kuti

Eins og áður hefur komið fram stendur Framsýn, stéttarfélag fyrir útgáfu á sérstöku afmælisblaði í tilefni af því að í ár eru 100 ár eru liðin frá stofnun verkakvennafélagsins Vonar en félagið var stofnað sunnudaginn 28. apríl 1918 í fundarsal Húsavíkur.

Blaðið verður gefið út í 2000 eintökum og dreift inn á öll heimili á félagssvæði Framsýnar, stéttarfélags. Útgáfudagur hefur ekki verið ákveðinn en ljóst er að valinn verður dagur í byrjun maí.

Verkefnið fer vel af stað en efnistök verða af ýmsum toga. Svipmyndum úr sögunni verður brugðið upp í máli og myndum, viðtöl og pistlar þar sem sérstök áhersla er lögð á verkalýðsbaráttu í fortíð, nútíð og framtíð og auðvitað margt fleira.

Fyrir helgina leit hin pólsk-húsvíska Kasia Osipowska-Cieslukowska inn á skrifstofu ritstjóra og ræddi við hann um lífið í Póllandi, komuna til Íslands og hvernig það er að aðlagast samfélaginu á Húsavík en hún segist hæst ánægð í bænum og sér fyrir sér að búa hér til frambúðar.

Þá heimsótti ritstjóri ásamt Ósk Helgadóttur merkiskonuna Hólmfríði Sigurðardóttur í Sjávarborg. Hún er 98 ára gömul en ennþá ern og öll hin hressasta og sagði frá lífsbaráttunni á fyrrihluta síðustu aldar.

Framsýn, stéttarfélag hefur ritað stjórn Landsvirkjunar bréf með áherslu á hækkun launa til starfsmanna á gólfinu.  Það er því von Framsýnar, stéttarfélags að sá velvilji stjórnar Landsvirkjunar til að hækka eigin laun og laun lykilstjórnenda fyrirtækisins verði til þess hún bregðist vel við beiðni stéttarfélagsins um að almennir starfsmenn innan Landsvirkjunar fái einnig notið hluta þess mikla hagnaðar sem fyrirtækið skilaði á síðasta ári, ekki bara stjórnendur. Sjá bréfið: 

Landsvirkjun
Hr. Jónas Þór Guðmundsson stjórnarformaður
Háaleitisbraut 68
103  Reykjavík 

Húsavík 12. mars 2018 

Beiðni um endurskoðun á kjörum starfsmanna

Fram hefur komið í fjölmiðlum að staða Landsvirkunnar sé með miklum ágætum og fyrirtækið hafi hagnast um  11,2 millj­arða króna á síðasta ári, en það er tölu­vert meiri hagnaður en árið áður þegar hann nam 6,7 millj­örðum króna. Selt magn nam 14,3 tera­vatt­stund­um, sem er yfir 5% aukn­ing frá fyrra ári.

Í til­kynn­ingu um árs­upp­gjörið er haft eft­ir Herði Arn­ar­syni for­stjóra að rekst­ur­  hafi gengið vel á ár­inu 2017. Tekj­ur hafi verið meiri en nokkru sinni fyrr og sleg­in hafi verið öll met í orku­sölu- og vinnslu. Þá hafi ytri aðstæður verið hag­stæðar þar sem ál­verð hafi hækkað um 23% á milli ára.

Að sjálfsögðu ber að fagna þessu að mati Framsýnar, stéttarfélags. Það verður hins vegar ekki gert með því að færa lykilstjórnendum fyrirtækisins fáheyrðar launahækkanir meðan aðrir starfsmenn fyrirtækisins, það er starfsmennirnir á gólfinu, sitja eftir á strípuðum töxtum samkvæmt kaupskrá Starfsgreinasambands Íslands og Landsvirkjunar.

Svo vitnað sé áfram í fjölmiðla þá hækkuðu laun for­stjóra Lands­virkj­unar um 700 þús­und krónur á mán­uði á árs­grund­velli og eru nú 2,7 millj­ónir króna. Laun stjórn­ar­manna í Landsvirkjun hækk­uðu um tæp 50 pró­sent. Sam­an­lagt deildu fimm stjórn­ar­menn með sér 525 þús­und krónum til við­bótar á mán­uði. Þetta var ákveðið af starfs­kjara­nefnd Landsvirkjun­ar, sem í sitja þrí­r ­stjórn­ar­mann­anna.

Með bréfi þessu óskar Framsýn, stéttarfélag eftir viðræðum við Landsvirkjun um leiðréttingu á kjörum félagsmanna sem starfa við virkjanir fyrirtækisins á félagssvæði Framsýnar, það er við Þeistareykjavirkjun, Kröfluvirkjun og Laxárvirkjun.

Í viðræðum við Landsvirkjun hefur Framsýn komið að því innan Starfsgreinasambands Íslands að jafna kjör kynjanna innan fyrirtækisins. Að mati félagsins ætti næsta skref í jöfnun kjara innan Landsvirkjunar að vera að  ofurhækkanir til lykilstjórnenda flæði jafnframt til annarra starfsmanna. Höfum í huga að hagnaður fyrirtækja verður ekki til í excel skjali, mann-auðurinn er lykillinn að góðum rekstri, sem ber að virða.

Framsýn er fullkunnugt um að stjórnarformaður Landsvirkjunar er jafnframt formaður Kjararáðs, sem hefur hækkað laun æðstu embættismanna langt umfram það sem gengur og gerist á almennum vinnumarkaði undanfarin misseri. Embættismanna, sem fullir af gleði rúnta þessa dagana um borg og bæ á kostnað ríkisins, þ.e. skattgreiðenda. Hækkanir á kjörum sem sagðar eru taka mið af almennum launabreytingum á íslenskum vinnumarkaði.

Það er því von Framsýnar, stéttarfélags að sá velvilji stjórnar Landsvirkjunar til að hækka eigin laun og laun lykilstjórnenda fyrirtækisins verði til þess hún bregðist vel við beiðni stéttarfélagsins um að almennir starfsmenn innan Landsvirkjunar fái einnig notið hluta þess mikla hagnaðar sem fyrirtækið skilaði á síðasta ári.

Virðingarfyllst 

Fh. Framsýnar, stéttarfélags 

_______________________________
Aðalsteinn Á. Baldursson

Afrit:
Starfsgreinasamband Íslands
Félagsmenn Framsýnar innan Landsvirkjunar

 

 

 

 

 

 

 

 

 

 

 

 

 

 

 

 

 

 

 

 

 

Framsýn hefur ráðið Egil Pál Egilsson fjölmiðlafræðing í sérverkefni í tilefni af 100 ára afmæli Verkakvennafélagsins Vonar. Verkefninu er ætlað að standa yfir í fjórar vikur og viðkemur útgáfu á afmælisblaði sem kemur út um miðjan maí.

Egill Páll er fæddur árið 1978 og hefur undanfarið starfað sem blaðamaður bæði á vef og prenti. Um er að ræða vefmiðilinn vikudagur.is,  þingeyska héraðsfréttablaðið Skarp og Vikudag á Akureyri en allir miðlarnir eru í eigu Ásprents ehf. Egill Páll hefur einnig tekið að sér sérverkefni. Hann ritsýrði m.a. 90 ára afmælisriti Völsungs.

Rétt er að taka fram að Egill Páll tekur að sér aukin verkefni á þessu sviði og eru fyrirtæki, stofnanir, félög og einstaklingar hvattir til að hafa samband við hann þurfi þeir á þjónustu hans að halda. Hans sérsvið er textagerð ýmis konar; fréttatengt efni, kynningarefni, mannlífsefni, viðtöl o.fl. Hvort heldur sem er á íslensku eða ensku.

Egill Páll er kominn í tímabundið verkefni við ritun á afmælisblaði fyrir Framsýn en þann 28. apríl 2018 verða 100 ár liðin frá stofnun Verkakvennafélagsins Vonar, nú Framsýnar stéttarfélags.

 

Það eru margir farnir að bíða eftir vorinu og sumrinu reyndar líka. Ein af þeim er Birna Ásgeirsdóttir starfsmaður Þekkingarnets Þingeyinga sem hér er að þrífa planið fyrir framan Þekkingarnetið á dögunum en starfsstöðin er niður við höfn, það er á hafnarstéttinni.

Flugfélagið Ernir mun taka í notkun nýja Dornier 328 flugvél með vorinu. Flugvélin verður notuð á flesta áfangastaði flugfélagsins en þó væntanlega mest á Húsavík, Höfn og Vestmannaeyjar. Flugvélin mun einnig nýtast í leiguverkefni með hópa bæði hér innanlands og eins erlendis s.s. til Grænlands og Norðurlandanna en hún tekur 32 farþega. Að sjálfsögðu er þetta mikið fagnaðarefni en um 4.400 félagsmenn stéttarfélaganna í Þingeyjarsýslum flugu milli Húsavíkur og Reykjavíkur á síðasta ári sem sparaði þeim tæplega 50 milljónir, það er að fljúga á sérkjörum stéttarfélaganna.

Félagsmenn stéttarfélaganna spöruðu sér tæplega 50 milljónir á árinu 2017 með því að fljúga á sérkjörum stéttarfélaganna. Eftir nokkrar vikur gefst þeim tækifæri á að fljúga með nýrri flugvél sem Flugfélagið Ernir hefur fest kaup á.

Sólveig Anna Jónsdóttir verður næsti formaður Eflingar-stéttarfélags og mun hún taka við af Sigurði Bessasyni, fráfarandi formanni, á aðalfundi félagsins þann 26. apríl nk. B listi Sólveigar Önnu fékk 2099 atkvæði en A listi stjórnar og trúnaðarráðs fékk 519 atkvæði. Þeir sem voru með Sólveigu Önnu á lista og taka sæti í stjórn Eflingar eru Magdalena Kwiatkowska hjá Café Paris, Aðalgeir Björnsson, tækjastjóri hjá Eimskip, Anna Marta Marjankowska hjá Náttúru þrif, Daníel Örn Arnarsson hjá Kerfi fyrirtækjaþjónustu, Guðmundur Jónatan Baldursson, bílstjóri hjá Snæland Grímsson, Jamie Mcquilkin hjá Resource International ehf. og Kolbrún Valversdóttir, starfsmaður búsetuþjónustu Reykjavíkurborgar.

Úrslit kosninganna eru þannig:
Á kjörskrá voru 16.578 félagsmenn og af þeim greiddu 2.618 atkvæði.
B listi Sólveigar Önnu Jónsdóttur fékk 2099 atkvæði.
A listi stjórnar og trúnaðarráðs fékk 519 atkvæði.
Auðir seðlar voru 6 og ógildir voru 4.

Þessar breytingar eru nokkuð áhugaverðar og eiga líklega eftir að leiða af sér kröftugri verkalýðsbaráttu standi frambjóðendur B-listans við yfirlýsingar sem þeir hafa látið hafa eftir sér í aðdraganda kosninganna. Töluverð vakning hefur orðið meðal félagsmanna stéttarfélaga að bjóða sig fram eins og þetta dæmi sýnir. Þá má geta þess að tveir formenn sem hafa verið áberandi í íslenskri verkalýðsbaráttu hafa fengið mótframboð, það eru þeir Guðmundur Ragnarsson hjá VM og Guðbrandur Einarsson formaður verslunarmannafélagsins á Suðurnesjum. Guðbrandur er auk þess formaður Landssambands ísl. verslunarmanna. Að sjálfsögðu eiga menn að gleðjast yfir því að nýtt og kraftmikið fólk sé tilbúið að takast á við krefjandi störf í verkalýðshreyfingunni. Hugsanlega hafa menn sofnað á verðinum hvað það varðar þar sem ákveðin stöðnun hefur orðið í hreyfingunni. Rétt er að óska Sólveigu Örnu til hamingju með kjörið með von um að ný stjórn Eflingar komi af krafti inn í baráttuna sem framundan er en kjarasamningar eru almennt lausir um næstu áramót. Það eru vissulega áhugaverðir tímar framundan, mun Starfsgreinasamband Íslands og Flóabandlagið starfa nánar saman í næstu kjarasamningum? Mun starfsemi Starfsgreinasambandsins eflast við þetta s.s. með nýju fólki í framkvæmdastjórn? Hvað með ASÍ, stefnir í breytingar á forystusveit sambandsins á þingi þess í haust? Eitt er víst að það á ýmislegt eftir að gerast á næstu mánuðum, talað er um að ákveðið uppgjör þurfi að fara fram. Sumir gleðjast meðan aðrir hræðast breytingar innan verkalýðshreyfingarinnar.

Myndin af Sólveigu er af efling.is.

Á dögunum var undirritað samkomulag um launaþróunartyrggingu til starfsmanna ríkis og sveitarfélaga. Lesa má um málið á heimasíðu ASÍ.

Helst má nefna að laun félagasmanna í aðildarfélögum ASÍ sem starfa hjá sveitarfélögunnum hækka um 1,4% að meðaltali vegna samkomulagsins. Laun félaga ASÍ hjá ríkinu hækka að meðaltali um 0,5%.

Á þessari mynd eru heiðurshjónin Unnur Kjartansdóttir og Torfi Aðalsteinsson ásamt dóttur þeirra sem ber nafnið Sunna Torfadóttir. Þau tóku öll þátt í trúnaðarmannanámskeiði stéttarfélaganna sem haldið var í síðustu viku sem væntanlega er einsdæmi. Það er að þrír úr sömu fjölskyldu séu trúnaðarmenn á sínum vinnustöðum, Torfi hjá Jarðborunum, Unnur hjá Heilbrigðisstofnun Norðurlands og Sunna hjá N1 á Húsavík.

Nú liggur fyrir að ekki bárust fleiri  tillögur um félagsmenn í stjórnir, ráð og nefndir á vegum Framsýnar fyrir næsta kjörtímabil sem eru tvö ár. Kjörnefnd félagsins skilaði tillögum sínum til stjórnar og trúnaðarráðs sem voru síðan auglýstar á heimasíðu félagsins og í Skarpi samkvæmt ákvæðum laga félagsins. Stillt var upp í tæplega 80 stöður í félaginu. Þar sem ekki bárust aðrar tillögur skoðast listinn samþykktur. Frestur til að skila inn nýjum tillögum rann út 28. febrúar. Vel gekk að koma saman listanum og er töluvert um breytingar. Sem dæmi má nefna að Börkur Kjartansson kemur nýr inn í varastjórn félagsins. Nýir í trúnaðarráði eru Brynjar Smárason,  Magnea D. Arnardóttir, Guðlaug Ívarsdóttir, Kristján Önundarson, Garðar Finnsson, Unnur Kjartansdóttir, Guðrún Steingrímsdóttir og Sigrún Hildur Tryggvadóttir.

Börkur Kjartansson er einn af þeim sem kemur nýr inn í stjórnunarstörf hjá Framsýn. Töluvert er um að nýtt fólk komi til starfa fyrir félagið í stjórnum, ráðum og nefndum.

 

Nú liggur fyrir að Sigríður Jóhannesdóttir tekur við starfi formanns Verkalýðsfélags Þórshafnar á næsta aðalfundi félagsins. Svala Sævarsdóttir sem verið hefur formaður gaf ekki kost á sér til áframhaldandi formennsku. Hún verður hins vegar áfram í stjórn. Auk hennar verða í aðalstjórn Hulda I. Einarsdóttir, Sigríður Jónsdóttir og Ari Sigfús Úlfarsson.  Nánar verður hægt að nálgast upplýsingar um þá sem skipa trúnaðarstöður fyrir félagið inn á heimasíðu stéttarfélaganna í Þingeyjarsýslum, framsyn.is

 

Sigríður tekur við formennsku í VÞ á næsta aðalfundi félagsins. Í dag er hún starfsmaður félagsins en félagið er með skrifstofu í íþróttahúsinu á Þórshöfn. Með henni á myndinni er Guðný Þorbergsdóttir en þær voru báðar á trúnaðarmannanámskeiði á Húsavík fyrir helgina.

 

Nú stendur yfir tveggja daga  trúnaðarmannanámskeið á vegum stéttarfélaganna í Þingeyjarsýslum. Um 30 trúnaðarmenn eru á námskeiðinu sem er met fjöldi á einu námskeiði. Leiðbeinandi er Sigurlaug Gröndal frá Félagsmálaskóla alþýðu. Meðfylgjandi myndir eru teknar á námskeiðinu.

Formannafundur ASÍ var haldinn í gær, 28. febrúar 2018. Eftir líflegar og kröftugar umræður var meirihluti fyrir því að  segja ekki upp kjarasamningum. Því miður var ekki samstaða um að segja samningunum upp. Rétt er að taka skýrt fram að fulltrúar Framsýnar og Þingiðnar á fundinum lögðu til að samningunum yrði sagt upp. Töluvert hefur verið um að spurt hafi verið út í afstöðu félaganna þar sem greinileg reiði er meðal launafólks víða um land með niðurstöðuna, fólk telur að verkalýðshreyfingin hafi brugðist trausti fólks. Það er hins vegar ánægt með afstöðu Framsýnar og Þingiðnar og þeirra félaga sem stóðu í lappirnar og vildu segja samningunum upp.

Alls greiddu 49 atkvæði á fundinum frá aðildarfélögum ASÍ en þeir voru með 79.062 félagsmenn (heilsársstörf) á bak við sig.

Niðurstaða formanna:

Já, vil segja upp 21 (42,9%)

Nei, vil ekki segja upp 28 (57,1%)

Vægiskosning:

Já 52.890 (66,9%)

Nei 26.172 (33,1%)

Í atkvæðagreiðslunni þurfti bæði meirihluta fundarmanna sem fóru með atkvæði á fundinum og meirihluta þess atkvæðavægis sem að baki þeim standa. Þar sem ekki náðist meirihluti fundarmanna var tillaga um uppsögn samninga felld.

Kjarasamningar á almennum vinnumarkaði munu því gilda til ársloka.

Þeir sem vildu halda í samninginn töluðu m.a. um að aðeins væru 9 mánuðir eftir af samningnum og hann tryggði 3% almenna launahækkun 1. maí og rúmlega 7% hækkun lágmarkslauna. Nota ætti tímann til hausts til að móta kröfugerð og undirbúa næstu kjaraviðræður.

Það var þungt hljóð í þeim sem vildu segja upp og sterk krafa um að verkalýðshreyfingin setti fótinn niður í samfélagi misskiptingar. Stjórnvöld voru harðlega gagnrýnd fyrir að taka til sín ávinning af starfi verkalýðshreyfingarinnar sem hefur lagt mikla áherslu á hækkun lægstu launa, en stjórnvöld tekið að stórum hluta til baka með skerðingu bóta. Úrskurðir kjararáðs og hækkanir á launum æðstu stjórnenda banka og Landsvirkjunar urðu auk þess mörgum fundarmönnum tilefni til gagnrýni.

 

Leikfélag Húsavíkur mun fljótlega hefja sýningar á leikritinu Sjóræningjaprinsessunni. Stéttarfélögin niðurgreiða leikhúsmiðana fyrir félagsmenn. Forsendan fyrir því er að félagsmenn hafi samband við Skrifstofu Stéttarfélaganna áður en þeir fara í leikhúsið og fái afsláttarmiða hjá félögunum. Hér má fræðast betur um leikritið.

Stéttarfélögin í Þingeyjarsýslum standa fyrir tveggja daga trúnaðarmannanámskeiði í næstu viku, það er fimmtudag og föstudag. Námskeiðið er haldið í samstarfi við Félagsmálaskóla alþýðu. Mjög góð þátttaka er á námskeiðið en um 25 trúnaðarmenn eru skráðir á námskeiðið.

Forsendur kjarasamninga eru brostnar að mati ASÍ en samkvæmt ákvæði í samningunum koma þeir til endurskoðunar fyrir lok þessa mánaðar.

Það er mat ASÍ, að óbreyttu, að forsendur um að launastefna kjarasamninganna hafi verið stefnumarkandi hafi ekki gengið eftir. Því er heimild til uppsagnar þeirra fyrir lok febrúar enn í gildi.

Vegna þessarar stöðu hefur miðstjórn ASÍ ákveðið að boða til formannafundar aðildarfélaga ASÍ miðvikudaginn 28. febrúar þar sem farið verður yfir málið og ákvörðun tekin um viðbrögð verkalýðshreyfingarinnar.

Þess má geta að Framsýn hafði áður ályktað um málið og sagt forsendur kjarasamninga vera brostnar. Með yfirlýsingu miðstjórnar ASÍ er tekið undir skoðanir félagsins.

 

Leikdeild Eflingar sýnir leikritið Stöngin inn eftir Guðmund Ólafsson. Leikstjóri er Vala Fannel og tónlistarstjóri Jaan Alavere. Verkið er gamansöngleikur með ABBAtónlist. Það gerist í litlu sjávarþorpi þar sem konur bæjarins ákveða að setja eiginmenn sína í kynlífsbann nema þeir hætti að horfa á enska boltann og við fylgjumst með afleiðingum þess. Stéttarfélögin niðurgreiða leikhúsmiðana fyrir félagsmenn. Forsendan fyrir því er að félagsmenn hafi samband við Skrifsofu Stéttarfélaganna áður en þeir fara í leikhúsið og fái afsláttarmiða hjá félögunum.

Sýningaplan

Frumsýning – föstudagur 23. febrúar kl. 20:30

2. sýning – sunnudagur 25. febrúar kl. 17:00
3. sýning – fimmtudagur 1. mars kl. 20:30
4. sýning – föstudagur 2. mars kl. 20:30
5. sýning – föstudagur 9. mars kl. 20:30
6. sýning – laugardagur 10. mars kl. 18:00
7. sýning – sunnudagur 11. mars kl. 16:00
8. sýning – miðvikudagur 14. mars kl. 20:30
9. sýning – sunnudagur 18. mars kl. 20:30
10. sýning – miðvikudagur 21. mars kl. 20:30

Dalakofinn verður með leikhúsmatseðil fyrir hópa (lágmark 6 manns) lambasteik, kaffi og kaka í eftirrétt á 3900.-  Einnig bíður Dalakofinn 15% afslátt af matseðli fyrir leikhúsgesti.

Að venju verður Kvenfélag Reykdæla með kaffi- og vöfflusölu á sýningum.

 

 

Miðapantanir eru í síma 618-3945 eða á leikdeild@leikdeild.is

 

Formaður Framsýnar, Aðalsteinn Árni Baldursson, var í viðtali í útvarpsfréttum Bylgjunnar í hádeginu þann 15. febrúar síðastliðinn.

Umræðuefnið voru núgildandi kjarasamningar og hvort skuli segja þeim um núna í febrúar eins og heimild er fyrir. Deildar meiningar eru innan verkalýðshreyfingarinnar í landinu hvort segja skuli upp samningunum. Stjórn og trúnaðarráð Framsýnar áliktaði um málið nú í vikunni og var eining um að segja upp samningunum eins og lesa má um hér.

Að ofan má sjá forsíðu héraðsfréttablaðsins Skarps en þar er einmitt fjallað um þessi mál.

Hlusta má á viðtalið á vefsíðu Bylgjunnar.

Laun þeirra ríkisstarfsmanna sem eru í aðildarfélögum Starfsgreinasambands Íslands fá nú í fyrsta sinn svokallaða launaskriðstryggingu sem gefur að meðaltali 1,8% hækkun á laun afturvirkt frá 1. janúar 2017.

Nánar má lesa um málið á heimasíðu Starfsgreinasambands Íslands.

Einnig munu laun félagsmanna Starfsmannafélags Húsavíkur hækka um 1,3% afturvirkt á sama tímabili eins og lesa má um á heimasíðu BSRB.