kuti

Aðalfundur Starfsmannafélags Húsavíkur var haldinn í dag. Fundarmenn voru ánægðir með öflugt starf félagsins á umliðnu starfsári. Ljóst er að samstarf félagsins við Þingiðn og Framsýn gerir það að verum að félagið getur haldið úti öflugu starfi þrátt fyrir að félagsmenn séu rúmlega hundrað. Þátttaka í sameiginlegum  rekstrarkostnaði við Skrifstofu stéttarfélaganna á síðasta ári var aðeins kr. 2.578.963. Hér má lesa skýrslu stjórnar:

 Fundir
Síðasti aðalfundur félagsins var haldinn 6. september 2021. Frá þeim tíma hafa verið haldnir fjórir formlegir stjórnarfundir. Þá hafa stjórnarmenn tekið þátt í fundum og þingum á vegum BSRB.

Fullgildir félagsmenn
Fullgildir félagsmenn í Stafsmannafélagi Húsavíkur þann 31. desember 2021 voru 112, það er þeir sem greiddu til félagsins 2021. Þess ber að geta að fjöldi virkra félagsmanna STH sem greiddu í félagssjóð í janúar 2022 skv. félagatali í DK voru 81. Félagsmönnum hefur fækkað aðeins milli ára. Samkvæmt lögum BSRB skal tala fulltrúa miðast við félagatölu eins og hún reyndist í janúar það ár sem halda skal þing BSRB.

Fjármál
Félagsgjöld og iðgjöld ársins 2021 námu kr. 13.091.405,  en voru kr. 12.882.346 árið á undan.

Rekstrargjöld voru kr. 11.252.700 og lækkuðu því milli ára úr kr. 11.566.093.

Fjármunatekjur voru kr. 186.024 samanborið við kr. 192.125 árið á undan.

Samkvæmt sameinuðum rekstrar- og efnahagsreikningi nam hreinn tekjuafgangur félagsins kr. 4.559.429, samanborið við kr. 3.605.578 tekjuafgang frá fyrra ári.

Heildareignir í árslok voru kr. 75.678.889,- og eigið fé nam kr. 73.313.600 og hefur það aukist um 6,6% frá fyrra ári.

Rekstur Skrifstofu stéttarfélaganna gekk vel á síðasta ári. Þátttaka Starfsmannafélagsins í rekstrarkostnaði nam kr. 2.578.963.

Gerð verður frekari grein fyrir helstu niðurstöðum úr ársreikningi félagsins undir b-lið þessa liðar, Venjuleg aðalfundarstörf.

Orlofsmál
Aðildarfélög Skrifstofu stéttarfélaganna eiga mjög gott samstarf um orlofsmál. Í því sambandi eru þau með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands.

STH á eina íbúð í Sólheimum og gengur rekstur hennar vel. Komið er því að tak ákvörðun um hvort selja eigi íbúðina eða gera hana upp þar sem hún er komin á viðhald. Ákvörðun þess efnis þarf að taka fljótlega. Búið er að láta verðleggja íbúðina og þá hefur viðhaldsþörfin verið skoðuð lauslega. Auk íbúðarinnar í Sólheimum á félagið eitt orlofshús á Eiðum, líkt og með íbúð félagsins í Sólheimum hefur rekstur orlofshússins gengið vel. Starfsfólk Skrifstofu stéttarfélaganna sér um að halda utan um úthlutun og rekstur á eignunum.

Þá fengu 11 félagsmenn endurgreiðslur vegna dvalar á tjaldsvæðum eða alls kr. 194.910,-.

 Fræðslumál og heilsurækt
Á síðasta ári voru greiddir 23 styrkir til félagsmanna úr sjóðnum til náms/námskeiða samtals kr. 1.159.844,-. Þá fengu félagsmenn greiddar kr. 160.000,- í heilsustyrki frá félaginu.

Kjaramál
Lítið fór fyrir kjarasamningsgerð á síðasta starfsári enda kjarasamningar ekki lausir fyrr en á árinu 2023. Hins vegar hefur töluverður tími farið í aðstoð við félagsmenn vegna innleiðingar á vinnutímastyttingum og eftirfylgni með félagsmannasjóðnum Kötlu. Það er að tryggja að greiðslur úr sjóðnum skiluðu sér til félagsmanna.

STH hefur gengið frá því að BSRB  gæti hagsmuna félagsins gagnavart samninganefndum ríkis og sveitarfélaga þar sem búið er að leggja niður Samflotið sem var samstarfsvetvangur nokkurra starfsmannafélaga innan BSRB um kjaramál. Nokkur af þeim hafa nú sameinast Kili starfsmannafélagi og því er ekki lengur grundvöllur fyrir Samflotinu. Að sjálfsögðu verður stjórnin á kantinum og þátttakandi í kjarasamningsgerðinni fyrir hönd félagsmanna.

Atvinnumál og vinnustaðaeftirlit
Atvinnuástandið hjá félagsmönnum hefur almennt verið með miklum ágætum enda heimsfaraldurinn ekki haft veruleg áhrif á starfsmenn sveitarfélaga og ríkisins.

Hátíðarhöldin 1. maí
Stéttarfélögin stóðu fyrir hátíðarhöldum í Íþróttahöllinni á Húsavík 1. maí 2022 eftir tveggja ára hlé vegna Covid. Boðið var upp á veglega hátíð þar sem heimamenn voru í aðalhlutverki. Athygli vakti að helmingi færri mættu á hátíðarhöldin í ár en undanfarin ár eða um 250 manns. Vissulega var hátíðinni streymt í fyrsta skiptið sem getur hafa haft áhrif á mætinguna sem og Covid. Í ljósi þessa er spurning hvort tímabært sé að endurskoða hátíðarhöldin, það er með hvaða hætti sé best að halda upp á baráttudag verkafólks á komandi árum.   Fulltrúráð stéttarfélaganna mun taka við boltanum og ákveða framhaldið varðandi hátíðarhöldin 1. maí.

Starfsemi félagsins
STH hefur komið að nokkrum málum frá síðasta aðalfundi. Ástæða er til að gera aðeins grein fyrir nokkrum þeirra:

Félagið hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn.

Ríkissáttasemjari stóð fyrir þriggja daga námsstefnu í samningagerð á Húsavík í nóvember 2021. Um fimmtíu manns tóku þátt í námstefnunni. Að beiðni Ríkissáttasemjara stóðu aðildarfélög Skrifstofu stéttarfélaganna fyrir móttöku fyrir hópinn sem tókst í alla staði mjög vel.

Til stóð að ráðast í endurskoðun á lögum félagsins en þar sem félagið hefur ekki starfað af fullum þunga á starfsárinu tókst ekki að hefja þá vinnu. Vonandi verður hægt að ráðast í þessa vinnu í vetur.

Samkomulag við Flugfélagið Erni
Stéttarfélögin eru með samkomulag við Flugfélagið Erni um sérstök kjör á flugfargjöldum milli Húsavíkur og Reykjavíkur.

Samkomulagið byggir m.a. á því að stéttarfélögin gera magnkaup á flugmiðum og endurselja til félagsmanna. Flugmiðarnir hafa verið seldir á kostnaðarverði og eru aðeins ætlaðir félagsmönnum. Þeir einir geta ferðast á þessum kjörum.

Án efa er þetta ein besta kjarabót sem stéttarfélögin hafa samið um fyrir félagsmenn þegar við horfum til þess að félögin hafa sparað félagsmönnum umtalsverðar upphæðir síðan félögin hófu að selja félagsmönnum flugmiða á þessum hagstæðu kjörum. Með nýlega endurnýjuðu samkomulagi við flugfélagið tókst félögunum að tryggja félagsmönnum áframhaldandi afsláttarkjör út árið 2022. Verð til félagsmanna í dag er kr. 12.000,- per flugmiða/kóða.

Húsnæði stéttarfélaganna
Rekstur á sameiginlegum eignum stéttarfélaganna hefur gengið vel. Félögin eiga í sameiningu skrifstofuhúsnæðið að Garðarsbraut 26 á Húsavík. Þá eiga Framsýn og Þingiðn efri hæðina í sömu byggingu sem ber nafnið Hrunabúð sf.

Starfsemi Virk – starfsendurhæfingarsjóðs
Virk – starfsendurhæfingarsjóður var stofnaður árið 2008 af aðilum vinnumarkaðarins. Í júní 2012 voru sett lög um atvinnutengda starfsendurhæfingu og starfsemi starfsendurhæfingarsjóða, lög nr. 60/2012, sem sjóðurinn starfar eftir.

Með samvinnu Virk – starfsendurhæfingarsjóðs og Framsýnar, Þingiðnar, Starfsmannafélags Húsavíkur og Verkalýðsfélags Þórshafnar hefur verið rekin þjónustu- og ráðgjafaskrifstofa Virk í Þingeyjarsýslum frá árinu 2009. Ágúst Sigurður Óskarsson, ráðgjafi í starfsendurhæfingu hefur annast þá þjónustu. Hann er ávallt reiðubúinn til að veita félagsmönnum nánari upplýsingar um starfsemina en markmið Virk – starfsendurhæfingarsjóðs er að draga úr líkum á því að einstaklingar hverfi af vinnumarkaði vegna heilsubrests. Þjónusta við einstaklinga felst í persónulegri ráðgjöf og hvatningu, samvinnu um áætlun um eflingu starfsgetu og endurkomu á vinnumarkað, vali á endurhæfingarúrræðum í samvinnu við einstakling og fagfólk og leiðbeiningum um réttindi, framfærslu og þjónustu.

Skrifstofa stéttarfélaganna
Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Framsýn og Þingiðn. Þar starfa 6 starfsmenn í 5,4 stöðugildum.

Félögin halda úti öflugri heimasíðu og fréttabréfi sem tengir hinn almenna félagsmann við stjórn félagsins, starfsmenn og félagið í heild sinni. Full ástæða er til að hvetja félagsmenn til að fylgjast með starfi félagsins inn á heimasíðu stéttarfélaganna sem reglulega er uppfærð með fréttum og tilkynningum til félagsmanna auk þess sem hægt er að nálgast þar aðrar þarfar upplýsingar inn á vefnum er snerta s.s. kjaramál. Hvað heimasíðuna varðar, þá var samið við hugbúnaðarfyrirtækið AP um að gera verulegar breytingar á síðunni og gera hana notendavænni fyrir félagsmenn í samráði við starfsmenn stéttarfélaganna. Samstarfið gekk afar vel og er afraksturinn eftir því.

Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar þrátt fyrir að það hafið dregið mikið úr þeim vegna Covid. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla.  Ekki eru fyrirsjáanlegar breytingar á rekstri skrifstofunnar.

Góð nýting er á félagsaðstöðunni enda mikil starfsemi í gangi á vegum stéttarfélaganna.

Frá og með áramótunum 2021/22 urðu breytingar á lögfræðiþjónustu við félagsmenn. Samið var við PACTA lögmenn á Akureyri mun að taka yfir gjaldþrotamálin sem Jón Þór Ólason lögmaður var með áður fyrir félögin. PACTA hefur fram að þessu séð um alla innheimtu á útistandandi skuldum fyrirtækja við stéttarfélögin, auk þess að sjá um almenna þjónustu við félagsmenn sem þurfa á lögfræðiþjónustu að halda er varðar þeirra einkamál. Glaldþrotamálin bættast nú við þessa þjónustu lögmannstofunnar.

Þá var jafnframt samið við Sókn lögmannsstofu á Egilsstöðum um að taka að sér þau mál er varða slysa- og vinnuréttarmál félagsmanna sem fara í gegnum STH. Eva Dís Pálmadóttir framkvæmdastjóri Sóknar verður jafnframt  aðallögmaður stéttarfélaganna.

Fulltrúaráð stéttarfélaganna
Aðildarfélög Skrifstofu stéttarfélaganna mynda með sér Fulltrúaráð sem skipað er formönnum þessara félaga. Fulltrúaráðinu er ætlað að fylgjast með sameiginlegri starfsemi félaganna, ekki síst sem viðkemur rekstri skrifstofunnar. Fulltrúaráðið kemur saman til fundar eftir þörfum.

 Lokaorð
Skýrslan er að venju ekki tæmandi um starfsemi félagsins því hér hefur aðeins verið farið yfir helstu málaflokka og málefni sem félagið hefur komið að milli aðalfunda. Það er von stjórnarinnar að skýrsla þessi gefi lauslegt yfirlit yfir það helsta í fjölbreyttu félagsstarfi, um leið og hún þakkar félagsmönnum, þeim sem hafa haft trúnaðarstörf fyrir félagið á hendi og starfsmönnum félagsins fyrir gott samstarf og vel unnin störf á árinu.

Eftir umræður um skýrslu stjórnar og reikninga voru eftirfarandi tillögur teknar fyrir og samþykktar samhljóða:

Tillaga 1: Löggiltur endurskoðandi félagsins
Tillaga er um að endurskoðunarfyrirtækið PWC sjá um endurskoðun á ársreikningum félagsins fyrir árið 2022.

Tillaga 2: Um félagsgjald
Tillaga stjórnar er að félagsgjaldið verði óbreytt milli ára, það er 1% af launum.

Tillaga 3: Ráðstöfun á tekjuafgangi
Tillaga er um að tekjuafgangi ársins verði ráðstafað til hækkunar á óráðstöfuðu eigin fé frá fyrra ári.

Tillaga 4: Laun stjórnar og varastjórnar
Tillaga er um að laun stjórnar og varastjórnar fyrir setinn stjórnarfund verði tveir tímar á yfirvinnutaxta samkvæmt launatöflu STH og Sambands íslenskra sveitarfélaga: Skrifstofuvinna II með 8% álagi. Formaður hafi einn tíma til viðbótar í yfirvinnu per fund vegna undirbúnings og frágangs stjórnarfunda.

Tillaga 5: Laun fyrir aðrar fastar stjórnir og nefndir kjörnar á aðalfundi
Tillaga er um að laun fyrir aðrar fastar stjórnir og nefndir per setinn fund verði tveir tímar á yfirvinnutaxta samkvæmt launatöflu STH og Sambands íslenskra sveitarfélaga: Skrifstofuvinna II með 8% álagi.

Stjórnarkjör
Ganga þarf frá kjöri á gjaldkera og meðstjórnanda til tveggja ára samkvæmt lögum félagsins.

Stjórnarkjör og kjör í aðrar stjórnir og nefndir fyrir næsta starfsár:

Stjórn:
Fanney Hreinsdóttir gefur kost á sér sem gjaldkeri félagsins og Sylvía Ægisdóttir sem meðstjórnandi.

Tillaga um skoðunarmenn reikinga:
Tillaga er um að Ása Gísladóttir og Erla Bjarnadóttir verði félagslega kjörnir skoðunarmenn reikninga fyrir starfsárið 2022. Til vara verði Vilborg Sverrisdóttir.

Tillaga um orlofs-, ferðamála- og starfskjaranefnd:
Tillaga er um að Sveinn Hreinsson, Arna Þórarinsdóttir og Guðrún Ósk Brynjarsdóttir verði í orlofs-, ferðamála- og starfskjaranefnd félagsins fyrir starfsárið 2022.

Tillaga um Ferðanefnd:
Tillaga er um að Fanney Hreinsdóttir, Arna Þórarinsdóttir og Eyrún Sveinsdóttir verði í Ferðanefnd félagsins fyrir starfsárið 2022.

 

 

 

 

 

Það er afar vinsælt hjá ferðamönnum að heimsækja Þingeyjarsýslurnar enda margir fallegir og heillandi staðir á þessu fallega landshorni. Þessi mynd var tekin við Goðafoss í morgun þar sem ferðamenn röltu um og skoðuðu einn fallegasta foss landsins.

Hefð er fyrir því að Framsýn bjóði íbúum Raufarhafnar og nágrennis í kaffi og meðlæti föstudaginn fyrir Sjómannadaginn. Síðasta föstudag var komið að því að bjóða til veislu sem gekk afar vel þar sem tæplega hundrað manns þáðu boðið. Á staðnum voru formaður Framsýnar og stjórnarmenn sem tóku vel á móti fólkinu og spjölluðu við það auk þess að þjóna þeim til borðs.

Heiðrun sjómanna fór fram í dag í félagsaðstöðu Eldri borgara á Húsavík. Að þessu sinni voru sjómennirnir Hreinn Jónsson og Aðalsteinn Ólafsson heiðraðir fyrir áratuga sjómennsku auk þess sem eiginkonur þeirra fengu blómvönd að gjöf frá Sjómannadeild Framsýnar sem sá um heiðrunina. Það var Aðalsteinn Árni Baldursson formaður Framsýnar sem flutti ávarp við heiðrunina og gerði samkomunni grein fyrir lífshlaupi þeirra félaga til sjós. Hér má lesa ávarp Aðalsteins Árna en auk hans kom formaður Sjómannadeildar Framsýnar að heiðruninni, Jakob Gunnar Hjaltalín, samkoman í dag var fjölmenn:

Ágæta samkoma!

Ég vil byrja á því að óska sjómönnum og fjölskyldum þeirra til hamingju með daginn og reyndar okkur öllum þar sem við flest tengjumst sjómennskunni á einn eða annan hátt.

Hefð er fyrir því hér á Húsavík að halda Sjómannadaginn hátíðlegan og heiðra húsvíska sjómenn fyrir vel unnin störf. Sjómannadeild Framsýnar hefur séð um heiðrunina undanfarin ár. Með mér hér í dag er Jakob Gunnar Hjaltalín formaður deildarinnar.

Því miður hefur heiðrunin fallið niður síðustu tvö ár sem tengist heimsfaraldri og ástæðulaust er að nefna hér frekar og flestir vilja gleyma.

Hetjur hafsins sem við ætlum að heiðra hér í dag eiga það sameiginlegt að hafa helgað sig sjómennskunni frá unglingsárum, nánast út æviskeiðið.  Þeir byrjuðu báðir ungir að árum að upplifa stemninguna neðan við Bakkann sem var einstök á þeim tíma. Þar iðaði allt af lífi. Beitt var í flestum skúrum, ef menn voru ekki að beita voru þeir að fella net eða stokka upp bjóð. Það hjálpuðust allir að í þá daga, bæði ungir sem aldnir. Það var ekki í boði að sitja hjá.

Þetta eru félagarnir, Aðalsteinn Ólafsson og Hreinn Jónsson sem eru vel að því komnir að vera heiðraðir hér í dag.

Hreinn Jónsson:

Hreinn Jónsson eða Dilli eins og hann er oftast kallaður er fæddur á Húsavík 16. desember 1946, nánar tiltekið á Torginu. Foreldrar hans voru Álfheiður Eðvaldsdóttir og Eysteinn Gunnarsson, sem gekk honum í föðurstað.

Hreinn er kominn af mikilli sjómannafjölskyldu. Það kom því ekki á óvart að hann byrjaði ungur að árum að sniglast í beitningaskúrunum neðan við Bakkann. Á sínum langa sjómannsferli hefur Hreinn stundað sjómennsku og útgerð, auk þess að stýra fiskvinnslu í landi.

Á þessum tíma, þegar Hreinn var mjög ungur, átti faðir hans ásamt öðrum Hrönnina TH 36 sem þótti nokkuð mikill bátur á þeim tíma, enda um 15 tonn.

Þetta voru þeir Siggi Stísi og Aggi í Skuld. Það var stíft róið á Hrönn og einhverjar ákúrur fengu þeir fyrir að virða ekki daga sem öðrum þóttu heilagir. Allar vinnandi hendur komu að góðum notum og þar brást Hreinn ekki. Hann byrjaði á því að vinna í landi við bátinn þegar færi gafst til þess, þar til hann þótti gjaldgengur til sjós á sumarvertíð. Þórarinn Vigfússon eða Tóti í Jörfa var þá með bátinn.

Hreinn vildi skoða sig aðeins um og fór til Norðfjarðar um tíma þegar hann var 16 ára gamall. Þar byrjaði hann að vinna í landi í fiski áður en hann réði sig á Stefán Ben NK, sem var um 150 tonna bátur gerður út á línu, þorskanet og síld.

En hugurinn leitaði aftur heim. Hann réði sig hjá Kalla í Höfða á Sæborgina ÞH 55 sem gerð var út á snurvoð, áður en hann réði sig á Pétur Jónsson ÞH 50 sem gerður var út frá Sandgerði yfir vetrarvertíðina. Í brúnni stóð Tóti í Jörva. Hreinn var einnig á Pétri Jónssyni ÞH á síldarvertíð yfir sumarið.

Eftir um ársveru á Pétri Jónssyni ÞH hélt Hreinn yfir til Vestmannaeyja, þar sem hann munstraði sig á Eyjabergið VE 130, sem var tæplega 100 tonna stálbátur gerður út á net og fiskitroll.

Hreinn hefur verið heppinn til sjós í gegnum tíðina, samt sem áður var hann um borð í Eyjaberginu þegar báturinn strandaði á Faxaskerinu við Vestmannaeyjar árið 1966, mannbjörg varð en báturinn eyðilagðist. Hreinn var þá tvítugur að aldri.

Nú skyldi haldið heim til Húsavíkur, þangað sem Hreinn fór og réði sig hjá Útgerðarfélaginu Vísi. Þar átti hann góða tíma í nokkur ár á bátum Vísis, þeim Svani ÞH 100 og Sigþóri ÞH 100 með Ingvari Hólmgeirssyni skipstjóra og Hörður Þórhallsson stóð vaktina í landi. Hreinn var ekki bara á sjó heldur beitti  hann í landi auk þess að taka til hendinni í fiskverkun sem Vísir rak um tíma.

Hreinn stundaði um tíma útgerð frá Húsavík annars vegar með þeim bræðrum Viðari og Guðmundi Eiríkssonum sem gerðu út bátinn Eirík ÞH, sem var 12 tonna bátur og hins vegar með Kristjáni bróður sínum og Eymundi Kristjánssyni sem gerðu út trilluna Sjóbirting ÞH. Bátarnir voru gerðir út á línu og handfæri.

Þegar þarna var komið ákvað Hreinn að flytja suður og að sjálfsögðu réði hann sig á bát, reyndar urðu þeir nokkrir auk þess sem hann beitti einnig í landi. Þetta voru bátarnir Ægir Jóhannsson ÞH, Sigrún GK og Snæfari ÞH.

Það má Hreinn eiga, að hann hefur sem betur fer, alltaf skilað sér aftur heim eftir að hafa farið á vertíðir víða um land. Eftir nokkra ára dvöl á höfuðborgarsvæðinu flutti Hreinn aftur heim til Húsavíkur og réði sig hjá Ugga fiskverkun ehf. sem var með útgerð og fiskvinnslu, það er hjá Ólafi Sigurðssyni. Hann byrjaði á því að sjá um fiskvinnsluna í landi áður en hann fór aftur á sjó á báta í eigu útgerðarinnar, nú síðast var hann á Haferninum ÞH 26 sem er skráður um 30 tonna stálbátur. Bátarnir í eigu Ugga voru aðallega gerðir út á snurvoð, net, línu og rækjutroll. Þegar Hreinn varð sjötugur fyrir nokkrum árum, batt hann Haförninn ÞH í síðasta sinn við bryggju og gekk stoltur frá borði eftir áratuga veru til sjós.

Eins og fram hefur komið á Hreinn farsælan og giftusamlegan ferill sem sjómaður við Íslandsstrendur, sem ber að virða.

Hreinn er giftur Svanhildi Þorleifsdóttur og búa þau á Húsavík. Saman eiga þau fimm börn, en þau voru bæði gift áður.

Hreinn, hafðu bestu þakkir fyrir framlag þitt til samfélagsins í gegnum tíðina. 

Aðalsteinn Ólafsson:

Aðalsteinn Ólafsson eða Alli eins og hann er oftast kallaður er fæddur á Húsavík 31. mars 1953. Foreldrar hans voru Ásgerður Júlíusdóttir og Ólafur Jón Aðalsteinsson. Aðalsteinn er giftur Huldu Sigríði Ingadóttir og eru þau búsett á Húsavík. Þau eiga fjögur börn.

Aðalsteinn stóð vart fram úr hnefa þegar hann byrjaði að venja komur sínar niður á bryggju. Alli bjó sem barn í Brún á Höfðaveginum og því var mjög stutt að fara niður í fjöru. Reyndar ber mörgum saman um að fjaran hafi verið, hér á árum áður, helsta leiksvæði barna og unglinga á Húsavík.

Faðir Aðalsteins var sjómaður og útgerðarmaður um tíma, en síðar starfaði hann sem hafnarvörður. Þegar Alli var um sjö ára gamall byrjaði hann að fara í róðra með föður sínum á Sæborginni ÞH 55 sem hann gerði út ásamt félögum sínum. Fyrir fermingu var Alli byrjaður að stokka upp bjóð en fljótlega upp úr því fór hann að beita, þrátt fyrir að hugur hans leitaði frekar út á sjó.

Draumurinn varð að veruleika haustið 1969 en þá réði hann sig sem háseta á Sæborgina ÞH með Aðalsteini frænda sínum Karlssyni skipstjóra, þá 15 ára gamall. Gert var út á línu og þorskanet.

Alli var þar í nokkur ár þar til hann fór á Svaninn ÞH 100 frá Húsavík með skipstjóranum Ingvari Hólmgeirssyni. Þar var hann í þrjú ár eða til ársins 1976. Svanur ÞH stundaði línu og þorskanet.  

Alli söðlaði um og réði sig á togarann Júlíus Havsteen ÞH 1 við komu hans til Húsavíkur, fyrsta skuttogara Húsvíkinga sem var smíðaður á Akranesi og afhentur Útgerðarfyrirtækinu Höfða árið 1976. Togarinn var tæplega 300 brúttórúmlestir að stærð. Reyndur skipstjóri frá Akureyri, Benjamín S. Antonsson, var fenginn til að vera með skipið.

Um borð í Júlíusi var Alli bæði háseti og bátsmaður. Hann stökk á milli togara í eigu Höfða hf. þegar nýr togari í eigu útgerðarfyrirtækisins kom til Húsavíkur vorið 1981, smíðaður í Slippstöðinni á Akureyri. Togarinn sem var um 430 brúttórúmlestir fékk nafnið Kolbeinsey ÞH 10. Flestir úr áhöfn Júlíusar Havsteen fylgdu Alla yfir á nýja togarann þar sem hann hélt sínu starfi sem háseti og bátsmaður. Bæði Júlíus og Kolbeinsey voru gerð út á fiskitroll.

Eftir góða tíma á Kolbeinsey ÞH fór hann aftur um borð í Júlíus Havsteen ÞH, það er eftir að skipinu var breytt í frystitogara. Skipstjóri var Jóhann Gunnarsson sem Alli kunni vel að meta. Togarinn var gerður út á rækjutroll og frysti aflann um borð.

Árið 1989 var kominn tími á breytingar, Alli fór suður til Reykjavíkur og réði sig á fjölveiðiskipið Helgu RE 49 með skipstjóranum Geir Garðarssyni. Þar var hann í þrettán ár á fjórum skipum með sama nafni í eigu sömu útgerðar sem háseti og bátsmaður.

Áður en hann kom aftur heim til Húsavíkur réði hann sig um tíma á Röstina SK 17 sem gerð var út á rækju frá Sauðárkróki. Þingeyingurinn Jón Árni Jónsson var í brúnni.

Eftir stutta veru á Krók var kominn tími á breytingar.  Alli hélt heim til Húsavíkur og réði sig hjá hvalaskoðunarfyrirtækinu Gentle Giants árið 2005 og síðar Norðursiglingu þar sem hann starfar í dag sem skipstjóri,  en þar hefur hann reyndar verið allt frá því að hann réði sig á hvalaskoðunarbáta frá Húsavík.

Í stað þess að halda út á Skjálfandann á fiskiskipum í  aflaleit stendur Alli nú keikur í brúnni á hvalaskoðunarbát. Hann leysir landfestar og tekur stefnuna út á Skjálfandann flesta daga með drekkhlaðinn bát af áhugasömum ferðamönnum frá flestum heimsálfum í leit að ævintýrum þar sem sjófuglar fljúga yfir bátnum og hvalir af öllum stæðum og gerðum heilsa með blæstri, auk þess að leika listir sínar við bátana við mikinn fögnuð gestanna. Vissulega er það ólýsanleg upplifun fyrir karlinn í brúnni að líða um hafflötinn við heimskautsbaug, um borð í fallegum íslenskum eikarbát, umkringdur hvölum, fuglalífi og ægifagurri náttúru. Ekki skemmir fyrir að um borð eru ferðamenn sem eiga ekki til orð til að lýsa upplifuninni og fegurðinni á Skjálfanda, þökk sé mönnum eins og Aðalsteini Ólafssyni sem átt hefur farsælan feril til sjós hvort heldur á fiskiskipum eða hvalaskoðunarbátum.

Aðalsteinn hafðu líkt og Hreinn bestu þakkir fyrir framlag þitt til samfélagsins í gegnum tíðina.  Ykkar framlag er ómetanlegt.

Heiðursmenn, viljið þið koma hér ásamt eiginkonum Svanhildi og Huldu Sigríði og taka við örlítilli viðurkenningu fyrir ykkar frábæra starf í gegnum tíðina í þágu lands og þjóðar.  Með mér er Jakob Gunnar Hjaltalín formaður Sjómannadeildar Framsýnar sem mun veita ykkur viðurkenningarnar.

 

Jóhannes Sigurjónsson ritstjóri frá Húsavík lést á Landspítalanum við Hringbraut 9. júní, 68 ára að aldri.

Jóhannes var fæddur í Bolungarvík 16. febrúar 1954 en flutti til Húsavíkur 1957 þar sem hann bjó að mestu til æviloka.

Hann var sonur hjónanna Herdísar Guðmundsdóttur og Sigurjóns Jóhannessonar, næstelstur í hópi sex systkina.

Jóhannes lauk stúdentsprófi frá Menntaskólanum við Tjörn 1974 og stundaði nám í ensku og íslensku við HÍ 1974–1978. Hann starfaði sem blaðamaður og ritstjóri á Húsavík samfellt frá 1979 þar til hann lét af störfum 2020. Hann var einn af stofnendum Víkurblaðsins á Húsavík sem hóf göngu sína 1979 og kom út samfellt til 1996. Hann var um skeið blaðamaður á Degi þar til hann tók við ritstjórn Skarps 2002. Jóhannes sat í stjórn Samtaka bæjar- og héraðsfréttablaða 1991–1992 og var virkur í starfi félagsins um langt skeið.

Eftir Jóhannes hafa komið út þrjú kver af Sönnum þingeyskum lygasögum auk ljóðabókarinnar Æpt varlega. Þá skrifaði hann nokkur leikrit, söngtexta, greinar og viðtöl í ýmis tímarit og bækur. Jóhannes lætur eftir sig fimm börn.

Útför Jóhannesar fer fram frá Húsavíkurkirkju 20. júní kl. 11.00.

Mynd: Aðalsteinn Árni Baldursson

Umfjöllun: Fréttablaðið

Sjómannadeild Framsýnar óskar sjómönnum  og fjölskyldum þeirra til hamingju með sjómannadaginn.

Að venju sér Sjómannadeild Framsýnar um heiðrun sjómanna á Sjómannadaginn á Húsavík sem er á morgun sunnudag. Í ár verða tvær hetjur hafsins heiðraðir fyrir vel unnin störf til fjölda ára til sjós. Heiðrunin fer fram í sjómannadagskaffinu í Hlyn, það er í félagsaðstöðu eldri borgara að Garðarsbraut 44. Heiðrunin sjálf fer fram kl. 15:00 en húsið opnar kl. 14:00 fyrir kaffiveitingar, sjá frekar auglýsingu í Skránni.

 

Nú er lokaspretturinn á Alþingi fyrir sumarfrí og þrefað og samið um hvaða mál ná framgangi og hver ekki. Það er áhugavert að fylgjast með því, þar sem þetta eru síðustu þinglok á þessu kjarasamningstímabili og því síðustu forvöð að gera þær lagabreytingar sem lýst var yfir að ætti að gera í tengslum við kjarasamningana 2019.

Förum aðeins yfir þetta:

Frumvarp sem kemur í veg fyrir kennitöluflakk hefur ekki enn fengist samþykkt þó enginn hafi í raun lýst andstöðu við það og það er ekki einu sinni til umræðu núna. Hvar tregðan liggur er óskiljanlegt en frumvarpið hefur dagað uppi trekk í trekk.

Frumvarp um ný starfskjaralög var lagt fram núna en verður ekki afgreitt. Þó margt sé til bóta í því frumvarpi er ljóst að mörg aðildarfélög innan ASÍ hafa fært rök fyrir því að frumvarpið taki ekki á launaþjófnaði eins og lofað var og því hefur ASÍ ekki þrýst á að frumvarpið nái fram að ganga.

Frumvarp um lífeyrismál sem lofað hefur verið síðan 2016 er loksins komið á lokametrana eftir miklar umræður en þar eru loksins lögfest 15,5% iðgjöld í lífeyrissjóði á almenna markaðnum eins og á hinum opinbera. Það er ekkert launungarmál að það hafa verið töluverð átök um frumvarpið innan verkalýðshreyfingarinnar. Einhverjir vilja sérhagsmuni og sértryggingu, á meðan aðrir vilja félagslega nálgun og samtryggingu. Niðurstaðan er tilgreind séreign, þar sem farið er bil beggja og í raun vísað til lífeyrissjóðanna að útfæra hvernig farið verður með tilgreinda séreign. Það er augljóst að búið er að finna málamiðlun og nauðsynlegt er að klára málið. Það gengur einfaldlega ekki að lífeyrisréttindi launafólks á almenna markaðnum eigi sér ekki lagastoð, að bara launafólk á hinum opinbera markaði búi að slíkum réttindum.

Frumvarp um húsaleigulög gengur allt of skammt, en er samt liður í þeirri vegferð að koma böndum á leigumarkaðinn. Skilyrði fyrir því er að skrá leigusamninga í gagnagrunn og það er lagt til í frumvarpinu. Að auki er búið að lofa enn frekari lagabótum í haust eftir nýlegt samráð í húsnæðismálum. Það er því afar mikilvægt að þetta frumvarp nái fram að ganga.

Frumvarp um vexti og verðtryggingu hefur dagað uppi í þinginu og þótti mörgum það ekki ganga nógu langt í þá átt að afnema svokölluð 40 ára lán. Frumvarpið er ekki til umræðu núna og því ekki í pakkanum sem verið er að semja um.

Þó tíundaðir séu hér nokkrir veigamiklir málaflokkar sem hafa orðið hornreka eftir síðustu kjarasamninga þá er líka vert að hafa það í huga að ýmislegt fleira hefur vissulega áunnist á tímabilinu: Breytingar á skattkerfinu, fæðingarorlof, bætt í tilfærslukerfin eins og barnabætur og fleira. Það er hins vegar ljóst að gengið verður til kjarasamninga með töluvert magn af óuppfylltum loforðum enn og aftur. Vonandi verður sá listi styttri en stefnir í núna og vona ég innilega að það náist að klára lífeyrisfrumvarpið og frumvarp um ný húsaleigulög. Svo skrifar forseti ASÍ.

Mik­il gleði og ham­ingja fylg­ir því þegar nýtt barn kem­ur í heim­inn. Það að sækja um fæðing­ar­or­lof get­ur þó verið stjarn­fræðilega flókið fyr­ir marga verðandi for­eldra. Ferlið er stund­um rugl­ings­legt og það er óþarfa haus­verk­ur fyr­ir verðandi for­eldra sem hafa í nógu að snú­ast. Núna er hægt að sækja um fæðing­ar­or­lof á net­inu.

Verðandi for­eldr­ar, sem eru á vinnu­markaði og sjálf­stætt starf­andi, geta nú sótt um fæðing­ar­or­lof á ein­fald­an hátt. Um­sókn­ar­ferlið fer í gegn­um is­land.is. Ný sta­f­ræn um­sókn um fæðing­ar­or­lof hef­ur síðustu miss­eri verið í vinnslu í sam­starfi við Vinnu­mála­stofn­un og er enn í stöðugri þróun. Ferlið sæk­ir sjálf­krafa öll þau gögn sem þurfa að fylgja um­sókn­inni og send­ir sjálf­krafa áfram til maka og at­vinnu­rek­anda til samþykkt­ar. Enn er unnið að þróun um­sókn­ar fyr­ir aðra hópa, ein­stak­linga sem hafa verið á at­vinnu­leys­is­bót­um eða eru að koma úr fæðing­ar­or­lofi.

Hverj­ir hafa rétt til fæðing­ar­or­lofs?

For­eldri sem er í meira en 25% starfs­hlut­falli á rétt á launuðu fæðing­ar­or­lofi í sex mánuði. Greiðslur frá fæðing­ar­or­lofs­sjóði eru tekju­tengd­ar og fær fólk 80% af meðaltali heild­ar­launa síðustu 12 mánuði. Þessu 12 mánaða tíma­bili lýk­ur sex mánuðum áður en barnið kem­ur í heim­inn.

Fólk sem á von á barni, til dæm­is 17. ág­úst 2022, þarf að gefa upp tekj­ur á tíma­bil­inu 17. mars 2021 til 17. mars 2022. Meðaltal launa fólks á þessu tíma­bili gilda í reikn­ingi til or­lofs.

Sam­kvæmt heimasíðu fæðing­ar­or­lofs­sjóðs eru lægstu greiðslur úr fæðing­ar­or­lofs­sjóði fæðing­ar­styrk­ir. Fæðinga­styrk­ir eru fyr­ir for­eldra sem eru utan vinnu­markaðar eða í námi.

Fólk utan vinnu­markaðar eða í minna en 25% starfi á rétt á 87.062 kr. á mánuði í fæðing­ar­styrk. Ef fólk er í 75-100% námi fær það 199.522 kr. á mánuði í fæðinga­styrk.

Fæðing­ar­or­lof for­eldr­is í fullu or­lofi eru 80% af meðaltali heild­ar­launa. Þó aldrei hærri en 600.000 kr. á mánuði. Töl­urn­ar miðast við 2022 og er barns­haf­andi for­eldr­um bent á að klára sta­f­ræna um­sókn á und­an maka sín­um.

Heimild mbl.is

Aðalfundur Þingiðar verður haldinn þriðjudaginn 14. júní kl. 20:00 í fundarsal stéttarfélaganna. Skorað er á félagsmenn að fjölmenna á fundinn.

Dagskrá:

 1.Venjuleg aðalfundarstörf

• Kjör á starfsmönnum fundarins
• Skýrsla stjórnar
• Ársreikningar
• Umræður um skýrslu stjórnar og reikninga
• Lýst kjöri í trúnaðarstöður í félaginu
• Lagabreytingar
• Ákvörðun árgjalda
• Laun stjórnar, annara stjórna og nefnda
• Kosning löggilts endurskoðanda

2. Hækkanir á styrkjum úr sjúkrasjóði

3.  Réttindi  félagsmanna við starfslok

 4. Önnur mál

 

Athygli er vakin á 24. grein laga félagsins – Ráðstöfun úr sjóðum félagsins:
Tillögur stjórnar, trúnaðarmannaráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

 

Stjórn Þingiðnar

 

 

 

 

Í tilefni af Sjómannadeginum um næstu helgi stendur Framsýn fyrir kaffiboði í Kaupfélaginu á Raufarhöfn föstudaginn 10. júní. Kaffi og tertur í boði frá Kvenfélagi Raufarhafnar. Opið hús verður frá kl. 16:00 til 18:00. Allir velkomnir og rúmlega það. Sjáumst í stuði á föstudaginn. Fulltrúar frá Framsýn verða á staðnum hressir að vanda.

 Framsýn stéttarfélag

Aðalfundur Starfsmannafélags Húsavíkur verður haldinn mánudaginn 13. júní kl. 17:00 í fundarsal stéttarfélaganna að Garðarsbraut 26 á Húsavík.

 Dagskrá:

1. Venjuleg aðalfundarstörf
   a) Stjórn félagsins gefur skýrslu um starfsemi félagsins síðastliðið ár
   b) Lagðir fram til úrskurðar endurskoðaðir reikningar félagsins fyrir síðastliðið ár
   c) Tekin ákvörðun um árgjöld félagsmanna
   d) Lagabreytingar
   e) Kosning stjórnar samkvæmt 6. grein
   f) Kosning félagslegra endurskoðenda samkvæmt 6. grein
   g) Kosning fulltrúa á þing B.S.R.B.
   h) Kosning fulltrúa í orlofs-, ferðamála- og starfskjaranefnd

 

2. Íbúð félagsins í Sólheimum

 

3. Greiðslur félagsmanna/sveitarfélaga í kjarasamningsbundna sjóði

 

4. Önnur mál

 

Skorað er á félagsmenn að fjölmenna á fundinn.

 

Stjórn STH

Ársfundur Stapa lífeyrissjóðs var haldinn í gær, miðvikudaginn 1. júní, í Menningarhúsinu Hofi. Mæting á fundinn var góð en sjóðfélögum var einnig gefinn kostur á að fylgjast með fundinum í vefútsendingu. Á dagskrá fundarins voru hefðbundin ársfundarstörf. Fundarstjóri var formaður Framsýnar, Aðalsteinn Árni Baldursson.

Tryggvi Jóhannsson stjórnarformaður flutti skýrslu stjórnar og Jóhann Steinar Jóhannsson framkvæmastjóri fór yfir ársreikning og áritanir ásamt því að gera grein fyrir tryggingafræðilegri stöðu. Jóhann Steinar fór einnig yfir fjárfestingarstefnu og hluthafastefnu sjóðsins í fjarveru fjárfestingastjóra.

Á fundinum voru lagðar fram fjórar tillögur að breytingum á samþykktum sjóðsins. Einar Ingimundarson lögmaður og Jóna Finndís Jónsdóttir forstöðumaður réttindasviðs, gerðu grein fyrir þeim breytingum og voru þær allar samþykktar.

Farið var yfir starfskjarastefnu sjóðsins sem er óbreytt frá fyrra ári og var hún samþykkt samhljóða. Þá var einnig samþykkt tillaga að KPMG sem löggiltum endurskoðanda sjóðsins og tillaga að breytingu stjórnarlauna frá fyrra ári, í samræmi við hækkun á launavísitölu.

Stjórnarkjöri var lýst en stjórn sjóðsins var kosin á fulltrúaráðsfundi sjóðsins þann 4. maí sl. Stjórn Stapa lífeyrissjóðs skipa í dag:

Frá launamönnum:
Tryggvi Jóhannsson (varaformaður), Guðný Hrund Karlsdóttir, Oddný María Gunnarsdóttir og Sverrir Mar Albertsson.

Varamenn: Heimir Kristinsson og Sigríður Dóra Sverrisdóttir.

Frá launagreiðendum:
Erla Jónsdóttir (formaður), Dagmar Ýr Stefánsdóttir, Unnar Már Pétursson og Valdimar Halldórsson.

Varamenn: Guðrún Ingólfsdóttir og Páll Snorrason.

Þá var í samþykkt samhljóða nefnd um laun stjórnar. Í nefndinni sitja stjórnarformaður Stapa, Jens Garðar Helgason, Hjördís Þóra Sigurþórsdóttir og Þórarinn G. Sverrisson.

Gögn frá ársfundinum:

• Ársskýrsla Stapa 2021
• Ávarp stjórnarformanns
• Glærur fundarins
• Breytingar á samþykktum
• Fundargerð ársfundar 2022 ( kemur inn síðar)

Ársfundur Lsj. Stapa fór fram í Hofi á Akureyri í dag. Að venju var kosið í stjórn sjóðsins. Framsýn samþykkti að tilnefna Guðnýju Hrund Karlsdóttir í stjórn sjóðsins til tveggja ára fh. sjóðfélaga í Þingeyjarsýslum. Guðný Hrund er félagsmaður í Framsýn stéttarfélagi.

Guðný Hrund Karlsdóttir er viðskiptafræðingur (Cand. Oecon) að mennt með viðbótar MA gráðu í fjölmiðla- og boðskiptafræðum. Hún hefur fjölbreytta reynslu frá einkageiranum og hinu opinbera.

Guðný Hrund er stofnandi og framkvæmdastjóri bókhalds- og ráðgjafafyrirtækisins Tvíhliða bókhald ehf. og situr í stjórn Íslandspósts. Hún var sveitarstjóri á Raufarhöfn 2002-2006 og í Húnaþingi Vestra 2014-2019. Áður starfaði hún hjá Streng hf., Maritech og WiseDynamics í Reykjavík, Akureyri, Noregi og Kanada sem viðskipta- og verkefnastjóri við innleiðingu viðskiptahugbúnaðar viðskiptavina í Evrópu, Kanada og Bandaríkjunum.

Guðný  Hrund hefur sinnt fjölmörgum trúnaðar- og ábyrgðastöðum m.a. í stjórn Hafnarsambands Íslands, Eignarhaldafélags Brunabótafélags Íslands, Fallorku, Nýsköpunarsjóð Atvinnulífsins og sem formaður stjórnar Ábyrgðarsjóðs launa.

Faðir Guðnýjar Hrundar er Karl Steinar Guðnason fyrrverandi formaður Verkalýðs- og sjómannafélags Keflavíkur í um tvo áratugi og varaformaður Verkamannasambands Íslands. Móðir Guðnýjar er Þórdís Þormóðsdóttir félagsráðgjafi.

Félagsmenn Þingiðnar og Starfsmannafélags Húsavíkur skulu reikna með aðalfundum félaganna um miðjan júní. Reiknað er með að endurskoðendur félaganna skili bókhaldinu af sér í lok þessar viku og þá verði hægt að tímasetja fundina. Sjá frekari upplýsingar um endanlegar tímasetningar inn á heimasíðunni eftir helgina.

Aðalfundur Framsýnar stéttarfélags verður haldinn miðvikudaginn 15. júní kl. 20:00 í fundarsal félagsins að Garðarsbraut 26, Húsavík.

Dagskrá:

1. Venjuleg aðalfundarstörf

• Félagaskrá
• Skýrsla stjórnar
• Ársreikningar
• Umræður um skýrslu stjórnar og ársreikninga
• Kjör í stjórnir, nefndir og ráð
• Kosning löggilts endurskoðanda/endurskoðunarskrifstofu
• Lagabreytingar
• Ákvörðun árgjalda
• Laun aðalstjórnar, trúnaðarráðs, nefnda og stjórna innan félagsins 

2. Önnur mál

• Heiðrun félagsmanna
• Réttindi félagsmanna við starfslok
• Kröfugerðir félagsins SGS/LÍV gagnvart Samtökum atvinnulífsins lagðar fram

Athygli er vakin á 32. grein laga félagsins – Ráðstöfun úr sjóðum félagsins:
Tillögur stjórnar, trúnaðarráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

Félagsmenn geta nálgast tillögur stjórnar og trúnaðarráðs Framsýnar sem liggja fyrir fundinum á Skrifstofu stéttarfélaganna.

Húsavík 31. maí 2022

Stjórn og trúnaðarráð Framsýnar

Framsýn svaraði kalli Heilbrigðisstofnunar Norðurlands með að halda kynninu á kjarasamningum og lögum er tengjast kjörum starfsmanna HSN á Húsavík. Aðalsteinn J. Halldórsson tók að sér að sjá um kynninguna fyrir Framsýn en hún var ætluð nýliðum sem eru um þessar mundir að hefja störf hjá stofnuninni.

Landssamband ísl. verslunarmanna stóð fyrir formannafundi í Reykjavík í gær um mótun kröfugerðar vegna komandi kjaraviðræðna við Samtök atvinnulífsins. Mjög gott hljóð var í fundarmönnum og mikill samhljómur var meðal þeirra. Deild verslunar- og skrifstofufólks innan Framsýnar á aðild að LÍV og fulltrúi frá félaginu tók þátt í fundinum. Mótuð voru drög að kröfugerð sem verður til frekari skoðunar hjá aðildarfélögum LÍV áður en gengið verður frá henni endanlega. Félögin hafa tíma til 3. júní til að koma frekari athugasemdum/ábendingum á framfæri varðandi endanlega kröfugerð. Fullur vilji er til þess að kröfugerð VR/LÍV verði sameiginleg, það er að aðildarfélög LÍV fari sameiginlega fram í kjaraviðræðurnar við Samtök atvinnulífsins sem hefjast á næstu vikum og mánuðum.

Um 80 börn og starfsmenn Leikskólans Grænuvalla á Húsavík gerðu sér ferð í Grobbholt í vikunni. Um er að ræða árvissa heimsókn á hverju vori. Í Grobbholti er haldinn smá dýragarður; Kindur, endur, hænur, dúfur og kanínur. Að sjálfsögðu var mikil gleði hjá unga fólkinu sem leit við í vikunni enda sauðburður í gangi og mikið að skoða. Á hverju vori hefur verið vinsælt hjá börnum á leikskólaaldri og reyndar á grunnskólaaldi líka að líta við í Grobbholti og skoða dýrin enda alltaf allir velkomnir í heimsókn. Hér má sjá nokkrar myndir sem teknar voru úr heimsókn leikskólabarna í Grobbholt og eldri barna á grunnskólaaldri sem voru á ferðinni á sama tíma.

Því miður hafa stjórnendur Heilbrigðisstofnunar Norðurlands ekki séð ástæðu til að svara erindi Framsýnar frá 10. maí 2022 varðandi beiðni um upplýsingar er varða sparnaðartillögur til að bregðast við fjárhagsvandanum hjá HSN.

Á fundi stjórnar og trúnaðarráðs Framsýnar 17. maí kom fram hörð gagnrýni á vinnubrögð HSN varðandi útboð á þrifum. Samþykkt var að ítreka fyrra bréf og álykta um málið. Þá hefur Framsýn falið Hagdeild ASÍ að yfirfara útreikninga stofnunarinnar sem kynntir voru á starfsmannafundi með starfsfólki við ræstingar. Þar kom fram að töluverður sparnaður væri fólginn í því að bjóða þrifin út. Framsýn dregur verulega í efa að útreikningarnir séu réttir. Vitað er að starfsfólk við þrif og ræstingar hefur auk þess komið að öðrum störfum s.s. í bítibúrinu og þrifum utan stofnunar HSN.

Hagdeild ASÍ er tilbúin að yfirfara útreikningana fyrir Framsýn enda fái hagdeildin aðgengi að útboðsgögnunum. Það er í hverju útboðið var fólgið er snýr að starfsemi HSN á Húsavík og hvort allir þeir verkþættir sem ræstingarfólkið hefur séð um fram að þessu hafi verið með í útboðinu eða eitthvað undanskilið. Til viðbótar má geta þess, samkvæmt heimildum Framsýnar eru þessi kaup HSN á þrifaþjónustu virðisaukaskyld sem felur í sér aukakostnað fyrir stofnunina þar sem hún fær hann ekki endurgreiddan.

Hér má lesa ályktun fundarins:

Ályktun

-Um útboð HSN á ræstingum-

 „Stjórn og trúnaðarráð Framsýnar fordæmir þá ákvörðun Heilbrigðisstofnunar Norðurlands (HSN) að bjóða út ræstingar á vegum stofnunarinnar á Norðurlandi. Samkvæmt fyrirliggjandi upplýsingum er um að ræða viðbrögð stjórnenda við fjárhagsvanda HSN.

 Hvað það varðar er athyglisvert að verða vitni að því að stjórnendur HSN hyggist taka á hallarekstrinum með því að setja krumlurnar í vasa þeirra lægst launuðu hjá stofnuninni. Þannig verði hægt að halda úti eðlilegri heilbrigðisþjónustu fyrir skjólstæðinga stofnunarinnar, það er með því að segja ræstingafólkinu upp störfum.

 Stjórn og trúnaðarráð Framsýnar dregur verulega í efa að útreikningur HSN sé réttur hvað varðar sparnað stofnunarinnar við að bjóða ræstingarnar út. Félagið hefur þegar óskað eftir upplýsingum frá HSN um útboðið og jafnframt falið Hagdeild ASÍ að yfirfara gögnin. Þess er vænst að Framsýn fái aðgang að gögnunum til að sannreyna framkomnar upplýsingar frá HSN um sparnað og upplýsingar um hvort/hvaða frekari sparnaðartillögur eru fyrirhugaðar.“