Aðalfundur Deildar verslunar- og skrifstofufólks innan Framsýnar verður haldinn fimmtudagskvöldið 2. febrúar kl. 20:00 í Sal Framsýnar.
Dagskrá:
Veitingar í boði,
félagsmenn fjölmennið
Deild verslunar- og skrifstofufólks innan Framsýnar.
Stjórn og trúnaðarráð Framsýnar kemur saman til fundar næsta mánudag, 30. janúar kl. 17:00 í fundarsal félagsins. Fulltrúum úr stjórn Framsýnar-UNG er boðið að sitja fundinn.
Dagskrá:
1. Fundargerð síðasta fundar
2. Inntaka nýrra félaga
3. Verkfall sjómanna- verkfallsbætur
4. Bankaviðskipti félagsins
5. Formannafundur LÍV
6. Aðalfundur Deildar verslunar- og skrifstofufólks innan Framsýnar
7. Staðan í samskiptum við verktaka á svæðinu
8. Kynnisferð til Póllands
9. Heimsókn SGS til Norðurlandana
10. Olís: Trúnaðarmaður
11. LNS-Saga: Trúnaðarmaður
12. Framkvæmdir G-26
13. Orlofsbyggðin Illugastöðum-ljósleiðari
14. Önnur mál
Fulltrúar aðildarfélaga Starfsgreinasambandsins voru á ferð um Noreg og Danmörku til að kynna sér kjarasamningsgerð og uppbyggingu verkalýðshreyfingarinnar þar í löndum. SGS hittu Fällesforbundet i Noregi, sem eru systursamtök SGS og stærstu landssamtök innan norska ASÍ (LO). Þá var haldin kynning á framkvæmd verkfalls starfsfólks í hótel- og veitingagreinum í fyrrasumar sem SGS studdi með ráðum og dáð, auk þess sem farið var yfir verklag við kjarasamningagerð. Í Danmörku hitti sendinefndin félaga okkar í 3F sem er stærsta stéttarfélag Danmörku. Þar þáðu Íslendingarnir fræðslu um kjarasamningagerð, vinnulag, laun og önnur réttindi starfsfólks á danska vinnumarkaðinu. Þá var farið sérstaklega yfir muninn á Norðurlöndunum varðandi kaup og kjör. Ljóst er að ferðin hefur verið árangursrík og fulltrúar aðildarfélaga SGS koma betur undirbúin heim undir umræður um framtíðarskipan kjarasamningsmála á Íslandi.
Tveir fulltrúar fóru í þessa ferð á vegum Framsýnar sem tókst í alla staði mjög vel en mikið var fundað með fulltrúum frá systursamtökum Starfsgreinasambandsins í Noregi og Danmörku. Ferðir sem þessar eru afar mikilvægar í norrænu samstarfi. Sjá myndir sem teknar voru í heimsókninni.
Þann 1. febrúar næstkomandi verða hótelstjóraskipti hjá Fosshótel Húsavík. Jóna Árný Sigurðardóttir sem verið hefur hótelstjóri hefur ákveðið að fara í nám eftir farsæl störf fyrir hótelið. Í hennar stað hafa Einar Karl Guðmundsson verið ráðinn sem hótelstjóri og Brynja Jóhannesdóttir sem aðstoðarhótelstjóri en þau eru hjón. Einar Karl og Brynja hafa lengi starfað í ferðaþjónustu. Þau litu við á Skrifstofu stéttarfélaganna í gær til að kynna sig og fara yfir þau áform sem þau hafa varðandi eflingu á starfsemi hótelsins á svæðinu jafnframt því að óska eftir góðu samstarfi við Framsýn um málefni starfsmanna.
Einar Karl og Brynja eru hér ásamt Jónu sem hættir sem hótelstjóri um næstu mánaðamót. Þau áttu góða samverustund með forsvarsmönnum Framsýnar, þeim Aðalsteini Árna og Huld Aðalbjarnar skrifstofu- og fjármálastjóra stéttarfélaganna.
Formannafundur LÍV (Landssamband íslenskra verzlunarmanna) var haldinn í Reykjavík í síðustu viku. Fulltrúi Framsýnar, Jóna Matthíasdóttir formaður deildar verslunar- og skrifstofufólks, sat fundinn sem var vel sóttur af formönnum aðildarfélaganna.
Dagskráin var nokkuð viðamikil, Henný Hinz fór yfir stöðu efnahagsmála og hvaða tækifæri og áskoranir eru þar til staðar áður en Gylfi Arnbjörnsson forseti ASÍ tók fyrir stöðu kjaramála. Hann ræddi m.a. helstu forsenduatriði samningsins sem þarf að taka sérstaklega til umræðu og endurskoðunar nú í febrúar mánuði samkvæmt bókun í kjarasamningi. Helstu forsenduatriði eru m.a. að aukinn kaupmáttur launa hafi gengið eftir, að stjórnvaldsákvarðanir og lagabreytingar í húsnæðismálum hafi og muni ganga eftir og að sú launastefna og launahækkanir sem í samningum felast hafi verið stefnumarkandi fyrir aðra samningagerð á vinnumarkaði.
Tómas Möller lögfræðingur Lífeyrissjóðs verslunarmanna fór vel yfir ýmis atriði sem snúa að réttindum og greiðslum í lífeyrissjóði og það gerði einnig Margrét Kristinsdóttir deildarstjóri lífeyrisdeildar VR.
M.a. bentu þau á mikilvægi þess að þekkja lífeyrisréttindi sín og minntu m.a.á að hægt er að nálgast upplýsingar á eigin síðum hjá viðkomandi lífeyrissjóði þar sem einnig er hægt að tengjast lífeyrisgátt og skoða réttindi, séu þau til staðar í fleirum en einum sjóði.
Fundinum lauk með yfirferð og upprifjun Elíasar Magnússonar á kjarasamningi VR/LÍV auk málefnalegra umræða fundarmanna.
Upp úr viðræðum milli sjómanna og útvegsmanna slitnaði á fundi hjá ríkissáttasemjara í dag og hefur nýr fundur ekki verið boðaður. Viðræðuhlé var milli aðila frá þriðjudeginum 17. janúar síðastliðnum til dagsins í dag. Aðildarfélög Sjómannasambandsins notuðu hléið til að funda með sjómönnum og fara yfir stöðuna. Skilaboð sjómanna frá þeim fundum voru skýr um að samninganefndir sjómanna ættu ekki að hvika frá kröfunum um lagfæringu á olíuverðsviðmiðuninni og bætur vegna niðurfellingar sjómannaafsláttarins. Útvegsmenn töldu sig ekki geta komið til móts við sjómenn varðandi þessar kröfur og því sigldu viðræðurnar í strand. Óvissa er því um framhaldið.
Sjómenn sem nú eru í verkfalli eiga rétt á greiðslum úr vinnudeilusjóði. Við viljum minna á hvernig hægt er að sækja um þessar greiðslur en um það má lesa hér.
Umsóknarblaðið má nálgast með því að smella á hnappinn á bleika borðanum á toppi heimasíðunnar.
Sjómannadeild Framsýnar stóð fyrir fjölmennum fundi um stöðuna í kjaramálum sjómanna á föstudagskvöldið. Formaður félagsins, Aðalsteinn Árni Baldursson og formaður Sjómannadeildarinnar, Jakob Gunnar Hjaltalín, fóru yfir stöðuna og þau tilboð sem gengið hafa milli samningsaðila, það er Sjómannasambandsins og Samtaka fyrirtækja í sjávarútvegi til lausnar á kjaradeilunni. Í máli þeirra kom fram að staðan væri mjög alvarleg þar sem útgerðarmenn hafa ekki verið viljugir til að ganga að kröfum sjómanna þrátt fyrir góða afkomu greinarinnar.
Þrjú atriði hafa þokast áfram, það er kostnaðarþátttaka útgerðarinnar er varðar fæðismál, hlífðarfatnað og netkostnað sjómanna um borð í fiskiskipum. Útgerðarmenn hafa hins vegar hafnað alfarið breytingum á olíuviðmiðinu og bótum vegna afnáms á sjómannaafslættinum. Þá hefur kröfum sjómanna um breytingar á nýsmíðaálaginu verið vísað útaf borðinu og eru þær því ekki í endanlegum tillögum sjómanna til lausnar kjaradeilunni.
Útgerðarmenn hafa lagt fram tillögur að breytingum á samningnum sem sjómenn taka ekki vel í enda um að ræða skerðingar á núgildandi kjarasamningi. Sérstaklega varðandi breytingar á veikinda- og slysarétti sjómanna sem og aukinni þátttöku sjómanna í slysatryggingum útgerðarinnar.
Eftir miklar og góðar umræður samþykktu sjómenn innan Framsýnar að standa fastir á þeim tveimur atriðum sem standa útaf. Leynileg atkvæðagreiðsla fór fram á fundinum.
Niðurstaðan var skýr, 100% þeirra sem tóku afstöðu sögðust ekki sætta sig við annað en að gengið yrði að kröfum sjómanna varðandi olíuverðsmyndunina og bætur vegna afnáms sjómannaafsláttarins kæmu til. Þá mótmæla sjómenn harðlega hugmyndum útgerðarinnar um aukna þátttöku sjómanna í slysatryggingum útgerðarinnar og að breytingar verði gerðar á veikindarétti sjómanna. Niðurstaðan getur ekki verið skýrari, sjómenn eru tilbúnir að standa og falla með framlögðum kröfum Sjómannasambandsins.
Skoðunum sjómanna innan Sjómannadeildar Framsýnar hefur verið komið á framfæri við samninganefnd Sjómannasambands Íslands og var það gert í dag.
Á morgun, mánudag, hefur verið boðað til samningafundar í deilunni hjá Ríkissáttasemjara. Miðað við viðbrögð sjómanna á Húsavík og víða um land eru miklar líkur á því að upp úr viðræðum slitni á morgun nema útgerðarmenn komi að borðinu með samningsviljann að vopni. Því miður er ekkert sem bendir til þess í augnablikinu.
Deila sjómanna og útgerðarmanna harðnar með hverjum degi sem líður. Svo virðist sem útgerðarmenn bíði eftir því að sett verði lög á deiluna í boði nýrrar ríkistjórnar þrátt fyrir yfirlýsingar þeirra um annað.
Starfsmaður stéttarfélaganna var á ferðinni á Húsavík á dögunum og heimsótti Trésmiðjuna Rein, en eins og flestir vita er það eitt rótgrónasta fyrirtæki svæðisins.
Mikið er um að vera hjá fyrirtækinu um þessar mundir. Fljótlega verður tekin í gagnið skemma sem byggð var á seinni hluta ársins 2016. Þar verður áhersla lögð á einingaframleiðslu en framleiðsla á þeim er í fullum gangi nú þegar. 25 starfsmenn eru að störfum hjá fyrirtækinu og útlit fyrir að þeim fjölgi á næstu dögum.
Verkefnin eru af margvíslegum toga en um þessar mundir eru nýsmíðaverkefni fyrir ferðaþjónustuaðila áberandi. Um er að ræða hús sem notuð verða sumarið 2017. Það er mikill akkur fyrir fyrirtækið að geta forunnið verkefni sem þessi innandyra, nú á þeim tíma árs þegar hefð er fyrir verkefnaskorti meðal iðnaðarmanna vegna veðurs og myrkurs.
Hér að neðan eru nokkrar myndir frá þessari ánægjulegu heimsókn.
Meðlimir Þingiðnar voru margir á svæðinu í gær.
Hér er í smiðum hús sem notað verður í ferðaþjónustu á komandi sumri.
Líkast til ekki fyrsta skipti sem þessi sagar DOKA bita.
Hápunktur heimsóknarinnar var að sjá þennan glæsilega hlaupakött sem er í nýju skemmunni. Þetta er klárlega með glæsilegri vélbúnaði á svæðinu um þessar mundir.
Höfundur ásamt Ragnari Hermannssyni hjá Trésmiðjunni Rein.
Fundur verður haldinn í Sjómannadeild Framsýnar á föstudaginn næstkomandi, 20. janúar klukkan 18:00. Meðlimir Sjómannadeildarinnar sem starfa eftir kjarasamningi Sjómannasambands Íslands og Samtaka fyrirtækja í sjávarútvegi eru eindregið hvattir til að mæta, ræða stöðuna og næstu skref í kjaradeilu sjómanna.
Sjómannadeild Framsýnar
Þessa dagana er unnið að því að ganga frá 8 nýjum skrifstofum í húsnæði stéttarfélaganna á Húsavík. Framkvæmdirnar ganga vel og á þeim að vera lokið 1. mars nk. Hér má sjá iðnaðarmenn og sérhæfða verkamenn við störf fyrir helgina. Húsnæðið er um 300m2 í heildina.
Skarpur sem er vikublað sem gefið er út á Húsavík kemur inn á málefni Framsýnar stéttarfélags í blaðinu sem kom út á föstudaginn. Eins og heimasíða stéttarfélaganna sagði frá um helgina var fjallað um öflugt starf Framsýnar-UNG í blaðinu auk þess sem sagt var frá fundi fulltrúa stéttarfélaganna Þingiðnar og Framsýnar með stjórnendum Norðurþings um húsnæðismál og stöðu mála varðandi uppbygginguna á Bakka við Húsavík. Til viðbótar voru hugleiðingar formanns Framsýnar um áramót birtar lesendum. Hægt að lesa hugleiðingar á heimasíðu stéttarfélaganna.
Kraftmikið starf Framsýnar ratar reglulega í fjölmiðla.
Sjómenn innan Sjómannadeildar Framsýnar sem eru í verkfalli eiga rétt á verkfallsbótum frá félaginu. Greitt verður út 31. janúar. Þeir sjómenn sem ætla að sækja um verkfallsbætur eru vinsamlegast beðnir um að skila inn umsóknareyðublaði fyrir 28. janúar. Hægt er að nálgast eyðublaðið inn á heimasíðu Framsýnar eða á skrifstofu félagsins. Þar er einnig hægt að fá frekari upplýsingar. Framsýn, stéttarfélag
(Þorgeir Baldursson tók myndina sem er meðfylgjandi þessari frétt)
Vikublaðið Skarpur kom út í gær. Meðal þess sem er til umfjöllunar í blaðinu er öflugt starf ungliða innan Framsýnar, það er Framsýn-UNG. Kraftmikið ungt fólk skipar stjórnina sem kemur víða að úr héraðinu, það er úr Öxarfirði, Reykjahverfi, Reykjadal og Fnjóskadal. Stjórn Framsýnar-UNG kom nýlega saman og ályktaði um verkfall sjómanna og stöðu fiskvinnslufólks í hráefnisskorti sem tengist verkfallinu. Skarpur gerir fundinum góð skil í umfjöllun sinni um starf Framsýnar-UNG.
Framsýn hefur tekist að byggja upp öflugt starf ungliða innan félagsins sem Aðalbjörn Jóhannsson leiðir. Hér má sjá stjórnarmenn, Aðalbjörn, Evu Sól og Sigurbjörgu Örnu. Á myndina vantar Kristínu Evu.
Stofnannasamningur milli Starfsmannafélags Húsavíkur og Heilbrigðisstofnunnar Norðurlands er kominn hér á síðuna. Samningurinn gildir frá 1. janúar 2016.
Hægt er að lesa samninginn með því að smalla á „Kjarasamningar“ á svæði Starfsmannafélagsins hér á síðunni eða með því að smella hér.
Formaður Framsýnar er nú staddur sunnan heiða þar sem fundað er vegna verkfalls sjómanna. Forsvarsmenn stéttarfélaga sjómanna leggja þar fram kröfur þeirra gagnvart Samtökum fyrirtækja í sjávarútvegi.
Ekki er útlit fyrir að lausn sé í sjónmáli miðað við hvernig viðræður hafa gengið síðustu daga.
Forystumenn sjómanna sitja nú á fundi í Karphúsinu.
Fulltrúar stéttarfélaganna, Þingiðnar og Framsýnar, áttu vinsamlegan fund með sveitarstjóra og fulltrúum Norðurþings í vikunni. Fundurinn var haldinn að frumkvæði félaganna. Tilefni fundarins var að fara yfir framvindu mála varðandi uppbygginguna á Bakka og samfélagsmál s.s. byggingu á íbúðarhúsnæði en verulegur húsnæðisskortur er á Húsavík. Stéttarfélögin hafa átt mjög gott samstarf við núverandi sveitarstjórn Norðurþings enda vilji beggja aðila að vinna sameiginlega að málefnum er varða þær miklu breytingar sem eru fyrirsjáanlegar á næstu árum í atvinnuuppbyggingu og styrkingu innviða samfélagsins.
Framsýn hefur með ályktunum gagnrýnt fyrirtæki í fiskvinnslu fyrir að vísa starfsfólki á atvinnuleysisbætur í stað þess að halda þeim á kauptryggingu í verkfalli sjómanna. Þetta á ekki við um öll fyrirtæki. Þau fyrirtæki sem eru til fyrirmyndar hafa haldið starfsfólki á kauptryggingu og nýtt sér síðan reglur sem kveða á um að þau geti fengið greiðslur frá Vinnumálstofnun í staðinn, það er upp í laun starfsmanna. Starfsgreinasambandið hefur nú sent frá sér ályktun þar sem tekið er undir málflutning Framsýnar og þeirra stéttarfélaga innan sambandsins sem hafa mótmælt vinnubrögðum fiskvinnslufyrirtækjanna sem eiga í hlut. Hér má lesa ályktun Starfsgreinasambands Íslands:
„Þær vinnudeilur sem sjómenn og útgerðarmenn standa nú í hafa haft alvarlegar afleiðingar fyrir landverkafólk. Fiskvinnslufyrirtæki hafa nýtt sér ákvæði í landslögum sem gerir þeim kleift að senda fiskvinnslufólk á atvinnuleysisbætur vegna „ófyrirséðra áfalla“ í stað þess að njóta kauptryggingar vegna hráefnisskorts eins og hingað til hefur tíðkast. Með þessu spara fyrirtæki sér launakostnað í verkfallinu en að sama skapi geta fyrirtæki ekki vænst þess að fólk snúi aftur til vinnu eftir að deilan leysist. Með því að fara þessa leið eru fiskvinnslufyrirtæki að sýna starfsfólki sínu lítilsvirðingu og rjúfa þann gagnkvæma skilning sem felst í ráðningarsambandi. Þessar aðgerðir margra fiskvinnslufyrirtækja koma misjafnlega niður á afkomu fjölda einstaklinga þar sem atvinnuleysisbætur eru í mörgum tilvikum lægri en kauptrygging. Þá er ótalinn nokkur fjöldi fólks sem á alla jafna ekki rétt á atvinnuleysisbótum, fólk yngra en 18 ára, fólk nýflutt til landsins og fólk sem hefur áður fullnýtt bótarétt sinn. Starfsgreinasambandið mun freista þess að sækja réttindi þessa fólks enda um grófa mismunun að ræða gagnvart þessum hópi sem er sviptur uppsagnarfresti og afkomu í einni sviphendingu.
Það er skýr krafa Starfsgreinasambandsins að fiskvinnslufyrirtæki sýni starfsfólki sínu virðingu og traust og geri allt sem í þeirra valdi stendur til að viðhalda ráðningasambandi og tryggja framfærslu starfsfólks. Það ber líka að hafa í huga að mörg fiskvinnslufyrirtæki sem bera nú við ákvæði um „ófyrirséð áföll“ er einnig útgerðarfyrirtæki og sitja því við samningaborðið með sjómönnum.“
Eins og sjá má í meðfylgjandi útreikningum hefur hækkun atvinnuleysisbóta ekki haldið í við hækkun lágmarkstekjutryggingar á vinnumarkaði. Í því sambandi má geta þess að árið 2009 voru atvinnuleysisbætur um 95,2% af lágmarkstekjutryggingu á vinnumarkaði en var í lok síðasta árs komin í 77,7% sem hlutfall af tekjutryggingunni. Um síðustu áramót var tekjutryggingin kr. 260.000 og fullar atvinnuleysisbætur kr. 202.054,-.
Vinnumálastofnun hefur nú gefið út að atvinnuleysisbætur hækki og verði kr. 217.208 frá 1. janúar 2017. Hlutfallið verður því tímabundið 83,5% þar sem tekjutryggingin hækkar í kr. 280.000 þann 1. maí nk. Frá þeim tíma verður munurinn 77,6%. Ráðamönnum er greinilega ekki eins umhugað um kjör atvinnuleitenda og sín eigin kjör samanber úrskurð Kjararáðs sem þeir tóku við með miklum þökkum. Að mati Framsýnar er mikilvægt að atvinnuleysibætur verði hækkaðir og fylgi annarri launaþróun í landinu.
Upplýsingar með þessari frétt eru fengnar frá skrifstofu ASÍ.
Almennt gekk starfsemi Framsýnar mjög vel á árinu 2016 en það var án efa eitt annasamasta árið í sögu stéttarfélaganna sem aðild eiga að Skrifstofu stéttarfélaganna. Þau eru auk Framsýnar, Þingiðn og Starfsmannafélag Húsavíkur. Þá er Verkalýðsfélag Þórshafnar með þjónustusamning við Skrifstofu stéttarfélaganna. Það sem kallað hefur á aukin umsvif stéttarfélaganna er ekki síst mikil uppbygging í ferðaþjónustunni og framkvæmdir sem tengjast uppbyggingunni á Bakka. Þá hefur aukið framboð varðandi orlofskosti, íbúðir, orlofshús, flug og hótel fyrir félagsmenn kallað á töluverða aukna vinnu starfsmanna. Markmiðið er að gera enn betur við félagsmenn á árinu 2017. Framsýn ætlar sér að vera í fremstu röð stéttarfélaga á Íslandi á hverjum tíma. Annað er ekki í boði.
Skrifstofa stéttarfélaganna
Rekstur Skrifstofu stéttarfélaganna gekk vel á árinu 2016. Þrátt fyrir að niðurstöðutölur úr rekstri liggi ekki enn fyrir er alveg ljóst að tekjur stéttarfélaganna í Þingeyjarsýslum hafa aldrei verið meiri en á ný liðnu ári.
Í mars var ráðinn nýr starfsmaður í vinnustaðaeftirlit, Aðalsteinn J. Halldórsson. Að öðru leiti urðu ekki breytingar á starfsmannahaldinu. Ekki eru fyrirhugaðar breytingar í starfsmannahaldi á árinu 2017.
Mikið álag var á skrifstofunni enda kallar öflugt starf stéttarfélaganna á hátt þjónustustig. Það er ekki bara að félagsmenn leiti eftir aðstoð heldur eru stjórnendur fyrirtækja á félagsvæðinu ekki síður duglegir við að leita eftir upplýsingum er varðar kjör og réttindi starfsmanna enda mikill mannauður á Skrifstofu stéttarfélaganna þegar kemur að þekkingu á kjarasamningum. Almennt séð eiga starfsmenn stéttarfélaganna mjög gott samstarf við atvinnurekendur á svæðinu. Eðlilega koma upp smá núningar milli aðila sem er hið eðlilegasta mál.
Kynningarmál
Stéttarfélögin halda úti öflugri heimasíðu www.framsyn.is og Fréttabréfi stéttarfélaganna. Báðir þessir miðlar eru mikilvægir í starfi félaganna. Umferðin um heimasíðuna er ótrúleg en fjöldi fólks fer daglega inn á síðuna sem er virkasta heimasíðan meðal aðildarfélaga ASÍ. Til að mæta þörfum erlendra starfsmanna á svæðinu hafa stéttarfélögin látið útbúa bæklinga með helstu réttindum starfsmanna. Bæklingarnir hafa mælst vel fyrir.
Verulegur áhugi fyrir Framsýn
Verulega mikil ásókn er í Framsýn, það er bæði frá launþegum sem starfa eftir kjarasamningum Framsýnar og eins frá öðrum launþegum sem ekki eiga aðild að kjarasamningum Framsýnar svo ekki sé talað um alla þá sem búa og starfa utan félagssvæðis Framsýnar. Framsýn hefur það að leiðarljósi að virða samskiptareglur stéttarfélaga innan ASÍ en ákveðnar reglur gilda meðal félaganna um félagssvæði og félagsaðild. Hins vegar er greinilegt að það fyrirkomulag sem verið hefur varðandi félagsaðildina er hugsanlega að líða undir lok. Starfsfólk kallar eftir auknu frelsi til að velja sér stéttarfélag sem kæmi sér vel fyrir Framsýn. Reyndar hafa ákveðin félög, sérstaklega iðnaðarmannafélög, unnið að því að verða landsfélög sem skarast á við núverandi fyrirkomulag, það er að félögin séu með ákveðin félagssvæði eftir landshlutum líkt og Framsýn.
Fjölgun hefur orðið á félagsmönnum undanfarin ár. Á síðasta ári greiddu 2736 til félagsins og fjölgaði þeim um 300 milli ára sem er gríðarleg fjölgun. Félagsmenn Framsýnar hafa aldrei verið fleiri en um þessar mundir. Með gjaldfrjálsum félagsmönnum telur félagið um 3000 félagsmenn.
Greinlegt er að Framsýn nýtur mikillar virðingar meðal félagsmanna. Í þeim skoðanakönnunum sem gerðar hafa verið hefur félagið alltaf komið mjög vel út. Þá hefur félagið netpósta undir höndum frá félagsmönnum þar sem starfsemi félagsins er rómuð og starfsmönnum hælt fyrir þjónustulund og góða þekkingu á málefnum vinnumarkaðarins.
Vinnustaðaeftirlit
Stéttarfélögin hafa haldið úti öflugu vinnustaðaeftirliti. Eins og fram hefur komið áður í þessum pistli var Aðalsteinn J. Halldórsson ráðinn í vinnustaðaeftirlit. Hvað varðar vinnustaðaeftirlitið þá hefur það verið unnið í góðu samstarfi við Ríkisskattstjóra, lögregluna, Vinnueftirlitið og Vinnumálastofnun. Til viðbótar gerði lögreglan á höfuðborgarsvæðinu, sem kemur að vinnustaðaeftirliti og mannsálsmálum, sér ferð til Húsavíkur og fór í skoðunarferð á Bakka með fulltrúum stéttarfélaganna á Húsavík. Vinnustaðaeftirlitið hefur helst beinst að ferðaþjónustunni og byggingarframkvæmum á svæðinu. Eftirlitinu verður framhaldið á árinu 2017. Nokkrir aðilar koma að því að fjármagna eftirlitið með stéttarfélögum, það er Landsvirkjun, Landsnet, Rafiðnarsambandið, VM og Samiðn. Samstarfið við þessa aðila kemur sér vel enda mjög kostnaðarsamt að halda úti öflugu eftirliti.
Efri hæðin að Garðarsbraut 26
Fyrir nokkrum árum eignuðust stéttarfélögin efri hæðina að Garðarsbraut 26 sem snýr að Árgötunni. Um er að ræða 300m2 húsnæði. Tilgangurinn með kaupunum var að eignast húsæðið og hafa áhrif á það hvernig það væri nýtt. Eins og gefur að skilja skiptir verulega miklu máli fyrir Skrifstofu stéttarfélaganna að starfsemin í húsnæðinu fari saman við skrifstofuhald. Í nýja húsnæðinu verða 8 skrifstofur sem flestar verða leigðar út. Verkinu verður lokið 1. mars n.k.
Framsýn-UNG
Innan Framsýnar er starfandi ungliðahreyfing er nefnist Framsýn-UNG. Aðalbjörn Jóhannsson fer fyrir starfinu sem formaður. Hann situr einnig í stjórn ASÍ-UNG. Ætlunin með Framsýn-UNG er að efla starfsemi ungs fólks innan félagsins enda afar mikilvægt að skoðanir stéttarfélaga taki á hverjum tíma mið af ólíkum hópum og fólks á öllum aldri. Þess er vænst að starfið hjá Framsýn-UNG verði kraftmikið á árinu sem er ný hafið. Eitt er víst að landslið ungmenna er í stjórn Framsýn UNG.
Deildir innan félagsins
Innan Framsýnar eru starfandi tvær deildir, það er Deild verslunar- og skrifstofufólks og Sjómannadeild. Jakob Gunnar Hjaltalín fer fyrir Sjómannadeildinni og Jóna Matthíasdóttir fyrir Deild verslunar- og skrifstofufólks. Deildirnar skiluðu góðu starfi á árinu 2016 en þær halda utan um starf sem fellur beint undir þessa starfshópa innan félagsins.
Áfram ódýrt að fljúga
Fyrir áramótin gengu stéttarfélögin frá áframhaldandi samningi við Flugfélagið Erni um sérstök kjör á flugmiðum fyrir félagsmenn milli Reykjavíkur og Húsavíkur. Samningurinn tryggir félagsmönnum flugmiðann á kr. 8.900,- út árið 2017. Um er að ræða mjög gleðileg tíðindi, aukin lífsgæði og sparnað fyrir félagsmenn upp á um 40 milljónir sé horft út árið. Stéttarfélögin í Þingeyjarsýslum hafa með samningi sínum við flugfélagið komið að því að efla flugsamgöngur um Húsavíkurflugvöll. Á árinu 2016 flugu rúmlega 20 þúsund farþegar um völlinn sem er veruleg fjölgun milli ára.
Orlofsmál
Stéttarfélögin kappkosta að bjóða félagsmönnum upp á orlofskosti, það er orlofsíbúðir og orlofshús víða um land sem og tjaldsvæðisstyrki. Auk þess hafa félögin samninga við hótel víða um land um afsláttarkjör fyrir félagsmenn. Á síðasta ári tóku félögin auk þess á leigu íbúð á Spáni sem félagsmenn hafa verið duglegir að nota. Þá eru miðar í Hvalfjarðargöngin alltaf til sölu á góðu verði fyrir félagsmenn svo ekki sé talað um ódýru flugmiðana.
Styrkir úr sjúkra- og starfsmenntasjóðum
Félagsmenn hafa gott aðgengi að starfsmenntasjóðum í gegnum Framsýn. Á hverju ári fá félagsmenn umtalsverðar endurgreiðslur stundi þeir nám eða sæki námskeið sem þeir þurfa að greiða fyrir. Þá býr Framsýn yfir öflugum sjúkrasjóði sem félagsmenn hafa aðgengi að s.s. í veikindum.
Velferðarmál
Að venju hafa stéttarfélögin komið að því að styðja við bakið á góðum málefnum með ýmsu móti. Ekki síst hefur verið horft á stuðning við æskulýðs- og íþróttastarf í héraðinu.
Starfið og samstarf við atvinnurekendur
Mikilli uppbyggingu fylgir álag. Algjör sprenging hefur orðið í ferðaþjónustu í Þingeyjarsýslum. Á árinu 2017 er búist við frekari aukningu á ferðamönnum sem kallar á aukin umsvif. Samhliða þessari aukningu mun uppbyggingin er tengist PCC á Bakka ná hámarki á árinu. Í dag eru framkvæmdir við verksmiðjuna á Bakka, línulögn frá Bakka að Kröflu, þrjú tengivirki eru í byggingu, boranir eru í gangi á Þeistareykjum og á þeim stað er einnig verið að byggja stórt og mikið stöðvarhús. Yfir þúsund manns hafa komið að uppbyggingunni. Stéttarfélögin hafa almennt átt gott samstarf við verkkaupa, verktaka og starfsmenn fyrirtækjanna. Strax í upphafi var ákveðið af hálfu stéttarfélaganna að taka á verkefninu með föstum tökum. Sú áætlun gekk upp og hefur skilað þeim góða árangri að flest mál hefur verið hægt að leysa innan húss, það er með viðkomandi aðilum. Því miður eru dæmi um ljót mál sem félögin hafa þurft að takast á við með hlutaðeigandi aðilum og lögmönnum félagsins. Þrátt fyrir þessi ljótu mál hafa starfsmenn stéttarfélaganna orðið varir við að verktakarnir sem hafa verið hér við störf, ekki síst þeir erlendu, bera almennt virðingu fyrir starfi félaganna. Það sést best á því að þeir hafa sóst eftir fundum með talsmönnum stéttarfélaganna til að tryggja að allt sé í lagi og bæta úr hafi þess þurft með.
Hvernig vinnustaður verður PCC
Um næstu áramót er stefnt að því að nýr fjölmennur vinnustaður hefji starfsemi á Bakka við Húsavík. Það er þegar þýska fyrirtækið PCC hefur starfsemi við kísilmálmvinnslu. Rúmlega hundrað manns koma til með að vinna í verksmiðju fyrirtækisins. Síðar á þessu ári munu hefjast viðræður milli stéttarfélaganna og forsvarsmanna fyrirtækisins um kaup og kjör starfsmanna. Það er alveg ljóst í huga Framsýnar að félagið vill sjá vellaunuð góð störf í verksmiðjunni. Það er von félagsins að forsvarsmenn fyrirtækisins hafi skilning á kröfum Framsýnar sem ætlað er að stuðla að því að gera störf hjá fyrirtækinu eftirsóknarverð og starfsmanavelta verði í lágmarki.
Eitt er víst að góð ímynd fyrirtækis eins og PCC verður ekki til nema með góðu samstarfi við stéttarfélögin á svæðinu, bæjaryfirvöld og fólkið sem hér býr. Fylgi menn þessari forskrift verða hlutirnir í lagi, annars ekki eins og dæmin sanna. Framsýn mun standa vörð um þessi gildi, það er að fyrirtækið starfi hér í sátt og samlyndi við samfélagið. Neikvæð umræða um nýju kísilmálmverksmiðjuna í Keflavík á að vera okkur hvatning til að tryggja að hér verði farið eftir öllum reglum er varðar réttindi starfsmanna og ekkert verði slakað á í umhverfismálum. Annað á ekki að koma til greina.
Grunnstoðirnar standa fyrir sínu
Sjávarútvegur og landbúnaður hafa lengi borið uppi atvinnulífið í Þingeyjarsýslum auk þjónustu á vegum ríkis og sveitarfélaga. Svo verður áfram en ferðaþjónusta og iðnaður munu fá stærra hlutverk en verið hefur í þróun atvinnulífsins. Þá eru væntingar uppi um að verslun og önnur þjónusta komi til með að eflast frekar á komandi árum. Til að mæta fjölgun íbúa á svæðinu og auknum ferðamannastraum er ljóst að töluvert verður byggt á næstu árum, það er bæði íbúðarhúsnæði og eins húsnæði tengt ferðaþjónustu í Þingeyjarsýslum.
Friður eða ófriður á vinnumarkaði
Um þessar mundir stendur yfir verkfall sjómanna innan Framsýnar. Deilan er í hnút og því óvíst að hún leysist á næstu dögum og jafnvel vikum þar sem mikið ber í milli. Sjómenn hafa verið samningslausir frá því í lok árs 2010. Þá er spurning hvað gert verður í febrúar á almenna vinnumarkaðinum, ekki síst í ljósi þess að við Austurvöll er sjálftökulið sem tók við gríðarlegum hækkunum á dögunum í gegnum úrskurð Kjararáðs. Þingið sá ekki ástæðu til að beina þeim tilmælum til Kjararáðs að úrskurður ráðsins yrði endurskoðaður. Ekki síst þess vegna eru kjarasamningar á almenna markaðinum í uppnámi þar sem endurskoðun á forsendum samningsins eiga að fara fram í febrúar. Það er ólga meðal launþega í landinu, ekki síst þeirra sem búa við lökust kjörin.
Virk – starfsendurhæfingarsjóður skiptir máli
Virk – starfsendurhæfingarsjóður er stofnaður af aðilum vinnumarkaðarins í kjarasamningum 2008, aðild eiga öll stéttarfélög og samtök launagreiðenda, s.s. Ríkið, Sveitarfélögin og Samtök atvinnulífsins.
Markmið aðila vinnumarkaðarins með starfsemi Virk er að draga markvisst úr líkum á því að einstaklingar með skerta starfsgetu í kjölfar veikinda og slysa hverfi af vinnumarkaði.
Í Þingeyjarsýslum starfar Ágúst Sigurður Óskarsson ráðgjafi Virk á skrifstofu stéttarfélaganna á Húsavík og annast þjónustu við alla í þjónustu Virk, bæði þá sem eru í Þingeysku stéttarfélögunum sem aðra. Helstu verkefni ráðgjafa eru:
Persónuleg ráðgjöf og hvatningu sem tekur mið af aðstæðum hvers og eins.
Samvinnu um gerð og eftirfylgni einstaklingsbundinnar áætlunar um eflingu starfshæfni eða endurkomu á vinnumarkað.
Vali á hentugustu úrræðum til að bæta heilsu og styrkja starfshæfni (skv. ráðgjöf lækna, s.s. meðferð annarra heilbrigðisstétta, sjúkraþjálfara, náms- og starfsráðgjafa, endurmenntunar, mats á starfsaðstæðum og annarra endurhæfingaraðila).
Leiðbeiningar um réttindi, greiðslur, framfærslu og aðra þjónustu á svæðinu.
Samstarf við launagreiðendur og aðra lykilaðila í samfélaginu um málefni tengd starfsendurhæfingu.
Vel hefur tekist til með þróun og þjónustu Virk á landsvísu og í Þingeyjarsýslum. Þjónustu- og árangursmælikvarðar sýna að einstaklingar hafa náð góðum árangri í starfsendurhæfingu, eru mjög sáttir við stuðning og þjónustu Virk og góð samvinna er við aðra sem koma að starfsendurhæfingarferlinu. Einnig hefur vakið athygli að þáttur stjórnenda fyrirtækja og stofnana í Þingeyjarsýslum í stuðningi við starfsmenn sem kljást við afleiðingar veikinda og slysa og eru í starfsendurhæfingarferli er virkur og styðjandi og samstarf við Virk árangursríkt. Árið 2016 var árangursríkt í starfsendurhæfingu, í lok árs voru rúmlega tvö þúsund einstaklingar í virkri þjónustu. Jafnvægi hefur náðst í innstreymi í þjónustuna, eftir stöðuga aukningu fyrstu árin fækkaði nýjum í þjónustu um 7% árið 2016. Í árslok hafa 11.000 einstaklingar notið þjónustu Virk.
Stjórn, trúnaðarráð og starfsfólk
Innan Framsýnar er starfandi öflug stjórn og trúnaðarráð sem kemur reglulega saman og fundar um málefni félagsins á hverjum tíma. Þá eru starfandi innan félagsins aðrar stjórnir sjóða, ráð og nefndir. Full ástæða er til að þakka öllu því ágæta fólki sem starfar fyrir félagið fyrir þeirra frábæra starf. Það er gleðilegt til þess að vita að það er eftirsóknarvert að starfa fyrir félagið.
Á Skrifstofu stéttarfélaganna starfar metnaðarfullt starfsfólk sem hefur það að leiðarljósi að halda utan um kraftmikið starf félaganna. Hafi félagsmenn ábendingar um það sem betur má fara í starfi félaganna er mikilvægt að þeir komi skoðunum sínum á framfæri við félögin. Saman getum við gert starfið öflugra, öllum til hagsbóta.
Góðar stundir og megi árið 2017 verða okkur gjöfult í alla staði.
Aðalsteinn Árni Baldursson
Formaður Framsýnar, stéttarfélags