Þingiðn boðar til félagsfundar um skipulagsmál stéttarfélaga mánudaginn 9. október kl. 20:00 í fundarsal stéttarfélaganna á Húsavík. Tilefnið er ákvörðun Félags málmiðnarmanna á Akureyri að gera félagssvæði Þingiðnar að sínu. Gestur fundarins verður Hilmar Harðarson formaður Samiðnar.
Dagskrá:
Skorað er á félagsmenn að fjölmenna á fundinn. Boðið verður upp á kaffi og meðlæti á fundinum.
Stjórn Þingiðnar
Vinnumarkaðsráð Norðurlands Eystra fundaði í fundarsal stéttarfélaganna í gær, þriðjudaginn 26. ágúst. Á fundinum flutti formaður Framsýnar erindi um stöðuna hér á Húsavík og nágrenni, hvað hefur gerst síðustu misseri og eins hvað líklegt er að sé framundan í atvinnu- og byggðamálum.
Töluvert er um að hinir ýmsu aðilar óski eftir erindi frá forsvarsmönnum stéttarfélaganna er varðar þessi mál enda mikið um að vera á svæðinu er tengist sérstaklega uppbyggingunni á Bakka.
Myndirnar voru teknar á fundinum.
Félagsmenn Framsýnar eiga aðild að öflugum fræðslusjóðum í gegnum félagið sem félagsmenn geta notað sæki þeir námskeið eða stundi nám á framhalds- eða háskólastigi. Jafnframt geta fyrirtæki sem greiða til Framsýnar einnig fengið góða styrki til námskeiðahalds á vinnustöðum. Þá er rétt að geta þess að félagsmenn Starfsmannafélags Húsavíkur og Þingiðnar hafa sömuleiðis gott aðgengi að niðurgreiðslum á námskeiðs- eða skólagjöldum. Frekari upplýsingar er hægt að fá á Skrifstofu stéttarfélaganna á Húsavík.
35. þing Alþýðusambandsins verður haldið að Illugastöðum í Fnjóskadal 29.-30. sept. næstkomandi en þing sambandsins eru haldin annað hvert ár.
Í ár eru liðin 70 ár síðan Alþýðusamband Norðurlands var stofnað í Verkalýðshúsinu á Akureyri. Þá sameinaðist norðlenskst alþýðufólk í kröfum sínum fyrir bættum kjörum, en það voru 18 verkalýðsfélög með samtals 4000 meðlimum, á svæðinu frá Langanesi að Ströndum sem voru stofnendur sambandsins.
Í dag eru 11 félög innan vébanda Alþýðusambands Norðurlands og greiðandi félagar þeirra telja tæplega 14. 000 manns.
Árið 1947 kröfðust verkamenn viðunandi lífskjara og 70 árum síðar er það enn stærsta baráttumál verkalýðshreyfingarinnar. Þing Alþýðusambands Norðurlands í ár verður að mestu helgað þessum tímamótum. Fyrirlesarar koma úr ýmsum áttum, saga sambandsins rifjuð upp, staðan tekin í nútíðinni og reynt að skyggnast til framtíðar.
Án efa fróðlegt og skemmtilegt þing framundan hjá norðlenskum stéttarfélögunum.
Innan Framsýnar er starfandi Ungliðaráð Framsýnar sem skipað er til eins árs í senn. Skipunin skal fara fram á fundi stjórnar- og trúnaðarráðs félagsins í október á hverju ári.
Ungliðaráðið skal skipað fjórum félagsmönnum á aldrinum 16-35 ára. Stjórnin skiptir sjálf með sér verkum formanns, ritara og tveggja meðstjórnenda. Leitast skal við að kynjaskiptingin sé jöfn í ráðinu. Ungliðaráðið skal starfa á vettvangi Framsýnar undir heitinu FRAMSÝN-UNG. Ungliðaráðið skal starfa náið með stjórn og trúnaðarráði Framsýnar að þeim málefnum sem aðilar ákveða að vinna að hverju sinni með sérstaka áherslu á málefni ungs fólks. Það er að tryggja að hugað sé að stöðu og hagsmunum ungs launafólks í stefnu verkalýðshreyfingarinnar og að rödd unga fólksins heyrist í starfi og stefnumótun Framsýnar- stéttarfélags.Þá skal ungliðaráðið vera tengiliður Framsýnar við starf ungliða á vettvangi ASÍ á hverjum tíma.
Þeir sem vilja taka þátt í þessu starfi og leggja sitt að mörkum til að bæta stöðu ungs fólks er vinsamlegast beðið um að hafa samband við formann Framsýnar, Aðalstein Árna Baldursson á netfangið kuti@framsyn.is
Fulltrúar stéttarfélaganna í Þingeyjarsýslum voru staddir á Þeistareykjum á dögunum. Eftirfarandi myndir eru innan úr stöðvarhúsi Þeistareykjavirkjunar en þar er mikið um að vera þessa dagana, enda stefnt á að ræsa fyrri vél virkjunarinnar um miðjan nóvember.
Óvenju mikið er um nýbyggingar á Húsavík um þessar mundir. Uppgangur er á svæðinu og sést það greinilega á þessu, sérstaklega aukningu í byggingu á íbúðarhúsnæði. Þar vegur þyngst húsin sem byggð eru í Holtahverfi sem reist eru í tengslum við verksmiðju PCC á Bakka. Þess utan eru nokkrir einstaklingar að byggja sér íbúðarhúsnæði.
Rétt er einnig að minnast á byggingu Sjóbaðanna á Húsavíkurhöfða en þar eru framkvæmdir í fullum gangi og stefnt á opnun á næsta ári.
Hér að neðan eru myndir af framkvæmdum við nýbyggingar á Húsavík.
Nú stendur yfir sláturtíð á landinu öllu, þar á meðal hjá Norðlenska á Húsavík.
Það í mörg horn að líta á þessum tíma eins og gefur að skilja. Finna þarf gistingu fyrir alla tímabundna starfsmenn sem er meira en að segja það nú þegar ferðaþjónustan er enn í fullum gangi þetta haustið, koma þarf öllu þessu fólki til landsins og fleira í þeim dúr. Starfsmenn á sláturtíð eru vel á annað hundrað og eru þeir af 16 þjóðernum. Slátrun hófst 31. ágúst og síðasti sláturdagur verður 27. október.
Það sem af er er meðalvigt hússins 16,7 kíló sem er í tæpu meðallagi. Þegar er búið að slátra það mörgum gripum að líkast til verður það niðurstaðan eftir haustið, það er vigt í tæpu meðallagi.
Á dögunum kom kínverskt sendinefnd í sláturhúsið til úttektar með það fyrir augum að hefja innflutning á íslensku lambakjöti til Kína. Að sögn Sigmundar Hreiðarssonar, vinnslustjóra hjá Norðlenska á Húsavík, gekk heimsóknin vel og var hin ánægjulegasta. Ekki var að merkja annað en að sendinefndinni hafi litist vel á og vonandi verður í framhaldinu haldið áfram með þá vinnu að selja kindakjöt til Kína.
Vandi sauðfjárvænda hefur verið mikið í umræðunni í haust. Á dögunum kom tillaga frá landbúnaðarráðherra þar sem bændum er boðið að hætta sauðfjárbúskap gegn því að fá ákveðnar ívilnanir í staðinn. Raunar er þetta tilboð í uppnámi nú eftir að ríkisstjórnin sprakk en engu að síður forvitnaðist blaðamaður framsyn.is hvort það sé merkjanlegt á sláturloforðum haustsins að bændur væru að taka þessu tilboði landbúnaðarráðherra? Sigmundur sagði að ekki væri útlit fyrir annað og eins og staðan er núna verði framleiðsla ársins 2018 svipuð og í ár og undanfarin ár hjá Norðlenska.
Formaður Framsýnar, Aðalsteinn Árni, fór í heimsókn í vikunni í ÚA sem rekur fiskþurrkun í Reykjadal sem áður bar nafnið Laugafiskur. Að venju var mikið að gera og starfsmenn gáfu sér varla tíma til að líta upp frá vinnunni. Í máli þeirra kom fram að vöntun er á starfsfólki til starfa. Formaður Framsýnar átti gott spjall við starfsmenn og borðaði með þeim morgunverð.
Rétt í þessu skrifuðu fulltrúar Framsýnar, stéttarfélags og Fjallalambs undir samning um kaup og kjör starfsmanna í sláturtíðinni á Kópaskeri í haust. Aðilar hafa gert með sér samning á hverju ári um kjör og aðbúnað starfsmanna. Það er til mikillar fyrirmyndar að Fjallalamb skuli leggja áherslu á að viðhalda samningnum og gefa starfsmönnum og þar með Framsýn möguleika á að koma með breytingar á samningnum enda sé talin ástæða til þess á hverjum tíma.
Aðalsteinn Árni og Björn Víkingur handsöluðu samninginn í dag eftir viðræður/samræður síðustu daga.
Dagskrá 35. þings Alþýðusambands Norðurlands
Föstudagur 29. september 2017
10:00 Setning þingsins
Skýrsla stjórnar
Skipun starfsnefnda þingsins
Helstu málefni þingsins verða vinnumarkaðsmál, menntamál, jafnréttismál og velferðarmál.
Skipun kjörbréfanefndar
10:30 Vinnumarkaðurinn – fortíð – nútíð – framtíð.
Fækkun starfa og menntunarþörf
Róbert Farestveit hagfræðingur hjá ASÍ
11: 00 – 11.10 Kaffihlé
11:10 Raunheimar tækninnar –
Andri Már Helgason frá Advania
11:40 Mikilvægi menntunar á vinnumarkaði
Valgeir Magnússon framkvæmdastjóri hjá Símey
12:10 Hádegisverður (súpa og brauð)
12:40 Hlutverk og gildi kjarasamninga á breyttum vinnumarkaði.
Halldór Oddsson lögfræðingur hjá ASÍ
13:10 Er verkalýðshreyfingin fyrir ungt fólk á vinnumarkaði? Raddir framtíðar.
Hvað segja þeir sem landið munu erfa? Þingeyskir og Eyfirskir ungliðar
13:30 :13:40 Kaffihlé
13:40 Kvennastörf – karlastörf. Er jafnrétti til staðar á vinnumarkaði í dag?
Tryggvi Hallgrímsson frá Jafnréttisstofu
14: 10 Önnur mál
14:20 AN 70 ár
Hákon Hákonarson flytur stutta samantekt um sögu AN.
14:50 – 15:20 Kaffihlé
15:20 Skipting í vinnuhópa – Málefnahópar – Vinnumarkaðsmál – menntamál,
jafnréttismál og velferðarmál. Eyrún Valsdóttir stjórnar vinnuhópum.
17: 00 Hlé
20:00 Kvöldverður og kvöldvaka, gaman saman
Laugardagur 30. september 2017
09:00 – 10:00 Morgunverður
10:00 Afgreiðsla og ályktanir
Niðurstaða tillagna frá málefnanefndum og stjórn kynntar og lagðar fram til umsagnar og afgreiðslu.
Ályktanir þingsins.
10:45 Ársreikningar 2015 og 2016
Fjárhagsáætlun 2017-2018
11:10 Kosningar
11:15 Önnur mál
11:30 Þingslit
Hádegisverður
Nefndir á þinginu:
Gert er ráð fyrir að fjórar nefndir starfi á þinginu og fjalli um vinnumarkaðsmál, velferðarmál, menntamál og jafnréttismál.
Á þinginu mun stjórn sambandsins flytja tillögu um fjárhagsáætlun fyrir árin 2017-2018 og næstu stjórn, varastjórn og skoðunarmenn reikninga. Jafnframt mun stjórnin sjá um vinnslu og afgreiðslu kjörbréfa.
Fulltrúafjöldi á þingið:
Samkvæmt lögum Alþýðusambands Norðurlands hefur hvert aðildarfélag rétt á að senda 1 fulltrúa fyrir allt að 100 félagsmenn og síðan 1 fulltrúa fyrir hvert hundrað félagsmanna eða brot úr hundraði, ef það nemur hálfu hundraði eða meiru. Tala varafulltrúa fer eftir sömu reglum. Fulltrúatala miðast við tölu félagsmanna 1. janúar 2017.
Æskilegt er að aðildarfélög sendi upplýsingar um fulltrúa á þinginu (kjörbréf) á okkah@hotmail.com a.m.k. viku fyrir þing.
Allar nánari upplýsingar um þingið veita:
Stjórn Alþýðusambands Norðurlands skipa :
Ósk Helgadóttir
Jóhann Sigurðsson
Jón Ægir Ingólfsson
Varastórn:
Anna Júlíusdóttir
Agnes Einarsdóttir
Vigdís Elva Þorgeirsdóttir
Fyrr í dag áttu fulltrúar stéttarfélaganna vinnustaðafund á Bakka. Það var fyrirtækið Constructus ehf. sem var heimsótt. Constructus hefur verið að störfum á Bakka síðan í vor og mun verða fram á vetur. Allir starfsmenn fyrirtækisins koma frá Litháen en fyrirtækið er þó íslenskt.
Þetta var hinn ágætasti fundur og var fulltrúum stéttarfélaganna tekið vel. Starfsmenn voru áhugasamir og spurðu út í sín réttindi. Meðfylgjandi myndir voru teknar á meðan á fundinum stóð.
Föstudaginn 15. september varð Framhaldsskólinn á Húsavík 30 ára. Í tilefni af því var blásið til afmælishátíðar þar sem skólinn var opnaður almenningi. Nemendur sýndu hvað þeir væru að bauka í skólanum um þessar mundir, boðið var upp á myndasýningar frá starfi skólans síðustu 30 ár og gestum boðið upp á veitingar. Einnig var stutt formleg dagskrá með erindum forsvarsmanna skólans og annarra velunnara. Einnig var boðið upp á tónlistaratriði.
Eftirfarandi myndir voru teknar á meðan hátíðarhöldunum stóð.
Í nýlegri rannsókn Hagdeildar ASÍ um þróun og skattbyrði launafólks 1998-2016 kemur fram að bótafjárhæðir hafa ekki haldið í við þróun launa eða verðlags og barnabætur í dag eru lítið meira en fátækrastyrkur. Á meðan fá allir foreldrar á Norðurlöndunum barnabætur óháð tekjum. Nánar má lesa um þetta mál á heimasíðu ASÍ.
Ef þessir tveir heiðursmenn væru fengnir til að leysa heimsmálin væri staðan miklu, miklu betri en hún er í dag. Þetta eru félagarnir Reynir Jónasson og Bjarni Sigurjónsson sem tóku tal saman yfir kaffibolla á dögunum í Skóbúð Húsavíkur sem er ein ef ekki besta skóbúð landsins.
Þorsteinn Gunnarsson sveitarstjóri Skútustaðahrepps leit við á Skrifstofu stéttarfélaganna í morgun. Að sjálfsögðu voru málefni héraðsins tekin til umræðu s.s. staða sveitarfélaga, umhverfismál og uppgangurinn í atvinnulífinu svo ekki sé talað um framkvæmdirnar sem tengjast uppbyggingu PCC á Bakka.
Það er alltaf ánægjulegt að fá góða gesti í heimsókn, hér er sveitarstjóri Skútustaðahrepps á tali við starfsmenn stéttarfélaganna og Magnús Þorvaldsson sem starfar hjá VÍS á Húsavík.
Á vormánuðum 2016 var ákveðið að auka stofnfé Sparisjóðs Suður-Þingeyinga og skyldi stofnfjáraukningunni ljúka í ágúst 2017. Bæði var horft til núverandi stofnfjáreigenda en einnig annarra viðskiptamanna og velunnara sparisjóðsins. Viðtökur hafa verið góðar innan héraðs og einnig hafa allmargir aðilar víðsvegar af landinu tekið þátt. Stofnfé hefur aukist úr 67,5 milljónum í 157 milljónir og stofnfjáreigendur eru nú um 370. Stofnfjáraukningin hefur styrkt félagslega stöðu Sparisjóðs Suður-Þingeyinga og gerir sjóðnum kleift að auka útlán sín og mæta kröfum eftirlitsaðila. Nýir stofnfjáraðilar eru boðnir velkomnir í hópinn og öllum sem lagt hafa sparisjóðnum lið með stofnfjárframlögum er þakkað traustið. Lokið er uppgjöri rekstrar Sparisjóðs Suður-Þingeyinga vegna fyrri árshelmings 2017. Reksturinn var í góðu jafnvægi, bæði innlán og útlán jukust verulega og rekstrarhagnaður
eftir skatta var 14,7 milljónir. Heildareignir í lok tímabilsins voru um 7,9 milljarðar, bókfært eigið fé 618 milljónir og CAD eiginfjárhlutfall sjóðsins 16,4%. (Fréttin byggir á umfjöllun á 641.is)
Einstaklingar, fjárfestingasjóðir, sveitarfélög og stéttarfélög í Þingeyjarsýslum hafa komið að því kaupa stofnfé í Sparisjóði Suður- Þingeyinga til að efla sjóðinn í heimabyggð. Ekki þarf að taka fram að sjóðurinn er afar mikilvæg fjármálastofnun í héraðinu. Stéttarfélögin Framsýn og Þingiðn hafa nú gerst aðilar að sjóðnum með kaupum á stofnfé.
Fyrir fáum misserum voru gerð á vegum ASÍ nokkur fjöldi fræðslumyndbanda um sum grunnatriði vinnumarkaðarins. Þessi myndbönd eru sérstaklega heppileg fyrir ungt fólk sem er ekki búið að vera lengi á vinnumarkaði. Einnig er án vafa hollt fyrir þá sem eldri eru að skauta yfir myndböndin og rifja upp helstu leikreglur vinnumarkaðarins.
Hér að neðan má sjá myndband sem fjallar um launaseðla og hvaða skilyrði þeir þurfa að uppfylla. Hin myndböndin má nálgast á youtube síðu ASÍ.
https://www.youtube.com/watch?v=1etgrzv-c18&list=PLSKCjKKu9LwLee0RTW3amiBk-zXANMx9-&index=4
Svo skrifar Tómas Guðbjartsson læknir og náttúruunnandi í nýlegri grein og talar fyrir blómstrandi ferðaþjónustu sem skapi langmestar gjaldeyristekjur Íslendinga. Hann varar við stóriðju og að virkjunarframkvæmdum verði framhaldið á Íslandi. Hann gleymir hins vegar að bera saman launakjör í þessum tveimur atvinnugreinum sem eru miklu hærri í stóriðjunni. Annar þekktur Íslendingur, Skúli Mogensen eigandi WOW air tekur í sama streng og varar við stóriðju. Þess í stað sé mikilvægt að auka tíðni flugumferðar um Keflavíkurflugvöll, markmið flugfélagsins sé að fjölga farþegum um nokkrar milljónir á komandi árum.
Þessir menn og þeir sem tala niður stóriðju eru yfirlýsingaglaðir í nafni náttúruverndar, sem þeir gera út á með því að taka sérstaklega fram að þeir séu einmitt sérstakir náttúruunnendur. Skyldi Skúli hafa gleymt að reikna út hvað það mengar að fjölga flugferðum um Keflavíkurflugvöll? Veit Tómas af öllu hættulega svifrykinu í miðborg Reykjavíkur þar sem hann starfar svo ekki sé talað um mengandi skemmtiferðarskip í Sundahöfn. Manni er algjörlega misboðið.
Eðlilega skilur ritstjóri Skarps á Húsavík ekki neitt í neinu yfir umræðunni og skrifar í leiðara blaðsins; „Ýmsir hafa verið að sproksetja Húsvíkinga vegna verksmiðjunnar á Bakka og talið þá óalandi og óferjandi vegna þessa og jafnvel eiga skilið alla þá mengunarsjúkdóma sem séu óhjákvæmilegir fylgifiskar slíkrar starfsemi, ásamt og með ónæði af innfluttu vinnuafli“
Ritstjórinn heldur áfram og skrifar; „Hvað hafa til dæmis mörg þúsund Hafnfirðingar flutt þaðan vegna álversins? Hvað hafa margir tugir þúsunda túrista forðast Hafnarfjörð vegna álversins? Hvað hafa mörg hundruð Hafnfirðinga tapað heilsu og látist um aldur fram vegna mengunar frá Straumsvík? Ég meina dómsdagsspádómarnir vegna Bakka hljóta að byggja á staðreyndum og tölfræði úr Hafnarfirði þar sem áratuga reynsla af návígi við mengandi stóriðju er til staðar. Eða hvað?“
Í sömu andrá berast fréttir af því að eitt skemmtiferðaskip mengi jafnmikið á sólarhring og þrefaldur bílafloti landsmanna. Axel Friedreich, þýskur vísindamaður sem var hér á dögunum heldur þessu fram. Örsmáar agnir komi frá olíubrennslunni í skipunum og ýti undir líkur á hjartasjúkdómum og heilabilun. Svo ekki sé talað um viðkvæma náttúru og ferðamannastaði víða um land sem varnarlaus þurfa að þola verulegan ágang ferðamanna með tilheyrandi eyðileggingu og umhverfisáhrifum. Hvað með vegakerfið á Íslandi, halda menn virkilega að það sé undir þetta búið?
Fyrir mér eru umhverfismál ekki tískufyrirbæri hvað þá að menn eigi að láta sína eigin hagsmuni njóta vafans þegar kemur að mengandi atvinnustarfsemi. Hvernig er t.d. hægt að halda því fram að flugumferð, skipaumferð og bílaumferð hafi ekki áhrif á umhverfið og viðkvæm landssvæði? Fyrir mér hafa allir þessir þættir sem og stóriðja slæm áhrif á umhverfið sé ekki haldið rétt á málum og varúðar gætt. Fleira má nefna eins og frárennslismál víða um land sem eru í miklum ólestri, ekki síst hjá sveitarfélögum. Fleira mætti tilgreina en verður ekki gert hér í þessari stuttu hugleiðingu.
Þá er rétt að árétta að íbúar á Húsavík munu standa vaktina varðandi orkufrekan iðnað á Bakka er viðkemur umhverfismálum. Það verður enginn afsláttur gefinn hvað það varðar. Það sama á við um aðra starfsemi í héraðinu sem ástæða er til að vakta út frá umhverfissjónarmiðum.
Ég kalla eftir málefnalegri umræðu um umhverfismál þar sem okkur ber skylda til að standa vörð um náttúruna, annað er einfaldlega ekki í boði. Höfum í huga að mengun er mengun sama hvaðan hún kemur, hún er ekki bara tengt stóriðju eins og sumir sem kenna sig við náttúruvernd halda fram kinnroðalaust. Vandamálið er því miður miklu, miklu stærra.
Aðalsteinn Árni Baldursson
Umhverfisstofnun auglýsir tillögu að nýju starfsleyfi fyrir kísilverksmiðju á Bakka í Norðurþingi. Opinn kynningarfundur verður af því tilefni haldinn í sal Framsýnar, Skrifstofu stéttarfélaganna að Garðarsbraut 26, Húsavík, fimmtudaginn 7. september næstkomandi. Fundurinn hefst kl. 16:30 og verður fjallað um starfsleyfisveitingar Umhverfisstofnunar, eftirlit með framkvæmd starfsleyfa, umhverfisvöktun sem tengist starfseminni og tillagan kynnt. Einnig verður opnað fyrir fyrirspurnir og umræður.
Frestur til að gera athugasemdir við tillöguna er til 15. september 2017.
