kuti

Góðir gestir frá Flugfélaginu Erni gerðu sér ferð til Húsavíkur fyrir helgina til að heilsa upp á starfsmenn á Húsavíkurflugvelli auk starfsmanna á Skrifstofu stéttarfélaganna á Húsavík. Afar gott samstarf hefur verið milli stéttarfélaganna og flugfélagsins um að efla flugsamgöngur um Húsavíkurflugvöll. Það ánægjulega er að það hefur skilað góðum árangri en búast má við að yfir 20 þúsund farþegar fari um Húsavíkurflugvöll á þessu ári, þar af um 4 þúsund á stéttarfélagsfargjöldum. Í máli þeirra Ásgeirs og Ævars frá Flugfélaginu Erni kom fram að þeir eru mjög ánægðir með samstarf flugfélagsins við aðildarfélög Skrifstofu stéttarfélaganna. Þeir komu því vel á framfæri í heimsókninni fyrir helgina. Hér eru þeir ásamt starfsmönnum stéttarfélaganna. Mikil áhugi er meðal samstarfsaðila að viðhalda góðu samstarfi áfram á komandi árum, flugfélaginu og félagsmönnum stéttarfélaganna til góða.

 

ADHD-samtökin ásamt sjö öðrum félagasamtökum standa fyrir undirskriftarsöfnun sem þar sem stjórnvöld eru hvött til að fella sálfræðiþjónustu undir greiðsluþátttökukerfi Sjúkratryggingar Íslands.

Hægt er að skrifa undir söfnunina hér.

Skútustaðahreppur hefur samþykkt keðjuábyrgð. Það var gert á fundi sveitarstjórnar í gær, 23. nóvember.

Skútustaðahreppur er þar með annað sveitarfélagið á starfssvæði Framsýnar sem samþykkir keðjuábyrgð eftir áskorun Framsýnar um slíkt fyrr í mánuðinum. Hér er um mikið framfaraspor að ræða.

Fundargerðina má lesa með því að smella hér. Bókunin er mál númer 5 í fundargerðinni.

Á fundi sveitarstjórnar Norðurþings 22. nóvember síðastliðinn var samþykkt að sveitarfélagið samþykkti keðjuábyrgð. Fer sveitarfélagið að dæmi annarra sveitarfélaga sem hafa gert slíkt hið sama að undanförnu.

Mikil ánægja er hjá stéttarfélögunum með þessa ákvörðun. Skorum við jafnframt á önnur sveitarfélög á starfssvæðinu að fara að dæmi Norðurþings í þessum efnum.

Fundargerðina má lesa með því að smella hér. Bókunin er mál númer 20 í fundargerðinni.

Ný kjarasamningur á milli SFS og aðilarfélaga Sjómannasambands Íslands var undirritaður þann 14. nóvember. Hér fyrir neðan má nálgast nýja samninginn auk kynningarefnis.

Einnig er nýr samningur frá 18. nóvember milli Sjómannasambandsins og SFS frá 18. nóvember sem fellir út 12. greinina um slysa- og veikindabætur skipverja.

Hér er samningurinn á pdf formi.

Hér er samningurinn frá 18. nóvember.

Hér má nálgast kynningarefnið.

Kosning um kjarasamninginn er hafin. Hægt er að kjósa með því að smella á „kjósa hér‟ á bleika borðanum hér efst á síðunni eða smella hér.

Nánar má lesa um málið á heimasíðu Sjómannasambandsins.

 

Framsýn stendur fyrir jólagleði í samstarfi við pólverja á félagssvæðinu laugardaginn 3. desember 2016 í fundarsal stéttarfélaganna sem hefst kl. 15:00. Boðið verður upp á veislu, söng og þá kemur pólski jólasveinninn í heimsókn. Frekari upplýsingar gefur Paulina í síma 893-1375, hún sér einnig um skráningu þar sem allir sem ætla að vera með þurfa að skrá sig hjá henni. Verð á mann er kr. 500 og fyrir börn kr. 1000.

Dnia 3 grudnia 2016 r w sali zawiązków zawodowych FRamsyn odbędą się polskie Mikołajki. W programie przewidywane spotkanie ze świętym Mikołajem , upominki dla dzieci ,kawa i ciasto 🙂 wszystkich seredecznie zapraszamy . Wszystkich chętnych prosimy o kontakt z Paulina 893-1375.

Osoba dorosła 500 kr
Dziecko 1000 kr

Vinnumálastofnun og Stéttarfélögin héldu sameiginlegan fund á Bakka í gærkvöldi.

Soffía Gísladóttir, forstöðumaður Vinnumálastofnunnar á Norðurlandi eystra sat fyrir svörum á fundinum sem rúmlega 30 starfsmenn á Bakka sóttu. Hún naut aðstoðar túlks en Agnieszka Szczodrowska sá um það af einstakri prýði.

Verkalýðsfélag Þórshafnar var með kennslu á hluta af námskeiði fyrir starfsmenn Loðnubræðslu Ísfélags Vestmannaeyja á Þórshöfn sem nú stendur yfir.

Sá hluti námskeiðsins sem Verkalýðsfélag Þórshafnar kenndi heitir Vinna og vinnumarkaður og þar er fjallað um atvinnulífið, starfsfólkið og launakerfin.

Þarna er lögð höfuðáhersla á að kynna hlutverk aðila vinnumarkaðsins og vinnulöggjöfina. Þá er námsmönnum kynnt réttindi og skyldur starfsfólks og farið ítarlega í framkvæmd kjarasamninga, sérstaklega varaðandi ráðningar, kauptryggingu, launamál, frítökurétt, veikinda- og orlofsrétt og lífeyrismál.

Námskeið sem þessi eru launafólki mikilvægt til að fara vandlega yfir þau réttindi og þær skyldur sem það ber á vinnumarkaði og miðar að því að gera viðkomandi betur í stakk búinn að afla sér upplýsinga um launakerfi og kjaramál.

Námskeið sem þessi eru því mikilvægur þáttur verkalýðsfélaganna til að styrkja fólk á vinnumarkaði.

Klukkan 01:20 í nótt var skrifað undir nýjan kjarasamning milli Samtaka fyrirtækja í sjávarútvegi (SFS) og Samtaka atvinnulífsins (SA) annars vegar og hins vegar Sjómannasambands Íslands (SSÍ). Lesa má kjarasamninginn hér.

Þar með hefur verkfalli verið frestað frá 20:00 þann 15. nóvember til 20:00 þann 14. desember.

 

Starfsmaður stéttarfélaganna tók hús á gulrótarframleiðandanum í Akurseli á dögunum. Þar á bæ bar fólk sig vel eftir ágætis uppskeru sumarsins. Allir upptöku var lokið en reiknað var með því að pökkun muni vara í fáeinar vikur í viðbót, en eftir það verður lítil starfsemi hjá fyrirtækinu þangað til undirbúningu sáningar hefst í vor.

Að venju varð iðandi líf á árlegum jólamarkaði á Þórshöfn í dag. Jólamarkaðurinn er orðinn árviss viðburður og ómissandi þáttur í jólaundirbúningnum á svæðinu.
Fjöldi söluaðila leggja land undir fót og koma taka þátt í markaðinum en svo láta heimamenn heldur ekki sitt eftir liggja og eru virkir þátttakendur með ýmsan varning til sölu
Á jólamarkaðnum er sett upp myndarlegt kaffihús á vegum foreldrafélag Grunnskólans á Þórshöfn, þannig að þeir sem koma á markaðinn geta rölt um og síðan sest niður og gætt sér á dýrindis bakkelsi.
Í ár er tíðin góð og voru margir úr nágrannabyggðarlögum sem komu og nutu dagsins með staðarbúum sem er ánægjulegt
Þessi markaður er samvinna margra einstaklinga og félagasamtaka og eiga skipuleggjendur markaðsins heiður skilið fyrir að halda vel utan um skipulagningu og framkvæmd.

Mikil umferð er á verktökum hér á svæðinu um þessar mundir, innlendum sem erlendum. Starfsmenn Framsýnar hafa það fyrir reglu að reyna að hitta alla nýja verktaka á svæðinu, skömmu eftir að þeir hefja störf eða áður. Það er ekki alltaf sem sá kostur er fyrir hendi að hittast í eigin persónu, sérstaklega þegar um erlenda aðila er að ræða.

Sú var staðan í gær og brugðið var á það ráð að nýta sér fjarfundatækni til fundarins og átti fundurinn sér þá stað hér á Húsavík sem og í Póllandi. Þetta ferli gekk vel þó langt væri á milli fundarfólks.

Stéttarfélögum út um allt land, þar á meðal Framsýn, hefur borist beiðni frá Landspítalanum um að nýta orlofsíbúðir félaganna þegar þörf er á að kyrrsetja þungaðar konur/foreldra utan af landi í Reykjavík vegna veikinda. Stéttarfélög hafa byggt upp orlofsíbúðir af miklum metnaði síðustu áratugi fyrir félagsfólk sitt til að auka lífsgæði þeirra og gera fólki kleift að ferðast um landið. Eftir því sem heilbrigðisþjónustu á landsbyggðinni hrakar og fólk þarf í auknum mæli að leita sér lækninga til höfuðborgarsvæðisins hafa þessar íbúðir verið nýttar fyrir veikt fólk og þungaðar konur. Stéttarfélögin standa við bakið á sínum félagsmönnum en það er algerlega ófært að treyst sé á að stéttarfélögin bæti fyrir versnandi heilbrigðisþjónustu fyrir fólk utan höfuðborgarsvæðisins. Það kemur til viðbótar því vinnutapi sem sífellt lengri vegalengdir og fjarvistir vegna læknisaðstoðar kalla á. Hið opinbera á að sinna skyldum við fólk alls staðar af landinu og ekki treysta á sjóði sem félagsmenn stéttarfélaga hafa byggt upp í áratugi. Það er skýr krafa aðildarfélaga Starfsgreinasambandsins að hið opinbera tryggi jafnræði á milli landsbyggðar og höfuðborgarsvæðis og sinni skyldum sínum gagnvart veiku fólki og þunguðum konum sem ekki geta lengur sótt þjónustu í heimabyggð.

Í gærkvöldi kl. 21:20 slitnaði upp úr kjaraviðræðunum milli Sjómannasambands Íslands (SSÍ) og Samtaka fyrirtækja í sjávarútvegi (SFS). Verkfall hjá sjómönnum hófst því kl. 23:00 í gærkvöldi.

Ástæða viðræðuslitanna er fyrst og fremst deila um mönnunarmálin, en samkvæmt kjarasamningi eiga að vera 15 menn á uppsjávarveiðiskipunum og togurunum. Á uppsjávarflotanum hafa útgerðirnar fækkað úr 15 mönnum niður í 8 sem fulltrúar sjómanna telja að sé undirmönnun á þessum skipum. SFS hafnaði kröfu sjómanna um að setja mörk á fækkun skipverja á uppsjávarveiðiskipunum. Á sumum togurum er farið að fækka í 13 menn og höfnuðu útgerðarmenn einnig kröfu sjómanna um að manna togarana eðlilega.

Sátt hafði náðst um fiskverðsmálið og nýsmíðaálagið, sem voru stóru málin ásamt mönnunarmálinu og einnig nokkur önnur smærri mál. Þar sem slitnað hefur upp úr viðræðunum verður ekki boðað til sáttafundar fyrr en eftir um viku tíma. Ljóst er því að félögin þurfa að vera á verkfallsvaktinni næstu daga. Um 30 sjómenn innan Sjómannadeildar Framsýnar eru á leiðinni í verkfall. Rétt er að taka fram að verkfallið nær ekki til sjómanna á smábátum sem fara eftir kjarasamningi Sjómannasambandsins og Landssambands smábátaeigenda.

 

 

 

 

 

 

 

 

 

Sjómenn innan Framsýnar á stærri bátum eru komnir í verkfall sem hófst í gærkvöldi.

Úrslita­tilraun verður gerð eft­ir há­degið í dag til að ná samn­ing­um á milli sjó­manna og út­vegs­manna. Ef ekki tekst að semja í dag kem­ur til boðaðs verk­falls sjó­manna á fiski­skipa­flot­an­um klukk­an 23 í kvöld.

Búið er að þýða kauptaxta samnings Starfsgreinasambandsins við Samtök atvinnulífsins yfir á ensku og pólsku. Þetta er mjög gott framtak sem mun nýtast vel eins og staðan er á Íslandi í dag, ekki síst hér á Þingeyjarsýslusvæðinu. Skoða má kauptaxtana með því að velja „Framsýn“ stikunni hér efst á síðunni og velja svo „Kauptaxta“. Einnig má smella hér.

Framsýn stendur fyrir kynningarfundi fyrir félagsmenn sem starfa hjá Heilbrigðisstofnun Norðurlands á Húsavík um nýgerðan stofnanasamning félagsins við HSN þriðjudaginn 15. nóvember kl. 17:00 í fundarsal félagsins. Samningurinn tekur gildi 1. janúar 2017.
Framsýn, stéttarfélag

Undirverktakinn G&M sem verið hefur með verkefni á Þeistareykjum og við Laxárvikrjun á vegum verktakans LNS Saga hefur nú pakkað saman og yfirgefið landið með starfsmenn sína. Síðustu starfsmennirnir fóru frá landinu síðasta föstudag. Frá því að fyrirtækið hóf störf á Þeistareykjum vorið 2015 hafa verið allt að 60 starfsmenn við störf á vegum fyrirtækisins á félagssvæði Framsýnar.
Frá upphafi hefur Framsýn þurft að hafa afskipti af fyrirtækinu þar sem það hefur ekki séð ástæðu til að virða þær reglur sem gilda á íslenskum vinnumarkaði. Það er þrátt fyrir að Framsýn hafi gengið frá samkomulagi við fyrirtækið haustið 2015 um vinnufyrirkomulag og kjör starfsmanna. Blekkið var varla þornað á samkomulaginu þegar fyrirtækið hófst handa við að brjóta samkomulagið. Það eru ófáir fundirnir sem forsvarsmenn Framsýnar hafa átt með starfsmönnum fyrirtækisins svo ekki sé talað um alla netpóstana sem farið hafa milli aðila vegna þessara samskipta. Í sumar krafðist Framsýn þess að fyrirtækið greiddi starfsmönnum vangoldin laun upp á um 14 milljónir. Um er að ræða leiðréttingu á launum. Jafnframt var þess óskað að aðalverktakinn LNS Saga greiddi launin beint inn á reikning starfsmanna, það er héldi eftir uppgjöri til undirverktakans G&M þannig að leiðréttingin skilaði sér örugglega til starfsmanna.
Á þetta var fallist og leiðréttingin greidd beint inn á reikninga starfsmanna. Eftir stendur krafa Framsýnar um að fyrirtækið greiði starfsmönnum 3 milljónir til viðbótar vegna vangoldinna launa sem tengjast starfsemi fyrirtækisins áður en þeir skráðu sig með útibú á Íslandi í maí 2016. Til viðbótar hefur fyrirtækið ekki staðið við að greiða kjarasamningsbundinn gjöld af starfsmönnum til Framsýnar. Sú upphæð liggur ekki fyrir en verið er að skoða hver hún er. Í því sambandi hefur verið kallað eftir upplýsingum frá G&M í dag.
Starfsmenn G&M voru í sambandi við Framsýn fyrir helgina áður en þeir yfirgáfu landið. Óvissa var um hvernig þeir kæmust suður til Keflavíkur í flug til Póllands. Það mál leystist farsællega og komust þeir suður í tæka tíð. Málinu er hins vegar engan veginn lokið þar sem stjórnendur G&M hafa hótað því að draga af starfsmönnum launaleiðréttinguna sem Framsýn náði fram með samkomulagi við fyrirtækið þar sem þeir kannast ekki við að hafa samþykkt leiðina sem var farinn í gegnum LNS Saga.
Væntanlega verður ekki auðvelt að eiga við fyrirtækið eftir að það hefur yfirgefið landið og hætt starfsemi á Íslandi. Hins vegar verður allt gert til að tryggja starfsmönnum rétt kjör. Framsýn hefur kallað eftir lögum um keðjuábyrgð fyrirtækja og mun berjast fyrir því að slík lög nái fram að ganga á Alþingi.
Eins og þessi frétt ber með sér hefur gífurlegur tími farið í þetta erfiða mál. Það hefur hjálpað mikið til að verkkaupinn Landsvirkjun og aðalverktakinn LNS Saga hafa lagt sitt að mörgum til að liðka fyrir lausn málsins og fyrir það ber að þakka. Framsýn hefur borist miklar og góðar þakkir frá starfsmönnum G&M fyrir baráttu félagsins að tryggja starfsmönnum launakjör samkvæmt íslenskum kjarasamningum. Framganga Framsýnar hefur spurst út þar sem starfsmenn G&M á höfuðborgarsvæðinu og sem starfa við verkefni á vegum fyrirtækisins í Noregi hafa kallað eftir aðstoð frá félaginu.
Þegar framkvæmdir hófust á „Stór Húsavíkursvæðinu“ vegna uppbyggingu PCC á Bakka gaf Framsýn það út að allt yrði gert til að vinna gegn undirboðum og kjarasamningsbrotum. Við það hefur félagið staðið og mun gera áfram. Nú þegar hafa tvö fyrirtæki yfirgefið svæðið sem rekja má að hluta til afskipta félagsins að þeirra starfsemi þar sem þau hafa ekki virt kjarasamninga.

 

 

 

 

 

 

 

 

 

Mikið og gott samband hefur myndast milli erlendra starfsmanna sem tengjast uppbyggingunni á Bakka og forsvarsmanna Framsýnar/Þingiðnar. Hér má sjá póst frá starfsmanni G&M síðasta föstudag eftir að félögin komu að því að aðstoða starfsmenn fyrirtækisins að komast til Keflavíkur í veg fyrir flug til Póllands. „I was with you today, thank you for what you are doing. You’re gorgeous.“

Verktakafyrirtækið LNS Saga hefur sent frá sér yfirlýsingu vegna frétta um vanefndir undirverktakans G&M gagnvart starfsmönnum sínum. Í yfirlýsingunni kemur fram að LNS Saga hafi í sumar gert ítarlega skoðun í samstarfi við Vinnumálastofnun og verkalýðsfélög, á því hvort kjarasamningar væru virtir af hálfu G&M við Þeistareykjavirkjun. Kom í ljós að um 17 milljónir króna vantaði upp á í greiðslur til starfsmanna. Heildarupphæð verksamningsins við G&M var yfir 300 milljónir króna á tímabilinu og því hafi skekkjan verið ríflega 5%. Helsta ástæðan hafi verið mistök í gegnisútreikningum af hálfu G&M.
Greiðslur í gegnum íslenska ráðningastofu:
Eftir að ljóst varð að G&M skorti fjármagn til að standa við gerða samninga við LNS Saga hefur LNS Saga náð samningum við G&M um að greiðslur fyrir októberlaunum verða greiddar beint til starfsmanna í gegnum íslenska ráðgjafaskrifstofu sem unnið hefur fyrir G&M. Starfsmenn hafa fengið tilboð um að halda áfram störfum. Þar segir einnig að fullyrðingar um að LNS Saga noti erlenda starfsmenn til að undirbjóða aðra verktaka í samkeppni um verkefni standist ekki skoðun.
Yfirlýsingin í heild sinni:
G&M hefur starfað á Íslandi í eitt og hálft ár sem undirverktaki LNS Saga. Fyrirtækið hafði á að skipa miklum fjölda af reyndu og duglegu fólki sem hefur reynst ágætlega í verkefnum hér á landi. Í öllum samningum LNS Saga við G&M eru skýr ákvæði um að fylgja beri íslenskum lögum og kjarasamningum.
Í sumar gerði LNS Saga, í samstarfi við Vinnumálastofnun og verkalýðsfélög, ítarlega skoðun á því hvort kjarasamningar væru virtir af hálfu G&M við Þeistareykjavirkjun. Tímaskráningar, viðvera starfsmanna og launaseðlar voru skoðuð og að lokum greiðslukvittanir frá bönkum. Niðurstaða skoðunarinnar var að um það bil 17 milljónir íslenskra króna vantaði upp á í greiðslur til starfsmanna. Heildarupphæð verksamningsins við G&M var á tímabilinu var yfir 300 milljónir. Skekkjan var því ríflega 5% Ein helsta ástæða þessa voru mistök í gengisútreikningum af hálfu G&M, en á þessu tímabili hafði krónan styrkst talsvert.
Nú í haust kom á daginn að G&M skorti fjárhagslegt bolmagn til að halda úti starfsmannahópnum á Íslandi og tók að draga launagreiðslur frá fyrirtækinu til starfsmanna sinna. LNS Saga flýtti greiðslum til fyrirtækisins til að liðka fyrir lausn málsins, en það dugði ekki til og að lokum varð ljóst að fyrirtækið skorti fjármagn til að standa við gerða samninga við LNS Saga.
Frá þeim tíma hefur LNS Saga unnið að því að viðhalda viðunandi verkhraða í þeim verkefnum sem G&M unnu fyrir fyrirtækið. Starfsmenn hafa fengið tilboð um að halda áfram störfum. LNS Saga hefur í dag náð samningum við G&M að greiðslur fyrir októberlaunum verða greiddar beint til starfsmanna í gegnum íslenska ráðgjafaskrifstofu sem unnið hefur fyrir G&M.
Í tengslum við þessi mál hafa komið fram fullyrðingar um að LNS Saga noti erlenda starfs-menn til að undirbjóða aðra verktaka í samkeppni um verkefni. Ef kostnaður við erlenda starfsmenn er skoðaður þá stenst þessi fullyrðing ekki skoðun. LNS Saga hefur verulegan uppihalds og ferðakostnað af starfsmönnum sínum og starfsmönnum erlendra undirverktaka.
LNS Saga er með fjölda undirverktaka bæði íslenska og erlenda. Ástæða þess að stundum eru valdir erlendir verktakar er skortur á hæfu innlendu starfsfólki.
Allt þetta mál hefur einnig verið tengt kröfum verkalýðshreyfingarinnar um keðjuábyrgð. Það er skoðun LNS Saga að lög um keðjuábyrgð hefðu verið mjög til bóta í þessu máli og greitt fyrir úrlausn þess.

Athugasemd:

Framsýn, stéttarfélag gerir eina alvarlega athugasemd við þessa fréttatilkynningu. Það er morgun ljóst að ástæðan fyrir þessum vangreiddu launum er ekki gengisútreikningum að kenna. Fyrirtækið G&M hefur gert í því að hlunfara starfsmenn þrátt fyrir að vita betur verandi með skriflegt samkomulag við Framsýn um kjör starfsmanna og vinnufyrirkomulag. Það er það rétta í málinu.

Framsýn skrifaði í dag sveitarfélögum á félagssvæðinu bréf þar sem þau eru hvött til að setja sér reglur um keðjuábyrgð verktaka sem þau eru í samskiptum við á hverjum tíma. Hér má lesa bréfið til sveitarfélaganna.
Til sveitarfélaga á félagssvæði
Framsýnar stéttarfélags

Húsavík 4. nóvember 2016

Varðar keðjuábyrgð verktaka

Þann 1. nóvember samþykkti bæjarstjórn Akureyrar samhljóða að í öllum samningum sem sveitarfélagið gerir um verklega framkvæmdir verði kveðið á um keðjuábyrgð verktaka. Keðjuábyrgðin gerir það að verkum að verkkaupi og aðalverktaki bera ábyrgð á því að tryggja kjarasamningsbundin kjör og önnur lögbundin réttindi.

Fyrr á þessu ári hafði Reykjavíkurborg samþykkt sambærilegar reglur. Þá hefur Landsvirkjun einnig sett sér reglur vegna keðjuábyrgðar.

Framsýn skorar á sveitarstjórnir á félagssvæðinu að samþykkja hliðstæðar reglur við fyrsta tækifæri. Keðjuábyrgð er eitt allra mikilvægasta verkfæri sem völ er á til að tryggja lögbundin réttindi og kjör. Á þeim miklu framkvæmda- og breytingatímum sem nú standa yfir í Þingeyjarsýslum hefur aldrei verið mikilvægara að sofna ekki á verðinum í þessum efnum.

Framsýn hefur einnig komið þeim skilaboðum á framfærði við alþingismenn að Alþingi hraði gerð laga um keðjuábyrgð fyrirtækja. Þess er vænst að Alþingi fjalli um málið í vetur en því miður er ekki hægt að teysta því.

Meðfylgjandi er bókun bæjarstjórnar Akureyrar.

Bókunin er svohljóðandi:
„Bæjarstjórn Akureyrar samþykkir að í öllum samningum verklegra framkvæmda, kaupa á þjónustu og vörum á vegum sveitarfélagsins verði sett inn ákvæði um keðjuábyrgð þeirra seljenda sem sveitarfélagið semur við. Með þessu vill Akureyrarbær tryggja að allir starfsmenn, hvort sem það eru starfsmenn verktaka, undirverktaka eða starfsmannaleiga, njóti launa, trygginga og annarra réttinda í samræmi við gildandi kjarasamninga og lög hverju sinni. Aðalverktakinn yrði í verksamningi, gerður ábyrgur fyrir að tryggja kjarasamnings- og lögbundin réttindi allra starfsmanna sem að verkinu koma. Þetta verður gert til að koma í veg fyrir undirboð og óeðlilega samkeppnishætti á vinnumarkaði.“