kuti

Fundur hefur verið boðaður í stjórn og trúnaðarmannaráði Framsýnar þriðjudaginn 1. mars kl. 17:00 í fundarsal stéttarfélaganna. Að venju eru mörg mál á dagskrá fundarins.
Dagskrá:
1. Fundargerð síðasta fundar
2. Inntaka nýrra félaga
3. Kjaramál
4. Fundur SGS með ungu fólki
5. Samningur við Flugfélagið Erni
6. Samskipti við verktaka á svæðinu
7. Átakið: Einn réttur – ekkert svindl
8. Kjör í stjórnir, ráð og nefndir á vegum félagsins fyrir næsta kjörtímabil
9. Aðalfundur félagsins
10. Fjárhagsáætlun Skrifstofu stéttarfélaganna
11. Merkingar á húsnæði félaganna
12. Tilboð í breytingar á húsnæði stéttarfélaganna
13. Ráðning starfsmanns í eftirlit
14. Önnur mál.
a. N1-kortið
b. Löggilding félagsliða

Innan samninganefndar Sjómannasambands Íslands liggur fyrir samþykkt að hefja undirbúning verkfallsaðgerða. Jafnframt að reyna til þrautar á næstu vikum að ná samningum við Samtök fyrirtækja í sjávarútvegi. Gangi það ekki eftir má búast við hörðum aðgerðum á næstu mánuðum. Samningar sjómanna og útgerðar hafa verið lausir frá árinu 2011 og kjaradeilan verið á borði ríkissáttasemjara frá 2012. Deilan snertir á fimmta þúsund sjómenn.

Virðingarleysi Samtaka fyrirtækja í sjávarútvegi í garð sjómanna er algjört. Það er á þeirra ábyrgð komi til verkfallsátaka á næstu mánuðum.

Eins og fram hefur komið í fjölmiðlum hefur karlmaður verið í haldi lögreglu vegna gruns um mansal í Vík í Mýrdal. Fjölmennt lið lögreglumanna tók þátt í aðgerðum í Vík vegna málsins. Mansalsteymi höfuðborgarsvæðisins var fengið til aðstoðaðar og vöktu aðgerðirnar athygli á landsvísu. Lögreglumenn leituðu þolenda mansals sem þeir höfðu fengið ábendingar um að væru nýttir sem þrælar til vinnu. Tvær konur fundust og hafa stöðu þolenda mansals samkvæmt áreiðanlegum heimildum fjölmiðla sem fjallað hafa um málið.

Því miður virðist sem svona ljótum málum sé að fjölga töluvert á landinu er tengist sérstaklega þeim uppgangi sem er í þjóðfélaginu, ekki síst í byggingariðnaði og ferðaþjónustu.

Stéttarfélögin í Þingeyjarsýslum fylgjast grand með þróun mála á félagssvæði stéttarfélaganna. Svona ljót mál hafa sem betur fer ekki komið upp. Félögin hafa þó þurft að koma að kynferðismálum og í ákveðnum tilfellum orðið að fela fólk tímabundið vegna ofsókna á vinnustöðum, það er frá yfirmönnum.

Eftirlit stéttarfélaganna hefur aðallega einkennst að því að fylgjast með aðbúnaði og launakjörum starfsmanna. Í eftirlitsferðum félaganna á vinnustaði frá sumrinu 2015 hafa komið upp rúmlega 60 mál fyrir einstaka starfsmenn er tengjast erlendum fyrirtækjum sem starfa í skjóli íslenskra fyrirtækja. Í öllum tilvikum var um að ræða að starfsmennirnir fengu ekki greitt laun eftir íslenskum lágmarkskjörum. Málin eru nú vonandi upplýst en viðkomandi fyrirtæki sem áttu í hlut og starfa í byggingar- og matvælaiðnaði báru við mistökum. Ætlunin hefði ekki verið að hlunnfara erlendu starfsmennina. Reyndar eru þetta stöðluð viðbrögð þegar stéttarfélögin gera athugasemdir við kjarasamningsbrot fyrirtækja gagnvart erlendum starfsmönnum, það er að um mistök sé um að ræða og þau verði leiðrétt.

Reyndar eru dæmi um að fyrirtæki neiti því að verða við kröfu stéttarfélaganna um að leiðrétta kjör starfsmanna og eru þá þeim málum vísað til lögfræðinga til innheimtu.

Þeir sem lesa þessa umfjöllun, taka væntanlega eftir því, að talað er um að málin séu væntanlega upplýst. Hér er átt við að oft reynist erfitt að fylgjast með því hvort erlendu fyrirtækin standi í raun við að gera upp við starfsmenn samkvæmt íslenskum kjarasamningum enn allt er gert að hálfu stéttarfélaganna til að fylgja því eftir.

Annað sem er vaxandi vandamál og reyndar mjög alvarlegt. Það er að fyrirtæki, ekki síst í landbúnaði og ferðaþjónustu hafa í auknum mæli auglýst eftir erlendum sjálfboðaliðum til starfa, það er upp á fæði og húsnæði. Þannig eru fyrirtækin að koma sér hjá því að greiða kjarasamningsbundin laun og þar með skatta og aðrar skyldur í ríkisjóð. Þessi fyrirtæki halda eftir launum starfsmanna og styrkja þannig samkeppnisstöðuna gagnvart öðrum alvöru fyrirtækjum sem fara að lögum og eru í samkeppni við fyrirtækin sem sniðganga lög og reglur. Slíkt á ekki að líðast enda grafa undirboðin undan eðlilegum rekstri fyrrirtækja.

Því miður má sjá fyrirtæki á félagssvæði stéttarfélaganna í Þingeyjarsýslum sem fara þessa leið, það er að auglýsa eftir sjálfboðaliðum til starfa. Félögin hafa þegar gert athugasemdir við vinnulag þessara aðila þar sem slíkt er ólöglegt enda um efnahagslega starfsemi að ræða. Þá eru félögin, Framsýn, Þingiðn og Verkalýðsfélag Þórshafnar aðilar að verkefni á vegum Alþýðusambands Íslands, „Einn réttur ekkert svindl“ sem ætlað er að sporna við þessari alvarlegu þróun.

Á þessum síðum má sjá fyrirtæki sem auglýsa eftir sjálfboðaliðum til starfa: www.workaway.info og www.helpx.net.

Það er alveg ljóst að gera verður skýran greinarmun á ólaunaðri vinnu í efnahagslegri starfsemi annars vegar og ólaunaðri samfélagslegri vinnu (sjálfboðavinnu) hins vegar. Ólaunuð vinna við efnahagslega starfsemi, framleiðslu og sölu á vöru eða þjónustu á markaði (í hagnaðarskyni) oft í samkeppni við fyrirtæki í sömu atvinnustarfsemi, felur í sér óásættanleg undirboð á íslenskum vinnumarkaði og stenst hvorki kjarasamninga né lög. Dæmi um efnahagslega starfsemi þar sem gjarnan finnst fólk í ólaunaðri vinnu skv. athugun ASÍ er fyrst og fremst við ýmiss konar ferðaþjónustu, nánar tiltekið vinnu á kaffi- og veitingahúsum, á gistiheimilum og hótelum, hestaleigum og við hellaskoðanir auk ýmiskonar blandaðra starfa á sveitabýlum og/eða við bændagistingu.

Rétt er að taka fram að fæði og húsnæði geta verið hluti af endurgjaldi fyrir vinnu. Í sumum kjarasamningum er tiltekið að starfsmaður skuli fá fæði og húsnæði sér að kostnaðarlausu auk kjarasamningsbundinna launa. Í öðrum samningum er heimild atvinnurekanda til að draga af kjarasamningsbundnum launum starfsmanns vegna fæðis og húsnæðis sem honum er lagt til en þó með miklum takmörkunum. Forsendan er alltaf sú að kjarasamningum sé fylgt. Það þýðir að ráðningarsamningur sé gerður, lágmarkslaun að minnsta kosti greidd og gefinn út launaseðill þar sem fram koma laun og önnur starfskjör og heimilaðir frádráttarliðir. Allt endurgjald fyrir vinnu skal síðan telja fram til skatts og skila hinu opinbera, stéttarfélögum og sjóðum því sem þeirra er. Ólaunuð vinnu við efnahagslega starfsemi þýðir að atvinnurekendur sem nota hana hagnast á kostnað samneyslunnar og skapa sér bæði ósanngjarnt og ólöglegt samkeppnisforskot á markaði. ASÍ hefur óskað eftir ákvarðandi bréfi frá RSK um þetta efni.
Ólaunuð vinna borgara frá löndum utan EES við efnahagslega starfsemi þýðir að viðkomandi fyrirtæki gerast brotleg við lög um atvinnuréttindi útlendinga og baka sér refsiábyrgð í leiðinni.

Úrræði s.s. á grundvelli laga nr. 80/1938 um stéttarfélög og vinnudeilur og samninga ASÍ og SA um vinnustaðaeftirlit og útlendinga á íslenskum vinnumarkaði færa stéttarfélögum starfsmanna sem hagsmuna eiga að gæta fjölmörg úrræði til að takmarka undirboð á vinnumarkaði með ólaunaðri vinnu.

Einstaklingar sem „ráða sig“ í ólaunaða vinnu njóta ekki tryggingaverndar eins og kjarasamningar kveða á um og gagnvart sjúkra- og almannatryggingakerfinu njóta mjög takmarkaðra réttinda. Almennt má álykta að viðkomandi einstaklingar njóti mjög takmarkaðrar tryggingaverndar.

ASÍ og aðildarsamtök þess, þar á meðal stéttarfélögin í Þingeyjarsýslum, munu ekki þola undirboð á vinnumarkaði og brot sem felast í ólaunaðri vinnu í efnahagslegri starfsemi. Jafnframt hefur ASÍ kallað eftir samstarfi við stjórnvöld og Samtök atvinnulífsins um að uppræta slíka brotastarfsemi.

Til að bregðast við hertu eftirliti verður ráðinn sérstakur starfsmaður í verkefnið á næstu dögum. Umsóknarfrestur um starfið rennur út í dag. Undirboð og þar með kjarasamningsbrot verða ekki liðin á félagssvæði stéttarfélaganna.

Sameiginlegri allsherjaratkvæðagreiðslu félagsmanna aðildarsamtaka ASÍ um kjarasamning milli aðildarsamtaka ASÍ og SA frá 21. janúar 2016 lauk kl. 12 á hádegi í dag.

Já sögðu 9.274 eða 91,28%. Nei sögðu 832 eða 7,81%. Auðu skiluðu 97 eða 0,91%. Kjarasamningurinn var því samþykktur.

Á kjörskrá voru 75.635. atkvæði greiddu 10.653 eða 14,08%.

Framsýn, Þingiðn og Verkalýðsfélag Þórshafnar áttu aðild að þessari atkvæðagreiðslu um kjarasamninginn enda innan Alþýðusambands Íslands.

Í gær var lagt fram á Alþingi frumvarp til laga um breytingu á lögum um hlutafélög og lögum um einkahlutafélög (kennitöluflakk). Flutningsmenn eru fulltrúar allra flokka sem sitja á Alþingi annarra en Sjálfstæðisflokksins. Meginefni frumvarpsins er að lagt til að stofnendur, stjórnarmenn og framkvæmdastjórar hlutafélaga megi ekki á næstliðnum þremur árum hafa verið í forsvari fyrir tvö eða fleiri félög sem orðið hafa gjaldþrota. Hér undir fellur einnig það þegar stofnendur, stjórnarmenn eða framkvæmdastjórar hafa hætt störfum áður en félag verður gjaldþrota og það fært undir stjórn svokallaðra útfararstjóra sem ganga með fyrirtækið í gjaldþrot. Um hæfisskilyrði er að ræða sem einstaklingar, sem ætla að stofna fyrirtæki, gerast stjórnarmenn eða eru ráðnir sem framkvæmdastjórar, þurfa að uppfylla.

Þetta eru fyrstu tilburðir á Alþingi um árabil til að stemma stigu við kennitöluflakki, þrátt fyrir að sá mikil samfélagslegi skaði sem kennitöluflakkið veldur sé löngu þekktur. En kennitöluflakkið þýðir milljarða tap fyrir sameiginlega sjóði landsmanna, auk þess skaða sem það veldur einstaklingum og atvinnulífinu öllu. Að vísu má gagnrýna að ekki sé gengið lengra og lagðar til frekari aðgerðir í baráttunni gegn kennitöluflakkinu. Það ber þó að fagna þessu frumkvæði um leið og vænta má þess að því verði fylgt frekar eftir. Í því sambandi er rétt að minn á tillögur sem Alþýðusambandið hefur sett fram til að sporna gegn kennitöluflakkinu ásamt greinargerð um það efni.

Um leið vekur framtak flutningsmannanna athygli á þeirri staðreynd að iðnaðar- og viðskiparáðherra sem fer með málaflokkinn hefur þrátt fyrir stefnuyfirlýsingu ríkisstjórnarinnar ekki aðeins látið hjá líða að gera nokkuð til að sporna við þeirri samfélagslegu meinsemd sem kennitöluflakkið er heldur hreinlega lagst gegn öllum hugmyndum í þeim efnum. Þannig er haft eftir Ragnheiður Elín Árnadóttir, iðnaðar- og viðskiptaráðherra, í frétt á RÚV að hún „efist hins vegar um að frumvarp Karls virki eins og best verði á kosið. Það sé til að mynda of íþyngjandi fyrir nýsköpunarfyrirtæki þar sem menn þurfa oft á tíðum að gera margar tilraunir með rekstur.“ Gera verður kröfu til þess að ráðherrann skýri hvað hún á við, en í greinargerð ASÍ kemur m.a. fram að allmargir einstaklingar hafi á fáum árum sett 10 fyrirtæki eða fleiri í þrot með stórkostlegum skaða fyrir samfélagið. Þar af setti sami einstaklingur 29 fyrirtæki í þrot og fékk að halda áfram óáreittur. Er það nýsköpun og frumkvöðlastarfsemi að skapi ráðherrans?

Atkvæðagreiðslu meðal launþega á almenna vinnumarkaðinum um nýja kjarasamninginn milli aðildarfélaga ASÍ og SA líkur í dag kl. 12:00. Um er að ræða sameiginlega atkvæðagreiðslu meðal þessara félaga innan Alþýðusambandsins.

Samningurinn tekur til þeirra almennu kjarasamninga sem aðildarfélög ASÍ gerðu frá maí til september 2015. Um 76 þúsund félagsmenn eru á kjörskrá. Í fyrradag voru rúmlega 10 þúsund félagsmenn stéttarfélaganna búnir að kjósa sem hlýtur að teljast mjög lélegt. Ekki er ólíklegt að um 20% félagsmanna kjósi í heildina en það mun skýrast síðar í dag.

Verði samningurinn samþykktur í yfirstandandi atkvæðagreiðslu gildir hann frá 1. janúar 2016 til 31. desember 2018. Samningurinn byggir á rammasamkomulagi aðila vinnumarkaðarins frá 27. október 2015 og bókun um jöfnun lífeyrisréttinda frá 5. maí 2011. Þá er skelfilegt til þess að vita að unnið er hörðum höndum að því að innleiða svokallað Salek samkomulag sem veit ekki á gott fyrir tekjulægsta fólkið eins og þessi kjarasamningur ber með sér.

Það jákvæða við kjarasamninginn er að framlög atvinnurekenda í lífeyrissjóði starfsmanna aukast á samningstímanum úr 8% í 11,5%, það er í áföngum:

1. júlí 2016 um 0,5% og verður 8,5%
1. júlí 2017 um 1,5% og verður 10,0%
1. júlí 2018 um 1,5% og verður 11,5%

Í boði verður að skipta auka framlaginu milli séreignar og sameignar sjóðfélaga. Því miður var ekki gengið frá skiptingunni í kjarasamningnum milli þessara tveggja kerfa sem er ámælisvert. Eðlilegra hefði verið að félagsmenn vissu um fyrirkomulagið áður en þeir greiddu atkvæði um samninginn þar sem mjög skiptar skoðanir eru innan verkalýðshreyfingarinnar um hvernig ráðstafa eigi viðbótarframlaginu í lífeyrissjóði. Það mun hins vegar skýrast á næstu mánuðum, það er eftir afgreiðslu samningsins.
Þessar breytingar á framlögum í lífeyrissjóði starfsmanna eru í áttina en því miður næst ekki fullur jöfnuður á við opinbera starfsmenn þar sem lífeyrissjóður þeirra er ríkistryggður og verður því áfram mun betri. Vissulega er þetta skref í áttina en ekki fullnægjandi því miður.

Það neikvæða við samninginn er að þeir lægst launuðu eru skyldir eftir hvað varðar launaleiðréttingar. Þannig hækka þeir félagsmenn stéttarfélaganna innan Starfsgreinasambands Íslands sem eru í lægstu launaflokkunum s.s. fólk í ferðaþjónustu ekki við þennan samning umfram áður samþykktar hækkanir. Vissulega kemur öllum til góða að launahækkanir sem koma áttu til framkvæmda 1. maí 2016 verður flýtt til 1. janúar 2016.

Millitekjufólk og starfsfólk með hærri tekjur fær hins vegar viðbótarhækkanir umfram áður umsamdar hækkanir. Í stað þess að fá 5,5% hækkun 1. maí 2016 kemur til 6,2% hækkun frá 1. janúar 2016. Þá kemur til 4,5% hækkun 1. maí 2017 í stað 3% hækkunar frá sama tíma. Að lokum kemur 3% hækkun til 1. maí 2018 í stað 2% frá sama tíma. Þessir hópar fá því í heildina um 3,2% í hækkun umfram áður umsamdar launahækkanir + breytingar á framlögum atvinnurekenda í lífeyrissjóði. Af hverju ekki var talin ástæða til að leiðrétta kjör þeirra lægst launuðu til samræmis við aðra hópa er óskiljanlegt með öllu.

Í dag mun svo skýrast hvort kjarasamningurinn verður samþykktur eða ekki. Því miður hefur verið lítil umræða um samninginn og mæting á kynningarfundi hjá aðildarfélögum Alþýðusambandsins hefur á flestum stöðum verið mjög léleg. Full ástæða er til að hafa áhyggjur af þessu áhugaleysi ekki síst þar sem lífsafkoma fólks byggir á framfærslu fólks í gegnum launaumslagið.

Í gær voru opnuð tilboð í breytingar á húsnæði stéttarfélaganna að Garðarsbraut 26. Stéttarfélögin eignuðust fyrir nokkrum árum efri hæðina í húsinu, Árgötu megin. Samkvæmt útboðinu er reiknað með átta skrifstofum, kaffistofu og eldhúsi og á verkinu að vera lokið í byrjun sumars. Þrír verktakar náðu í útboðsgögn og einn skilaði inn tilboði, trésmíðafyrirtækið H-3 ehf. á Húsavík sem er nokkuð hærra en kostnaðaráætlunin gerir ráð fyrir. Tilboðið verður skoðað á næstu dögum. Í framhaldi af því verður tekin ákvörðun um næstu skref í málinu.

 

 

 

 

 

 

 

 

 

Eitt tilboð barst í breytingar á húsnæði stéttarfélaganna að Garðarsbraut 26 á Húsavík.

Stéttarfélögin í Þingeyjarsýslum hafa endursamið við N1 um afsláttarkjör fyrir félagsmenn. Í boði er afsláttur á bensíni, bílaþjónustu, bílatengdum rekstrarvörum og veitingum. Félagsmenn geta nálgast kortin á Skrifstofu stéttarfélaganna. Helstu afslættir eru; 10% af veitingum og sælgæti, 12% af bílatengdum vörum og ýmsum rekstrarvörum og 12% af bílaþjónustu. Þá er 7 króna afsláttur af dæluverði á hvern lítra.

Um þessar mundir eru iðnaðarmenn að setja upp merkingar á Skrifstofu stéttarfélaganna en húsnæði stéttarfélaganna var tekið í gegn í sumar að utanverðu og því þótti við hæfi að endurnýja upplýsingar um félögin sem verið hafa á utan á húsinu. Reiknað er með að uppsetningu á nýjum merkingum á Skrifstofu stéttarfélaganna ljúki í dag.

Fulltrúar frá Framsýn og Verkalýðsfélagi Þórshafnar komu saman á Þórshöfn í gær til að fara yfir samstarf félaganna sem hefur verið farsælt í gegnum tíðina. Hugmyndir eru uppi um breytingar á samstarfinu sem verða til umræðu innan félaganna á næstu vikum.

Formaður Framsýnar tók þátt í fundi um öryggismál í Vaðlaheiðargöngum fyrir helgina en hann situr í sérstökum starfshóp fyrir þau stéttarfélög sem aðkomu eiga að göngunum í gegnum félagsmenn sem þar starfa. Almennt eru öryggismálin í lagi og sem betur fer hefur verið mjög lítið um óhöpp og slys. Vaðlaheiðargöng eru veggöng sem verið er að gera undir Vaðlaheiði við Eyjafjörð. Göngin eru um 7,2 km í bergi milli Eyjafjarðar og Fnjóskadals og heildarlengd vegskála er 280m, samtals 7,5 km. Með göngunum styttist vegalengd milli Akureyrar og Húsavíkur um 16 km og ekki þarf lengur að fara um Víkurskarð sem er fjallvegur þar sem færð spillist gjarnan að vetrum. Um þessar mundir er lokið við að grafa um 4.779 metra eða um 66% af göngunum.

 

 

 

 

 

 

 

 

 

Fulltrúar frá Landsneti voru á Húsavík á dögunum og funduðu meðal annars með fulltrúum Framsýnar en framundan eru stórframkvæmdir á vegum Landsnets á svæðinu. Þess má geta að tilboð í undirbúningsvinnu vegna byggingar tveggja 220 kílóvolta (kV) háspennulína á Norðausturlandi, Þeistareykjaínu 1 og Kröflulínu 4, voru opnuð hjá Landsneti fyrir helgina. Á heimasíðu Landsnets kemur fram að tveir verktakar hafi boðið í báða verkhlutana og verkið í heild en tveir buðu bara í undirbúning Kröflulínu 4.
Verkið felur í sér gerð vegslóðar með línunum tveim sem lagðar verða milli Kröflustöðvar, Þeistareykja og Bakka við Húsavík, ásamt gerð hliðarslóða og vinnuplana við möstur, efnisútvegun og framleiðslu undirstaða, stagfesta og stálhluta og jarðvinnu við niðurlögn undirstaða og stagfesta. Línuleiðin er rúmur 61 km og möstrin 193 talsins og skal undirbúningsvinnu við Kröflulínu 4 lokið 1. ágúst 2016 en allri undirbúningsvinnu vegna beggja línanna skal lokið að fullu 1. október 2016.

Tilboð yfir kostnaðaráætlun
Kostnaðaráætlun fyrir undirbúningsvinnu línanna tveggja hljóðar upp á rúmlega 810 milljónir króna og var útboðið þrískipt. Hægt var að bjóða sérstaklega í undirbúning hvorrar línu fyrir sig en einnig verkið allt – en þó því aðeins að viðkomandi hefði þá líka skilað inn tilboðum í undirbúning hvorrar línu fyrir sig.

Alls bárust tilboð frá fjórum aðilum, þar af frá tveimur í undirbúning beggja línanna sem og verkið í heild en tveir aðilar buðu bara í undirbúningsvinnu vegna Þeistareykjalínu 1. Árni Helgason átti lægra tilboðið í undirbúning hennar, um 469,5 milljónir króna (kostnaðaráætlun 386,4 milljónir) en G. Hjálmarsson átti lægsta tilboðið í undirbúning Kröflulínu 4, um 448,5 milljónir króna (kostnaðaráætlun 430 milljónir).

Landsnet mun nú fara yfir tilboðin og bera þau saman. Á grundvelli þeirrar niðurstöðu verður síðan gengið til samninga við þann eða þá aðila sem eiga hagstæðasta tilboð, að því gefnu að hann eða þeir uppfylli kröfur um hæfi.

Aukið orkuöryggi á Norðausturlandi
Tenging Þeistareykjavirkjunar við iðnaðarsvæðið á Bakka og tenging við meginflutningskerfið er umtalsverður þáttur í þeirri iðnaðaruppbyggingu sem hafin er á Norðausturlandi. Öflug tenging við meginflutningskerfið tryggir jafnframt enn betur orkuöryggi íbúa og fyrirtækja á svæðinu. Verklok við byggingu línanna eru áætluð haustið 2017. Unnið verður við slóðagerð og undirstöður í sumar en vinna við yfirbyggingu og strengingu leiðara fer að mestu fram sumarið 2017. (landsnet.is)

Félagsmenn Framsýnar og Verkalýðsfélags Þórshafnar eiga að hafa fengið kjörgögn í hendur til að greiða atkvæði um nýgerðan kjarasamning Samtaka atvinnulífsins og aðildarfélaga Alþýðusambands Íslands. Um er að ræða félagsmenn þessara félaga sem starfa eftir kjarasamningum Samtaka atvinnulífsins annars vegar og Starfsgreinasambands Íslands og Landssambands ísl. verslunarmanna hins vegar. Félagsmenn sem fá ekki kjörgögn í hendur, en telja sig hafa kjörgengi, eru vinsamlegast beðnir um að hafa samband við skrifstofur félaganna. Atkvæðagreiðsla hefst kl. 08:00 þann 16. febrúar og stendur til hádegis þann 24. febrúar.

Framsýn
Verkalýðsfélag Þórshafnar

Framsýn, stéttarfélag stóð fyrir trúnaðarmannanámskeiði fyrir helgina. Mætting á námskeiðið var verulega góð en um 25 trúnaðarmenn tóku þátt í námskeiðinu. Auk þess að sitja á námskeiði áttu trúnaðarmennirnir saman góða kvöldstund þar sem farið var í golf auk þess sem menn borðuðu saman góðan kvöldverð á veitingastaðnum Sölku. Ungir trúnaðarmenn voru áberandi á námskeiðinu enda greinilega verulegur áhugi meðal ungs fólks að taka þátt í starfi Framsýnar. Sjá myndir:

Gera verður skýran greinarmun á ólaunaðri vinnu í efnahagslegri starfsemi annars vegar og ólaunaðri samfélagslegri vinnu (sjálfboðavinnu) hins vegar. Ólaunuð vinna við efnahagslega starfsemi, framleiðslu og sölu á vöru eða þjónustu á markaði (í hagnaðarskyni) oft í samkeppni við fyrirtæki í sömu atvinnustarfsemi, felur í sér óásættanleg undirboð á íslenskum vinnumarkaði og stenst hvorki kjarasamninga né lög. Dæmi um efnahagslega starfsemi þar sem gjarnan finnst fólk í ólaunaðri vinnu skv. athugun ASÍ er fyrst og fremst við ýmiss konar ferðaþjónustu, nánar tiltekið vinnu á kaffi- og veitingahúsum, á gistiheimilum og hótelum, hestaleigum og við hellaskoðanir auk ýmiskonar blandaðra starfa á sveitabýlum og/eða við bændagistingu.
Rétt er að taka fram að fæði og húsnæði geta verið hluti af endurgjaldi fyrir vinnu. Í sumum kjarasamningum er tiltekið að starfsmaður skuli fá fæði og húsnæði sér að kostnaðarlausu auk kjarasamningsbundinna launa. Í öðrum samningum er heimild atvinnurekanda til að draga af kjarasamningsbundnum launum starfsmanns vegna fæðis og húsnæðis sem honum er lagt til en þó með miklum takmörkunum. Forsendan er alltaf sú að kjarasamningum sé fylgt. Það þýðir að ráðningarsamningur sé gerður, lágmarkslaun að minnsta kosti greidd og gefinn út launaseðill þar sem fram koma laun og önnur starfskjör og heimilaðir frádráttarliðir. Allt endurgjald fyrir vinnu skal síðan telja fram skatts og skila hinu opinbera, stéttarfélögum og sjóðum því sem þeirra er. Ólaunuð vinnu við efnahagslega starfsemi þýðir að atvinnurekendur sem nota hana hagnast á kostnað samneyslunnar og skapa sér bæði ósanngjarnt og ólöglegt samkeppnisforskot á markaði. ASÍ hefur óskað eftir ákvarðandi bréfi frá RSK um þetta efni.
Ólaunuð vinna borgara frá löndum utan EES við efnahagslega starfsemi þýðir að viðkomandi fyrirtæki gerast brotleg við lög um atvinnuréttindi útlendinga og baka sér refsiábyrgð í leiðinni.
Úrræði s.s. á grundvelli laga nr. 80/1938 um stéttarfélög og vinnudeilur og samninga ASÍ og SA um vinnustaðaeftirlit og útlendinga á íslenskum vinnumarkaði færa stéttarfélögum starfsmanna sem hagsmuna eiga að gæta fjölmörg úrræði til að takmarka undirboð á vinnumarkaði með ólaunaðri vinnu.
Einstaklingar sem „ráða sig“ í ólaunaða vinnu njóta ekki tryggingaverndar eins og kjarasamningar kveða á um og gagnvart sjúkra- og almannatryggingakerfinu njóta þeir mjög takmarkaðra réttinda. Almennt má álykta að viðkomandi einstaklingar njóti mjög takmarkaðrar tryggingaverndar.
ASÍ og aðildarsamtök þess munu ekki þola undirboð á vinnumarkaði og brot sem felast í ólaunaðri vinnu í efnahagslegri starfsemi. Jafnframt hefur ASÍ kallað eftir samstarfi við stjórnvöld og Samtök atvinnulífsins um að uppræta slíka brotastarfsemi.

Börn og unglingar á Húsavík og reyndar fullorðnir líka hafa farið víða í dag til að syngja og spila fyrir starfsmenn fyrirtækja, verslana og stofnana. Meðal vinnustaða sem heimsóttir hafa verið er Skrifstofa stéttarfélaganna. Sjá skemmtilegar myndir frá heimsóknum í dag á skrirfstofuna, takk fyrir okkur:

Stéttarfélögin í Þingeyjarsýslum leita að öflugum liðsmanni til starfa hjá félögunum á Húsavík. Starfsmanninum er ætlað að gegna eftirlitsstarfi með kjörum og réttindum starfsmanna er tengjast atvinnuuppbyggingu á Bakka við Húsavík auk þess að sinna almennu vinnustaðaeftirliti. Þá er starfsmanninum ætlað að vinna almenn störf á Skrifstofu stéttarfélaganna á Húsavík s.s. túlkun kjarasamninga.

Hæfniskröfur:
 Góð mannleg samskipti
 Góð enskukunnátta
 Góð tölvukunnátta

Skriflegum umsóknum skal skilað í lokuðu umslagi á Skrifstofu stéttarfélaganna Garðarsbraut 26, 640 Húsavík fyrir 25. febrúar 2016. Þá er einnig hægt að senda umsóknina á netfangið kuti@framsyn.is fyrir auglýstan frest.

Forstöðumaður Skrifstofu stéttarfélaganna, Aðalsteinn Árni Baldursson, veitir frekari upplýsingar um starfið.

Stéttarfélögin í Þingeyjarsýslum eru ein öflugustu stéttarfélög landsins en um 2.700 félagsmenn eru innan þessara félaga. Á skrifstofu félaganna á Húsavík starfa fimm starfsmenn. Hægt er fræðast frekar um starfsemi félaganna á heimasíðu félaganna www.framsyn.is

Framsýn, stéttarfélag
Þingið, félag iðnaðarmanna
Starfsmannafélag Húsavíkur

Þrátt fyrir vetrarveður er framkvæmdum fram haldið á Þeistareykjum, bæði utan og innan húss. Eftirlitsmenn frá Framsýn og Vinnumálastofnun fóru fyrir helgina í sameiginlega eftirlitsferð um svæðið. Heilsað var upp á innlenda og erlenda starfsmenn auk þess sem menn voru spurðir út í vinnustaðaskírteini sem starfsmönnum ber að hafa.  Því miður voru ekki allir starfsmenn undirverktakana með skírteini. Þeim var gefinn kostur á að laga það, að öðrum kosti verði þeir sektaðir í samræmi við gildandi lög um Vinnustaðaskírteini.

Í vikunni fékk skrifstofa stéttarfélaganna góða gesti frá Borgarhólsskóla í heimsókn. Um var að ræða nemendur í 10. bekki. Þessa dagana standa yfir þemadagar hjá þeim, þar sem
„gömlu“ námsgreinarnar eru lagðar til hliðar, þess í stað takast þau á við praktísk viðfangsefni. Í heimsókn sinni á skrifstofu stéttarfélaganna fengu þau upplýsingar um starfsemi Framsýnar – stéttarfélags, réttindi og skyldur á vinnumarkaði, ráð í starfsleit, upplýsingar um ráðningu og tímaskrift. Önnur viðfangsefni þeirra þennan dag voru m.a. fjármálafræðsla og baráttusaga verkalýðshreyfingarinnar. Almennt virtust unglingarnir bjartsýn á störf n.k. sumar, flest eru að huga að starfi í sumar og nokkur þeirra eru nú þegar að starfa með skólanum. Eitt það mikilvægasta sem ungir þátttakendur þurfa að huga að þegar þeir fara á vinnumarkað er að skrá niður vinnutímann, í því augnarmiði að bera hann síðan samann við launaseðilinn. Gott verkfæri er nú til staðar til að nota við tímaskriftina, ASÍ hefur látið þróa App sem ætlað er til að halda utan um tímaskrift. Appið er aðgengilegt og auðvelt í notkun. Það hefur hlotið nafnið KLUKK og er aðgengilegt fyrir tölvur og allar tegundir síma í forritabönkunum App store og Play store.

Ágúst Óskarsson starfsmaður stéttarfélaganna tók á móti ungum nemendum úr Borgarhólsskóla og gerði þeim grein fyrir starfsemi stéttarfélaga. Nemendurnir komu í þremur hópum.

Það voru ekki margir sem lögðu leið sína á sameiginlegan fund Framsýnar og Þingiðnar um nýgerðan kjarasamning Samtaka atvinnulífsins og aðildarfélaga Alþýðusambandsins. Á fundinum sem haldinn var í vikunni var farið yfir helstu atriði samningsins og fyrirkomulag atkvæðagreiðslunnar um samninginn. Á næstu dögum munu þeir sem hafa atkvæðisrétt um samninginn fá kjörgögn í hendur.