonandi tækist að laga ýmsa þætti í komandi kjaraviðræðum við ríkið og sveitarfélögin.

 

Vegna starfsmannafundar þriðjudaginn 8. nóvember opnum við kl. 10:00. Beðist er velvirðingar á því.

Starfsfólk Skrifstofu stéttarfélaganna