kuti

Aðalfundur Starfsmannafélags Húsavíkur verður haldinn fimmtudaginn 8. júní 2017 kl. 20:00 í fundarsal Starfsmannafélags Húsavíkur, Garðarsbraut 26 Húsavík.

Dagskrá samkvæmt lögum félagsins.

1. Skýrsla stjórnar um starfsemi s.l. ár.
2. Ársreikningar 2016, kynning og afgreiðsla.
3. Ákvörðun um félagsgjöld.
4. Breytingar á lögum og reglugerðum félagsins.
   1. Stjórn félagsins hefur lagt fram tillögu um hækkun styrkja hjá Starfsmenntunarsjóði félagsins, sbr. 5. grein Reglugerðar um Starfsmenntunarsjóð Starfsmannafélags Húsavíkur.
5. Kosning stjórnar, endurskoðenda og fulltrúa í nefndum félagsins, skv. 6. grein Laga STH.
6. Önnur mál.

Ársreikningar félagsins fyrir árið 2016 liggja frammi á skrifstofu félagsins fyrir félagsmenn.

Vonumst til að sjá sem flesta félagsmenn!

Stjórn Starfsmannafélags Húsavíkur

Aðalfundur Þingiðnar, félags iðnaðarmanna í Þingeyjarsýslum verður haldinn þriðjudaginn 6. júní kl. 20:00 í fundarsal stéttarfélaganna að Garðarsbraut 26 á Húsavík. Til fundarins er boðað samkvæmt lögum félagsins.

Dagskrá: 

1. Venjuleg aðalfundarstörf
Félagaskrá
Skýrsla stjórnar
Ársreikningar
Umræður um skýrslu stjórnar og ársreikninga
Kjör í stjórnir, nefndir og ráð
Kosning löggilts endurskoðana/endurskoðunarskrifstofu
Lagabreytingar
Ákvörðun árgjalda
Laun aðalstjórnar, trúnaðarmannaráðs, nefnda og stjórna innan félagsins

2. Önnur mál

Í lok fundar verður boðið upp á kaffiveitingar. Skorað er á félagsmenn að fjölmenna á fundinn og taka þátt í umræðu um starfsemi félagsins og komandi verkefni á næstu árum.

Athygli er vakin á 24. grein laga félagsins – Ráðstöfun úr sjóðum félagsins:
Tillögur stjórnar, trúnaðarmannaráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

Þingiðn, félag iðnaðarmanna í Þingeyjarsýslum

 

Tillögur sem liggja fyrir aðalfundinum frá stjórn félagsins:

Tillaga 1
Ráðstöfun á tekjuafgangi
Tillaga er um að tekjuafgangi ársins verði ráðstafað til hækkunar á óráðstöfuðu eigin fé frá fyrra ári.

Tillaga 2
Löggiltur endurskoðandi félagsins
Lagt er til að endurskoðunarfyrirtækið PricewaterhouseCoopers ehf. sjá um endurskoðun á bókhaldi félagsins fyrir starfsárið 2017.

Tillaga 3
Um félagsgjald
Tillaga er um að félagsgjaldið verði áfram óbreytt, það er 0,7% af launum félagsmanna.

Tillaga 4
Laun aðalstjórnar
Tillaga er um að laun aðalstjórnar verði óbreytt milli ára.

Tillaga 5
Breytingar á félagslögum
Stjórn Þingiðnar hefur samþykkt að leggja til við aðalfund félagsins að félagssvæði Þingiðnar verði landið allt. Í dag er nær starfssvæði félagsins yfir sveitarfélög er tilheyra Suður- og Norður-Þingeyjarsýslu.

 

 

Það er ekki dónalegt fyrir sveitarfélag eins og Norðurþing að eiga sveit í bæ. Börn og starfsfólk Leikskólans Grænuvalla nýttu sér þetta í morgun og fóru í heimsókn í Grobbholt sem er á Skógargerðismelnum á Húsavík. Um 100 börn og starfsmenn fengu sér göngutúr og skoðuðu lömb og búfénað auk þess myndaðist biðröð við gamla dráttarvél á svæðinu sem ungviðið var afar spennt fyrir. Eins og öllum góðum göngutúrum sæmir fengu gestirnir sér Trópí og kex í nesti eftir velheppnaða skoðunarferð í Grobbholt. Reyndar voru ærnar nokkuð ágengar og vildu fá að smakka kexið góða enda vanar því að fá brauð og kex hjá ábúendum í Félagsbúinu Grobbholti. Hér má sjá myndir úr heimsókninni:

Aðalfundur Framsýnar stéttarfélags verður haldinn fimmtudaginn 1. júní kl. 20:00 í fundarsal stéttarfélaganna að Garðarsbraut 26 á Húsavík. Til fundarins er boðað samkvæmt lögum félagsins.

Dagskrá: 

1. Venjuleg aðalfundarstörf
   Félagaskrá
   Skýrsla stjórnar
   Ársreikningar
   Umræður um skýrslu stjórnar og ársreikninga
   Kjör í stjórnir, nefndir og ráð
   Kosning löggilts endurskoðana/endurskoðunarskrifstofu
   Lagabreytingar
   Ákvörðun árgjalda
   Laun aðalstjórnar, trúnaðarmannaráðs, nefnda og stjórna innan félagsins

2. 100 ára afmæli Verkakvennafélagsins Vonar 28. apríl 2018
   Tilnefning í afmælisnefnd

3. Önnur mál

Í lok fundar verður boðið upp á kaffiveitingar. Skorað er á félagsmenn að fjölmenna á fundinn og taka þátt í umræðu um starfsemi félagsins og komandi verkefni á næstu árum.

Athygli er vakin á 32. grein laga félagsins – Ráðstöfun úr sjóðum félagsins:
Tillögur stjórnar, trúnaðarmannaráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

Framsýn, stéttarfélag

Tillögur sem liggja fyrir aðalfundinum frá stjórn félagsins:

Tillaga 1
Ráðstöfun á tekjuafgangi
Tillaga er um að tekjuafgangi ársins verði ráðstafað til hækkunar á óráðstöfuðu eigin fé frá fyrra ári.

Tillaga 2
Löggiltur endurskoðandi félagsins
Lagt er til að endurskoðunarfyrirtækið PricewaterhouseCoopers ehf. sjá um endurskoðun á bókhaldi félagsins fyrir starfsárið 2017.

Tillaga 3
Um félagsgjald
Tillaga er um að félagsgjaldið verði áfram óbreytt, það er 1% af launum félagsmanna.

Tillaga 4
Laun aðalstjórnar, trúnaðarmannaráðs, nefnda og stjórna innan félagsins
Tillaga er um að laun aðalstjórnar, trúnaðarmannaráðs, nefnda og stjórna innan félagsins verði óbreytt milli ára.

Tillaga 5
Afmælisnefnd
Tillaga er um að Ósk Helgadóttir, Dómhildur Antonsdóttir og Sigurveig Arnardóttir skipi sérstaka afmælisnefnd félagsins í tilefni af því að 100 ár verða liðin frá stofnun Verkakvennafélagsins Vonar 28. apríl 2018.

 

LSR stendur fyrir kynningarfundum núna í Maí á breytingum á sinni A-deild. Nánari upplýsingar eru í meðfylgjandi auglýsingum. Einnig verða haldnir almennir kynningarfundir um lífeyrismál.

Athygli er vakin á því að sumartímabil Fosshótel hefur verið breytt. Nú hefst það 1. maí og líkur 30. september. Áður var það mánuði styttra í hvorn enda. Þetta þýðir að þeir sem nýta sér gistimiða keypta á Skrifstofu stéttarfélaganna þurfa að greiða með tveimur miðum í maí og september sem er breyting frá því sem var þegar þurfti einn miða á þessum tíma.

Þann 1. maí sl. tók gildi nýtt greiðsluþátttökukerfi fyrir heilbrigðisþjónustu. ASÍ tók saman dæmi um kostnaðaraukningu þeirra sem ekki hafa náð kostnaðarþakinu í nýja kerfinu sem er mikil í sumum tilfellum. Nánar má lesa um málið hér.

Ársrit VIRK 2017 er komið út sneisafullt af upplýsingum um starfsemi VIRK og greinum og viðtölum tengdum starfsendurhæfingu.
Meðal efnis í ársritinu er grein Vigdísar Jónsdóttur framkvæmdastjóra VIRK um leiðir til þess að auka vinnugetu og þátttöku á vinnumarkaði, Jónína Waagfjörð sviðsstjóri þróunar atvinnutengingar reifar ávinning atvinnulífsins af stigvaxandi endurkomu til vinnu, Hans Jakob Beck sviðsstjóri þróunar starfsgetumats og greiningar fer yfir tilgang starfsgetumats og Guðrún R. Jónsdóttir sérfræðingur hjá VIRK fjallar um fjölda einstaklinga á örorku- og endurhæfingarlífeyri og virkni ungs fólks.
Þá fjallar Dr. Ingibjörg Jónsdóttir, forstöðumaður Institutet för Stressmedicin og prófessor við Háskólann í Gautaborg, um vinnutengda streitu í grein sinni í ársritinu og Dr. Tom Burns um IPS Lite- árangursríka leið inn á vinnumarkaðinn fyrir einstaklinga með geðræn vandamál.
Auk þessa þá er í ársritinu að finna greinargóðar upplýsingar um starfsemi VIRK, viðtöl við ráðgjafa VIRK og einstaklinga sem lokið hafa starfsendurhæfingu sem og samstarfsaðila VIRK.
Hægt er að nálgast rafrænt eintak af ársritinu 2017 hér. Ársritið liggur einnig frammi á Skrifstofu stéttarfélaganna og Virk á Húsavík, Garðarsbraut 26 Húsavík.

 

Ársfundur Stapa lífeyrissjóðs var haldinn í Skjólbrekku í Mývatnssveit, miðvikudaginn 3. maí sl. Mæting á fundinn var góð og fór hann vel fram. Á dagskrá fundarins voru hefðbundin ársfundarstörf.

Ágúst Torfi Hauksson, formaður stjórnar, fór yfir skýrslu stjórnar um starfsemi sjóðsins á árinu 2016. Þá fór Ingi Björnsson, framkvæmdastjóri yfir ársreiknings sjóðsins og áritanir og gerði grein fyrir tryggingafræðilegri stöðu sjóðsins. Var ársreikningur sjóðsins samþykktur samhljóða að yfirferð lokinni. Einnig kynntu Arne Vagn Olsen, fjárfestingarstjóri, og Jóna Finndís Jónsdóttir, áhættustjóri, fjárfestingar- og áhættustefnu sjóðsins.

Aðalsteinn Árni Baldursson formaður Framsýnar og Arna Jakobína Björnsdóttir formaður Kjalar voru gestir á fundi VG á Akureyri á mánudagskvöldið 1. maí. Umræðuefnið var staða verkalýðshreyfingarinnar og samskipti sveitarfélaga og stéttarfélaga. Að sögn Aðalsteins var fundurinn mjög áhugaverður og miklar umræður sköpuðust um fundarefnið.

 

 

 

 

 

 

 

 

 

Formaður Framsýnar lét sig ekki muna um að bruna til Akureyrar eftir hátíðarhöldin á Húsavík á baráttu- og hátíðardegi verkafólks til að taka þátt í fundinum sem hófst kl. 20:00 og stóð vel fram eftir kvöldi. Hér er hann í viðtali við Rás 1 rétt fyrir upphaf hátíðarhaldanna á Húsavík fyrr um daginn.

Stéttarfélögin tóku í notkun nýtt endurbætt húsnæði á föstudaginn að Garðarsbraut 26, efri hæð, sem er allt hið glæsilegasta. Við það tækifæri var því fagnað með viðeigandi hætti. Verktakar sem komið hafa að framkvæmdunum og stjórnir stéttarfélaganna gerðu sér glaðan dag enda full ástæða til þess. Verktakinn H-3 var aðalverktakinn.  Stofnað hefur verið sameignarfélag um reksturinn, Hrunabúð sf. Til stendur að leggja út rýmin til lengri eða skemmri tíma á vegum leigufélagsins. Um er að ræða 8 skrifstofur. Eftir að Sparisjóður Vestmannaeyja eignaðist húsnæðið á sínum tíma hefur húsnæðið ekki selst, ekki síst þar sem það var komið á mikið viðhald. Þar sem viðhaldsleysið var farið að valda stéttarfélögunum vandræðum og skemmdum á neðri hæðinni sem er í eigu stéttarfélaganna var ákveðið að ráðast í kaup á húsnæðinu þrátt fyrir að það hafi ekki verið á stefnuskrá  félaganna.   Í stuttu ávarpi við vígsluna fór formaður Framsýnar nokkrum orðum um framkvæmdina og tilurð þess að stéttarfélögin eignuðust eignina og réðust í breytingarnar.

Ágætu gestir!

Það er ekki bara að menn fagni gegnumslagi í gegnum  Vaðlaheiði í dag heldur erum við hér saman komin til að halda upp á verklok á nýju skrifstofuhúsnæði stéttarfélaganna að Garðarsbraut 26. Það verða Framsýn og Þingiðn sem koma til með að eiga þennan hluta af húsnæðinu, Félögin eiga einnig og reka neðri hæðina í sameiningu ásamt Starfsmannafélagi Húsavíkur. Þar verður skrifstofa stéttarfélaganna rekin áfram eins og verið hefur til fjölda ára.

Eignarhluturinn á efri hæðinni skiptist þannig: Framsýn á 84% og Þingiðn 16% og hafa félögin stofnað með sér sameignarfélag um reksturinn, Hrunabúð sf. Nafnið er í höfuðið á verslun sem rekin var í húsnæðinu á vegum Kaupfélags Þingeyinga hér á árum áður, það er á neðri hæðinni.

Til stóð að nota nafnið Prýði en það fékkst ekki leyfi fyrir því þar sem það var þegar  í notkun, en saumastofan Prýði var lengi starfrækt á hæðinni sem nú hefur fengið nýtt hlutverk.

Það var árið 2013 sem stéttarfélögin ákváðu að kaupa efri hæðina að Garðarsbraut 26 af Sparisjóði Vestmannaeyja. Eignin var keypt á 13.376.500.

Áður hafði hæðin verið auglýst til sölu á almennum markaði í nokkur ár án þess að hún seldist. Lítill áhugi reyndist vera hjá fjárfestum að kaupa eignina undir atvinnustarfsemi og gera hana upp, en tími var komin á mikið og kostnaðarsamt  viðhald.

Við þessar aðstæður, það er að eignin seldist ekki og að viðhald eignarhlutans var í algjöru lágmarki sáu stéttarfélögin sig tilneydd til að kaupa efri hæðina. Langvarandi viðhaldsskortur var farinn að hafa alvarlegar afleiðingar fyrir eign stéttarfélaganna, það er neðri hæðina.

Efri hæðin var ekki kynnt almennilega, raki var farinn að myndast í veggjum og meðfram gluggum. Í miklum rigningum streymdi vatnið af norðurhliðinni í gegnum vegginn niður á neðri hæðina með tilheyrandi hættu á eignatjóni. Við þessar aðstæður var hreinlega ekki hægt að búa við lengur. Þrátt fyrir að það væri ekki á stefnuskrá félaganna og ekki bein þörf fyrir stærra húsnæði var ákveðið að slá til og kaupa efri hæðina.

Fljótlega var ráðist í að lagfæra húsið að utan með múrviðgerðum og málningu, gera það vatnshelt og bæta við kyndinguna. Beðið var með frekari framkvæmdir að innanverðu ef ske kynni að fjárfestar kæmu og vildu kaupa hæðina af stéttarfélögunum til að gera hana frekar upp. Það gerðist ekki, þannig að ákveðið var að ganga til samninga við Arnhildi Pálmadóttur arkitekt um að útfæra skrifstofur og lítinn fundarsal á hæðinni og koma  húsnæðinu í notkun.

Eins og sjá má, tókst Arnhildi afar vel til við hönnunina, sem er henni til mikils sóma. Það má Arnhildur einnig eiga að hún hefur verið tilbúin að hlusta á mis gáfulegar breytingatillögur sem komið hafa frá stéttarfélögunum og verktökum. Samstarfið um breytingarnar hefur verið til mikillar fyrirmyndar.

Þrátt fyrir, eins og ég sagði áðan að ekki hafi verið markmiðið að kaupa eignina, þá skiptir verulega miklu máli hvers konar starfsemi velst í húsnæði þar sem fyrir er skrifstofuhald.

Það var t.d. töluverð truflun fyrir starfsemina þegar rekin var líkamsræktarstöð á efri hæðinni, það er fyrir ofan fundarsal stéttarfélaganna. Þessi starfsemi fór engan vegin saman vegna hljóðmengunar og þá voru bílastæðin við húsnæðið oft teppt. Með þessari framkvæmd er tryggt að hér verður skrifstofuhald í húsinu næstu misserin.

Varðandi framkvæmdina sjálfa, þá buðu stéttarfélögin hana út, það er í febrúar á árinu 2016. Ekki var reiknað með mörgum tilboðum í ljósi þeirra miklu þenslu sem er í byggingariðnaði hér á svæðinu . Enda fór það svo að aðeins eitt tilboð barst í verkið, frá fyrirtækinu H-3 á Húsavík þrátt fyrir að nokkur önnur fyrirtæki næðu sér í útboðsgögn. Eftir smá fínstillingar reyndist tilboðið vera upp á 30,4 milljónir. Tilboðinu var tekið og hófust framkvæmdir í lok desember 2016, þær framkvæmdir sem við erum að fagna hér í dag.

Þess ber að geta að ekki var fyrirséð hvað þyrfti að endurbæta varðandi frárennslislagnir, hita- og kaldavatnskerfið í húsinu sem var fyrir fyrir löngu komið á tíma. Ákveðið var að bjóða þann hluta ekki út. Fyrirtækið Lagnatak var ráðið í verkið og sáu þeir um að leggja nýtt kerfi í hæðina sem og frárennsli.

Þá er ekki hægt að ráðast í breytingar nema vita símanúmerið hjá Kristjáni Halldórssyni. Hann   var að sjálfsögðu kallaður til þegar tölvu- og símasamband datt út hjá góðum nágrönnum okkar í suðurendanum að Garðarsbraut 26, það er eftir að  lagnir í vegg höfðu verið sagaðar í sundur til að koma fyrir eldvarnarstiga/rýmingarleið frá efri hæðinni. Að sjálfsögðu var málinu reddað í hvelli og sambandi við umheiminn komið á aftur.

Ég vil nota tækifærið og þakka arkitektinum, aðalverktakanum H-3 og undirverktökum hans sem og Lagnataki og Kidda Halldórs og samstarfsmanni hans fyrir gott verk og samstarf. Ég tel að samstarfið hafi gengið afar vel, auðvitað hafa verið smá pústrar af og til , en svo litlir að ekki hefur þurft að setja plástra á sár eða að menn hafi þurft að nota bólgueyðandi krem eftir samskipti aðila.

Eins og ég hef komið inn á, þá hafa margir komið að þessu verkefni. Ég tel mig knúinn til að nefna fjóra aðila sérstaklega enda hefur mikið mætt á þeim varðandi breytingarnar á húsnæðinu. Þetta eru þau Arnhildur Pálmadóttir, Hermann Benediktsson, Þórólfur Aðalsteinsson og Vigfús Leifsson, en hann hefur haldið utan um verkefnið fyrir hönd aðalverktakans. Fulltrúar stéttarfélaganna hafa átt mjög gott samstarf við þau öll um lausn þeirra fjölmörgu mála sem hafa komið upp á framkvæmdatímanum.

Hvað tekur við ? Hluti af húsnæðinu hefur verið leigður út og munu nýir legendur taka við þremur skrifstofum af þeim sjö til átta sem verða í útleigu. Þar sem skrifstofurnar eru rúmgóðar og af ýmsum stærðum eru möguleikar á að hafa nokkra starfsmenn í hverri þeirra. Sem dæmi má nefna að 5 til 6 starfsmenn verða með starfstöðvar í þeim þremur skrifstofum sem þegar hafa verið leigðar út. Stéttarfélögin verða áfram að mestu á neðri hæðinni  en munu nota nýja fundarsalinn á efri hæðinni fyrir ört vaxandi starfsemi félaganna.

Eins og fram kom í upphafi hefur verið stofnað sérstakt leigufélag um reksturinn, sem mun sjá um að reka eignina sem fellur undir Hrunabúð sf. Áhugasömum býðst að fá þær skrifstofur sem enn eru á lausu leigðar. Um er að ræða mjög glæsilegar skrifstofur og þá verður öll aðstaða fyrir starfsfólk eins og hún gerist best. Í boði er að leigja skrifstofupláss til lengri tíma, og eins til skemmri tíma þurfi menn á aðstöðu að halda vegna tímabundina verkefna í Þingeyjarsýslum.

Með þessum orðum ætla ég ljúka máli máli mínu og bjóða ykkur að skoða húsnæðið og njóta þeirra veitinga sem hér eru í boði stéttarfélaganna.

 

 

Mjög góð þátttaka var í hátíðarhöldunum sem Framsýn, Þingiðn og Starfsmannafélag Húsavíkur stóðu fyrir í Íþróttahöllinni á Húsavík í gær á 1. maí en um 600 manns tóku þátt í hátíðarhöldunum. Aðalsteinn Árni Baldursson flutti ávarp dagsins og Ósk Helgadóttir varaformaður Framsýnar flutti kröftuga hátíðarræðu. Boðið var upp á einstaklega áhugaverð skemmtiatriði. Ari Eldjárn skemmtikraftur fór á kostum og þá voru söngatriði sem Söngfélagið Sálubót, Hjalta Jóns, Lára Sóley, Guðrún Gunnars og Sigga Beinteins sáu um. Steini Hall spilaði alþjóðasöng verkalýðsins í upphafi samkomunnar. Miðað við viðbrögð fundarmanna þá er gríðarlega mikil ánægja með hátíðina og fyrir það ber að þakka. Hér má sjá myndir frá samkomunni.

Á hátíðarhöldunum 1. maí færðu stéttarfélögin í Þingeyjarsýslum Hvammi, heimili aldraðra gjöf. Það er meðferðarstól og sjónvarp er tengist öryggismálum á heimilinu. Það var Hróðný Lund yfirhjúkrunarfræðingur á heimilinu sem veitti gjöfinni móttöku. Hún notaði tækifærið og þakkaði vel fyrir gjöfina sem kæmi að góðum notum um leið og hún gerði að umræðuefni hvað það skipti miklu máli fyrir að hafa öflug stéttarfélög á svæðinu. Félög sem væru tilbúin að leggja sitt að mörkum til góðra málefna eins og þessi gjöf staðfesti. Stéttarfélögin þakka Hróðnýju fyrir hléleg orð í garð félaganna.

Hér má lesa Gjafabréfið:

Gjafabréf

Til Hvamms, heimili aldraðra 

Stéttarfélögin, Framsýn, Þingiðn og Starfsmannafélag Húsavíkur hafa samþykkt að færa Hvammi, heimili aldraðra að gjöf sérstakan meðferðarstól sem staðsettur verður í skoðunar- og meðferðarstofunni á Hvammi. Stóllinn verður m.a. notaður við lyfjagjafir og umbúðaskipti. 

Þá hafa stéttarfélögin jafnframt ákveðið að færa heimilinu sjónvarpstæki sem staðsett verður í vaktherbergi starfsmanna. Sjónvarpið verður hluti af öryggiskerfi heimilisins en til stendur að koma upp eftirlitsmyndavélum í opnum rýmum til að auka öryggi heimilismanna og auðvelda um leið starfsmönnum að fylgjast með daglegri starfsemi heimilisins er viðkemur velferð heimilismanna. 

Það sem er sérstaklega ánægjulegt við gjöfina er að hún auðveldar starfsmönnum að vinna sín mikilvægu störf með betri vinnuaðstöðu jafnframt því sem hún eykur öryggi heimilismanna til muna. 

Virði gjafarinnar er kr. 300.000,-.  

Húsavík 1. maí 2017 

Virðingarfyllst! 

Fh. Stéttarfélaganna í Þingeyjarsýslum 

Aðalsteinn Á. Baldursson

 

 

 

 

 

 

 

 

 

Það voru formenn stéttarfélaganna þriggja sem stóðu að hátíðinni sem afhendu Hvammi gjöfina, Aðalsteinn Árni fyrir Framsýn, Jónas Kristjánsson formaður Þingiðnar og Helga Þuríður Árnadóttir formaður Starfsmannafélags Húsavíkur.

Ósk Helgadóttir varaformaður Framsýnar var með kröftuga hátíðarræðu á fjölmennum baráttufundi stéttarfélaganna í Þingeyjarsýslum í gær. Hér má lesa ræðuna.

Góðir gestir.

Það er mér mikill heiður að fá að ávarpa ykkur hér, á sjálfum baráttudegi verkalýðsins.

Ungur vinur minn spurði mig um daginn hvort við ætluðum ekki að fara að hætta þessu 1. maí kjaftæði, baráttufundir í þeirri mynd sem haldnir væru í dag væru tímaskekkja og löngu úrelt fyrirbæri. Hann færði rök fyrir máli sínu, þau að Íslendingar lifðu góðu lífi og því væri ekki lengur þörf á svona gamaldags baráttufundum.

Ég er þessum málflutningi algjörlega ósammála, tel að einmitt í neyslusamfélagi nútímans sé mjög mikilvægt að halda í þau gildi sem 1.maí hefur, rifja upp söguna og flagga fána verkalýðsins. Flagga fánanum rauða sem er sameiningarmerki verkalýðshreyfingarinnar og minnast um leið allra þeirra sem þennan dag hafa, undir  fánum réttlætisins, krafist þjóðfélags jöfnuðar og friðar. Hlusta á fótatak forfeðranna, varðveita sigra þeirra og sækja um leið fram til nýrra sigra.

Sagan er okkur mikilvæg og það er stundum er sagt að til þess að geta haft áhrif á framtíðina þurfi maður að skilja fortíðina. Ég held að í þeim orðum felist mikill sannleikur.

Og við megum ekki gleyma.

Hér á dögunum datt ég ofan í sögu Alþýðusambands Norðurlands, en það var stofnað á Akureyri árið 1947 af 17 verkalýðsfélugum á Norðurlandi. Og hvaða mál skyldu nú hafa verið tekin til umræðu og verið heitu málin á stofnfundi sambandsins, hjá norðlenskri verkalýðshreyfingu fyrir 70 árum?

Á þessum fyrsta fundi voru mörg mál á dagskrá. Það voru m.a. rædd atvinnumál, kaup – og kjaramál, það var rætt um erlent vinnuafl, sjávarútvegsmál, öryggismál sjómanna og menningar – og fræðslumál.

Þá var samþykkt tillaga þar sem varað var við því að hafa síldarverksmiðjurnar til sýnis hvaða útlendingi sem hafa vildi og einnig var samþykkt tillaga um lokun á útsölum áfengisverslanna á Siglufirði og Akureyri yfir síldveiðitímann.

Hljómar þetta ekki allt nokkuð kunnuglega ? Við getum mátað öll þessi mál við umræðu dagsins í dag, meira að segja brennivínið.

Á þessum árum var lagður grunnur að þeim réttindum sem við njótum í dag því þetta er kynslóðin sem tók fyrstu skóflustunguna að velferðarkerfinu, lagði hornstein að almannatryggingakerfinu og lífeyrissjóðunum okkar, kerfum sem aðrar þjóðir naga sig í handabökin fyrir að hafa ekki fundið upp. Þau bjuggu til samfélag mannréttinda þar sem fram undir þetta hefur þótt sjálfsagt að börn geti menntað sig óháð efnahag foreldranna.

En vinnuaðstaðan, aðbúnaður verkafólks, starfsöryggi, launamismunur kynja á þessum tíma…  myndum við vilja stíga aftur til baka? Ég held ekki.

Víða um heim eru mannréttindi fótum troðin og fyrir mörgum ekki annað en fjarlægur draumur. En við Íslendingar teljum okkur siðaða þjóð og fordæmum  hömlulausa græðgi og þá sem hagnast á neyð annara, hagnast á örbyrgð, mismunun og vonleysi.

Það eru talin grundvallarmannréttindi á Íslandi að hafa þak yfir höfuðið, eiga fyrir salti í grautinn, fyrir lyfjum og lækniskostnaði. En það helst líka í hendur að lágum launum á vinnumarkaði fylgja lágar lífeyrisgreiðslur og velferðarkerfið okkar ágæta er svo götótt að þeir verst settu þurfa að láta sér duga lífeyri sem er undir þeim framfærslumarkmiðum sem við þó setjum okkur. Fyrir þeim er þessi þrenna sem flestum hinum er heilög, saltið, lyfið og læknirinn ekki sjálfsagður hlutur og börnin þeirra njóta lítillra lífsgæða.

Fólk sem verður fyrir því óláni að veikjast og detta út af vinnumarkaði um lengri eða skemmri tíma er því voðinn vís og þrátt fyrir að hafa stritað alla sína hundstíð fellur það ofan í gil og skorninga kerfis sem ekki virkar og situr þar fast.

Það virðist einhvern vegin eins og inngróin nögl í íslenska samfélagsvitund að öryrkjar og eldri borgarar séu þiggjendur og eigi heima á jaðri velferðar samfélagsins okkar. Innan þeirra raða eru margir sem búa ekki einungis við kröpp kjör, heldur  einnig við meiðandi opinbera umræðu í fjölmiðlum og almenningsálit sem telur forkastanlegt ef öryrki á Íslandi getur búið við sæmilega góðar aðstæður.

Hver kannast ekki við myndina sem fylgir gjarnan  fréttaskýringum um málefni eldra fólks ? Mynd af gamalli konu á hjúkrunarheimili, tifandi æðaberum fótum eftir göngunum og meðfylgjandi fréttum um að þjóðin sé að eldast og hvað það kosti okkur mikið.

Að eldast er nokkuð sem enginn getur umflúið og við ættum frekar að fókusa á það að hærri aldri þjóðarinnar fylgir sem betur fer oftast betri heilsa, og við skyldum frekar fagna því að eldra fólk geti lengur verið virkir samfélagsþegnar.

Myndin af gömlu konunni finnst mér vera táknræn og ætti að segja okkur að eigandi þessara þreyttu fóta sé búinn að leggja að baki þrotlausa vinnu til samfélagsins og ávinna sér sjálfsagðan rétt á að njóta hvildarinnar síðasta spölinn í öruggu umhverfi. Þau skulda okkur ekki neitt – það erum við sem skuldum þeim. Og ég hafna þeirri hugmyndafræði að eldra fólk og öryrkjar sé baggi á samfélaginu okkar.

Eftir bankahrunið 2008 hófst íslenska þjóðin handa við að reisa upp langþráð samfélag sem að þessu sinni yrði byggt á réttlæti og jöfnuði. Við spýttum í sigggróna lófana, hertum sultarólina, við bættum á hana gati og hertum betur. Við trúðum því að allir myndu ganga jafnir til verks. Þeir sem minnst höfðu gengu að venju á undan með góðu fordæmi og flestir fylgdu. Þó voru all nokkrir aðilar sem töldu sínum hag betur borgið með því að fela peningna sína í aflandsfélögum. Brot þeirra manna var ekki einungis það að þeir stælu undan skatti, þeir stálu einnig vonum okkar og draumum, þeir brugðust trausti heillar þjóðar.

Og því megum við ekki gleyma.

Þjóðarskútan er aftur komin á kjöl og hefur sem stendur góðan byr í seglin,  gjaldeyristekjur flæða inn í landið, atvinnuleysi mælist hverfandi og því er ekki að neita að hópur þjóðarinnar hefur það býsna gott. Við siglum aftur þöndum seglum og áhöfnin í brúnni segir okkur aftur og enn að hér ríki hagsæld og jöfnuður, góðærið hafi sjaldan eða aldrei verið meira.

Fjármálaráðherra sagði hér á dögunum að hefði íslenskt launafólk sagt upp kjarasamningum 1.mars síðastliðinn  hefðu getað orðið nýjar hamfarir á Íslandi, af mannavöldum. Hann talaði einnig um að taka samtalið og þá ábyrgð sem við bærum öll saman og við ættum að nýta okkur þetta besta góðæri.

Útbelgdur af áðurnefndri ábyrgð nýtti kjaradómur þettta besta góðæri nú fyrir síðustu áramót og útdeildi veglegum launahækkunum til handa æðstu embættismönnum þjóðarinnar.

Við getum víst öll verið sammála um eitt, hvar sem við höfum munstrast á skútuna. Það er að eyði maður um efni fram kemur að skuldadögum. Ef að það er jöfnuður sem felst í því að þeir sem eiga mikið fái meira, en þeir sem minnst eigi fái ennþá minna þá hefur eitthvað misfarist í mínu uppeldi, því að það reikningsdæmi fæ ég á engan hátt skilið.

Já, nú verða sagðar fréttir … en í þetta sinn eru þær af ofurlaunum, af erfiðri stöðu láglaunafólks, öryrkja og eldri borgara, af brostnu heilbrigðis- og menntakerfi, af misnotuðum þjóðarauðæfum, af fótum troðinni náttúru. Af langveiku fullorðnu fólki geymdu á göngum og í geymslum á hátæknideildum Landspítalans. Fréttir af ungu fólki sem getur hvorki leigt eða eignast þak yfir höfuðið og kýs af þeim sökum að flýja land. Áfram skal hoggið í innviðina í nafni niðurskurðar, hagræðingar og einkavæðingar og þær raddir verða æ háværari að þeir sem geti borgað fyrir sig eigi að njóta þess.

Það eru fréttir að þessu tagi sem vekja mér óhug og að mér læðist sá grunur að auðvaldspúkinn á fjósbitanum sé aftur farinn að bæta á sig. Það ætti öllum að vera orðið ljóst að brotni bitinn fellur hann í flórinn og það verðum við sem fáum aftur að verka af honum skítinn.

Nei, við megum engu gleyma – því við vitum manna best að sterkt velferðarkerfi er grundvöllur að lífsgæðum landsmanna og hvaða fórnir hafa þar verið færðar.  Og við skulum  halda því til haga að það kerfi spratt ekki frá misvitrum stjórnmálamönnum, heldur er tilvist þess fyrst og fremst að þakka baráttu kynslóðanna og uppbygging þess hefur kostað launafólk í þessu landi – og er  ætluð fyrir alla þegna þess.

Góðir félagar

 

Lifi  frelsi – lifi  jafnrétti – lifi bræðralag

 

 

 

 

 

 

 

 

 

Formaður Framsýnar flutti ávarp í upphafi hátíðarhaldanna á Húsavík í gær. Hér má lesa það.

Ágætu hátíðargestir,

Það var nokkuð táknrænt þegar ég settist niður til að semja þetta ávarp að heyra hamarshögg, hljóð frá borvélum, vélsögum og stórvirkum vinnuvélum fyrir utan gluggann. Ég heyrði ekki í sjálfum mér, slíkur var hávaðinn þegar ég sat við tölvuna við skriftir.

Inn á milli mátti heyra fuglasöng, svona til að minna á komu sumarsins og að framundan væri annarsamur tími við hreiðurgerð hjá smáfuglunum.

Já, það eru margir í framkvæmdahug um þessar mundir með bjartsýnina að leiðarljósi, það er bæði menn og dýr.

Reyndar finnst mér eins og 1. maí 2016 hafi verið í gær, svo fljót líður tíminn og endurspeglar öflugt starf stéttarfélaganna þar sem hver dagur ber með sér nýjar áskoranir í starfi félaganna.

Dagurinn í dag, 1.maí spilar stórt hlutverk í baráttu alþýðunnar víða um heim fyrir bættum kjörum, jöfnuði og réttlæti. Baráttudeginum er ætlað að þjappa fólki saman um réttlátar kröfur og sjónarmið. Oft finnst okkur að þessi barátta gangi alltof hægt en það góða er að okkur miðar áfram þrátt fyrir að brekkan framundan sé oft á tíðum snarbrött og nánast óklífanleg.

Málið er einfalt, við megum aldrei gefast upp. Rödd okkar verður að heyrast þrátt fyrir að hún virki stundum þannig á handhafa auðvaldsins að við séum að skemma fyrir markmiðum þeirra með óheppilegu uppistandi. Við séum boðflennur.

Enda var það tilgangurinn í upphafi þegar samþykkt var á þingi evrópskra verkalýðsfélaga í París 1889 að gera 1. maí að alþjóðlegum frídegi verkafólks. Það er að verkafólk léti í sér heyra og stæði fyrir baráttufundum í sumarbyrjun á hverju ári. Á Íslandi fóru menn í fyrstu kröfugönguna 1. maí 1923 undir lúðrablæstri og rauðum fánum. Dagurinn varð síðan lögskipaður frídagur á Íslandi 1972. Það eru ekki allir sem gera sér grein fyrir því að rauði liturinn á fána verkalýðshreyfingarinnar táknar uppreisn gegn ranglæti. Nú sé nóg komið, auk þess sem hann táknar dagrenninguna.

Íslenska verkalýðshreyfingin hefur í gegnum tíðina tekið á mörgum mikilvægum málum undir rauðu flaggi.

Eitt af þeim málum sem gengur sem rauður þráður í gegnum sögu verkalýðsbaráttu á Íslandi í 100 ár er krafan um mannsæmandi húsnæði á sanngjörnum kjörum. Þetta verkefni hefur komið til okkar í verkalýðshreyfingunni af fullum þunga með reglulegu millibili í heila öld. Og það  hrópar enn í dag.

Það var af þessari ástæðu sem ASÍ og BSRB réðust í stofnun Bjargs – íbúðafélags í fyrra. Það þarf að lyfta grettistaki til að þjóðin komist út úr þeim ógöngum sem hún hefur ratað í í húsnæðismálum. Við Íslendingar viljum byggja upp réttlátt samfélag þar sem gott og öruggt húsnæði þykir sjálfsögð mannréttindi – ekki forréttindi.

Það þarf því ekki að koma mikið á óvart að Alþýðusamband Íslands hafi samþykkt að yfirskrift 1. maí í ár verði: „Húsnæðisöryggi – sjálfsögð mannréttindi.“

Félagar:

Eins og kunnugt er, er verulegur uppgangur víða í Þingeyjarsýslum. Þar kemur ekki síst til uppbygging í ferðaþjónustu og í byggingariðnaði er tengist ýmsum framkvæmdum í héraðinu.

Þá er loksins búið að slá í gegn um Vaðlaheiði eftir heldur erfiða meðgöngu og mikla og neikvæða fjölmiðlaumræðu. Þegar göngin verða klár síðla árs 2018 opna þau á betri samgöngur milli Eyjafjarðar og sveitarfélaganna austan Vaðlaheiðar. Atvinnusvæðið verður sterkara og stærra og öryggi varðandi heilbrigðisþjónustu eykst til muna enda Víkurskarðið oft verið erfiður farartálmi.  Með bættum samgöngum og öflugu og fjölbreyttu atvinnulífi er Norðurlandið orðið mjög samkeppnishæft við höfuðborgarsvæðið varðandi búsetuskilyrði og þar með almenn lífsgæði.

Í smá gríni eða alvöru má einnig nefna að það verður ekki dónalegt fyrir Eyfirðinga að fá nú loksins almennilegt loft frá Þingeyingum í gegnum göngin í skurðinn sem ber nafnið Eyjafjörður. Það er full ástæða fyrir okkur að gleðjast  með þeim og megi þeir njóta þingeyska loftsins.

Miklar áskoranir fylgja því fyrir stéttarfélögin að fylgjast með atvinnulífinu á hverjum tíma, það er að allir þeir fjölmörgu verktakar sem koma að framkvæmdunum í Þingeyjarsýslum sem og aðrir fari eftir lögum og reglum sem gilda á vinnumarkaðinum á Íslandi.

Vissulega er þetta ekki auðvelt verk enda kemur hluti af verktökunum frá löndum þar sem réttindi verkafólks eru fyrir borð borin og aðild að stéttarfélögum er ekki almenn, reyndar mjög lítil. Okkur reiknast til að um 2000 starfsmenn hafi komið að framkvæmdunum á svæðinu, það er á öllu félagssvæðinu. Það er umfram þá sem eru hér við störf að staðaldri.

Strax í upphafi framkvæmdanna  gerðu stéttarfélögin sér fulla grein fyrir því að eftirlitið yrði að vera öflugt horfandi til framkvæmdanna á Kárahnjúkum og við byggingu álversins á Reyðarfirði á sínum tíma þar sem ýmislegt fór úr skorðum.

Meðan á framkvæmdunum stóð voru reglulega fluttar neikvæðar fréttir í fjölmiðlum af gangi mála og alltof mikið var um kjarasamningsbrot og vanefndir  varðandi aðbúnað og öryggi starfsmanna. Það var gúrkutíð hjá fjölmiðlum.

Með þessa vitneskju í farteskinu ákváðu stéttarfélögin að hafa frumkvæði að því að tryggja eins og hægt væri að þessi saga endurtæki sig ekki í Þingeyjarsýslum.

Frá upphafi hafa stéttarfélögin átt mjög gott samstarf við verkkaupa og verktaka á svæðinu. Reyndar á það ekki við um alla verktakanna, dæmi eru um að þeir hafi ætlað sér að sniðganga kjarasamninga og lög á Íslandi.

Stéttarfélögin hafa brugðist hart við slíkum undirboðum í góðu samstarfi við aðra eftirlitsaðila s.s. lögreglu, ASÍ, Vinnueftirlitið, Vinnumálastofnun og Ríkisskattstjóra.

Dæmi eru um að fyrirtæki hafi hrökklast í burtu eftir afskipti stéttarfélaganna. Hér erum við að tala um fyrirtæki sem framið hafa mjög alvarleg brot gagnvart starfsmönnum og jafnvel verið grunuð um mansal. Við höfum að mestu sloppið við alvarlegar hótanir frá þessum erlendu verktökum en höfum þó fundið fyrir undirliggjandi hótunum. Þannig er að við vitum ekki alltaf við hverja við erum að eiga.

Fyrir liggur að starf okkar nýtur virðingar meðal þeirra starfsmanna sem hér hafa verið við störf. Þeir skynja að stéttarfélögin búa yfir mikilli þekkingu á málefnum vinnumarkaðarins og eru tilbúin að veita þeim upplýsingar og aðstoð eftir þörfum.

Ég vil nota tækifærð og þakka samstarfsfólki mínu á skrifstofunni fyrir einstaka fórnfýsi á undanförnum mánuðum og árum með það að markmiði að láta hlutina ganga upp og stuðla þar með að öflugu starfi stéttarfélaganna í þágu félagsmanna og nærsamfélagsins. Langir vinnudagar hjá starfsmönnum, helgarvinna og tilfærsla á sumarfríum milli orlofsára hefur verið sjálfsagt mál og hefur verið mætt með bros á vör.   Öðruvísi væri ekki hægt að halda uppi öflugu starfi sem ætti að vera öðrum stéttarfélögum góð fyrirmynd.

Til fróðleiks má einnig geta þess að stéttarfélögin hafa ekki bara kappkostað að verja hagsmunni vinnandi fólks sem hingað hefur komið til tímabundina starfa.

Félögin hafa einnig beitt sér fyrir því að erlendu verktakarnir nýti sér þjónustu fyrirtækja og  þjónustuaðila á svæðinu og skrái jafnframt starfsmennina með heimilisfestu í héraðinu, það er á framkvæmdasvæðum sveitarfélaganna.  Það hefur tryggt fólksfjölgun og auknar útsvarstekjur fyrir sveitarfélögin. Við teljum að þessi vinna hafi skilað tilætluðum árangri þegar við horfum á fjölgun íbúa og auknar tekjur sveitarfélaganna í héraðinu.

Þrátt fyrir að framkvæmdirnar séu nú í fullum gangi og ljúki að mestu innan árs koma stéttarfélögin til með að halda áfram sínu öfluga starfi.

Ég nefni sérstaklega mikilvægi þess að vel takist til með nýju verksmiðjuna á Bakka. Verksmiðju sem verður mikil lyftistöng fyrir Þingeyinga enda verði rétt haldið á málum. Við eigum ekki að gefa neinn afslátt af umhverfismálum, við eigum heldur ekki að veita neinn afslátt af launakjörum starfsmanna bara fyrir það eitt að fá verksmiðjuna til Húsavíkur.

Þegar áform um byggingu verksmiðjunnar voru kynnt í upphafi af eigendum hennar var skýrt tekið fram að allt yrði gert til að tryggja umhverfismálin og að launakjör starfsmanna yrðu með sambærilegum hætti og þekkist í sambærilegum verksmiðjum á Íslandi.

Framsýn og Þingiðn hafa átt í viðræðum við stjórnendur PCC á Íslandi um kjör starfsmanna. Krafan hefur verið skýr, það er að fyrirtækið standi við stóru orðin sem gefin voru í upphafi varðandi kjör og aðbúnað starfsmanna. Við förum ekki fram á annað.

Ég gef mér að PCC ætli sér að að starfa hér í sátt og samlyndi við samfélagið enda er það alltaf vænlegast til árangurs fyrir alla.  Það er ekki eftirspurn eftir umræðu eða umfjöllun fjölmiðla eins og verið hefur um  verksmiðju United Silicon í Reykjanesbæ þar sem nánast allt hefur farið úrskeiðis sem á annað borð getur farið úrskeiðis. Ekki síst þess vegna er mikilvægt að vel  takist til með starfsemi PCC á Bakka. Það er leiðarljós stéttarfélaganna.

Að lokum þetta. Stéttarfélögin í Þingeyjarsýslum hafa ákveðið að tileinka þessa hátíð í dag baráttu eftirlaunafólks og öryrkja fyrir bættum kjörum og réttlæti. Staðreyndin er nefnilega sú að það hallar verulega á þessa hópa og allt of margir í þeirra röðum búa ekki við réttlæti eða viðunandi framfærslu.

Við hjá Framsýn höfum í vetur haldið nokkur velheppnuð málþing m.a. um stöðu eftirlaunafólks sem var sérstaklega vel sótt. Greinilegt var að fundarmönnum fannst á sig hallað og þörf væri á umræðu um stöðu ört stækkandi hóps eftirlaunafólks.

Framsýn hefur komið þeim skilaboðum á framfæri við Alþýðusambands Íslands að sambandið stigi fram og berjist við hlið eftirlaunafólks hvað varðar þeirra baráttumál til að tryggja þessum hópi áhyggjulaust ævikvöld sem og öryrkjum.

Þá hefur Framsýn hug á því að verða fyrirmyndarfélag er viðkemur því að félagsmenn sem láta af störfum á vinnumarkaði vegna aldurs eða örorku haldi sem mest af réttindum hjá félaginu meðan þeir þurfa á þeim að halda um leið og við hvetjum önnur stéttarfélög innan ASÍ og BSRB að stiga þessi skref með félaginu.

Við ætlum okkur að halda merkjum þessara hópa á lofti, teljum það reyndar vera skyldu okkar, þetta er jú hópurinn sem markaði sporin fyrir okkur hin. Við eigum ekki að láta fenna í þeirra spor eins og okkur komi ekki við hvað þau gerðu til að gera okkar lífsgæði að því sem þau eru í dag.

Ég þakka gott hljóð og sett hér með samkomuna.

 

 

 

 

 

 

Það verður mikið fjör í Íþróttahöllinni á Húsavík 1. maí. Að venju bjóða stéttarfélögin upp á veglega dagskrá. Ræður dagsins verða á vegum heimamanna. Þá verður Söngfélagið Sálubót á svæðinu enda úr héraðinu. Lára Sóley og Hjalti koma brunandi frá Akureyri á heimaslóðir og taka lagið eins og enginn sé morgundagurinn. Þrír frábærir listamenn koma síðan fljúgandi úr Reykjavík til að skemmta gestum á Húsavík. Þetta eru þau Ari Eldjárn, einn okkar fremsti skemmtikraftur sem mun fara með gamanmál og söngdýfurnar Sigríður Beinteinsdóttir og Guðrún Gunnarsdóttir sem munu flytja atriði úr sýningunni um Ellý Vilhjálms sem notið hefur mikilla vinsælda. Að sjálfsögðu mun Steini Hall starta hátíðinni með lúðrablæstri. Hér má sjá dagskrána:

Hátíðardagskrá 1. maí 2017

Að venju standa stéttarfélögin í Þingeyjarsýslum fyrir veglegri hátíðardagskrá í Íþróttahöllinni á Húsavík 1. maí 2017 kl. 14:00.

Dagskrá:

Ávarp: Aðalsteinn Árni Baldursson formaður Framsýnar stéttarfélags

Hátíðarræða: Ósk Helgadóttir varaformaður Framsýnar stéttarfélags

Sálubót: Söngfélagið Sálubót syngur nokkur lög. Stjórnandi Jaan Alavere

Undirleikur Jaan Alavere, Marika Alavere, Þórgnýr Valþórsson og Katla María Kristjánsdóttir

Söngur og grín: Hjalti Jónsson og Lára Sóley Jóhannsdóttir spila og syngja þekkt dægurlög

Grín: Ari Eldjárn, einn okkar fremsti skemmtikraftur, skemmtir gestum með gamanmáli

Söngur og grín: Guðrún Gunnarsdóttir og Sigríður Beinteinsdóttir heiðra minningu Ellýjar Vilhjálms með því að syngja lögin hennar ásamt því að segja sögur af þessari merku konu

Steingrímur Hallgrímsson spilar Internasjónalinn/alþjóðasöng verkalýðsins í upphafi samkomunnar.

Meðan á hátíðarhöldunum stendur verður gestum boðið upp á kaffi og meðlæti í boði stéttarfélaganna.

Þingeyingar og landsmenn allir, fjölmennum í höllina og drögum fána að hún á hátíðar- og baráttudegi verkafólks 1. maí 2017.

Framsýn, stéttarfélag – Starfsmannafélag Húsavíkur – Þingiðn, félag iðnaðarmanna

Aðalfundur Húsfélags Þorrasala 1-3 í Kópavogi fór fram í gær. Fundurinn var haldinn í fjölbýlishúsinu, íbúð 201 sem er í eigu Framsýnar. Rekstur félagsins hefur gengið vel og var samþykkt að ráðast í smá framkvæmdir við stigahús, það er að mála stigahúsið að innanverðu á þessu ári enda fáist iðnaðarmenn í verkið. Samþykkt var að hækka húsgjöld um 2% milli ára á íbúð. Þá var gengið frá kjöri á nýrri stjórn. Formaður Framsýnar, Aðalsteinn Árni Baldursson, sem setið hefur í stjórn og varastjórn Húsfélagsins frá upphafi, það er frá árinu 2012 var kjörinn formaður Húsfélagsins til eins árs. Góður andi var á fundinum og eru íbúðareigendur almennt ánægðir með starfsemi Húsfélagsins.

 

Kári Arnór Kárason, fyrrum framkvæmdarstjóri lífeyrissjóðsins Stapa hefur stefnt sjóðnum vegna vangoldinna launa. Nánar má lesa um málið hér.

Kári sagði upp störfum hjá sjóðnum fyrir um ári síðan.

Við viljum biðja þá sem hafa verið í íbúðum stéttarfélaganna og eiga eftir að skila lyklum að koma þeim á Skrifstofu stéttarfélaganna sem allra fyrst. Mikið rennerí hefur verið í íbúðunum undanfarið og mörg lyklasettanna úti sem stendur og útlit fyrir mögulegan skort ef ástandið skánar ekki fljótlega.

Þingiðn, félag iðnaðarmanna hefur með bréfi til Laganefndar Alþýðusambands Íslands gert alvarlegar athugasemdir við samþykktar breytingar á félagslögum Félags málmiðnarmanna á Akureyri. Þannig er að ef stéttarfélög gera breytingar á sínum félagslögum þarf Laganefnd ASÍ að taka þær fyrir áður en þær taka gildi hjá viðkomandi stéttarfélögum enda samþykki laganefndin breytingarnar.

Félagssvæði Félags málmiðnarmanna á Akureyri náði áður yfir nokkur sveitarfélög við Eyjafjörð.  Með samþykktum breytingum á aðalfundi félagsins, væntanlega 2015, er félagssvæðið stækkað verulega. Það er að það nái yfir allt Norðurland frá og með Húnaþingi vestra til og með Langanesbyggð í austri. Það þýðir að félagssvæði Þingiðnar er undir sem eru sveitarfélögin, Norðurþing, Skútustaðahreppur, Þingeyjarsveit og Tjörneshreppur. Félagssvæði Verkalýðsfélags Þórshafnar er einnig undir en innan félagsins er iðnaðarmannadeild og er félagið því með aðild að Samiðn fyrir þennan hóp félagsmanna.

1. gr. laga Félags málmiðnarmanna á Akureyri er svohljóðandi:
   Félagið heitir Félag málmiðnaðarmanna Akureyri, skammstafað FMA.
   Félagssvæði þess er, Norðurland frá og með Húnaþingi vestra til og með Langanesbyggð.
   Félagið er aðili að Samiðn sem er aðili að Alþýðusambandi Íslands.
   Heimili félagsins og varnarþing er á Akureyri. 

Þingiðn er kunnugt um að Samiðn hafi fengið málið til umsagnar á sínum tíma en ekki gert athugasemdir við þessar breytingar sem vekur reyndar furðu þar sem troðið er á tveimur aðildarfélögum  sambandsins.

Þingiðn var ekki kunnugt um þessar breytingar á lögum Félags málmiðnarmanna á Akureyri fyrr en á dögunum þegar auglýsingar birtust frá félaginu á Sjónvarpsstöðinni N4 þar sem auglýst er að félagsvæðið nái yfir allt Norðurland, þar á meðal yfir félagssvæði Þingiðnar.  Á sínum tíma var ekki leitað umsagnar Þingiðnar á þessum breytingum á lögum Félags málmiðnarmanna á Akureyri sem er athyglisvert í ljósi þess að um félagssvæði Þingiðnar er um að ræða.

Mikil reiði er meðal félagsmanna Þingiðnar með yfirgang Félags málmiðnarmanna á Akureyri og endurspeglast í breytingum á lögum félagsins. Ljóst er að Samiðn skuldar Þingiðn skýringar á afstöðu sambandsins til  málsins.

Með bréfi Þingiðnar til Laganefndar Alþýðusambands Íslands er þess vænst að nefndin taki erindi Þingiðnar fyrir og kveði á um hvort vinnubrögð sem þessi teljist eðlileg í ljósi þess að ákveðið félag yfirtekur félagssvæði annars félags með breytingum á félagslögum í skjóli ASÍ. Þá telur Þingiðn að þetta sé á skjön við þær starfsreglur sem gilt hafa um félagssvæði stéttarfélaga innan Alþýðusambands Íslands og friður hefur verið um. Málið verður tekið fyrir á aðalfundi Þingiðnar síðar í þessum mánuði.