kuti

Eins og fram hefur komið í fjölmiðlum kom til ágreingins innan miðstjórnar ASÍ um hvaða leið ætti að fara varðandi óskir Samtaka atvinnulífsins um aðkomu aðildarfélaga sambandsins að stöðunni en fyrir liggur að mörg fyrirtæki á almenna vinnumarkaðinum eru í slæmri stöðu og hafa því óskað eftir viðræðum við verkalýðshreyfinguna um tímabundnar breytingar á gildandi kjarasamningi.

Helst hefur verið talað um að fara svokallaða lífeyrissjóðsleið, það er að heimila tímabundna lækkun á mótframlagi atvinnurekenda úr 11,5% í 8%. Í öðru lagi hefur verið talað um að fresta boðuðum launahækkunum 1. apríl um nokkra mánuði og í þriðja lagi hafa menn verið þeirrar skoðunar að verkalýðshreyfingin ætti ekki að hlusta á áhyggjur atvinnulífsins varðandi rekstrarumhverfi fyrirtækja. Meirihluti miðstjórnar samþykkti eftir að hafa farið nokkra hringi í málinu, eins og einn ágætur maður orðaði það, að hafna þessum leiðum. Það er að gefa eftir tímabundna frestun á launahækkunum og/eða greiðslum atvinnurekanda í lífeyrissjóði starfsmanna.

Til að gera langa sögu stutta þá varð alvarlegur klofningur innan miðstjórnar ASÍ um hvernig best væri að takast á við stöðuna og beiðni Samtaka atvinnulífsins um tímabundna eftirgjöf verkalýðshreyfingarinnar meðan Covid 19 veiran væri að ganga yfir.

Vilhjálmur Birgisson sagði skilið við miðstjórn með því að segja af sér sem fyrsti varaforseti sambandsins og formaður og varaformaður VR, sem sitja einnig í miðstjórn ASÍ, notuðu tækifærið og sögðu sömuleiðis skilið við miðstjórn vegna óánægju með nálgun forseta og annarra kjörinna fulltrúa í miðstjórn sambandsins varðandi óskir Samtaka atvinnulífsins um breytingar á gildandi kjarasamningi.

Innan Framsýnar er virkur hópur félagsmanna sem skipaður er um 50 fulltrúum frá flestum fyrirtækjum á félagssvæðinu, ekki síst frá stærri fyrirtækjum. Hópurinn var virkjaður í gær í leynilega skoðanakönnun um stöðuna en hópurinn er að mestu skipaður trúnaðarmönnum starfsmanna og endurspeglar vel almennar skoðanir félagsmanna sem telja hátt í 4000 félagsmenn.

Spurt var um leiðir, hvort rétt væri að bregðast við óskum Samtaka atvinnulífsins um tímabundnar tilslakanir eða ekki. Boðið var upp á þrjá valkosti.

• Verða ekki við óskum Samtaka atvinnulífsins um breytingar á kjörum félagsmanna aðildarfélaga ASÍ þrátt fyrir stöðuna í þjóðfélaginu?
• Svara kallinu með því að fresta tímabundið boðuðum launahækkunum sem koma eiga til framkvæmda 1. apríl?
• Í stað þess að samþykkja frestun á launahækkunum 1. apríl verði heimilað tímabundið að færa mótframlag atvinnurekenda í lífeyrissjóði starfsmanna úr 11,5% í 8%?

Niðurstaðan er skýr:

Mikill meirihluti þeirra sem tóku þátt í skoðanakönnuninni var á því að leið 3 kæmi best út fyrir félagsmenn eða um 78% svarenda, það er að heimila tímabundna lækkun á mótframlagi atvinnurekanda í lífeyrissjóði. 19% voru á því að fresta ætti tímabundið launahækkunum sem koma eiga til framkvæmda 1. apríl. Það sem vekur hins vegar töluverða athygli eða ekki, er að aðeins 3% svarenda taldi að verkalýðshreyfinginn ætti að halda áætlun og hafna kröfum um breytingar á launahækkunum eða breytingum á lífeyrissjóðsframlögum atvinnurekanda í lífeyrissjóði.

Niðurstaðan úr þessari óformlegu könnun segir okkur að 97% félagsmanna eru tilbúnir að leggja á sig tímabundnar skerðingar enda verði allir launþegar í landinu klárir að leggjast saman á árannar með það að markmiði að sigla þjóðarskútunni í örugga höfn og verðlagi og öðrum þáttum sem áhrif hefur á afkomu fólks verði haldið í lágmarki.

Að mati félagsmanna Framsýnar er ekki pláss fyrir farþega, það verði allir að leggja sitt að mörkum við þessar aðstæður, ekki bara verkafólk.

 

 

Frétt heimasíðunnar í gær um að höfðinginn Guðmundur Vilhjálmsson væri að taka við formennsku í Framsýn stéttarfélagi var að sjálfsögðu aprílgabb. Talað var um að formaður Framsýnar tæki á móti gestum í fjárhúsinu í Grobbholti frá kl. 17:00 til 19:00 í gær. Enginn hljóp aprílgabb en hundruð manna lækuðu við fréttina á heimasíðu stéttarfélaganna sem vakti töluverða athygli. Þó nokkrir komu hins vegar við og bönkuðu á gluggann hjá formanni Framsýnar til að athuga hvort hann væri ekki örugglega í sætinu sínu en lokað er fyrir almenna umferð á skrifstofuna um þessar mundir. Heimasíðan þakkar öllum þeim sem tóku þessu gabbi vel, fyrir þeirra viðbrögð við þessu gríni, eða eins og einn ágætur maður orðaði það, hvað rugl er hér eiginlega í gangi. Ölver Þráinsson trúnaðarmaður hjá starfsmönnum Norðlenska var einn af þeim sem kom á gluggann hjá formanni Framsýnar til að fara yfir stöðuna og fylgja eftir fyrirspurnum frá starfsmönnum fyrirtækisins um ákveðin atriði.

 

Stéttarfélögin hafa ákveðið að koma til móts við félagsmenn og lækka leiguverðið á sumarhúsunum og íbúðum stéttarfélaganna til félagsmanna sumarið 2020. Þannig vilja félögin koma til móts við félagsmenn á erfiðum tímum.

• Gjald fyrir vikudvöl í orlofshúsi/íbúð sumarið 2020 verður kr. 20.000 í staðinn fyrir kr. 29.000.
• Umsóknarfresturinn verður framlengdur til 30. apríl. Í fyrri auglýsingum var hann auglýstur til 15. apríl.

Það er von stéttarfélaganna að Covid 19 verði gengin yfir og félagsmenn verði duglegir við að ferðast innanlands í sumar. Gaman saman kæru félagar og fjölskyldur.

Frekari upplýsingar eru í boði á Skrifstofu stéttarfélaganna.

Framsýn stéttarfélag
Verkalýðsfélag Þórshafnar
Starfsmannafélag Húsavíkur
Þingiðn, félag iðnaðarmanna

 

 

Fæðuöryggi er fremur nýtt hugtak í alþjóðlegri umræðu og fyrir mörgum er það enn nokkuð framandi. Á undanförnum áratugum hefur heimsmyndin tekið stakkaskiptum og afleiðingin er meðal annars sú að nú er talið brýnt fyrir hverja þjóð að móta stefnu sem tryggir fæðuöryggi hennar í framtíðinni. Áhyggjur manna eru heldur ekki að ástæðulausu, því helstu sérfræðingar í loftslagsmálum spá því að stórir heimshlutar, þar sem nú er framleiddur matur verði áður en langt um líður, óhæfir til matvælaframleiðslu, vegna þurrka, skógarelda eða vegna súrnunar sjávar.

Víða um heim verða kröfur almennings um breytta stefnu í mat­væla­fram­leiðslu háværari og Ísland er þar ekki undanskilið. Fyr­ir­hyggju­laus verk­smiðju­fram­leiðsla og aukin lyfja­notkun í mat­væla­fram­leiðslu vekur óhug/ógeð í brjósti upplýstra neytenda, er eitt að því sem gagnrýni gætir og eykur á efann um misjafnt vistspor þeirrar matvöru sem við kaupum erlendis frá. Neytendur krefjast upplýsinga um rekjanleika, upprunamerkingar og hreinleika vörunnar. Það er í takt við vaxandi meðvitund almennings um loftslagsmál, sjálfbæra þróun og umræðu um fækkun vistspora, enda gerir flest hugsandi fólk sér grein fyrir því, að ætlum við komandi kynslóðum að eiga sér lífvænlega framtíð á hér á jörð, verðum við einhverju að breyta.

Lengi vel settum við Íslendingar hugtakið „öryggi“ helst í samband við utanaðkomandi ógnir, í formi hernaðar, átaka eða hryðjuverka, við sváfum á verðinum og héldum að við værum lang flottust. Fátt þótti hallærislegra en að  efast um gildi þess að óheft markaðslögmál kapítalismans ættu að ráða för og fjár­hags­leg hag­kvæmni væri mik­il­væg­asta mæli­stikan á hvað skyldi flutt inn og hvað ekki. En svo kom blessað hrunið, íslenska krónan hrundi og innflutningskostnaður tvöfaldaðist í einni svipan. Við vorum rækilega minnt á hversu nauðsynlegt það er að við sem þjóð, séum sem mest sjálfum okkur nóg um fæðuöflun.

Nýjasta ógnin sem heimsbyggðin stendur frammi fyrir er  COVID 19 veiran. Við vitum ekki hvar þau ósköp enda, en þegar er ljóst að faraldurinn leiðir af sér fjölda ótímabærra dauðdaga um allan heim, auk þess að hafa gríðarlegar efnahagslegar og pólitískar afleiðingar. Eftir COVID verður heimsmyndin breytt. Það er illt til þess að vita að verð á matvælum mun óhjákvæmilega hækka í ljósi þeirra aðstæðna sem nú eru uppi og það sem enn verra er, raskist aðflutningar gæti það stefnt fæðuöryggi þjóðarinnar í voða.

Fæðuöryggi snýst meðal annars um það að horfa fram í tímann, það er öryggismál og við Íslendingar höfum alla burði til að tryggja fæðuöryggi þjóðarinnar.Landbúnaðurinn og matvælaframleiðslan, hvort sem það er framleiðsla á dýraafurðum eða grænmeti er ein af mikilvægustu grunnatvinnuvegum okkar og það er mikilvægt að landbúnaðurinn fái viðurkennt það stóra hlutverk sem hann gegnir fyrir byggðir landsins. Vonandi ber okkur gæfu til að varðveita og nýta þessa perlu af skynsemi, þjóðinni til hagsbóta. Marka okkur stefnu að góðum matvælagrunni og styðja við íslenskan landbúnað svo hann hafi burði til að standa á styrkum fótum – eigin fótum. (ÓH)

 

 

 

 

 

Aðalsteinn Árni Baldursson, formaður Framsýnar var í viðtali í þættinum „Kvótann heim‟ sem er vefþáttur í umsjá Ögmundar Jónassonar. Vilhjálmur Birgisson, formaður Verkalýðsfélags Akraness var einnig gestur Ögmundar í þættinum.

Ekki er ólíklegt að þetta séu tíðindi ársins ef ekki síðasta áratugar. Aðalsteinn Árni Baldursson sem verið hefur formaður Framsýnar, áður Verkalýðsfélags Húsavíkur lengur en nokkur annar maður í þessari veröld, hefur látið af störfum. Stjórn Framsýnar gekk frá starfslokum við hann í gærkvöldi eftir langan og strangan 24 tíma samningafund. Eins og kunnugt er, þá er Aðalsteinn Árni mikill kröfuhundur og krafðist hann þess að fá feitan starfslokasamning. Sagan segir að samningurinn sé í takt við starfslokasamning fyrrverandi Ríkislögreglustjóra. Rétt er að taka fram að algjör trúnaður ríkir um samninginn og því ekki opinber.

Félagið verður ekki lengi formannslaust þar sem þegar hefur verið samið við Guðmund Vilhjálmsson framkvæmdastjóra Garðvíkur og formanns SANA, sem eru heildarsamtök atvinnurekanda á norðausturhorninu, að taka við keflinu og leiða Þingeyskan verkalýð áfram á braut kjara og jafnréttis. Samningar tókust í nótt og hóf Guðmundur störf í morgun kl. 08:15 nokkuð hress eftir erfiða nótt. Það er eftir undirritun ráðningarsamnings sem er ótímabundinn. Hvorugur aðili getur sagt upp samningnum sem Guðmundur sagði fagnaðarefni enda færi vel um hann í stól formanns Framsýnar. Hann sagði þó þörf á því að endurnýja tölvuna og kaupa stærri tölvuskjá, helst tvo. Núverandi græjur væru svo gamaldags að þær ættu best heima á Byggðasafni Þingeyinga og hló um leið og hann hristi höfuðið yfir þessum úrelta tækjabúnaði.

Guðmundur Vilhjálmsson er 53 ára gamall Langnesingur og er fæddur og uppalinn að Syðra-Lóni á Langanesi.  Guðmundur er Vélfræðingur að mennt, lauk námi frá Vélskóla Íslands 1994 og fékk meistararéttindi í Vélsmíði árið 2001.  Guðmundur hefur jafnframt tvær útskriftir úr Háskólanum í Reykjavík, bæði á vélasviði og rekstrarsviði auk byggingastjóraréttinda. Eiginkona Guðmundar er Jóhanna Sigríður Logadóttir og eiga þau hjónin tvo syni, þá Friðrik Aðalgeir 14 ára og Loga Vilhjálm 12 ára. Starfsferill Guðmundar hefur lengst af verið tengdur sjávarútvegi, meðal annars hjá Samherja hf, Hraðfrystistöð Þórshafnar, Ísfélagi Vestmannaeyja og síðustu átta ár Guðmundar HB Granda og var Guðmundur þar í átta ár vélstjóri á Lundey NS. Síðustu fjögur ár hefur Guðmundur rekið Garðvík ehf á Húsavík.

Í samtali við heimasíðuna sagðist Guðmundur virkilega ánægður með að takast á við ný verkefni. Einhverjir hefðu haft að orði, hvort það væri ekki óeðlilegt að hann tæki við stéttarfélagi verandi einn af stærstu og öflugustu atvinnurekendum á Norðurlandi. Hann sagðist telja að menn þyrftu ekki að óttast það eða hafa óþarfa áhyggjur, hagsmunir fyrirtækja og starfsmanna færu vel saman og best væri að hafa öll eggin í sömu körfu. Það væri ekki spurning í hans huga, það er að hafa jafnan hitta á öllum eggjunum. Þannig væri hægt að skapa aukin tækifæri fyrir alla og unga út kjarabótum á svæðinu. Menn gætu hins vegar velt fyrir sér hvort hænan eða eggið hafi komið á undan, það væri umhugsunarefni. Hann vildi einnig taka fram að þetta væri ekki í fyrsta skiptið sem framkvæmdastóri fyrirtækis væri jafnframt formaður í verkalýðsfélagi. Sá ágæti maður Kristján Ásgeirsson hefði á sínum tíma bæði verið formaður Verkalýðsfélags Húsavíkur og Útgerðarfyrirtækisins Höfða. Á þeim tíma hefði það verið talið afar eðlilegt og rúmlega það. Það væri full ástæða til að endurvekja þessa góðu tíma. Hann sagðist ekki sjá ástæðu til að þakka Aðalsteini Árna fyrir hans störf í þágu Framsýnar þar sem hann hefði ekki unnið neina sérstaka sigra heldur verið með allt niður um sig eins og formaður Verkalýðsfélagsins á Akranesi hefði haldið fram í Boðberanum, málgagni KÞ, á dögunum.

Ekki náðst í Aðalstein Árna við gerð þessarar fréttar til að bera undir hann þessi óvæntu tíðindi. Sagan segir að hann ætli að snúa sér alfarið að fjárrækt eða jafnvel svínarækt en Aðalsteinn er búfræðingur að mennt og heldur nokkrar kindur, dúfur, hænur og eina kanínu í Grobbholti.

Við loka frágang fréttarinnar, rétt í þessu,  náðist þessi óvænta mynd af fyrrverandi formanni Framsýnar en sauðburður hófst í Grobbholti í morgun. Foreldrar ásamt börnum eru velkomin í heimsókn í dag milli kl. 17:00 og 19:00 til að sjá nýfædd lömb og annan búfénað og villidýr. Hann sagði alla velkomna á þessum tímamótum, það væri nefnilega líf eftir Framsýn og vildi ekki ræða málið frekar enda sauðburður í fullum gangi og rúmlega það hjá þessum fjórum ám sem bera í Grobbholti þetta vorið.

Þeir félagsmenn stéttarfélaganna sem fara í skert starfshlutfall samkvæmt tímabundnu samkomulagi við viðkomandi atvinnurekendur vegna Covid 19 þurfa að hafa í huga, ætli þeir sér að viðhalda fullum réttindum í stéttarfélögunum verða þeir að taka fram þegar þeir sækja um atvinnuleysisbætur að þeir ætli að greiða félagsgjald af atvinnuleysisbótunum. Sama á við um þá sem fara í fæðingarorlof.

Frekari upplýsingar eru í boði á Skrifstofu stéttarfélaganna.

Framsýn stéttarfélag
Starfsmannafélag Húsavíkur
Þingiðn, félag iðnaðarmanna

Að gefnu tilefni vilja stéttarfélögin árétta að atvinnurekendur, sem nýta sér úrræði stjórnvalda um að lækka stafshlutfall starfsmanna tímabundið vegna slæmrar stöðu sem tengist Covid-19,  er óheimild með öllu að krefjast vinnuframlags umfram hið nýja starfshlutfall nema greiða fyrir það sérstaklega. Umræða um þetta hefur verið að skjóta upp kollinum síðustu daga og hafa félagsmenn stéttarfélaganna komið sínum athugasemdum á framfæri við Skrifstofu stéttarfélaganna.

Tilgangur þeirra lagabreytinga sem samþykktar voru nýlega var að auðvelda atvinnurekendum að halda starfsfólki og koma í veg fyrir fjölda uppsagnir. Þannig hafa atvinnurekendur nú möguleika á að lækka starfshlutafall starfsmanna niður í allt að 25% með samþykki starfsmanna. Á móti eiga starfsmenn rétt á atvinnuleysisbótum sem nemur skerðingunni enda sé bótaréttur til staðar hjá Vinnumálastofnun.

Rétt er að taka fram að það er óheimilt með öllu að fara fram á það við starfsmenn fyrirtækja að þeir skili hærra starfshlutfalli/vinnuframlagi en þeir eru ráðnir til samkvæmt heimild stjórnvalda um skert starfshlutfall vegna aðstæðna í þjóðfélaginu nema fyrirtækin greiði þeim laun fyrir þá vinnu. Á móti skerðast síðan atvinnuleysisbæturnar.

Að auki er starfsfólki skylt að leita sér að starfi á móti skertu starfshlutfalli hjá viðkomandi atvinnurekanda sé það í boði.

Stéttarfélögin í Þingeyjarsýslum skora á fyrirtæki og stofnanir að framfylgja alfarið lögum og reglum sem gilda um tímabundnar hlutabætur til fyrirtækja í vanda vegna Covid 19.

 

 

Nú er blessuð sólin farin að hækka á lofti og gerir það að verkum að skammdegisdrunginn hopar og geislar sólarinnar finna sér leið inn í hrímguð sálartetur landans, eftir erfiðan vetur. Síðan í desemberbyrjun hefur Vetur konungur engan slaka gefið, en vonandi fara nú fréttir af fannfergi, ófærð og appelsínugulum viðvörunum að heyra sögunni til. Ef grannt er hlustað leynast nefnilega inn á milli hörmungafrétta heimsbyggðarinnar, nokkrar jákvæðar fréttir. Á dögunum var greint frá því að vorboðinn ljúfi, blessuð lóan væri komin og byrjuð að kveða burt snjóinn á Suðurlandinu og við vitum að þegar svo er komið byrja aðrir vorboðar að tínast til landsins einn af öðrum.  Fréttir af þessu tagi lyfta dagsins amstri einhvern vegin upp á hærra plan og vekja þá von í brjósti um að vorið sé kannski bara á næsta leiti.

Inn á milli stórhríðarkaflanna í vetur hafa laumað sér nokkrir góðviðrisdagar og þá kunna margir vel að meta, enda vel hægt að njóta fegurðar landsins þó það klæðist tímabundið hvítum hjúpi. Það gerir öllum gott að taka sér smá stund frá amstri hversdagsins, ná upp púlsinum með því að skreppa í  góðan göngutúr, eða leika við börnin úti í snjónum. Við skulum ekki gleyma að hreyfa okkur á þessum skrýtnu tímum sem við erum að upplifa, sem eru langt frá því að vera eins og við höfum óskað eftir.  Höfum í huga að reglubundin hreyfing er sterkasta meðalið sem við eigum við streitu og kvíða – og kostar ekkert. Drífum okkur út og njótum, verum bjartsýn og opnum hugann fyrir öllu því fegursta sem náttúran hefur að bjóða. (ÓH)

 

Það telst til tíðinda þegar fólk ræðst í það stórvirki að byggja sér einbýlishús, en að sögn fróðra manna hefur slíkt ekki gerst í Fnjóskadal í tæpan áratug. Það eru  Benedikt Geir Ármannsson og María Fernanda Reyes sem byggja í landi Vatnsleysu, en húsið er einingahús sem keyptar eru frá fyrirtækinu Landshús ehf. Benedikt sem er uppalinn á Vatnsleysu hefur búið á Akureyri um nokkurt skeið, en er nýlega fluttur heim og tekinn við búi af foreldrum sínum. Benedikt rekur blikksmíðafyrirtæki á Akureyri samhliða búskapnum, en María, sem einnig er starfandi blikksmiður, mun flytja í dalinn fagra á vordögum. Það er alltaf ánægjulegt þegar dugmikið fólk flytur í sveitina, en fjölskyldan áætlar að flytja inn í nýja húsið á síðar á árinu. (ÓH)

Benedikt Geir Ármannsson veit ekki að því að henda upp einbýlishúsi í einum fallegasta dal landsins.

Garðvík ehf. á Húsavík hefur undanfarið unnið að því að laga stétt við Hrunabúð sem er félag um rekstur á leiguhúsnæði á efri hæðinni að Garðarsbraut 26, það er fyrir ofan skrifstofur stéttarfélaganna. Að sjálfsögðu stóðu starfsmenn Garðvíkur sig afar vel og hafa nú að mestu lokið framkvæmdum við verkefnið. Stéttin við hurðina var hellulögð og hiti settur undir hana sem kemur sér vel enda oft snjóþungt hér norðan heiða.

Afar mikilvægt er að gengið sé rétt frá málum þegar fyrirtæki semur við starfsmenn um að taka á sig skert starfshlutfall. Hér má sjá samkomulag sem hægt er að styðjast við þegar gengið er frá samkomulagi um skert starfshlutfall. Þetta form er til á íslensku, ensku og pólsku.

Samkomulag
um tímabundna lækkun starfshlutfalls

Vegna tímabundins samdráttar í rekstri fyrirtækisins er samkomulag milli (heiti fyrirtækis og kennitala) og (nafn starfsmanns og kennitals) um tímabundna lækkun starfshlutfalls.

Starfshlutfall er nú ___% og verður ____%.

(Lýsa getur þurft hvað felst í lækkuðu starfshlutfalli, t.d. hvort lækkað starfshlutfall í vaktavinnu feli í sér færri eða styttri vaktir (eða bæði) eða hvaða áhrif það hefur á fasta kvöld- og helgarvinnu).

Lægra starfshlutfall / breyttur vinnutími gildir á tímabilinu frá ____________ til ___________ 2020.

Á tímabilinu verða laun lægri sem nemur lækkun starfshlutfalls (eða tilgreina nánar m.v. breyttan vinnutíma).

 

Forsendur:

Forsenda samkomulags þessa er að starfsmaður geti á tímabilinu sótt um og fengið greiddar atvinnuleysisbætur á grundvelli sérstaks bráðabirgðaákvæðis laga um atvinnuleysistryggingar.

Bráðabirgðaákvæði um atvinnuleysisbætur á móti skertu starfshlutfalli gildir til 1. júní 2020.

Ef rekstrarforsendur breytast er fyrirtækinu heimilt án ástæðulausrar tafar að hækka starfshlutfall starfsmanns í allt að fyrra hlutfalli.

 

Staður og dagsetning

 

F.h. (heiti fyrirtækis)                                                                     (nafn starfsmanns – undirritun)

Til stéttarfélaga innan Starfsgreinasambandsins um land allt  berast nú mikið af fyrirspurnum og athugasemdum vegna uppsagna, fyrirvaralausra breytinga á vaktafyrirkomulagi og fjölmargra annara atriða sem snúa að vinnufyrirkomulagi og réttindum fólks samkvæmt ákvæðum kjarasamninga.

Að gefnu tilefni ítrekar Formannafundur Starfsgreinasambandsins að allar breytingar á að vinna í fullu  samráði við starfsfólk og skorar á atvinnurekendur að nýta sér ekki núverandi aðstæðurnar til að fara á svig við gildandi kjarasamninga og brjóta á réttindum launafólks. Slíkt framferði er algerlega óásættanlegt og verður mætt af fullum þunga af hálfu félaga innan SGS Starfsgreinasambands Íslands.

 

 

Eins og fram hefur komið er Skrifstofa stéttarfélaganna lokuð fyrir heimsóknum. Félagsmönnum er velkomið að hafa samband við starfsfólk í gegnum síma og/eða með því að senda netpóst. Þrátt fyrir að skrifstofan sé formlega lokuð hafa félagsmenn komið við og bankað á glugga í leit að þjónustu. Á meðfylgjandi mynd má sjá Aðalstein J, sinna einum erlendum félagsmanni í gegnum glugga.  Að sjálfsögðu standa starfsmenn vaktina og vinna sín daglegu störf sem eru mjög krefjandi og eru vinnudagarnir langir um þessar mundir.

Framsýn stéttarfélag tekur heilshugar undir með Alþýðusambandinu sem beinir þeim tilmælum til fyrirtækja að sýna ábyrgð og halda aftur af verðhækkunum við þær aðstæður sem nú eru uppi og koma þannig í veg fyrir frekari verðbólgu og efnahagslega óvissu sem kemur illa niður bæði á heimilum og fyrirtækjum.

Nokkur umræða hefur verið um að verð á innfluttum vörum fari nú hækkandi vegna þeirrar gengislækkunar sem orðið hefur á síðustu mánuðum og hefur verðlagseftirliti ASÍ einnig borist nokkuð af ábendingum og áhyggjum neytenda þar um. Í því samhengi er nauðsynlegt að beina því til söluaðila að  gengislækkun ein og sér leiðir ekki sjálfkrafa til samsvarandi verðhækkana þar sem mun fleiri þættir hafa áhrif á verðlag innfluttra vara.

Í því sérstaka ástandi sem myndast hefur vegna Covid-19 veirunnar, hefur almenningur heldur ekki sömu tækifæri til að versla og gera verðsamanburð og hann hefur venjulega. Samkeppni á markaði minnkar þar sem verslun færist yfir á færri aðila og tækifæri neytenda til að veita aðhald minnkar. Í slíkri stöðu er auðveldara en ella fyrir fyrirtæki að hækka verð og okra á viðskiptavinum.

Fyrirtæki eru hvött til að nýta sér ekki ástandið með þessum hætti heldur laða frekar að sér ný viðskipti og styrkja þau viðskiptasambönd sem fyrir eru með því að sýna samfélagslega ábyrgð og  leita allra leiða til að halda verði í lágmarki.

Neytendur eru hvattir til að fylgjast vel með verðlagi, biðja um og passa upp á strimla og láta vita ef þeir verða varir við okur eða óeðlilega miklar verðhækkanir. Það má gera með því að deila inn á facebook hóp verðlagseftirlitsins; Vertu á verði – eftirlit með verðlagi en einnig má senda ábendingu til Samkeppniseftirlitsins í gegnum útfyllingarform á vefsíðu þeirra eða í gegnum netfangið samkeppni@samkeppni.is.

 

Í ljósi aðstæðna í íslensku samfélagi hefur stjórn Landsmenntar fræðslusjóðs ákveðið bjóða einstaklingum og fyrirtækjum uppá þann valkost að sækja námskeið á netinu eða í fjarkennslu þeim að kostnaðarlausu. Einnig mun sjóðurinn rýmka úthlutunarreglur sjóðsins og stofna til átaks í stafrænni/rafrænni fræðslu innan atvinnulífsins í samstarfi við fræðsluaðila og fyrirtæki.

Einnig mun sjóðurinn rýmka úthlutunarreglur sjóðsins sem taka til námskeiða sem ekki eru rafræn eða í fjarkennslu.  Stofnað verður til átaks í stafrænni/rafrænni fræðslu innan atvinnulífsins í samstarfi við fræðsluaðila og fyrirtæki.

Átakið tekur gildi frá  15.mars til og með 31.ágúst 2020 og gildir gagnvart námi/námskeiðum sem haldin eru innan þessa sama tímaramma.

Nánari útfærstla á átaksverkefninu:  Gerðir verða samningar við fræðsluaðila sem bjóða upp á vefnám/fjarnám þar sem fyrirtækjum og einstaklingum er boðin þátttaka í námi/námskeiðum þeim að kostnaðarlausu. Þessir samningar gilda einnig tímabundið og gagnvart því námi/námskeiðum sem fræðsluaðilar bjóða upp á innan þessa tímaramma það er frá 15. mars til og með 1. ágúst 2020

Um leið og Landsmennt hvetur stjórnendur fyrirtækja til þess að sinna sí-og endurmenntun starfsmanna sinna, vill stjórnin koma því á framfæri að tekið verði á móti öllum góðum hugmyndum að fræðslu sem kynnu að nýtast og falla vel að úthlutunarreglum sjóðsins.

Breytingar á úthlutunarreglum eru eftirfarandi:

• Endurgreiðslur til fyrirtækja vegna kostnaðar við námskeiðahald, miðað við núverandi reglur, verði hækkaðar úr allt að 75% í allt að 90% af styrkhæfum heildarkostnaði. Gildistími verði frá 15. mars til og með 1. ágúst 2020.
• Hámarksupphæð einstaklingsstyrkja verður áfram kr. 130.000 á ári miðað við núverandi reglur. Hlutfalli endurgreiðslu verði hins vegar breytt og verði 90% í stað 75% af kostnaði við námið. Gildistími verði frá 15. mars til og með 1. ágúst 2020.
• Tómstundstyrkir sem nú eru 75% en að hámarki kr. 30.000 á ári verði í sama hámarki og hefðbundnir styrkir, það er kr. 130.000 á ári. Hlutfall endurgreiðslunnar verði sömuleiðis 90% af viðurkenndum kostnaði við námið. Gildistími verði frá 15. mars  til og með 1. ágúst 2020.

Nánari upplýsingar veitir Kristín Njálsdóttir, framkvæmdastjóri Landsmenntar í síma 863 6480 eða á tölvupósti, kristin@landsmennt.is

 

During those uncertain times it is important that we are all informed about the situation in our society. We would like to encourage you to visit our website www.nordurthing.is for updates on the situation in our local community as well as www.covid.is for updates on official information on COVID-19 in Iceland. Both websites can be translated to English and Polish in the upper right corner. You can also find regular updates on our facebook page https://www.facebook.com/nordurthingmulticultural/. If you have any questions you can message us there,  email nordurthing@nordurthing.is or call 4646100.