kuti

Forsendunefnd kjarasamninga hefur úrskurðað að kauptaxtaauki virkjast frá og með 1. apríl næstkomandi. Kauptaxtaaukinn felur í sér að lágmarkstaxtar kjarasamninga hækka um 0,58%. Forsendur þessa eru hækkun launavísitölu á almennum markaði umfram umsamdar taxtahækkanir á fyrsta tímabili stöðugleikasamningsins.

Samkvæmt kjarasamningum á árunum 2024-2028, ber nefndinni að fylgjast með efnahagslegum forsendum og mögulegum áhrifum á markmið samninga um minnkun verðbólgu og lækkun vaxta. Einnig verður lagt mat á samningsforsendur í september 2025 og september 2026.

Yfirlýsing launa- og forsendunefndar í heild sinni

Launa- og forsendunefnd kjarasamninga á almennum vinnumarkaði, sem skipuð er fulltrúum frá ASÍ og SA, kom saman til fyrsta fundar föstudaginn 7. mars. Á fundinum var úrskurðað að kauptaxtaauki virkjast frá og með 1. apríl næstkomandi. Kauptaxtaaukinn felur í sér að kauptaxtar kjarasamninga hækki um 0,58% frá og með 1. apríl og skýrist af því að launavísitala á almennum markaði hækkaði umfram umsamdar taxtahækkanir viðmiðunartaxtans á fyrsta tímabili stöðugleikasamningsins.

Nefndinni, sem starfar samkvæmt kjarasamningum á árunum 2024-2028, ber að fylgjast með framvindu efnahagslífs og mögulegum áhrifum á markmið samninga um minnkun verðbólgu og lækkun vaxta. Nefndinni ber jafnframt að leggja mat á samningsforsendur í september 2025 og september 2026.

Verðbólga gengið niður og kaupmáttur aukist

Meginmarkmið samninganna er að stuðla að minnkun verðbólgu og lækkun vaxta. Verðbólga mældist um 8% þegar undirbúningur kjarasamninga hófst haustið 2023. Forsendunefndin er sammála um að árangur samninganna hafi verið merkjanlegur, verðbólga mælist í dag 4,2% en 2,7% ef horft er fram hjá áhrifum húsnæðisverðs. Kaupmáttur launa hefur aukist á fyrsta ári samnings.

Seðlabankinn hóf vaxtalækkunarferli í október síðastliðnum og hafa stýrivextir lækkað um 1,50 prósentur frá gerð samninga. Á sama tíma hefur aðhald peningastefnunnar aukist og raunvextir hækkað.

Aukin óvissa um efnahagshorfur

Forsendur eru fyrir áframhaldandi hjöðnun verðbólgu á næstu mánuðum og þar með frekari lækkun vaxta. Hins vegar hefur alþjóðleg óvissa um efnahagshorfur aukist og hætta á að Ísland verði fyrir áhrifum af vaxandi átökum á alþjóðavettvangi og viðskiptastríðum. Forsendunefndin telur mikilvægt að stjórnvöld, Seðlabanki Íslands og fyrirtæki vinni áfram að markmiðum samninganna og skapi þannig forsendur fyrir áframhaldandi minnkun verðbólgu og lækkun vaxta. Þar telur nefndin brýnt að ríki og sveitarfélög vinni með peningastefnunni, gæti hófs í álagningu gjalda og taki markviss skref í íbúðauppbyggingu.

Um þessar mundir stendur yfir tveggja daga trúnaðarmannanámskeið á vegum stéttarfélaganna. Trúnaðarmennirnir koma frá Framsýn, Þingiðn, Starfsmannafélagi Húsavíkur og Verkalýðsfélagi Þórshafnar. Við látum myndirnar tala sínu máli en námskeiðið klárast síðar í dag.

Stjórn Framsýnar kemur saman til fundar á morgun, þriðjudag. Fjölmörg mál eru á dagskrá fundarins.

Dagskrá:

1. Inntaka nýrra félaga

2. Fundargerð síðasta fundar

3. Bjarg íbúðafélag – uppbygging á Húsavík

4. Málþing – Konur í nýju landi

5. Flugsamgöngur Húsavík-Reykjavík

6. Stjórn sjúkrasjóðs félagsins

7. Fjárhagsáætlun Skrifstofu stéttarfélaganna 2025

8. Erindi sjómenn-byggðakvóti Raufarhöfn

9. Strandveiðar-samantekt Norðurþings

10. Heimsóknir frá Carbfix/Heildelberg

11. Tilgreind séreign

12. Stofnanasamningur við Náttúruverndarstofnun

13. Aðalfundur Orlofsbyggðarinnar á Illugastöðum

14. Lagfæringar á húsnæði stéttarfélaganna

15. Hátíðarhöldin 1. maí

16. Orlofsmál 2025

17. Trúnaðarmannanámskeið

18. Önnur mál

Í gærmorgun mátti sjá grunn í Lyngholti 42-52 á Húsavík undir raðhús. Sólarhring síðar er risið 6 íbúða raðhús á grunninum. Um er að ræða raðhús, svokölluð ‘kubbahús’, sem Bjarg íbúðafélag er að reisa á Húsavík í samstarfi við Norðurþing. Björn Traustason, framkvæmdastjóri Bjargs hefur sagt í fjölmiðlum að þetta sé í raun fyrsta verkefni félagsins þessarar tegundar, en örugglega ekki það síðasta. Húsin eru smíðuð á Selfossi, af SG húsum. Eins og fram hefur komið á heimasíðu stéttarfélaganna var slegist um þessar sex íbúðir og bíða leigjendur spenntir eftir því að flytja inn í nýjar og glæsilegar íbúðir. Um er að ræða sérbýli með litlum garði, en allar íbúðirnar eru 4ra herbergja. Reiknað er með að íbúðirnar verði tilbúnar í apríl 2025. Framsýn, sem hafði frumkvæði að því að Bjarg kæmi að uppbyggingu á Húsavík, mun hvetja til frekari húsbygginga á vegum Bjargs á Húsavík enda eftirspurnin greinilega mikil eftir óhagnaðardrifnum leiguheimilum. Aðalmarkmið Bjargs er að tryggja fólki húsnæðisöryggi án hagnaðarsjónarmiða. Í þessu kerfi þarf fólk ekki að hafa áhyggjur af því að missa húsnæðið. Íbúar halda húsnæðinu eins lengi og þeir vilja og breytir engu þó að tekjur íbúa hækki þegar líður á.

Þingmaðurinn Ingvar Þóroddsson óskaði eftir fundi með formanni Framsýnar í dag til að fara yfir atvinnu- og byggðamál í Þingeyjarsýslum og önnur þau mál sem brenna á heimamönnum. Ingvar er þingmaður í Norðausturkjördæmi auk þess að sitja í nefndum og ráðum á vegum Alþingis. Aðalsteinn Árni lagði sérstaka áherslu á mikilvægi þess að þingmenn kjördæmisins gangi til liðs við heimamenn, hvað varðar samgöngumál, með það að markmiði að tryggja öruggar flugsamgöngur um Húsavík til framtíðar. Þá lagði hann ekki síður áherslu á mikilvægi þess að byggðakvóti til handa Raufarhöfn verði aukin verulega. Að mati Framsýnar er aukin byggðakvóti ein besta byggðaaðgerðin fyrir Raufarhöfn sem lengi hefur verið í vörn og ekki getað treyst á fjölbreytt atvinnulíf, fiskeldi eða vaxandi ferðaþjónustu líkt og þekkist víða í hinum dreifðu sjávarbyggðum landsins. Til upprifjunar má geta þess að Raufarhöfn var eitt fyrsta byggðarlagið á Íslandi sem fór í verkefni Byggðastofnunar „Brothættar byggðir.“ Ingvar sagðist átta sig vel á stöðunni, þakkaði fyrir upplýsingarnar um leið og hann lagði mikið upp úr góðu samstarfi við Framsýn og íbúa svæðisins hvað varðaði hagsmunamál Þingeyinga.  

Eins og áður hefur komið fram á heimasíðu stéttarfélaganna hefur Bjarg íbúðafélag, sem er óhagnaðardrifið íbúðafélag, unnið að því að byggja sex íbúða raðhús að Lyngholti 42-52 á Húsavík í samstarfi við Norðurþing. Nú liggur fyrir að bílalestinn mun væntanlega leggja af stað frá Selfossi á morgun með einingarnar til Húsavíkur. Hún ætti því að vera á komin norður síðdegis á föstudaginn gangi allt eftir. Hamingjustund og rúmlega það. Húsavík, blómstarandi bær, enda vorveður í lofti.

Á meðfylgjandi mynd má sjá að allt er að verða klárt fyrir ferðina norður með einingarnar. Búið er að lesta flutningabílana fyrir langa ferð til Húsavíkur. Alls þarf 12 öfluga flutningabíla til að færa Þingeyingum sex íbúða raðhús sem er hreint út sagt magnað.

Félagsgjöld í Framsýn eru ákveðin á aðalfundi félagsins á hverjum tíma. Þau hafa verið óbreytt til fjölda ára eða 1% af launum starfsmanna. Til að teljast fullgildur félagsmaður þurfa menn að vera á vinnumarkaði og hafa náð að greiða lágmarksfélagsgjald kr. 16.379,- á árinu 2024. Félagsmenn sem eru á vinnumarkaði og ná ekki að greiða lágmarksgjaldið s.s. vegna þess að þeir eru í hlutastarfi eða störfuðu á vinnumarkaði, aðeins hluta af árinu, stendur til boða að greiða mismuninn á greiddu félagsgjaldi á árinu og lágmarksgjaldinu enda ætli þeir sér  að vera  áfram á vinnumarkaði. Geri menn það hafa menn fullt kjörgengi í félaginu og teljast fullgildir félagsmenn. Eða eins og stendur í lögum félagsins; „Þeir félagsmenn, sem ekki hafa náð að greiða það lágmarksgjald, sem aðalfundur hefur ákveðið skulu færðir á aukafélagaskrá. Greiði þeir skuld sína vegna næstliðins starfsárs fyrir 31. mars, skulu þeir á ný færðir á skrá yfir fullgilda félagsmenn.“ Rétt er að taka skýrt fram að greiðslur til félagsmanna úr sjóðum félagsins s.s. sjúkra- orlofs eða starfsmenntasjóðum taka ávallt mið af greiðslum atvinnurekenda í þessa sjóði af viðkomandi félagsmönnum ekki lágmarksgjaldinu enda kjarasamningsbundið að atvinnurekendur greiði í þessa sjóði, ekki almennir félagsmenn. Frekari upplýsingar eru í boði á Skrifstofu stéttarfélaganna eða með því að senda fyrirspurn á  netfangið kuti@framsyn.is.

Ný stofnun, Náttúruverndarstofnun, hefur tekið við verkefnum sem snúa að náttúruvernd, lífríkis- og veiðistjórnun hjá Umhverfisstofnun og starfsemi Vatnajökulsþjóðgarðs. Stofnunin fer með stjórnsýslu, eftirlit og önnur verkefni á sviði náttúruverndar og sjálfbærrar þróunar og á sviði friðlýstra svæða, vernd villtra fugla og spendýra og veiðistjórnunar. Þá sinnir stofnunin samhæfingu í skipulagi svæðisbundinnar stjórnunar og verndar og eftirliti á ofangreindum sviðum.

Starfsgreinasamband Íslands hefur fram að þessu verið með sameiginlegan stofnanasamning við Vatnajökulsþjóðgarð og Umhverfisstofnun. Vinna er hafin við að aðlaga samninginn að nýrri stofnun, Náttúruverndarstofnun. Á meðfylgjandi mynd má sjá formann Framsýnar, Aðalstein Árna og Hjördísi formann Afls, starfsgreinafélags undirbúa viðræður við stjórnendur Náttúruverndarstofnunnar. Með þeim á myndinni er Björg Bjarnadóttir framkvæmdastjóri SGS sem heldur utan um verkefnið fh. aðildarfélaga sambandsins sem aðild eiga að samningnum. Hvað Framsýn varðar starfa landverðir á vegum Náttúruverndarstofnunar víða á félagssvæðinu. Þar á meðal í Mývatnssveit og í Ásbyrgi.

Stéttarfélögin í Þingeyjarsýslum, í samstarfi við Norðurþing og Alþýðusamband Íslands stóðu fyrir opinni málstofu og pallborðsumræðum á Alþjóðlegum baráttudegi kvenna, laugardaginn 8. mars. Samkoman fór fram í Golfskálanum á Húsavík og var fjölsótt. Sjónum var beint að framlagi kvenna af erlendum uppruna til íslensks samfélags og stöðu þeirra hér á landi. Yfirskrift málstofunnar var „Konur í nýju landi – okkar konur“. Meðal þeirra sem voru með erindi voru Guðrún Margrét Guðmundsdóttir jafnréttisfulltrúi hjá Alþýðusambandi Íslands, Agnieszka Szczodrowska starfsmaður Stéttarfélaganna í Þingeyjarsýslum, Aneta Potrykus formaður Verkalýðsfélags Þórshafnar og Ósk Helgadóttir varaformaður Framsýnar sem jafnframt fór fyrir skipulagningu málstofunnar fh. Framsýnar stéttarfélags. Þá tóku Nele Marie Beitelstein fjölmenningafulltrúi Norðurþings, Aleksandra Leonardsdóttir sérfræðingur ASÍ í fræðslu og inngildingu, Fanný Cloé, íslenskukennari fyrir innflytjendur, Christin Irma Schröder verkefnastjóri hjá PCC og Sylwia Gręda, lögfræðingur og aðstoðarmaður daglegs reksturs hjá Norðursiglingu þátt í pallborðsumræðum. Huld Aðalbjarnardóttir lífsþjálfi hélt utan um málstofuna sem var öllum til mikils sóma.

Formaður Framsýnar skrifaði nýlega grein á visi.is um skipulagsmál í Garðabæ. Aðalsteinn Árni er ekki einungis formaður Framsýnar heldur er hann einnig formaður Húsfélagsins í Þorrasölum 1-3 þar sem félagið á sjúkra- og orlofsíbúðir. Veruleg óánægja er meðal íbúa í fjölbýlishúsunum í Þorrasölum með fyrirhugaðar vegaframkvæmdir í bakgarðinum við fjölbýlishúsin. Í greininni gerir Aðalsteinn  grein fyrir afstöðu íbúanna í Þorrasölum og krefst þess að tillit verði tekið til íbúðaeigenda. Annað komi ekki til greina.

https://www.visir.is/g/20252697012d/skipulagsslys-i-gardabae

Þingeyjarsveit sem er vaxandi sveitarfélag leitar að starfsmönnum til starfa. Um er að ræða mörg spennandi störf. Hér má fræðast betur um störfin sem eru í boði í þessu frábæra sveitarfélagi.

Sumarstörf í íþróttamiðstöðvum Þingeyjarsveitar
Íþróttamiðstöðvar Þingeyjarsveitar óska eftir sumarstarfsfólki til starfa frá byrjun júní 2025. Umsækjendur þurfa að hafa náð 18 ára aldri, vera með ríka þjónustulund og samskiptahæfileika. Nauðsynlegt er að hafa frumkvæði, vera sjálfstæður í vinnubrögðum og hafa kunnáttu í skyndihjálp. Hreint sakarvottorð er skilyrði. Reynsla af afgreiðslustörfum, gæslu og þrifum er kostur.

Sundlaugin á Laugum
Auglýst er eftir fólki til að sinna sundlaugarvarðarstarfi í tímavinnu. Um er að ræða gæslu á sundlaugarsvæði, vöktun og þrif. Nauðsynlegt er að standast sundpróf laugarvarða skv. reglugerð um hollustuhætti á sund- og baðstöðum. Nánari upplýsingar um starfið veitir Magnús Már, magnus@thingeyjarsveit.is

Íþróttamiðstöðin í Reykjahlíð
Auglýst er eftir sumarstarfsmanni í 100% starf. Starfið felur í sér afgreiðslustörf, gæslu, þrif og annað sem til fellur. Nánari upplýsingar um starfið veitir Ásta Price, asta.price@thingeyjarsveit.is
Laun eru greidd skv. kjarasamningi Sambands íslenskra sveitarfélaga við viðkomandi stéttarfélag. Umsóknarfrestur er til 25. mars 2025.
Umsóknum ásamt ferilskrá og sakavottorði skal skila á skrifstofu Þingeyjarsveitar eða á netfangið umsokn@thingeyjarsveit.is.

Starf í heimaþjónustu í Bárðardal og Kinn
Um er að ræða u.þ.b. 5 – 6 tíma í viku (einn dag) eins og er við þjónustu á heimilum í Bárðardal, við Ljósavatn og í Kaldakinn. Mikill sveigjanleiki í vinnutíma.
Félagsleg heimaþjónusta felur í sér margskonar aðstoð við einstaklinga á heimilum sínum sem geta ekki hjálparlaust sinnt daglegum verkefnum vegna öldrunar, veikinda, álags eða fötlunar. Áhersla er lögð á persónulega þjónustu þar sem samskipti og virðing eru höfð í fyrirrúmi. Þrif, aðstoð við þrif og önnur heimilisstörf er stórt verkefni í heimaþjónustu en einnig er um að ræða verkefni tengd félagslegum stuðningi og önnur aðstoð og stuðningur. Starfsmaður í heimaþjónustu þarf að vera hvetjandi og jafnframt sýna umburðarlyndi og skilning á aðstæðum þjónustuþega.

Hæfniskröfur:

• Framúrskarandi færni í mannlegum samskiptum, jákvæðni, frumkvæði, sveigjanleiki og geta til að vinna sjálfstætt
• Áhugi og/eða reynsla af að starfa með öldruðum
• Almenn kunnátta við þrif og önnur heimilisstörf
• Stundvísi, heiðarleiki og góð kunnátta í íslensku
• Umsækjendur verða að hafa náð 18 ára aldri, hafi gild ökuréttindi og bíl til umráða

Laun eru samkvæmt gildandi kjarasamningi Sambands íslenskra sveitarfélaga og hlutaðeigandi stéttarfélags. Gerð er krafa um hreint sakarvottorð.
Umsóknarfrestur er til og með 24. mars 2025.
Umsóknir skal senda í tölvupósti til sviðsstjóra fjölskyldusviðs Þingeyjarsveitar: asta.flosadottir@thingeyjarsveit.is

Nánari upplýsingar um starfið veitir Ásta F. Flosadóttir sviðsstjóri fjölskyldusviðs í síma 512 1800 eða á netfangið asta.flosadottir@thingeyjarsveit.is

Flokksstjóri vinnuskóla 
Starfið felst m.a. í því að stjórna starfi nemenda vinnuskólans, leiðbeina nemendum og fræða þá um rétt vinnubrögð og verkþætti í starfinu í samráði við verkstjóra áhaldahúss. Sinna verkefnum við hreinsun á umhverfi og almennum garðyrkjustörfum. Flokksstjóri vinnur auk þess markvisst að því að efla liðsheild og góða líðan nemenda. 

Hæfniskröfur:  

• Vera góð fyrirmynd 
•  Stundvísi og vinnusemi 
• Sjálfstæði og frumkvæði í starfi.  

Bílpróf er skilyrði og viðkomandi þarf að hafa hreint sakavottorð. 
Laun og starfskjör eru samkvæmt kjarasamningi viðkomandi stéttarfélags og Sambands íslenskra sveitarfélaga. Æskilegt  er að viðkomandi geti hafið störf eigi síðar en 1. júní eða eftir samkomulagi.
Umsóknarfrestur er til og með 20. mars 2025.    
Nánari upplýsingar um starfi veitir Ásta F. Flosadóttir sviðsstjóri fjölskyldusviðs: asta.flosadottir@thingeyjarsveit.is eða í síma 512-1800.
Umsóknum ásamt ferilsskrá skal skila á netfangið umsokn@thingeyjarsveit.is  

Öll kyn eru hvött til þess að sækja um. Þingeyjarsveit áskilur sér rétt til að hafna öllum umsóknum. Öllum umsóknum verður svarað þegar ákvörðun um ráðningu hefur verið tekin. 

Sumarstarf í Þjónustumiðstöð Þingeyjarsveitar
Í starfinu felst m.a. sláttur opinna svæða og umhirða lóða stofnanna, viðhald og eftirlit með eignum sveitarfélagsins, ásamt öðrum störfum sem falla undir verksvið Þjónustumiðstöðvar.  

Menntunar- og hæfniskröfur : 

• Iðnmenntun sem nýtist í starfi er kostur  
• Reynsla af sambærilegu starfi er kostur 
• Þjónustulund og hæfni í mannlegum samskiptum er skilyrði   
• Sjálfstæð og öguð vinnubrögð   
• Geta til að vinna í teymi 
• Ökuréttindi eru skilyrði  
• Vinnuvélaréttindi eru æskileg  
• Aukin ökuréttindi eru kostur  
• Íslenskukunnátta 

Laun og starfskjör eru samkvæmt kjarasamningi viðkomandi stéttarfélags og Sambands íslenskra sveitarfélaga. Æskilegt  er að viðkomandi geti hafið störf eigi síðar en 1. júní eða eftir samkomulagi.   

Nánari upplýsingar gefur Ingimar Ingimarsson sviðsstjóri umhverfis- og framkvæmdasviðs Þingeyjarsveitar í síma 512-1800 eða í tölvupósti ingimar@thingeyjarsveit.is    

Umsóknarfrestur er til og með 20. mars og skal senda umsóknir á umsokn@thingeyjarsveit.is ásamt ferilskrá og kynningarbréfi. 

Öll kyn eru hvött til þess að sækja um. Þingeyjarsveit áskilur sér rétt til að hafna öllum umsóknum. Öllum umsóknum verður svarað þegar ákvörðun um ráðningu hefur verið tekin. 

Aðstoð í eldhúsi Þingeyjarskóla
Við óskum eftir að ráða starfsfólk í mötuneyti Þingeyjarskóla. Um er að ræða tvær stöður:
• 80% starfshlutfall.
• 65% starfshlutfall.
Ráðið er í stöðurnar frá 1. apríl n.k. eða eftir nánara samkomulagi.

Helstu verkefni
• Vinnur undir leiðsögn yfirmatráðs.
• Þátttaka í matseld fyrir nemendur og starfsfólk Þingeyjarskóla.
• Sér um að matur sé samkvæmt lýðheilsumarkmiðum, hollur, fjölbreyttur og snyrtilega framborinn.
• Frágangur og þrif í eldhúsi og matsal.

Menntunar- og hæfniskröfur
• Menntun og reynsla sem nýtist í starfi er kostur.
• Skipulagshæfni, snyrtimennska og sjálfstæði í vinnubrögðum.
• Hæfni í mannlegum samskipum og frumkvæði í starfi.
• Stundvísi og áreiðanleiki.

Þingeyjarskóli er samrekinn leik-, grunn- og tónlistarskóli með um 100 nemendur. Lögð er áhersla á samvinnu og sameiginlega ábyrgð starfsmanna á verkefnum skólans. Áhugasamir einstaklingar, án tilliti til kyns, eru hvattir til að sækja um.
Umsóknarfrestur er til og með 17. mars og skulu umsóknir berast á netfangið lilja@thingskoli.is

Frekari upplýsingar veitir Lilja Friðriksdóttir, skólastjóri Þingeyjarskóla, í gegnum tölvupóst lilja@thingskoli.is og í síma 464-3580/847-2372. 

Í byrjun síðasta mánaðar fengu forsvarsmenn Framsýnar kynningu á starfsemi Heidelberg á Íslandi en fyrirtækið er með til skoðunar að skoða kosti þess og galla að koma upp starfsemi sinni á Húsavík. Fyrirtækið hefur verið í nánu sambandi við byggðarráð Norðurþings vegna málsins. Fyrirtækið vill koma upp framleiðslu á möluðu móbergi til útflutnings og íblöndunar við sement fáist til þess tilskilin leyfi. Tilgangurinn með verkefninu er ekki síst að stuðla að því minnka verulega kolefnisspor sementsframleiðslu. Það verður forvitnilegt að fylgjast með framvindu málsins en mikill áhugi er fyrir því að efla atvinnustarfsemi á Húsavík enda búum við vel hvað varðar náttúruauðlindir.

Öskudagurinn hefur farið vel fram í góðu veðri á Húsavík. Eftir að frí var gefið í Borgarhólsskóla um hádegi hafa nemendur og yngri börn verið á ferðinni í bænum. Starfsfólk Skrifstofu stéttarfélaganna þakka öllum þeim sem lögðu leið sína til þeirra í dag fyrir komuna. Besti dagur ársins og bestu gestirnir.  

Nýlega samþykkti Sveitarstjórn Norðurþings samhljóða viljayfirlýsingu um samstarf við Carbfix varðandi uppbyggingu og rekstur athafnasvæðis til móttöku, niðurdælingar, og bindingar CO2 á Bakka við Húsavík. Carbfix er í eigu Orkuveitu Reykjavíkur.

Í viljayfirlýsingunni kemur m.a. fram að aðilar lýsa yfir áhuga á að móttökustöð Carbfix um niðurdælingu og bindingu á CO2 verði byggð upp á Bakka. Verkefnið felli vel að nýrri umhverfis- og loftslagsstefnu sveitarfélagsins, hringrásarhagkerfinu og þeirri hugmyndafræði sem hefur verið mótuð af samfélaginu um Grænan iðngarð á Bakka.

Carbfix kynnti verkefnið fyrir byggðarráði Norðurþings, Framsýn og hagaðilum á Húsavík. Að mati forsvarsmanna stéttarfélagana er um áhugavert verkefni að ræða sem full ástæða sé að skoða áfram með jákvæðum huga. Þá má geta þess að töluverður fjöldi starfa fylgir svona starfsemi.

Til fróðleiks má geta þess að Carbfix hf. vinnur að þróun og uppbyggingu móttökustöðva á Íslandi fyrir koldíoxíð (CO2) sem verður varanlega bundið í berg með Carbfix tækninni. Sjá heimasíðu: https://www.carbfix.com/

Töluverð umræða hefur verið um mikilvægi strandveiða fyrir byggðalög landsins, ekki síst eftir að núverandi ríkistjórn boðaði breytingar á kerfinu sem byggja á því að efla strandveiðikerfið. Eins og gefur að skilja eru mjög skiptar skoðanir um gagnsemi og mikilvægi strandveiða meðal þjóðarinnar. Sjómannadeild Framsýnar samþykkti á dögunum að kalla eftir upplýsingum frá Norðurþingi á mikilvægi strandveiða fyrir sveitarfélagið enda liggi upplýsingar þess efnis fyrir. Kallað er eftir fjölda báta sem stunduðu strandveiðar frá Húsavík, Kópaskeri og Raufarhöfn árið 2024, heildar aflamagni og hvort vitað sé hversu stór hluti aflans af strandveiðibátunum fór til vinnslu hjá fiskvinnslufyrirtækjum í sveitarfélaginu.

Það er alltaf ánægjulegt að koma til Þórshafnar á Langanesi. Formaður Framsýnar gerði sér ferð austur fyrir helgina  til að heimsækja formann Verkalýðsfélags Þórshafnar auk þess að spjalla við félagsmenn VÞ sem urðu á vegi hans. Að sjálfsögðu var tekið hús á Birni L. Lárussyni sveitarstjóra og hans ágæta samstarfsfólki á skrifstofu Langanesbyggðar sem ekki er skoðanalaust. Ánægjulegt er að sjá að uppbygging Ísfélagsins heldur áfram á Þórshöfn en þar er verið að byggja stóra frystigeymslu við höfnina sem ætlað er að bæta alla aðstöðu fyrirtækisins á staðnum. Bygg­ing henn­ar er nú kom­in vel á veg ásamt tengi­bygg­ingu sem er rúm­ir 600 fer­metr­ar. Byrjað er að reisa stál­grind húss­ins sem er um 17 metra há. Að grunn­fleti er frystigeymslan um 2.070 fer­metrar. Já, það er allt að gerast á Þórshöfn.

Stéttarfélögin í Þingeyjarsýslum, í samstarfi við Norðurþing og Alþýðusamband Íslands munu standa fyrir opinni málstofu og pallborðsumræðum á Alþjóðlegum baráttudegi kvenna, laugardaginn 8. mars. Yfirskriftin er; „Konur í nýju landi – okkar konur.“ Þar verður sjónum beint að framlagi kvenna af erlendum uppruna til íslensks samfélags og stöðu þeirra hér á landi. Málstofan mun fara fram í Golfskálanum á Katlavelli, Húsavík og standa frá kl.11.00 -14.00. Boðið verður uppá súpu og brauð í hádeginu. Málstofustjóri og stjórnandi pallborðsumræðna verður Huld Aðalbjarnardóttir lífsþjálfi.

Dagskrá málstofu: 

11:00  Opnunarávarp
Guðrún Margrét Guðmundsdóttir jafnréttisfulltrúi ASÍ

11:15 Samfélagið okkar – í allra þágu
Ósk Helgadóttir varaformaður Framsýnar

11: 30 Fyrstu skrefin á Raufarhöfn
Agnieszka Szczodrowska túlkur og starfsmaður Stéttarfélaganna í Þingeyjarsýslum.

11: 45 Íslenska er lykill – líka með hreim
Aneta Potrykus formaður Verkalýðsfélags Þórshafnar

12:00 Matarhlé

12:30 Pallborðsumræður
Nele Marie Beitelstein fjölmenningafulltrúi Norðurþings, Aleksandra Leonardsdóttir sérfræðingur ASÍ í fræðslu og inngildingu, Fanný Cloé, íslenskukennari fyrir innflytjendur, Christin Irma Schröder verkefnastjóri hjá PCC, Sylwia Gręda, lögfræðingur, aðstoðarmaður daglegs reksturs hjá North Sailing.

Viðburðurinn fer fram á íslensku og ensku – The event will be in both Icelandic and English

Framsýn stéttarfélag
Þingiðn
Starfsmannafélag Húsavíkur    

The trade unions in Þingeyjarsýsla, in collaboration with Norðurþing and the Icelandic Confederation of Labour (ASÍ), will host an open seminar and panel discussion on International Women’s Day, Saturday 8 March. The focus will be on the contribution of women of foreign origin to Icelandic society and their position in Iceland. The seminar will take place in the Golf Pavilion at Katlavellir, Húsavík and last from 11.00 -14.00. Soup and bread will be served for lunch. The moderator and moderator of the panel discussions will be Huld Aðalbjarnardóttir, life coach.

Seminar agenda: 

11:00  Opening remarks
Guðrún Margrét Guðmundsdóttir, Equal Rights Officer

11:15   Our community – for the benefit of all
Ósk Helgadóttir, vice chairman of Framsýn

11:30 First steps in Raufarhöfn
Agnieszka Szczodrowska, interpreter and employee of the unions in Þingeyjarsýsla.

11:45  Icelandic is a key – also with an accent
Aneta Potrykus, chairman of the Þórshöfn Labour Union

12:00 Lunch break

12:30 Panel discussion
Nele Marie Beitelstein, multicultural representative at Norðurþing, Aleksandra Leonardsdóttir, ASÍ’s specialist in education and inclusion, Fanný Cloé, Icelandic teacher for immigrants, Christin Irma Schröder, project manager at PCC, Sylwia Gręda, Lawyer, Daily Operations Assistant in North Sailing.   

Viðburðurinn fer fram á íslensku og ensku – The event will be in both Icelandic and English.

  

Á Kvennaári 2025 verður efnt til a.m.k. tveggja viðburða sem verða  tileinkaðir konum af erlendum uppruna innan verkalýðshreyfingarinnar. Fyrri viðburðurinn verður í höndum stéttarfélaganna  í Þingeyjarsýslum, sem munu í samstarfi við Norðurþing og ASÍ standa fyrir opinni málstofu og pallborðsumræðum á Alþjóðlegum baráttudegi kvenna, laugardaginn 8. mars. Þar verður sjónum beint að framlagi kvenna af erlendum uppruna til íslensks samfélags og stöðu þeirra hér á landi. Málstofan mun fara fram í Golfskálanum á Katlavelli, Húsavík og standa frá 11:00 -14:00. Boðið verður upp á súpu og brauð í hádeginu. Vonandi sjá sem flestir sér fært að koma og taka þátt í uppbyggjandi samræðum um upplifun erlendra kvenna á íslenskum vinnumarkaði.

Eins og áður hefur komið fram á heimasíðu stéttarfélaganna hefur Bjarg íbúðafélag unnið að því að byggja sex íbúða raðhús að Lyngholti 42-52 á Húsavík. Grunnurinn er klár og á næstu dögum mun bílalest leggja af stað frá Selfossi með einingarnar til Húsavíkur enda haldist veðrið áfram í lagi. Húsboxin eru 12 talsins eins og sjá má á meðfylgjandi myndum. Að utan eru þau að mestu klár og að innan er búið að parketleggja að stórum hluta og verið að setja upp innréttingar og klára baðherbergin. Gangi allt eftir verða íbúðirnar tilbúnar til afhendingar með vorinu, Framsýn hefur reyndar ekki fengið það staðfest endanlega en fulltrúar frá Bjargi eru væntanlegir norður á næstu vikum til að ganga frá samningum við þá sem þegar hafa fengið úthlutað þessum íbúðum. Rúmlega 40 umsækjendur voru um þessar sex íbúðir. Greinilegt er að mikil þörf er fyrir frekari uppbyggingu á Húsavík sem Framsýn mun fylgja eftir í góðu samstafi við Norðurþing og Bjarg.

Um er að ræða sérbýli með litlum garði og allar íbúðir með tveimur bílastæðum. Allar íbúðirnar eru 4ra herbergja (3 svefnherbergi). Íbúðirnar eru ætlaðar fyrir félagsmenn Framsýnar, Þingiðnar og Starfsmannafélags Húsavíkur sem eru á leigumarkaði og standast þær reglur sem gilda um úthlutun íbúðanna. Þá hafa félagsmenn innan aðildarfélaga ASÍ og BSRB sem búa utan félagssvæðið stéttarfélaganna í Þingeyjarsýslum einnig aðgengi að íbúðunum. Full ástæða er til að fagna þessum áfanga. Norðurþing kemur að þessu verkefni með Bjargi íbúðafélagi. Hægt að lesa frekar um starfsemi Bjargs íbúðafélags á heimasíðu félagsins: https://www.bjargibudafelag.is/.

Bjarg er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að öruggu íbúðarhúsnæði í langtímaleigu. Um er að ræða svokölluð leiguheimili að norrænni fyrirmynd, „Almene boliger“. Fyrstu íbúðir voru afhentar leigutökum í júní 2019 á höfuðborgarsvæðinu. Framsýn hefur lengi barist fyrir því að Bjarg komi að því að byggja leiguhúsnæði fyrir tekjulága á Húsavík og víðar á félagssvæðinu enda sé grundvöllur fyrir því. Það er í fullu samstarfi við sveitarfélögin og verkalýðsfélögin í Þingeyjarsýslum. Það verður því afskaplega gleðilegt þegar nýju íbúðirnar verða teknar í notkun síðar á árinu, vonandi í sumarbyrjun.