kuti

Það verður mikið fjör í Íþróttahöllinni á Húsavík 1. maí. Að venju bjóða stéttarfélögin upp á veglega dagskrá. Baráttukonan Ásdís Skúladóttir leikstjóri og einn stofnenda Gráa hersins flytur hátíðarræðu dagsins, enda dagurinn tileinkaður baráttu eldri borgara. Söngfélagið Sálubót syngur nokkur lög undir stjórn Jaan Alavere. Eyþór Ingi og Guðni Ágústsson sjá um grín og gamanmál og að sjálfsöðu mun Eyþór Ingi einnig taka nokkur lög ásamt meðlimum úr Stjórninni, þeim Siggu Beinteins og Gretari Örvarssyni.

Hátíðardagskrá 1. maí 2019
Að venju standa stéttarfélögin í Þingeyjarsýslum fyrir veglegri hátíðardagskrá í Íþróttahöllinni á Húsavík 1. maí 2019 kl. 14:00.

Dagskrá: 

Ávarp: Aðalsteinn Árni Baldursson formaður Framsýnar stéttarfélags

Hátíðarræða: Ásdís Skúladóttir leikstjóri og einn stofnenda Gráa hersins.

Söngur og tónlist: Söngfélagið Sálubót ásamt hljómsveit taka nokkur lög. Stjórnandi Jaan Alavere

Söngur og grín: Eyþór Ingi Gunnlaugsson eftirherma og einn af fremstu söngvurum landsins tendrar fram fallegan söng auk þess að herma eftir þjóðþekktu fólki.

Grín: Guðni Ágústsson er einn heitasti grínistinn um þessar mundir. Hann verður á svæðinu í sínu besta formi.

Söngur: Grétar Örvarsson og Sigríður Beinteinsdóttir úr Stjórninni spila og syngja þekkt dægurlög.

Meðan á hátíðarhöldunum stendur verður gestum boðið upp á kaffi og meðlæti í boði stéttarfélaganna.

Þingeyingar og landsmenn allir, fjölmennum í höllina og drögum fána að hún á hátíðar- og baráttudegi verkafólks 1. maí 2019. Í ár verða hátíðarhöldin á Húsavík tileinkuð baráttu eldri borgara fyrir bættum kjörum og jöfnuði í þjóðfélaginu. Hver vill ekki lifa áhyggjulausu æfikvöldi?

Framsýn, stéttarfélag – Starfsmannafélag Húsavíkur – Þingiðn, félag iðnaðarmanna

 

Ágætu félagar og landsmenn allir, stéttarfélögin í Þingeyjarsýslum senda ykkur kveðjur um gleðilegt sumar, megi það verða okkur gjöfult og gott í alla staði.

Steingrímur J. Sigfússon forseti Alþingis leit við á skrifstofu stéttarfélaganna í dag og tók stöðuna með starfsmönnum skrifstofunnar. Eðlilega voru þjóðmálin og nýgerðir kjarasamningar til umræðu.

Hér má lesa minningargrein eftir formann Framsýnar, Aðalstein Árna Baldursson um Kristján Ásgeirsson – F. 26. júlí 1932 – D. 12. apríl 2019. Kristján hafði lengi afskipti af störfum Verkalýðsfélags Húsavíkur sem nú ber nafnið, Framsýn stéttarfélag. Kristján verður jarðsunginn frá Húsavíkurkirkju í dag:

Góður félagi og vinur er fallinn frá. Verkalýðsforingi, félagsmálamaður, bæjarfulltrúi, útgerðarmaður, en fyrst og fremst góður og gegnheill maður sem vildi öllum vel. Kristján Ásgeirsson, eða Kiddi Ásgeirs eins og hann var ávallt kallaður kom lengi að störfum fyrir Verkalýðsfélag Húsavíkur, sem stjórnarmaður, formaður og varaformaður. Reyndar má segja að Kiddi hafi drukkið í sig áhugann fyrir verkalýðsbaráttu með móðurmjólkinni. Þegar saga verkalýðsbaráttu á Húsavík er sögð koma ættir Kidda fyrir, allt frá stofnun fyrstu verkalýðsfélaga á Húsavík þar til hann ákvað að stíga til hliðar árið 1992, eftir 27 ára farsælt starf í þágu Verkalýðsfélags Húsavíkur. Föðuramma Kidda, Þuríður Björnsdóttir, var fyrsti formaður Verkakvennafélagsins Vonar og Ásgeir Kristjánsson faðir hans var lengi formaður Verkamannafélags Húsavíkur.

Kiddi kynntist ungur atvinnuleysi og þeirri staðreynd að þorpið við Skjálfanda tæmdist reglulega á haustin þegar ungir menn leituðu suður á vertíðir, þar sem almennt var ekki gert út frá Húsavík yfir vetrarmánuðina. Honum var því mjög umhugað um að efla atvinnulífið á Húsavík, vissi að örugg atvinna væri forsenda alls. Hann beitti sér fyrir því innan bæjarstjórnarinnar og Verkalýðsfélags Húsavíkur að ráðist yrði í kaup á togara til að draga úr atvinnuleysinu í bænum og efla þar með Húsavík sem útgerðarbæ. Það var ekki síst vegna þrautseigju Kidda og annarra sem lögðust á árarnar með honum innan bæjarstjórnar og öflugustu fyrirtækjanna á svæðinu, að grunnur var lagður að togaraútgerð frá Húsavík með kaupum á Júlíusi Havsteen ÞH 1 sem kom til heimahafnar haustið 1976.

Kiddi mótaði einnig starf Verkalýðsfélags Húsavíkur, enda kom hann lengi að stjórn félagsins með góðu og samhentu fólki. Hann kom að því að opna fyrstu skrifstofuna fyrir verkalýðsfélagið í Félagsheimili Húsavíkur árið 1971. Áður hafði fólk lagt leið sína heim til hans til að leita aðstoðar er viðkom verkalýðs- og velferðarmálum, en Kiddi tók öllum vel og opnaði heimili sitt fyrir þeim sem á þurftu að halda.

Á þessum tíma var Kiddi kominn í mjög sérstaka stöðu, þar sem hann var formaður í verkalýðsfélagi, bæjarfulltrúi og framkvæmdastjóri Höfða hf. sem stofnað var um rekstur Júlíusar Havsteen. Þessi tengsl vöktu eðlilega upp margar spurningar á þeim tíma og voru ekki óumdeilanlegar. Hann var sagður sitja hringinn í kringum borðið. Ekki var vilji meðal félagsmanna til þess að Kiddi hætti afskiptum af Verkalýðsfélagi Húsavíkur, enda alltaf verið góður og gegn málsvari þeirra sem minna máttu sín og skilað góðu starfi fyrir félagið. Þess í stað ákvað hann að stíga til hliðar sem formaður, en taka að sér varaformennsku í félaginu. Kiddi sagði þetta ekkert mál, menn mættu bara aldrei gleyma uppruna sínum og fyrir hvað þeir stæðu. Orðin sem hann mælti eitt sinn í útvarpsviðtali lýsa manngerð Kristjáns Ásgeirssonar kannski best: „ Ég hef sem betur fer alltaf verið í þeirri stöðu að geta talað frá hjartanu og hef aldrei haft verulegar áhyggjur af eigin heilsu. En aftur á móti hef ég verið voðalega viðkvæmur andspænis veikindum annarra“.

Því hefur verið haldið fram að kjör félagsmanna Verkalýðsfélags Húsavíkur hafi almennt verið betri en hjá sambærilegum stéttarfélögum á þessum tíma. Það hafi ekki síst verið Kristjáni Ásgeirssyni að þakka, enda hafði hann góða yfirsýn yfir málin og lagði ríka áherslu á atvinnuöryggi, góð laun og félagslega hugsun í rekstri fyrirtækja.

Kiddi var virtur fyrir störf sín að verkalýðsmálum. Hann þótti mikill málafylgjumaður og var einlægur baráttumaður fyrir ýmsum mikilvægum réttindamálum sem þykja sjálfsögð í dag, s.s. atvinnuleysistryggingum, stofnun lífeyrissjóða og að félagsmenn stéttarfélaga hefðu aðgengi að öflugum sjúkrasjóðum í alvarlegum veikindum. Fyrir þessu barðist Kiddi ekki eingöngu innan Verkalýðsfélags Húsavíkur, heldur gegndi hann lengi trúnaðarstörfum fyrir verkalýðshreyfinguna á landsvísu, sem áhrifamaður innan Verkamannasambandsins og Alþýðusambands Íslands. Auk þess sat hann í stjórn Lífeyrissjóðsins Bjargar um árabil.

Það fór því vel á því að baráttumaðurinn Kristján Ásgeirsson væri hylltur fyrir vel unnin störf í þágu verkafólks og samfélagsins alls, en á 95 ára afmæli Verkalýðsfélags Húsavíkur var hann gerður að heiðursfélaga þess. Athöfnin fór fram þann 1. maí 2006 á baráttudegi verkafólks, en stéttarfélögin í Þingeyjarsýslum stóðu fyrir hátíðardagskrá í Félagsheimili Húsavíkur.

Fyrir mig sem ungan og róttækan mann voru mikil forréttindi að fá að kynnast Kidda og hans lífsskoðunum. Enda fór það svo að ég fylgdi honum í gegnum þau ár sem hann gaf kost á sér til áhrifa í bæjarstjórn Húsavíkur, sat með honum í stjórn verkalýðsfélagsins um tíma auk þess að fara með honum á fyrsta þingið sem ég tók þátt í á vegum Verkamannasambands Íslands, sem haldið var í Vestmannaeyjum árið 1988. Verkalýðsfélag Húsavíkur átti rétt á tveimur fulltrúum. Til stóð að Helgi Bjarnason formaður verkalýðsfélagsins færi með Kidda en hann forfallaðist á síðustu stundu og var ég kallaður inn sem varamaður. Það var mikil lífsreynsla fyrir ungan fiskvinnslumann frá Húsavík að fara á þingið með Kidda og upplifa hvernig þing sem þessi færu fram.

Það var einnig mikill heiður þegar Kiddi og Helgi Bjarnason komu að máli við okkur Kára Arnór Kárason árið 1992 og lögðu að okkur að taka við Verkalýðsfélagi Húsavíkur, enda væri stuðningur við það innan félagsins. Það væri kominn tími á breytingar. Við tókum slaginn, Kári tók við af Helga sem formaður og ég tók við keflinu frá Kidda sem varaformaður. Vissulega stór stund sem gefið hefur mér mikið frá upphafi til dagsins í dag. Hafðu kærar þakkir fyrir það Kristján Ásgeirsson, það er ekki sjálfgefið að fá tækifæri til að sameina áhugamál og vinnu.

Fyrir mína hönd og Framsýnar stéttarfélags votta ég fjölskyldu Kristjáns Ásgeirssonar dýpstu samúð. Við minnumst látins félaga með miklu þakklæti fyrir hans óeigingjörnu störf í þágu verkafólks í Þingeyjarsýslum. Megi minning um góðan mann lifa um ókomna tíð.

Aðalsteinn Árni Baldursson

 

Niðurstöður atkvæðagreiðslu um nýjan kjarasamning aðildarfélaga Starfsgreinasambands Íslands og Samtaka atvinnulífsins á hinum almenna vinnumarkaði liggja nú fyrir og var samningurinn samþykktur með yfirgnæfandi meirihluta. Starfsgreinasambandið hélt utan um sameiginlega rafræna atkvæðagreiðslu meðal 18 félaga um nýjan samning, en AFL Starfsgreinafélag sá sjálft um sína atkvæðagreiðslu. Atkvæðagreiðslan stóð yfir á tímabilinu 12. til 23. apríl. Í heildina var kjörsókn 12,78%, já sögðu 80,06% en nei sögðu 17,33%. 2,61% tóku ekki afstöðu. Á kjörskrá voru 36.835 manns.

Niðurstöðurnar voru afgerandi í öllum félögunum nema einu, en í 17 af 19 félögum var samningurinn samþykktur með yfir 70% atkvæða.

Hjá Framsýn var kjörsóknin fyrir ofan meðaltalið eða 15,97%. Á kjörskrá voru 839 félagsmenn, já sögðu 102 eða 76,12. Nei sögðu 29 eða 21,64%. Þrír tóku ekki afstöðu eða 2,24%.Samningurinn á hinum almenna vinnumarkaði, sem undirritaðir voru 3. apríl síðastliðinn, telst því samþykktur hjá meðal félagsmanna Framsýnar stéttarfélags og tekur því gildi frá og með 1. apríl 2019.

Þá er einnig búið að telja í atkvæðagreiðslu um kjarasamning Landssambands íslenskra verslunarmanna/Framsýnar og Samtaka atvinnulífsins. Félagsmenn Deildar verslunar- og skrifstofufólks innan félagsins samþykktu samninginn en kjörsóknin var mjög léleg. Á kjörskrá voru 189, 20 greiddu atkvæði, þar af sögðu 19 já eða 95% og 1 sagði nei við samningnum eða 5%. Auð atkvæði 0. Kjörsóknin var 10,58%.

Vegna jarðarfarar Kristjáns Ásgeirssonar á morgun, miðvikudag, verður Skrifstofa stéttarfélaganna lokuð frá kl. 13:00 til 16:00 miðvikudaginn 24. apríl.

Framsýn stéttarfélag
Þingiðn
Starfsmannafélag Húsavíkur

 

Rafræn atkvæðagreiðsla hjá Framsýn um nýjan kjarasamning félagsins og SGS við SA fyrir störf á almennum vinnumarkaði, sem undirritaður var 3. apríl 2019, hefst kl. 13:00 í dag, 12. apríl og lýkur þriðjudaginn 23. apríl kl. 16:00.
Atkvæðisrétt eiga allir félagsmenn í Framsýn sem vinna eftir viðkomandi samningi og greiddu félagsgjöld í janúar/febrúar 2019.  Kynningarefni um samninginn má nálgast hér.

Geti einhver ekki kosið sem telur sig hafa til þess rétt getur sá hinn sami snúið sér til Skrifstofu stéttarfélagsins og fengið sig færðan á kjörskrá og greitt atkvæði, enda leggi viðkomandi fram launaseðil sem sanni afdregin félagsgjöld í janúar/febrúar 2019. Tekið er við kjörskrárkærum samkvæmt framansögðu til kl. 16.00 þriðjudaginn 23. apríl en þá lýkur atkvæðagreiðslu um samninginn. Félagsmenn eru eindregið hvattir til að nýta réttindi sín og greiða atkvæði.

Til að greiða atkvæði smellir viðkomandi á hnappinn „Smellið hér til að kjósa‟ sem staðsettur er á bleika borðanum hér efst á síðunni. Til að skrá sig inn á þann vef þarf rafræn skilríki eða íslykli. Eftir innskráningu birtist atkvæðaseðilinn og getur viðkomandi þá greitt atkvæði.

Á morgun kl. 16:00 lýkur kosningu um kjarasamning Framsýnar og Samtaka atvinnulífsins. Afar mikilvægt er að félagsmenn gefi sér tíma til að kjósa um samninginn. Formaður Framsýnar, Aðalsteinn Árni Baldursson, fór í vinnustaðaheimsóknir um páskana til að kynna samninginn fyrir félagsmönnum. Í gær, laugardag, átti hann fund með starfsmönnum í ferðaþjónustu Í Mývatnssveit. Vel var mætt á þann fund og lögðu fundarmenn fram fjölmargar spurningar sem formaður svaraði eftir bestu getu.

Ársfundur Stapa lífeyrisjóðs verður haldinn miðvikudaginn 8. maí nk. í Menningarhúsinu Hofi á Akureyri og hefst fundurinn kl. 14:00. Gögn vegna fundarins verða aðgengileg á heimasíðu sjóðsins www.stapi.is a.m.k. tveimur vikum fyrir ársfund. Ársfundurinn er opinn öllum sjóðsfélögum með málfrelsi og tillögurétt. Atkvæðisrétt hafa þeir einir sem tilnefndir eru af aðildarfélögum sem aðild eiga að sjóðnum s.s. Framsýn stéttarfélagi. Framsýn leitar hér með til félagsmanna sem jafnframt eru sjóðsfélagar í Lsj. Stapa um að gefa kost á sér á ársfundinn fh. Framsýnar stéttarfélags. Áhugasömum er bent á að hafa samband við formann félagsins, Aðalstein Árna Baldursson, eða með því að senda upplýsingar á netfangið kuti@framsyn.is.

 

Stjórn Framsýnar skorar á félagsmenn sem starfa eftir almenna kjarasamningnum að greiða atkvæði um kjarasamninginn. Hægt verður að kjósa til kl. 16:00 þann 23. apríl 2019. Atkvæðagreiðslan er rafræn og hægt er að kjósa á heimasíðu Framsýnar. Einnig er hægt að kjósa með gamla laginu á skrifstofunni. Skoðanir félagsmanna á samningnum skipta mjög miklu máli. Koma svo!

Í dag var gengið frá samkomulagi um breytingu á kjarasamningi milli (ASÍ)Starfsgreinasambands Íslands fh. aðildarfélaga og Sambands íslenskra sveitarfélaga. Um er að ræða útfærslu launaþróunartryggingar fyrir tímabilið 2017 til 2018 sem byggir á Rammasamkomulagi aðila vinnumarkaðarins frá 27. október 2015.

Launaþróunartryggingin gildir frá 1. janúar 2019 með nýrri launatöflu, ASÍ-V, sem hækkar um 1,7% frá gildandi launatöflu.

Sveitarfélögin munu greiða þetta sem eingreiðslu um leið og hægt verður að koma því við, það er við næstu eða þar næstu mánaðamót.

Félagsmenn Framsýnar geta nálgast frekari upplýsingar á skrifstofu félagsins.

Framsýn stóð fyrir tveimur félagsfundum í gær á Húsavík, annars vegar fyrir erlenda félagsmenn kl. 17:00 og hins vegar fyrir almennum félagsfundi kl. 20:00. Báðir fundirnir voru góðir og sköpuðust töluverðar umræður um kjarasamning Framsýnar og Samtaka atvinnulífsins og útspil ríkistjórnarinnar. Í máli formanns kom fram að samningurinn væri með merkilegri samningum sem hann hefði komið að og að mikilvægt væri að menn gæfu sér tíma til að kjósa um samninginn en kosningin væri rafræn. Með því að fara inn á heimasíðu Framsýnar geta menn kosið sem voru við störf í janúar og febrúar. Þá er einnig hægt að kjósa á skrifstofu félagsins með gamla laginu vilji menn það.

Meðlimir í Verkalýðsfélagi Þórshafnar sem stara samkvæmt kjarasamningi V.Þ./SGS og SA geta kosið með því að smella hér.

Um leið og við hvetjum félagsmenn á almenna vinnumarkaðinum og verslunarmenn að greiða atkvæði um nýgerða kjarasamninga er rétt að taka fram að félagsmenn Framsýnar sem starfa hjá ríki og sveitarfélögum hafa ekki kosningarétt um kjarasamninginn sem nú er til afgreiðslu.

Þessi þrír höfðingjar, Jón Borgar, Árni Kjartans og Snorri komu við á Skrifstofu stéttarfélaganna fyrir lokun í gær. Eins og margir aðrir sem leita til stéttarfélaganna áttu þeir erindi á skrifstofuna. Að sjálfsögðu voru þeir hressir enda ekki þekktir fyrir annað og helgin framundan. Við skálum fyrir því.