Ingvar Þorvaldsson býður til málverkasýningar í Safnahúsinu á Húsavík í dag, laugadaginn 19. mars kl. 15.00. Sýningin verður opin daglega frá kl. 15.00 til 18.00. Sýningarlok verða síðan 28. mars. Að mati heimasíðu stéttarfélaganna er Ingvar einn af okkar bestu málurum, þess vegna ekki síst er skorað á Þingeyinga og aðra landsmenn sem leið eiga um Húsavík um páskana að koma við í Safnahúsinu og njóta listarinnar eftir Ingvar málara.
Því er fagnað á Húsavík að ný verslun Nettó opnaði í dag. Verslunin er til húsa á Garðarsbraut 64 þar sem áður var verslunin Samkaup Úrval. Margmenni var í versluninni nú á opnunardaginn og heyra mátti á viðstöddum að almenn ánægja væri með breytingarnar. Að sögn Halls G. Heiðarssonar, rekstrarstjóra Nettó og Kaskó, er vilji fyrirtækisins að veita heimamönnum góða þjónustu í nýju versluninni um leið og vöruúrval mun aukast umtalsvert. Stéttarfélögin í Þingeyjarsýslum fagna þessari breytingu enda ljóst að um talsverða kjarabót er að ræða fyrir íbúa á svæðinu um leið og vöruúrvalið mun aukast til muna. Samkaup hf. hefur skipulagt frekari breytingar á starfsemi sinni á Húsavík en versluninni Kaskó sem er til húsa á Garðarsbraut 5 verður breytt verulega á næstu vikum. Hér má sjá nokkrar myndir sem voru teknar við opnunina í dag.
Opnað hefur verið fyrir umsóknir um orlofshús sumarið 2016. Búið er að koma upplýsingum þess efnis inn á heimasíðu stéttarfélaganna. Þar er einnig að finna umsóknareyðublöð um orlofshús. Sama verð verður milli ára, það er kr. 26.000 fyrir vikuna og framboð orlofshúsa verður með sambærilegum hætti milli ára. Þá hefur verið samþykkt að hækka endurgreiðslur til félagsmanna vegna tjaldstæðisstyrkja, það er úr kr. 18.000 upp í kr. 20.000. Til viðbótar má geta þess að unnið er að því að skipuleggja skemmtilega og fróðlega göngu um Laxárdalinn í ágúst. Ferðin verður auglýst síðar. Næsta Fréttabréf stéttarfélaganna kemur út eftir helgina með frekari upplýsingum um orlofskostina. Góða skemmtun félagar.
Opnað hefur verð verið umsóknir um orlofshús sumarið 2016.
Starfsgreinasambandið undirritaði í dag nýjan kjarasamning við Landssamband smábátaeigenda vegna starfsfólks sem vinnur við uppstokkun eða beitningu í landi annarra en þeirra sem eru hlutaráðnir. Samningurinn gildir jafnframt fyrir starfsmenn sem starfa við netavinnu. Samið var um sams konar hækkanir og samið var um í almenna kjarasamningnum á milli ASÍ og SA, þ.e. til viðbótar við þá samninga sem þegar höfðu verið gerðir var samið um auka kauphækkanir og hærra framlag atvinnurekenda í lífeyrissjóð. Kauphækkanir verða afturvirkar frá 1. janúar 2016 og hækkar kauptryggingin þá um 8,7% í stað 8% eins og samið hafði verið um áður. Unnið er að útgáfu nýrra kauptaxta og nýs heildarsamnings sem birtur verður eins fljótt og auðið er. Samningurinn verður lagður fyrir stjórnir SGS og LS fyrir lok mánaðarins.
Nýjan kjarasamning má nálgast hér: Kjarasamningur SGS og LS 2016 – undirritað.
Síðustu vikurnar hefur verið unnið að því að uppfæra kjarasamninga m.v. við nýjar forsendur á vinnumarkaðinum. Í því sambandi var gengið frá samningi í dag við Landssamband smábátaeigenda.
Það hefur verið fallegt vetrarveður í Þingeyjarsýslum undanfarna daga, því hefur flugumferð verið mjög áberandi og stórar breiðþotur hafa sést fljúga yfir landinu sem vakið hefur athygli jarðarbúa á „Stór Húsavíkursvæðinu“ sem virt hafa vélarnar fyrir sér og jafnvel myndað. Eftirfarandi myndir voru teknar út um glugga á Skrifstofu stéttarfélaganna á Húsavík á dögunum.
Starfsgreinasambandið gekk í dag frá endurnýjuðum kjarasamningi við Bændasamtök Íslands. Samningurinn er í takt við aðra samninga sem gerðir hafa verið undarnfarið milli aðila vinnumarkaðarins og tengjast endurskoðun kjarasamninga. Samkvæmt samningnum sem var undirritaður í dag færast hækkanir sem koma áttu til 1. maí nk. fram til 1. janúar 2016. Þá koma á tímabilinu, það er næstu þrjú ár hækkanir á lífeyrisframlögum atvinnurekenda sem getið verður um í Fréttabréfi stéttarfélaganna sem kemur út fyrir páska.
Yfirmaður þýska fyrirtækisins S.M.S. með á aðsetur á Húsavík, Ruud.M. Smit, var gestur Framsýnar í morgun. Ruud.M. Smit fer fyrir verktakafyrirtækinu S.M.S sem sér um uppbygginguna á Bakka fyrir PCC. Á fundinum óskaði Ruud eftir upplýsingum um reglur sem gilda á íslenskum vinnumarkaði auk þess sem hann lagði mikið upp úr góðu samstarfi við stéttarfélögin á svæðinu. Það voru þeir Aðalsteinn formaður Framsýnar og Aðalsteinn þjónustu- og eftirlitsfulltrúi stéttarfélaganna sem tóku á móti gestinum frá S.M.S.
Aðalfundum deilda hjá Verkalýðsfélagi Þórshafnar er lokið þetta árið, voru það hádegisverðarfundir í Hafliðabúð. Boðið var upp á veitingar frá Grillskálanum.
Aðalfundur Sjómannadeildar haldinn 8. janúar 2016
Stjórn skipa Sigfús Kristjánsson formaður, Árni Bragi Njálsson varaformaður og Jóhann Ægir Halldórsson ritari.
Aðalfundur verslunar og skrifstofudeildar haldinn 2. mars 2016
Stjórn skipa Kristín Kristjánsdóttir formaður, Elfa Benediktsdóttir varaformaður og Guðrún Þorleifsdóttir ritari.
Aðalfundur iðnaðarmannadeildar haldinn 9. mars 2016
Stjórn skipa Vikar Már Vífilsson formaður, Þórður Þórðarson varaformaður og Axel Jóhannesson ritari.
Innan Verkalýðsfélags Þórshafnar eru þrjár öflugar deildir sem lokið hafa sínum aðalfundum þetta árið.
Samkvæmt vefmælingum fóru 3,688 einstaklingar inn á heimasíðu stéttarfélaganna í síðustu viku. Heimsóknirnar voru 4,351 frá þessum aðilum. Þar af fóru heimsóknirnar upp í 2.200 yfir einn sólarhring í vikunni sem er ótrúlegt ekki síst þar sem um heimasíðu stéttarfélaga er um að ræða. Heimasíðan blandar saman fréttum af starfi stéttarfélaganna og fréttum úr samfélaginu, greinilegt er að lesendur síðunnar kunna vel að meta þessa blöndu. Af þeim sem skoðuðu síðuna í síðustu viku voru 64,9% nýjir lesendur sem er magnað.
Eins og sjá má á þessu yfirliti eru fjölmargir gestir sem heimsækja heimasíðu stéttarfélaganna á hverjum degi. Þá er fólk nokkuð duglegt við að senda pósta á starfsmenn og þakka þeim fyrir líflega síðu. Hér má t.d. sjá póst frá einum gesti sem skoðaði síðuna fyrir helgina; Verð að hrósa ykkur fyrir nýju heimasíðuna, festist þar alveg í ½ tíma.
Um þessar mundir er unnið að því að breyta virðulegu timburhúsi við Ásgarðsveg 1 á Húsavík í veitingastað. Húsið sem ber nafnið Sel var byggt árið 1931. Það eru mágkonurnar Elín Kristjánsdóttir og Ingunn Ásta Egilsdóttir sem hafa fest kaup á húsinu samkvæmt frétt Skarps um málið. Til stendur að opna nýja veitingastaðinn í sumarbyrjun. Þær Elín og Ingunn hafa síðustu ár rekið mjög vinsælan veitingastað fyrir neðan Bakkann á Húsavík sem borið hefur nafnið Naustið. Staðurinn hefur sérhæft sig í ferskum sjávarréttum og mun gera það áfram á nýjum stað við Ásgarðsveginn. Ekki er ólíklegt að miðbæjarkjarninn á Húsavík muni styrkjast með tilkomu veitingastaðarins á þennan stað sem verður við hliðina á Gistiheimilinu Árból og stutt verður í aðra þjónustu sem ferðamenn á hverjum tíma sækja í. Þá bendir allt til þess að nýr veitingastaður dreifi því mikla álagi sem þegar er orðið við hafnarsvæðið og fyrrum verslunarhúsnæði Kaupfélags Þingeyinga við Garðarsbrautina. Eins og kunnugt er hefur komum ferðamanna til Húsavíkur fjölgað verulega á síðustu árum og spár gera ráð fyrir að þeim muni fjölga enn frekar á komandi árum.
Unnið er að því þessa dagana að gera Sel að virðulegum veitingastað. Nýr veitingastaður opnar í húsinu í sumar þar sem Sigurður heitinn Brim bjó áður.
Fjölmenni hefur lagt leið sína í Hvalasafnið á Húsavík í dag í tilefni af opnun nýrrar sýningar, Steypireyður-Hvalreki. Steypireyðurin sem rak á landa á Skaga er komin til Húsavíkur og hefur verið sett upp til sýningar á Hvalasafninu á Húsavík. Beinagrindin er af 25 metra langri steypireyð sem rak á land síðsumars 2010. Grindin liggur á bakinu líkt og tíðkast þegar hvalhræ reka á land á náttúrulegan hátt. Steypireyður-Hvalreki er sýning sem er lifandi og í stöðugri þróun. Árið 2017 er stefnt að því að sá hluti sýningarinnar sem snýr að sögu hvalreka við Íslandsstrendur verði lokið og tekur sýningin mið að því. Ekki er ólíklegt að beinagrindin eigi eftir að draga til sín fjölda gesta en um 26 þúsund gestir komu í safnið á síðasta ári. Sjá myndir frá opnuninni í dag.
Verkalýðshreyfingin er ein öflugasta félagshreyfing þjóðarinnar. Flestir vita af hreyfingunni, margir njóta þjónustu hennar, sýna skilning á hlutverki hennar en þeir eru líklega fleiri sem gera sér ekki grein fyrir hversu stórt hlutverk hennar er í sögu þjóðarinnar síðustu 100 árin. Þess vegna er mikilvægt að rifja upp söguna og vekja athygli á framlagi verkalýðshreyfingarinnar til mótunar íslensks samfélags. Í dag 12. mars 2016 eru 100 ár liðin frá því að 20 einstaklingar frá sjö verkalýðsfélögum bundust samtökum til að efla samtakamátt sinn í baráttunni fyrir bættum kjörum og Alþýðusambandið varð til.
Á fyrstu árum hreyfingarinnar snérust baráttumálin um að verkafólk fengi greitt fyrir vinnu í peningum, um hvíldartíma og mannsæmandi mannabústaði. Alla tíð síðan hafa réttindamál af ýmsum toga einkennt starf verkalýðshreyfingarinnar og er nú svo komið að réttindi og aðbúnaður íslensks launafólks er með því allra besta sem þekkist í heiminum. Má þar nefna veikinda- og orlofsrétt, sjúkrasjóði og lífeyrisréttindi. Það má þó ekki sofna á verðinum því stöðugt þurfa stéttarfélögin að verja það sem hefur áunnist auk þess að sækja fram til frekari sigra.
Þjóðminjasafn Íslands
Sögu Alþýðusambandsins verða gerð viðeigandi skil á ljósmyndasýningunni Vinnandi fólk í Þjóðminjasafninu sem opnar 5. mars nk. Þar verður birtu brugðið á það hvernig aðstaða og aðbúnaður vinnandi fólks á Íslandi hefur breyst frá stofnun ASÍ. Sýningin er vitnisburður um framþróun hjá vinnandi fólki á mörgum sviðum á síðustu hundrað árum. Máttur ljósmyndarinnar er magnaður, hún sýnir okkur betur en flest, veruleikann eins og hann var.
Listasafn ASÍ
Í stórfenglegri listaverkagjöf Ragnars Jónssonar í Smára til Alþýðusambands Íslands, sem varð kveikjan að stofnun Listasafns ASÍ 1961, eru mörg af þekktustu myndverkum tuttugustu aldar eftir nokkra fremstu listamenn þjóðarinnar; Ásgrím Jónsson, Jón Stefánsson, Jóhannes Sveinsson Kjarval Nínu Tryggvadóttur og Svavar Guðnason. Á sýningunni, GERSEMAR úr safneign Listasafns ASÍ, sem opnar 5. mars verða verk eftir ofangreinda listamenn sýnd í bland við aðrar og minna þekktar perlur úr safneigninni.
Tónlist hefur leikið stórt hlutverk í verkalýðshreyfingunni alla tíð og tónlist verður einkennandi í afmælisfagnaði ASÍ. Boðið verður til tónleika á fjórum stöðum á landinu 12. mars þar sem ungir og ferskir listamenn stíga á svið í bland við eldri og reyndari.
Reykjavík dagur
Fjölskylduskemmtun í tilefni 100 ára afmælis ASÍ hefst í Hörpu kl. 14 laugardaginn 12. mars. Boðið verður upp á tónleika með Páli Óskari og Úlfi Úlfi í Norðurljósasalnum. Auk þess setur tvíeykið magnaða, Hundur í óskilum, upp stutta leiksýningu í Kaldalóni kl. 15 og 16 þar sem farið verður yfir athyglisverða hluti úr 100 ára sögu verkalýðshreyfingarinnar. Kl. 17:30 blæs Lúðrasveit verkalýðsins svo til tónleika í Kaldalóni. ASÍ býður svo gestum Hörpunnar upp á afmælisköku, kaffi og djús í tilefni aldarafmælisins. Það er frítt inn á alla þessa viðburði og ekki þarf að ná sér í miða til að vera með á fjölskylduskemmtuninni.
Reykjavík kvöld
Frábærir listamenn koma fram til að fagna þessum tímamótum með okkur: Retro Stefson, Mannakorn, Valdimar, Hundur í óskilum, Mammút og Lúðrasveit Verkalýðsins. Kynnar verða Halldóra Geirharðsdóttir og Ólafía Hrönn Jónsdóttir. Aðgangur er ókeypis en miðar verða afhentir á tix.is og harpa.is og hefst afhending miða föstudaginn 4. mars kl. 12 á hádegi.
Akureyri
Ljósmyndasýning og tónleikar í Hofi á Akureyri laugardaginn 12. mars kl. 20. Fram koma: Agent Fresco, Ylja, Hvanndalsbræður og Emmsje Gauti. Aðgangur er ókeypis en nauðsynlegt er að nálgast miða á tix.is. Afhending miða hefst föstudaginn 4. mars kl. 12 á hádegi.
Ísafjörður
Ljósmyndasýning og tónleikar í Edinborgarhúsinu á Ísafirði laugardaginn 12. mars kl. 20. Fram koma: Mugison og Lára Rúnars. Aðgangur er ókeypis en nauðsynlegt er að nálgast miða á tix.is. Afhending miða hefst föstudaginn 4. mars kl. 12 á hádegi.
Neskaupstaður
Ljósmyndasýning og tónleikar í Egilsbúð í Neskaupstað laugardaginn 12. mars kl. 20. Fram koma: Bjartmar Guðlaugs, Lay Low og Úlfur Úlfur. Aðgangur er ókeypis en nauðsynlegt er að nálgast miða á tix.is. Afhending miða hefst föstudaginn 4. mars kl. 12 á hádegi.
Skrifstofa stéttarfélaganna auglýsti nýlega eftir starfsmanni í eftirlits- og þjónustustörf á vegum félaganna með sérstaka áherslu á vinnustaðaeftirlit. Alls sóttu 13 umsækjendur um starfið. Eftir yfirferð hefur Fulltrúaráð stéttarfélaganna sem skipað er fulltrúum þeirra félaga sem aðild eiga að skrifstofunni; Framsýnar, Þingiðnar og Starfsmannafélags Húsavíkur samþykkt að ráða Aðalstein Jóhannes Halldórsson í starfið og var gengið frá ráðningarsamningi við hann í morgun. Aðalsteinn lauk BA gráðu í stjórnmálafræði frá Háskóla Íslands árið 2006 og MPA gráðu í opinberri stjórnsýslu frá sama skóla árið 2010. Áður lauk hann stúdentsprófi frá Framhaldsskólanum á Húsavík árið 1999. Auk þess hefur hann klárað námskeið í bókhaldi. Þá býr Aðalsteinn yfir mjög góðri tölvuþekkingu og hefur gott vald á íslensku og ensku bæði í ræðu og riti. Aðalsteinn sat í sveitarstjórn Norðurþings kjörtímabilið 2006-2010 ásamt því að sitja í nokkrum nefndum sveitarfélagsins eða fyrir hönd þess á þessu tímabili. Hann starfaði sem sérfræðingur á Þekkingarneti Þingeyinga á árunum 2008-2013. Auk þess hefur hann starfað við ýmiskonar störf í gegnum tíðina, til dæmis byggingarvinnu, afgreiðslustörf og landbúnaðarstörf. Aðalsteinn mun formlega hefja störf miðvikudaginn 16. mars 2016.
Stéttarfélögin vilja nota tækifærið og þakka öllum þeim sem sóttu um starfið fyrir áhugan fyrir starfinu um leið og Aðalsteinn Jóhannes er boðinn velkominn til starfa.
Aðalsteinn Jóhannes Halldórsson hefur verið ráðinn í starf eftirlits- og þjónustufulltrúa stéttarfélaganna í Þingeyjarsýslum.
Það hefur verið afar fallegt vetrarveður undanfarna daga sem skiptir miklu máli, ekki síst fyrir þá sem koma að uppbyggingunni á „stór Húsavíkursvæðinu“. Meðfylgjandi myndir voru teknar af starfsmönnum á Þeistareykjum, vetrarríkinu þar og fallegu landslagi sem reyndar er að mestu undir snjó en fallegt samt. Sjá myndir teknar í gær.
Eftirlitsfulltrúi Framsýnar fór í heimsókn til starfsmanna LNS Saga á Bakka við Húsavík í gær en hann hefur verið tíður gestur þar undanfarið ekki síst þar sem starfsmenn LNS hafa óskað eftir nærveru hans á svæðinu enda vilji starfsmanna að vita um sín réttindi og skyldur. Fyrirtækið vinnur að því að reisa kísilmálmverksmiðju fyrir PCC. Allt var á fullu í góða veðrinu eins og meðfylgjandi myndir bera með sér.
Veruleg aukning hefur orðið á flugi til Húsavíkur milli ára. Í febrúar mánuði 2015 fóru 674 farþegar um Húsavíkurflugvöll á móti 1518 farþegum í febrúar 2016. Um er að ræða aukningu upp á 125%. Flugfélagið Ernir hóf áætlunarflug til Húsavíkur 15. apríl 2012. Á árunum 2013 og 2014 fóru um 9.800 farþegar um völlinn á ársgrundvelli. Á árinu 2015 fjölgaði farþegum upp í tæplega 12.000 farþega. Í sambandi við fjölgun farþega um völlinn má geta þess að Framsýn, gerði fyrst stéttarfélaga, samning við flugfélagið um sérkjör fyrir félagsmenn. Samningur þess efnis var undirritaður 21. nóvember 2013. Frá þeim tíma hafa félagsmenn stéttarfélaganna sem aðild eiga að Skrifstofu stéttarfélaganna flogið 7.500 flugferðir sem sparað hefur þeim um 50 milljónir frá miðlungs fargjaldi um leið og sætanýting í flugvélum Ernis hefur orðið mun betri enda jafngilda 7.500 flugmiðar 395 full bókuðum flugferðum m.v. stærð flugvélanna. Í dag er flogið flesta daga, allt upp í þrjár ferðir á dag. Þá er ljóst að framkvæmdirnar á svæðinu er tengjast uppbyggingunni á Bakka auk sívaxandi ferðaþjónustu kemur til með að styrkja flugumferð um Húsavíkurflugvöll enn frekar sem er afar ánægjulegt enda mikil lífsgæði fólgin í því að hafa aðgengi að flugsamgöngum í heimahéraði. Fyrir liggur að á árinu 2016 verður slegið met í farþegafjölda um Húsavíkurflugvöll frá þeim tíma sem Flugfélagið Ernir hóf áætlunarflug til Húsavíkur.
Félagsmenn stéttarfélaganna í Þingeyjarsýslum hafa sparað sér um 50 milljónir á tveimur árum með sérkjörum á flugmiðum stéttarfélaganna milli Húsavíkur og Reykjavíkur með Flugfélaginu Erni. Óhætt er að segja að þetta sé kjarabót í lagi.
Framsýn hefur samþykkt að senda frá sér svohljóðandi ályktun um kjaradeilu starfsmanna í álverinu í Straumsvík.
Ályktun
um kjaradeilu starfsmanna í álverinu í Straumsvík
Framsýn, stéttarfélag Þingeyinga lýsir yfir fullum stuðningi við starfsmenn álvers Rio Tinto Alcan í Straumsvík sem eiga í kjaradeilu við eigendur fyrirtækisins.
Framkoma forsvarsmanna fyrirtækisins í garð starfsmanna er með ólíkindum og gróf aðför að íslenskum vinnumarkaði. Fram að þessu hefur verið borin ákveðin virðing fyrir starfsemi álversins enda hefur það skilað miklum gjaldeyristekjum í þjóðarbúið. Virðingu sem stjórnendur fyrirtækisins hafa nú kastað á glæ með yfirgangi, hótunum og lítilsvirðingu í garð starfsmanna. Ekki verður séð hvernig fyrirtækið ætlar sér að endurheimta fyrri virðingu og traust í ljósi atburða síðustu daga.
Fyrir liggur að útskipunargengi það sem gengið hefur í störf hafnarverkamanna í Straumsvík að undanförnu er hæst launaðasta útskipunargengi Íslandssögunnar með sjálfan forstjóra álversins í fararbroddi.
Formannafundur LÍV fór fram í Reykjavík sl. föstudag 26.febr. Til fundarins mættu formenn og/eða starfsmenn stéttarfélaga alls staðar af landinu. Af hálfu Framsýnar, Deildar verslunar- og skrifstofufólks, sóttu Jóna Matthíasdóttir og Jónína Hermannsdóttir fundinn.
Selma Kristjánsdóttir hélt góða kynningu á starfsemi Starfsmenntasjóðs verslunar- og skrifstofufólks en vert er að minna á nokkrar breytingar sem hafa tekið gildi á síðustu mánuðum. Má þar m.a. nefna að nú er hægt að fá endurgreitt 75% af námskostnaði og styrkupphæð getur numið allt að 90.000 krónur á ári, að uppfylltum skilyrðum styrkveitingar. Allar upplýsingar má finna á vef sjóðsins www.starfsmennt.is
Elías G. Magnússon fór ítarlega yfir nýsamþykktan kjarasamning VR/LÍV og SA og voru góðar umræður meðal fundarmanna um breytingar sem og önnur ákvæði samningsins. Vert er að minna á breytingu varðandi laun starfsmanna undir 20 ára aldri en laun 18 og 19 ára eru 95% af byrjunarlaunum 20 ára. Breytingin felst í því að 18 og 19 ára starfsmenn fara beint á 20 ára taxta ef þeir hafa náð 6 mánuðum og 700 klst. í starfsgrein frá 16 ára aldri. Við 20 ára aldur er síðan starfsreynslan metin að nýju, til framgangs í töxtum. Laun ungmenna miðast nú við 20 ára aldur(hlutfall) í stað 18 ára aldurs áður. Útfærslur launa vegna þessa aldurs getur verið flókinn og mikilvægt að ungmenni, sem og aðrir, haldi utan um vinnutíma sína og beri saman við launaseðla. Þá er gott að minna á nýt tapp, Klukk, sem hentar vel til þess.
Við viljum einnig minna á að gera skriflega ráðningarsamninga og að starfsmannaviðtal er viðurkennt af SA sem eðlilegur hluti vinnusambands en starfsmaður á rétt á viðtali einu sinni á ári. Þar skal ræða um helstu verkefni í starfi, starfið sjálf og vinnuálag, þekkingu starfsmanns, fjölda verkefna, verkefnastjórnun og ánægju í starfi, starfsumhverfi, samskipti á vinnustað, laun, starfsþróun og önnur starfskjör.
Rétt er að taka fram að þessi fyrirsögn er ekki brandari. Samkvæmt nýlegri frétt Austurfrétta sauð upp úr á bæjarstjórnarfundi í Grindavík þegar sala á bát og kvóta úr bænum var til umræðu. Það byrjaði á harðri gagnrýni Páls Jóhanns Pálssonar, bæjarfulltrúa Framsóknarmanna og þingmanns, sem sagðist harma meðferð bæjarráðs á málinu, lýsti „vanþóknun á þeim sem ráða ferðinni“ og sakaði þá um „ábyrgðar- og dómgreindaleysi.“ Hér má lesa þessa athyglisverðu frétt sem er á austurfrett.is:
Hiti var í bæjarfulltrúum í Grindavík þegar þeir ræddu sölu á línuveiðibátnum Sandfellu SU 75 frá Stakkavík til Loðnuvinnslunnar á Fáskrúðsfirði. Þeir telja bæinn hafa verið hlunnfarinn um forkaupsrétt en hyggja ekki á lögsókn. Þeir óttast að störf flytjist til Austfjarða í kjölfarið.
Loðnuvinnslan festi kaup á bátnum, sem áður hét Óli á Stað, í lok janúar og var tekið á móti honum í nýrri heimahöfn í byrjun febrúar. Honum fylgir 1200 tonna bolfiskkvóti í krókaaflamarkskerfinu sem Loðnuvinnslan gerðir andvirði 3,1 milljarðs króna fyrir. Hluti þeirra er í formi 200 tonna þorskkvóta í aflamarkskerfinu sem metinn er á 600 milljónir króna.
Kaupsamningurinn er undirritaður 26. janúar. Tilboð var gert sléttum tveimur mánuðum fyrr. Stakkavík gerði Grindavíkurbæ viðvart um fyrirhuguð viðskipti og bauð bænum forkaupsrétt samkvæmt lögum um fiskveiðistjórnun. Það er gert 1. desember og forkaupsrétturinn þar með talinn gildur til 28. sama mánaðar.
Í kjölfar bæjarráðsfundar þann 2. desember var óskað eftir að útgerðarfélög í bænum lýstu yfir áhuga sínum með skuldbindandi hætti fyrir hádegi 10. desember hvort þau hefðu áhuga á að ganga inn í kaupin. Í bréfi undirrituðu af bæjarstjóra segir að markmið Grindavíkurbæjar sé „að reyna eftir fremsta megni að tryggja að aflaheimildirnar haldist í sveitarfélaginu og að viðskiptin verði sveitarfélaginu að skaðlausu.“
18-23 störf í húfi
Í minnisblaði bæjarstjóra frá 9. desember greinir hann frá samtali sínu við forsvarsmann Stakkavíkur sem hafi lýst því að til að fyrirtækið væri jafnsett nýtti bærinn forkaupsrétt sinn yrði einnig að tryggja að fyrirtækið fengi 200 tonna kvóta en ekki eingöngu fjármuni. Væri báturinn seldur án þess að aflaheimildir kæmu á móti gætu störfum á sjó fækkað um átta og 10-15 í landi.
Bæjarstjórinn segir skipasöluna hafa krafist þess að ákvörðun yrði tekin sem fyrst og vísað til þess að í sölutilboðinu sé fyrirvari um samþykki stjórnar Loðnuvinnslunnar sem hægt sé að virkja dragist ferlið á langinn. Bæjarstjórinn skrifar að þann dag hafi hann kallað „eftir skýrum svörum frá skipasalanum um hvort stjórn Loðnuvinnslunnar hafi staðfest tilboðið.“
Vísir hf. lýsti yfir áhuga með bréfi dagsettu 10. desember en óskaði eftir tveggja vikna fresti til að útvega fjármagn. Þremur dögum fyrr hafði forsvarsmaður fyrirtækisins látið vita af áhuga þess. Bæjarráð samþykkti hins vegar á fundi sínum þann dag að nota ekki réttinn. Í því fælist of mikil áhætta fyrir bæjarfélagið auk þess sem salan hefði „ekki afgerandi áhrif á atvinnulíf og samfélag í Grindavík.“
„Engin sala sem taka þarf afstöðu til“
Á bæjarstjórnarfundi fimm dögum síðar var málinu frestað. Daginn áður höfðu forsvarsmenn Stakkavíkur sent bænum bréf um að þeir hefðu „afturkallað sölutilboð“ þar sem það hefði verið háð samþykki stjórnar Loðnuvinnslunnar en það ekki borist. Þar með „komst aldrei á skuldbindandi samningur um söluna, svo sem forsvarsmenn Grindavíkur höfðu bent á […] þá er enginn kaupsamningur til staðar og engin sala sem taka þarf afstöðu til forkaupsréttar á.“
Stjórn Loðnuvinnslunnar staðfestir heimild framkvæmdastjóra til undirskriftar tilboðs þann 16. desember. Fyrirvaranum sé þar með aflétt og beðið eftir svari bæjarstjórnar Grindavíkur sem hafi forkaupsrétt til 28. desember.
Þann 15. janúar sendir lögmaður Loðnuvinnslunnar Grindavíkurbæ bréf þar sem hann lýsir því yfir að forkaupsrétturinn sé fallinn niður og vísar meðal annars til bókunar bæjarráðs frá 10. desember.
Hvenær er forkaupsrétturinn gildur?
Bréf lögfræðingsins er tekið fyrir á bæjarstjórnarfundi 26. janúar, sama dag og endanlegur kaupsamningur er undirritaður. Í samræmi við umræður á fundinum er bréfinu svarað á þeim nótum að fyrir liggi að áhugi hafi verið innan bæjarins á að kaupa skipið.
Ekki hafi verið hægt að ætlast til þess að afstaða væri tekin til þess eftir erindi Stakkavíkur og svo virtist sem ágreiningur væri milli fyrirtækjanna um hvort kaupsamningur lægi fyrir. Bærinn líti svo á að fjögurra vikna frestur til forkaupsréttar verði ekki virkur fyrr en hann liggi fyrir.
Bæjarráð fjallar aftur um málið 2. febrúar og bókar að lagaleg óvissa sé uppi. Tveimur dögum síðar er haldin móttökuathöfn fyrir bátinn á Fáskrúðsfirði og honum gefið Sandfellsnafnið.
„Þetta fólk þegar farið að tala um að flytja úr bænum“
Síðan hefur bæjarráð Grindavíkur tvisvar fjallað um málið ásamt lögfræðingum. Á bæjarstjórnarfundi í gærkvöldi sauð svo upp úr þegar málið var tekið á dagskrá. Það byrjaði á harðri gagnrýni Páls Jóhanns Pálssonar, bæjarfulltrúa Framsóknarmanna og þingmanns, sem sagðist harma meðferð bæjarráðs á málinu, lýsti „vanþóknun á þeim sem ráða ferðinni“ og sakaði þá um „ábyrgðar- og dómgreindaleysi.“
Hann lýsti áhyggjum sínum af áhrifum viðskiptanna á Grindavík. „Trúa menn því að það tapist ekki störf þegar 1000 tonn fara út úr bænum. Þetta fólk er þegar farið að tala um að flytja úr bænum. Þegar menn eru farnir að róa annars staðar flytja menn sína fjölskyldu“
„Viljum alls ekki að kvóti renni í önnur sveitarfélög“
Guðmundur Pálsson, bæjarfulltrúi Sjálfstæðisflokks, brást hart við orðum Páls. Hann sagði að málið væri „stórt mál fyrir Grindavík“ og bæjarfulltrúar þar vildu „alls ekki að kvóti renni þaðan frá í önnur sveitarfélög.“
Hann og fleiri fulltrúar meirihlutans, sem Sjálfstæðisflokkur myndar með Grindavíkurlistanum, sögðu að bærinn tæki mikla áhættu með dómsmáli. Það tæki langan tíma, niðurstaða þess væri óviss og ekki hefði verið komið bindandi tilboð frá Vísi sem réttlætti að taka áhættuna.
Samflokksmaður hans Hjálmar Hallgrímsson sagði „alla vilja halda kvóta, skipum og störfum í byggð.“ Málið ætti sér „hörmungarsögu“, í því hefðu verið gerð „mýmörg mistök“ og því væri „lítilmannlegt að draga einhvern til ábyrgðar.“
„Við höfum ekkert mál lengur í höndunum“
„Við hefðum öll viljað halda þessum afla í bæjarfélaginu,“ sagði Kristín María Birgisdóttir, oddviti Grindavíkurlistans. „Við erum hundfúl yfir að kaupin hafi verið dregin til baka og engin vitneskja um að þau væru komin á aftur. Við vorum sniðgengin, við vorum ekki upplýst. Báturinn er farinn og aflaheimildirnar líka. Við höfum ekkert mál lengur í höndunum.“
Hún sakaði Pál Jóhann um að vera vanhæfan í málinu en hann á 5% hlut í Vísi, sem áður rak meðal annars fiskverkun á Djúpavogi. Því hafnaði Páll Jóhann. „Ég er bara að hugsa um hag bæjarins. Er ég einn um að telja að það séu ríkir hagsmunir bæjarfélagsins að halda þessum kvóta og störfum?“
Í bókun meirihlutans frá fundinum í gær segir að ekki sé skynsamlegt að reyna að leita forkaupsréttarins ef ekkert útgerðarfyrirtæki í bænum geti gengið inn í kaupin. Því virðist þá lokið því í gær voru sléttar fjórar vikur liðnar síðan endanlegur kaupsamningur var virtust. Jafnvel þótt deilur væru um hvort forkaupsrétturinn miðaðist við sölutilboðið í lok nóvember eða endanlegan kaupsamning í lok janúar er allt svigrúm til svara bæjarins liðið og vart hróflað við Sandfelli SU 75 úr því sem komið er.
Vísismenn brjálaðir yfir því að missa kvóta úr bænum, það er Grindavík. Sömu menn hreinsuðu nánast upp kvótann á Húsavík án þess að missa bros. Miklir menn.
Nú er lokið umsóknarfresti um starf á Skrifstofu stéttarfélaganna á Húsavík, umsóknarfresturinn rann út fyrir helgi. Alls sóttu 13 einstaklingar um starfið en töluverður hópur spurðist einnig fyrir um starfið. Á næstu dögum verða umsóknirnar skoðaðar með það að markmiði að ráða hæfasta umsækjandann.