kuti

 

Nú í júlí eru 33 ár síðan við hjónin fluttum fyrst í Fnjóskadalinn. Það var í árdaga Víkurskarðsins sem þá þótti reyndar mikil samgöngubót. Við vorum ung og bjartsýn og höfnuðum fyrirframgefnum hugmyndum um að við værum að fara í hefðbundinn búskap. Ég man ennþá hvað fólk hér rak upp stór augu þegar fréttin barst og æði oft fengum við spurninguna: „Já en, á hverju ætlið þið þá að lifa?“ Á þeim tíma lifðu nánast allir hér á búskap.

Einhvernvegin hefur okkur það nú tekist , það hefur ekki alltaf verið auðvelt en við fundum okkar farveg. Og í gegnum árin hefur þeim fjölgað töluvert sem búa hér og starfa við annað en landbúnað.

Víkurskarðið farartálmi
En það er þetta blessaða Víkurskarð. Vissulega er gaman að fara þar um á sólríkum sumardegi og útsýnið skemmir ekki í hvora á áttina sem litið er, en þeim sem ekki þekkja til hættir til að gera lítið úr þeim aðstæðum sem skapast þar gjarnan yfir vetrartímann.

Ég mun ekki syrgja vetrarferðirnar yfir Skarðið, enda í mínum reynslubanka um þennan fjallveg minningar sem sitja fastar á sálinni en hughrifin af því að horfa yfir spegilsléttan Eyjafjörðinn. Og það eru neikvæðar minningar.

Það er til dæmis minningin um nýjársdag 2005 þegar maðurinn minn fékk hjartaáfall og Skarðið ófært – ekki sérlega góð minning. Biðin eftir Súlumönnum sem brutust frá Akureyri með lækni og sjúkraflutningamenn var löng og ferðin inn eftir tók í minningunni eilífðartíma. Það fór betur en á horfðist – en mikið hefði nú verið gott að hafa göngin þá.

Það getur skollið á fyrirvaralaust uppi í Hrossagilinu og þeir sem það hafa upplifað þekkja þá tilfinningu að komast hvorki aftur á bak né áfram vegna veðurs og vita ekkert hvort eða hvenær einhver asninn gluðar framan á, aftan á eða jafnvel inn í hliðina á manni. Skyldu menn geta sett sig í spor þeirrar konu sem lendir í þannig aðstæðum ein á ferð – og ólétt? Ég þekki það – og það er verulega vond tilfinning.

Ég gæti haldið áfram og sagt ykkur margar fleiri sögur sem tengjast baráttu fólksins hér austan við, við þennan „krúttlega“ fjallveg. Þær sögur hafa ekki endilega farið hátt eða ratað á forsíður fjölmiðlana, en oft hefur staðið tæpt og litlu mátt muna að illa færi. Það er til dæmis ekki óalgengt að vinnustaður minn, Stórutjarnaskóli breytist í fjöldahjálparstöð í vondum vetrarveðrum og margir hafa verið fegnir að skríða þar í hús þegar færðin spillist út af – og Víkurskarð lokast.

Mikilvæg samgöngubót – öryggisventill
Gerð Vaðlaheiðargangna hefur fengið mjög neikvæða umfjöllun í samfélaginu, það er talað um kjördæmapot og ég held að þar hafi öll stóru orðin verið látin falla. Ég er samt ekki viss um að þeir hinir sömu og gagnrýna framkvæmdina hvað hæst vildu endilega vera í sporum okkar hér.

Ég ætla hins vegar ekkert að dæma það hvort að einhver önnur göng hefðu átt að vera á undan í forgangsröðinni. Ég þekki líka til aðstæðna austur á landi þar sem fjallvegir liggja mun hærra en Víkurskarð. Þekki Fjarðarheiðina og veit að hún sýnir ekki alltaf sparihliðina yfir vetrartímann. Það er hins vegar mín skoðun að ætlum við að viðhalda byggð í landinu þurfi samgöngur að standast þær kröfur sem gerðar eru í dag. Við erum rík þjóð og jarðgangnagerð ætti að vera sjálfsagður þáttur í nútímavegagerð rétt eins og hjá öðrum þjóðum.

Það eru breyttir tímar og þó að þeir sem eru komnir aðeins upp á árin sætti sig við ýmislegt þá gerir unga fólkið það ekki og við ætlum þeim að taka við. Því segi ég það að skilyrði fyrir áframhaldandi búsetu fólks hér sem annarsstaðar eru tryggar samgöngur.

En Vaðlaheiðargöng – ég get sagt ykkur það að orðið bráðnar á tungu minni eins og góður konfektmoli. Mér finnst gott að segja það, það hljómar vel, það vekur mér vonir um aukin lífsgæði og tilfinningin fyrir þessari framkvæmd fyllir mig sem íbúa í þessu sveitarfélagi bjartsýni og öryggi.

Göngin eru mikið hagsmunamál fyrir alla sem búa austan Vaðlaheiðar. Þar get ég fyrst nefnt aðgengi að Fjórðungssjúkrahúsinu á Akureyri sem er svæðinu hér austur um gríðarlega mikilvægur öryggisventill. Þegar við mætum sjúkrabílnum í Ljósavatnsskarði er hann ekkert endilega að flytja sjúkling frá Húsavík til Akureyrar, hann getur allt eins verið að koma frá Egilsstöðum eða Norðfirði.

Margir hér austan við stunda nám á Akureyri og keyra daglega á milli. Hér þurfa foreldrar að sjá á eftir börnum sínum í framhaldsskóla inn yfir heiði, flest fara þau þangað, leigja þá ýmist eða búa á heimavist. Það er kostnaðarsamt, fyrir utan það að það er ekki æskilegt að þurfa að sleppa hendinni af börnunum sínum svo ungum. Mér finnst ekki óeðlilegt að ætla að með betri samgöngum skapist meiri líkur á að börnin okkar geti búið lengur í foreldrahúsum og farið daglega á milli. En það verður þá að vera þannig að snjómokstur á sveitavegum verði í takt við almenningssamgöngur um þjóðveg 1.

Aukin tækifæri felast í bættum samgöngum
Ég hef alveg heyrt þær raddir að sérstaða samfélagsins okkar komi til með að breytast vegna bættra samgangna. Ég kaupi alveg þau rök, en hef engar sérstakar áhyggjur af því. Við þróumst bara og það er eðlilegt. Auðvitað er þetta gagnkvæmt, því við komum einnig til með að eiga greiðari leið út úr okkar samfélagi og fáum þá aukin tækifæri til að nýta okkur þann fjölbreytileika sem nágrannar okkar í þéttbýlinu hafa upp á að bjóða og tekið þar þátt.

Það er einhæfni í atvinnulífi, erfiðar samgöngur og fjarlægð frá vinnusóknarsvæðum sem gerir það oftast að verkum að íbúum í hinum dreifðu byggðum landsins fækkar. Þetta á við um okkur, ekki satt?

Ég er sannfærð um að tilkoma Vaðlaheiðargangna eigi eftir að breyta landslaginu meira en okkur grunar. Til dæmis gæti aukið aðgengi að atvinnu komið til með að styrkja hér búskap og ég hugsa að margir vilji drýgja tekjurnar með því að stunda vinnu af bæ. Það styrkir líka samfélagið í heild að hafa greiðari aðgang að fjölbreyttum vinnumarkaði. Göngin annarsvegar og uppbyggingin á Bakka hinsvegar munu vonandi tvinna saman þráð sem tengir byggð í Þingeyjarsýslu allri og það ásamt þeim atvinnugreinum sem fyrir eru stuðla að samfelldu atvinnusvæði frá Eyjafirði og austur um. Það eru nú þegar margir sem sækja vinnu úr Eyjafirði austur og öfugt og eins og við vitum er Víkurskarðið orðið næst fjölfarnasti fjallvegur landsins. Og það sem að menn gleyma gjarnan, Víkurskarðið tengir Austur – og Norðurland og miklir flutningar eru þar um – í báðar áttir.

Með göngunum batnar aðgengi að Akureyrarflugvelli fyrir íbúa austan Vaðlaheiðar og vonandi breytast þá líka forsendur fyrir betri nýtingu og frekari uppbyggingu Aðaldalsflugvallar þannig að það verði tveir öflugir flugvellir á þessu svæði. Til hagsbóta fyrir Þingeyinga – og Eyfirðinga til framtíðar.

Ég er bjartsýn á framtíðina og trúi því að ef/þegar fólk kemur til með að flytja hér austur þegar Vaðlaheiðargöng opna ætti enginn að þurfa að spyrja „Á hverju ætlið þið að lifa?“ því þá munu leiðir liggja til allra átta.

Ósk Helgadóttir
Merki, Fnjóskadal

 

 

 

 

Framsýn leggur mikið upp úr öflugu starfi ungliða innan félagsins. Í því sambandi er starfandi stjórn ungliða sem heldur utan um starfsemi Framsýnar-UNG.

Fyrir helgina barst Framsýn erindi frá erlendum aðilum með beiðni um að Framsýn taki þátt í Evrópsku verkefni (Erasmus+ programme) um stöðu ungs fólks, menntun og atvinnuætti í mismunandi löndum. Reiknað er með að verkefnið sem er fjölþjóðlegt verði kostað að erlendum sjóðum.

Framsýn mun taka erindið fyrir í ágúst og ákveða hvort félagið verður þátttakandi í verkefninu. Þessi beiðni er dæmi um öflugt starf félagsins sem hefur ekki bara vakið athygli innanlands heldur einnig víða erlendis.

 

Formaður Framsýnar og forstöðumaður Skrifstofu stéttarfélaganna, Aðalsteinn Árni Baldursson, fór í sumarfrí í morgun og verður í sumarfríi til næstu mánaðamóta. Félagsmönnum og atvinnurekendum er því bent á að hafa samband við aðra starfsmenn stéttarfélaganna á Skrifstofu stéttarfélaganna þurfi þeir á þjónustu félaganna að halda.

Boðað hefur verið til samstöðu og baráttufundar í Háskólabíó í dag, laugardaginn 15. júlí kl. 14.00. Vaxandi ólga er í þjóðfélaginu, ekki síst vegna stöðu öryrkja, eftirlaunafólks og verkafólks. Ekki síst þess vegna er boðað til fundarins í  dag og koma frummælendur úr röðum þessara hópa. Aðalsteini Árna Baldurssyni formanni Framsýnar var boðið að flytja ræðu á baráttufundinum en hann kom því ekki við að þessu sinni. Stéttarfélögin í Þingeyjarsýslum skora á fólk að fjölmenna í Háskólabíó í dag og sýna þannig samstöðu í verki.

 

Talsmenn stéttarfélaganna í Þingeyjarsýslum eru á ferð og flugi um félagssvæðið þessar vikurnar og hafa fjölmargir vinnustaðir verið heimsóttir. Stéttarfélögin leggja mikið upp úr góðu samstarfi við félagsmenn og atvinnurekendur á svæðinu. Þá er mikið um að talsmenn fyrirtækja, stofnana og sveitarfélaga leiti eftir upplýsingum frá stéttarfélögunum um réttindi á vinnumarkaði. Starfsmenn eru jafnframt duglegir við að hafa samband og óska eftir vinnustaðafundum með talsmönnum stéttarfélaganna. Einn slíkur fundur var haldin í vikunni með starfsmönnum Vaðlaheiðargangna en þeir óskuðu eftir fundi með formanni Framsýnar til að fara yfir sýn mál. Að sjálfsögðu var orðið við þeirri beiðni og fóru starfsmenn Framsýnar til fundar við starfsmenn í göngunum. Fundurinn gekk vel, nokkrar ábendingar komu fram frá starfsmönnum um réttindi og kjör sem unnið verður með á næstu vikum.

 

 

 

 

 

 

 

 

 

 

Talsmenn stéttarfélaganna á Húsavík hafa áður fundað með starfsmönnum Vaðlaheiðargangna. Þessi mynd var tekin við það tækifæri þegar fundað var með erlendum starfsmönnum á vaktaskiptum. Í vikunni var hins vegar fundað með íslenskum starfsmönnum að mestu.

Nokkrar vikur í sumarhúsum á vegum stéttarfélaganna eru í boði fyrir félagsmenn í ágúst. Áhugasömum er bent á að hafa samband við Lindu linda@framsyn.is á Skrifstofu stéttarfélaganna.

Mörk í Grímsnesi:
28. júlí – 4. ágúst

Svignaskarð:
18. ágúst – 25. ágúst

Bjarkarsel á Flúðum:
18. ágúst – 25. ágúst

Flókalundur:
28. júlí – 4. ágúst

Svínadalur:
18. ágúst – 25. ágúst

 

 

Glænýtt og glæsilegt Fosshótel Mývatn sem stendur á Flatskalla fékk heimsókn frá fulltrúum stéttarfélaganna dagana 6. til 7. júlí. Tvennir fundir voru haldnir, sitt hvorn daginn, til þess að ná til sem flestra starfsmanna hótelsins. Starfsmennirnir eru 40 talsins og koma víða að.

Nokkrar umræður voru á fundinum og var ánægjulegt að finna áhuga fólksins. Myndavélin var með í för og má sjá afraksturinn hér að neðan.

Í vikunni fór fram vinnustaðafundur á Bakka sem líklega er sá fjölmennasti í sögu stéttarfélaganna í Þingeyjarsýslu. Það var útibú Beck & Pollitzer á Íslandi sem var heimsótt, en fyrirtækið hefur verið við vinnu á Bakka í um tíu mánuði og á eftir rúmlega ár af sinni vinnu. Rúmlega 180 manns mættu á fundinn en það eru allir starfsmenn fyrirtækisins á Bakka.
Fulltrúar Framsýnar fóru yfir helstu leikreglur íslensks vinnumarkaðar og réttindi launþega. Svo var boðið upp á tertur sem bakaðar voru í Heimabakarí.
Almenn ánægja var meðal viðstaddra með fundinn og greinilega áhugi á viðfangsefninu.
Myndavélin var með í ferðinni eins og sjá má hér að neðan.

Ýmsar spurningar hafa vaknað hjá launafólki og launagreiðendum vegna þeirra breytinga sem verða á mótframlagi atvinnurekenda frá og með júlílaunum og jafnframt hefur orðið vart við nokkurn misskilning sem mikilvægt er að leiðrétta. Mótframlag atvinnurekenda í lífeyrissjóð á almennum vinnumarkaði hækkaði þann 1. júlí 2017 um 1,5% og er nú 10%. Skylduiðgjald til lífeyrissjóðs nemur því nú samtals 14% sem skiptist í 4% iðgjald launamanns og 10% mótframlag atvinnurekenda.
Síðasti áfangi hækkunar á mótframlagi atvinnurekenda kemur síðan til framkvæmda þann 1. júlí 2018 en þá hækkar framlagið um 1,5% til viðbótar og verður þá 11,5%. Skylduiðgjald til lífeyrissjóðs mun frá 1. júlí 2018 nema samtals 15,5% sem skiptist í 4% iðgjald launamanns og 11,5% mótframlag atvinnurekenda.
Sjóðfélagar hafa nú val um hvernig þeir ráðstafa hækkun mótframlagsins. Þeir geta ráðstafað því í tilgreindan séreignarsparnað með samningi við sinn lífeyrissjóð eða nýtt það til að auka tryggingavernd sína til örorkulífeyris og ævilangs ellilífeyris í samtryggingu.
Hækkun mótframlags atvinnurekenda byggir á kjarasamningum aðildarfélaga ASÍ og SA frá janúar 2016 og þar er að finna ákvörðun um hvernig með skuli fara.
Hvert á að greiða hækkað mótframlag atvinnurekenda?
Atvinnurekenda er skylt að greiða hækkað mótframlagi til þess lífeyrissjóðs sem skylduiðgjaldið hefur verið greitt til. Þetta þýðir að greiða ber 14% frá 1. júlí 2017 og 15,5% frá 1. júlí 2018 til skyldutryggingarsjóðs. Atvinnurekendi getur ekki ákveðið að greiða hækkað mótframlag í séreign heldur getur sjóðsfélagi tekið ákvörðun um að greiða það í tilgreinda séreign í samskiptum við sinn lífeyrissjóð.
Þarft þú að taka ákvörðun um ráðstöfun hækkaðs mótframlags atvinnurekanda núna?
Hver og einn launamaður ákveður sjálfur ráðstöfun hækkunar mótframlagsins, allt að 3,5% af launum, í tilgreinda séreign eða samtryggingu.
Viljir þú að hækkun mótframlags atvinnurekanda fari í tilgreinda séreign getur þú haft samband við þinn skyldutryggingarsjóð og gengið frá yfirlýsingu þar að lútandi. Hafir þú ekki samband við lífeyrissjóðinn þinn til að setja hækkun mótframlagsins eða hluta þess í tilgreinda séreign rennur það í samtryggingu og réttindi þín þar aukast.
Þú getur síðan hvenær sem er ákveðið að breyta ráðstöfun hækkunar mótframlags atvinnurekanda, úr samtryggingu í tilgreinda séreign að öllu leyti eða að hluta, eða úr tilgreindri séreign í samtryggingu. Breytingin tekur þá gild frá þeim tíma, en er ekki afturvirk.
Allar frekari upplýsingar um áhrif ráðstöfunar hækkunar mótframlags atvinnurekanda á lífeyrisréttindin má nálgast á heimasíðum viðkomandi skyldutryggingarsjóðs og á heimasíðu ASÍ

Benóný Benediktsson sem gegndi formennsku í Verkalýðsfélagi Grindavíkur í tæp þrjátíu ár lést þann 6. júní 2017 en hann var fæddur 28. maí 1928. Útför Benónýs fór fram frá Grindavíkurkirkju þriðjudaginn 20. júní og var fjölmenni á jarðarförinni.

Með Benóný er genginn góður maður og ötull talsmaður verkafólks. Það var mikill heiður að fá að starfa með honum í tæpa þrjá áratugi að verkalýðsmálum. Samstarf okkar var gott í bland við gaman og alvöru. Það var eðlilega töluvert spjallað um verkalýðsmál, sjósókn og landsmálin almennt enda Benóný áhugasamur um flest milli himins og jarðar. Þá var fjölskyldan honum kær. Það var ekki hans stíll að tala fólk niður heldur byggði hans málflutningur á jákvæðni og því sem betur mæti fara í þjóðfélaginu og þar með verkalýðshreyfingunni. Hann átti það til að vera stríðinn. Honum leiddist til dæmis ekki að hringja í mig norður til Húsavíkur eftir að hafa hlustað á veðurfréttirnar þar sem fram kom að veðrið hér fyrir norðan væri afar slæmt og spyrja;Hvernig er veðrið þarna fyrir norðan félagi?

Auðvitað stóð ekki á svari hjá mér sem svaraði um hæl að staðbundið verður í Grindavík væri rigning og rok sem gerði alla menn kollruglaða, þar á meðal hann og síðan var hlegið.

Með þessum orðum vil ég þakka Benóný fyrir einstaklega gott samstarf um tíðina um leið og ég votta fjölskyldu hans innilegrar samúðar. Minning um góðan mann lifir um ókomna tíð.

Aðalsteinn Árni Baldursson formaður Framsýnar, stéttarfélags

Á dögunum boðuðu Framsýn og Þingiðn til opins fundar um samþykktar breytingar á framlögum atvinnurekenda í lífeyrissjóði. Fundurinn var haldinn í fundarsal stéttarfélaganna á Húsavík.

Huld Aðalbjarnardóttir setti fund og bauð fundarmenn velkomna til fundarins, sérstaklega bauð hún starfsmenn Lsj. Stapa velkomna til fundarins. Þær voru Jóna Finndís Jónsdóttir, Kristín Hilmarsdóttir og Fanney Þórarinsdóttir. Huld tók að sér fundarstjórn.

Huld sagði að þann 1. júlí 2017 tækju gildi nýjar reglur um framlög atvinnurekenda í lífeyrissjóði.  Hún fór yfir helstu breytingarnar en sagði að Jóna Finndís Jónsdóttir áhættustjóri Lsj. Stapa væri hingað komin til að gera fundarmönnum grein fyrir helstu breytingum á kerfinu. Stjórnir Þingiðnar og Framsýnar hefðu talið mikilvægt að standa fyrir kynningarfundi sem þessum til að fræða félagsmenn um nýja kerfið.

Jóna Finndís tók við keflinu og sagðist ánægð með að vera komin til Húsavíkur til að fara yfir þessi mál með sjóðfélögum Lsj. Stapa.  Nýlega hefði sjóðurinn staðið fyrir aukaársfundi sjóðsins á Akureyri til að fara yfir tillögur að breytingum á reglugerð sjóðsins til að geta tekið við viðbótar hækkununum. Tillögurnar hefðu verið samþykktar. Þá stæði til að kynna breytingarnar fyrir sjóðfélögum með ýmsum hætti á komandi mánuðum. Jóna Finndís kom víða við í máli sínu. Meðal annars kom fram að í síðustu kjarasamningum við Samtök atvinnulífsins í maí 2015 hefði verið samið um hækkun á mótframlagi atvinnurekenda í lífeyrissjóð sem kemur inn í áföngum á samningstímanum. 0,5% kom til framkvæmda 1. júlí í fyrra, 1,5% kemur til framkvæmda 1. júlí 2017 og 1,5% kemur til framkvæmda þann 1. júlí 2018. Frá þeim tíma verður mótframlag orðið 11,5% eða það sama og á opinbera markaðnum. Framlag launamanns verður áfram 4%. Dregist hefur hjá Alþingi að koma saman lögum sem gilda um þetta viðbótarframlag sem kallast ,,tilgreind séreign“. Ástæðan fyrir nafngiftinni er, að launamaður þarf að tilgreina að hann óski eftir að viðbótin renni inn í lífeyrissjóðinn með þessum hætti. Jóna Finndís sagði mikilvægt að rugla henni ekki saman við hina hefðbundnu séreign sem verið hefur inni í kjarasamningum um nokkurt skeið. Þótt að lögin um tilgreinda séreign séu ekki klár liggur nú loksins fyrir með hvaða hætti þetta verður og því hafa lífeyrissjóðirnir undirbúið jarðveginn og stofnuðu á dögunum á aukaársfundum nýja deild inni í sjóðunum fyrir tilgreinda séreign. Atvinnurekendur skila viðbótarframlaginu inn í lífeyrissjóðina sem hækkun á mótframlagi. Þeir launamenn sem vilja láta viðbótina renna inn í sameignina þurfa ekki að gera neinar ráðstafanir. Þeir launamenn sem vilja að viðbótin fari inn í tilgreinda séreign þurfa sjálfir að gera ráðstafanir til þess. Það er gert með því að fara inn á heimasíðu sjóðsins www.stapi.is fyrir þá sem eru í Stapa lífeyrissjóði og fylla út eyðublað til að óska eftir að viðbótin fari inn á tilgreinda séreign. Þeir sem kunna að vera í öðrum lífeyrissjóðum fara með sama hætti inn á heimasíðu síns sjóðs. Mikilvægt er að launafólk átti sig á því, að sé valið að ráðstafa viðbótinni í tilgreinda séreign, að hún veitir ekki aukinn rétt í áfallatryggingum (örorkulífeyri, makalífeyri og barnalífeyri) heldur safnast tilgreinda séreignin upp með sama hætti og hinn hefðbundni séreignarsparnaður. Inni á heimasíðum sjóðanna er að finna frekari upplýsingar og von er á reiknivél til að auðvelda fólki að átta sig á þeim mismun á réttindum sem viðbótin veitir eftir því hvort hún er sett í sameignina eða tilgreindu séreignina.

Eftir yfirferð Jónu Finndísar var orðið gefið frjálst. Töluverðar umræður urðu um málefni fundarins og fjölmargar spurningar komu fram. Þá urðu umræður um mikilvægi þess að kynna málið vel fyrir sjóðfélögum svo þeir geti tekið vel upplýsta ákvörðun.

 

Ævar Ísak Sigurgeirsson og fjölskylda hefur í áratugi rekið verslun og þjónustu í Söluskálunum Ásbyrgi. Nýlega var gerði DV verðkönnun á vörum og þjónustu verslana af þessu tagi. Ein verslun hafði lækkað verð á vöru milli ára og hefur það vakið nokkra athygli. 

Í ferð um svæðið ákvað Aðalsteinn Árni Baldursson formaður Framsýnar – stéttarfélags að grípa tækifærið og grípa sína uppáhaldsmæru.  Að sögn Ísaks sýna nýjustu verðkannanir að Prinspóló er hvergi ódýrara en í þessari rótgrónu ferðamannaverslun. Prinspóló kostar nú kr. 130 og hefur lækkað um tæp 30% frá s.l. sumri, en þá kostaði það kr. 180. Hann segir þetta eiga mjög eðlilega skýringu, hér sé um innflutta vöru að ræða og lækkunin sé í samræmi við gengisbreytingar milli ára. Hann telur eðlilegt að skila henni til neytenda.

Aðalsteinn fagnar þessu. Þetta sýni að Ævar og hans fólk er heiðarlegir verslunarrekendur freistist ekki til að stela ábata vegna breytinga á gengi.

Aðspurður um verslun segir Ævar að hún sé ágæt og vaxandi á þessum tíma. Hjá þeim í þessari rótgrónu ferðamannaverslun er ákveðinn stöðugleiki, m.a. hafi þau áfram breitt vöruúrval í verslun og í matsölu.

Það er mikið líf á Skjálfanda um þessar mundir eins og meðfylgjandi myndir bera með sér sem teknar voru fyrir helgina. Fjölmargir hvalaskoðunarbátar fara daglega í hvalaskoðunarferðir um Skjálfanda auk þess sem fuglalífið er skoðað, ekki síst við Lundey. Þá hefur skipaumferð um flóann aukist töluvert með tilkomu framkvæmdana á svæðinu. Við skulum láta myndirnar tala sínu máli.

Hér rétt áðan gerði einhverja mestu úrkomu sem viðstaddir hafa orðið vitni af. Lætin hófust með hagléli sem skömmu síðar breyttist í afar mikla rigningu. Undirritaður heyrði af því að vart hefði orðið við þrumur og eldingar víða um sýsluna í dag. Meðfylgjandi myndir voru teknar þegar lætin stóðu sem hæst.

Lokið er talningu í atkvæðagreiðslu meðal félagsmanna Verkalýðsfélags Þórshafnar sem starfa í fiskimjölsverksmiðju Ísfélags Vestmannaeyja á Þórshöfn um nýgerðan sérkjarasamning. Þáttaka í atkvæðagreiðslu var 83% og var mikill meirihluti sem samþykkti samninginn. Samningurinn gildir þar til í maí 2019.

Samninginn í heild sinni má nálgast hér

Sérkjarsamningur VÞ og SA vegna starsmanna í fiskimjölsverksmiðju ÍV á Þórshöfn

 

 

 

 

 

 

 

 

 

Skrifstofa stéttarfélaganna leitar að góðum liðsmanni sem er tilbúinn að leysa af við ræstingar og þrif á skrifstofunni vegna sumarleyfa og þegar á þarf að halda. Áhugasömum er bent á að hafa samband við Aðalstein Árna á skrifstofunni sem veitir frekari upplýsingar. Einnig er hægt að senda umsóknir um starfið á netfangið kuti@framsyn.is

Skrifstofa stéttarfélaganna

Stéttarfélögin, Þingiðn og Framsýn, standa fyrir opnum fundi í dag, miðvikudag, um breytingar á greiðslum starfsmanna/fyrirtækja í lífeyrissjóði. Breytingarnar tóku gildi 1. júlí 2017. Fundurinn verður í fundarsal stéttarfélaganna og hefst kl. 17:00.

Það er afar mikilvægt að félagsmenn kynni sér vel þær breytingar sem samþykktar hafa verið á greiðslum iðgjalda í lífeyrissjóði. Hvaða leið vilja menn fara, tilgreinda séreign eða trygginavernd.

Framsýn, stéttarfélag

Þingiðn, félag iðnaðarmanna

Í dómi Hæstaréttar síðan 1. júní er það staðfest að óheimilt var að stytta bótarétt þeirra sem þegar höfðu virkjað sinn rétt fyrir 1. janúar 2015. Þeir sem fengu í fyrsta skipti greiddar bætur eftir 1. janúar 2015 verða ekki fyrir áhrifum af dómnum.

Nánar má lesa um málið hér.

Undanfarin misseri hafa staðið yfir framkvæmdir við Goðafoss. Eins og flestir vita er Goðafoss afar vinsæll áfangastaður ferðamanna. Kominn var tími á að bæta aðstöðu fyrir gesti en aðstæður við fossinn voru ekki taldar viðundandi nú þegar ferðamönnum hefur fjölgað ákaflega mikið síðustu árin.
Meðfylgjandi myndir af framkvæmdunum og aðstöðunni tók Helga Erlingsdóttir og veitti góðfúslegt leyfi fyrir birtingu þeirra.

Í gildandi kjarasamningum aðildarfélaga ASÍ og SA er kveðið á um að iðgjald til lífeyrissjóða hækki í áföngum og verði 15,5% 1. júlí 2018. Iðgjaldið hækkaði 1. júlí 2016 um 0,5% og hækkar um 1,5% 1. júlí n.k. og svo önnur 1,5% 1. júlí 2018. Í gildandi kjarasamningum er gert ráð fyrir að einstaklingar geti ráðstafað allri viðbótinni eða hluta hennar í svokallaða„tilgreinda séreign“ sem verður aðskilin frá hefðbundinni séreign enda hluti af skylduiðgjaldi. Lífeyrissjóðir á samningssviði ASÍ og SA eru þessa daganna að vinna að breytingum á samþykktum sínum og er gengið út frá því að regluverkið verði tilbúið 1. júlí n.k.

Einstaklingurinn velur leið
Til þess að viðbótariðgjaldið fari í tilgreinda séreign verður einstaklingurinn að gera skriflegan samning um skiptinguna þ.e. hvort allt viðbótariðgjaldið skuli renna í tilgreindu séreignina eða einungis hluti þess. Einnig þarf einstaklingurinn að ákveða fjárfestingaleið, ef hann gerir það ekki fer tilgreinda séreignin í ákveðna fjárfestingaleið. Bregðist einstaklingurinn ekki við rennur viðbótariðgjaldið í samtrygginguna og hækka réttindin í hlutfalli við það. Ef allt gengur eftir ætti ekkert að vera því til fyrirstöðu 1. júlí n.k. fyrir þá einstaklinga sem þess óska að gera samning við sinn lífeyrissjóð um tilgreinda séreign. Þrátt fyrir að ekki sé gerður samningur 1. júlí er hægt að gera samning hvenær sem er og gildir hann þá frá þeim tíma sem hann er gerður.

Hver eru áhrifin?
Þegar einstaklingur tekur ákvörðun um ráðstafa viðbótariðgjaldinu í tilgreinda séreign hefur það áhrif t.d. á örorkutrygginguna. Fyrir ungan einstakling getur það haft mikil áhrif á fjárhagslega afkomu hans ef hann verður fyrir því að verða öryrki síðar á lífsleiðinni. Þeir sem eru í samtryggingunni eiga rétt á framreikningi ef þeir verða öryrkjar. Það þýðir t.d. að einstaklingur sem verður öryrki 30 ára og hefur greitt til lífeyrissjóðs í 3 ár, á rétt á því að réttindi hans séu uppreiknuð og miðuð við að hann hefði greitt til 65 ára aldurs. Ákveði þessi einstaklingur að láta allt viðbótariðgjaldið renna í tilgreinda séreign miðast örorkulífeyrinn og framreikningurinn við 12% iðgjaldið en ekki 15,5%.

Aukið valfrelsi og ábyrgð
Með tilgreindu séreigninni er verið að auka valfrelsi einstaklinganna en jafnframt verið að leggja aukna ábyrgð á þá sjálfa við val fjárfestingaleiðum og samsetningu lífeyristyggingar. Það er mikilvægt að hver og einn gefi sér góðan tíma til að meta kosti og galla við að velja tilgreinda séreign áður en ákvörðunin er tekin. Ef það vakna spurningar og eitthvað er óskýrt er rétt að hafa samband við sinn lífeyrissjóð eða stéttarfélag.