kuti

Starfsgreinasamband Íslands sem Framsýn á aðild að boðar til fundar í byrjun sumars þar sem ungu fólki innan hreyfingarinnar verður gefið færi á að hittast, fræðast og skemmta sér saman í þeim tilgangi að efla ungt fólk félagslega.

Staðsetning: Fundurinn verður haldinn í húsnæði Verkalýðsfélags Grindavíkur að Víkurbraut 46. Búið er að panta gistingu fyrir hópinn að Geo Hotel Grindavík, Víkurbraut 58.
Tímasetning: Fundurinn er haldinn dagana 1. og 2. júní. Dagskráin hefst með hádegisverði kl. 12 miðvikudaginn 1. júní. Fundi unga fólksins lýkur formlega klukkan 12 fimmtudaginn 2. júní en þá verður boðið uppá hádegismat með formönnum og varaformönnum aðildarfélaga SGS og síðan er óskað eftir því að fulltrúar úr hópi unga fólksins kynni afrakstur fundarins í upphafi formannafundar SGS sem hefst kl. 13:30.
Fulltrúar á fundinum: Hvert aðildarfélag má senda tvo fulltrúa, einn af hvoru kyni, 30 ára eða yngri.
Kostnaður: Kostnaður við ferðir og uppihald er greitt af hverju félagi fyrir sig en Starfsgreinasambandið kostar fyrirlesara og kvöldmat.
Tilgangur og markmið: Tilgangurinn er að ungt fólk kynnist hvert öðru og hreyfingunni betur, njóti þess að vera saman og verði áhugasöm um áframhaldandi starf innan hreyfingarinnar. Ef vel gengur verður leikurinn endurtekinn.
Dagskrá: Dagskráin verður sambland af kynningu á hverjum þátttakanda, námskeið í samningatækni, fundasköpum, að koma sér á framfæri og hvernig hægt er að hafa áhrif innan hreyfingarinnar. Þá er gert ráð fyrir að fundurinn komi sér saman um skilaboð til forystu SGS um áherslur ungs fólks.
Fulltrúar Framsýnar: Framsýn mun senda tvo fullrúa á fundinn og greiða vinnutap og allan kostnað sem fulltrúar félagsins verða fyrir er tengist fundinum. Áhugasamir eru beðnir um að hafa samband við Skrifstofu stéttarfélaganna hafi þeir áhuga fyrir því að vera fulltrúar Framsýnar á fundinum. Hægt er að senda skilaboð á kuti@framsyn.is

Benedikt Jóhannesson, tryggingastærðfræðingur tók saman ávinning af starfsemi VIRK fyrir árið 2015. Í ljós kom að tæplega 14 milljarða ávinningur var af starfseminni árið 2015. Þetta er enn meiri ávinningur en var af starfseminni árin á undan. Nánar má lesa um úttekt Benedikts hér.

Ágúst Óskarsson starfar fyrir VIRK starfsendurhæfingarsjóð á Húsavík.

Aðalsteinn Á. og Aðalsteinn J. áttu fund með pólskum starfsmönnum LNS Saga á Bakka föstudaginn 1. apríl. Agnieszka Szczodrowska sá um að túlka fyrir hópinn. Margt var rætt á fundinum og almenn ánægja með þessa heimsókn.
Vinnubúðir, vinnuaðstaða og mötuneyti eru að taka á sig mynd og fyrr en varir verður uppbyggingin kominn á fullt skrið. Heimsóknir eins og þessar munu verða farnar reglulega á meðan á uppbyggingarferlinu stendur.

Eðvarð var búinn að vera í basli undanfarna daga á flestum vígstöðum. Heima fyrir var hann að klára páskana með tilheyrandi kjöt- og sykurneyslu. Jenever lagerinn hans var tómur en þetta niðurlenska undrameðal var stundum það eina sem hélt honum gangandi. Hvað reksturinn varðar gekk hótelið ekki sem skyldi. Spjátrungurinn sem hann réð til að sjá um tölvumálin sagði að það væri út af slæmum umsögnum á vef sem nefndist „Trip Advisor“. Eðvarð hafði margsagt honum að laga það hið snarasta, hann væri jú einu sinni tölvusérfræðingurinn, Eðvarð sæi um reksturinn og hann kæmi tölvumálum ekkert við. Eðvarð vissi að flestir útlendingar koma bara einu sinni á ævinni í hreppinn til hans og þá væri auðvitað lag að ná sem mestu úr þeim. En nú var internetið komið í stríð við hann. „Farið til fjandans, tölvunirðir þessa heims“, hugsaði Eðvarð á meðan hann setti hangikjötssalatið á mjólkurkexið. Vandamálin í félagslífinu voru þó stærst. Eðvarð var endanlega orðinn að athlægi í Rótarý. Stress-niðurgangurinn um páskana hafði að hluta skýrst af ótta Eðvarðs við lista sem einhverjir kommúnistar hótuðu nú að birta um eignir Íslendinga á breskum paradísareyjum karabíska hafsins. Jakkafataklæddi maðurinn, hjá ráðgjafarfyrirtækinu með erlendu skammstöfuninni, hafði lýst fyrir honum einhverri „hókus-pókus leið“ sem átti að þýða að Eðvarð þyrfti ekki að borga skatt af þessum litla hluta reksturs síns sem ekki tilheyri hinu dásamlega svarta hagkerfi. Miðað við það sem Eðvarð hafði borgað jakkafataklædda manninum dró hann þá ályktun að í þjónustunni hlyti að hafa falist a.m.k. þrjár hringferðir með peningana hans um hnöttinn. Annað
kom þó heldur betur á daginn! Á fyrsta fundi eftir páska var Eðvarð hafður að háði og spotti enda eini meðlimurinn í hreppnum sem var ekki á listanum. Félagar hans hlógu framan í hann og þökkuðu honum fyrir vegina, spítalana og ellilífeyrinn. Eðvarð bar að sjálfsögðu fyrir sig ráðgjöf jakkafatamannsins. Hann hafi öfugt við flesta aðra í raun talið að peningarnir væru í karabíska hafinu en nú vissi hann ekkert hvar þeir voru niðurkomnir. Og það sem verra var að jakkafataklæddi maðurinn hjá fyrirtækinu með erlendu skammstöfunina svaraði ekki í símann.

Tuttugu og tvö stéttarfélög um allt land á almenna markaðnum og hjá hinu opinbera hafa skorað á heilbrigðisráðherra að löggilda starfsheitið félagsliði, þar á meðal stéttarfélagið Framsýn. Félagsliðar hafa barist fyrir því að verða löggilt heilbrigðisstétt um árabil en lítið hefur gengið. Löggilding félagsliða er ekki bara mikilvæg fyrir framgang stéttarinnar heldur ekki síst fyrir gæði þjónustu við þann vaxandi hóp sem þarf á aðstoð að halda. Fulltrúar félagsliða gengu á fund heilbrigðisráðherra í nóvember síðastliðnum til að tala fyrir löggildingu en engar fréttir hafa borist af framgangi málsins. Á fræðsludegi félagsliða sem haldinn var nýverið er ljóst að krafan um löggildingu er sterk innan stéttarinnar enda ólíðandi að félagsliðar sitji ekki við saman borð og sambærilegar stéttir. Framsýn átti tvo öfluga fulltrúa á fundinun, þær Ósk Helgadóttir og Kristbjörgu Sigurðardóttir.
Áskorunina má sjá hér.

Starfsfólk skrifstofu stéttarfélaganna tók þátt í 1. apríl eins og þorri þjóðarinnar. Eins og sjá má í fyrri frétt var ókeypis páskaeggjum lofað fyrir gesti skrifstofunnar í dag, vegna breyttra reglna um meðferð afgangs páskaeggja. Nokkrir féllu fyrir gabbinu en urðu að snúa tómhentir heim. Starfsfólk skrifstofunnar vilja koma á framfæri þökkum til þeirra sem tóku þátt.

Fulltrúar Samkaupa komu við á skrifstofu stéttarfélaganna á dögunum og færðu skrifstofunni 30 páskaegg sem seldust ekki fyrir páska. Nýjar reglur tóku gildi fyrr á þessu ári um að ekki megi bræða óseld páskaegg til endurvinnslu og því sitja verslanirnar uppi með þau egg sem ekki seljast. Starfsmenn Samkaupa hér á Húsavík töldu það góða lausn að færa stéttarfélögunum þau egg sem urðu afgangs til útdeilingar. Ákveðið hefur verið að gefa gestum skrifstu stéttarfélaganna eggin núna í dag. Fyrstir koma, fyrstir fá. Þeir sem ekki hafa tök á því að koma á skrifstofu stéttarfélaganna í dag geta þó engu að síður tryggt sér egg með því að senda tölvupóst á framsyn@framsyn.is og fá egg frátekið.

Niðurstaða atkvæðagreiðslu nýrra samninga um starfsskilyrði nautgripa- og sauðfjárbænda hefur verið gerð kunngjörð. Báðir samningarnir voru samþykktir nokkuð örugglega. Samningarnir voru undirritaðir þann 19. febrúar síðastliðinn af fulltrúum Bændasamtaka Íslands, sjávarútvegs- og landbúnaðarráðherra og fjármála- og efnahagsráðherra fyrir hönd ríkissjóðs. Nánar má lesa um atkvæðagreiðsluna hér.

Þrátt fyrir snjókomu í dag hafa ferðamenn sem lagt hafa leið sína til Húsavíkur ekki látið það aftra sér frá því að fara í hvalaskoðun á Skjálfanda með Norðursiglingu. Hér koma myndir sem teknar voru við höfnina í dag þegar Náttfari var að koma úr hvalaskoðun með yfir fimmtíu farþega.

Kvenfélagasamband Íslands gefur út tímaritið Húsfreyjuna fjórum sinnum á ári. Það er í mars, júní, september og nóvember. Í mars blaðinu er að finna áhugavert viðtal við varaformann Framsýnar, Ósk Helgadóttir auk þess sem vitnað er í erindi sem hún flutti á opnum fundi Framsýnar þegar 100 ára kosningarétti kvenna var fagnað sérstaklega á Húsavík á síðasta ári.

Framganga varaformanns Framsýnar hefur vakið töluverða athygli, sem þarf ekki að koma á óvart, enda mikil baráttumanneskja.

ASÍ stendur fyrir átaki sem nefnist Einn réttur – ekkert svindl. Stofnað var til þess til þess til að berjast gegn undirboðum á vinnumarkaði og svartri atvinnustarfsemi. Nú hefur ASÍ tekið saman ítarlega rökstutt álit og helstu rök sín í málinu.

Afstaða ASÍ er einföld: ,,Ólaunuð vinna við efnahagslega starfsemi, framleiðslu og sölu á vöru eða þjónustu á markaði (í hagnaðarskyni) oft í samkeppni við fyrirtæki í sömu atvinnustarfsemi, felur í sér óásættanleg undirboð á íslenskum vinnumarkaði og stenst hvorki kjarasamninga né lög“. Nánar má lesa um málið hér.

 

 

Athyglisverð greining á áhrifum hækkanna mótframlags atvinnurekanda í lífeyrissjóði og áhrif þeirra á afkomu og möguleika ungs fólks birtist á vef ASÍ á dögunum. Þessi má hafa verið mikið í umræðunni á undanförnum misserum. Í greininni eru ágætis rök fyrir því að hækkað framlag sé leið sem heppilegt sé að fara. Lesa má meira hér.

Í grein á vefmiðli Dagskránnar á Akureyri fer Húsvíkingurinn Egill Páll Egilsson yfir þá stöðu sem komin er upp á húsnæðismarkaðnum á Húsavík. Ljóst er að vöntun er á markaðnum og dæmi er um að fólk hættir við að flytja til Húsavíkur vegna þess að heppilegt húsnæði finnst ekki eða jafnvel að fólk flytji úr bænum vegna þess að það missir leiguhúsnæði og finnur sér ekki annað í staðinn. Í greininni er rætt við Kristján Þ. Magnússon, sveitarstjóra Norðurþings, um hvernig hægt sé að bregðast við þessu vandamáli og hvað sveitarfélagið sé að gera í málinu. Einnig er rætt við formann Framsýnar, Aðalstein Á. Baldursson, en hann hefur lýst yfir vilja stéttarfélagsins til þess að koma að lausn málsins með einhverjum hætti, enda um afar brýnt mál að ræða. Lesa má grein Egils Páls hér.

Aðalsteinn Á. Baldursson, formaður Framsýnar, var í viðtali við Ágúst Ólafsson í þættinum Morgunvaktin á Rás 1 í morgun. Rætt var um þau auknu umsvif sem hafa orðið hjá félaginu í kjölfar uppbyggingarnar á Bakka, kjarasamninga þeim tengdum og fleira í þeim dúr. Hægt er að hlusta á viðtalið hér. Viðtalið við Aðalstein hefst eftir um það bil 15 mínútur.

Fulltrúar Framsýnar fóru í morgunsárið á fund með starfsmönnum og yfirmönnum Steinsteypis ehf. Yfirmenn fyrirtækisins óskuðu eftir fundi til að fara yfir ýmislegt sem tengist launamálum, hvíldartíma og fleira í þeim dúr. Í jafn miklum umsvifum og eru hér á svæðinu þessi misserin koma spurningar sem þessar oft upp, enda mikil vinna í boði. Fulltrúar stéttarfélaganna er ánægðir með að leitað hafi verið til þeirra. Fljótlega eftir að fundinum lauk hófst fundur í fundarsal stéttarfélaganna með öryggisráði Bakkaverkefnisins og er honum að ljúka á þessari stundu.

Rúningur stendur nú yfir hjá flestum sauðfjárbændum þessar vikurnar. Nokkuð er um að bændur fái verktaka í þessa vinnu og eru þá gjarnan fleiri en einn verktaki á hverju búi. Hér má sjá tvo þeirra, Öxfirðingana Tryggva Hrafn Sigurðsson og Daníel Stefánsson. Þarna eru þeir að klippa fyrir Snorra Kristjánsson í Stafni.

Tekin hefur verin ákvörðun um að leggja niður skattkortin í þeirri mynd sem þekkist í dag. Liður í þeirri aðgerð er rafrænt yfirlit yfir staðgreiðslu og nýttan persónuafslátt. Nálgast má þetta yfirlit á þjónustuvef ríkisskattstjóra. Hægt er að skrá sig inn með rafrænum skilríkjum eða veflykli. Hafa skal í huga að engar breytingar eru gerðar á staðgreiðsluskilum, en nýtt verklag er tekið upp þegar launamaður vill breyta nýtingu persónuafsláttar eða þegar launamaður kemur nýr til starfa. Hér eftir verður það launamanns að gera grein fyrir hvort hann ætli að nýta persónuafslátt við útreikning staðgreiðslu af launum. Einnig ef launamaður vill nota sér persónuafslátt maka eða nýta uppsafnaðan persónuafslátt. Nánar má lesa um rafrænan persónuafslátt hér.

„Aðalfundur Handverkskvenna milli heiða haldinn þann 19. mars 2016 tekur heils hugar undir tilkynningu Handprjónasambands Íslands varðandi gjöf Icelander til borgarstjóra Chicago og Ragnheiður Elín Árnadóttir iðnaðar – og viðskiptaráðherra afhenti í vikunni.
Síaukinn fjöldi ferðamanna til landsins hefur kallað á aukna framleiðslu handverks og íslenskt handverksfólk hefur mikinn metnað fyrir sinni vöru. Íslenskar lopapeysur hafa undanfarna áratugi verið þar í fremstar í flokki. Því er sárt að horfa upp á það að forsvarsmenn stórfyrirtækja og íslenskir ráðamenn skuli velja táknrænar gjafir til kynningar lands og þjóðar, vörur sem framleiddar eru í Kína.
Íslenskt handverk er þjóðararfur sem við eigum að vera stolt af og það mega ráðamenn líka vera og sýna það í verki.“

Framkvæmdir standa nú yfir við Húsavíkurhöfn þar sem unnið er að því að lagfæra höfnina. Einnig er hafin jarðgangnagerð í gegnum Húsavíkurhöfða og vegaverð að iðnaðarlóðunum á Bakka. Eftirlitsfulltrúar Framsýnar voru á ferðinni og tóku þessar myndir við það tækifæri.

Byrjað er á göngunum í gegnum Húsavíkurhöfða.

 

 

 

 

 

 

 

 

 

Hér verður gangnamuninn Bakka megin, það er í Laugardalnum. Ánægjulegt er að sjá að verktakinn hlífir gamalli kartöflugeymslu sem er í jaðrinum á veginum.

 

 

 

 

 

 

 

 

 

Hér eru starfsmenn LNS Saga að vinna við að lengja grjótvarnargarð frá Bökugarði að gangnamunanum. Til þess eru notaðar stórar vinnuvélar.

Öflugur bor er notaður við verkið.

Sturla Fanndal starfsmaður LNS Saga fór yfir framkvæmdirnar með formanni Framsýnar og eftirlitsfulltrúa stéttarfélaganna. Sturla er ættaður frá Húsavík.

Aðkeyrslan að göngunum verður nánast í fjöruborðinu.

 

 

 

 

 

 

 

 

 

Hér er verið að vinna að því að tengja nýja veginn frá göngunum í Laugadal að iðnaðarlóðunum á Bakka.

Búið er að opna grjótnámu austan við Húavíkurfjall. Grjótið verður notað í varnargarð við göngin að sunnanverðu.

Farið þið frá, hér eru vinnandi menn á ferð. Já það er eins gott að vera ekki fyrir á athafnasvæðinu enda allt á fullu.

Farmur losaður utan við höfnina í uppfyllingu.

Mötuneyti starfsmanna við hafnarframkvæmdirnar og Húsavíkurgöng er ekkert slor. Konurnar í mötuneytinu tendra fram góða rétti til handa starfsmönnum. Þær voru ánægðar með sig þegar eftirlitsfulltrúi stéttarfélaganna kom við hjá þeim eftir að hafa skoðað athafnasvæðið undir leiðsögn yfirmanna LNS Saga á staðnum. Að sjálfsögðu var honum boðið í hádegisverð.