kuti

Það hefur verið athyglisvert að fylgjast með málflutningi Sjálfstæðismanna á Alþingi, en þeir berjast nú sem aldrei fyrr í nafni frelsis og mannréttinda gegn félagslegum réttindum verkafólks. Aðferðir þeirra þurfa reyndar ekkert að koma á óvart, enda hefur  flokkurinn löngum gengið erinda auðvaldsins. Einn fremsti skósveinn íhaldsins á Alþingi, Óli Björn Kárason, fylgdi nýverið úr hlaði frumvarpi Sjálfstæðisflokksins um félagafrelsi á íslenskum vinnumarkaði.

Megininntak frumvarpsins hjá illa upplýstum framsögumanni og samflokksmönnum hans er að koma á framfæri sterkum vilja flokksmanna frjálshyggjunnar um að brjóta niður samtakamátt verkafólks. Þeir ríku þurfi að græða meira til að viðhalda velferð á Íslandi, þeirra sé að skammta smælingjunum skítalaun og réttindi í þágu frjálshyggjunnar og smána íslensk stéttarfélög eins og mögulegt er. Að veikja stöðu þeirra sem barist hafa gegn ójöfnuði, óréttlæti og misskiptingu í samfélaginu, allt frá stofnun fyrstu stéttarfélaganna á Íslandi. Það sem fer fyrir brjóstið á varðhundum auðvaldsins er nákvæmlega það sem erlendar verkalýðshreyfingar öfunda okkur af. Það er að yfir 92% íslenskra launamanna skuli eiga aðild að stéttarfélögum, en það er það hæsta sem þekkist innan OECD ríkjanna.

Eitt af margþættum hlutverkum íslenskra stéttarfélaga er að fara með kynningu í grunnskóla og framhaldsskóla fyrir unga nemendur um vinnumarkaðinn, skattkerfið og tilgang stéttarfélaga, enda bíður unga fólksins í framtíðinni að taka þátt í krefjandi störfum á vinnumarkaði.

Að sjálfsögðu eru það eðlileg mannréttindi í lýðræðisríki að geta verið í öflugum og frjálsum stéttarfélögum sem í gegnum tíðina hafa byggt upp öryggisnet sem ætlað er að fanga sem flesta og veita fólki mannsæmandi afkomu og tryggingarvernd. Í dag er það þannig að menn geta gengið í stéttarfélag á Íslandi eða valið að standa utan þeirra. Velji menn að standa  utan stéttarfélaga greiða þeir samt sem áður iðgjald til viðkomandi stéttarfélags. Það tryggir þeim öfluga og endurgjaldslausa þjónustu lendi þeir í ágreiningi við atvinnurekanda hvort sem það er vegna kjarasamningsbrota, slysa, veikinda o.fl., ásamt því að tryggja lágmarkskjör og aðkomu að réttindum í gegnum kjarasamninga og samninga við stjórnvöld.  Þetta er einnig sérstaklega mikilvægt þegar í hlut á erlent verkafólk sem hingað flyst eða kemur hér tímabundið. Það er sá hópur sem veikast stendur á vinnumarkaði, en á rétt til og nýtir sér alla þjónustu stéttarfélaganna. Á hinum Norðurlöndunum er aðild þeirra að stéttarfélögum mjög lítil, staða þeirra veik og brotin gegn þeim hrikaleg.

Þegar sagan er skoðuð má sjá að verkalýðshreyfingin hefur í gegnum tíðina barist fyrir flestum þeim framfaramálum sem við búum við í dag, s.s. lífeyrissjóðakerfinu, almannatryggingarkerfinu, atvinnuleysisbótakerfinu, verkamannabústaðakerfinu, Bjargi-Íbúðafélagi, VIRK-starfsendurhæfingu, öflugu verðlagseftirliti og réttlátu skattkerfi. Það er að þeir tekjulægri beri lægri skatta en þeir tekjuhærri, sem hafa borð fyrir báru.

Í gegnum kjarasamninga hefur síðan náðst að tryggja fólki lágmarkskjör, veikindarétt, orlofsrétt, slysarétt og aðkomu að mikilvægum sjúkra- og starfsmenntasjóðum. Allur þessi ávinningur og meira til hefur náðst í gegnum öflug stéttarfélög á Íslandi til handa félagsmönnum, sem við megum vera stolt af.

Þá er hlutverk stéttarfélaga að standa vörð um hagsmuni félagsmanna og styðja við bakið á þeim sé brotið á þeirra kjarasamningsbundnu réttindum. Jafnframt því að tryggja að félagsmenn hafi ávallt aðgengi að lögfræðingum í gegnum félögin, gerist þess þörf. Það má heldur ekki gleyma öflugu vinnustaðaeftirliti stéttarfélaganna sem ætlað er stuðla að heilbrigðum vinnumarkaði, minni skattsvikum og þar með samkeppnishæfara atvinnulífi.

Það væri hollt fyrir þingmenn Sjálfstæðisflokksins að fá sambærilega kynningu á mikilvægi stéttarfélaga og unga fólkið fær í skólum landsins, því svo virðist sem fáfræðin sé algjör hjá flutningsmönnum frumvarpsins.

Athygli vakti á dögunum að Bjarni Benediktsson formaður Sjálfstæðisflokksins tók ekki einvörðungu undir tilgang frumvarps um frjálsa stéttarfélagaaðild, heldur lagði hann sérstaka áherslu á mikilvægi þess að lækka lægstu laun á íslenskum vinnumarkaði, það er í ferðaþjónustu. Laun sem slefa rétt yfir 300.000,- kr. á mánuði fyrir fullt starf. Hafi maður einhvern tíma borið virðingu fyrir formanni Sjálfstæðisflokksins, er sú virðing öll. Fjármálaráðherra er greinilega í einhverjum öðrum víddum, umgengst ekki almennt verkafólk og hefur því engan skilning á stöðu þess fólks sem ekki getur skammtað sér arð og ofurlaun á diskinn eftir þörfum, eins og þekkt er úr hans nærumhverfi. Sú staðreynd er vægast sagt óhugguleg að formaður Sjálfstæðisflokksins og hans auðsveipu skósveinar séu ætíð reiðubúnir að vaða eld og brennistein fyrir hina auðugu á kostnað vinnandi fólks, neytenda og heimilanna í landinu. Þetta er ekki sá Sjálfstæðisflokkur sem nafni hans og margir forverar fóru fyrir.

Á sama tíma og þingmenn Sjálfstæðisflokksins leggjast á árarnar með að kippa grundvellinum undan sterkri verkalýðshreyfingu á Íslandi gjamma Samtök atvinnulífsins á hliðarlínunni og krefjast þess að Vinnulöggjöfin verði endurskoðuð til að veikja stöðu launafólks enn frekar. Markmiðið samtakanna er að fjölga félagslegum undirboðum og kjarasamningsbrotum á íslenskum vinnumarkaði með veikari verkalýðshreyfingu. Það er á skjön við stefnu þeirra alvöru fyrirtækja sem vilja viðhalda samkeppnishæfum vinnumarkaði og hræðast samkeppnisstöðuna nái tillögur þeirra eigin samtaka fram að ganga. Þess vegna þarf ekki að koma á óvart að samtökin séu klofin í dag og eigi hugsanlega eftir að liðast frekar í sundur.

Framsögumanni Sjálfstæðisflokksins sem talaði fyrir niðurrifi íslenskrar verkalýðshreyfingar í ræðustól Alþingis var mjög tíðrætt um vinnumarkaðsmódelið á Norðurlöndunum. Taldi hann það fremra því íslenska og þangað ættu menn að horfa, því þannig væri hægt að efla starfsemi stéttarfélaga á Íslandi. Er ekki allt í lagi?

Að sjálfsögðu er þetta mjög athyglisvert í ljósi þess sem ég nefndi hér að framan, að erlend verkalýðssamtök horfa til Íslands sem fyrirmyndarsamfélags hvað varðar vinnumarkaðsmál. Framsögumaðurinn hafði greinilega ekki gefið sér tíma til að kynna sér málið í þaula og er því út á túni í sínum málflutningi.

Sjálfur sat ég í stjórn Nordisk Union til margra ára, en það eru samtök þeirra stéttarfélaga á Norðurlöndum sem hafa starfsfólk í matvælaframleiðslu innan sinna vébanda. Breytingar á vinnulöggjöfinni í viðkomandi löndum hafa orðið til þess að félögum í hefðbundnum stéttarfélögum hefur fækkað verulega á undanförnum áratugum. Nærtækast er eða líta til Svíþjóðar þar sem hægrimenn hafa lagt sig fram um að veikja verkalýðshreyfinguna. Félagsmönnum í Gulu verkalýðsfélögunum, sem eru undir hælnum á atvinnurekendum, hefur hins vegar fjölgað verulega. Atvinnurekendur hafa verið að beina starfsmönnum, sérstaklega erlendum, í slík verkalýðsfélög til að losna undan eftirliti hefðbundnu stéttarfélaganna. Mörg dæmi eru um að atvinnurekendur hafi tekið vegabréf af erlendum starfsmönnum svo þeir geti ekki yfirgefið vinnustaðinn og landið þrátt fyrir alvarleg kjarasamningsbrot. Það á við um félagsmenn sem standa utan hefðbundinna stéttarfélaga, svokallaða teikara, sem eru ótryggðir og án aðildar að öryggisneti stéttarfélaga.

Mér var boðið á vinnustað þar sem ófélagsbundnir verkamenn voru við störf á byggingastað. Þar var ekki í boði að sofa í venjulegum rúmum í löglegri starfsmannaaðstöðu með salerni eins og kröfur eru gerðar um í almennum kjarasamningum og við þekkjum á Íslandi heldur var þeim gert að sofa í bílskrjóðum við verkstað án salernisaðstöðu. Sjá mátti verkamennina fara í skjól til að gera þarfir sínar á víðavangi. Þeir gátu ekkert leitað varðandi aðbúnaðarmál enda haldið frá því að vera í stéttarfélagi. Þeim var tryggð vinna gegn því að vera í Gulu verkalýðsfélagi.

Þetta er vinnumarkaðsmódelið sem þingmenn Sjálfstæðisflokksins sjá fyrir sér á Íslandi, það er að almennir starfsmenn s.s. á Alþingi, sem standa utan stéttarfélaga, skreppi út fyrir húsvegginn og geri þarfir sínar við styttuna af Jóni Sigurðssyni á Austurvelli. Það er í anda þess sem hefur verið að gerast á Norðurlöndunum með tilkomu Gulu verkalýðsfélaganna. Í nafni lýðræðis og mannréttinda! Hver voru aftur slagorð og stefnumörkun Sjálfstæðisflokksins? Var það stétt með stétt, eða auðstétt með auðstétt?  Ég er reyndar löngu hættur að átta mig á stefnu flokksins.

Þeir halda kannski að opinberar stofnanir geti  tekið að sér að framfylgja kjarasamningum, reglum um aðbúnað og öryggi og tryggja réttarstöðu þeirra sem höllustum fæti standa. Það væri þá í anda flokksins að þenja út eftirlitskerfi ríkisins og stofnanir þess eða hvað? Eða vilja þeir einfaldlega minnka sjálfsprottið og frjálst eftirlit stéttarfélaganna, draga eftirlit ríkisins saman og draga þannig úr mannréttindum vinnandi fólks? Í málflutningi þeirra stangast allt hvað á annars horn.

Með þessum skrifum vil ég skora á Sjálfstæðisflokkinn að draga frumvarpið þegar í stað til baka, enda er um alvarlega aðför að íslenskum vinnumarkaði að ræða. Gerist það ekki skora ég á þingmenn annara flokka að mótmæla þessum málflutningi auðvaldsins. Þingmenn, það verður hlustað eftir ykkar viðbrögðum, þið getið ekki setið hjá meðan Róm brennur í boði þingmanna Sjálfstæðisflokksins.

                                                                                                                        Aðalsteinn Árni Baldursson

 

 

 

Stærstu landssambönd launafólks á vinnumarkaði, Landssamband íslenzkra verzlunarmanna og Starfsgreinsamband Íslands, hafa ákveðið að taka höndum saman í viðræðum við Samtök atvinnulífsins um nýjan kjarasamning. Samstarfið nær til hátt í 90 þúsund einstaklinga sem starfa á almennum vinnumarkaði innan tuttugu stéttarfélaga.

Skrifstofa stéttarfélaganna á Húsavík óskar eftir að ráða öflugan einstakling í almenn skrifstofustörf. Um er að ræða afar fjölbreytt og krefjandi starf í góðum starfsmannahóp. Kjör taka mið af menntun, reynslu og kjarasamningi Landssambands ísl. verslunarmanna og Samtaka atvinnulífsins. Viðkomandi þarf að geta hafið störf sem fyrst.

Starfssvið:

• Móttaka viðskiptavina
• Umsjón með orlofsíbúðum og orlofskostum á vegum stéttarfélaganna
• Umsjón með sölu á flugmiðum
• Túlkun kjarasamninga með öðrum starfsmönnum
• Upplýsingagjöf varðandi réttindi félagsmanna úr sjóðum félagsins
• Aðstoð við skráningu iðgjalda og annara styrkja
• Innkaup á vörum fyrir Skrifstofu stéttarfélaganna

Menntunar- og hæfniskröfur:

• Menntun og reynsla á vinnumarkaði sem nýtist í starfi
• Áhugi fyrir verkalýðsmálum
• Góð hæfni í mannlegum samskiptum og leiðtogahæfileikar
• Hæfni til að miðla upplýsingum
• Góð kunnátta í íslensku og ensku
• Góð tölvukunnátta

Stéttarfélögin í Þingeyjarsýslum, Framsýn, Þingiðn og Starfsmannafélag Húsavíkur eru með öflugri stéttarfélögum landsins.

Umsóknarfrestur er til og með 7. nóvember n.k.

Umsækjendur eru vinsamlegast beðnir að sækja um starfið með því að senda umsókn á netfangið kuti@framsyn.is eða með því að koma upplýsingum á Skrifstofu stéttarfélaganna, Garðarsbraut 26, Húsavík. Forstöðumaður, Aðalsteinn Árni Baldursson, gefur frekari upplýsingar um starfið.  Umsókninni þarf að fylgja upplýsingar fyrir ástæðu umsóknar og hæfni viðkomandi til að sinna starfinu. Um er að ræða fullt starf.

Öllum umsóknum verður svarað þegar ákvörðun um ráðningu liggur fyrir en það er í höndum Fulltrúaráðs stéttarfélaganna.

Skrifstofa stéttarfélaganna

 

 

 

 

 

Á fundi með Samtökum atvinnulífsins í síðustu viku var kröfugerð Samiðnar lögð fram vegna endurnýjunar kjarasamnings aðila. Þingiðn á aðild að kröfugerðinni fyrir sína félagsmenn. Tveir formlegir fundir hafa verið haldnir en samningurinn er laus frá og með 1. nóvember nk. Í viðræðunum fara iðnaðarmannafélögin í Húsi fagfélaganna saman sem ein heild. Í kröfugerðinni er m.a. gerð krafa um eftirfarandi:

• Aukinn kaupmátt launa
• Hlutfallshækkanir launa (prósentuhækkanir)
• Leiðrétting á launum iðnaðarfólks
• Færa taxta að greiddum launum
• Aukinn orlofsréttur
• Frekari stytting vinnuvikunnar
• Verk- og tækninámi sé tryggt nægjanlegt fjármagn til að mæta aukinni aðsókn
• Vinnustaðaeftirlit verði markvissara og skilvirkara

Kröfugerð Samiðnar gagnvart SA

 

Með því að fara inn á þessa slóð geta félagsmenn Framsýnar sem starfa við verslun, þjónustu og á skrifstofum séð kröfugerð LÍV sem Framsýn á aðild að  fyrir sína félagsmenn. https://www.vr.is/kjaramal/kjarasamningar/krofugerd-vegna-kjarasamninga-2022/

Formenn aðildarfélaga Starfsgreinasambands Íslands sem hafa ákveðið að fara saman í komandi kjaraviðræður við Samtök atvinnulífsins funduðu í morgun um stöðuna og viðræðurnar sem hafnar eru við SA. Þá var frumvarp þingmanna sjálfstæðismanna um frjálsa félagaaðild einnig til umræðu. Ekki þarf að taka fram að veruleg óánægja er með framkomið frumvarp enda markmið þingmannanna að lama íslenska verkalýðshreyfingu. Mikil og góður baráttuandi var á fundinum og voru formenn einhuga um að standa saman í komandi kjaraviðræðum við Samtök atvinnulífsins en núverandi kjarasamningar á almenna vinnumarkaðinum renna út um næstu mánaðamót. Innan Starfsgreinasambandsins eru 19 aðildarfélög, sautján af þeim hafa ákveðið að fara saman í viðræðurnar. Hin stéttarfélögin tvö eru með samningsumboðið hjá sér en munu væntanlega vinna mjög náið með félögum sínum innan SGS.

Stjórn og trúnaðarráð Framsýnar kom saman til fundar í gær ásamt stjórn Framsýnar-ung. Meðal þess sem var til umræðu voru deilurnar í verkalýðshreyfingunni sem hafa verið til umræðu í fjölmiðlum eftir þing Alþýðusambands Íslands í síðustu viku. Eftir góðar umræður þar sem fundarmenn skiptust á skoðunum um stöðuna var eftirfarandi ályktun samþykkt samhljóða:

Ályktun
um stöðuna í verkalýðshreyfingunni

„Framsýn stéttarfélag harmar þá atburðarás sem átti sér stað á nýyfirstöðnu þingi ASÍ og leiddi til þess að þingfulltrúar VR, Eflingar,Verkalýðsfélags Akraness og Verkalýðsfélags Grindavíkur gengu á dyr. Það sem gerðist á þinginu var aðeins dropinn sem fyllti mælinn, eftir harðvítugar deilur innan hreyfingarinnar um langan tíma.

Félagið hafnar því alfarið að ástandið innan verkalýðshreyfingarinnar sé á ábyrgð þeirra stéttarfélaga sem gagnrýnt hafa skort á gagnsæi og lýðræðislegum starfsháttum innan ASÍ og kallað eftir breytingum þar um. Opin og lýðræðisleg umræða um það hvernig verkalýðshreyfingin eigi að starfa og hvert hún skuli stefna hlýtur að vera forsenda þess að fólk geti unnið saman.

Framsýn telur afar brýnt nú þegar mikilvæg verkefni eru framundan við gerð kjarasamninga,      að deiluaðilar slíðri sverð sín og einbeiti sér að því að komast upp úr þeim hjólförum sem deilan virðist föst í. Þar verða allir sem koma að málum að fá að njóta sannmælis.

Verkefni verkalýðshreyfingarinnar verða hér eftir sem hingað til að ná farsælum samningum fyrir  launafólk í landinu og slagkraftur hreyfingarinnar felst fyrst og síðast í því að aðildarfélögin geti tekist á um einstök atriði, en hafi þroska til að fylkja liði á bak við niðurstöðuna þegar hún er fengin.“                         

 

 

Þing Alþýðusambands Íslands sem haldið var í síðustu viku fer í sögubækurnar fyrir óeiningu og átök innan hreyfingarinnar. Tekist var á um völd, áhrif, persónur og stefnumál. Vissulega voru það mikil vonbrigði að þingið skyldi leysast upp í tóma vitleysu, sem kallaði á mjög neikvæða umræðu í fjölmiðlum og á samfélagsmiðlum. Fjöldi fólks skilur eðlilega ekki málavexti og hvað það er sem veldur ríkjandi ágreiningi innan verkalýðshreyfingarinnar og kallar því eftir skýringum.

Forystumenn í lang fjölmennustu stéttarfélögum landsins stigu fram í aðdraganda þingsins og gáfu kost á sér til forystustarfa í Alþýðusambandinu. Þau eiga það sammerkt að hafa kallað eftir áherslubreytingum í verkalýðsbaráttu á Íslandi nú þegar menn eru að sigla inn í krefjandi kjaraviðræður. Eins og hendi væri veifað fór fámennur en hávær hópur formanna innan Alþýðusambandsins af stað í sögulega herferð gegn því ágæta fólki sem var tilbúið að leiða sambandið til frekari sigra fyrir íslenska alþýðu. Þar fóru fremstir formenn sem hafa orðið undir og tapað völdum í hreyfingunni á undanförnum misserum og átt erfitt með að sætta sig við orðinn hlut.

Hægri öflin í þjóðfélaginu fögnuðu þessum ófriði að sjálfsögðu með flugeldasýningu og þá hafa afskipti fyrrverandi framkvæmdastjóra ASÍ vakið töluverða athygli, en hún var ráðin til sambandsins á sínum tíma án þess að starfið væri auglýst sérstaklega, enda vinatengsl við þáverandi forseta. Framkvæmdastjórinn fyrrverandi hefur átt sviðið í fjölmiðlum og fengið hvert tækifærið á fætur öðru til að tala niður forystumenn þeirra stéttarfélaga sem kallað hafa eftir breytingum í hreyfingunni. Að hennar mati bera þau ábyrgð á því hvernig komið er fyrir verkalýðshreyfingunni. Að sjálfsögðu nefnir hún ekki félaga sína og símavini í hreyfingunni sem farið hafa hamförum í orðræðunni gegn formönnum Eflingar, VR og Verkalýðsfélags Akraness. Það er mikil einföldun að halda því fram að formenn fjölmennustu aðildarfélaga ASÍ beri einir ábyrgð á því hvernig komið er fyrir hreyfingunni, þar bera fleiri ábyrgð samanber skeytasendingar í fjölmiðlum sem staðið hafa yfir um langan tíma og standa enn yfir.

Þá vakti að sjálfsögðu athygli á þinginu að ákveðinn hópur hafði safnað saman fulltrúum að baki tillögu um að þingheimur ógilti kjörbréf Eflingar sem var með um 18% af þingfulltrúum. Áður hafði Kjörbréfanefnd ASÍ staðfest að kjörbréf félagsins stæðust reglur ASÍ og lýst fulltrúa þess rétt kjörna. Samt sem áður hófst skemmdarverkastarfsemin strax í upphafi þingsins. Svo fór, reyndar eftir harða gagnrýni annarra þingfulltrúa, að flutningsmaður tillögunnar dró hana til baka með skömm. Þrátt fyrir það var tilgangnum náð, fræjum efa og tortryggni hafði verið sáð og til þess var leikurinn gerður.

Til að gera frekari usla var áfram leitað  að aðilum til að bjóða sig fram í forsetasætin, gegn þeim sem kjörnefnd hafði stillt upp í aðdraganda þingsins. Vissulega var athyglisvert að sjá konur sem talað hafa fyrir jafnrétti innan verkalýðshreyfingarinnar styðja karlmann á móti Sólveigu Önnu Jónsdóttur, einu konunni sem stillt var upp í embætti forseta af kjörnefnd ASÍ.  Já, þetta er saga til næsta bæjar og fer á spjöld sögunnar.

Svo fór að frambjóðendur til forsetakjörs að undanskildum formanni Rafiðnaðarsambandsins drógu framboð sín til baka. Eðlilega var þeim misboðið að sitja undir linnulausum árásum frá „svokölluðum“ félögum sínum í hreyfingunni og gátu því ekki hugsað sér að starfa með þessum formönnum að framfaramálum innan hreyfingarinnar.

Eftir stendur að hreyfingin er klofin. Það var mjög sérstakt að upplifa það að forystumenn innan Starfsgreinasambands Íslands hafi viljað veikja stöðu sambandsins með því að styðja fulltrúa annars sérsambands innan Alþýðusambandsins í forsetakjöri, það er á móti formanni Eflingar, sem er stærsta aðildarfélag Starfsgreinasambandsins. Ég minnist þess ekki að hafa upplifað svona nokkuð áður, hvað þá að forystumenn innan sama sambands hafi ætlað að koma í veg fyrir kjör Vilhjálms Birgissonar formanns Starfsgreinasambands Íslands í  sæti þriðja forseta ASÍ. Rétt er að taka fram, þetta er ekki reifari, þetta gerðist þótt ótrúlegt sé á þingi Alþýðusambands Íslands árið 2022.  Til fróðleiks má geta þess að fram að þessu hefur verið sátt um að skipta embættum, það er forsetum og miðstjórnarmönnum eftir landssamböndum og félögum með beina aðild í hlutföllum við vægi þeirra á þinginu. Það er lýðræðið sem menn hafa unnið eftir fram að þessu til að tryggja að raddir mismunandi hópa innan Alþýðusambandsins nái að heyrast á vetfangi sambandsins. Annars væri veruleg hætta á því að fjölmennustu stéttarfélögin á hverjum tíma einokuðu allar helstu trúnaðarstöður innan  Alþýðusambandsins. Um þetta fyrirkomulag hefur gilt heiðursmannasamkomulag til þessa.

Framundan eru krefjandi tímar og strax um næstu mánaðamót losna kjarasamningar á almennum vinnumarkaði. Búið er að fresta þingi Alþýðusambandsins fram á næsta ár í þeirri von að öldur lægi. Hvað það varðar er vert að hafa í huga að sjaldan veldur einn er tveir deila. Við, kjörnir fulltrúar í verkalýðshreyfingunni hljótum öll að bera ábyrgð á því að sverðin verði slíðruð og við virðum skoðanir hvers annars, til frekari sigra fyrir vinnandi fólk. Notum slagkraftinn í hreyfingunni til góðra verka, annað er ekki í boði fyrir félagsmenn Alþýðusambands Íslands.

Aðalsteinn Árni Baldursson

 

 

 

 

Stjórn og trúnaðarráð Framsýnar samþykkti á fundi sínum 18. október að setja sér skýrar reglur varðandi kaup á vörum og þjónustu af öðrum aðilum. Lögfræðingar félagsins komu að því að vinna stefnuna með forsvarsmönnum Framsýnar. Ekki er vitað til þess að stéttarfélög á Íslandi hafi sett sér sambærilegar reglur sem þessar. Eins og kveðið er á um í 1. grein stefnunnar er markmiðið að stuðla að vönduðum og hagkvæmum kaupum á vörum og þjónustu af hálfu Framsýnar og tryggja góða og viðurkennda viðskiptahætti. Þá skal Framsýn sýna samfélagslega ábyrgð og leitast við að eiga viðskipti við ábyrga aðila. Með vörum og þjónustu í stefnunni er átt við samninga í víðari merkingu, þ.á.m. stærri framkvæmdir og endurnýjanir sem Framsýn kann að ráðast í. Reiknað er fastlega með að Þingiðn og Starfsmannafélag Húsavíkur samþykki einnig að vinna eftir þessari stefnu. Félögin munu fjalla um málið í næstu viku en þau eru í sameiginlegum rekstri með Framsýn sem halda úti Skrifstofu stéttarfélaganna. 

Innkaupastefna Framsýnar stéttarfélags

1. Tilgangur stefnu þessarar er að stuðla að vönduðum og hagkvæmum kaupum á vörum og þjónustu af hálfu Framsýnar og tryggja góða og viðurkennda viðskiptahætti. Framsýn skal sýna samfélagslega ábyrgð og leitast við að eiga viðskipti við ábyrga aðila. Með vörum og þjónustu í stefnu þessari er átt við samninga í víðari merkingu, þ.á.m. stærri framkvæmdir og endurnýjanir sem Framsýn kann að ráðast í.

 

2. Kaup Framsýnar á vörum og þjónustu skulu vera í samræmi við ákvæði laga og reglna um eðlilega viðskiptahætti. Beita skal markvissum og skipulögðum vinnubrögðum við kaup á vörum og þjónustu til að stuðla að gagnsæi og hagkvæmni í rekstri. Áhersla skal lögð á samkeppni og jafnræði.

 

3. Ábyrgð á kaupum á vörum og þjónustu er á hendi forstöðumanns, en hann sér jafnframt um að samningar séu gerðir í samræmi við rekstrar- og fjárhagsáætlun stjórnar.

 

4. Þegar stjórn Framsýnar ákveður skal kaup á vörum og þjónustu fara fram með því að leitað sé tilboða frá fleiri en einum aðila eða gerð verðkönnun og að samið sé við bjóðendur á grundvelli hagkvæmni og gæða. Undantekning frá þessu er þegar um er að ræða einstök kaup, minni háttar samninga, samninga með takmarkaðan gildistíma, kaup á vörum eða þjónustu sem þola ekki bið eða aðrar ríkar ástæður eru til staðar.

 

5. Telji forstöðumaður það hagkvæmt getur hann ákveðið að framlengja, gera viðauka eða endurnýja einstaka samninga um kaup á vörum eða þjónustu.

 

6. Mál er varða innkaup á vöru eða þjónustu að undangengnum tilboðum eða verðkönnunum skulu vera rekjanleg eins og kostur er þannig að ef stjórn Framsýnar ákveður að skoða einstök viðskipti skal forstöðumaður leggja fram nauðsynleg gögn yfir ferli viðkomandi tilboða eða verðkannana.

 

7. Samningar um kaup á vörum eða þjónustu skulu vera skriflegir og undirritaðir af forstöðumanni. Forstöðumaður getur þó gefið einstökum starfsmönnum umboð til að undirrita minni háttar samninga. Ef um er að ræða mjög stóra samninga eða samninga sem eru stefnumarkandi fyrir Framsýn skulu þeir einnig vera samþykktir af stjórn.

 

8. Starfsmenn Framsýnar eða einstakir stjórnarmenn mega ekki eiga aðild að ákvörðunum um kaup eða tilboð á vörum og þjónustu er varða aðila sem þeim eru náskyldir eða hagsmunatengdir nema um sé að ræða minni háttar kaup, sbr. 2. málsl. 4. gr.

 

9. Framsýn kaupir einungis vöru og þjónustu frá aðilum sem virða kjarasamninga og réttindi starfsmanna sinna og stéttarfélaga.

Félagsmenn stéttarfélaganna sem hafa áhuga á að dvelja í íbúðum á vegum félaganna á Akureyri, Reykjavík og í Kópavogi um jól og áramót eru beðnir um að skila inn umsóknum fyrir 1. nóvember. Í kjölfarið verður íbúðunum úthlutað til umsækjenda. Um er að ræða tímabilið frá 22. desember til 3 janúar. Nánari upplýsingar gefur Linda á Skrifstofu stéttarfélaganna, linda@framsyn.is. Sími 464-6600.

Fjölmiðlar hafa verið uppfullir af fréttum af þingi Alþýðusambands Íslands sem fram fór í vikunni. Því miður hefur umfjöllunin aðalega snúið að átökum innan hreyfingarinnar um menn og málefni. Eins og kunnugt er gengu fulltrúar VR, Eflingar, Verkalýðsfélags Akraness og Grindavíkur af þinginu eftir að formenn þessara félaga drögu til baka framboð sín til embætta innan sambandsins eftir hatursorðræðu í þeirra garð og ásakanir um ofbeldi, einelti og valdasýki frá öðrum forystumönnum sem eiga ekki við rök að styðjast. Það er frá aðilum sem haldið hafa um völdin innan Alþýðusambandsins. Kallað hefur verið eftir breytingum á forystusveit sambandsins. Því miður tókst ekki að klára verkefni þingsins og kjósa í embætti s.s. forseta sambandsins og fulltrúa í miðstjórn fyrir næsta kjörtímabil vegna útgöngu þessara félaga. Þinginu var því frestað fram á næsta ár, óvíst er hvenær það verður haldið en það er í höndum miðstjórnar að ákveða það. Í ljósi aðstæðna, eftir að fjórmenningarnir drögu framboð sín til baka, komu nokkrir þingfulltrúar að máli við formann Framsýnar og báðu hann um að gefa kost á sér sem forseti ASÍ. Auk þess sem mörgum var greinilega brugðið við fréttirnar sem upplifðu umræðuna á þinginu í gegnum fjölmiðla, sé tekið mið af öllum þeim skilaboðum sem formanni Framsýnar barst frá almenningi þar sem skorað var á hann að stiga fram og gefa kost á sér sem forseti sambandsins. Fyrir liggur að hann hefur ekki verið að sækjast eftir því að verða forseti Alþýðusambands Íslands.

Framhaldsskólinn á Laugum leitaði til Framsýnar með fyrirlestur um tilgang stéttarfélaga, staðgreiðslu skatta og lífeyrismál. Formaður félagsins fór á staðinn í morgun og messaði yfir áhugasmömum nemendum sem stunda nám við þennan frábæra skóla. Nemendur skólans sem koma víða að, enda heimavistarskóli, voru mjög áhugasamir um málefni fundarins en tæplega 40 nemendur hlustuðu á fyrirlesturinn. Eins og áður hefur komið fram eru stéttarfélögin ávalt tilbúin að koma með fræðslu inn í skóla á félagssvæðinu. Eitt símtal og við komum í heimsókn.

Eins og fram hefur komið í fjölmiðlum fór 45. þing Alþýðusambands Íslands fram í vikunni á Hótel Nordica. Meðan á þinginu stóð bauð Katrín Jakobsdóttir forsætisráðherra formanni Framsýnar stéttarfélags, Aðalsteini Árna, í heimsókn í Stjórnarráðið. Ekki þarf að koma á óvart að kjaramál, velferðarmál og málefni Alþýðusambands Íslands voru m.a. til umræðu á fundinum. Forsætisráðherra leggur mikið upp úr góðu samstarfi við verkalýðshreyfinguna ekki síst núna þegar kjarasamningar eru lausir um næstu mánaðamót á almenna vinnumarkaðinum.

Meðfylgjandi þessari frétt er yfirlýsing frá formannafundi Sjómannasambands Íslands um kjaramál sem haldinn var í Vestmannaeyjum um helgina.  Á fundinum var rætt um kjaramál sjómanna og stöðu viðræðnanna við SFS um endurnýjun kjarasamningsins sem hefur verið laus frá 1. desember 2019. Viðræðurnar hafa ekki skilað árangri fram til þessa og því var meðfylgjandi yfirlýsing samþykkt á formannafundinum.

 “Yfirlýsing. Fundur formanna aðildarfélaga Sjómannasambands Íslands, haldinn í Vestmannaeyjum 7. og 8. október 2022, ítrekar kröfugerð sína á hendur útgerðarmönnum í yfirstandandi kjaraviðræðum. Krafa aðildarfélaganna er skýr um að sjómenn fái inn í kjarasamning sinn ákvæði um að útgerðin greiði 3,5% viðbótarframlag í lífeyrissjóði sjómanna með sama hætti og launafólk á almenna vinnumarkaðnum hefur þegar samið um við atvinnurekendur. Jafnframt fái sjómenn sömu hækkanir á kauptryggingu sjómanna og aðra kaupliði og samið var um á almenna vinnumarkaðnum árið 2019. Fundurinn felur formanni Sjómannasambandsins að hefja undirbúning að aðgerðum gegn útgerðarmönnum, í samráði við aðildarfélögin, til að knýja á um lausn kjaradeilunnar milli sjómanna og útgerðarmanna. Vestmannaeyjum 8. október 2022.”

Kjördæmadagar hafa staðið yfir síðustu daga, það er frá 3.– 6. október og því hafa engir þingfundir verið á Alþingi þessa vikuna. Kjördæmadagana nýta þingmenn til að fara út í kjördæmi sín og hitta kjósendur, sveitarstjórnafólk, fulltrúa fyrirtækja og fleiri. Bjarkey Olsen Gunnarsdóttir þingmaður VG í Norðausturkjördæmi og formaður Fjárlaganefndar leit við hjá formanni Framsýnar í dag. Það er alltaf ánægjulegt þegar þingmenn sína málefnum kjördæmisins áhuga og koma við á Skrifstofu stéttarfélaganna þar sem er til staðar víðtæk þekking á málefnum svæðisins sem tilheyrir félagssvæði stéttarfélaganna í Þingeyjarsýslum. Yfir volgum kaffibolla var farið yfir málefni svæðisins, þing ASÍ í næstu viku og komandi kjaraviðræður í vetur. Þá kom formaður Framsýnar mikilvægum málefnum á framfæri við þingmanninn s.s. hvað varðar vegamál í Bárðardal, flugvallarmál og atvinnumál. Að sjálfsögðu þarf ekki að taka fram að fundurinn var vinsamlegur í alla staði.

Því miður hafa aðrir þingmenn kjördæmisins ekki séð ástæðu til að koma við og fræðast um stöðuna á svæðinu, vonandi finna þeir sér tíma til þess í næstu kjördæmaviku eftir áramótin.

 

Framsýn og Þingiðn stefna að því að koma upp hleðslustöðvum fyrir rafmagnsbíla í Þorrasölum í Kópavogi þar sem félögin eiga 5 orlofsíbúðir.  Unnið verður að því að setja upp stöðvar í bílakjallarann í október. Samið hefur verið við Hleðsluvaktina um að koma upp grunnneti og stöðvum í kjallarann. Þannig vilja félögin koma til móts við sífjölgandi félagsmenn sem fjárfesta í rafmagnsbílum og dvelja í íbúðum á vegum félaganna í Kópavogi.

Fallegur dagur er runnin upp við Skjálfanda og haustið skartar sínu fegursta í veðurblíðunni og kyrrðinni sem oft er einstök á þessum árstíma. Litskrúð náttúrunnar er engu líkt þessa dagana, nú þegar veðrabreytingar eru í aðsigi og það styttist í komu fyrstu haustlægðarinnar. Það eru blikur á lofti.

Frístundabændur í Grobbholti eru mættir í hús til að vigta og fara í gegnum bústofninn eftir göngur og frekar vætusamt sumar. Það er stemning í hópnum, menn eru kátir og hjálpast að við að undirbúa vigtunina „Hvar er Páll?“ heyrist kallað. Félagi Sófus Páll Helgason, eða Palli eins og hann var ávallt nefndur, hefur fram að þessu haft það hlutverk að skrásetja þyngd og númer á vigtuðum lömbum, enda hluti af hópnum. Hann er nú fjarri góðu gamni, í langþráðu sumarfríi með Nínu sinni á Tenerife. Palla hefur verið best treyst fyrir þessu mikilvæga hlutverki, enda ábyrgur maður í alla staði og óspar á að senda mönnum tóninn reyni þeir að þyngja eigin lömb með því að leggja hendur ofan á þau svo þau virki aðeins meiri á vigtinni.

En líkt og með veðurfarið getum við aldrei stólað á að lífið og tilveran sé okkur hliðholl. Eins og hendi sé veifað er gleðin á bak og burt þegar knúið er dyra í Grobbholti með sorgarfréttir. Félagi Páll er fallinn frá, hafði orðið bráðkvaddur þennan sama dag á Tenerife. Það gat ekki verið að þetta væri að raungerast. Palli sem hafði verið með okkur í anda við vigtunina var ekki lengur á meðal vor. Dimmt ský leggst yfir félagahópinn, menn setur hljóða og tár falla niður vanga.

Upp í hugann koma margar góðar minningar enda höfum við Palli allt frá unga aldri verið samferða í gegnum lífið. Nokkuð sem ég hafði ekki áttað mig á fyrr en ég settist niður til að skrifa minningarorð um góðan félaga. Það hefur verið þægilegt að stíga ölduna með Páli í gegnum lífið, enda einstakur maður í alla staði. Snemma tókum við þátt í  harðvítugum bardögum þess tíma milli Torgara og Hólara, en þá þekktist að unglingar færu milli hverfa á Húsavík til að berjast, oftast í góðu með heimatilbúnum trésverðum og skjöldum og síðar teygjubyssum sem þóttu mikil vopn þess tíma. Á þeim tíma vorum við Palli ekki í sama liði, hann var Hólari en ég aftur á móti Torgari. Félagi Palli var snemma mikið heljarmenni, enda vorum við Torgarar fljótir að gefast upp yrðum við þess varir að hann færi fyrir liði Hólara. Við höfðum einfaldlega ekkert í hann að gera og lögðum því auðsveipir niður vopn. Sigrarnir voru hins vegar auðsóttir ef hann kom því ekki við að berjast með Hólurum.

Við vorum hins vegar í sama liði þegar við stunduðum handbolta með Völsungi, reyndar var ég yngri og lék því í næsta flokki fyrir neðan. Palli var með betri línumönnum sem Völsungur hefur átt í handbolta. Við kepptum reglulega við Þór og KA og það var ekki laust við að við strákarnir kenndum í brjósti um andstæðinga okkar, sem reyndu hvað þeir gátu að stöðva Pál, en þó hann væri með þá tvo til þrjá á bakinu höfðu þeir ekkert í hann að gera. Reyndar lokuðum við oft augunum þegar heljarmennið kastaði sér inn af línunni og skoraði glæsimörk fyrir Völsung. Þá kom fyrir að þeir andstæðingar sem hvað fastast höfðu hangið í honum, lentu undir okkar manni og gengu ráfandi af velli eftir viðskiptin við hann. Það voru ekki lætin í Páli, en hann  var fastur fyrir.

Eftir unglingsárin störfuðum við Palli saman hjá Fiskiðjusamlagi Húsavíkur við almenn fiskvinnslustörf, auk þess að vera í löndunargengi fyrirtækisins, sem sá um að landa úr togurum og öðrum vertíðarbátum. Það var ekki nóg með að við værum samstarfsfélagar, heldur stofnuðum við heimili á svipuðum tíma og eignuðumst okkar fyrstu börn á sama árinu. Þá höfum við Jónína Hermannsdóttir eiginkona Páls unnið saman á Skrifstofu stéttarfélaganna frá árinu 1996.

Eftir góðan tíma hjá Fiskiðjusamlagi Húsavíkur skildu leiðir tímabundið. Palli réði sig á togarann Kolbeinsey ÞH og ég hélt til starfa hjá Verkalýðsfélagi Húsavíkur, síðar Framsýn. Þrátt fyrir að við færum í sitt hvora áttina  náðum við aftur saman þegar Páll kom alkominn í land til að læra fiskeldisfræði við Hóla í Hjaltadal. Eftir námið réði hann sig til starfa hjá Fiskeldisfyrirtækinu Rifós í Kelduhverfi. Með störfum sínum hjá Rifós gegndi hann trúnaðarstörfum fyrir Framsýn stéttarfélag.

Það hafði lengi blundað í Páli að fá sér kindur sér til gamans. Úr varð að hann gerðist aðili að Grobbholti á Húsavík, þar sem hann hélt nokkrar kindur til margra ára með okkur öðrum frístundabændum sem eiga það sameiginlegt að hafa líf og yndi af því að umgangast sauðfé. Páll var kannski ekki sá fjárgleggsti í hópnum, en hann var með öll eyrnamerki á hreinu væru þau nefnd í hans eyru. „Þetta er mín, Vogey“ fullyrti hann hiklaust eftir að honum hafði verið sagt hvaða númer væri í eyranu. Þá hafði hann gott auga fyrir fjárrækt enda yfirleitt með bestu meðalvigtina í Grobbholti. Já það er mikill sjónarsviptir af höfðingjum eins og Páli Helgasyni. Hans verður sárt saknað. Hafðu kærar þakkir fyrir samfylgdina í gegnum lífið kæri vinur og félagi. Elsku Jónína og fjölskylda. Ég votta ykkur mína dýpstu samúð á þessum erfiðu tímum og megi góður guð gefa ykkur kærleik og styrk í sorginni. Minning um góðan mann mun lifa með okkur um ókomna tíð.

Aðalsteinn Árni Baldursson

Skrifstofa stéttarfélaganna veður lokuð miðvikudaginn 5. október frá kl. 12:00 til 16:00 vegna jarðarfarar. Beðist er velvirðingar á því.

The union office will be closed on Wednesday, October 5 from 12:00pm to 4:00pm for funeral. We apologize for any inconvenience.

Vegna óviðráðanlegra aðstæðna var ekki hægt að senda út um síðustu mánaðamót kröfur vegna  skilagreina frá fyrirtækjum sem greiða til Framsýnar og Þingiðnar. Beðist er velvirðingar á því. Það mun ekki hafa kostnaðarleg áhrif á fyrirtækin. Búist er við að þær berist til fyrirtækjanna um miðjan október. Nánari upplýsingar eru í boði á Skrifstofu stéttarfélaganna eða með því að senda fyrirspurnir á netfangið linda@framsyn.is

Alls tóku 77 fulltrúar, frá öllum stéttarfélögum á Norðurlandi innan ASÍ þátt í 37. þingi Alþýðusambands Norðurlands sem fram fór á Illugastöðum í Fnjóskadal í gær og í dag , þar af voru 11 fulltrúar frá Framsýn og Þingiðn. Þingið var í fyrsta sinn pappírslaust og tókst það í alla staði mjög vel. Formaður Framsýnar var annar af fundarstjórum þingsins.

Fjölmargir gestir mættu á þingið og voru með erindi. Helga Þyri Bragadóttir, verkefnastjóri og ráðgjafi hjá VIRK í Eyjafirði, fjallaði um VIRK starfsendurhæfingarsjóð og starfsemi hans. Ellen Jónína Sæmundsdóttir, forstöðumaður Vinnumálastofnunar á Norðurlandi eystra og Austurlandi, fjallaði um Vinnumálastofnun – stöðu og framtíðarsýn. Ágúst Torfi Hauksson, forstjóri Kjarnafæðis Norðlenska ehf., fjallaði um stöðu og framtíð í kjötvinnslu á Íslandi. Björn Traustason, framkvæmdastjóri Bjargs íbúðafélags, sagði frá félaginu og hvað væri á döfinni hjá þeim. Jóna Finndís Jónsdóttir, forstöðumaður réttindasviðs Stapa, fjallaði um lífeyrismál.

Þá sögðu fjórir trúnaðarmenn frá starfi trúnaðarmannsins og viðhorfinu til þess. Þetta voru þær Elsa Hrönn Gray Auðunsdóttir og Sigríður Þórunn Jósepsdóttir, sem eru í Einingu-Iðju, Sirrý Laxdal, sem er í FVSA og Guðmunda Steina Jósefsdóttir, sem er í Framsýn. Í lok fyrri dags var unnið í hópum þar sem fjallað var um samvinnu og samstarf Alþýðusambands Norðurlands við Orlofsbyggðina á Illugastöðum. Í upphafi vinnunnar fjallaði Trausti Jörundarson, formaður Sjómannafélags Eyjafjarðar, aðeins um samvinnuna og samskiptin. Bergþóra Hrönn Guðjónsdóttir og Guðrún Edda Baldursdóttir, frá ASÍ, stjórnuðu vinnunni sem var með þjóðfundarfyrirkomulagi. Niðurstöður hópavinnu og atkvæðagreiðslu um hana voru kynntar að morgni föstudagsins.

 

Ný stjórn AN
Anna Júlíusdóttir, frá Einingu-Iðju, var kjörin nýr formaður AN til næstu tveggja ára. Með henni í stjórn eru Aneta Potrykus, frá Verkalýðsfélagi Þórshafnar, sem er varaformaður stjórnar og Atli Hjartarsson, frá Öldunni stéttarfélagi, sem er ritari stjórnar. Varamenn í stjórn eru Vigdís Edda Guðbrandsdóttir, frá Samstöðu, Guðný Grímsdóttir, frá Framsýn, og Trausti Jörundarson, frá Sjómannafélagi Eyjafjarðar.