kuti

Til að öðlast full félagsréttindi þarf að greiða mánaðarlegt félagsgjald samkvæmt ákvörðun aðalfundar á hverjum tíma, nú 1% af heildarlaunum.

Lágmarksfélagsgjaldið er 0,3% byrjunarlaunum 18 ára afgreiðslufólks, samkvæmt launataxta LÍV-SA sem Framsýn á aðild að á hverjum tíma. Nú kr. 15.514,- á ársgrundvelli.

Félagsgjaldið tekur breytingum í samræmi við umsamdar breytingar á launataxta LÍV-SA. Þegar rætt er um lágmarksfélagsgjald er miðað við gjald samtals í eitt ár, eða undangengna 12 mánuði.

Félagsmenn sem ekki hafa náð lágmarksfélagsgjaldi eiga rétt á aðstoð við kjaramál og réttindi í sjóðum félagsins í hlutfalli við greiðslur. Til þess að viðhalda fullgildum félagsrétti í Framsýn þurfa félagsgjaldsgreiðslur að berast reglulega. Ef ekkert félagsgjald er greitt í sex mánuði samfellt fellur viðkomandi af félagsskrá. Hægt er að ná aftur fullgildingu frá þeim mánuði sem næsta félagsgjaldsgreiðsla berst, ef lágmarksfélagsgjaldi er náð undangengna 12 mánuði.

Allt frá 14. maí hafa staðið yfir umfangsmiklar vinnustöðvanir í Færeyjum þar sem stór hluti vinnandi fólks hefur lagt niður störf til að krefjast betri kjara. Framsýn stéttarfélag lýsir yfir fullum stuðningi við vinnustöðvun félagsmanna í Foroya arbeiðarafélagi, Havnar arbeiðarafelagi, Klaksvíkar arbeiðskvinnufelagi og Klaksvíkar arbeiðsmannafelagi.

Jafnframt hvetur Framsýn til þess að félagsmenn aðildarfélaga Alþýðusambands Íslands gangi hvorki beint né óbeint í störf félagsmanna framangreindra samtaka meðan á vinnustöðvun stendur.

Félagsmenn Framsýnar eiga aðild að öflugum fræðslusjóðum í gegnum þá kjarasamninga sem félagið á aðild að. Þessar greiðslur geta verið allt að kr. 170.000 á ári. Uppsafnaður þriggja ára réttur getur orðið mest kr. 510.000,-. Til viðbótar þessum góða rétti stendur félagsmönnum Framsýnar til boða að fá sérstakan styrk úr Fræðslusjóði Framsýnar kr. 130.000,-. Sumir segja að það sé best að búa í Kópavogi meðan aðrir segja að það sé best að vera félagsmaður í Framsýn. Að sjálfsögðu tökum við heilshugar undir það.

Þar sem rekstur Framsýnar gekk mjög vel á síðasta ári var ákveðið á aðalfundi félagsins að hækka bætur og styrki til félagsmanna úr sjúkrasjóði félagsins. Á síðasta ári fengu félagsmenn greiddar tæpar 100 milljónir í sjúkradagpeninga og aðra styrki er tengjast heilsueflingu eða veikindum þeirra. Styrkupphæðir til félagsmanna Framsýnar úr sjúkrasjóði og reyndar fræðslusjóði líka eru með þeim bestu sem þekkjast hjá sambærilegum stéttarfélögum á Íslandi.

Breytingarnar sem taka gildi 1. maí 2024 eru eftirfarandi:

• Útfararstyrkur til aðstandenda eldri félagsmanna hækki úr kr. 150.000,- í kr. 160.000,-.
• Styrkur til félagsmanna vegna dvalar á heilsuhælum/Hveragerði hækki úr kr. 110.000,- í kr. 120.000,-.
• Fæðingarstyrkur til félagsmanna hækki úr kr. 160.000,- í kr. 200.000,-.
• Ættleiðingastyrkur til félagsmanna hækki úr kr. 160.000,- í kr. 200.000,-.
• Þurfi félagsmenn að gangast undir tæknifrjóvgun hækki styrkurinn úr kr. 160.000,- í kr. 200.000,-.
• Krabbabeinsskoðun taki smávægilegum breytingum. Áfram greitt fyrir hefðbundna skoðun að fullu. Heildarstyrkurinn verði kr. 40.000,- á ári til félagsmanna.
• Styrkur vegna heilsueflingar félagsmanna hækki úr kr. 40.000,- í kr. 45.000,-. 
• Þátttaka í ferðakostnaði félagsmanna vegna veikinda, það er þurfi þeir að ferðast til Akureyrar eða Reykjavíkur til lækna eða sérfræðinga, verði aukin um eina ferð. Fari úr þremur ferðum í fjórar.
• Þátttaka í göngugreiningu félagsmanna verði aukin úr kr. 6.000,- í kr. 10.000,-.
• Þátttaka vegna Laser eða augnsteinaaðgerða hækki úr kr. 60.000,- í kr. 80.000,- per auga.
• Gleraugnastyrkur til félagsmanna hækki úr kr. 70.000,- í kr. 90.000,-.
• Heyrnatækjastyrkir til félagsmanna hækki úr kr. 100.000,- í kr. 125.000,- per eyra.   

Reglur varðandi úthlutun styrkja úr sjúkrasjóði halda sér áfram sem taka m.a. mið af greiddu félagsgjaldi síðustu mánuði fyrir umsókn.

Við minnum á Sveitarfélag ársins, starfsumhverfiskönnun bæjarstarfsmannafélaganna innan BSRB, við þurfum á þinni skoðun að halda. Könnunin klárast 10. júní. Könnunin var send í tölvupósti frá kannanir@kannanir.gallup.is

Ef þú hefur ekki fengið könnun, vinsamlega hafðu samband við fyrirmyndar@gallup.is

Á næstu dögum munum við fjalla um helstu málefni og samþykktir aðalfundar Framsýnar sem var haldinn 3. maí. Því miður hefur ekki gefist tími til að fjalla um aðalfundinn fyrr en núna vegna mikilla anna á Skrifstofu stéttarfélaganna. Aðalfundurinn samþykkti með lófaklappi að færa HSN/Hvammi að gjöf til kaupa á tækjum fyrir stofnanirnar. Mestu munar um hjartatæki sem gerir HSN kleift að hafa hjartalækni í hlutastarfi hjá stofnunninni á Húsavík. Nánar verður fjallað um málið síðar en til stendur að afhenda gjöfina síðar í júní. Eftirfarandi samþykkt var gerð á fundinum:

“Aðalfundur Framsýnar stéttarfélags samþykkir að færa Styrktarfélagi HSN í Þingeyjarsýslum að gjöf kr. 15.000.000,- til kaupa á tækjum og búnaði til að efla starfsemina enn frekar.

HSN og Hvammur hafa á að skipa frábæru fagfólki í öllum stöðum. Svo starfsemin megi þrífast áfram um ókomna tíð er mikilvægt að heilbrigðis starfsfólk hafi aðgengi að fullkomnustu tækjum á hverjum tíma til lækninga og þjálfunar.

Með gjöfinni vill Framsýn stéttarfélag undirstrika mikilvægi þess, að íbúar í Þingeyjarsýslum og aðrir þeir sem þurfa á heilbrigðisþjónustu og endurhæfingu að halda á hverjum tíma, hafi aðgengi að öflugum heilbrigðisstofnunum.

Þannig byggjum við upp sterkt samfélag öllum til hagsbóta.”

Aðalfundur STH var haldinn í fundarsal stéttarfélaganna 24. maí. Mæting á fundinn hefði mátt vera betri. Hermína Hreiðarsdóttir formaður opnaði fundinn og bauð fundarmenn velkomna til fundarins.

Niðurstöður fundarins:

a) Kjör á starfsmönnum fundarins
Aðalsteinn Árni var kjörinn fundarstjóri og fundarritari.

b) Skýrsla stjórnar fyrir liðið starfsár
Formaður, Hermína Hreiðarsdóttir, flutti skýrslu stjórnar.

Síðasti aðalfundur félagsins var haldinn 24. maí 2023. Frá þeim tíma hafa verið haldnir eftirfarandi fundir á vegum félagsins:

Fundir í stjórn                                         4

Félagsfundir                                           1

Fundir í fulltrúaráði stéttarfélaganna     5

Fundir í 1. maínefnd stéttarfélaganna    2

Fundir í orlofsnefnd stéttarfélaganna    1

Fundir skoðunarmanna reikninga          1

Samtals fundir 14

Auk þess hafa stjórnarmenn tekið þátt í fundum, ráðstefnum og þingum á vegum BSRB. Landsfundur bæjarstarfsmannafélaga var haldinn í Keflavík dagana 22. til 23. nóvember 2023. Hermína, Fanney og Berglind tóku þátt í fundinum fh. félagsins. Þær voru sammála um að fundurinn hafi bæði verið málefnalegur og fræðandi. Umræður hafi orðið á landsfundinum m.a. um verkfallið síðastliðið haust, kröfugerð aðildarfélaganna, starfsmatið og vinnutímastyttinguna. Formaður félagsins tók þátt í pallborðsumæðum á landsfundinum.

Fullgildir félagsmenn:
Fullgildir félagsmenn í Stafsmannafélagi Húsavíkur þann 31. desember 2023 voru 100, það er þeir sem greiddu til félagsins 2023 Það er 36 karlar og 66 konur. Þess ber að geta að fjöldi virkra félagsmanna STH sem greiddu í félagssjóð í janúar 2024 skv. félagatali í DK voru 72 en voru 76 á sama tíma í fyrra. Félagsmönnum hefur fækkað aðeins milli ára. Samkvæmt lögum BSRB skal tala fulltrúa miðast við félagatölu eins og hún reyndist í janúar það ár sem halda skal þing BSRB.

Fjármál:
Félagsgjöld og iðgjöld ársins 2023 námu kr. 12.298.254,-  en voru kr. 13.134.738,- árið á undan.

Rekstrargjöld voru kr. 16.624.114,- og hækkuðu því milli ára úr kr. 11.214.580,-. Fjármunatekjur voru kr. 2.820.096,- samanborið við kr. 1.046.576,- árið á undan. Samkvæmt sameinuðum rekstrar- og efnahagsreikningi nam hreinn tekjuafgangur félagsins kr. 1.526.591,- samanborið við kr. 5.705.534,- tekjuafgang frá fyrra ári. Heildareignir í árslok voru kr. 81.625.593,- og eigið fé nam kr. 80.545.725,-. Hefur það aukist um 1,9% frá fyrra ári. Rekstur Skrifstofu stéttarfélaganna gekk vel á síðasta ári. Þátttaka Starfsmannafélagsins í rekstrarkostnaði nam kr. 2.543.772,-.

Orlofsmál:
Aðildarfélög Skrifstofu stéttarfélaganna eiga mjög gott samstarf um orlofsmál. Í því sambandi eru þau með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands. STH á eina íbúð í Sólheimum og gengur rekstur hennar vel. Auk íbúðarinnar í Sólheimum á félagið eitt orlofshús á Eiðum, líkt og með íbúð félagsins í Sólheimum hefur rekstur orlofshússins gengið vel. Starfsfólk Skrifstofu stéttarfélaganna sér um að halda utan um úthlutun og rekstur á eignunum. Að venju fengu nokkrir félagsmenn endurgreiðslur vegna dvalar á tjaldsvæðum.

Til viðbótar má geta þess að félagið fór í umtalsverðar breytingar á bústaðnum á Eiðum. Verið er að taka orlofshúsið í gegn. Skipt verður um ofna þar sem tengja á hitaveitu inn í húsið, nýjum gluggatjöldum verður komið fyrir að hluta, komið verður fyrir heitum potti og nýjum rafmagnsmæli. Kostnaður félagsins hleypur á nokkrum milljónum. Orlofssjóður félagsins mun fjármagna verkefnið. Reiknað er með að hægt verði að lengja leigutímann þar sem leggja á hitaveitu í orlofshúsið sem og önnur orlofshús á Eiðum. Reiknað er með að orlofshúsið fari aftur í leigu til félagsmanna 1. júlí í sumar. Því miður lagðist áætlunarflug af til Húsavíkur þann 1. maí 2024. Flugfélagið Ernir hóf áætlunarflug til Húsavíkur árið 2012. Síðan þá hafa stéttarfélögin verið í góðu samstarfi við flugfélagið um áætlunarflugið sem hefur byggst á því að stéttarfélögin hafa gert magnkaup á flugmiðum sem síðan hafa verið áfram seldir til félagsmanna á kostnaðarverði. Ljóst er að það er mikið áfall fyrir Þingeyinga og alla þá sem treyst hafa á flugið að flugsamgöngurnar skuli hafa lagst af. Ekki er að sjá að áætlunarflug milli Reykjavíkur og Húsavíkur hefjist í bráð.

60 ára afmæli félagsins:
Félagið stóð fyrir afmælisferð til Siglufjarðar 25. nóvember í tilefni af 60 ára afmæli félagsins. Félagið var stofnað 26. október 1963. Ferðin til Siglufjarðar var í alla staði frábær. Boðið var upp á jólahlaðborð og gistingu. Þá var boðið upp á siglingu með Örkinni sem var gerð upp á Húsavík fyrir nokkrum árum.

Fræðslumál og heilsurækt:
Á síðasta ári voru greiddir samtals kr. 710.200,- í námsstyrki til félagsmanna. Þá fengu félagsmenn greiddar kr. 88.496,- í heilsustyrki frá félaginu.

Kjaramál:
Kjaraviðræður við ríkið og sveitarfélög hafa gengið allt of hægt. Sameiginleg samninganefnd bæjarstarfsmannafélaga í BSRB hefur vísað kjaradeilu sinni til ríkissáttasemjara vegna viðræðna við Samband íslenskra sveitarfélaga. Viðræðurnar hafa staðið yfir í nokkra mánuði vegna endurnýjunar kjarasamninga sem taka til um 7000 félagsfólks í félögunum sem starfa um land allt. Samninganefndin telur fullreynt að ná samkomulagi milli aðila án milligöngu ríkissáttasemjara. Samhliða hefur BSRB farið fyrir sameiginlegum málum félaganna líkt og útfærslu á vinnutíma, þ.e. vaktavinnu og dagvinnu sem sést nú fyrir endann á en enn er langt á milli aðila þegar kemur að jöfnun launa milli markaða. Starfsmannafélag Húsavíkur á aðild að samningnum fyrir sína félagsmenn. Félagið greiddi BSRB kr. 3.168.789,- vegna verkfalls bæjarstarfsmanna. Sambandið tók að sér að halda utan um málið, það er að greiða út verkfallsbætur og greiða kostnað vegna auglýsingaherferðar í kjölfar ákvörðunar aðildarfélaga sambandsins að fara í verkfallsaðgerðir. Við því er ekkert að gera enda félagið þáttakandi í verkfallsaðgerðum BSRB. Innan félagsins hafa verið umræður um starfsmatið og endurskoðunina á því sem stendur yfir um þessar mundir. Mikil óánægja er með ákvörðun Sambands ísl. sveitarfélaga með að ákveða einhliða að nýtt starfsmat tæki gildi 1. janúar 2024. Aðildarfélög BSRB og ASÍ hafa sameiginlega mótmælt vinnubrögðum SÍS. Þá telja BSRB og ASÍ að búið hafi verið að semja um að nýtt starfsmat tæki gildi haustið 2021. Til skoðunar er að fara með málið fyrir dómsstóla. Formaður félagsins hefur verið í góðu sambandi við þá sem fara fyrir viðræðunum við Samband ísl. sveitarfélaga fh. starfsmannafélaganna innan BSRB og upplýst stjórnarmenn STH um stöðuna á hverjum tíma. Þá er rétt að taka fram til viðbótar að ósamið er við ríkið.

Atvinnumál og vinnustaðaeftirlit:
Atvinnuástandið hjá félagsmönnum hefur almennt verið með miklum ágætum. Ekki er að sjá að sveitarfélögin á svæðinu muni draga úr starfsemi á komandi árum. Því ætti atvinnuástandið að haldast áfram gott.

Hátíðarhöldin 1. maí:
Stéttarfélögin stóðu að þessu sinni fyrir hátíðarhöldum á Fosshótel Húsavík 1. maí 2024. Boðið var upp á veglega hátíð þar sem heimamenn voru í aðalhlutverki ásamt góðum gestum. Ræðumaður dagsins var Aðalsteinn Árni Baldursson formaður Framsýnar, sem jafnframt var heiðraður á samkomunni, auk þess sem þekktir og óþekktir tónlistarmenn tendruðu fram áhugaverða tónlist og söng. Þá var boðið upp á veglegt kaffihlaðborð. Hátíðarhöldin á Fosshótel Húsavík voru vel sótt og öllum til mikils sóma.

Starfsemi félagsins:
STH hefur komið að nokkrum málum frá síðasta aðalfundi. Ástæða er til að gera aðeins grein fyrir nokkrum þeirra: Félagið hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn. Miðvikudaginn 14. júní stóð félagið fyrir kynningarfundi í fundarsal stéttarfélaganna um nýgerðan kjarasamning aðildarfélaga BSRB og Sambands ísl. sveitarfélaga. Um var að ræða skammtímasamning. Formaður gerði fundarmönnum grein fyrir helstu atriðum kjarasamningsins og fyrirkomulagi varðandi atkvæðagreiðslu um samninginn.  Kjarasamningurinn var samþykktur í öllum aðildarfélögum BSRB sem voru aðilar að samningnum. Alls samþykktu 93,33% félagsmanna STH samninginn. Stjórnin samþykkti að senda sveitarstjóra Norðurþings bréf varðandi aðild starfsmanna sveitarfélaga og sjálfseignarstofnana að STH.

Heimsókn til forseta Íslands:
Formaður STH þáði heimboð forseta Íslands, Guðna T. Jóhannessonar til Bessastaða, í tilefni fullveldisdagsins 1. desember. Til móttökunnar voru boðnir formenn launþegasamtaka ASÍ og BSRB. Formenn stéttarfélaganna, Framsýnar, Þingiðnar og STH þáðu öll boð forseta, sem hélt þar tölu og bauð gestum að skoða húsakynni á Bessastöðum.

Heimsókn ríkissáttasemjara:                                                                                                                  Ríkissáttasemjari, Ástráður Haraldsson og samstarfsfólk hans hjá embættinu, þær Bára Hildur Jóhannsdóttir, Aldís Magnúsdóttir og Elísabet S. Ólafsdóttir funduðu með fulltrúum úr stjórnum Framsýnar, STH og Verkalýðsfélags Þórshafnar á Húsavík í september 2023. Gestirnir fóru yfir hlutverk og starfsemi embættis ríkissáttasemjara sem hefur á að skipa fáu, en að sama skapi öflugu starfsfólki. Auk þess kölluðu þau eftir helstu áherslum félaganna varðandi kjaramálaumhverfið og komandi samningavetur. Fundurinn var upplýsandi og  góður í alla staði. Síðar kom ríkissáttasemjari á framfæri kveðju til forsvarsmanna stéttarfélaganna, þar sem hann þakkaði fyrir góðar móttökur og áhugaverðar umræður á fundinum á Húsavík.

Samstöðufundur 24. október:
Þann 24. október 2023 boðuðu á fjórða tug samtaka til kvennaverkfalls og skipulagðir voru  baráttufundir kvenna og kvára víða um land. Meðal þeirra sem stóðu að skipulagningunni voru ASÍ, BSRB og BHM ásamt fjölda samtaka kvenna og hinsegin fólks. Framsýn, Þingiðn og STH stigu fram með stuttum fyrirvara og stóðu fyrir samstöðufundum á Húsavík og Raufarhöfn. Á Húsavík komu tæplega 300 konur og kvárar saman og hreinlega sprengdu húsnæði stéttarfélaga utan af sér. Á Raufarhöfn var einnig góð mæting í félagsheimilið Hnitbjörg og komu konur bæði frá Raufarhöfn og nærliggjandi byggðarlögum saman til fundar. Óhætt er að segja að báðar samkomurnar hafi heppnast afar vel. Það voru Ósk Helgadóttir, Guðný I. Grímsdóttir, Gunnþórunn Þórgrímsdóttir og  Sunna Torfadóttir frá Framsýn, ásamt Hermínu Hreiðarsdóttur formanni STH, sem sáu um og skipulögðu viðburðinn á Húsavík, með dyggri aðstoð karlkyns starfsmanna Skrifstofu stéttarfélaganna, en Svava Árnadóttir var í forsvari fyrir fundinum á Raufarhöfn.  Eftir tvö ár verða 50 ár liðin frá fyrsta Kvennafrídeginum. Full ástæða er til að þakka þeim sem komu að framkvæmd og skipulagningu samstöðufundanna á Húsavík og Raufarhöfn fyrir þeirra framlag til að gera daginn sem glæsilegastan.

Húsnæði stéttarfélaganna:
Rekstur á sameiginlegum eignum stéttarfélaganna hefur gengið vel. Félögin eiga í sameiningu skrifstofuhúsnæðið að Garðarsbraut 26 á Húsavík. Þá eiga Framsýn og Þingiðn efri hæðina í sömu byggingu sem ber nafnið Hrunabúð sf.

Tímamót hjá forstöðumanni:
Þann 3. maí 2024 voru tímabót hjá forstöðumanni Skrifstofu stéttarfélaganna, Aðalsteini Árna Baldurssyni, en þá voru liðinn 30 ár frá því að hann tók við forstöðu Skrifstofu stéttarfélaganna. Hann hefur því verið framkvæmdastjóri STH í þrjá áratugi. Fyrir það ber að þakka.

Starfsemi Virk – starfsendurhæfingarsjóðs:
Virk – starfsendurhæfingarsjóður var stofnaður árið 2008 af aðilum vinnumarkaðarins. Í júní 2012 voru sett lög um atvinnutengda starfsendurhæfingu og starfsemi starfsendurhæfingarsjóða, lög nr. 60/2012, sem sjóðurinn starfar eftir. Markmið Virk er að draga úr líkum á því að einstaklingar hverfi af vinnumarkaði vegna heilsubrests. Með samvinnu Virk og Framsýnar, Þingiðnar, Starfsmannafélags Húsavíkur og Verkalýðsfélags Þórshafnar hefur verið rekin þjónustu- og ráðgjafaskrifstofa Virk í Þingeyjarsýslum frá árinu 2009, það er í húsnæði stéttarfélaganna á Húsavík. Þann 1. maí 2024 urðu ákveðnar breytingar hvað samstarfið varðar. Framsýn og Virk gerðu með sér samkomulag um að Virk yfirtæki starfsmann sjóðsins á Húsavík en Virk hafði áður kostað starfsmanninn, það er með framlagi til Framsýnar. Frá og með 1. maí færðist hann alfarið yfir til Virk og heyrir því ekki lengur undir forstöðumann Skrifstofu stéttarfélaganna. Gott samstarf er við stofnanir og meðferðaraðila á svæðinu, á sviði heilbrigðis-, félags- og menntunarmála. Virk hefur staðið fyrir kynningu og vitundavakningu um efni sem tengjast farsælli þátttöku og endurkomu á vinnumarkaði. Í þessu sambandi má t.d. nefna kynningarátök og rannsóknir Virk á kynbundnu ofbeldi á vinnumarkaði, kulnun og breytingaskeiði kvenna. Á vettvangi Virk hlutu 10 fyrirtæki/stofnanir nýlega sérstaka viðurkenningu fyrir framlagt sitt til stuðnings einstaklinga sem stíga út á vinnumarkað eftir fjarveru vegna veikinda.

Skrifstofa stéttarfélaganna:
Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Framsýn og Þingiðn. Þar starfa 7 starfsmenn með starfsmanni Virk í 5,8 stöðugildum. Þess ber að geta að Kristján Ingi Jónsson hætti störfum hjá stéttarfélögunum í lok síðasta árs. Í hans stað var Aðalsteinn J. Halldórsson ráðinn til starfa frá og með 1. nóvember 2023, en hann starfaði áður á Skrifstofu stéttarfélaganna frá árinu 2016 til ársins 2020 og hefur frá þeim tíma hefur hann verið í afleysingum hjá félögunum. Full ástæða er til að þakka Kristjáni fyrir vel unnin störf í þágu stéttarfélaganna, Kristján var góður liðsmaður. Félagið heldur úti öflugri heimasíðu og Fréttabréfi sem tengir hinn almenna félagsmann við stjórn félagsins, starfsmenn og félagið í heild sinni. Full ástæða er til að hvetja félagsmenn til að fylgjast með starfi félagsins inn á heimasíðu stéttarfélaganna sem reglulega er uppfærð með fréttum og tilkynningum til félagsmanna auk þess sem hægt er að nálgast þar aðrar þarfar upplýsingar inn á vefnum er snerta s.s. kjaramál. Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla.  Ekki eru fyrirsjáanlegar breytingar á rekstri skrifstofunnar.

Fulltrúaráð stéttarfélaganna:
Aðildarfélög Skrifstofu stéttarfélaganna mynda með sér Fulltrúaráð sem skipað er formönnum þessara félaga. Fulltrúaráðinu er ætlað að fylgjast með sameiginlegri starfsemi félaganna, ekki síst sem viðkemur rekstri skrifstofunnar. Fulltrúaráðið kemur saman til fundar eftir þörfum.

Lokaorð:
Skýrslan er að venju ekki tæmandi um starfsemi félagsins því hér hefur aðeins verið farið yfir helstu málaflokka og málefni sem félagið hefur komið að milli aðalfunda. Það er von stjórnarinnar að skýrsla þessi gefi lauslegt yfirlit yfir það helsta í fjölbreyttu félagsstarfi, um leið og hún þakkar félagsmönnum, þeim sem hafa haft trúnaðarstörf fyrir félagið á hendi og starfsmönnum félagsins fyrir gott samstarf og vel unnin störf á árinu.

c) Endurskoðaðir reikningar félagsins lagðir fram til afgreiðslu
Elísabet Gunnarsdóttir fjármálastjóri stéttarfélaganna fór yfir ársreikninga félagsins. Félagsgjöld og iðgjöld ársins 2023 námu kr. 12.298.254,-  en voru kr. 13.134.738,- árið á undan. Rekstrargjöld voru kr. 16.624.114,- og hækkuðu því milli ára úr kr. 11.214.580,-. Fjármunatekjur voru kr. 2.820.096,- samanborið við kr. 1.046.576,- árið á undan. Samkvæmt sameinuðum rekstrar- og efnahagsreikningi nam hreinn tekjuafgangur félagsins kr. 1.526.591,- samanborið við kr. 5.705.534,- tekjuafgang frá fyrra ári. Heildareignir í árslok voru kr. 81.625.593,- og eigið fé nam kr. 80.545.725,-. Hefur það aukist um 1,9% frá fyrra ári. Rekstur Skrifstofu stéttarfélaganna gekk vel á síðasta ári. Þátttaka Starfsmannafélagsins í rekstrarkostnaði nam kr. 2.543.772,-.

Umræður um b og c-lið á dagskrá fundarins voru teknar saman. Eftir umræður voru reikningarnir bornir upp og samþykktir. Tillaga um að tekjuafgangi ársins verði ráðstafað til hækkunar á óráðstöfuðu eigin fé frá fyrra ári var samþykkt samhljóða.

d) Ákvörðun félagsgjalds
Tillaga stjórnar um að félagsgjaldið verði óbreytt milli ára, það er 1% af launum var samþykkt samhljóða.

e) Kosning löggilts endurskoðanda eða endurskoðunarskrifstofu
Tillaga um að endurskoðunarfyrirtækið PWC sjái um endurskoðun á ársreikningum félagsins fyrir árið 2024 var samþykkt samhljóða.

f) Lagabreytingar, ef þær liggja fyrir
Engar lagabreytingar liggja fyrir fundinum.

g) Kosning stjórnar, varastjórnar og skoðunarmanna samkvæmt 8. Grein
Ganga þarf frá kjöri á gjaldkera og einum meðstjórnanda til tveggja ára samkvæmt lögum félagsins.

Fanney Hreinsdóttir gefur kost á sér áfram sem gjaldkeri félagsins og gerð er tillaga um að Sylvía Ægisdóttir verði áfram meðstjórnandi en hún var ekki á fundinum. Fundurinn samþykkti kjör þeirra.

Tillaga er um að Ása Gísladóttir og Erla Bjarnadóttir verði félagslega kjörnir skoðunarmenn reikninga fyrir starfsárið 2024. Til vara verði Vilborg Sverrisdóttir. Tillagan var samþykkt samhljóða.

h) Kosning fulltrúa í orlofsnefnd, ferðanefnd og starfskjaranefnd
Tillaga um að Sveinn Hreinsson, Arna Þórarinsdóttir og Guðrún Ósk Brynjarsdóttir verði í orlofs- og starfskjaranefnd félagsins var samþykkt samhljóða.

Tillaga um að Einar Víðir Einarsson, Arna Þórarinsdóttir og Eyrún Sveinsdóttir verði í Ferðanefnd félagsins var samþykkt samhljóða.

Tillaga um að Bergljót Friðbjarnardóttir og Hermína Hreiðarsdóttir verði í stjórn Starfsmenntasjóðs STH fh. félagsins var samþykkt samhljóða. Norðurþing tilnefnir sína fulltrúa í stjórn sjóðsins.

i) Kosning fulltrúa á þing BSRB
Reglulegt þing BSRB verður haldið síðar á árinu. STH á rétt á tveimur fulltrúum. Þrír gefa kost á sér til að fara og því þarf að kjósa um fulltrúa félagsins. Hermína Hreiðarsdóttir, Fanney Hreinsdóttir og Bergljót Friðbjarnardóttir gefa allar kost á sér. Fram fór leynileg atkvæðagreiðsla. Atkvæði féllu þannig: Hermína 7 atkvæði, Bergljót 5 atkvæði og Fanney 2 atkvæði. Hermína og Bergljót eru því réttkjörnir fulltrúar félagsins á komandi þing.

 j) Ákvörðun um laun stjórnar, annarra stjórna, ráða og nefnda
Tillaga er um að laun stjórnar og varastjórnar fyrir setinn stjórnarfund verði tveir tímar á yfirvinnutaxta samkvæmt launatöflu STH og Sambands íslenskra sveitarfélaga:

Skrifstofuvinna II með 8% álagi. Formaður hafi einn tíma til viðbótar í yfirvinnu per fund vegna undirbúnings og frágangs stjórnarfunda. Þá hafi formaður á hverjum tíma fasta greiðslu kr. 30.000,- á mánuði fyrir störf sín sem formaður félagsins samkvæmt nánara samkomulagi aðila. Tillagan var samþykkt samhljóða.

k) Önnur mál
Undir þessum lið urðu umræður um orlofshús félagsins á Eiðum og breytingarnar sem unnið er að um þessar mundir til að bæta orlofshúsið. Töldu fundarmenn það mjög jákvætt. Án efa yrði betri nýting á húsinu eftir breytingarnar en fyrirhugað er að það fari í útleigu til félagsmanna 1. júlí nk.

Umræður urðu um mikilvægi þess að efla starfsemi félagsins, s.s. með því að velja fleiri félagsmenn í trúnaðarstöður fyrir félagið. Í dag er það þannig að sama fólkið situr að mestu í stjórnum og nefndum á vegum félagsins. Ákveðið að hafa þetta í huga þegar stillt verður upp fólki í trúnaðarstöður á næsta aðalfundi félagsins 2025.

Ása Gísladóttir spurði út í Starfsmenntasjóð félagsins. Taldi hún stöðu sjóðsins góða og því væri spurning hvort ekki væri ástæða til að styrkja fræðslustofnanir á svæðinu með einhverjum hætti. Aðalsteinn Árni tók fram að markmið sjóðsins væri að styrkja félagsmenn sem eru á vinnumarkaði til náms og endurmenntunar svo þeir geti á hverjum tíma tileinkað sér tæknibreytingar og tekist á við vandasamari störf í framtíðinni. Fundarmenn töldu eðlilegt að stjórnin skoðaði reglugerð sjóðsins og hvað væri heimilt að gera hvað það varðar að styrkja menntastofnanir. Eins og kunnugt er, er stjórn starfsmenntasjóðsins skipuð fulltrúum frá STH og Norðurþingi og því þarf að eiga sér stað samtal milli aðila um málið.

Fanney Hreins ítrekaði mikilvægi þess að kynna félagið betur fyrir starfsmönnum Norðurþings og stofnana sem tengjast starfsemi sveitarfélaga á félagssvæðinu.

Fleira ekki gert – fundi slitið.

Fundarritari/fundarstjóri, Aðalsteinn Árni Baldursson

Undanfarnar vikur hefur verið unnið að því endurbæta sumarhús Starfsmannafélags Húsavíkur á Eiðum ásamt nokkrum öðrum húsum sem eru í eigu aðildarfélaga BSRB. Skipt verður um ofna í sumarhúsi STH þar sem tengja á hitaveitu inn í húsið, nýjum gluggatjöldum verður komið fyrir að hluta, komið verður fyrir heitum potti og nýjum rafmagnsmæli. Kostnaður félagsins hleypur á nokkrum milljónum. Orlofssjóður félagsins mun fjármagna verkefnið. Verklok eru áætluð síðar í þessum mánuði og mun húsið fara í útleigu til félagsmanna 1. júlí. Vonir eru bundnar við að hægt verði að lengja leigutímann fram á haustið eftir breytingarnar enda verður húsið eins og nýtt eftir framkvæmdirnar.

Framsýn stóð fyrir kaffiboði síðasta laugardag, 1. júní, í Félagsheimilinu Hnitbjörgum á Raufarhöfn. Um er að ræða árvissan viðburð sem notið hefur töluveðra vinsælda meðal bæjarbúa. Um 130 manns komu og þáðu kaffi, konfekt og tertu sem Kvenfélagið á Raufarhöfn lagði til. Auk þess að snæða góða tertu gafst heimamönnum tækifæri á að ræða við formann og varaformann félagsins um allt milli himins og jarðar en þeir voru á staðnum. Sá mikli höfðingi Helgi Ólafsson varð 95 ára þann 31. maí. Í tilefni af því færði Aðalsteinn Árni honum blómvönd frá Framsýn. Með þeim á myndinni er eiginkona Helga, Stella Þorláksdóttir. Ástæða er til að þakka heimamönnum fyrir komuna og aðstoðina við kaffiboðið.

Framsýn stéttarfélag óskar sjómönnum og fjölskyldum þeirra sem og landsmönnum öllum til hamingju með Sjómannadaginn 2. júní 2024.

Framsýn stéttarfélag stendur fyrir árlegu kaffiboði á Raufarhöfn laugardaginn 1. júní kl. 15:00-17:00 í Félagsheimilinu Hnitbjörgum. Forsvarsmenn Framsýnar verða á staðnum.

Boðið verður upp á heimsins bestu tertur frá Kvenfélagi Raufarhafnar.

Öll velkomin

Framsýn stéttarfélag

Sameiginleg samninganefnd bæjarstarfsmannafélaga í BSRB hafa vísað kjaradeilu sinni til ríkissáttasemjara vegna viðræðna við Samband íslenskra sveitarfélaga. Viðræðurnar hafa staðið yfir í nokkra mánuði vegna endurnýjunar kjarasamninga sem taka til um 7000 félagsfólks í félögunum sem starfa um land allt. Samninganefndin telja fullreynt að ná samkomulagi milli aðila án milligöngu ríkissáttasemjara. Samhliða hefur BSRB farið fyrir sameiginlegum málum félaganna líkt og útfærslu á vinnutíma, þ.e. vaktavinnu og dagvinnu sem sést nú fyrir endann á en enn er langt á milli aðila þegar kemur að jöfnun launa milli markaða. Rétt er að taka fram að Starfsmannafélag Húsavíkur á aðild að samningnum fyrir sína félagsmenn.

Elísabet Gunnarsdóttir fjármálastjóri ásamt öðrum starfsmönnum stéttarfélaganna kölluðu Aðalstein Árna upp á aðalfundi Framsýnar til að þakka honum fyrir samstarfið og störf hans í þágu félagsins um leið og hún færði honum gjöf frá samstarfsfólkinu á skrifstofunni. Aðalsteinn Árni hefur verið forstöðumaður Skrifstofu stéttarfélaganna í 30 ár en hann tók formlega við sem forstöðumaður Skrifstofu stéttarfélaganna 2. maí 1994. Aðalsteinn Árni þakkaði fyrir sig og sagði að það hefði verið bæði ánægjulegt og eins gefandi að starfa fyrir stéttarfélögin í þrjá áratugi.

Því miður hefur ekki tekist að fjalla mikið um helstu málefni aðalfundar Framsýnar vegna mikilla anna á Skrifstofu stéttarfélaganna en það kemur. Vonandi verður það hægt í næstu viku enda mikið um ákvarðanir á aðalfundinum s.s. hækkanir á styrkjum til félagsmanna og þá var samþykkt að færa HSN 15.000.000,- króna gjöf til kaupa á mikilvægum tækjum fyrir stofnuninna. Við munum segja frá því síðar enda um að ræða mikilvæga gjöf sem á eftir að nýtast samfélaginu vel. En menn koma og fara, á aðalfundinum kölluðu formaður og varaformaður Aðalstein Gíslason, Svövu Árnadóttir og Þóri Stefánsson upp til að þakka þeim fyrir vel unninn störf í þágu félagsins til fjölda ára en þau gáfu ekki kost á sér til áframhaldandi starfa fyrir félagið. Þess ber að geta að þau hafa þjónað félaginu vel og verið mjög virk í starfi þess auk þess að sækja fundi, ráðstefnur og þing á vegum verkalýðshreyfingarinnar sem fulltrúar Framsýnar stéttarfélags. Fengu þau smá glaðning frá félaginu á þessum tímamótum. Fundarmenn klöppuðu vel og lengi fyrir þeim.

Á aðalfundi Framsýnar 3. maí 2024 var Ágúst S. Óskarsson sæmdur gullmerki félagsins. Samkvæmt lögum félagsins er heimilt að velja heiðursfélaga og/eða sæma menn sérstaklega gullmerki félagsins fyrir störf í þágu félagsins.

Fyrir tveimur árum síðan var byrjað að veita sérstakt gullmerki fyrir vel unnin störf í þágu félagsins, en nokkrir einstaklingar hafa í gegnum tíðina verið gerðir að sérstökum heiðursfélögum sem er æðsta viðurkenning félagsins.  Þeir síðustu voru Helgi Bjarnason, Kristján Ásgeirsson, Kristbjörg Sigurðardóttir, Ósk Helgadóttir og nú Aðalsteinn Árni Baldursson sem tók við æðsta heiðursmerki félagsins á hátíðarhöldunum 1. maí sl. Þau hafa öll gengt formennsku eða varaformennsku í Verkalýðsfélagi Húsavíkur, síðar Framsýn stéttarfélagi.

Gullmerki Framsýnar er unnið af Kristínu Petru Guðmundsdóttur gullsmið. Það er gert eftir upprunalegu merki félagsins, sem hannað var af grafískum hönnuði, Bjarka Lúðvíkssyni, og tekið upp við sameiningu Verkalýðsfélags Húsavíkur og nágrennis og Verslunarmannafélags Húsavíkur undir nafninu Framsýn stéttarfélag árið 2008. Áður höfðu Verkalýðsfélag Raufarhafnar og Verkalýðsfélag Öxarfjarðar sameinast Verkalýðsfélagi Húsavíkur.

Í máli formanns Framsýnar, Aðalsteins Árna, kom fram að það væri ekkert launungarmál að árangur félagsins og vinsældir væru ekki síst fólkinu að þakka sem myndaði félagið á hverjum tíma. Þátttaka launafólks í stéttarfélögum væri forsendan fyrir því að þau næðu að sinna sínu mikilvæga hlutverki á hverjum tíma, félagsmönnum til hagsbóta. Það gerðist ekki að sjálfu sér.

Það væri hins vegar ekki sjálfgefið að fólk fengist til að sinna trúnaðarstörfum innan hreyfingarinnar, allra síst nú á dögum þegar þátttaka fólks í félagsstörfum almennt virtist fara þverrandi. Það væri einkar ánægjulegt fyrir félagið að geta gefið til baka og sýnt því góða fólki sem starfað hefur lengi af óeigingirni og trúmennsku örlítinn þakklætisvott fyrir hið mikla starf sem þau hafa innt af hendi í þágu félagsmanna.

Á komandi árum munum við án efa veita fleiri slíkar viðurkenningar fólki sem starfað hefur af heilindum fyrir félagið okkar til lengri tíma um leið og Aðalsteinn Árni kallaði Ágúst S. Óskarsson upp til að taka við gullmerki félagsins en hann hefur um áratugaskeið starfað fyrir félagið og sinnt ýmsum trúnaðarstörfum af mikilli trúmennsku. Ágúst bætist nú í hóp þeirra Jakobs G. Hjaltalín, Jónínu Hermanns og Dómhildar Antons sem áður hafa fengið þessa viðurkenningu frá Framsýn fyrir vel unnin störf í þágu félagsins.

Ágúst Sigurður Óskarsson:
Ágúst hefur að baki langan og farsælan feril sem starfsmaður stéttarfélaganna. Hann hóf störf hjá stéttarfélögunum árið 1988. Hann tók smá hliðarskref árið 2005 þegar hann færði sig um set og réð sig til starfa hjá Félagsþjónustu Norðurþings. Þar starfaði hann sem ráðgjafi og staðgengill félagsmálastjóra til ársins 2010 þegar honum bauðst að taka við starfi ráðgjafa á vegum Virk starfsendurhæfingarsjóðs sem Framsýn hefur hýst allt frá stofnun sjóðsins 2008 þar til 1. maí 2024 þegar Virk og Framsýn gerðu með sér samkomulag um að starfsmaðurinn færðist alfarið yfir til Virk vegna skipulagsbreytinga hjá sjóðnum. Ágúst féll því af launaskrá hjá Framsýn um síðustu mánaðamót. Ágúst hefur alla tíð verið mjög virkur í starfi. Þegar hann réð sig til starfa hjá stéttarfélögunum fyrir rúmlega þremur áratugum síðan, hefur hann gengt ýmsum störfum í gegnum tíðina s.s. séð um að færa bókhald, þjónað atvinnuleitendum og almennum félagsmönnum auk þess að starfa fyrir Lífeyrissjóðinn Björg sem var í fyrstu í samstarfi við stéttarfélögin um skrifstofuhald áður en hann var sameinaður Lífeyrissjóði Norðurlands og starfsemin fluttist til Akureyrar í kjölfarið. Það verður ekki annað sagt um Ágúst en að hann hafi verið traustur og metnaðarfullur starfsmaður þau fjölmörgu ár sem hann hefur starfað á Skrifstofu stéttarfélaganna við almenn störf, síðar Virk starfsendurhæfingarsjóð. Þá má ekki gleyma því að Ágúst var formaður Verslunarmannafélags Húsavíkur um árabil. Fyrir það viljum við þakka með því að veita honum gullmerki félagsins.  Ágúst hafðu kærar þakkir fyrir framlag þitt til félagsmanna stéttarfélaganna í Þingeyjarsýslum.

Hér með er boðað til aðalfundar Starfsmannafélags Húsavíkur þriðjudaginn 28. maí 2024. Fundurinn hefst kl. 17:00 í fundarsal stéttarfélaganna að Garðarsbraut 26. Aðalfundur er æðsta vald félagsins og skal hann haldinn ár hvert fyrir lok maí.

Dagskrá:

a) Kjör á starfsmönnum fundarins
b) Skýrsla stjórnar fyrir liðið starfsár
c) Endurskoðaðir reikningar félagsins lagðir fram til afgreiðslu
d) Ákvörðun félagsgjalds
e) Kosning löggilts endurskoðanda eða endurskoðunarskrifstofu
f) Lagabreytingar, ef þær liggja fyrir
g) Kosning stjórnar, varastjórnar og skoðunarmanna samkvæmt 8. grein
h) Kosning fulltrúa í orlofsnefnd, ferðanefnd og starfskjaranefnd
i) Kosning fulltrúa á þing BSRB
j) Ákvörðun um laun stjórnar, annarra stjórna, ráða og nefnda
k) Önnur mál

Skorað er á félagsmenn að fjölmenna á fundinn og taka þátt í umræðum um starfsemi félagsins. Boðið verður upp á hefðbundnar veitingar.

Stjórn STH

Aðalfundur Þingiðnar var haldinn 29. apríl í fundarsal stéttarfélaganna að Garðarsbraut 26. Óvenjugóð mæting var á fundinn. Formaður stjórnar, Jónas Kristjánsson, gerði grein fyrir starfsemi félagsins milli aðalfunda, þar kom fram m.a:

„Formaður félagsins hefur verið virkur í starfi og sótt fundi og þing á vegum félagsins s.s. á vegum Lsj. Stapa, Lsj. Birtu, Húsfélags Þorrasala, Alþýðusambands Íslands, Alþýðusambands Norðurlands og Samiðnar. Þriðjudaginn 21. nóvember stóð Þingiðn og Framsýn fyrir sameiginlegum félagsfundi um kjaramál, flugsamgöngur og íbúðakaup. Fundurinn samþykkti eftirfarandi ályktun um kaup á orlofsíbúð: „Félagsfundur Þingiðnar, haldinn 21. nóvember 2023, samþykkir að heimila stjórn félagsins að kaupa orlofsíbúð að Hraunholti 22, 640 Húsavík, enda standist hún kröfur félagsins um orlofsíbúðir. Um er að ræða 4 herbergja íbúð á einni hæð í tvíbýli. Íbúðin sjálf er 105,7 m2 að stærð auk þess sem um 12 m2 garðskúr fylgir íbúðinni. Eignin afhendist fullbúin með lóð 1. ágúst 2024 eða eftir nánara samkomulagi. Kaupverð kr. 69.350.000,-.“Góð tenging er milli formanns félagsins og forstöðumanns Skrifstofu stéttarfélaganna sem funda reglulega um starfsemina og rekstur félagsins. Eftirtaldir hafa setið í stjórn félagsins milli aðalfunda: Jónas Kristjánsson formaður, Vigfús Þór Leifsson varaformaður og aðrir stjórnarmenn Hólmgeir Rúnar Hreinsson, Þórður Aðalsteinsson og Jónas Hallgrímsson.

Fullgildir félagsmenn:
Félagsmenn í Þingiðn voru samtals 109 þann 31. desember 2023, það er greiðandi félagar, öryrkjar og aldraðir sem áður greiddu til félagsins.  Greiðandi fullgildir félagsmenn voru 99. Töluvert hefur verið um nýbyggingar á félagssvæðinu sem tryggt hefur gott atvinnuástand meðal iðnaðarmanna. Reyndar er vöntun á iðnaðarmönnum til starfa í flestar greinar innan félagsins.

Fjármál:

Félagsgjöld og iðgjöld ársins 2023 námu kr. 19.141.488 sem er um 8,7 % hækkun frá fyrra ári. Heildartekjur námu kr. 22.659.666. Ef tekið er tillit til leiðréttinga frá fyrri árum var upphæðin 17.921.907 og 1,6% hækkun. Rekstrargjöld voru kr. 23.221.654 og hækkuðu um 10,7% frá síðasta ári. Þetta þýðir að tap var af rekstri fyrir fjármagnsliði. Stærsti einstaki útgjaldaliður félagsins eru bætur og styrkir úr sjúkrasjóði. Árið 2023 voru alls greiddir úr sjúkrasjóði 69 styrkir eða sjúkradagpeningar til félagsmanna kr. 7.754.665. Árið áður voru einnig greiddir 69 styrkir. Fjármagnstekjur hækkuðu lítillega eða úr kr. 14.287.573 árið 2022 í kr. 15.211.667 árið 2023 sem gerir um 6,5% hækkun. Samkvæmt sameinuðum rekstrar- og efnahagsreikningi nam hreinn tekjuafgangur félagsins kr. 14.649.678 en hann var kr. 14.040.907 árið áður. Útistandandi iðgjöld lækkuðu um fimm miljónir milli ára sem er mjög ánægjulegt. Heildareignir í árslok voru kr. 289.996.214 og eigið fé nam kr. 280.207.702, hefur það aukist um 5,5% frá fyrra ári. Rekstur Skrifstofu stéttarfélaganna gekk vel á síðasta ári. Þátttaka Þingiðnar í rekstrarkostnaði nam kr. 3.851.896.

Orlofsmál:

Aðildarfélög Skrifstofu stéttarfélaganna ásamt Verkalýðsfélagi Þórshafnar hafa í gegnum tíðina átt mjög gott samstarf um orlofsmál. Stéttarfélögin eru með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið á liðnum árum með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands. Þingiðn á eina íbúð í Þorrasölum 1-3. Þá eiga Þingiðn og Framsýn saman íbúð í gegnum Hrunabúð sf. að Garðarsbraut 26, efri hæð sem hefur verið útleigu. Til viðbótar þessu er rétt að geta þess að Framsýn og Þingiðn eru með í byggingu parhús að Hraunholti 26-28 á Húsavík sem verður tilbúið til leigu fyrir félagsmenn 1. ágúst 2024. Mikil ánægja er með þessa ákvörðun félaganna, það er að auka framboð á orlofsíbúðum fyrir félagsmenn. Á síðasta ári dvaldi fjöldi félagsmanna ásamt fjölskyldum sínum í orlofshúsum, orlofsíbúðum, á tjaldsvæðum og hótelum á vegum félagsins. Veruleg ásókn er í orlofshúsin en félagið niðurgreiðir orlofsdvöl félagsmanna í orlofsíbúðum/húsum  sem auðveldar fólki að njóta orlofsdvalar með fjölskyldum sínum á Íslandi. Ekki er óalgengt að niðurgreiðslurnar séu um kr. 50.000,- fyrir viku dvöl í þeim húsum sem félagið er með á leigu hjá öðrum aðilum. Þá fengu 15 félagsmenn endurgreiðslur á árinu 2023 vegna dvalar á tjaldsvæðum eða alls kr. 362.940,-. Árið á undan fengu 20 félagsmenn endurgreiðslur vegna dvalar á tjaldsvæðum eða alls kr. 302.300,-. Ekki var boðið upp á sumarferð á vegum stéttarfélaganna 2023. Unnið er að því að skipuleggja ferð í sumar á Langanes. Ferðin verður auglýst frekar þegar nær líður sumri. Til viðbótar gafst félagsmönnum kostur á að kaupa gistimiða á hótelum/gistiheimilum og ódýr flugfargjöld með Flugfélaginu Erni á flugleiðinni Húsavík – Reykjavík. Verðið hefur undanfarið verið kr. 17.500,- per flugmiða sem er gríðarleg kjarabót fyrir félagsmenn stéttarfélaganna. Ekki er ólíklegt að forsendan fyrir áætlunarflugi milli Húsavíkur og Reykjavíkur hafi verið samningur stéttarfélaganna við flugfélagið. Kæmi ekki til þessa samkomulags væri farþegafjöldinn ekki sá sami og hann hefur verið allt frá því að gengið var frá samkomulaginu á sínum tíma. Veruleg óvissa er með frekara áætlunarflug til Húsavíkur, þar sem ekki er vitað um frekari aðkomu stjórnvalda hvað varðar ríkisstyrki á þessari flugleið. Stéttarfélögin í Þingeyjarsýslum hafa margítrekað talað fyrir mikilvægi þess að flugsamgöngum verði viðhaldið. Því miður hefur farið lítið fyrir áhuga þingmanna kjördæmisins að berjast fyrir því með félögunum og öðrum heimamönnum að tryggja flugsamgöngurnar í sessi, ekki síst fyrir íbúa og atvinnulífið í Þingeyjarsýslum. Þann 1. apríl sl. var áætlunarflugi til Húsavíkur hætt þar sem Flugfélagið Ernir treysti sér ekki til að halda fluginu áfram nema Vegagerðin kæmi með áframhaldandi ríkisstuðning. Vegagerðin hefur boðað að svo verði ekki nema hvað það komi til greina að bjóða út flug til Húsavíkur yfir þrjá mánuði yfir veturinn, des-jan-feb. Afstaða Vegagerðarinnar er óásættanleg. Vonir voru bundnar við ríkisstyrkt flug til Húsavíkur á ársgrundvelli, til vara í sex mánuði yfir vetrartímann. Aðra mánuði væri flogið á markaðslegum forsendum. Stéttarfélögin munu halda áfram að vinna að málinu en staðan varðandi frekari flugsamgöngur milli Húsavíkur og Reykjavíkur er verulega slæm. Þá eru stéttarfélögin með samning við Icelandair um afsláttarkjör fyrir félagsmenn milli landa. Samningurinn felur í sér að Icelandair veitir stéttarfélaginu 10 til 20% afslátt frá fullu verði. Á móti niðurgreiða stéttarfélögin flugmiðana til félagsmanna. Það er, félagsmenn geta verslað gjafabréf í gegnum orlofsvef stéttarfélaganna sem gefur þeim góð afsláttarkjör upp í fullt fargjald hjá flugfélaginu. Nýlega var ráðist í að kaupa ný húsgögn í íbúð félagsins í Þorrasölum. Skipt var um húsgögn í stofu, það er sófasett, sófaborð og skáp. Kostnaðurinn er um kr. 750.000,-. Formaður félagsins gekk í málið ásamt starfsmanni félagsins.

Þorrasalir 1-3:

Þingiðn á eina íbúð í Þorrasölum 1-3 í Kópavogi og gengur rekstur hennar mjög vel. Útleiga á íbúð félagsins í Kópavogi hefur gengið vel og hefur nýtingin verið mjög góð. Komið hefur verið upp hleðslustöð fyrir gesti íbúðar félagsins í Þorrasölum. Þá eru einnig til staðar tvær stöðvar á bílaplaninu sem eru í eigu húsfélagsins. Fjölbýlishúsið var málað síðasta sumar. Framkvæmdin var á vegum húsfélagsins. Þá er til skoðunar að mála íbúð félagsins síðar á árinu, eða næsta vetur ásamt íbúðum Framsýnar í Þorrasölum.

Fræðslumál:

Ekki voru haldinn námskeið á vegum félagsins á síðasta starfsári. Hafi félagsmenn óskir um námskeið eru þeir vinsamlegast beðnir um að koma þeim til stjórnar eða starfsmanna félagsins. Þá eru dæmi um að félagsmenn fari á eigin vegum á námskeið. Í þeim tilfellum hefur Þingiðn komið að því að niðurgreiða námskeiðin fyrir félagsmenn í gegnum nýja fræðslusjóðinn sem félagið stofnaði til 2018.

Á síðasta ári fengu 6 félagsmenn styrki úr sjóðnum til náms/námskeiða samtals kr. 317.200,-. Samþykkt var að hækka styrki úr starfsmenntasjóði frá og með síðustu áramótum til samræmis við úthlutunarreglur Fræðslusjóðsins Landamenntar sem Framsýn á aðild að fyrir sína félagsmenn. Sjóðurinn stendur vel og því taldi stjórnin eðlilegt að hækka námstyrki til félagsmanna. Tillaga þess efnis liggur fyrir aðalfundinum.

Málefni sjúkrasjóðs:

Eins og fram kemur í ársreikningum félagins voru greiðslur til félagsmanna úr sjúkrasjóði félagsins samtals kr. 7.754.665,- á árinu 2023. Árið 2022 voru greiddar kr. 6.620.793,- í styrki til félagsmanna. Greiðslur til félagsmanna hækkuðu því aðeins milli ára.

Kjaramál:

Samiðn gekk frá kjarasamningi við Samtök atvinnulífsins 7. mars síðastliðinn. Þingiðn átti aðild að samningnum fyrir sína félagsmenn. Sameiginleg atkvæðagreiðsla aðildarfélaga Samiðnar stóð yfir frá 12.-19. mars 2024. Samningurinn var samþykktir með miklum meirihluta með gildistíma frá 1. febrúar 2024 til 31. janúar 2028. Alls voru 689 félagsmenn Samiðnar á kjörskrá, þar af 75 í Þingiðn. Kjörsókn var 39,6%. Atkvæði greiddu 273 félagsmenn innan Samiðnar. Já sögðu 78,4%. Nei sögðu 16,5% og 5,1% tóku ekki afstöðu. Samningurinn skoðast því samþykktur og hefur þegar tekið gildi.

Þá kom félagið að sérkjarasamningi við PCC á Bakka, ásamt Framsýn stéttarfélagi. Sá samningur var sömuleiðis samþykktur í atkvæðagreiðslu enda hluti af aðalkjarasamningi félaganna við Samtök atvinnulífsins og því með sama gildistíma, það er til 31. janúar 2028.

Atvinnumál og vinnustaðaeftirlit:

Atvinnuástandið hjá iðnaðarmönnum er almennt mjög gott um þessar mundir og mikið að gera hjá flestum ef ekki öllum iðnaðarmönnum enda hafa töluverðar framkvæmdir verið  í gangi á svæðinu.

Stéttarfélögin, Þingiðn og Framsýn, hafa frá árinu 2016 rekið öflugt vinnustaðaeftirlit á félagssvæðinu. Fullur vilji er til þess að halda áfram úti öflugu vinnustaðaeftirliti í fullu samráði við Alþýðusamband Íslands og helstu eftirlitsaðila í Þingeyjarsýslum. Mikið hefur verið lagt upp úr góðu samstarfi við aðrar eftirlitsstofnanir. Í því sambandi hafa stéttarfélögin átt gott samstarf við Vinnueftirlitið. Félagið hefur hins vegar kallað eftir því að aðrar eftirlitsstofnanir verði virkari í vinnustaðaeftirliti s.s. Vinnumálastofnun og ríkisskattstjóri. Lögreglan hefur óskað eftir auknu samstarfi við stéttarfélögin hvað varðar vinnustaðaeftirlit. Heilt yfir er ástand vinnumarkaðarins á starfssvæðinu gott varðandi réttindi og kjör félagsmanna. Vitaskuld hafa annað slagið komið upp mál sem krefjast viðbragða, hjá því verður ekki komist. Enn fremur er ljóst að gott ástand vinnumarkaðarins gerist ekki að sjálfu sér. Enginn vafi er á því að ef eftirlit og aðhald stéttarfélaganna væri ekki til staðar, myndi ástandið versna til muna.

Starfsemi félagsins:

Þingiðn hefur komið að mörgum málum frá síðasta aðalfundi. Ástæða er til að gera aðeins grein fyrir nokkrum þeirra.

Félagið hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn.

Félagið hefur komið að kynningum á starfsemi stéttarfélaga í grunnskólum á félagssvæðinu með Framsýn stéttarfélagi. Formaður Þingiðnar þáði heimboð forseta Íslands, Guðna T. Jóhannessonar til Bessastaða, í tilefni fullveldisdagsins 1. desember. Til móttökunnar voru boðnir formenn launþegasamtaka ASÍ og BSRB. Formenn stéttarfélaganna, Framsýnar, Þingiðnar og STH þáðu öll boð forseta, sem hélt þar tölu og bauð gestum að skoða húsakynni á Bessastöðum. Félagið kom að því að halda tveggja daga trúnaðarmannanámskeið í mars 2024, það er með öðrum aðildarfélögum Skrifstofu stéttarfélaganna. Félaginu barst beiðni frá Gólfklúbbi Húsavíkur um styrk vegna kaupa á golfhermi fyrir starfsemina sem verður í nýju húsnæði klúbbsins við völlinn. Stjórnin samþykkti að styrkja verkefnið um kr. 200.000,-. Önnur aðildarfélög Skrifstofu stéttarfélaganna komu að verkefninu með samtals kr. 300.000,-. Samþykkt var að heimila formanni félagsins að úthluta allt að kr. 400.000.- á árinu 2024 úr skúffusjóði formanns.

Húsnæði stéttarfélaganna:

Rekstur Hrunabúðar sf. hefur gengið vel. Um þessar mundir eru flest skrifstofurými í notkun og rúmlega það þar sem fundarsalurinn er einnig í útleigu. Hrunabúð sf. er félag í eigu Framsýnar og Þingiðnar. Eignarhluturinn á efri hæðinni skiptist þannig: Framsýn á 84% og Þingiðn 16%. Félagið var stofnað á árinu 2017 utan um sameiginlegt eignarhald og sameiginlegan rekstur á efri hæð Garðarsbrautar 26. Heildarvelta félagsins árið 2023 var kr. 10,7 milljónir samanborið við kr. 10,2 milljóna veltu árið 2022. Tekjuafgangur ársins nam kr. 1,6 samanborið við kr. 1,6 milljón árið 2022.

Til viðbótar eiga Framsýn og Þingiðn íbúð að Garðarsbraut 26, efri hæð sem fellur undir rekstur Hrunabúðar. Íbúðin sem um ræðir er alls um 180 fm. Á síðasta ári var gengið í að útbúa nýtt skrifstofurými við hliðina á íbúðinni sem hafði áður verið ófrágengið fram að því og ekki í fastri útleigu. Um er að ræða um 50 fm. húsnæði. Verkinu er þegar lokið og hefur PwC fært sig um set og tekið húsnæðið á leigu en þeir voru áður með tvær skrifstofur á leigu í Hrunabúð. Önnur þeirra er komin í útleigu. Einn starfsmaður starfaði hjá félaginu á árinu í hlutastarfi við þrif og ræstingar. Þess utan eru reiknuð stjórnunarlaun á rekstur Hrunabúðar og fram koma í ársreikningi húsfélagsins.

Merki félagsins:

Til skoðunar hefur verið að breyta um félagsmerki. Núverandi merki þykir of „þungt“. Leitað var til

Bjarka Lúðvíkssonar sem er grafískur hönnuður með að gera merki fyrir félagið. Sá hinn sami hannaði merki Framsýnar. Borist hafa nokkrar tillögur frá honum. Eftir umræður í stjórn félagsins var samþykkt að vísa málinu til aðalfundar félagsins til afgreiðslu. Hvað merkið varðar sem varð fyrir valinu hjá stjórn táknar það klaufhamar eða eins og segir í umsögn um merkið frá hönnuðinum;  „Grafískur klaufhamar sem gæti líka verið blóm með litlu broti í hringnum sem túlkar skugga af sólinni. Hringurinn gæti verið sólin.“ Á aðalfundinum kemur í ljós hvort fundarmenn telji ástæðu til að skipta um félagsmerki eða ekki.

Félagssvæðið:

Félagið hefur átt í deilum við Félag Málmiðnarmanna á Akureyri eftir að félagið tók ákvörðun um að stækka félagssvæðið yfir félagssvæði Þingiðnar fyrir nokkrum árum. Á aðalfundi Þingiðnar 2023 var ákveðið að svara þessum yfirgangi með því að stækka félagssvæðið með sambærilegum hætti og FMA gerði á sínum tíma. Síðan þá hefur afgreiðsla málsins verið hjá ASÍ sem ber að taka fyrir allar lagabreytingar. Því miður virðist sem það hafi verið mistök hjá ASÍ að samþykkja breytingarnar hjá FMA þar sem þeir eru í miklum vandræðum með afgreiðsluna á lagabreytingum Þingiðnar. Forseti ASÍ og lögmenn sambandsins hafa verið með málið til skoðunar og hafa nú lagt fram tillögu að lausn málsins sem verður til afgreiðslu á aðalfundinum. Stjórn Þingiðnar hefur fallist á að ljúka málinu með þessum hætti. Það er hins vegar aðalfundarins að afgreiða málið endanlega.

Málefni skrifstofunnar:

Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Starfsmannafélagi Húsavíkur og Framsýn. Þar starfa 7 starfsmenn með starfsmanni Virk í 5,8 stöðugildum. Að auki starfa 5 starfsmenn í hlutastörfum hjá Framsýn/Þingiðn við að þjónusta orlofsíbúðir í Reykjavík, Kópavogi, Akureyri og í Öxarfirði. Starfshlutfall þeirra er um 30% að meðaltali. Þá er einn starfsmaður í 5% starfi á Raufarhöfn. Þess ber að geta að Kristján Ingi Jónsson hætti störfum hjá stéttarfélögunum í lok síðasta árs. Í hans stað var Aðalsteinn J. Halldórsson ráðinn til starfa frá og með 1. nóvember 2023, en hann starfaði áður á Skrifstofu stéttarfélaganna frá árinu 2016 til ársins 2020 og hefur frá þeim tíma hefur hann verið í afleysingum hjá félögunum. Full ástæða er til að þakka Kristjáni fyrir vel unnin störf í þágu stéttarfélaganna. Starfsmenn stéttarfélaganna í Þingeyjarsýslum fóru í náms- og kynnisferð til Færeyja í febrúar 2024 ásamt formanni Þingiðnar. Með í för voru makar formanns og starfsmanna. Tilgangur ferðarinnar var að fræðast um starfsemi verkalýðsfélaga og stöðu verkafólks og sjómanna í Færeyjum auk þess að heimsækja Aðalræðisskrifstofu Íslands í Færeyjum. Sendinefndinni frá Húsavík var alls staðar mjög vel tekið og full ástæða er til að þakka frændum okkar í Færeyjum kærlega fyrir frábærar móttökurnar. Stéttarfélögin halda úti öflugri heimasíðu og Fréttabréfi sem tengir hinn almenna félagsmann við stjórn félagsins, starfsmenn og félagið í heild sinni. Full ástæða er til að hvetja félagsmenn til að fylgjast með starfi félagsins inn á heimasíðu stéttarfélaganna sem reglulega er uppfærð með fréttum og tilkynningum til félagsmanna auk þess sem hægt er að nálgast þar aðrar þarfar upplýsingar inn á vefnum er snerta s.s. kjaramál. Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla.  Ekki eru fyrirsjáanlegar breytingar á rekstri skrifstofunnar. Góð nýting er á félagsaðstöðunni enda mikil starfsemi í gangi á vegum stéttarfélaganna.“

Lagabreytingar:

Undir liðnum lagabreytingar urðu umræður um samskipti félagsins við Félag málmiðnarmanna á Akureyri um félagssvæði félaganna. Formaður gerði fundarmönnum grein fyrir því að Laganefnd ASÍ hefði ekki staðfest lagabreytingu félagsins sem samþykkt var á síðasta aðalfundi um stækkun á félagssvæðinu. Þingiðn hefði ákveðið að ráðast í þessa lagabreytingu til að mæta yfirgangi FMA. Í kjölfarið hefðu orðið töluverðar umræður hjá ASÍ um lagabreytingarnar. Eftir samræður innan ASÍ og með formönnum Þiniðnar og FMA hefði orðið til yfirlýsing sem væri til afgreiðslu á fundinum. Sagðist formaður þegar vera búinn að skrifa undir hana með fyrirvara um að formaður FMA gerði það einnig. Þrátt fyrir loforð þess efnis hefði formaður FMA ekki skrifað undir yfirlýsinguna. Formaður fór síðan yfir yfirlýsinguna:

„Við undirritaðir formenn f.h. Þingiðnar og FMA, lýsum því hér með yfir að stjórnir félaganna munu leggja fyrir aðalfundi/aukaaðalfundi félaganna á árinu 2024, tillögur þess að efnis að lagabreytingar FMA  annars vegar og hins vegar Þingiðnar sem nú bíða afgreiðslu miðstjórnar þar sem félagssvæðum félaganna var breytt svo þau skarast, verði breytt til fyrra horfs þ.a. að félagssvæði félaganna verði þau sömu og voru fyrir lagabreytingarnar.

Jafnframt lýsum við því yfir að félögin munu leggja sig fram um að mörk félagssvæða félaganna verði virt þar sem meginreglan er sú að skil iðgjalda og félagsaðild skuli ætíð ráðast af því hvar varanleg störf eru unnin. Félagsmenn sem hins vegar fara tímabundið til starfa á milli félagssvæða frá varanlegri starfsstöð, skulu eiga aðild á því svæði þar sem aðalstarfsstöð er. Félögin eru jafnframt sammála um að þeir félagsmenn félaganna sem nú eru starfandi á félagssvæðum þeirra en sem eru ranglega skráðir með félagsaðild skv. framansögðu skuli færa sig í það félag sem fer með kjarasamninginn á sínu svæði og félögin vinni saman að því að laga félagsaðildina á milli sín eins fljótt og unnt er.

Yfirlýsing þessi er háð tveimur skilyrðum. Í fyrsta lagi að stjórnir félaganna staðfesti hana og í öðru lagi að ASÍ haldi sérstakan fund um skipulagsmál á meðal formanna aðildarfélaganna. Að uppfylltum þessum skilyrðum skuldbinda stjórnir félaganna sig til þess að leggja fram og fylgja eftir þeim lagabreytingum sem yfirlýsing þessi fjallar um.“

Akureyri/Húsavík 12.4  2024

F.h. FMA                                                                                                            F.h. Þingiðnar

Jóhann Rúnar Sigurðsson                                                                            Jónas Kristjánsson

Eftir umræður var samþykkt að veita formanni fullt umboð til að klára málið enda staðfesti FMA sama skilning og afturkalli lagabreytinguna sem felur í sér að félagssvæðið þeirra nái yfir félagssvæði Þingiðnar. Gerist það mun Þingiðn draga lagabreytinguna jafnframt til baka. Formanni var falið að fylgja málinu eftir og klára yfirlýsinguna.

Ákvörðun árgjalda og starfsmenntagjalds:

Samþykkt var að hafa félagsgjaldið óbreytt milli ára, það er 0,7% af launum og lágmarksfélagsgjaldið verði 0,3% af mánaðarlaunum iðnaðarmanna samkvæmt kjarasamningi Samiðnar og Samtaka atvinnulífsins. Þá var samþykkt að félagsmenn greiði 0,3% í starfsmenntasjóð félagsins.

Hækkanir á styrkjum úr sjúkrasjóði:

Í ljósi þess að staða félagsins er góð samþykkti aðalfundurinn að hækka greiðslur úr sjúkrasjóði frá og með 1. maí 2024. Eftirfarandi tillaga var samþykkt samhljóða.

• Útfararstyrkur til aðstandenda eldri félagsmanna hækki úr kr. 150.000,- í kr. 160.000,-.
• Styrkur til félagsmanna vegna dvalar á heilsuhælum/Hveragerði hækki úr kr. 110.000,- í kr. 120.000,-.
• Fæðingarstyrkur til félagsmanna hækki úr kr. 160.000,- í kr. 200.000,-.
• Ættleiðingastyrkur til félagsmanna hækki úr kr. 160.000,- í kr. 200.000,-.
• Þurfi félagsmenn að gangast undir tæknifrjóvgun hækki styrkurinn úr kr. 160.000,- í kr. 200.000,-.
• Krabbabeinsskoðun taki smávægilegum breytingum. Áfram greitt fyrir hefðbundna skoðun að fullu. Heildarstyrkurinn verði kr. 40.000,- á ári til félagsmanna.
• Styrkur vegna heilsueflingar félagsmanna hækki úr kr. 40.000,- í kr. 45.000,-. 
• Þátttaka í ferðakostnaði félagsmanna vegna veikinda, það er þurfi þeir að ferðast til Akureyrar eða Reykjavíkur til lækna eða sérfræðinga, verði aukin um eina ferð. Fari úr þremur ferðum í fjórar.
• Þátttaka í göngugreiningu félagsmanna verði aukin úr kr. 6.000,- í kr. 10.000,-.
• Þátttaka vegna Laser eða augnsteinaaðgerða hækki úr kr. 60.000,- í kr. 80.000,- per auga.
• Gleraugnastyrkur til félagsmanna hækki úr kr. 70.000,- í kr. 90.000,-.
• Heyrnatækjastyrkir til félagsmanna hækki úr kr. 100.000,- í kr. 125.000,- per eyra.   

Reglur varðandi úthlutun styrkja úr sjúkrasjóði halda sér áfram.

Nýtt félagsmerki:

Formaður gerði fundarmönnum grein fyrir hugmyndum um að félagið taki upp nýtt félagsmerki. Undir umræðum kom fram að flestir voru á því að skipta um merki. Menn voru hins vegar ekkert of ánægðir með tillögurnar sem voru lagðar fram á fundinum. Eftir umræður var samþykkt að skoða málið betur.

„Miðstjórn Alþýðusambands Íslands telur óskiljanlega þá ákvörðun peningastefnunefndar Seðlabanka Íslands að halda stýrivöxtum óbreyttum. Ákvörðun þessi gengur þvert á fyrri rökstuðning nefndarinnar og er mikið áhyggjuefni með tilliti til áhrifa á hagkerfið og þar með afkomu almennings.

Miðstjórn vekur athygli á að við síðustu hækkun stýrivaxta Seðlabankans  í ágúst í fyrra sagði peningastefnunefnd hana nauðsynlega með tilvísun til óvissu um kjarasamninga, spennu í hagkerfinu og undirliggjandi verðbólgu.  

Nú liggur fyrir kjarasamningur til langs tíma sem gerður er í nafni stöðugleika. Hagtölur sýna að spenna fer minnkandi í hagkerfinu og að undirliggjandi verðbólga hefur hjaðnað. Án áhrifa húsnæðiskostnaðar mælist verðbólga 3,9% og samkvæmt kjarnavísitölu án áhrifa reiknaðrar húsaleigu mælist hún 3,5%. Sá rökstuðningur sem borinn var fram í ágúst á augljóslega ekki lengur við.  

Við þessar aðstæður kallar nákvæmlega ekkert á að stýrivöxtum sé haldið óbreyttum í 9,25%. Þvert á móti blasir við að forsendur eru til þess að hefja lækkun vaxta. Núverandi vaxtastig felur í sér skipulagðan flutning fjármagns frá þeim sem skulda til þeirra sem eiga peningana. Þannig er ákvörðun peningastefnunefndar fallin til að þjóna hagsmunum fjármagnsafla og auka enn ójöfnuð í landinu.  

Neyðarástand ríkir á húsnæðismarkaði og telja má víst að fasteigna- og leiguverð muni enn fara hækkandi. Þær hækkanir verða helsti aflvaki verðbólgunnar. Ofurvextir leysa ekki þann vanda.  

Algjört getu- og úrræðaleysi ríkis og sveitarfélaga er helsta orsök húsnæðiskreppunnar. Skortstefna hvað lóðir varðar heldur uppi fasteignaverði og þar með skatttekjum sveitarfélaga. Miðstjórn ASÍ telur þá framgöngu ósiðlega. Óþolandi er með öllu að launafólk í landinu beri kostnaðinn af þeim vítahring húsnæðiskreppu, verðbólgu og vaxta sem skortstefnan veldur.

Miðstjórn ASÍ telur að grípa verði þegar í stað til neyðaraðgerða með aðkomu verkalýðshreyfingarinnar, atvinnurekenda, stjórnvalda og samtaka í greininni til að rjúfa  kyrrstöðu á húsnæðismarkaði sem er botnfrosinn sökum lóðaverðs og vaxtastigs í landinu.

Miðstjórn minnir á að verkalýðshreyfingin féllst á hóflegar launahækkanir í síðustu kjarasamningum til að stuðla að hjöðnun verðbólgu og þar með lækkun vaxta. Launafólk í landinu krefst þess að ríki og sveitarfélög standi við skuldbindingar sínar og stundi ábyrga hagstjórn til að yfirlýstum markmiðum verði náð.“

Á aðalfundi Þingiðnar síðasta mánudag var m.a. gengið frá kjöri á nýjum stjórnarmönnum. Vigfús Þór Leifsson sem verið hefur í stjórn félagsins síðustu 18 ár gaf ekki kost á sér til áframhaldandi stjórnarsetu enda að komast á aldur. Núverandi formaður, Jónas Kristjánsson, þakkaði Vigfúsi fyrir samstarfið í gegnum tíðina og vel unnin störf í þágu félagsins og þar með félagsmanna.  

Greinilegt er að ræða formanns Framsýnar hitti í mark á hátíðarhöldunum 1. maí, ekki síst sá hluti sem varðaði  hans fyrstu skref á vinnumarkaði þegar hann ungur maður hóf störf hjá Fiskiðjusamlagi Húsavíkur, þá 18 ára gamall. Sjá meðfylgjandi úr ræðu formanns Framsýnar þar sem hann rifjar upp gamla tíma:

Ágæta samkoma!

Það er laugardagsmorgun og það er landburður af fiski. Árið er 1979.

Dagurinn er tekinn snemma og allir sem vettlingi geta valdið eru á leið niður að höfn til starfa í Aðgerðinni, deild innan Fiskiðjusamlags Húsavíkur.

Ingvar í Bókabúðinni fagnar, sem og aðrir kaupmenn. Þeir vita sem er, að verslun eykst í bænum þegar fiskast vel.

Nágrannar mínir, Eysteinn og Heiða, bjóða mér góðan daginn um leið og þau setjast upp í bílinn á Iðavöllunum.

Reyndar tók það yfirleitt töluverðan tíma fyrir þau að koma sér niður í fjöru enda Eysteinn langt frá því að vera þekktur ökuníðingur. Hann þótti reyndar fara mjög rólega og rúmlega það.

Utar í götunni má sjá aftan á þá bræður, Dóra og Stjána Hákonar rölta til vinnu. Stjáni var ekki glaður í bragði, enda hafði ÍA tapað fótboltaleik, kvöldinu áður, en hann var mikill Skagamaður.

Dóri skildi hins vegar ekkert í því hvað bróðir hans væri viðkvæmur fyrir fótbolta og brosti í kampinn. Að hans mati skipti það engu einasta máli hvort ÍA hefði farið með sigur að hólmi, eða ekki. Undir það tóku hjónakornin Guðný og Óli Bjarna á Sólvöllunum, sem sögðust reyndar ekkert vit hafa á fótbolta.

Liðið á Torginu, sem er bæjarhluti á Húsavík, hélt áfram að safnast saman á leið sinni til vinnu og hópurinn þéttist. Reyndar höfðu Siggi Steini og Dilli farið fyrr um morguninn, enda báðir sjómenn, en algengt var að bátar, stórir sem smáir, létu úr höfn eldsnemma á morgnanna.  Pabbi tilheyrði þessum hópi sem fór snemma, enda þurfti hann að gera allt klárt fyrir daginn í fiskimjölsverksmiðjunni, þar sem þrærnar voru yfirfullar af fiskúrgangi.

Kristjana og Bjössi Þorkels sem bjuggu á Reykjaheiðarveginum kinkuðu kolli og gengið af Brávöllunum kom stormandi að venju.

Fyrir hópnum fór Þráinn Kristjánsson, barnmargur maður. Í humátt á eftir honum komu þrír af sonum hans, þeir Siffi, Lilli og Goði, allt hörkuduglegir ungir menn.

Fyrir aftan þá glitti í kratann, Dóra Þorgríms, sem veifaði Alþýðublaðinu með bros á vör, enda Alþýðuflokkurinn komið vel út úr nýlegri skoðanakönnun.

Hann hvatti okkur ungu mennina til að setja X við A í næstu kosningum. Já menn voru pólitískir á þessum árum, vissulega voru þeir flestir sannir vinstrimenn, kratar eða kommar, sem unnu fyrir neðan Bakkann.

Máni í Tungu verður á vegi okkar, hálf þreytulegur. Sagði hann kartöflurnar í garðinum hafa haldið fyrir sér vöku þá um nóttina og hann því lítið sem ekkert sofið. Þær þroskuðust svo hratt. „Það brakar og brestur í jarðveginum þegar þessir rosalegu boltar eru að ryðja frá sér moldinni með hávaða og látum“ sagði Máni íbygginn á svip.

Já það lífgaði upp á tilveruna að hlýða á ýkjusögurnar hjá Mána í Tungu enda bjó hann yfir mikilli frásagnargáfu, þessi mikli meistari.

Þegar komið var yfir Garðarsbrautina við Hrunabúð, verslun kaupfélagsins, hélt verkafólkið áfram að streyma frá öðrum götum bæjarins, sjómenn, beitningamenn og fiskvinnslufólk gengu í takt. Lífsbjörgin var sjórinn og það sem hann gaf.

Á þessum tíma unnu flestir fyrir neðan Bakkann. Bjarney í Múla veifar unga manninum og spyr hvað sé að frétta, hvort þetta sé fyrsti dagurinn í vinnu eftir búfræðinámið á Hvanneyri.

Áður en ég næ að svara konunni með þykku gleraugun tekur Geiri í Ásgarði af mér orðið og fer að lýsa frétt sem hann hafði heyrt í útvarpinu fyrr um morguninn sem enginn annar kannaðist við að hafa heyrt. Er hann sakaður um að fara ekki rétt með. Geiri var fljótur til svara, hann skildi það vel að aðrir hefðu ekki heyrt sömu fréttina og hann, sem varðaði alla heimsbyggðina, enda ætti hann öðruvísi útvarp en aðrir. Hans útvarp væri nefnilega rússneskt og það flytti öðruvísi og ábyrgari fréttir.

Menn hristu höfuðið yfir þessum útskýringum Geira í Ásgarði. Þetta væri kallað að hagræða sannleikanum. Geiri gerði lítið fyrir það og hélt göngu sinni áfram með bros á vör, enda náð að hækka blóðþrýstinginn hjá nokkrum í hópnum.

Áfram var haldið niður í Aðgerð og Ívar Geirs, Palli Helga, Hjalli Geira, Doddi Kobbi, Hallgrímur Guðmunds og Torfi Sig. bætast í hópinn á lokametrunum. Við tekur langur og strangur vinnudagur undir stjórn Alla Þorgríms verkstjóra.

Já, það var ómetanlegt að verða samferða öllu þessu frábæra og yndislega fólki, sem mörg hver þurftu að hafa verulega mikið fyrir lífinu á þessum árum.

Það sem er fallegt við þennan tíma er að það voru allir jafnir sem störfuðu í Aðgerðinni, það hjálpuðust allir að.

Vissulega voru ekki allir heilsuhraustir og sumir reyndar með skerta starfsorku. Það skipti bara engu máli, við litum á okkur sem jafningja og léttum undir hver með öðrum. Vinnustaðamenningin var einstök.

Ég skal fúslega viðurkenna að ég sakna þessa tíma þegar ég horfi yfir farinn veg.

Óhætt er að segja að þessi tími hafi mótað mig til lífstíðar þar sem grunnurinn að ævistarfinu var lagður. Annars stæði ég ekki hér í dag, þetta löngu síðar, sem formaður í stéttarfélagi.

Vinnufélagarnir kusu mig sem trúnaðarmann árið 1981, þegar ég var tvítugur að aldri auk þess að hvetja mig til þess að taka að mér formennsku í Verkalýðsfélagi Húsavíkur, nú Framsýnar stéttarfélags þann 3. maí 1994.  

Fyrir þennan mikla og góða stuðning er ég þakklátur nú þegar ég fagna 30 ára formennsku. Þetta hefur verið langur og strangur tími sem hefur gefið mér mikið.

Þegar ég tók við félaginu árið 1994 lofaði ég fráfarandi formanni Verkalýðsfélags Húsavíkur, Helga Bjarnasyni, að viðhalda hátíðarhöldunum 1. maí. Blessuð sé minning hans.

Helgi hafði ákveðnar áhyggjur af því að ungir menn eins og ég hefðu ekki sama skilning á mikilvægi dagsins eins og þeir sem eldri væru.

Síðan þá hef ég reynt að fylgja eftir vegvísi félaga Helga með mínu frábæra samstarfsfólki sem sannast með þessum glæsilegu hátíðarhöldum.

Ég veit að Helgi Bjarnason er með okkur í anda hér í dag og upplifir stemninguna sem fylgir baráttudegi verkafólks. Það svífur baráttuandi yfir hátíðinni.