kuti

Forseti Íslands, herra Guðni Th. Jóhannesson, lagði í gær hornstein að Þeistareykjavirkjun, fyrstu jarðvarmavirkjun sem Landsvirkjun reisir frá grunni. Fjölmenni var við athöfnina, sem fór fram í stöðvarhúsinu.

Á Þeistareykjum er nú verið að reisa 90 MWraf jarðvarmavirkjun í tveimur áföngum. Stefnt er að því að ljúka fyrri áfanga haustið 2017 og þeim seinni á fyrri hluta árs 2018. Þeistareykjavirkjun verður 17. aflstöð Landsvirkjunar.

Jónas Þór Guðmundsson, stjórnarformaður Landsvirkjunar, setti athöfnina. Hann sagði í ávarpi sínu að bygging Þeistareykjavirkjunar markaði tímamót fyrir iðnað og atvinnustarfsemi á svæðinu, enda væri traust aðgengi að rafmagni forsenda fyrir uppbyggingu af því tagi sem hafin væri og fyrirhuguð á næstu misserum og árum. Þá kom fram í máli Jónasar að leitast hefði verið við að lágmarka neikvæð umhverfisáhrif framkvæmdanna og jafnframt að lögð hefði verið höfuðáhersla á öryggismál við alla þætti hennar, í samræmi við öryggisstefnu fyrirtækisins. Að síðustu óskaði hann Íslendingum öllum til hamingju með þennan merka áfanga.

Í máli Harðar Arnarsonar, forstjóra Landsvirkjunar, kom fram að um væri að ræða mikilvægan áfanga fyrir fyrirtækið, sem hefði það hlutverk að hámarka afrakstur af þeim auðlindum sem því væri trúað fyrir, með með sjálfbæra nýtingu, verðmætasköpun og hagkvæmni að leiðarljósi. Með þetta hlutverk í huga hefði fyrirtækið lagt mikið upp úr vandlegum undirbúningi og rannsóknum á svæðinu, líkt og við aðrar framkvæmdir á vegum fyrirtækisins. Hann þakkaði nærsamfélaginu á norðausturhorninu, verktökum, eftirlitsaðilum og aðilum vinnumarkaðarins fyrir gott samstarf við framkvæmdina.

Bjarni Benediktsson, efnahags- og fjármálaráðherra, sagði að allar forsendur væru fyrir því að Þeistareykjavirkjun yrði lyftistöng fyrir samfélagið á Norðausturlandi og öllum Íslendingum til heilla. Framkvæmdin væri til vitnis um það hve Landsvirkjun væri mikilvægt fyrirtæki þegar kæmi að því að skapa grundvallarskilyrði fyrir vöxt og viðhald atvinnulífs í landinu, sem væri stór þáttur í því að tryggja Íslendingum þau lífskjör sem þeir hafa átt að venjast.

Valur Knútsson, yfirverkefnastjóri Þeistareykjavirkjunar, lýsti framkvæmdunum, en hönnun Þeistareykjavirkjunar hófst á haustmánuðum 2011 og hófust framkvæmdir vorið 2015. Fram kom m.a. hjá Val að við framkvæmdina setji Landsvirkjun öryggis- og umhverfismál í öndvegi. Rekin sé svokölluð „núll slysa stefna“ á framkvæmdasvæðinu, sem hafi það markmið að allir starfsmenn komi heilir heim að loknum vinnudegi.

Guðni Th. Jóhannesson, forseti Íslands, óskaði Landsvirkjun og Íslendingum öllum til hamingju með Þeistareykjavirkjun. Hann lagði í ávarpi sínu áherslu á að sjónarmið um sjálfbærni réðu ferðinni við nýtingu náttúruauðlinda Íslendinga. Þörf væri á langtímahugsun og ná þyrfti sátt um jafnvægi á milli nýtingar og verndar. Guðni sagði ánægjulegt að Íslendingar hefðu samþykkt niðurstöðu loftslagsráðstefnunnar í París á síðasta ári, en þjóðin hefði einmitt lagt sitt af mörkum í baráttunni við loftslagsbreytingar með nýtingu endurnýjanlegrar orku í stað kolefnaeldsneytis.

Hildur Ríkarðsdóttir verkefnisstjóri og Einar Erlingsson staðarverkfræðingur aðstoðuðu forsetann við hornsteinslagninguna.

Fyrsta djúpa rannsóknarholan boruð 2002

Tilurð Þeistareykjavirkjunar má rekja allt til síðustu aldar, en árið 1999 stofnuðu Orkuveita Húsavíkur, Hita- og vatnsveita Akureyrar, Rafveita Akureyrar, Aðaldælahreppur og Reykdælahreppur Þeistareyki ehf. Þremur árum síðar var fyrsta djúpa rannsóknarholan boruð, og gaf hún 6 MWraf.

Landsvirkjun kom að verkefninu árið 2005, þegar fyrirtækið keypti tæplega þriðjungshlut í Þeistareykjum ehf. Landnýtingar- og verndaráætlun fyrir Þeistareykjasvæðið var unnin í samstarfi sveitarfélaga og orkufyrirtækja árið 2006. Við mótun hennar var haft víðtækt samráð við hagsmunaaðila. Í kjölfarið var unnið Svæðisskipulag háhitasvæða í Þingeyjarsýslum 2007–2025. Lögð var áhersla á að samþætta nýtingu og vernd þannig að tekið yrði tillit til náttúrufars og náttúruverndarsjónarmiða við virkjanaframkvæmdir og mannvirkjagerð.

Árið 2008 var heildaraflgeta borhola á svæðinu orðin ríflega 45 MWraf og á næstu tveimur árum jók Landsvirkjun hlut sinn í félaginu upp í 97%. 2010 var mat á umhverfisáhrifum 200 MWraf virkjunar samþykkt og 2013 var Þeistareykjavirkjun raðað í nýtingarflokk rammaáætlunar. Árið 2014 sameinuðust Þeistareykir ehf. Landsvirkjun og í fyrravor hófust framkvæmdir við virkjunina.

Framkvæmdir

Á undanförnum árum hefur verið unnið að undirbúningsframkvæmdum á svæðinu. Má þar nefna lagningu aðkomuvegar frá Húsavík, jarðvegsframkvæmdir við stöðvarhússgrunn, lagningu vatnsveitu og uppbyggingu innviða. Árið 2014 voru boraðar vatnstöku-, niðurrennslis- og svelgholur ásamt rannsóknarholum til að efla enn frekar rannsóknir á grunnvatni.

Árið 2015 hófst bygging stöðvarhúss og lagning gufuveitu. Stöðvarhúsið samanstendur af tveimur vélasölum, þjónustubyggingu og verkstæði. Einnig er unnið að uppbyggingu skiljustöðvar, niðurrennslismannvirkja og dælustöðvar fyrir kaldavatnsveitu. Eftir að byggingu stöðvarhúss lýkur mun vinna við rafbúnað, stjórnkerfi og vélar virkjunarinnar taka við á verkstað. Þegar mest lætur verða rúmlega 200 manns í vinnu á Þeistareykjum á vegum Landsvirkjunar.

Helstu verktakar og framkvæmdaaðilar

LNS Saga og LNS A/S – Verktaki við byggingu stöðvarhúss og lagningu gufuveitu

Jarðboranir ehf. – Borun vinnsluhola

Fuji Electric/Balcke-Dürr – Framleiðsla og uppsetning vélbúnaðar og kalda enda

ABB – Framleiðsla og uppsetning stjórnkerfis

Tamini – Framleiðsla spenna

Rafeyri – Stöðvarveitur

Vélsmiðjan Héðinn – Framleiðsla skilja

Nú þegar eru til staðar á Þeistareykjum sjö vinnsluholur sem knýja munu aflvél fyrsta áfanga og verið er að bora fleiri vinnsluholur til að afla gufu fyrir annan áfanga framkvæmdarinnar. Sem fyrr segir á 90 MWraf stöð að vera komin í gagnið um vorið 2018.

Umhverfismál

Við allan undirbúning og framkvæmd Þeistareykjavirkjunar hefur verið tekið mið af sérstöðu svæðisins og áhersla lögð á umhverfismál. Þeistareykir voru nær ósnortið svæði ef frá voru taldar búsetuminjar og ummerki um brennisteinsnám á öldum áður. Í skipulagsáætlunum hafa því verið afmörkuð verndarsvæði vegna náttúru- og fornminja til að tryggja að þeim svæðum verði ekki raskað.

Við hönnun virkjunar var hugað að áhrifum á landslag og ásýnd svæðisins og fara framkvæmdir fram samhliða uppbyggingu. Má þar nefna sáningu í vegfláa Þeistareykjavegar og nýtingu gróðurþekju af framkvæmdasvæðum til klæðningar jarðvegsmana og vegfláa. Jafnframt er hafin uppgræðsla lands til mótvægis við það land sem fer undir mannvirki.

Mikil áhersla hefur verið lögð á góð samskipti við heimamenn með almennum fundum, útgáfu fréttabréfs og opnu húsi á verkstað til að auka samráð og upplýsingagjöf.

Viðamiklar rannsóknir og vöktun

Reglubundin vöktun umhverfisþátta er hafin á jarðhitasvæðinu á Þeistareykjum og næsta nágrenni. Markmiðið er að þekkja grunnástand umhverfisþátta svæðisins áður en rekstur virkjunar hefst og vakta þá síðan á rekstrartíma virkjunarinnar. Þannig verður hægt að meta hvort og þá hvernig rekstur jarðvarmavirkjunar hefur áhrif á umhverfi sitt. Yfirborðsjarðhiti, jarðhitakerfið, grunnvatn, loftgæði, hljóðvist, fuglar og gróður eru meðal þeirra umhverfisþátta sem eru vaktaðir.

Sjálfbærniverkefni

Árið 2015 var sjálfbærniverkefnið á Norðurlandi endurvakið í samvinnu við sveitarfélög á svæðinu og Rannsóknamiðstöð Háskólans á Akureyri og var Þekkingarnet Þingeyinga ráðið til að halda utan um verkefnið. Landsnet og hagsmunasamtök í ferðaþjónustu eiga nú einnig aðild að verkefninu. Markmið verkefnisins er að fylgjast með þróun samfélags, umhverfis og efnahags á svæðinu tengt uppbyggingu Þeistareykjavirkjunar, iðnaðarframkvæmdum á Bakka og auknum umsvifum í ferðaþjónustu.

Staðsetning

Jarðhitasvæðið á Þeistareykjum tilheyrir Þingeyjarsveit og er um 25 km suðaustur af Húsavík. Almennt er talað um að Þeistareykjasvæðið afmarkist af Höfuðreiðarmúla í norðri og Hólasandi í suðri. Svæðið markast af hamrabeltum Lambafjalla í vestri og Bæjarfjalli og Ketilfjalli í austri. Í norðri er Sæluhúsmúli og þar austur af heiðarlönd Kelduhverfis og Þeistareykjabunga.

Hér koma nokkrar myndir sem teknar voru í gær en viðburðurinn á Þeistareykjum var tilkomu mikill.

Hollvinasamtök Grunnskólans á Þórshöfn stóðu fyrir söfnun í septemberbyrjun til að fjármagna kaup á námstengdum spilum og öðru afþreyingarefni fyrir nemendur skólans. Í sumar þurfti að henda öllu slíku efni vegna myglusvepps sem upp kom í húsnæðinu. Samfélagið brást mjög vel við og söfnuðust 390 þúsund krónur frá fyrirtækjum og einstaklingum, ásamt nokkrum nytsamlegum gjöfum sem allt mun koma að góðum notum fyrir nemendur skólans. Hollvinasamtökin þakka fyrir góðar kveðjur og framlög frá einstaklingum. Einnig fá eftirtalin fyrirtæki sérstakar þakkir fyrir veittan stuðning: Dawid smidur ehf, Verkalýðsfélag Þórshafnar, Bílaleiga Akureyrar, Gistiheimilið Lyngholt, Geir ÞH 150, Landsbankinn hf, Samkaup Strax, Þekkingarnet Þingeyinga, Vanda ehf, Berg Íslensk hönnun og Snyrtistofa Valgerðar. Börnin í yngstu bekkjunum tóku á móti fulltrúum Hollvina, þau voru heldur fín og segja TAKK KÆRLEGA FYRIR OKKUR.

Stéttarfélögin á Norðurlandi hafa undanfarnar vikur unnið að því að samræma gildandi stofnanasamninga við heilbrigðisstofnanir á svæðinu, það er frá Húsavík að Blönduósi. Ástæðan er að búið er að sameina þessar stofnanir undir Heilbrigðisstofnun Norðurlands. Viðræður hafa gengið vel og vonandi tekst að ganga frá nýjum sameiginlegum stofnanasamningi á næstu vikum. Fyrir hönd Framsýnar og starfsmanna hjá HSN á Húsavík hefur formaður félagsins, Aðalsteinn Árni og trúnaðarmaður starfsmanna, Unnur Kjartansdóttir tekið þátt í samningaviðræðunum.

Framsýn, stéttarfélag boðar hér með til fundar með starfsmönnum Öryggismiðstöðvar Íslands mánudaginn 26. september kl. 15:00 í starfsmannaaðstöðu starfsmanna á Bakka. Tilgangur fundarins er að fara yfir kjaramál er tengjast þeirra störfum.

Föstudaginn 23. september verður haldið fjórða þing ASÍ-UNG en þingið sækja þeir sem eru 35 ára og yngri og eru í aðildarfélögum ASÍ. Þingið verður haldið í Rafiðnaðarskólanum, Stórhöfða 27.

Á þinginu verður farið yfir stöðu ungs fólks á húsnæðismarkaði sem og samtvinningu vinnu og fjölskyldulífs. Einnig ætlar hópurinn að rýna í stöðu ungs fólks innan hreyfingarinnar og hvernig virkja má hóp 35 ára og yngri betur.

Aðalbjörn Jóhannsson verður fulltrúi Framsýnar á þinginu.

Í apríl slasaðist pólskur starfsmaður á Þeistareykjum illa. Hann hefur verið frá vinnu síðan þá þangað til fyrir skömmu síðan þegar hann snéri aftur til Þeistareykja.

Starfsmenn stéttarfélaganna hafa aðstoðað hann á meðan veikindunum stóð, meðal annars við að sækja þær bætur og réttindi sem honum ber að hafa samkvæmt lögum og kjarasamning.

Það voru fagnaðarfundir þegar formaður Framsýnar hitti hann á vinnustaðafundi á dögunum. Hann þakkaði fyrir góða þjónustu og var greinilega hinn kátasti með þá þjónustu sem hann fékk af hendi stéttarfélagsins síns.

Auk þess vildi hann koma áleiðis kærum þökkum til starfsfólks Heilbrigðisstofnunnar Norðurlands á Húsavík. Hann sagðist hafa fengið framúrskarandi faglega og góða þjónustu.

Þetta er dæmi um hversu mikilvægt það er að vera vel á verði þegar eitthvað kemur upp á í aðstæðum sem þessum.

Föstudaginn 16. september fóru starfsmenn stéttarfélaganna á Þeistareyki og hittu þar fyrir starfsmenn Yabimo á stuttum en ánægjulegum fundi. Starfsmönnunum var færð terta og kunnu þeir það mjög vel að meta.

Eftir að starfsmennirnir fengu tertuna svöruðu fulltrúar Framsýnar fyrirspurnum frá stafsmönnum.

Meðfylgjandi eru myndir sem teknar voru við þetta tilefni.

Boðið er upp á rafræna kosningu um ótímabundið verkfall sjómanna. Kosningin er sett upp á þann hátt að hver kjósandi getur kosið jafn oft og hann vill, en síðasta atkvæðið mun gilda. Tryggt er að alger kosningaleynd er fyrir hendi. Til að kjósa skal smella hér.

Einnig er hægt að smella á Kjósið hér, efst á síðunni. Sá tengill mun verða hér efst á síðunni á meðan kosningu stendur. Sjá myndina hér að neðan:

SSÍ mun senda bréf til kjósenda sem inniheldur leyniorð sem notað verður til að taka þátt. Einnig er möguleiki fyrir kjósendur að notast við auðkenningarþjónustu Þjóðskrár Íslands, Innskraning.island.is (Íslykill og rafræn skilríki). Með þessu móti er hægt að kjósa strax á mánudag þegar opnað er fyrir kosningu, jafnvel þó bréfið sem inniheldur lykilorðið frá SSÍ hafi þá ekki borist.

 

Framsýn, stéttarfélag hefur samþykkt að senda frá sér svohljóðandi ályktun um ákvörðun Landsvirkjunar um að setja sér reglur um keðjuábyrgð sem ber að fagna sérstaklega.

Ályktun

Um samþykkt stjórnar Landsvirkjunar um keðjuábyrgð verktaka

„Framsýn, stéttarfélag fagnar sérstaklega ákvörðun Landsvirkjunar um að setja sér reglur um keðjuábyrgð. Reglunum er ætlað að tryggja að allir sem vinna fyrir Landsvirkjun á óbeinan hátt, hjá verktökum, undirverktökum eða starfsmannaleigum, njóti réttinda og kjara í samræmi við lög og kjarasamninga.

Framsýn hefur lengi kallað eftir reglum sem þessum, það er að Alþingi setji lög um keðjuábyrgð verktaka, þar sem núverandi staða mála er gjörsamlega óþolandi og kallar auk þess á undirboð.

Það að Landsvirkjun skuli stiga fram og marka sér stefnu í þessu mikilvæga máli er gott fordæmi fyrir aðra verkkaupa, ekki síst ríkið og sveitarfélög.

Framsýn skorar hér með á verkkaupa að fylgja fordæmi Landsvirkjunar um leið og félagið krefst þess að Alþingi standi í lappirnar og taki á þessum málum með því að setja lög um keðjuábyrgð verktaka.“

 

W poniedzialek, 19 wrzesnia przedstawiciele Zwiazkow Zawodowych Framsýn beda odpowiadac na Wasze pytania bedac do Waszej dyspozycji miedzy godzina 19:30 a godzina 21:00. Miejscem spotkania bedzie stolowka, serdecznie zapraszamy.

Zwiazki Zawodowe Framsýn

Allir helstu kjarasamningar Framsýnar eru nú tilbúnir á prentuðu formi. Þeir samningar sem eru komnir úr prentun eru heildarkjarasamningur Framsýnar og SA, samningur Framsýnar við Bændasamtök Íslands, samningur Framsýnar við Landssambands smábátaeigenda og nú síðast kom samningur Framsýnar við ríkið úr prentun. Nú vantar aðeins prentútgáfu af samningnum við Samband íslenskra sveitarfélaga, hann er væntanlegur fljótlega

Félagsmenn geta nálgast samningana á Skrifstofu stéttarfélaganna. Samningarnir eru einnig til á heimasíðu stéttarfélaganna á rafrænu formi.

Landsvirkjun hefur tekið upp keðjuábyrð. Þessu reglum er ætlað að tryggja að allir starfsmenn sem starfa fyrir Landsvirkjun óbeint, hvort sem það eru undirverktaka, starfsmenn starfsmannaleiga eða aðrir, fái kjör og réttindi í samræmi við lög og kjarasamninga.

Þetta tilkynnti fyrirtækið í gær.

Starfsmenn Framsýnar áttu fund í gær með Einari Erlingssyni, staðarverkfræðing Landsvirkjunar á Þeistareykjum. Aðalsteinn Á. Baldursson notaði tækifærið og lýsti yfir mikilli ánægju með þessar nýju reglur og bað Einar fyrir góðar kveðjur í höfuðstöðvar Landsvirkjunar.

Væntingar standa til að fleiri stórir verkkaupar muni fylgja fordæmi Landsvirkjunar í kjölfarið. Nánar má lesa um þessar nýju reglur Landsvirkjunar hér.

Framsýn, stéttarfélag og Verkalýðsfélag Þórshafnar hafa endurnýjað samstarfssamning félaganna. Samningurinn er ólíkur þeim fyrri. Sá samningur fól í sér að Verkalýðsfélag Þórshafnar greiddi ákveðna upphæð á mánuði til Skrifstofu stéttarfélaganna á Húsavík gegn ákveðinni þjónustu við félagið og félagsmenn. Nú færist sú þjónusta til Verkalýðsfélags Þórshafnar og falla því niður fastar greiðslur til skrifstofunnar á Húsavík. Komi til þess að Verkalýðsfélag Þórshafnar þurfi á þjónustu að halda mun félagið greiða sérstakt gjald fyrir þá þjónustu til Skrifstofu stéttarfélaganna. Við það er miðað að félagsmenn Verkalýðsfélags Þórshafnar leiti fyrst til skrifstofu félagsins á Þórshöfn sem síðan ákveður hvort þörf sé á aðkomu Skrifstofu stéttarfélaganna á Húsavík að málinu.
Samkvæmt samkomulaginu ætla félögin einnig að vinna sameiginlega að málefnum félagsmanna, atvinnulífs og byggðarlagsins í heild sinni með hagsmuni félagsmanna að leiðarljósi. Þá ætla félögin að vinna sameiginlega að orlofsmálum félagsmanna, vinnustaðaeftirliti og upplýsingamálum í gegnum fréttabréf og heimasíðu stéttarfélaganna í Þingeyjarsýslum.

Regulega berast vísbendingar um að íbúar landsbyggðarinnar sitji ekki við sama borð og þeir sem á höfuðborgarsvæðinu búa þegar kemur að verðlagi hjá ýmsum verslunum og verslunarkeðjum sem starfa á landsvísu. Til dæmis var auglýst vara á 177.000 krónur af einni af stærri verslunarkeðjum landsins á dögunum sem reyndist eiga að kosta 195.000 krónur í verslun keðjunnar á Húsavík.

Jafnvel veru vísbendingar um að mismunandi verð sé að finna innan sömu sýslu. Til dæmis tók glöggur neitandi eftir því á dögunum að bensín og díselolía voru á mismunandi verðum á Húsavík og Reykjahlíð.

Stjórn og trúnaðarráð Framsýnar kom saman til fundar í gær til að undirbúa vetrarstarfið. Boðið var upp á vöfflur og kaffi á fundinum sem fór vel fram að venju enda mikil samstaða innan félagsins. Umræður urðu m.a. um framkvæmdirnar á svæðinu, vetrarstarfið, vinnustaðaeftirlit, húsnæðisskort á Húsavík, hugsanlegar verkfallsaðgerðir sjómanna og fund stjórnar með forseta ASÍ síðar í þessum mánuði. Gengið var frá kjöri á fulltrúum á þing ASÍ sem haldið verður í Reykjavík í lok október og á fund Alþýðusambands Norðurlands sem haldinn verður á Illugastöðum í byrjun október.

 

 

 

 

 

 

 

 

 

Þessir tveir menn eru ekki skoðanalausir menn enda annar ættaður úr Bárðardal og hinn úr Fnjóskadal. Þetta eru gæða piltarnir, Torfi Aðalsteins og Valgeir Páll Guðmundsson.

 

 

 

 

 

 

 

 

 

Trúnaðarráð Framsýnar er vel skipað hörku fólki sem kemur víða að. Hér má sjá Guðnýju úr Reykjadal, Ragnhildi úr Kelduhverfi og Þórdísi sem kemur úr þeim fagra dal, Aðaldal.

 

 

 

 

 

 

 

 

 

Aðalsteinn J. Halldórsson starfsmaður stéttarfélaganna var gestur fundarins og fór yfir vinnustaðaeftirlitið á félagsvæðinu sem almennt hefur gengið mjög vel. Um 30 félagsmenn sitja í trúnaðarráði Framsýnar.

Nýr verktaki er væntanlegur á Bakka á næstu dögum. Hann heitir Beck & Pollitzer og er í grunninn breskt fyrirtæki. Mörg útibú eru þó starfandi á heimsvísu og mun það nýjasta opna hér á Íslandi innan fárra daga. Starfsmennirnir sem hér verða munu flestir koma frá Póllandi ásamt nokkrum öðrum frá öðrum ríkjum í Austur-Evrópu.

Fulltrúar Framsýnar áttu ágætan fund með þremur starfsmönnum fyrirtækisins í morgun. Eins og áður hefur komið fram á þessari síðu leggur Framsýn mikið upp úr góðu sambandi við verktaka á svæðinu, þar sem línurnar eru lagðar varðandi íslensk kjör og aðrar reglur sem gilda hér um vinnumarkaðinn.

Beck & Pollitzter munu verða áberandi hér á svæðinu næstu misserin en um 200 manns verða hér á þeirra vegum þegar mest verður.

Framsýn hefur ákveðið að viðhafa rafræna atkvæðagreiðslu um verkfallsboðun meðal sjómanna á fiskiskipum innan Sjómannadeildar Framsýnar, það er undirmanna og vélstjóra á bátum fyrir ofan 15 brútto tonn. Á næstu dögum munu kjörgengir sjómenn fá frekari upplýsingar um atkvæðagreiðsluna í pósti. Þeir sem telja sig hafa rétt til að kjósa en fá ekki kjörgögn í hendur í næstu viku eru vinsamlegast beðnir um að hafa samband við Skrifstofu stéttarfélaganna á Húsavík. Rétt er að taka fram að samningurinn nær ekki til sjómanna á smábátum.

Húsavík 13. september 2016
Sjómannadeild Framsýnar

Í sumar hafa stéttarfélögin orðið að hafa afskipti af fyrirtækjum í ferðaþjónustu í Þingeyjarsýslum sem gera út á hestaferðir um landið. Því miður gengur sumum þessara aðila mjög illa að virða kjarasamninga og lög sem gilda um slíka starfsemi. Stéttarfélögin hafa unnið að þessum málum með opinberum stjórnvaldsstofnunum s.s. Ríkisskattstjóra, lögreglunni, Vinnueftirlitinu og Vinnumálastofnun.   Þess ber að geta að sum fyrirtæki sem gera út á hestaferðir eru með sína starfsemi í góðu lagi meðan önnur fyrirtæki velja að fara aðrar leiðir sem ekki eru boðlegar og kalla á aðgerðir af hálfu stéttarfélaga og opinberra stofnanna.

Myndin tengist fréttinni ekki beint.

Þann 1. september hófst sláturtíð hjá Norðlenska á Húsavík. Um 190 manns koma að sláturtíðinni hér á Húsavík með einum eða öðrum hætti. Margir eru tímabundnu starfsmennirnir erlendir en alls má finna 15 þjóðerni á meðal starfandi fólks á staðnum.

Að sögn Sigmundar Hreiðarssonar fer sláturtíðin ágætlega af stað. Vel gekk að manna sláturtíðina en það getur verið töluvert púsluspil. Það kemur sér vel í því samhengi að nokkuð stór kjarni starfsmannanna koma á hverju ári og sú er raunin í ár.

Sigmundur segir að meðalvigt sé í rúmu meðallagi það sem af er, en minnir á að einungis fáir dagar séu búnir og erfitt að fullyrða neitt um framhaldið í þeim efnum.

Hér má sjá einn ástsælasta innleggjanda Norðlenska, Gunnar Rúnar Pétursson frá Vogum í Mývatnssveit ásamt Halldóri Sigurðssyni, réttarstjóra.Kristján Gíslason sér um viðhald í sláturhúsi Norðlenska og því mikið að gera hjá honum þessa dagana.

Pólska verktakafyrirtækið Yabimo starfar á Þeistareykjum og við Húsavík um þessar mundir. Verkþáttur fyrirtækisins pípulögnin frá virkjunarsvæðinu og á iðnaðarlóðina. Starfsmenn Framsýnar ásamt túlk áttu ánægjulegan fund með starfsmönnum fyrirtækisins á Þeistareykjum á dögunum. Yabimo-menn sýndu sínum málum áhuga og virtust ánægðir með þetta framtak.