kuti

Stjórn og trúnaðarráð Framsýnar kom saman til fundar í gær til að undirbúa vetrarstarfið. Boðið var upp á vöfflur og kaffi á fundinum sem fór vel fram að venju enda mikil samstaða innan félagsins. Umræður urðu m.a. um framkvæmdirnar á svæðinu, vetrarstarfið, vinnustaðaeftirlit, húsnæðisskort á Húsavík, hugsanlegar verkfallsaðgerðir sjómanna og fund stjórnar með forseta ASÍ síðar í þessum mánuði. Gengið var frá kjöri á fulltrúum á þing ASÍ sem haldið verður í Reykjavík í lok október og á fund Alþýðusambands Norðurlands sem haldinn verður á Illugastöðum í byrjun október.

 

 

 

 

 

 

 

 

 

Þessir tveir menn eru ekki skoðanalausir menn enda annar ættaður úr Bárðardal og hinn úr Fnjóskadal. Þetta eru gæða piltarnir, Torfi Aðalsteins og Valgeir Páll Guðmundsson.

 

 

 

 

 

 

 

 

 

Trúnaðarráð Framsýnar er vel skipað hörku fólki sem kemur víða að. Hér má sjá Guðnýju úr Reykjadal, Ragnhildi úr Kelduhverfi og Þórdísi sem kemur úr þeim fagra dal, Aðaldal.

 

 

 

 

 

 

 

 

 

Aðalsteinn J. Halldórsson starfsmaður stéttarfélaganna var gestur fundarins og fór yfir vinnustaðaeftirlitið á félagsvæðinu sem almennt hefur gengið mjög vel. Um 30 félagsmenn sitja í trúnaðarráði Framsýnar.

Nýr verktaki er væntanlegur á Bakka á næstu dögum. Hann heitir Beck & Pollitzer og er í grunninn breskt fyrirtæki. Mörg útibú eru þó starfandi á heimsvísu og mun það nýjasta opna hér á Íslandi innan fárra daga. Starfsmennirnir sem hér verða munu flestir koma frá Póllandi ásamt nokkrum öðrum frá öðrum ríkjum í Austur-Evrópu.

Fulltrúar Framsýnar áttu ágætan fund með þremur starfsmönnum fyrirtækisins í morgun. Eins og áður hefur komið fram á þessari síðu leggur Framsýn mikið upp úr góðu sambandi við verktaka á svæðinu, þar sem línurnar eru lagðar varðandi íslensk kjör og aðrar reglur sem gilda hér um vinnumarkaðinn.

Beck & Pollitzter munu verða áberandi hér á svæðinu næstu misserin en um 200 manns verða hér á þeirra vegum þegar mest verður.

Framsýn hefur ákveðið að viðhafa rafræna atkvæðagreiðslu um verkfallsboðun meðal sjómanna á fiskiskipum innan Sjómannadeildar Framsýnar, það er undirmanna og vélstjóra á bátum fyrir ofan 15 brútto tonn. Á næstu dögum munu kjörgengir sjómenn fá frekari upplýsingar um atkvæðagreiðsluna í pósti. Þeir sem telja sig hafa rétt til að kjósa en fá ekki kjörgögn í hendur í næstu viku eru vinsamlegast beðnir um að hafa samband við Skrifstofu stéttarfélaganna á Húsavík. Rétt er að taka fram að samningurinn nær ekki til sjómanna á smábátum.

Húsavík 13. september 2016
Sjómannadeild Framsýnar

Í sumar hafa stéttarfélögin orðið að hafa afskipti af fyrirtækjum í ferðaþjónustu í Þingeyjarsýslum sem gera út á hestaferðir um landið. Því miður gengur sumum þessara aðila mjög illa að virða kjarasamninga og lög sem gilda um slíka starfsemi. Stéttarfélögin hafa unnið að þessum málum með opinberum stjórnvaldsstofnunum s.s. Ríkisskattstjóra, lögreglunni, Vinnueftirlitinu og Vinnumálastofnun.   Þess ber að geta að sum fyrirtæki sem gera út á hestaferðir eru með sína starfsemi í góðu lagi meðan önnur fyrirtæki velja að fara aðrar leiðir sem ekki eru boðlegar og kalla á aðgerðir af hálfu stéttarfélaga og opinberra stofnanna.

Myndin tengist fréttinni ekki beint.

Þann 1. september hófst sláturtíð hjá Norðlenska á Húsavík. Um 190 manns koma að sláturtíðinni hér á Húsavík með einum eða öðrum hætti. Margir eru tímabundnu starfsmennirnir erlendir en alls má finna 15 þjóðerni á meðal starfandi fólks á staðnum.

Að sögn Sigmundar Hreiðarssonar fer sláturtíðin ágætlega af stað. Vel gekk að manna sláturtíðina en það getur verið töluvert púsluspil. Það kemur sér vel í því samhengi að nokkuð stór kjarni starfsmannanna koma á hverju ári og sú er raunin í ár.

Sigmundur segir að meðalvigt sé í rúmu meðallagi það sem af er, en minnir á að einungis fáir dagar séu búnir og erfitt að fullyrða neitt um framhaldið í þeim efnum.

Hér má sjá einn ástsælasta innleggjanda Norðlenska, Gunnar Rúnar Pétursson frá Vogum í Mývatnssveit ásamt Halldóri Sigurðssyni, réttarstjóra.Kristján Gíslason sér um viðhald í sláturhúsi Norðlenska og því mikið að gera hjá honum þessa dagana.

Pólska verktakafyrirtækið Yabimo starfar á Þeistareykjum og við Húsavík um þessar mundir. Verkþáttur fyrirtækisins pípulögnin frá virkjunarsvæðinu og á iðnaðarlóðina. Starfsmenn Framsýnar ásamt túlk áttu ánægjulegan fund með starfsmönnum fyrirtækisins á Þeistareykjum á dögunum. Yabimo-menn sýndu sínum málum áhuga og virtust ánægðir með þetta framtak.

Fundur verður í stjórn og trúnaðarráði Framsýnar mánudaginn 12. september kl. 20:00 í fundarsal félagsins að Garðarsbraut 26 á Húsavík. Að venju eru mörg mál á dagskrá fundarins.

Dagskrá:
1. Fundargerð síðasta fundar
2. Inntaka nýrra félaga
3. Kynning á stjórnar- og trúnaðarráðsmönnum
4. Vetrarstarf félagsins
5. Framkvæmdir á svæðinu
a. Samskipti við verktaka
b. Samskipti við starfsmenn
6. Vinnustaðaeftirlit í ferðaþjónustu
7. Húsnæðismál
8. Fundur AN í haust
9. Fundur með forseta ASÍ
10. Kjör fulltrúa á ASÍ þingið
11. Samstafssamningur við VÞ
12. Ársreikningar félagsins 2015
13. Önnur mál

 

Fulltrúar Framsýnar áttu fund á Þeistareykjum um málefni verktaka á svæðinu. Fundurinn var góður og árangursríkur. Eftir fund safnaðist hópur starfsmanna að fulltrúum Framsýnar á bílastæði staðarins og vildu ákaft ræða sín mál. Um 30 manns hópuðust að formanni Framsýnar sem er þarna með bláan hjálm í miðjum hópnum.

N4 tóku viðtal fyrir helgina við formann Framsýnar, Aðalstein Árna Baldursson, um framkvæmdirnar á svæðinu. Hér má hlíða á viðtalið.

Í gær, 31. ágúst heimsótti Framkvæmdarstjórn Samiðnar Skrifstofu stéttarfélaganna á Húsavík. Formaður Framsýnar tók á móti stjórninni ásamt Jónasi Kristjánssyni, formanni Þingiðnar. Um morguninn og farið yfir stóriðjuverkefnið á Bakka og virkjunarframkvæmdir á Þeistareykjum og hvernig verkefnið snertir starfsfólk stéttarfélaganna og meðlimi þeirra. Að því loknu var lagt af stað til Þeistareykja þar sem farið var yfir stöðu framkvæmda með Einari Erlingssyni, yfirmanni Landsvirkjunar á staðnum. Sigurður Óli Guðmundsson frá Landsvirkjun sá svo um leiðsögn um framkvæmdasvæðið. Að því loknu var förinni heitið í Bakka þar sem Friðgeir Indriðason, yfirmaður LNS Saga á svæðinu tók á móti hópnum og sagði frá verkefnum fyrirtækisins á Bakka. Botninn var svo sleginn í ferðina með Sturlu Fanndal, yfirmanni hjá LNS Bakkagöngum. Hann veitti hópnum leiðsögn um svæðið og fékk hópurinn meðal annars að skoða sig um í kringum gangnaframkvæmdina.

Framkvæmdastjórnin var ánægð að ferð lokinni og þakkaði vel fyrir sig. Ljóst er að þeim þótti umfang framkvæmda í kringum stóriðju mikið og sömuleiðis fleiri framkvæmdir sem ekki tengjast stóriðjunni sem ekki allir áttu endilega von á, svo sem stækkun á Fosshótel Húsavík. Enda er það svo að það er í mörg horn að líta hjá starfsfólki stéttarfélaganna um þessar mundir.

Myndir úr heimsókninni má sjá hér að neðan.

Fulltrúar Framsýnar funduðu með starfsmönnum G&M í dag en fyrirtækið er undirverktaki hjá LNS Saga á Þeistareykjum og þá kemur fyrirtækið einnig að breytingum sem verið er að gera á Laxárvirkjun í Aðaldal. Á fundinum var farið yfir réttindamál starfsmanna og kjör. Ljóst er að skoða þarf nokkur atriði er tengjast þeirra starfskjörum og verður það gert á næstu dögum. Sjá myndir sem teknar voru á fundinum í dag.

 

 

 

 

 

 

 

 

 

Um þrjátíu starfsmenn tóku þátt í fundinum í dag, það er flestir starfsmenn G&M sem voru á svæðinu.

 

 

 

 

 

 

 

 

 

 

 

 

 

 

 

 

 

 

 

Fundurinn var líflegur og formaður Framsýnar stóð vaktina og svaraði fyrirspurnum fundarmanna.

 

 

 

 

 

 

 

 

 

Agnieszka túlkaði það sem fram fór og stóð sig afar vel að venju.

 

 

 

 

 

 

 

 

 

Eftir fundinn héldu starfsmenn aftur til vinnu.

 

Stjórn Framsýnar samþykkti í morgun að senda frá sér svohljóðandi ályktun um Þeistareykjalínu 1 sem er í uppnámi vegna kæru Landverndar. Þar er því einnig mótmælt að einstakir þingmenn skuli gleðjast yfir stöðu mál.

Ályktun
um framkvæmdir á Bakka við Húsavík

„Framsýn, stéttarfélag tekur heilshugar undir með sveitarfélaginu Norðurþingi sem lýsir yfir þungum áhyggjum af þeirri stöðu sem upp er komin varðandi framkvæmdir við Þeistareykjalínu 1,en henni er ætlað að flytja orku til iðnaðarsvæðisins á Bakka. Öll hönnun svæðisins og uppbygging innviða hefur miðað að því að á næstu árum byggist þar upp iðnaðarsvæði með nokkrum fyrirtækjum sem nýta muni orku og línumannvirki svæðisins. Frá upphafi hefur verið litið á fyrri áfanga kísilvers PCC BakkiSilicon sem einungis fyrsta áfanga í þeirri uppbyggingu. Mjög miklir samfélagslegir og fjárhagslegir hagsmunir eru undir í því að niðurstaða fáist í málið á allra næstu dögum.
Þá telur Framsýn það ekki boðlegt og reyndar sorglegt að ákveðnir þingmenn skuli gleðjast sérstaklega yfir því að framkvæmdin á Bakka á vegum PCC skuli vera komin í uppnám eftir kæru Landverndar. Tugmilljarða framkvæmd er í hættu þrátt fyrir að framkvæmdaaðilar og sveitarfélögin á svæðinu hafi vandað mjög til verks allt frá upphafi í fullu samráði við hlutaðeigandi aðila.“

Framsýn, zwiazki zawodowe zapraszaja pracownikow G&M na zebranie, ktore odbedzie sie we wtorek 30 sierpnia o godzinie 15:00 w stolowce zakladowej w Þeistareykjum. Na zebraniu beda przedstawione warunki placowe pracownikow i zostanie wybrany ich maz zaufania. Framsýn, zwiazki zawodowe.

 

Síðasta miðvikudag sprengdi Erna Björnsdóttir forseti sveitarstjórnar Norðurþings síðasta haftið í Húsavíkurhöfðagöngum. Göngin eru tæplega kílómetri að lengd og tengja saman hafnarsvæðið á Húsavík og iðnaðarsvæðið á Bakka. Sprengingar hófust 10. mars sl. en verktakafyrirtækið LNS Saga sér um jarðgangagerðina og framkvæmdir henni tengdar. Mikil vinna er enn eftir við vegagerð, vegskála og frágang ganganna en áætlað er að framkvæmdum verði lokið haustið 2017.

 

 

 

 

 

 

 

 

Fjölmenni var saman komið þegar síðasta sprengingin var framkvæmd í Húsavíkurhöfðagöngum eins og meðfylgjandi myndir bera með sér.

Kristján L. Möller alþingismaður kom við á Skrifstofu stéttarfélaganna í gær til að ræða við starfsmenn um þjóðmálin og framkvæmdirnar á Húsavíkursvæðinu. Eins og kunnugt er hefur Kristján ákveðið að hætta á þingi í haust en hann hefur skilað góðu starfi á þingi og verið góður talsmaður landsbyggðarinnar.

 

 

 

 

 

 

 

 

 

Það er alltaf ánægjulegt að fá þingmenn í heimsókn til að ræða landsmálin.

 

Miðstjórn Alþýðusambands Íslands mótmælir harðlega nýlegum úrskurðum kjararáðs þar sem embættismönnum og forstöðumönnum ríkisstofnana eru úrskurðaðir tugprósenta launahækkanir í einu vetfangi. Niðurstaða kjararáðs gengur þvert á sameiginlega launastefnu sem samið var um á vinnumarkaði og lá til grundvallar vinnu aðila vinnumarkaðar um mótun nýs samningalíkans. Með þegjandi samþykki sínu gefa stjórnvöld launafólki langt nef og grafa undan viðræðum aðila vinnumarkaðarins um nýtt samningamódel sem byggir á stöðuleika og öruggri kaupmáttaraukningu.
Miðstjórn ASÍ áréttar að það kemur ekki til greina að tekjuhæstu hópar samfélagins fái sérstaka meðferð og deili ekki kjörum með almenningi í landinu – um slíkt verður engin sátt. Okkar félagsmenn munu ekki sætta sig við að skapa jarðveg fyrir stöðugleika og aukna verðmætasköpun með ábyrgum launahækkunum til þess að hátekjuhópar geti á einu bretti fengið hækkanir sem nema mánaðarlaunum margra félaga okkar.
Hér er á ferðinni versta birtingarmynd þess ranglætis sem við höfum alltof lengi búið við. Það er löngu tímabært að þeir sem telja sig vera yfirstétt þessa lands geri sér grein fyrir því að nú þurfa þeir eins og aðrir að taka afstöðu til þess hvort þeir vilja byggja hér upp samfélag þar sem jafnræði ríkir í launamálum. Til þess þurfum við hugarfarsbreytingu sem felst í norrænu fyrirmyndinni og tímabært að stjórnvöld horfist í augu við alvarlegar afleiðingar þessara úrskurða.

Nú standa yfir framkvæmdir við Laxárvirkjun í Aðaldal. Um er að ræða framkvæmd sem felur í sér breytingar á inntaki Laxárvirkjunar III sem og norðurhluta núverandi stíflumannvirkis ásamt nokkrum öðrum verkþáttum s.s. dýpkun inntakspolls, lagningu bráðabirgðavega og gerð varnargarða til bráðabirgða. Framkvæmdinni er ætlað að minnka rekstrarvandamál virkjunarinnar sökum ísmyndunar í ánni og aurburðar. Öll mannvirki, bæði tímabundin og varanleg, eru innan svæðis sem var raskað við byggingu Laxárvirkjunar I og III. Í framlögðum gögnum framkvæmdaraðila kemur fram að fyrirhugaðar framkvæmdir miði að því að fleyta ís sem berst að inntaki um nýtt ísfleytingaryfirfall og þaðan til baka í náttúrulegan farveg árinnar um frárennslisrennu en meðallengd steypts hluta hennar verði um 30 m og breidd á bilinu 3,5 m – 13 m. Steypt verði nýtt inntak sem verði um 30 m að lengd að meðaltali og að lágmarki um 10 m á breidd. Fulltrúar Framsýnar voru á ferðinni um síðustu helgi og tóku þessar myndir við það tækifæri.

Það var föngulegur hópur sem mætti á skrifstofu stéttarfélaganna síðastliðinn laugardagsmorgun. Tilefnið var hin árlega sumarferð stéttarfélaganna í Þingeyjarsýslum. Rúnar Óskarsson var þar mættur á rútu Fjallasýnar sem ferja átti liðið eftir hentugleikum þennan dag. Hópurinn skemmtilega breiður, þar sem elsti þátttakandi var um sjötugt en sá yngsti átta mánaða.

Næturþokan grúfði sig enn yfir stór – Húsavíkursvæðið er rútan brunaði út bænum, en er komið var í Reykjadalinn var heldur farið að rofa til. Á Mývatnsheiðinni tók sólin svo brosandi á móti okkur og gaf fyrirheit um að dagurinn yrði líkast til nokkuð góður. Það var ekki bara sólin sem tók okkur fagnandi á heiðinni, það gerði mývargurinn líka. En því betur fór fljótlega að gola aðeins að utan, þannig að mýið varð ekki til mikilla vandræða.
Ferðinni var heitið niður Laxárdalinn og skyldi gengið af Nónskarðsásnum niður í Ljótsstaði, en það eru um 12 km. Á fyrrgreindum ás eru gatamótin upp í Stöng, þar var stoppað og smalað út úr rútunni, flugnanetum smeygt yfir höfuð, skór reimaðir fastar og arkað af stað niður dalinn undir öruggri leiðsögn Hallgríms Valdimarssonar, sem ættaður er frá Halldórsstöðum í Laxárdal.

Laxárdalur er sannkölluð náttúruperla. Úfin apalhraunin, runnin frá eldstöðum í Mývatnssveit, löngu vaxin lyngi og fjalldrapa og myndarlegar birkihríslur er smeygja sér undan hraundröngum spila undurfagrar sónötur með nið Laxár sem streymir niður eftir dalnum endilöngum. Sannkölluð sinfonía fyrir augu og eyru. Við hverfum aftur til fortíðar, hlaðnir hraungarðar og bæjarrústir í túni geyma sögu og spor genginna kynslóða og strax í upphafi ferðar kemur í ljós að nokkrir innan hópsins hafa tengsl af einhverju tagi við dalinn. Hafa alist þar upp, verið þar í sveit eða vinnumennsku, eða jafnvel að forfeður þeirra hafi búið í dalnum í lengri eða skemmri tíma. Það gefur auka krydd í ferðalagið, enda hafa menn frá ýmsu að segja.

Við höldum að Brettingsstöðum sem var syðsta jörðin í Laxárdal vestan megin ár, en búið var þar til ársins1954. Höfum viðkomu á trébrú skammt sunnan og neðan við bæinn. Hallgrímur segir okkur frá slysi því er varð til þess að áin var brúuð árið 1902, en ári fyrr hafði bóndinn á Brettingsstöðum drukknað þar ásamt vinnumanni sínum. Á Brettingsstöðum tökum við nestisstopp og eftir góða sögustund höldum við áleiðis að Ljótsstöðum. Leiðin milli bæja liggur í gegnum fallegan birkiskóg er nefnist Varastaðaskógur. Þar teygist ögn á hópnum þar sem menn kjósa misjafnan ferðahraða, en allir skila sér þó í hlað á Ljótsstöðum á góðum tíma. Blíðviðrið og fagurbláar berjaþúfur tefja nokkuð fyrir göngufólki og víst er að töluvert magn berja hafur ratað í maga manna þennan dag.

Á Ljótsstöðum stendur tíminn í stað, þar er flest eins og það var þegar síðasti ábúandi féll frá árið 1965. Bærinn stendur opinn fyrir vegfarendum, öllum frjálst að skoða sig þar um gegn því að hrófla þar ekki við neinu. Eftir að hafa litast um á Ljótsstöðum og pústað um stund í hlaðvarpanum tóku aftur við þægindin í rútunni hjá Rúnari sem flutti hópinn að Þverá. Þar tók Áskell bóndi á móti okkur og sýndi hæverskur nýuppgerða kirkjuna og gamla torfbæinn þar sem hann er sjálfur fæddur og uppalinn. Á Þverá er snyrtimennskan höfð í fyrirrúmi, þar hefur öllu verið haldið til haga og leynir sér ekki sú natni og eljusemi sem ábúendur þar á bæ hafa lagt í að viðhalda sögunni. Gamli torfbærinn sem hefur verið í vörslu þjóðminjasafnsins frá árinu 1968 þykir ekki síst merkilegur fyrir það að hann er talinn geyma heildstæðustu búsetuminjar sem til eru á landinu.

Eftir að hafa kvatt Þverárbónda brunum við í Halldórsstaði þar sem Hallgrímur leiðsögumaður okkar og Halldór bróðir hans ráða ríkjum. Enn dveljum við í fortíðinni, skoðum Halldórsstaðahúsið þar sem fjölskyldur þeirra bræðra hafa komið sér upp skemmtilegri dvalaraðstöðu. Hér hefur dagatalinu heldur ekki verið flett í hálfa öld og gamlir munir prýða húsið sem hefur fengið að halda sjarmanum og manni finnst að maður sé staddur á lifandi safni þar inni. Þeir bræður léðu okkur fúslega mataraðstöðu í skemmtilega uppgerðri hlöðu og það stóð á endum, er við renndum í hlað var grillmeistarinn Lilja Sigurðar rétt að ljúka við að grilla dýrindis lambakjöt ásamt tveimur aðstoðarmönnum, þeim Aðalsteini og Aðalsteini. Eftir góðan mat og drykk seig á menn nokkur höfgi, en nú var orðið mál að halda heimleiðis og voru Halldórsstaðabræður kvaddir með þakklæti fyrir frábærar móttökur.

Við snúum aftur til nútímans og sólin er enn á himni er Rúnar skilar hópnum aftur heim til Húsavíkur. Menn kveðjast og týnast hver til síns heima, vonandi alir sáttir eftir viðburðarríkan dag.

 

 

Starfsmenn stéttarfélaganna hafa rekið sig á það í sumar að það vantar upp á að ferðaþjónustuaðilar séu með allar helstu leikreglur hvað varðar vaktavinnu, en sérstakar reglur gilda um þess háttar vinnufyrirkomulag.

Starfsgreinasamband Íslands tók saman helstu atriði sem hafa ber í huga ef nota á þennan kost. Hér má lesa samantektina.

Stéttarfélögin stóðu fyrir sumarferð í gær, laugardag, í Laxárdal. Hér má skoða nokkrar myndir sem teknar voru úr ferðinni. Ferðasaga kemur svo inn á síðuna eftir helgina.