kuti

Ellefu þingmenn Sjálfstæðisflokksins hafa lagt fram lagafrumvarp um félagafrelsi á vinnumarkaði. Það  á að tryggja rétt launafólks til að velja sér stéttarfélag. Auk þess er lagt bann við forgangsréttarákvæðum í kjarasamningum, vernda á rétt launafólks til að standa utan verkfalla stéttarfélaga sem það tilheyrir ekki og afnema greiðsluskyldu félagsbundinna launamanna til stéttarfélaga þar sem þess er krafist í lögum eða kjarasamningum. Ljóst er að frumvarpið er alvarleg aðför að sjálfstæði stéttarfélaga og íslenskri verkalýðshreyfingu. Framsýn kom á framfæri alvarlegum athugasemdum við frumvarpið. Það er von félagsins að verkalýðshreyfingin og vel hugsandi alþingismenn muni gera allt sem hægt er til að koma í veg fyrir að frumvarpið fari í gegn um þingið enda víðáttu vitlaust og rúmlega það. Þá hefur formaður Framsýnar skrifað greinar um alvarleika málsins og hafa þær fengið mjög góðar undirtektir lesenda.

Framsýn og sveitarfélagið Norðurþing stóðu fyrir fundi með Birni Traustasyni framkvæmdastjóra leigufélagsins Bjargs (sem er í eigu ASÍ og BSRB) um hugsanlegt samstarf um uppbyggingu á leiguhúsnæði í sveitarfélaginu. Mikil vöntun er á leiguhúsnæði á Húsavík fyrir tekjulágt fólk, en Bjarg íbúðafélag er sérsniðið að tekjulágum einstaklingum á vinnumarkaði sem eiga hvað erfiðast með að komast í leiguhúsnæði á almenna húsnæðismarkaðinum vegna lágra tekna. Stóð vilji fundarmanna til að þróa samtalið áfram. Framsýn mun fylgja málinu eftir enda mikilvægt að auka framboð á svæðinu fyrir þá sem þurfa á leiguhúsnæði að halda á viðráðanlegu verði.

Virk – starfsendurhæfingarsjóður var stofnaður árið 2008 af aðilum vinnumarkaðarins. Í júní 2012 voru sett lög um atvinnutengda starfsendurhæfingu og starfsemi starfsendurhæfingarsjóða, lög nr. 60/2012, sem sjóðurinn starfar eftir. Með samvinnu Virk – starfsendurhæfingarsjóðs og Framsýnar, Þingiðnar, Starfsmannafélags Húsavíkur og Verkalýðsfélags Þórshafnar hefur verið rekin þjónustu- og ráðgjafaskrifstofa Virk í Þingeyjarsýslum frá árinu 2009. Markmið Virk – starfsendurhæfingarsjóðs er að draga úr líkum á því að einstaklingar hverfi af vinnumarkaði vegna heilsubrests. Þjónusta við einstaklinga felst í persónulegri ráðgjöf og hvatningu, samvinnu um áætlun um eflingu starfsgetu og endurkomu á vinnumarkað, vali á endurhæfingarúrræðum í samvinnu við einstakling og fagfólk og leiðbeiningum um réttindi, framfærslu og þjónustu. Gott samstarf er við stofnanir og meðferðaraðila á svæðinu, á sviði heilbrigðis-, félags- og menntunarmála. Virk hefur staðið fyrir kynningu og vitundavakningu um efni sem tengjast farsælli þátttöku og endurkomu á vinnumarkaði. Í þessu sambandi má t.d. nefna kynningarátök og rannsóknir Virk á kynbundnu ofbeldi á vinnumarkaði, kulnun og breytingarskeyði kvenna. Mikið er lagt upp úr að þjónustan sé sýnileg og aðgengileg, hvort heldur til almennrar ráðgjafar fyrir félagsmenn, formlegrar samvinnu við einstaklinga í starfsendurhæfingu eða samstarf við úrræðaaðila og launagreiðendur. Formleg þjónusta við einstaklinga á vettvangi Virk hefst með tilvísun frá lækni (oftast heimilislækni/lækni heilsugæslu).

Framsýn og samstarfs stéttarfélög í Þingeyjarsýslum eiga virkt samstarf við Virk – starfsendurhæfingarsjóð um skipulag og stuðning við þjónustuna. Á síðustu misserum hefur byggst upp gott samstarf um miðlun verkefna, m.a. á Norðurlandi. Starfsmaður Virk á Húsavík hefur að hluta starfað sem atvinnulífstengill á því svæði. Á vettvangi Virk – starfsendurhæfingarsjóðs, hlutu 10 fyrirtæki/stofnanir nýlega sérstaka viðurkenningu fyrir framlagt sitt til stuðnings einstaklinga sem stíga út á vinnumarkað eftir fjarveru vegna veikinda. Heilbrigðistofnun Norðurlands – Húsavík, hlaut þessa viðurkenningu, sem VIRKt fyrirtæki. Áralangt samstarf hefur verið verið stofnunina, jákvætt viðhorf stjórenda og samstarfsfólks hafa einkennt samstarf og samskipti við einstaklinga í endurkomu í starf eða í leit að starfi við hæfi og tækifæri á vinnumarkaði að nýju. Ráðgjafi Virk – starfsendurhæfingarsjóðs í Þingeyjarsýslum er Ágúst Sigurður Óskarsson og er hann til staðar á Skrifstofu stéttarfélaganna á Húsavík, sími 464-6600 og netfang virk@framsyn.is.

Töluvert hefur verið um að fulltrúar stéttarfélaganna í Þingeyjarsýslum hafi verið beðnir um að koma með fræðslu inn á vinnustaði á félagssvæðinu. Það er fræðslu um starfsemi stéttarfélaga og ákvæði kjarasamninga. Meðfylgjandi mynd var tekin þegar talsmaður Framsýnar var beðinn um að flytja erindi fyrir sumarstarfsmenn á Hvammi og HSN á Húsavík í byrjun sumars.  

Framsýn stóð fyrir árlegu sumarkaffi í félagsheimilinu Hnitbjörgum á Raufarhöfn í byrjun júní eins og gert hefur verið í aðdraganda Sjómannadagsins mörg undanfarin ár. Íbúar staðarins ásamt nærsveitingum hafa verið mjög duglegir að mæta í sumarkaffið og svo var einnig nú, en um 70 til 80 gestir komu og þáðu veitingar og áttu góða stund með forsvarsmönnum félagsins.  Með kaffinu var boðið upp á konfekt og hnallþórur af allra bestu gerð, en það voru konur úr Kvenfélaginu Freyju á Raufarhöfn sem höfðu veg og vanda af tertubakstrinum. Framsýn þakkar rekstraraðilum Hnitbjarga, þeim Ingibjörgu Hönnu Sigurðardóttur og Gunnari Páli Baldurssyni  fyrir afnotin af húsnæðinu og öllum þeim sem lögðu leið sína í sumarkaffið hjartanlega fyrir komuna.

Jakob Gunnar Hjaltalín kom að sjálfsögðu á aðalfund Framsýnar sem haldinn var í lok maí. Um þessar mundir eru ákveðin tímabót í hans lífi þar sem hann fagnar 70 ára afmæli. Að sjálfsögðu var Jakob hylltur á fundinum auk þess sem fundarmenn færðu honum smá glaðning á þessum merku tímamótum í hans lífi. Það gerði Aðalsteinn Árni formaður Framsýnar.

Félagsgjaldið hefur verið óbreytt til fjölda ára, það er 1% af launum félagsmanna. Til að öðlast full félagsréttindi þurfa félagsmenn að greiða mánaðarlegt félagsgjald samkvæmt ákvörðun aðalfundar á hverjum tíma, nú 1% af heildarlaunum enda séu þeir á vinnumarkaði.

Aðalfundurinn samþykkti einnig að lágmarksfélagsgjaldið vegna ársins 2023 verði sem svarar til 0,3% byrjunarlaunum 18 ára afgreiðslufólks, samkvæmt launataxta LÍV-SA sem Framsýn á aðild að á hverjum tíma. Lágmarksgjaldið tekur breytingum í samræmi við umsamdar breytingar á launataxta LÍV-SA. Þegar rætt er um lágmarksfélagsgjald er miðað við gjald samtals í eitt ár, eða undangengna 12 mánuði. Félagsmenn sem ekki hafa náð lágmarksfélagsgjaldi eiga rétt á aðstoð við kjaramál og réttindi í sjóðum félagsins í hlutfalli við greiðslur. Til þess að viðhalda fullgildum félagsrétti í Framsýn þurfa félagsgjaldsgreiðslur að berast reglulega. Ef ekkert félagsgjald er greitt í sex mánuði samfellt fellur viðkomandi af félagsskrá. Hægt er að ná aftur fullgildingu frá þeim mánuði sem næsta félagsgjaldsgreiðsla berst, ef lágmarksfélagsgjaldi er náð undangengna 12 mánuði.

Því miður geisar stríð í Úkraínu þar sem stríðsglæpamaður frá Rússlandi heldur heilli þjóð í heljargreipum með skelfilegum afleiðingum fyrir land og þjóð. Reyndar fyrir heimsbyggðina alla. Hörmungarnar hafa ratað inn á borð Framsýnar. Alþjóðasamfélagið verður að gera allt til að stoppa þetta ömurlega stríð. Hvað það varðar getur enginn setið hjá. Almenningur verður að gera allt til að aðstoða flóttafólkið frá Úkraínu um leið og þjóðarleiðtogar heimsins eru hvattir til að stuðla að friði í heiminum með öllum tiltækum ráðum. Hvað Framsýn varðar hefur félagið ekki setið hjá. Félagið kom að því að leggja flóttafólki frá Úkraínu til íbúð í Asparfelli í Reykjavík í gegnum hjálparsamtök. Mæðgur með lítið barn frá Úkraínu fluttu inn í íbúðina 1. maí 2022 sem er táknrænt enda ber dagurinn upp á alþjóðlegan baráttudag verkafólks. Flóttafólkið var í íbúðinni til 1. mars 2023. Félaginu hafa borist kærar kveðjur frá flóttafólkinu sem þakkar kærlega fyrir hlýhug þess í þeirra garð á þessum erfiðu tímum.

Stéttarfélögin stóðu að þessu sinni fyrir hátíðarhöldum á Fosshótel Húsavík 1. maí 2023. Eftir hátíðarhöldin í höllinni í fyrra var ákveðið að breyta til og færa hátíðina á Fosshótel Húsavík til prufu. Ástæðan er að fólki hefur frekar fækkað sem sækir viðburði sem þennan auk þess sem samfélagsgerðin hefur tekið miklum breytingum á undanförnum áratugum. Þeir sem eldri eru hafa verið mjög duglegir við að sækja hátíðarhöldin meðan þeir sem yngri eru búa ekki yfir sama áhuga sem og erlendir félagsmenn. Þess vegna var ákveðið að færa hátíðarhöldin á hótelið þar sem góð þjónusta er í boði til að halda samkomu sem þessa. Boðið var upp á veglega hátíð þar sem heimamenn voru í aðalhlutverki ásamt góðum gestum. Ræðumaður dagsins var Ósk Helgadóttir varaformaður Framsýnar auk þess sem þekktir og óþekktir tónlistarmenn tendruðu fram áhugaverða tónlist og söng. Þá var boðið upp á veglegt kaffihlaðborð. Óhætt er að segja að breytingarnar hafi tekist vel og voru hátíðarhöldin á Fosshótel Húsavík vel sótt og öllum til mikils sóma. Salurinn á Fosshótel Húsavík hefur þegar verið tekinn frá fyrir hátíðarhöldin á næsta ári.

Framsýn óskaði nýlega eftir upplýsingum frá Norðurþingi um hækkanir á launum ungmenna í Vinnuskóla sveitarfélagsins milli ára. Eins og fram hefur komið í fjölmiðlum samþykkti Reykjavíkurborg að hækka ekki laun ungmenna í Vinnuskóla Reykjavíkur milli ára sem er með miklum ólíkindum og rúmlega það. Reyndar til mikillar skammar fyrir sitjandi borgarstjórn.

Samkvæmt upplýsingum frá Norðurþingi hækka laun Vinnuskólans um 9% milli ára sem er í takt við almennar launahækkanir starfsmanna sveitarfélaga sem starfa eftir launatöflu SGS/Framsýnar og Sambands ísl. sveitarfélaga sem er afar ánægjulegt. Framsýn hefur komið þeim skilaboðum á framfæri við Norðurþing að mikilvægt sé að gera samanburð á launakjörum ungmenna í Vinnuskólum á landinu með það að markmiði að Norðurþing verði örugglega samanburðarhæft við önnur sambærileg sveitarfélög hvað varðar launakjör ungmenna í Vinnuskólum. Þeirri málaleitan hefur verið vel tekið af hálfu sveitarfélagsins.

Í morgun komu nemendur úr Vinnuskólanum á Húsavík í heimsókn til stéttarfélaganna. Tilgangurinn með heimsókninni var að fræðast um starfsemi stéttarfélaga og réttindi þeirra á vinnumarkaði. Formaður Framsýnar, Aðalsteinn Árni, tók vel á móti ungu gestunum sem tóku virkan þátt í kynningunni með fyrirspurnum og öðrum skemmtilegheitum. Heimsóknin var í alla staði mjög skemmtileg og rúmlega það.  Ekki þarf að taka sérstaklega fram að kynning sem þessi er ekki síst mikilvæg fyrir þá sem eru að stíga sín fyrstu skref á vinnumarkaði.

Framsýn er mjög umhugað um starfsmenntun félagsmanna. Á árinu 2022 fengu 327 félagsmenn greiddar kr. 21.394,858,- í einstaklingsstyrki frá fræðslusjóðum í endurgreiðslur vegna náms eða námskeiða. Sambærileg tala fyrir árið 2021 var kr. 21.959.258,-.

Námsstyrkir árið 2022 skiptast þannig milli fræðslusjóða sem Framsýn á aðild að:

198 félagsmenn fengu greidda styrki úr Landsmennt                                                     kr. 13.197.541,-.

    6 félagsmenn fengu greidda styrki úr Sjómennt                                                           kr.      354.410,-.

  14 félagsmenn fengu greidda styrki úr Ríkismennt                                                        kr.      698.693,-.

 71 félagsmenn fengu greidda styrki úr Fræðslusjóði LÍV                                                kr.   4.408.067,-.

 35 félagsmenn fengu greidda styrki úr Sveitamennt                                                      kr.   2.436.147,-.

3 styrkir voru greiddir úr Fræðslusjóði Framsýnar á árinu 2022, samtals kr. 300.000,-.

Samtals fengu félagsmenn því greiddar kr. 21.394,858,- í námsstyrki á árinu 2022.

Fræðslusjóðirnir eru fjármagnaðir með framlögum frá fyrirtækjum, sveitarfélögum og ríkisstofnunum sbr. ákvæði þar um í kjarasamningum. Það á þó ekki við um Fræðslusjóð Framsýnar sem hefur ekki fastan tekjustofn. Þá má geta þess að félagið leggur mikið upp úr heimsóknum í skóla með fræðslu um starfsemi stéttarfélaga og vinnumarkaðinn, það er í vinnuskóla, grunnskóla og framhaldsskóla á félagssvæðinu. Þó nokkuð er um að fyrirtæki og stofnanir leiti til Framsýnar eftir fræðslu fyrir starfsmenn sem tengist réttindum og skyldum þeirra á vinnumarkaði sem er afar ánægjulegt.  Þá eru starfsmenn stéttarfélaganna reglulega beðnir um að kenna á námskeiðum er tengjast vinnurétti.

Atkvæðagreiðslu er lokið hjá 18 aðildarfélögum Starfsgreinasambands Íslands, vegna nýs kjarasamnings SGS og fjármálaráðherra f.h. ríkissjóðs sem undirritaður var 15. júní síðastliðinn. Rafræn atkvæðagreiðsla meðal félagsmanna stóð yfir dagana 16.-21. júní. Á kjörskrá voru 1.418 manns og var kjörsókn 24,26%. Já sögðu 92,44%, nei sögðu 4,65% og 2,91% tóku ekki afstöðu.

Samningurinn var því samþykktur með yfirgnæfandi meirihluta hjá þeim 18 aðildarfélögum sem eiga aðild að honum.

Eftirtalin félög eiga aðild að samningnum: Framsýn stéttarfélag, AFL Starfsgreinafélag, Aldan stéttarfélag, Báran stéttarfélag, Drífandi stéttarfélag, Eining-Iðja, Stéttarfélag Vesturlands, Stéttarfélagið Samstaða, Verkalýðsfélag Akraness, Verkalýðs- og sjómannafélag Bolungarvíkur, Verkalýðs- og sjómannafélag Sandgerðis, Verkalýðsfélag Snæfellinga, Verkalýðsfélag Suðurlands, Verkalýðsfélag Vestfirðinga, Verkalýðsfélag Þórshafnar, Verkalýðs- og sjómannafélag Keflavíkur og nágrennis og Verkalýðsfélagið Hlíf.

Niðurstöður atkvæðagreiðslu

Kjarasamningur SGS og ríkisins 2023-2024

Kauptaxtar 1. apríl 2023 – 31. mars 2024

Félagar í Framsýn sem starfa hjá ríkinu. Munið að greiða atkvæði um kjarasamning SGS og ríkisins sem Framsýn á aðld að fyrir sína félagsmenn. Lokað verður fyrir atkvæðagreiðsluna kl. 09:00 á morgun, miðvikudag. Hér er slóðin: Hér er slóðin: https://www.sgs.is/kjaramal/kjarasamningar/kjarasamningur-sgs-og-rikisins-2023-2024/

Framsýn færði nýlega Tónlistardeild Stórutjarnaskóla gjöf vegna aðkomu nemenda skólans að hátíðahöldunum 1. maí sem fram fóru á Fosshótel Húsavík á baráttudegi verkafólks.  Félaginu hefur borist þakkarbréf þar sem fram kemur þakklæti fyrir höfðinglega gjöf sem beri vott um hlýhug gefanda. Þakkað er fyrir gjöfina. Fram kemur að búið er að fjárfesta í fiðlu og cajontrommu sem mun nýtast tónlistarnemum skólans afar vel að sögn stjórnenda skólans um leið og óskað er eftir áframhaldandi farsælu samstarfi.

Aðildarfélög Skrifstofu stéttarfélaganna ásamt Verkalýðsfélagi Þórshafnar hafa í gegnum tíðina átt mjög gott samstarf um orlofsmál. Stéttarfélögin eru með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið á liðnum árum með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands. Framsýn á tvö orlofshús,  á Illugastöðum og í Dranghólaskógi og fjórar íbúðir í Kópavogi, eina á Akureyri og eina í Reykjavík. Orlofshúsið í Dranghólaskógi hefur verið notað í leiguskiptum á sumrin fyrir annað orlofshús í Svignaskarði í Borgarfirði sem er í eigu Eflingar. Leiguskiptin hafa komið vel út. Þá eiga Þingiðn og Framsýn saman íbúð í gegnum Hrunabúð sf. að Garðarsbraut 26, efri hæð sem hefur verið útleigu. Á síðasta ári dvaldi fjöldi félagsmanna ásamt fjölskyldum sínum í orlofshúsum, orlofsíbúðum, á tjaldsvæðum og hótelum á vegum félagsins. Veruleg ásókn er í orlofshúsin en félagið niðurgreiðir orlofsdvöl félagsmanna í orlofsíbúðum/húsum  sem auðveldar fólki að njóta orlofsdvalar með fjölskyldum sínum á Íslandi. Ekki er óalgengt að niðurgreiðslurnar séu um kr. 45.000 fyrir viku dvöl í þeim húsum sem félagið er með á leigu hjá öðrum aðilum. Þá fengu 86 félagsmenn endurgreiðslur vegna dvalar á tjaldsvæðum eða alls kr. 1.441.806,-. Árið áður fengu 78 félagsmenn þessa styrki, samtals kr. 1.506.910,-. Ekki var boðið upp á sumarferð 2022 þar sem ekki náðist þátttaka í sögu- og gönguferð í Bárðardal, það er niður með Skjálfandafljóti. Unnið er að því að skipuleggja ferð í sumar. Ferðin verður auglýst frekar þegar nær líður sumri. Til viðbótar gafst félagsmönnum kostur á að kaupa gistimiða og ódýr flugfargjöld með Flugfélaginu Erni á flugleiðinni Húsavík – Reykjavík. Verðið hefur undanfarið verið kr. 15.000,- per flugmiða. Ekki er ólíklegt að forsendan fyrir áætlunarflugi milli Húsavíkur og Reykjavíkur sé ekki síst samningur Framsýnar við flugfélagið. Kæmi ekki til þessa samkomulags væri farþegafjöldinn ekki sá sami og hann hefur verið allt frá því að gengið var frá samkomulaginu á sínum tíma. Þá gekk Framsýn frá samningi við Icelandair um afsláttarkjör fyrir félagsmenn. Samningurinn felur í sér að flugfélagið veitir stéttarfélaginu 10% afslátt frá fullu verði. Á móti niðurgreiðir stéttarfélagið flugmiðana til félagsmanna. Það er, félagsmenn geta verslað gjafabréf í gegnum orlofsvef stéttarfélaganna sem gefur þeim góð afsláttarkjör upp í fullt fargjald hjá Icelandair.

Stéttarfélögin, Þingiðn og Framsýn, hafa frá árinu 2016 rekið öflugt vinnustaðaeftirlit á félagssvæðinu. Um tíma voru félögin með sérstakan mann í eftirlitinu. Í heimsfaraldrinum var starfið lagt niður tímabundið. Félögin hafa nú endurráðið í starfið. Hugmyndin er að tveir starfsmenn sinni starfinu í hlutastörfum með öðrum störfum á Skrifstofu stéttarfélaganna. Þannig vilja stéttarfélögin halda úti öflugu vinnustaðaeftirliti í fullu samráði við Alþýðusamband Íslands og helstu eftirlitsaðila í Þingeyjarsýslum. Mikið hefur verið lagt upp úr góðu samstarfi við aðrar eftirlitsstofnanir. Í því sambandi hafa stéttarfélögin átt gott samstarf við Vinnueftirlitið. Félagið hefur hins vegar kallað eftir því að aðrar eftirlitsstofnanir verði virkari í vinnustaðaeftirliti s.s. Vinnumálastofnun og ríkisskattstjóri. Heilt yfir er ástand vinnumarkaðarins á starfssvæðinu gott varðandi réttindi og kjör félagsmanna. Vitaskuld hafa annað slagið komið upp mál sem krefjast viðbragða, hjá því verður ekki komist. Enn fremur er ljóst að gott ástand vinnumarkaðarins gerist ekki að sjálfu sér. Enginn vafi er á því að ef eftirlit og aðhald stéttarfélaganna væri ekki til staðar, myndi ástandið versna til muna.

Á árinu 2022 var atvinnuástandið á félagssvæði Framsýnar með miklum ágætum enda flestar atvinnugreinar búnar að ná sér eftir heimsfaraldurinn. Eins og staðan er í dag vantar starfsfólk til starfa í flestar atvinnugreinar. Kjölfestan í atvinnumálum í Þingeyjarsýslum hefur verið ferðaþjónusta, iðnaður, sjávarútvegur, landbúnaður og opinber þjónusta. Framsýn hefur átt gott samstarf við Vinnumálastofnun um að veita atvinnuleitendum á félagssvæðinu góða þjónustu. Hvað það varðar hafa aðildarfélög Skrifstofu stéttarfélaganna lagt starfsmanni Vinnumálastofnunar til skrifstofu að kostnaðarlausu en stofnunin hefur séð um að greiða starfsmanninum laun. Núverandi starfsmaður hefur bæði starfsstöðvar á Akureyri og Húsavík. Það er, hann er í hlutastarfi á Húsavík. Það sem stendur atvinnulífinu fyrir þrifum á svæðinu er vöntun á starfsmönnum og íbúðarhúsnæði.

Fyrirtækið PCC BakkiSilicon hf. greiddi mest allra atvinnurekenda  í iðgjöld til Framsýnar árið 2022 eða samtals um kr. 34,6 milljónir, það er heldur meira en sveitarfélagið Norðurþing. Árið 2021 greiddi Sveitarfélagið Norðurþing mest allra fyrirtækja eða um 25,7 milljónir. Innifalið í upphæðinni eru félagsgjöld starfsmanna og lögbundin iðgjöld atvinnurekenda í sjóði Framsýnar og í starfsmenntasjóði atvinnulífsins. Stærstu greiðendur iðgjalda til Framsýnar 2022 eftir röð:

PCC BakkiSilicon hf.

Sveitarfélagið Norðurþing

GPG. Seafood ehf.

Þingeyjarsveit

Hvammur, heimili aldraðra

Norðlenska matarborðið ehf.

Íslandshótel hf.

Ríkissjóður Íslands

Eimskip ehf.

Samherji fiskeldi ehf.

Samkaup hf.

Ellefu aðildarfélög BSRB og Samband íslenskra sveitarfélaga undirrituðu nýjan kjarasamning á áttunda tímanum í morgun. Lauk þar með 14 klukkustunda samningatörn samninganefndar BSRB. Verkfallsaðgerðum 2500 félagsmanna aðildarfélaga BSRB í 30 sveitarfélögum hefur verið aflýst.

Mánaðarlaun hækka að lágmarki um 35.000 kr. og desemberuppbót á árinu 2023 verður 131.000 kr. Samkomulag náðist um sáttagreiðslu að upphæð 105.000 kr. eftir að ríkissáttasemjari lagði fram innanhústillögu á fjórða tímanum í nótt. Auk þess var samið um hækkun á lægstu launum og viðbótargreiðslur fyrir tiltekin starfsheiti. Samningurinn gildir frá 1. apríl 2023 til 31. mars 2024 og nær til um 7000 félagsmanna BSRB.

„Það hefur verið magnað að upplifa kraftinn, samstöðuna og baráttuþrekið meðal félagsfólks okkar síðustu vikur sem og stuðning samfélagsins,“ segir Sonja Ýr Þorbergsdóttir, formaður BSRB. Margt jákvætt má finna í samningnum. „Við getum verið hóflega sátt við þessa niðurstöðu. Lægstu laun hækka verulega auk þess sem við fengum sáttagreiðslu samþykkta og hækkun á tiltekin starfsheiti.“

Félögin sem gera kjarasamninginn eru:

Félag opinbera starfsmanna á Austurlandi

FOSS – stéttarfélag í almannaþjónustu

Kjölur – stéttarfélag starfsmanna í almannaþjónustu

Sameyki – stéttarfélag í almannaþjónustu

Starfsmannafélag Garðabæjar

Starfsmannafélag Húsavíkur

Starfsmannafélag Hafnarfjarðar

Starfsmannafélag Mosfellsbæjar

Starfsmannafélag Kópavogs

Starfsmannafélag Suðurnesja

Starfsmannafélag Vestmannaeyjabæjar

Á næstu dögum munu aðildarfélög BSRB, þar á meðal Starfsmannafélag Húsavíkur, kynna samningana fyrir sínu félagsfólki. Eftir það verða samningarnir bornir undir atkvæði félagsmanna. Frekari upplýsingar verður hægt að nálgast á heimasíðu stéttarfélaganna.