kuti

Fundur í stjórn og trúnaðarráði Framsýnar verður haldinn mánudaginn 9. september kl. 17:00 í fundarsal félagsins. Að venju er stjórn Framsýnar-ung boðið að taka þátt í fundinum. Mörg mál eru á dagskrá fundarins.

Dagskrá:

1. Fundargerð síðasta fundar
2. Inntaka nýrra félaga
3. Kjaramál- lausir samningar
4. Furulundur 11E
5. Kjör fulltrúa á þing AN
6. Kjör fulltrúa á þing SGS
7. Kjör fulltrúa á þing LÍV
8. Vinnustaðaeftirlit – brotastarfsemi
9. Þakkarbréf frá SHÞ
10. Ársreikningar félagsins – staðfesting ASÍ
11. Kynnisferð
12. VÍS- erindi
13. Starfið framundan
14. Önnur mál
    1. Starfslokanámskeið
    2. Kjör trúnaðarmanns

 

Meðfylgjandi ályktun var samþykkt á miðstjórnarfundi ASÍ 28. ágúst. Meðal miðstjórnarmanna á fundinum var formaður Framsýnar sem var kallaður inn sem varamaður.

Gagnsæi gegn misskiptingu
Komið hefur í ljós að sú aðgerð að leggja niður kjararáð hefur valdið launaskriði hjá þeim hæstlaunuðu hjá ríkinu. Það var engin umræða um sanngjörn laun í tengslum við þá aðgerð. Það kemur í sjálfu sér ekki á óvart. Á meðan við leggjum ekki skýrar línur í þessum málum skiptir engu máli hverjir ákveða launin. Einföld aðgerð eins og að breyta því hverjir ákveða laun þeirra launahæstu skilar engu réttlæti í sjálfu sér án skýrra reglna um launaákvarðanir. Tilhneigingin er alltaf sú að þeir sem hafa meira fá meira og þeir sem minna hafa fá minna.

Það er löngu tímabært að mótuð verði skýr og sanngjörn launastefnu hjá ríkinu og í stjórnum fyrirtækja, stofnana og félagasamtaka. Festa þarf í lög að fyrirtæki geri grein fyrir launabili í ársreikningum og stjórnvöld þurfa að setja skýra launastefnu þar sem tilgreint er hvert launabilið megi vera á milli þeirra hæst launuðu og lægst launuðu.
Við þurfum að bregðast við þeirri móðgun og augljósu stéttaskiptingu sem birtist okkur í hvert sinn sem skattskrár eru gerðar opinberar. Það er ekki nóg að fordæma ofurlaun einu sinni á ári án þess að aðhafast nokkuð. Það er kominn tími til aðgerða.

Miðstjórn ASÍ hvetur fulltrúa í stjórnum, trúnaðarmenn á vinnustöðum, stjórnmálafólk, starfsfólk og stjórnendur til að ræða launamun innan þeirra fyrirtækja og stofnana sem og innan samfélagsins alls. Móta þarf stefnu sem byggir á niðurstöðu þess samtals.

Það er afar brýnt að allir landsmenn greiði skatta og gjöld til samfélagsins óháð uppruna tekna, svo sem arðgreiðslur úr fyrirtækjum eða fjármagnstekjur. Upplýsingar um slíkt þurfa að vera aðgengilegar og gagnsæjar. Miðstjórn ASÍ hvetur Alþingi jafnframt til að samþykkja að birta álagningarskrár með rafrænum hætti, þar sem birtir eru allir álagðir skattar, þannig að aðgengi að þessum samfélagslega mikilvægu upplýsingum sé tryggt

Undanfarin ár hefur verið hraður vöxtur í efnahagslífinu á Íslandi. Ný rannsókn ASÍ, sem byggir á skoðanakönnunum og launakröfum stéttarfélaga, bendir til að samhliða þessari þróun hafi jaðarsetning og brotastarfsemi aukist á íslenskum vinnumarkaði. Stéttarfélög fá inn á borð til sín fleiri og alvarlegri mál en áður tengd launaþjófnaði og kjarasamningsbrotum. Brotin virðast einkum beinast gegn hópum sem síður þekkja rétt sinn, þ.e. erlendu launafólki, ungu fólki og einstaklingum með lágar tekjur. Við þessum brotum eru í dag engin viðurlög sem Alþýðusambandið telur algerlega óásættanlegt.

Helstu niðurstöður rannsóknarinnar eru eftirfarandi:

• Launakröfur vegna launaþjófnaðar og kjarasamningsbrota hlaupa á hundruðum milljóna króna á ári.
• Fjögur aðildarfélög ASÍ gerðu 768 launakröfur árið 2018 upp á samtals 450 milljónir króna og nam miðgildi kröfuupphæðar 262.534 kr.
• Meira en helmingur allra krafna stéttarfélaga eru gerðar fyrir hönd félagsmanna af erlendum uppruna. Um 19% launafólks á íslenskum vinnumarkaði er af erlendum uppruna.
• Um helmingur allra krafna kemur úr hótel-, veitinga- og ferðaþjónustu en hæstu launakröfurnar eru gerðar á fyrirtæki í mannvirkjagerð.
• Niðurstöður spurningakönnunar Gallup eru í takt við launakröfur stéttarfélaga og benda til þess að brotastarfsemi beinist fremur gegn erlendu launafólki og yngra fólki, með lægri tekjur og í óreglulegu ráðningarsambandi og hlutastörfum.
• Skoðun á launakröfum og spurningakönnunin benda til að brotin felist m.a. í vangreiðslum á launum, álagsgreiðslum og ýmsum réttindabrotum.
• Hjá meirihluta launafólks, einkum hjá þeim sem hafa lengri starfsaldur og hærri tekjur, er brotastarfsemi nærri óþekkt.

Brotastarfsemi gagnvart erlendu launafólki og ungmennum er alvarleg meinsemd á íslenskum vinnumarkaði sem uppræta verður með öllum tiltækum ráðum. Dæmin skipta ekki bara tugum eða hundruðum. Brotin snerta þúsundir einstaklinga. Þessir félagar okkar eiga að njóta kjara og annarra réttinda til jafns við aðra á vinnumarkaði. Það eru hagsmunir samfélagsins alls. Hér er ábyrgð stjórnvalda og samtaka atvinnurekenda mikil.

• Bæta þarf löggjöf og regluverk. Lögbinda verður hörð viðurlög og sektargreiðslur vegna launaþjófnaðar og annarra brota gegn launafólki
• Efla þarf upplýsingamiðlun, eftirlit á vinnumarkaði og eftirfylgni vegna brotastarfsemi. Bæta með kerfisbundnum hætti samstarf og samvinnu stjórnvaldsstofnana og aðila vinnumarkaðarins með samræmdri og öflugri upplýsingamiðlun.
• Stuðningur við brotaþola. Tryggja verður að þeir einstaklingar sem brotið er á sæki rétt sinn með stuðningi verkalýðshreyfingarinnar og samfélagsins alls og þeir njóti öryggis og skjóls.

Í tengslum við gerð kjarasamninga vorið 2019 gaf ríkisstjórn Íslands fyrirheit um að gripið verði til fjölmargra aðgerða gegn launaþjófnaði og brotastarfsemi á vinnumarkaði. Fyrirheit sem byggja á kröfum og áherslum verkalýðshreyfingarinnar. Fyrir liggur aðgerðaáætlun en verkefnið nú er að fylgja yfirlýsingunni eftir og hrinda að fullu í framkvæmd á næstu mánuðum þannig að stigin verði markviss og afgerandi skref til að uppræta brotastarfsemi á vinnumarkaði.

Rannsókn ASÍ um brotastarfsemi á vinnumarkaði

Mál Starfsgreinasambands Íslands gagnvart Sambandi íslenskra sveitarfélaga var tekið fyrir í Félagsdómi sl. mánudag. Er það í samræmi við samþykkt formannafundur SGS 8. ágúst síðastliðinn. Það var mat fundarins að með því að vísa deilum um jöfnun á lífeyrisréttindum til Félagsdóms væri hægt að halda áfram að ræða önnur atriði.

Fyrirtaka í málinu fór fram síðastliðinn mánudag og fór lögfræðingur saminganefndar sveitarfélaganna fram á frestun. Frestur til að skila inn greinargerð um frávísun er til 3. september og málflutningur verður 4. september. Verði því hafnað að vísa málinu frá verður settur nýr frestur til að skila inn efnislegri greinargerð. Ljóst er að sveitarfélögin eru að reyna að fresta efnislegri umræðu um sjálfsagða jöfnun lífeyrisréttinda eins lengi og þau geta. Þessi harða afstaða sveitarfélaganna er mikil vonbrigði, ekki í samræmi við málflutning talsmanna samninganefndar sveitarfélaganna og er ekki jákvætt innlegg til lausnar deilunnar.

Neita enn að greiða 105.000 kr. innágreiðslu
Viðræðunefnd SGS átti fund með samninganefnd Sambands íslenskra sveitarfélaga í gær þar sem 105.000 kr. innágreiðsla til félagsmanna var meðal þess sem tekið var til umræðu. SGS lagði á það þunga áherslu að upphæðin sem ríki, Reykjavíkurborg og nokkrar stofnanir greiddu sínu fólki 1. ágúst sl. yrði greidd til félagsmanna þeirra 1. september næstkomandi og töldu einboðið að samninganefnd Sambands íslenskra sveitarfélaga yrði við kröfunni um innágreiðsluna. Henni var hins vegar hafnað af hálfu nefndarinnar á fundinum og voru það mikil vonbrigði. Það sem er til viðbótar athyglisvert er að samninganefnd SNS ber því við að sveitarstjórnarmenn vilji ekki greiða starfsmönnum innan aðildarfélaga Starfsgreinasambandsins þessa innágreiðslu til jafns við aðra, það sé ekki stemning fyrir því innan þeirra raða. Þessar fullyrðingar eru á skjön við skoðanir þeirra sveitarstjórnarmanna sem tjáð hafa sig um málið við forsvarsmenn Framsýnar. Þar hefur ekki skort á viljann en því borið við að samninganefnd Sambands íslenskra sveitarfélaga leggist alfarið gegn því og hvetji sveitarfélögin til að standa saman gegn þessari sjálfsögðu kröfu aðildarfélaga Starfsgreinasambands Íslands. Já, vitleysan er ekki öll eins.

Síðasta þriðjudag funduðu fulltrúar Norðurþings og Framsýnar með forsvarsmönnum Vinnumálastofnunnar. Fundurinn fór fram á Húsavík. Tilgangur fundarins var að fara yfir sameinginleg mál er varðar þjónustu Vinnumálastofnunar við skjólstæðinga sína á svæðinu og samskipti stofnunarinnar við hagsmunaaðila, það er Norðurþing og Framsýn. Fulltrúar Framsýnar komu ýmsu á framfæri enda telur félagið þjónustu við atvinnuleitendur ekki vera ásættanlega á félagssvæðinu. Fulltrúar Vinnumálastofnunar svöruðu fyrir sig og lögðu fram sínar skýringar. Vilji er til þess að taka upp aukið samstarf er varðar málefni þess hóps sem um ræðir.

Á formannafundi Starfsgreinasambandsins 7. ágúst síðastliðinn var gerð eftirfarandi samþykkt:

Formannafundur SGS 8. ágúst samþykkir að fela framkvæmdastjóra að senda Landssambandi veiðifélaga erindi og óski eftir upplýsingum um kjarasamninga, aðbúnað og önnur atriði sem varða starfsfólk í veiðihúsum landsins og réttindi þess.

Svar barst til SGS dagsett 22. ágúst, en þar sem segir m.a.

,,Minnt er á að Landssamband veiðifélaga hefur ekki afskipti af rekstri eða störfum veiðifélaganna, þau starfa sjálfstætt, þó skylduaðild sé að Landssambandinu, sem annast sameiginleg hagsmunamál, s.s. umfjöllun um lög og reglur og samskipti við opinbera aðila.“

Þetta svar LV veldur SGS miklum vonbrigðum og að sjá það sett fram með svo skýrum hætti að aðbúnaður og kjör starfsfólks í veiðihúsum allt í kringum landið komi þeim ekki við með neinum hætti. Áhugaleysi LV er verulegt umhugsunarefni. Þó að veiðifélög innan LV leigi í einhverjum tilfellum út veiði í ám og rekstur veiðihúsa til annarra aðila geta þau ekki firrt sig ábyrgð með þessum hætti.

Starfsgreinasambandið mun halda áfram að reyna að afla áreiðanlegra upplýsinga um kjör í veiðihúsum og skorar á veiðifélög í landinu að tryggja að þessi mál séu í lagi. Jafnframt hvetur SGS Landssamband veiðifélaga til þess að breyta sínum starfsháttum og standa undir því að afla upplýsinga um að aðildarfélög þess hagi rekstri sínum í samræmi við lög og kjarasamninga.

Bréf SGS til LV

Svar LV til SGS

Skútustaðahreppur svaraði erindi Framsýnar í gær en félagið fór fram á að sveitarfélagið greiddi starfsmönnum eingreiðslu kr. 105.000 þar sem kjarasamningar hafa ekki tekist líkt og öðrum starfsmönnum sveitarfélagsins sem eru með lausa samninga. Eins og sjá má hér að neðan hafnaði sveitarfélagið beiðni Framsýnar sem eru mikil vonbrigði þar sem með því er sveitarfélagið að mismuna starfsmönnum eftir aðld að stéttarfélagi sem er þeim til skammar.  Hér má sjá svar sveitarfélagsins:

„Vegna erindis Framsýnar stéttarfélags 2. júlí 2019 og svo ítrekun á því erindi þann 7. ágúst s.l. þá hafnar sveitarfélagið óskum Framsýnar sem fram koma í bréfinu.  

Eins og þér er kunnugt um hafa kjaraviðræður staðið yfir við Samband íslenskra sveitarfélaga frá því í febrúar 2019 án niðurstöðu. Mikið ber á milli og vísaði Starfsgreinasamband Íslands, sem fer með samningsumboð Framsýnar, deilunni til ríkissáttasemjara þann 28. maí s.l.

Samband íslenskra sveitarfélaga fer með fullnaðarumboð til kjarasamningagerðar fyrir hönd sveitarfélaganna í landinu en rétt er að árétta að sveitarfélagið Skútustaðahreppur veitti samninganefndinni fullnaðarumboðið í desember s.l. Í því felst að sveitarfélaginu er óheimilt að hafa afskipti af kjarasamningagerð og skuldbindur sig til að hlíta markmiðum og stefnu sambandsins í kjaramálum og þeim kjarasamningum sem sambandið gerir fyrir þess hönd í öllum atriðum, með staðfestingu stjórnar sambandsins. 

Það er einlæg von sveitarfélagsins Skútustaðahrepps að samningsaðilar nái saman og leysi þá deilu sem uppi er sem fyrst.“

 

Framsýn stéttarfélag hefur ákveðið að kalla eftir upplýsingum frá veiðiheimilum á félagssvæði Framsýnar varðandi starfskjör starfsmanna enda eitt af hlutverkum stéttarfélaga að fylgjast með kjörum, aðbúnaði og réttundum þeirra sem eru á vinnumarkaði og falla undir kjarasamninga aðila vinnumarkaðarins. Flest störf í veiðiheimilum falla undir kjarasamning Starfsgreinasambands Íslands og Samtaka atvinnulífsins sem Framsýn á aðild að, það er fyrir utan þau störf sem unnin eru af fagmenntuðu fólki s.s. lærðum þjónum og matreiðslumönnum. Í bréfi Framsýnar til veiðiheimilanna er kallað eftir ráðningarkjörum starfsmanna, ráðningarfyrirkomulagi, aðild að stéttarfélögum, fjölda starfsmanna og eftir hvaða kjarasamningum starfsmenn starfa eftir á veiðiheimilunum.

Þá má geta þess að málefni starfsmanna sem starfa á veiðiheimilum voru til umræðu á formannafundi Starfsgreinasambands Íslands í síðustu viku. Þar var samþykkt að kalla eftir þessum upplýsingum frá þeim aðilum sem reka veiðiheimili víða um land.

Undanfarin ár hefur verið hraður vöxtur í efnahagslífinu á Íslandi. Ný rannsókn ASÍ, sem byggir á skoðanakönnunum og launakröfum stéttarfélaga, bendir til að samhliða þessari þróun hafi jaðarsetning og brotastarfsemi aukist á íslenskum vinnumarkaði. Stéttarfélög fá inn á borð til sín fleiri og alvarlegri mál en áður tengd launaþjófnaði og kjarasamningsbrotum. Brotin virðast einkum beinast gegn hópum sem síður þekkja rétt sinn, þ.e. erlendu launafólki, ungu fólki og einstaklingum með lágar tekjur. Við þessum brotum eru í dag engin viðurlög sem Alþýðusambandið telur algerlega óásættanlegt.
Helstu niðurstöður rannsóknarinnar eru eftirfarandi:
• Launakröfur vegna launaþjófnaðar og kjarasamningsbrota hlaupa á hundruðum milljóna króna á ári.
• Fjögur aðildarfélög ASÍ gerðu 768 launakröfur árið 2018 upp á samtals 450 milljónir króna og nam miðgildi kröfuupphæðar 262.534 kr.
• Meira en helmingur allra krafna stéttarfélaga eru gerðar fyrir hönd félagsmanna af erlendum uppruna. Um 19% launafólks á íslenskum vinnumarkaði er af erlendum uppruna.
• Um helmingur allra krafna kemur úr hótel-, veitinga- og ferðaþjónustu en hæstu launakröfurnar eru gerðar á fyrirtæki í mannvirkjagerð.
• Niðurstöður spurningakönnunar Gallup eru í takt við launakröfur stéttarfélaga og benda til þess að brotastarfsemi beinist fremur gegn erlendu launafólki og yngra fólki, með lægri tekjur og í óreglulegu ráðningarsambandi og hlutastörfum.
• Skoðun á launakröfum og spurningakönnunin benda til að brotin felist m.a. í vangreiðslum á launum, álagsgreiðslum og ýmsum réttindabrotum.
• Hjá meirihluta launafólks, einkum hjá þeim sem hafa lengri starfsaldur og hærri tekjur, er brotastarfsemi nærri óþekkt.
Brotastarfsemi gagnvart erlendu launafólki og ungmennum er alvarleg meinsemd á íslenskum vinnumarkaði sem uppræta verður með öllum tiltækum ráðum. Dæmin skipta ekki bara tugum eða hundruðum. Brotin snerta þúsundir einstaklinga. Þessir félagar okkar eiga að njóta kjara og annarra réttinda til jafns við aðra á vinnumarkaði. Það eru hagsmunir samfélagsins alls. Hér er ábyrgð stjórnvalda og samtaka atvinnurekenda mikil.

• Bæta þarf löggjöf og regluverk. Lögbinda verður hörð viðurlög og sektargreiðslur vegna launaþjófnaðar og annarra brota gegn launafólki
• Efla þarf upplýsingamiðlun, eftirlit á vinnumarkaði og eftirfylgni vegna brotastarfsemi. Bæta með kerfisbundnum hætti samstarf og samvinnu stjórnvaldsstofnana og aðila vinnumarkaðarins með samræmdri og öflugri upplýsingamiðlun.
• Stuðningur við brotaþola. Tryggja verður að þeir einstaklingar sem brotið er á sæki rétt sinn með stuðningi verkalýðshreyfingarinnar og samfélagsins alls og þeir njóti öryggis og skjóls.

Í tengslum við gerð kjarasamninga vorið 2019 gaf ríkisstjórn Íslands fyrirheit um að gripið verði til fjölmargra aðgerða gegn launaþjófnaði og brotastarfsemi á vinnumarkaði. Fyrirheit sem byggja á kröfum og áherslum verkalýðshreyfingarinnar. Fyrir liggur aðgerðaáætlun en verkefnið nú er að fylgja yfirlýsingunni eftir og hrinda að fullu í framkvæmd á næstu mánuðum þannig að stigin verði markviss og afgerandi skref til að uppræta brotastarfsemi á vinnumarkaði.

Nánari upplýsingar:
Drífa Snædal, forseti ASÍ, 695-1757
Henný Hinz, deildarstjóri hagdeildar ASÍ, 663 9026

Vegna forfalla eru örfá sæti laus í sumarferð stéttarfélaganna í Flateyjardal á laugardaginn, 17. ágúst.

Fyrir nokkrum árum gerðu stéttarfélögin góða ferð í Fjörður, en að þessu sinni verður Flateyjardalurinn heimsóttur. Um er að ræða dagsferð. Lagt verður af stað frá Skrifstofu stéttarfélaganna, Garðarsbraut 26 klukkan 8:30. Heimkoma er áætluð um kvöldmatarleitið. Fararstjórn er í höndum Óskar Helgadóttur varaformanns Framsýnar en hún þekkir hverja þúfu á þessum slóðum. Henni til aðstoðar verður Jónas Kristjánsson formaður Þingiðnar.

Stéttarfélögin hafa staðið fyrir skemmtiferðum fyrir félagsmenn sína undanfarin ár og hafa þær verið vinsælar og vel sóttar. Skaginn milli Eyjafjarðar og Skjálfanda hefur að geyma einstaka náttúruparadís. Til svæðisins teljast eyðibyggðirnar á Látraströnd, í Fjörðum, á Flateyjardal, Flateyjardalsheiði, nyrst í Fnjóskadal og í Náttfaravíkum að ógleymdri Flatey sem lúrir makindalega úti á Skjálfandanum. Eftir þúsund ára erfiðan búskap lagðist byggð af á þessum útkjálka, en eftir stendur mikilfengleg náttúra sem er í senn angurblíð og fögur, en jafnframt ógnvekjandi og hrikaleg. Skaginn geymir sögu genginna kynslóða og þar á hvert tóftarbrot sína sögu, þar bjó kraftmikið fólk sem háði harða og óvægna baráttu við náttúruöflin.

Reiknað er með að menn nesti sig sjálfir í ferðina en boðið verður upp á grillmat og drykki í boði stéttarfélaganna síðdegis á laugardaginn. Linda Baldurs á skrifstofu stéttarfélaganna tekur við skráningum í ferðina. Þátttökugjaldið er kr. 5.000 fyrir félagsmenn og gesti.

Ósk Helgadóttir er frábær fararstjóri og hún verður án efa í miklu stuði á laugardaginn.

…..Jónas Kristjánsson verður svo á katinum Ósk til aðstoðar.

 

 

Formenn Starfsgreinasambands Íslands komu saman til fundar í gær til að ræða stöðuna í kjaraviðræðum aðildarfélaga sambandsins og Samninganefndar Sambands íslenskra sveitarfélaga. Eins og fram hefur komið er deilan í hnút. Eftir umræður var þetta niðurstaða fundarins:
Starfsgreinasamband Íslands sem Framsýn á aðild að harmar þá afstöðu Samninganefndar Sambands íslenskra sveitarfélaga, að neita að ganga til kjarasamningsviðræðna um hvernig ná megi fram jöfnuði milli almenna og opinbera lífeyriskerfisins, sérstaklega hvað félagsmenn aðildarfélaga SGS og almennt verkafólk í þjónustu sveitarfélaganna varðar, líkt og samið var um í kjarasamningum 7. júlí 2009. Nú þegar hefur stærsta sveitarfélag landsins ákveðið að efna samkomulag aðila fyrir sitt leiti en önnur þverskallast við og neita einfaldlega að ganga til viðræðna um jöfnun lífeyrisréttinda starfsmanna sinna á þeirri forsendu að þau hafi aldrei undirgengist slíka skyldu. SGS hafnar þeirri afstöðu alfarið enda ráð gert fyrir þessari óefndu jöfnun í öllum forsendum og útreikningum aðila eftir 2009.
Formannafundur SGS samþykkir því að sambandið höfði mál fyrir Félagsdómi þar sem látið verður reyna á túlkun samningsákvæðisins frá 2009 um skyldu sveitarfélaga til þess að ganga til kjarasamningsviðræðna um jöfnun lífeyrisréttinda.

Starfsgreinasamband Íslands (SGS) hefur áður mótmælt harðlega þeirri gróflegu mismunun sem Samband íslenskra sveitarfélaga (SÍS) ætlast til að sveitarfélögin sýni gagnvart sínu starfsfólki. Kjaradeila SGS og sveitarfélaganna er í hörðum hnút og var vísað til Ríkissáttasemjara vegna þess að Samninganefnd sveitarfélaganna krafðist þess að SGS félli frá fyrirliggjandi samkomulagi um jöfnun lífeyrisréttinda og það yrði ekki rætt í kjaraviðræðunum.

Vegna þess hversu samningaviðræður við sveitarfélög og ríki hafa dregist náðist samkomulag, þ.e. við aðra samningsaðila en SGS, að starfsfólk með lausa kjarasamninga fengi eingreiðslu að upphæð 105.000 kr. sem greiðist út 1. ágúst sem innágreiðsla fyrir nýjan kjarasamning.

SÍS hefur ákveðið einhliða að félagsmenn í félögum innan SGS fái ekki þessa eingreiðslu, og hefur sent póst til allra sveitarfélaga þar sem þeim er beinlínis bannað að koma eins fram við alla sína starfsmenn. Hér er greinilega verið að reyna að kúga SGS til uppgjafar og ótrúlegt að sveitarfélögunum finnist það sæmandi að greiða ekki lægst launaða starfsfólkinu umrædda eingreiðslu líkt og öðrum.

Sambandið hefur borið það fyrir sig að eingreiðslan þurfi að tengjast tæknilegum atriðum um endurskoðun viðræðuáætlunar sem á sér enga lagastoð og er hreinn fyrirsláttur. Af sama meiði eru yfirlýsingar af hálfu SÍS um að það sé á einhvern hátt óheimilt að ræða stöðuna og deilumálin í fjölmiðlum. Það bendir til þess að þau vita að málatilbúnaður þeirra og rökstuðningur er afar veikur.

Næsti viðræðufundur í deilunni er boðaður hjá Ríkissáttasemjara 21. ágúst næstkomandi. Í ljósi þess og þeirra einstrengislegu fyrirmæla sem fram koma í pósti sambandsins hefur SGS boðað til sérstaks formannafundar á morgun, 8. ágúst til að ræða þessa alvarlegu stöðu og ákveða næstu skref. SGS krefst þess að störf og framlag okkar félagsmanna í þágu sveitarfélaganna um land allt verði virt og þeim ekki mismunað með þessum gróflega hætti. Haldi Samband íslenskra sveitarfélaga þessari afstöðu til streitu er hætta á að það þýði hörð átök. Formaður Framsýnar mun taka þátt í fundinum á morgun en afstaða félagsins er skýr, það á ekki að líða sveitarfélögunum það að mismuna starfsmönnum í launakjörum eftir félagsaðild.

 

Því miður hefur Skútustaðahreppur ekki séð ástæðu til að svara erindi Framsýnar stéttarfélags frá 2. júlí 2019 varðandi afstöðu sveitarfélagsins til tilmæla Framsýnar um að sveitarfélagið greiði starfsmönnum sveitarfélagsins sem jafnframt eru félagsmenn í Framsýn eingreiðslu/innágreiðslu upp á kr. 105.000 miðað við fullt starf meðan ósamið er.

Það er til samræmis við ákvörðun Samninganefndar Sambands íslenskra sveitarfélaga um að sveitarfélögin greiði starfsmönnum stéttarfélaga/landssambanda, sem eru með lausa samninga, eingreiðslu kr. 105.000,-. Það er öðrum en félagsmönnum aðildarfélaga Starfsgreinasambands Íslands.

Sveitarfélögum á félagssvæði Framsýnar var gefin frestur til að svara erindinu til 11. júlí 2019. Norðurþing, Þingeyjarsveit og Tjörneshreppur hafa þegar svarað erindinu.

Ekki þarf að taka fram að um mjög alvarlega mismunun er um að ræða meðal starfsmanna sveitarfélaga, þar sem þeim sem eru á lægstu laununum er haldið eftir meðan aðrir starfsmenn með lausa samninga fá þessa eingreiðslu. Svona vinnubrögð eru reyndar fordæmalaus sem betur fer.

Dæmi eru um að sveitarfélög hafi hunsað tilmæli Samninganefndar Sambands íslenskra sveitarfélaga og greitt starfsmönnum til jafns við aðra starfsmenn viðkomandi sveitarfélaga. Umrædd sveitarfélög bera greinilega virðingu fyrir störfum þessara starfsmanna í þágu sveitarfélaganna. Í þeim flokki er Tjörneshreppur.

(Frétt uppfærð. Rétt í þessu 7. ágúst var að berast póstur frá Skútustaðahreppi þar sem fram kemur að beiðni Framsýnar verði tekin fyrir á næsta sveitarstjórnarfundi síðar í þessum mánuði)

 

Vegna sumarleyfa á skrifstofu stéttarfélaganna eru umsækjendur um styrki eða sjúkradagpeninga úr sjúkrasjóðum Framsýnar og Þingiðnar beðnir um að skila inn umsóknum fyrir 20. ágúst vilji þeir fá endursgreiðslur frá félögnum í lok ágúst. Annars koma greiðslurnar ekki til framkvæmda fyrr en í lok september. Frekari upplýsingar er hægt að fá á skrifstofu stéttarfélaganna.

Fjáreigendafélag Húsavíkur stóð fyrir hrútasýningu á Mærudögum sem er árviss viðburður á bæjarhátíð Húsvíkinga. Keppnin fór fram á föstudagskvöldinu eftir setningu Mærudaga á hafnarstéttinni. Töluverður fjöldi fólks fylgdist með keppninni sem fór vel fram enda mikill metnaður meðal fjáreigenda á Húsavík að sigra keppnina og hafa umgjörðina sem besta. Eftir sýninguna söng Karlakórinn Hreimur nokkur lög fyrir gesti.

Sex magnaðir hrútar voru til sýnis og kepptu um hver væri glæsilegasti hrúturinn í flokki yngri og eldri hrúta. Skemmst er frá því að segja að kynbóta hrútar frá fjárræktarbúinu Grobbholti á Húsavík sigruðu bæði í flokki yngri og eldri hrúta og fékk búið veglegan bikar í verðlaun.

Eldri flokkur: Bassi besti sem er ættaður frá Bassastöðum á Stöndum

Yngri flokkur/veturgamlir hrútar: Horni sem er ættaður úr Grobbholti

Stórbændurnir, Sigurður Ágúst Þórarinsson úr Skarðaborg og Guðmundur Ágúst Jónsson úr Fagraneskoti voru yfirdómarar og kynnir kvöldsins var Kristján Þór Magnússon sveitarstjóri Norðurþings. Skrásetjari, Sveinbjörn Lund frá Miðtúni á Sléttu. Sveinbjörn sá til þess að allir dómar væru rétt skráðir á þar til gerð blöð.

Til viðbótar voru tvær konur fengnar til að velja fallegasta punginn og andlitsfallið á þeim hrútum sem tóku þátt í keppninni. Þetta voru þær Guðný J. Grímsdóttir úr Reykjadal og Pálína Halldórsdóttir af Tjörnesinu. Þær fóru á kostum og enduðu með því að velja Horna úr Grobbholti stæðilegasta hrútinn enda þykir hann fjallmyndarlegur og með einstakan pung til undaneldis.

Framsýn stóð fyrir ljósmyndasýningu á Mærudögum og fór hún fram í Þröskuldi, litla fundarsalnum á efri hæð Garðarsbrautar 26. Sýningin var helguð verkakonunum í Von og myndirnar lýsa vel vinnuaðstöðu og aðbúnaði verkafólks frá stofnun Verkakvennafélagsins árið 1918 og fram eftir síðustu öld. Það var afar ánægjulegt hversu margir lögðu leið sína í Þröskuld, en um 100 gestir sóttu sýninguna heim og gáfu sér tíma til að spá og spjalla yfir kaffi og meðlæti. Myndirnar voru unnar í samstarfi við Pétur Jónasson ljósmyndara og hefur þeim verið valinn áframhaldandi staður í Þröskuldi, en salurinn er tileinkaður baráttu Vonarkvenna.

Eftirfarandi myndir eru af gestum sýningarinnar. Þær voru teknar af Ósk Helgadóttur, varaformanni Framsýnar sem hélt um stjórnartaumanna á sýningunni ásamt öðru stjórnarfólki Framsýnar.

Síðustu 12 árin hefur það verið fastur viðburður í Laufásprestakalli að boða til messu á Þönglabakka í Þorgeirsfirði einu sinni á sumri. Það viðraði vel til messuhalds í veðurblíðunni í gær og margir lögðu leið sín í Þorgeirsfjörðinn, ýmist gangandi, hjólandi eða siglandi með Húna frá Akureyri og Grenivík.
Byggð í Fjörðum lagðist af árið 1944, var þá kirkjan tekin ofan og efniviður hennar nýttur til annara bygginga eins og títt var í þá daga þegar skortur var á byggingarefni.
Þrátt fyrir að kirkjan sé ekki lengur til staðar á Þönglabakka er helgihaldið ekki vandamál. Messan fór fram undir berum himni, altaristaflan undurfögur náttúran sem bjó sig upp á og skartaði sínu fegursta í tilefni dagsins, en kirkjugestir létu fara vel um sig í grösugum kirkjugarðinum og hlýddu á guðsorð og sálmasöng.
Það voru Kristján Valur Ingólfsson, biskup , Sr. Sólveig Halla Kristjánsdóttir og Sindri Geir Óskarsson guðfræðingur sem þjónuðu í messunni. Söngmálastjóri þjóðkirkjunnar, Margrét Bóasdóttir stýrði söng, einsöngvari var Benedikt Kristjánsson, Gunnar Sigfússon lék á trompet og Haukur Ingólfsson á gítar. Að messu lokinni var boðið upp á kaffi og kleinur áður en kirkjugestir héldu heim á leið.

Félagsmenn Framsýnar fengu samtals greiddar kr. 20.702.621,- í námsstyrki úr kjarasamningsbundnum fræðslusjóðum á árinu 2018, það er með styrkjum úr Fræðslusjóði Framsýnar.

Styrkirnir skiptast þannig milli sjóða: 

279 félagsmenn fengu greidda styrki úr Landsmennt  kr. 12.868.294,-.

6 félagsmenn fengu greidda styrki úr Sjómennt kr.     407.625,-.

13 félagsmenn fengu greidda styrki úr Ríkismennt kr.     602.759,-.

38 félagsmenn fengu greidda styrki úr Fræðslusjóði verslunar og skrifstofufólks kr. 2.680.362,-.

78 félagsmenn fengu greidda styrki úr Sveitamennt kr. 3.843.581,-.

Að auki fengu 5 félagsmenn styrki úr Fræðslusjóði Framsýnar kr. 300.000,-.

Félagsmenn Framsýnar spöruðu sér umtalsverða fjármuni á síðasta ári með því að hafa aðgengi að ýmsu í gegnum félagið, hér koma nokkur dæmi:

Félagsmönnum stéttarfélaganna á Húsavík stendur til boða að kaupa gistimiða og ódýr flugfargjöld sem skiptast þannig fyrir árið 2018:

Seldir flugmiðar 5.545        Sparnaður fyrir félagsmenn              kr. 66.540.000,-

Seldir gistimiðar  854         Sparnaður fyrir félagsmenn              kr.   1.964.200,-

Samtals sparnaður fyrir félagsmenn              kr. 68.504.200,-

Sambærilegar tölur fyrir 2017 eru eftirfarandi:

Seldir flugmiðar  4.470           Sparnaður fyrir félagsmenn              kr. 49.617.000,-

Seldir gistimiðar   739           Sparnaður fyrir félagsmenn              kr.   1.625.800,-

Samtals sparnaður fyrir félagsmenn               kr. 52.302.250,-

Þess má geta að árið 2018 flugu 14.332 farþegar um Húsavíkurflugvöll. Eins og sjá má var hlutfall félagsmanna Framsýnar sem notfærðu sér flugið því verulega hátt eða 39% af heildar farþegafjöldanum. Flug um Húsavíkurflugvöll fór mest í 20.199 farþega árið 2016 þegar framkvæmdirnar á svæðinu vegna Bakka og Þeistareykja stóðu hvað hæst.

Til viðbótar má geta þess að 78 félagsmenn fengu tjaldstæðisstyrki árið 2018 eða samtals kr. 1.317.365,-.

 

Samkvæmt 3.mgr. 49. gr. laga ASÍ skulu stjórnir sjúkrasjóða aðildarfélaga ASÍ fá tryggingafræðing eða löggiltan endurskoðanda til þess að meta framtíðarstöðu sjóðsins og semja skýrslu til stjórnar um athugun sína. Framsýn lét framkvæma þessa athugun og sá PWC um skoðunina. Niðurstaðan er skýr: „ekkert bendi til annars en að sjóðurinn geti staðið við skuldbindingar sínar á allra næstu árum sé litið til eiginfjárstöðu í árslok 2017, afkomu sjóðsins á undanförnum árum og þess að bótagreiðslur úr sjóðnum og iðgjöld til sjóðsins verði áfram með líkum hætti og verið hefur.“ Þá kemur fram í fylgiskjali að staðan sé í raun öfundsverð.