kuti

Framsýn stéttarfélag samþykkti í dag að senda frá sér svohljóðandi ályktun um málefni leigjenda sem félagið telur vera í miklum ólestri:

„Stjórn og trúnaðarráð Framsýnar skorar á ríki, sveitarfélög og lífeyrissjóði að gera átak í málefnum leigjenda á Íslandi með það að markmiði að bæta stöðu þeirra.

Allt of hátt leiguverð og óvissa í húsnæðismálum fyrir þennan stóra hóp er ólíðandi að mati félagsins, sérstaklega er varðar lágtekjufólk. Fólk sem býr við kröpp kjör á ekki auðvelt með að leigja á frjálsum markaði miðað við núverandi okur á leigumarkaði.

Ríkisstjórnin hefur lagt áherslu á að styrkja þurfi leigumarkaðinn og gera hann að raunverulegum valkosti. Til að svo geti orðið er mikilvægt að skýrar reglur gildi um leigumarkaðinn, að leigjendur eigi sér málsvara og geti leitað réttar síns.

Framsýn telur því brýnt að komið verði á fót formlegri leiðbeininga- og kvörtunarþjónustu þar sem neyðarástand ríkir í húsnæðismálum. Ráðinn verði umboðmaður leigjenda er aðstoði fólk á leigumarkaði, svari fyrirspurnum þeirra um lagalegan rétt sinn og hafi milligöngu í deilumálum. Til þess að svo geti orðið er mikilvægt að opinbert fjármagn verði sett í málaflokkinn.

Höfum í huga að öruggt húsnæði er réttur manneskjunnar, en ekkert til að gambla með.“

Gleðifréttir fyrir félagsmenn Framsýnar. Nýja íbúðin sem félagið eignaðist í sumar í Þorrasölum í Kópavogi er komin í notkun. Búið er að mála hana og laga þannig að hún fór í leigu síðasta föstudag. Fyrir átti Framsýn þrjár íbúðir í fjölbýlishúsinu og Þingiðn eina. Til viðbótar má geta þess að Framsýn á eina íbúð í Asparfelli og Starfsmannafélag Húsavíkur á eina íbúð í Sólheimum. Gríðarleg ásókn er í íbúðirnar og því taldi Framsýn rétt að bæta við einni íbúð fyrir félagsmenn í Þorrasölum.

Nýja íbúðin í Þorrasölum er öll hin glæsilegasta.

 

 

Á fundi stjórnar og trúnaðarráðs Framsýnar á þriðjudaginn kom fram megn óánægja með ákvörðun VÍS að loka þjónustuskrifstofu tryggingafélagsins á Húsavík. Töldu fundarmenn þetta vera slæma þróun og verri þjónustu við viðskiptavini. Formaður Framsýnar upplýsti að starfsmenn tryggingafélagsins yrðu áfram við störf á Húsavík við stafræna þjónustu við viðskiptavini. Þrír starfsmenn hafa starfað hjá VÍS á Húsavík. Hann sagðist hafa fundað með starfsmönnum og farið yfir málið með þeim.

Þess má geta að VÍS tilkynnti í síðasta mánuði að ákveðið hafi verið að sameina þjónustuskrifstofur fyrirtækisins víðs vegar um landið í sex skrifstofur; á Selfossi, Egilsstöðum, Akureyri, Sauðárkróki, Ísafirði og Reykjavík. Skrifstofurnar voru áður þrettán. Á vef fyrirtækisins segir að þetta sé gert í samræmi við nýja framtíðar­sýn fyrirtækisins um að verða sta­f­rænt þjón­ustu­fyr­ir­tæki. Breyt­ing­arn­ar tóku gildi 1. októ­ber síðastliðinn.

Stjórn og trúnaðarráð Framsýnar hefur samþykkt að senda frá sér eftirfarandi yfirlýsingu vegna 43. þings Alþýðusambands Íslands sem haldið verður í Reykjavík 24. – 26. október nk.

„Fyrir liggur að Drífa Snædal og Sverrir Mar Albertsson hafa gefið kost á sér til forsetakjörs í Alþýðusambandi Íslands á þingi sambandsins sem fram fer í lok október.

Framsýn stéttarfélag hefur lengi barist fyrir breytingum innan Alþýðusambands Íslands með það að markmiði að efla starfsemi sambandsins í anda skoðana og vilja verkafólks í landinu. Liður í því er að breyta um forystusveit í Alþýðusambandi Íslands.

Til að ná þessum markmiðum fram hefur stjórn og trúnaðarráð Framsýnar stéttarfélags samþykkt að skora á Ragnar Þór Ingólfsson formann VR að gefa kost á sér sem fyrsti varaforseti ASÍ og Vilhjálm Birgisson formann Verkalýðsfélags Akraness til að gefa kost á sér sem annar forseti ASÍ.

VR og Verkalýðsfélag Akraness hafa líkt og Framsýn stéttarfélag talað fyrir róttækum breytingum í verkalýðshreyfingunni. Til viðbótar má geta þess að með breytingum á forystusveit Eflingar stéttarfélags hafa komið fram nýir straumar í anda þeirra stéttarfélaga sem talað hafa fyrir breytingum og endurspeglast m.a. í kröfugerð Starfsgreinasambands Íslands sem lögð var fram í vikunni. Metnaðarfull kröfugerð sem vakið hefur mikla athygli.

Framsýn stéttarfélag skorar á þingfulltrúa á 43. þingi Alþýðusambands Íslands að veita Ragnari Þór Ingólfssyni og Vilhjálmi Birgissyni gott brautargengi til starfa fyrir öflugustu verkalýðssamtök landsins, ASÍ.“

Framsýn vill sjá Vilhjálm Birgisson og Ragnar Þór Ingólfsson í forystusveit ASÍ eftir næsta þing sambandsins í lok október.

Starfsgreinasamband Íslands og Félag íslenskra félagsliða boðaði til fræðslufundar fyrir félagsliða af öllu landinu þann 20. september 2018. Um 40 félagsliðar mættu á fundinn frá almennu og opinberu félögunum, alls staðar af landinu. Tveir félagsmenn úr Framsýn voru á fundinum, þær Ósk Helgadóttir og Kristbjörg Sigurðardóttir. Að þessu sinni var lögð áhersla á hópastarf, hvernig félagsliðar geti styrkt sig félagslega og faglega auk þess að styrkja stöðu stéttarinnar út á við. Auk þess var kynning á framkvæmd kjaraviðræðna, hvers ber að vænta í vetur, kynning á Bjarkarhlíð, kynning á framhaldsnámi fyrir félagsliða og jákvæð sálfræði.

Fræðslufundur félagsliða er orðinn fastur liður í starfsemi Starfsgreinasambandsins og dæmi um náið og gott samstarf á milli stéttarfélaga á almenna markaðnum og hinum opinbera. Kröfur félagsliða eru þær sömu og undanfarin ár, að stéttin sé viðurkennd sem heilbrigðisstétt og fái löggildingu sem slík. Námið haldi áfram að þróast og störf félagsliða verði kynnt betur í samfélaginu.

Fulltrúar Framsýnar voru á ferðinni í dag og heimsóttu Fjallalamb á Kópaskeri. Þar var skrifað undir árlegt samkomulag við Fjallalamb vegna kaupa og kjöra í sláturtíð fyrirtækisins á Kópaskeri.
Það var ágætt hljóðið í starfsfólki Fjallalambs en sláturtíð er þar í fullum gangi en vika er enn eftir af sláturtíðinni. Rúmlega 30.000 gripum er slátrað í Fjallalambi nú í haust.
Talsverð spenna er vegna hugsanlegra viðskipta við Kína en eins og hefur verið fjallað um í fjölmiðlum upp á síðkastið. Reikna má með því að niðurstaða fáist úr þeim viðræðum á næstu vikum.
Eftir heimsóknina í Fjallalamb lá leiðin í Sel sf þar sem tekið var vel á móti Framsýnarmönnum eins og sjá má á eftirfarandi mynd. Var það mál manna að það gerist varla oftar en tvisvar sinnum á öld að önnur eins valmenni náist saman á mynd.

Samninganefnd Framsýnar kom saman til fundar kl. 17:00 í dag til að yfirfara drög að kröfugerð Starfsgreinasambands Íslands sem Framsýn á aðild að gagnvart Samtökum atvinnulífsins. Nefndin er skipuð tæplega 30 fulltrúum frá vinnustöðum á félagssvæði Framsýnar. Eftir góðar umræður voru drög að kröfugerð Starfsgreinasambandsins samþykkt samhljóða með lófaklappi. Kröfugerðin er í anda kröfugerðar Framsýnar sem tekin var til greina ásamt kröfugerðum annarra stéttarfélaga innan Starfsgreinasambandsins. Samræming fór fram á formannafundi/samninganefndarfundi Starfsgreinasambandsins sem haldinn var á Selfossi í síðustu viku. Til stendur að ganga endanlega frá kröfugerðinni á fundi samninganefndar SGS á morgun í Reykjavík. Ljóst er að kröfugerðin mun vekja töluverða athygli þegar hún verður lögð fram.
Rétt í þessu var samninganefndarfundi Framsýnar að ljúka. Kröfugerð Starfsgreinasambands Íslands var samþykkt með lófaklappi. Formaður Framsýnar mun fylgja eftir niðurstöðu fundarins á samninganefndarfundi SGS sem haldinn verður í Reykjavík á morgun.

Innan Starfsgreinasambands Íslands eru 19 aðildarfélög. Þau hafa nú öll veitt sambandinu samningsumboð og munu félögin því koma sameinuð að gerð kjarasamninga við Samtök atvinnulífsins, en núgildandi samningar renna út um áramótin. Um er að ræða sögulegan áfanga því þetta er í fyrsta skipti í sögu sambandsins sem öll aðildarfélögin framselja samningsumboðin til SGS vegna kjarasamninga á almennum vinnumarkaði.

Fulltrúar frá þessum 19 aðildarfélögum áttu tveggja daga vinnufund á Hótel Selfossi fyrir helgina þar sem félögin kynntu áherslur sínar og í framhaldinu voru unnin drög að nýrri að sameiginlegri kröfugerð sem gengið verður frá á morgun í Reykjavík. kröfugerð SGS verður tekin til umræðu á fundi samninganefndar Framsýnar síðar í dag. Ljóst er að hún mun vekja mikla athygli þegar hún kemur fram. Slík kröfugerð hefur ekki sést áður enda telja stéttarfélögin innan SGS að atvinnurekendur og stjórnvöld skuldi verkafólki í landinu verulegar leiðréttingar.

Mikil vinna fór fram á vegum SGS við mótun kröfugerðarinnar. Hér sitja nokkrir formenn innan sambandsins yfir drögum að kröfugerð sambandsins.

Aðalsteinn Árni formaður Framsýnar fagnar samstöðu aðildarfélaga SGS. Þetta hafi lengi verið hans draumur, það er að félögin færu sameinuð í viðræður við Samtök atvinnulífsins. Hann sagði þó vinnuna við kröfugerðina ekki vera búna. Vonandi tækist að sigla samstöðunni í höfn, það væri sterkasta vopnið í baráttunni fyrir bættum kjörum verkafólks. Þá hefði hann einnig verið þeirrar skoðunar að Landssamband íslenskra verslunarmanna ætti að koma að borðinu með Starfsgreinasambandinu. Án efa yrði slagkraftur í slíku bandalagi verkafólki til hagsbóta.

 

Eins og fjallað hefur verið um á heimasíðu stéttarfélaganna gerðu fulltrúar frá Framsýn sér ferð til Póllands á dögunum til að kynna sér málefni verkalýðshreyfingarinnar í Póllandi auk þess að nota ferðina til að funda með forsvarsmönnum Solidarność um samstarf félaganna. Móttökur Solidarność voru hreint út sagt frábærar og eftir vinsamlegar samræður handsöluðu formenn Framsýnar og Solidarność samkomulag þess efnis að félögin skiptist á upplýsingum sín á milli er tengist verkalýðsmálum og réttindum verkafólks í löndunum tveimur. Forsvarsmenn Solidarność telja sig geta lært töluvert á uppbyggingu verkalýðshreyfingarinnar á Íslandi auk þess að kynna sér hvernig Íslendingar hafa tekist á við þann mikla fjölda erlendra starfsmanna sem komið hafa til starfa á Íslandi. Pólverjar eru að glíma við svipaðan vanda og við Íslendingar. Meðan Pólverjar yfirgefa landið í leit að betra lífi og atvinnu sem gefur þeim mun hærri laun en í Póllandi leita Úkraínumenn og önnur þjóðarbrot sem búa við léleg kjör til Póllands í atvinnuleit. Vandi Íslendinga og Pólverja er því svipaður er varðar að gæta hagsmuna þessa hóps. Framsýn lagði sérstaka áherslu á að fá aðstoð Solidarność við að afla upplýsinga um verktaka sem hafa verið að koma til Íslands með starfsmenn. Því miður er oft um að ræða fyrirtæki sem gera í því að snuða starfsfólk. Þá leikur grunur á um að pólskir starfsmenn hafi verið að framvísa fölsuðum vottorðum til Framsýnar sem félagið er með til skoðunar, það er til þess að fá styrki úr sjúkrasjóði félagsins. Framsýn tók málið upp við Solidarność sem gáfu fulltrúum Framsýnar góðar upplýsingar og ráð hvað það varðar.

Formaður Framsýnar, Aðalsteinn Árni Baldursson og Krzysztof Dosla forseti Solidarność í Gdansk handsöluðu samkomulag um samstarf verkalýðsfélaganna. Við það tækifæri tók Krzysztof Dosla fram að hann væri mjög áhugasamur um samstarfið. Formaður Framsýnar svaraði því til að fulltrúar Solidarność væru alltaf velkomnir í heimsókn til Framsýnar.

Að sjálfögðu fékk Solidarność gjöf frá Framsýn, það er mynd af Húsavík og fána félagsins.

Gengið var frá samkomulagi verkalýðsfélaganna inn á skrifstofu forseta Solidarność.

 

 

 

Samninganefnd Framsýnar sem jafnframt er stjórn og trúnaðarráð Framsýnar hefur verið boðuð saman til fundar á morgun, þriðjudag 9. október kl. 17:00 til að fara yfir drög að kröfugerð Starfsgreinasambands Íslands sem Framsýn á aðild að. Fulltrúar frá Framsýn UNG hafa einnig verið boðaðir á fundinn til að taka þátt í afgreiðslu kröfugerðarinnar. Um 30 manns hafa rétt til setu á fundinum frá öllum helstu vinnustöðum á félagssvæði Framsýnar. Ljóst er að kröfugerðin á eftir að vekja mikla athygli enda byggir hún sérstaklega á framfærsluþörf fólks til að geta framfleytt sér. Þá er ekki ólíklegt að ofurhækkanir elítunar í þjóðfélaginu síðustu ára hafi áhrif á endanlega kröfugerð sem tekin verður fyrir á fundi samninganefndar SGS á miðvikudaginn, það er eftir að aðildarfélög sambandsins hafa fjallað um þær í sínum félögum. Hér að neðan má sjá dagskrá fundarins sem er löng og ströng.

Dagskrá:

1. Fundargerð síðasta fundar
2. Inntaka nýrra félaga
3. Kröfugerð SGS
4. Samningsumboð LÍV
5. Þing ASÍ- málefni þingsins og forsetakjör
6. Þing ASÍ- val á fulltrúum Framsýnar
7. Val SGS á fulltrúum í miðstjórn og varamiðstjórn ASÍ
8. Þing SSÍ
9. PCC BakkiSilicon: Kjaramál og vinnuumhverfi starfsmanna
10. Póllandsferð félagsins
11. Samkomulag við Flugfélagið Erni
12. Nýja Íbúð félagsins í Þorrasölum/afsal-leiga
13. Lagfæringar á bústaði félagsins á Illugastöðum
14. Húsnæðismál á Akureyri
15. VÍS- uppsögn á leiguhúsnæði
16. Þing og starfsemi ASÍ-UNG
17. Kjör á trúnaðarmanni hjá Sjóböðunum
18. Bók: Ævisaga Einars Olgeirssonar
19. Bók: Atvinnuhættir og menning
20. Fulltrúaráðsfundur AN á Illugastöðum
21. Erindi frá félagsmanni
22. Önnur mál

Hrútadagurinn 2018 var haldinn hátíðlegur í Faxahöllinni á Raufarhöfn á laugardaginn. Að venju var boðið upp á fjölbreytta og skemmtilega dagskrá fyrir alla fjölskylduna. Fjölmenni var á staðnum og tæplega 20 hrútar skiptu um eigendur enda margir góðir hrútar til sölu á hrútadeginum. Einn hrútur seldist á kr. 153.000. Í því sambandi má geta þess að almennt verð fyrir lambhrút er um kr. 30.000,-. Hér fylgja með nokkrar myndir frá hrútadeginum en formaður Framsýnar var fenginn til að bjóða upp hrútana á hrútadeginum. enda vanur samningamaður.

Á dögunum sýndi Ríkissjónvarpið þátt af fréttaskýringaþættinum Kveik þar sem farið var yfir stöðuna á vinnumarkaðnum í dag með sérstaka áherslu á þau brot atvinnurekanda sem eru allt of algeng á landinu og hvernig megi sporna við slíkum brotum. Sérstaklega var rætt um málefni starfsmannaleiga. Mikil umræða hefur átt sér stað í þjóðfélaginu í kjölfar þáttarins. Kemur sú umræða beint ofan í þær kjaraviðræður sem fyrir liggja á næstu vikum og því málefni vinnumarkaðarins mjög í brennidepli þessa dagana.
Formaður Framsýnar var í viðtali í þættinum „Í bítið‟ í kjölfar þáttarins þar sem farið var yfir efni þáttarins og hans sjónarmið á þessi mál.

Hægt er að hlusta á viðtalið hér.

Félagar úr stjórn og trúnaðarráði Framsýnar auk starfsmanna félagsins fóru í náms- og kynnisferð til Póllands í síðustu viku. Tilgangurinn var að heimsækja Solidarnosc í Gedansk og fræðast um uppbyggingu verkalýðshreyfingarinnar og atvinnulífs í Póllandi. Til að gera langa sögu stutta voru móttökurnar frábærar. Solidarnosc skipulagði tveggja daga stranga dagskrá þar sem gestunum frá Íslandi var gert grein fyrir kjarasamningagerð, starfsmenntamálum og samstarfi verkalýðshreyfingarinnar, atvinnurekenda og stjórnvalda að málefnum er snerta vinnumarkaðinn í Póllandi. Auk þess var farið með gestina í heimsóknir í tvær skipasmíðastöðvar í Gdansk og á söfn tengd sögu Solidarnosc og stríðinu en seinni heimstyrjöldin byrjaði í Gdansk með áras Þjóðverja á borgina. Alls fóru 16 einstaklingar frá Framsýn í ferðina á eigin vegum.

Andrzej Matla er hér með formanni Framsýnar. Andrzej sér um erlend samskipti fyrir Solidarnosc í Gedansk. Hann skipulagði ferð Framsýnar til Póllands er viðkemur Solidarnosc.

Mirosslaw Piórek sem er einn af æðstu mönnum Solidarnosc flutti fróðlegt erindi um stöðuna á pólskum vinnumarkaði. Til hliðar má sjá Agnieszku Szczodrowska sem túlkaði fyrir hópinn.

Jóna og María fylgjast með erindi Mirosslaw Piórek.

Krzysztof Dosla forseti Solidarnosc í Gdansk sagði frá verkalýðssamtökunum og uppbyggingu þeirra í Póllandi. Hann var einnig áhugasamur um samstarf við Framsýn að málefnum pólskra verkamanna og kvenna sem kæmu til starfa á Íslandi.

Miklar og góðar umræður urðu undir fyrirlestri forseta Solidarnosc.

Robert Szewczyk kemur að samskiptum Solidarnosc við erlend verkalýðssamtök. Hann fór yfir mál er tengjast verkefnum sem þeir hafa verið að vinna að og tengjast þeim mikla fjölda Pólverja sem hafa yfirgefið landið í atvinnuleit, þar á meðal til Íslands. Á móti er mikil ásókn erlends verkafólks að koma til Póllands að vinna, sérstaklega frá Úkrarínu.

Töluvert er um vinnustaðasamninga í Póllandi. Einn af þeim er í skipasmíðastöðinni, REMONTOWA, sem er í Gdansk. Þangað var fulltrúum Framsýnar boðið í heimsókn þar sem forsvarsmaður Solidarnosc í skipasmíðastöðinni gerði grein fyrir honum. Sjá má Jónas Kristjánsson formann Þingiðnar einnig á myndinni.

Eftir fyrirlestur um uppbyggingu vinnustaðasamninga í Póllandi var gestunum boðað skoða skipasmíðastöðuna auk þess öllum var boðið í hádegisverð. Robert Szewczyk og Zakrzewski Stefan sáu um að fræða gestina um starfsemi REMONTOWA sem er stærsta skipasmíðastöð í Evrópu. Frábærar móttökur.

Andrzej Matla bauð í nafni Solidarnosc gestunum frá Íslandi í sögusafn verkalýðssamtakana í Gdansk. Virkilega áhugavert safn sem allir eiga að skoða sem leið eiga um þessa fallegu borg.

Sem betur höfum við Íslendingar ekki þurft að þola sömu þjáningar og Póllverjar þegar kemur að stríði. Sagan er á hverju strái í Gdansk enda hófst síðari heimstyrjöldin í borginni með innrás Þjóðverja. Nýlega var opnað stórt og mikið safn í borginni sem er ætlað að segja söguna. Átakanlegt safn svo ekki sé meira sagt. Gestunum úr Þingeyjarsýslum var boðið að skoða safnið.

Að sjálfsögðu versluðu menn sér minjagripi. Hér er Þórir Stefánsson í nýjum bol með nafni Solidarnosc. Við munum fjalla frekar um heimsóknina eftir næstu helgi.

Lög númer 42/2010 um vinnustaðaskírteini og eftirlit á vinnustöðum hafa verið uppfærð. Helstu tíðindi eftir breytingu að nú er hægt að beita atvinnurekanda hærri dagsektum en áður. Áður var heimildin allt að 100.000 krónur en hefur nú hækkað í 1.000.000 krónur. Til þessa sektar getur komið til dæmis ef eftirlitsfulltrúa er neitað um aðgengi að vinnustöðum. Einnig er hægt að beita sektum til dæmis ef starfsmenn eru ekki með vinnustaðaskírteini.
Þessar heimildir sýna ágætlega alvarleika málsins og því mikilvægt að atvinnurekendur séu vel með á nótunum um innihald laganna og jafnframt taki á móti eftirlitsaðilum þegar þeir eru á ferðinni.
Hér má nálgast lögin.

Félögum í Framsýn er velkomið að koma við á skrifstofu stéttarfélaganna og fá sér félagshúfu fyrir veturinn. Starfsmenn taka vel á móti félagsmönnum.

Undanfarna mánuði hefur Framsýn stéttarfélag unnið að mótun kröfugerðar sem innlegg inn í sameiginlega kröfugerð Starfsgreinasambands Íslands og Landssambands Íslenskra verslunarmanna. Framsýn hefur þegar veitt þessum tveimur samböndum sem félagið á aðild að samningsumboð fh. félagsins.

Mótun kröfugerðar fór þannig fram að farið var í kannanir meðal félagsmanna, vinnustaðaheimsóknir og þá voru haldnir tveir félagsfundir fyrir íslensku- og enskumælandi félagsmenn.

Framsýn gerir sér fulla grein fyrir því að stjórnvöld verði að liðka fyrir samningunum með aðkomu er varðar velferðar- og skattamál.

Tillögum Framsýnar hefur verið komið á framfæri við samninganefnd Starfsgreinasambands Íslands sem kemur saman í byrjun október til að móta endanlega kröfugerð sambandsins gagnvart Samtökum atvinnulífsins, það er þegar kröfur og samningsumboð aðildarfélaganna liggja fyrir.

Helstu atriði kröfugerðarinnar gagnvart Samtökum atvinnulífsins eru:

• • Lágmarkslaun verði kr. 375.000 á mánuði mv. full starf.
  • Gildistími kjarasamningsins verði frá 1. janúar 2019 þegar núgildandi kjarasamningur rennur út. Lengd samningsins fari eftir innihaldi hans.
  • Samið verði um krónutöluhækkanir
  • Samið verði um nýja launatöflu þar sem núverandi tafla er löngu úrelt. Það er að ákveðið hlutfall sé milli flokka, þrepa og starfsaldurs.
  • Laun ungmenna verði með sambærilegum hætti og var fyrir undirskrift síðustu kjarasamninga. Það er að miðað verði við 18 ára aldur m.v. launataxta viðkomandi en ekki 20 ára aldur. Í þessu sambandi þarf að taka mið af lögum nr. 86 frá 25. júní 2018. „Lög um jafna meðferð á vinnumarkaði.“
  • Samið verði um styttingu vinnuvikunnar gegn sömu launum.
  • Orlofsréttur færist óskertur milli atvinnurekenda, tekin verði upp lífaldurstenging líkt og er hjá sveitarfélögunum.
  • Starfsmenntun og ábyrgð í starfi verði almennt metin til hærri launa.
  • 80% vaktavinna teljist full vinna.
• Aðkoma stjórnvalda að kjarasamningunum:

• • Í ljósi þess að skattbyrði hefur aukist mest hjá lágtekjufólki er eðlilegt að verkalýðshreyfingin krefjist þess að ríkstjórnin komi til móts við þennan hóp með skattkerfisbreytingum. Fjölgun skattþrepa eða sérstök hækkun á persónuafslætti þeirra sem eru á lágmarkslaunum verði skoðað.
  • Íbúðafélagið Bjarg þarf að virka fyrir alla, burt séð frá búsettu. Mikilvægt er að farið verði í sértækar aðgerðir til að bæta úr húsnæðisvanda fólks á landsbyggðinni, á svokölluðum köldum svæðum.
  • Tekjutengingar bóta frá TR vegna lífeyrissjóðsgreiðsla einstaklinga frá lífeyrissjóðum verði teknar til endurskoðunar. Núverandi kerfi er ekki síst óréttlátt fyrir lágtekjufólk.
  • Þátttaka ríkisins í kostnaði fólks í dreifbýlinu sem gert er að sækja þjónustu fjarri heimabyggð vegna hagræðingar hjá ríkisstofnunum verði aukin s.s. í heilbrigðisþjónustu.
• Málefni öryrkja og eldri félagsmanna:
• Verkalýðshreyfingin horfi til stöðu öryrkja og aldraðra með það að markmiði að þeim verði tryggðar sambærilegar hækkanir og verða á almenna vinnumarkaðinum. Þessari kröfu þarf að koma skýrt á framfæri við stjórnvöld komi til þess að þeir gefi út yfirlýsingu um beina aðkomu þeirra að kjarasamningsgerðinni.

 

VÍS hefur ákveðið að loka samanlagt átta skrifstofum í kjölfar endurskipulagningar fyrirtækisins þar sem aukin áherslu verður lögð á á einfaldara fyrirkomulag þjónustu og stafrænar lausnir. Tilkynnt var um skipulagsbreytingarnar fyrir helgina.

Af þeim átta skrifstofum á landsvísu sem verður lokað verða sex sameinaðar öðrum, en tveimur alveg lokað. Samkvæmt upplýsingum frá VÍS sem komið hafa fram í fjölmiðlum hefur þremur starfsmönnum verið sagt upp í kjölfar skipulagsbreytinganna auk þess sem þrettán verktakasamningum var sagt upp. Breytingarnar taka gildi 1. október næstkomandi og verða sameinaðar þjónustuskrifstofur staðsettar á Selfossi, Egilsstöðum, Akureyri, Sauðárkróki, Ísafirði og Reykjavík.

Skrifstofan á Húsavík sameinast skrifstofu VÍS á Akureyri

Fyrir liggur að skrifstofa VÍS á Húsavík verður sameinuð skrifstofu VÍS á Akureyri. Skrifstofur á Akranesi, Borgarnesi og Keflavík sameinast skrifstofu í Reykjavík. Skrifstofa á Reyðarfirði sameinast Egilsstöðum og sameinast skrifstofa á Hvolsvelli skrifstofu á Selfossi. Ekki er annað vitað en að starfsmönnum VÍS á Húsavík verði boðinn áframhaldandi vinna hjá tryggingafélaginu við starfræna þjónustu en í dag starfa þrír starfsmenn hjá félaginu.

Að sögn formanns Framsýnar, Aðalsteins Árna Baldurssonar, hefði hann viljað sjá VÍS halda uppi sambærilegri þjónustu á Húsavík og verið hefur enda mikill mannauður til staðar hjá tryggingafélaginu á Húsavík. Greinilegt sé að viðskiptavinir séu ekki sáttir við ákvörðun félagsins að loka þjónustuskrifstofunni á Húsavík. Þá vilji hann senda þau skilaboð til stjórnenda VÍS að þeir noti tækifærið, gangi skipulagsbreytingar eftir, og efli starfræna þjónustu við viðskiptavini VÍS á landsvísu með því að horfa til Húsavíkur með aukna þjónustu á því sviði.

 

5. þing ASÍ-UNG var haldið á Hótel Natura Reykjavík síðastliðinn föstudag. Einn af hápunktum þingsins var málþing um hlutverk stéttarfélaga og þær áherslur sem ungt fólk vill sjá í komandi kjarasamningum. Kristján Þórður Snæbjarnarson, formaður Rafiðnaðarsambandsins, Ragnar Þór Ingólfsson, formaður VR og Sólveig Anna Jónsdóttir, formaður Eflingar, fluttu erindi og tóku svo þátt í pallborðsumræðum ásamt tveimur stjórnarmönnum ASÍ-UNG, þeim Eiríki Þór Theódórssyni og Hafdísi Ernu Ásbjarnardóttur. Miklar umræður sköpuðust varðandi stöðu ungs fólks á vinnumarkaði og er ljóst að fulltrúum finnst að víða megi gera betur til að styrkja stöðu þessa hóps.

Ný stjórn var kosin til starfa þar sem lögð var áhersla á jafna skiptingu út frá kyni, búsetu og félögum. Sjö af níu stjórnarmönnum koma úr röðum aðildarfélaga Starfsgreinasambandsins. Þessu er sambandið afar stolt af og ánægjulegt er að sjá unga og krafmikla einstaklinga bjóða fram krafta sína á þessum vettvangi. Ljóst er að ungliðafundir SGS sem haldnir hafa verið árlega frá árinu 2016 hafa skilað auknum áhuga hjá ungum félagsmönnum.

Nýja stjórn ASÍ-UNG skipa:

Aðalstjórn:
Alma Pálmadóttir, Efling
Gundega Jaunlina, Hlíf
Karen Birna Ómarsdóttir, Aldan
Margret Júlía Óladóttir, FVSA
Eiríkur Þór Theodórsson, Stétt Vest
Sindri Már Smárason, Afl
Ástþór Jón Tryggvason, VLFS
Aðalbjörn Jóhannsson, Framsýn
Margrét Arnarsdóttir, FÍR

Varastjórn:
Kristinn Örn Arnarson, Efling
Ólafur Ólafsson, Eining Iðja
Hafdís Erna Ásbjarnardóttir, Einingu Iðja
Birkir Snær Guðjónsson, Afl
Elín Ósk Sigurðardóttir, Stétt Vest

Stjórnin skiptir með sér verkum og kaus sér formann varaformann og ritara.
Formaður ASÍ-UNG er Aðalbjörn Jóhannsson.
Varaformaður er Eiríkur Þór Theodórsson.
Ritari er Alma Pálmadóttir.

 

 

 

 

Helstu hlutverk ASÍ-UNG eru að kynna ungu fólki á vinnumarkaði réttindi þess og skyldur og starfsemi stéttarfélaganna. ASÍ-UNG er málsvari ungs fólks innan verkalýðshreyfingarinnar sem og út á við. Jafnframt að tryggja að rödd unga fólksins heyrist í starfi og stefnumótun stéttarfélaganna.

Þess má geta að fjórir fulltrúar frá Framsýn sátu þingið. Það er Guðmunda, Heiða og Ásrún. Þar sem Aðalbjörn Jóhannsson var stjórnarmaður í ASÍ-UNG átti hann einnig seturétt á þinginu en hann starfar hjá Sjóböðunum á Húsavík. Ljóst er að ungliðastarf Framsýnar er að skila góðum árangri.

Fjárlagafrumvarp ríkisstjórnar Katrínar Jakobsdóttur gefur ekki tilefni til mikillar bjartsýni í þeim kjaraviðræðum sem í hönd fara, þrátt fyrir yfirlýsingar stjórnvalda í samskiptum við verkalýðshreyfinguna um aukna áherslu á félagslegan stöðugleika.

ASÍ hefur undanfarin ár gagnrýnt stjórnvöld harðlega fyrir að þyngja skattbyrði þeirra tekjulægstu stöðugt á sama tíma og þeir tekjuhærri hafa notið skattalækkana. Í fjárlagafrumvarpinu fyrir næsta ár er reyndar skorið á sjálfvirka skattalækkun hinna ríkari, sem er jákvætt, en það er hins vegar dapurlegt að ríkisstjórnin ríghaldi í það fyrirkomulag að þyngja skattbyrði þeirra verst settu með sjálfvirkum hætti. Verkalýðshreyfingin mun ekki horfa aðgerðarlaus á þessa þróun.

Húsnæðis- og vaxtabætur eru áfram skertar þrátt fyrir þá alvarlegu stöðu sem er á húsnæðismarkaði, sem bitnar verst á þeim sem hafa minnst handa á milli. Það er ánægjulegt að barnabætur hækka skv. frumvarpinu, en á sama tíma er aukið við tekjutengingu á millitekjufólk og jaðarskattar þess hækkaðir með auknum skerðingum. Það eru kaldar kveðjur ríkisstjórnarinnar til ungs fólks sem vill stofna fjölskyldu, koma sér þaki yfir höfuðið og eignast börn.

ASÍ hefur lengi vakið athygli stjórnvalda á því, að þeir sem eru með minnsta menntun eru líklegir til að missa fyrstir vinnuna í fjórðu iðnbyltingunni sem nú bankar á dyrnar. Í fjárlagafrumvarpi ríkisstjórnarinnar sér þess engan stað að til standi styðja og styrkja lágtekjufólk svo það fái annað tækifæri til náms, þrátt fyrir mikla umræðu í samráðsferli vinnumarkaðarins við stjórnvöld undanfarna mánuði. Þannig er Fræðslusjóður enn einu sinni sveltur. Kinnroðalaust stillir ríkisstjórnin láglaunafólki með litla menntun í fremstu víglínu andspænis þeim breytingum sem eru yfirvofandi á vinnumarkaði. Hún skilar auðu.

Það má finna ýmislegt jákvætt í fjárlagafrumvarpi ríkisstjórnarinnar, eins og aukið fé til réttinda launafólks í vinnumarkaðssjóðunum og ýmsa þætti heilbrigðiskerfisins o.fl., en þau atriði sem hér er drepið á eru ekki sæmandi samfélagi sem vill láta kenna sig við velferð og jöfnuð.

 

 

Félagsfundur Framsýnar sem haldinn var síðasta þriðjudag, 18. september, samþykkti að veita Starfsgreinasambandi Íslands umboð til samningagerðar fyrir hönd félagsins vegna kjarasamninga sem félagið á aðild að og losna 31. desember 2018. Um er að ræða kjarasamninga sem Framsýn á aðild að í gegnum Starfsgreinasamband Íslands gagnvart Samtökum atvinnulífsins. Umboðið nær ekki til sérkjarasamnings Framsýnar stéttarfélags og Samtaka atvinnulífsins vegna PCC BakkiSilikon hf.

Þá samþykkti félagsfundurinn einnig að veita Landssambandi íslenskra verslunarmanna samningsumboð vegna kjarasamnings sambandsins og Samtaka atvinnulífsins sem Framsýn á aðild að.

Framsýn áskilur sér rétt til að afturkalla samningsumboðið telji samninganefnd félagsins ástæðu til þess.

Eins og fram kemur í ályktun fundarins sem fjallað var um á heimasíðunni í gær lögðu fundarmenn mikið upp úr góðu samstarfi við VR í komandi kjaraviðræðum við Samtök atvinnulífsins. Þess má geta að formenn VR og Framsýnar hafa ákveðið að hittast í dag og skoða möguleikana á samstarfi í komandi viðræðum við atvinnurekendur.

Formenn VR og Framsýnar munu hittast í Reykjavík í dag og skoða möguleika á samstarfi í komandi kjaraviðræðum við Samtök atvinnulífsins.