kuti

Deildar verslunar- og skrifstofufólks innan Framsýnar verður haldinn þriðjudagskvöldið 6. febrúar kl. 20:00. Fundurinn verður í fundarsal stéttarfélaganna að Garðarsbraut 26 á Húsavík.

Dagskrá:

1. Venjulega aðalfundarstörf

Skýrsla stjórnar

Kosning stjórnar

Kosning formanns

2. Starfsmenntamál- hækkun styrkja til félagsmanna
3. Erindi og umræða um verslun og þjónustu „Hvernig get ég aðstoðað?“
4. Önnur mál

Mikilvægt er að verslunar- og skrifstofufólk innan Framsýnar fjölmenni á fundinn og taki þátt í að móta starf deildarinnar.

Deild verslunar- og skrifstofufólks innan Framsýnar

 

 

Á fundi sambandsstjórnar Samiðnar föstudaginn 12. janúar afhenti Hilmar Harðarson formaður Samiðnar, Ásmundi Einari Daðasyni ráðherra jafnréttis- og velferðarmála, áskorun fyrir hönd sambandsstjórnar þar sem Alþingi er hvatt til að lögbinda nú á vorþingi ákvæði um keðjuábyrgð og varnir gegn kennitöluflakki.

Jafnframt samþykkti sambandsstjórnin ályktanir um #MeToo og stöðu kjarasamninganna. Þingiðn, félag iðnaðarmanna í Þingeyjarsýslum á aðild að Samiðn. Formðuar félagsins, Jónas Kristjánsson, tók þátt í fundinum fyrir hönd félagsins.

 

Um áramót hækkaði persónuafsláttur til samræmis við hækkun á verðlagi undanfarið ár en efri tekjumörk hækkuðu til samræmis við launavísitölu, eins og lög gera ráð fyrir. Alþýðusambandið hefur ítrekað vakið athygli á þessu ósamræmi í framkvæmd skattkerfisins, sem leiðir kerfisbundið til aukins tekjuójafnaðar. Þannig nam hækkun persónuafsláttur 1,9%, hann fór úr 52.907 kr. í 53.895 kr. Á sama tíma hækkuðu tekjumörk í efra skattþrepi um 7,1% og greiðist tekjuskattur í efra skattþrepi nú af tekjum yfir 893.713 krónur á mánuði í stað 834.707 kr. áður.

Þróun persónuafsláttar hefur meiri áhrif á skattbyrði eftir því sem tekjur eru lægri og myndar í raun skattleysismörk að óbreyttu skatthlutfalli, sem líta má á sem fyrsta þrep tekjuskattskerfisins.   Tekjumörk í efra skattþrepi hafa hins vegar einungis áhrif á skattbyrði tekjuhærri hópa. Þannig má segja að tekjumörkin í fyrsta þrepi (skattleysismörkin) hafi um áramót hækkað úr 143.224 krónum á mánuði í kr. 145.899 eða um 1,9% á sama tíma og tekjumörkin í efra þrepi hækkuðu úr 834.707 kr. í 893.713 kr. eða um 7,1%.

Ráðstöfunartekjur hátekjufólks aukast um 78.000 kr. en lág- og millitekjufólks um tæp 12.000
Þetta misræmi veldur því að ráðstöfunartekjur hátekjufólks aukast mun meira en þeirra tekjulægri. Þannig lækkaði sem dæmi staðgreiddur tekjuskattur og útsvar hjá einstaklingi með 350.000 krónur í mánaðarlaun um áramótin úr 71.211 krónum á mánuði í kr. 70.223 krónur og ráðstöfunartekjur þessa einstaklings jukust þannig um 988 krónur á mánuði eða 11.800 krónur á ári sem samsvarar 0,3% aukningu ráðstöfunartekna. Ef litið er á hag þeirra sem eru með tekjur yfir efri tekjumörkunum skattkerfisins, þ.e. yfir 893.713 kr.,lækkar staðgreiddur tekjuskattur og útsvar hins vegar mun meira hjá þeim eða um 6.476 krónur á mánuði. Ráðstöfunartekjur þeirra hækka því um ríflega 77.700 krónur á ári, sem samsvarar t.a.m. 0,9% aukningu ráðstöfunartekna hjá einstaklingi sem hefur 1.000.000 kr. mánaðarlaun.

Sjá nánar á heimasíðu Alþýðusambands Íslands

Fulltrúar stéttarfélaganna fóru í hefðbundna eftirlitsferð á Þeistareyki í dag. Mikið vetrarríki er þar efra núna eins og sjá má á meðfylgjandi myndum og skyggni afleitt.  Raunar var það þannig að það menn töldu sig ágæta að hafa það af heim til Húsavíkur eftir hádegið.

Í vikunni kom nýr framkvæmdastjóri Sjóbaðanna á Húsavík í heimsókn á Skrifstofu stéttarfélaganna. Hann heitir Sigurjón Steinsson og tók við sjóbaðaverkefninu síðla árs 2017. Sigurjón kom við til að fara yfir sviðið er varðar kaup og kjör starfsmanna í svona starfsemi og að sjálfsögðu einnig til þess að kynna sig og starfsemina.

Sigurjón segir að ágætur gangur sé á framkvæmdum við sjóböðin og stefnt sé á opnun um miðjan júní í sumar. Óhætt er að segja að hér sé á ferðinni spennandi verkefni sem muni auka afþreyingarmöguleika á Húsavík fyrir ferðamenn sem og heimamenn.

Starfsmenn og forsvarsmenn Jarðborana gengu frá vinnustaðasamningi í síðustu viku fyrir almenna starfsmenn sem starfa á borum fyrirtækisins á Íslandi og erlendis. Starfsmenn sem að stórum hluta eru í Framsýn leituðu til félagsins eftir aðstoð við að gera samninginn auk þess sem Jarðboranir voru í sambandi við Samtök atvinnulífsins með aðstoð. Samningurinn liggur nú fyrir og er kominn í atkvæðagreiðslu meðal starfsmanna. Kjörgögnin fóru í póst í gær. Um er að ræða póstatkvæðagreiðslu, starfsmenn geta annars vegar sett atkvæðaseðillinn í kjörkassa sem komið hefur verið fyrir á þeim borum sem eru í gangi á Íslandi eða hins vegar komið þeim á skrifstofu Framsýnar á Húsavík. Samtals eiga 45 starfsmenn rétt á að greiða atkvæði um samninginn.  Atkvæðagreiðslan stendur yfir til 12. febrúar. Kjörstjórn Framsýnar sér um atkvæðagreiðsluna og talningu atkvæða.

 

Þingiðn og Rafiðnaðarsamband Íslands stóðu fyrir sameiginlegum fundi fyrir helgina með iðnaðarmönnum sem starfa hjá PCC á Bakka. Tilgangur fundarins var að fara yfir kjaramál, starfsemi iðnaðarmannafélaganna og kjósa trúnaðarmenn fyrir iðnaðarmenn. Fundurinn var málefnalegur og góður. Sigmar Tryggvason og Patryk Marcinkowski voru kjörnir trúnaðarmenn starfsmanna, Patryk fyrir félagsmenn Þingiðnar og Sigmar fyrir rafiðnaðarmenn.

Tæplega 20 iðnaðarmenn verða starfandi hjá PCC á Bakka.

Trúnaðarmaðurinn Patryk Marcinkowski er hér meðal annarra iðnaðarmanna sem komu á fundinn.

Ísleifur Tómasson  og Björn Eysteinsson komu fljúgandi frá Reykjavík til að taka þátt í fundinum en þeir eru starfsmenn Rafiðnaðarsambands Íslands.

Formaður Framsýnar fór í hefðbundna eftirlitsferð í Vaðlaheiðargöng í vikunni. Umræður urðu um framkvæmdina við forsvarsmenn aðalverktakans á staðnum og nokkur önnur mál sem tengjast starfsmönnum. Um 100 manns hafa verið við störf við lokafrágang í göngunum og við vegagerð til og frá göngunum. Reiknað er með að göngin verði tekin í notkun á haustdögum sem verður mikilvæg samgöngubót fyrir vegfarendur sem leið eiga um Norðurland.
Í lok samtalsins urðu léttar og óábyrgar umræður um fréttir síðustu daga um að eyfirskt loft komi til með að streyma vegna staðhátta úr Eyjafirði í gegnum göngin yfir í Þingeyjarsýslu. Fulltrúi stéttarfélaganna taldi þetta ekki heillavænlega þróun. Þingeyingar hefðu aldrei verið taldir loftlausir enda stútfullir af heimsins besta lofti, nær væri að beina fersku og ómenguðu lofti úr Þingeyjarsýslu yfir í Eyjafjörð til að bæta heilsufar nágrannanna handan Vaðlaheiðar. Mikilvægt væri að koma upp blásurum í göngunum sem tryggðu Eyfirðingum heilnæmt loft úr austri. Þörfin væri mikil eins og vísan sem Flosi Ólafsson orti á sínum tíma staðfesti:
„Frá Akureyri er um það bil
ekki neins að sakna.
En þar er fagurt þangað til
þorpsbúarnir vakna.“

Framsýn fór í reglubundna eftirlitsferð í vikunni í Vaðlaheiðargöng.

Brú lífeyrissjóður heldur námskeið um lífeyrisréttindi við starfslok fyrir sjóðfélaga Brúar lífeyrissjóðs, Lífeyrissjóðs starfsmanna Reykjavíkurborgar og Lífeyrissjóðs starfsmanna Kópavogsbæjar í húsakynnum sjóðsins, Sigtúni 42, Reykjavík, miðvikudaginn 17. janúar næstkomandi.
Á námskeiðinu verður farið almennt yfir helstu lífeyrisréttindi sjóðfélaga, hvar upplýsingar um réttindi er að finna og spurningum svarað sem brenna á sjóðfélögum um lífeyrismál.
Brú lífeyrissjóður rekur þrjár ólíkar deildir með mismunandi réttindakerfum og er námskeiðið því skipt upp eftir því. Takmarkaður fjöldi sæta eru í boði á hvert námskeið og nauðsynlegt að sjóðfélagar skrái þátttöku sína. Námskeið fyrir hverja deild tekur í kringum klukkustund.
Næsta námskeið verður haldið miðvikudaginn 17. janúar næstkomandi.
B deild – Lífeyrissjóður starfsmanna Reykjavíkurborgar – Lífeyrissjóður starfsmanna Kópavogsbæjar kl. 16.30
A deild kl. 17.30
V deild kl. 18.30
Næstu námskeið eftir þetta verða: 21. febrúar, 14. mars og 11. apríl.
Hægt er að skrá sig á námsskeiðið hér.

Framsýn stóð fyrir fundi með starfsmönnum PCC á þriðjudaginn í fundarsal stéttarfélaganna. Á fundinum var farið yfir starfsemi Framsýnar, viðræður félagsins við Samtök atvinnulífsins vegna samkomulags sem unnið er að um kjör og aðbúnað starfsmanna PCC sem koma frá nokkrum þjóðlöndum. Að lokum var gengið frá kjöri á tveimur trúnaðarmönnum starfsmanna. Starfsmennirnir, Sigrún Hildur Tryggvadóttir og Henrik Cater fengu góða kosningu og gildir kjör þeirra til tveggja ára. Þau verða trúnaðarmenn fyrir almenna framleiðslustarfsmenn og starfsfólk á skrifstofu PCC sem eru félagsmenn í Framsýn. Næsta föstudag hafa síðan Þingiðn og Rafiðnaðarsamband Íslands boðað til fundar með iðnaðarmönnum sem starfa hjá PCC á Bakka. Þar verður sömuleiðis gengið frá kjöri á tveimur  trúnaðarmönnum fyrir iðnaðarmenn. Samtals verða því fjórir trúnaðarmenn starfandi hjá PCC BakkiSilikon hf.,  það er á vinnustað sem telur um 110 starfsmenn.

Hress og mögnuð, framleiðslustarfsmennirnir Sigrún Hildur Tryggvadóttir og Þjóðverjinn Henrik Cater voru kjörin trúnaðarmenn fyrir framleiðslustarfsmenn og starfsmann á skrifstofu PCC á Bakka, það er á fundi sem haldinn var í vikunni að frumkvæði Framsýnar.

Framsýn átti góðan fund með starfsmönnum PCC á Bakka á þriðjudaginn, rúmlega hundrað manns koma til með að starfa hjá fyrirtækinu sem hefur starfsemi í vetur.

Formaður Framsýnar svaraði fyrirspurnum fundarmanna eftir bestu getu en eðlilega var töluvert spurt út í ýmsa þætti er varðar störf trúnaðarmanna, aðbúnað og kjör starfsmanna.

 

Persónuafsláttur hækkaði um áramót. Hækkunin er í samræmi við hækkun verðlags undanfarin ár. ASÍ hefur bent á að við breytingar á skattkerfinu myndist æ meiri ójöfnuður. Nánar má lesa um málið á heimasíðu ASÍ.

Fyrir nokkrum árum voru unnin nokkur kynningarmyndbönd fyrir Skrifstofu stéttarfélaganna. Þau lifa enn á internetinu og eiga ennþá fullt erindi við félagsmenn og aðra. Hér er til dæmis myndband um starfshætti verkafólks:

Fleiri myndbönd eru til á youtube síðu Framsýnar.

Steingrímur J. Sigfússon, forseti Alþingis kom í heimsókn á Skrifstofu stéttarfélaganna í gær. Farið var yfir hin ýmsu málefni á sviði stjórnmálanna, sérstaklega þau sem við koma starfi stéttarfélaganna svo sem mikilvægi keðjuábyrgðar og kjaramál.

Það er alltaf ánægjulegt að fá svona góðar heimsóknir. Við hvetjum aðra stjórnmálamenn að koma við hér á skrifstofunni þegar þeir eiga leið hjá og taka stöðuna á þeim málefnum sem eru efst á baugi.

Á undanförnum árum hefur borið á því að stéttarfélög innan ASÍ hafi útvíkkað sín félagssvæði, það er yfir félagssvæði annarra stéttarfélaga. Það á m.a. við um félagssvæði Þingiðnar þar sem töluverður uppgangur hefur verið á síðustu árum.

Meðal þessara félaga er Félag málmiðnarmanna Akureyri sem samþykkti að gera verulegar breytingar á sínu félagssvæði og útvíka það yfir önnur stéttarfélög iðnaðarmanna á Norðurlandi. Áður náði félagssvæðið yfir Akureyri og nærsveitir. Eftir breytinguna stendur í lögum félagsins, 1. gr: „Félagssvæði þess er, Norðurland frá og með Húnaþingi vestra til og með Langanesbyggð.“

Félagið fór í kjölfarið í mikla auglýsingaherferð til að auglýsa nýja félagssvæðið.

Þessi ákvörðun Málmiðnaðarmanna vakti upp mikla reiði og óánægju meðal félagsmanna Þingiðnar sem töldu að með þessu væri félagið að valta yfir félagssvæði Þingiðnar. Gerðar voru athugasemdir við þessi vinnubrögð félagsins sem gáfu þá skýringu að þeir væru að bregðast við þróun skipulagsmála innan iðnaðarmannafélaga, ekki síst á höfuðborgarsvæðinu.

Lagabreyting Félags málmiðnarmanna fór í gegnum Laganefnd ASÍ, ekki var leitað álits iðnaðarmannafélaga á Norðurlandi við þessari breytingu á félagslögum Félags málmiðnarmanna. Stjórn Þingiðnar fundaði með forsvarsmönnum Samiðnar sem sögðu ekkert vera því til fyrirstöðu að Þingiðn stækkaði sitt félagssvæði. Reyndar er það staðfest í umsögn sambandsins til Laganefndar ASÍ sem gerir ekki athugasemdir við stækkandi félagssvæði Þingiðnar. Svo virðist sem það hafi farist fyrir hjá Samiðn að veita umsögn um breytingarnar á lögum Félags málmiðnarmanna áður en að þær fóru í gegnum ASÍ.

Til að verjast þessum yfirgangi og til að tryggja stöðu félagsins samþykkti Þingiðn að gera breytingar á 1. gr. félagslaga á síðasta aðalfundi. Það er að stækka félagssvæðið með því að starfssvæði félagsins verði allt Ísland. Hugmyndin hjá Þingiðn er sú sama og er hjá FIT og Félagi Málmiðnarmanna á Akureyri sem Laganefnd ASÍ hefur þegar samþykkt í þeirra tilvikum. Það er að einbeita sér að núverandi félagssvæði og gera samstarfssamninga við þau félög innan Samiðnar þar sem félagssvæðin skarast.

Félagssvæði Þingiðnar náði áður yfir sveitarfélög í Suður og Norður Þingeyjarsýslu. Þá er vitað að FIT og VM starfa á landsvísu. FIT var t.d. heimilað að gerast landsfélag árið 2011. Laganefnd ASÍ og miðstjórn ASÍ á þeim tíma heimilaði það. Nú ber svo við að sömu aðilar fallast ekki á að Þingiðn stækki félagssvæðið. Skrýtið ekki satt!

Því miður er ekki annað að sjá en að Laganefnd ASÍ og þar með miðstjórn ASÍ sé á algjörum villigötum hvað skipulagsmálin varðar.

Að mati Þingiðnar er Laganefnd ASÍ eða miðstjórn ASÍ ekki stætt á því að heimila FIT, VM  að vera landsfélög og hafna öðrum, hvað þá að heimila Félagi Málmiðnarmanna á Akureyri að valta yfir félagssvæði annarra félaga á sama tíma og Þingiðn er meinað að stækka sitt félagssvæði. Slík ákvörðun stenst ekki skoðun.

Til viðbótar má geta þess að Framsýn spurðist fyrir um það fyrir nokkrum árum hjá Alþýðusambandinu hvort félagið gæti stækkað félagssvæðið og haft landið allt sem félagssvæði. Það stóð ekki á svarinu,“ JÁ – Framsýn getur haft landið allt sem félagssvæði án þess það skarist við lög ASÍ ef það hefur eða nær kjarasamningum um störf á landinu öllu.“

Það má alltaf deila um skipulagsmál og hvernig þeim verður best háttað innan verkalýðshreyfingarinnar til að tryggja stöðu félagsmanna og árangur í kjarabaráttu en það verður hins vegar ekki gert með mismununn eða tilviljunarkenndum afgreiðslum hjá Laganefnd ASÍ eða miðstjórn ASÍ.

Þingiðn hefur þegar falið lögmönnum félagsins að skoða málið og skila félaginu áliti áður en næstu skref verða ákveðin. Við þetta verður ekki unað.

 

 

Stjórn Starfsmenntasjóðs verslunar- og skrifstofufólks hefur samþykkt hækkun á styrkjum til félagsmanna. Hækkunin tók gildi um um áramótin og gildir fyrir félagsmenn Framsýnar enda félagið með aðild að sjóðnum.

Veittur er hámarksstyrkur allt að 130.000 kr. á ári.

90% af námi/starfstengdu námskeiðsgjaldi/ráðstefnugjaldi – hámark 130 þúsund.

50% af tómstund – hámark 30 þúsund (dregst frá hámarksstyrk).

50% af ferðastyrk vegna náms – hámark 40 þúsund (dregst frá hámarksstyrk).

Skilyrði fyrir styrkveitingu er að félagsmaður greiði námsgjöld/námskeiðsgjöld/ráðstefnugjöld.

Uppsöfnun einstaklinga til þriggja ára verður því 390 þúsund fyrir einu samfelldu námi.

Veittir fyrirtækjastyrkir hækkuðu einnig um síðustu áramót í samræmi við styrki til einstaklinga.

Frekari upplýsingar má nálgast á Skrifstofu stéttarfélaganna á Húsavík eða inn á starfsmennt.is

Stéttarfélögin, Framsýn, Þingiðn, Verkalýðsfélag Þórshafnar og Starfsmannafélag Húsavíkur hafa ákveðið að bjóða félagsmönnum upp á sama góða verðið á flugmiðum á vegum félaganna milli Húsavíkur og Reykjavíkur með flugfélaginu Erni á árinu 2018. Verðið verður áfram kr. 8.900,- per flugferð.

Á síðasta ári seldu félögin um 4000 flugmiða til félagsmanna en í heildina er ekki ólíklegt að um 20 þúsund farþegar hafi farið um flugvöllinn á árinu 2017. Staðfestar tölur liggja ekki fyrir.

Ljóst er að þetta er ein besta kjarabót sem félögin geta boðið upp á enda hafa fjölmargir félagsmenn lýst yfir mikilli ánægju sinni  með framtak félaganna að bjóða þeim upp á ódýrt flug milli Húsavíkur og Reykjavíkur. „Þetta eru aukin lífsgæði eins og einn eldi félagsmaður orðaði það, nú get ég farið suður og heimsótt börn og barnabörn án þess að það kosti augun úr.“

Félagsmenn Framsýnar geta farið jákvæðir inn í nýtt ár þar sem ákveðið hefur verið að hækka verulega námsstyrki til félagsmanna.

Um er að ræða breytingar á hámarki einstaklingsstyrkja sem taka gildi hjá öllum sjóðunum fjórum, Landsmennt, Sveitamennt, Ríkismennt og Sjómennt sem Framsýn á aðild að fyrir sína félagsmenn.

Hámarksgreiðsla á ári fer úr kr. 75.000,- fyrir almennt nám í kr. 100.000,-

Þriggja ára uppsafnaður styrkur hækkar úr kr. 225.000,- í kr. 300.000,- fyrir eitt samfellt nám

Hámarksstyrkur vegna námskeiða sem falla undir frístunda/tómstundanámskeið munu hækka í kr. 30.000,- á ári og dregst jafnframt af heildarupphæð einstaklingsstyrks þess árs

Þá er athygli vakin á því að sérstakur styrkur vegna meiraprófs fellur undir almenna einstaklingsstyrki og verður því áfram kr. 100.000.-

ATH: Um er að ræða breytingar sem taka gildi f.o.m. 1. janúar 2018 og þá gagnvart því námi sem hefst frá og með þeim tíma.

Aðrar reglur verða óbreyttar og gilda samhliða fyrrgreindum breytingum.