Formaður Framsýnar er í viðtali í Bylgjufréttum í dag í kjölfar ályktunar sem stjórn Framsýnar sendi frá sér í gær vegna stöðuna í kjaraviðræðum Starfsgreinasambandsins sem Framsýn á aðild að og samninganefndar Sambands íslenskra sveitarfélaga.
Formaður Framsýnar boðar verkföll með haustinu verði ekki samið í sumar. Lesa má um viðtalið á Visir.is
Ályktunina má lesa hér.
Framsýn stéttarfélag hefur ákveðið að færa Styrktarfélagi Heilbrigðisstofnunar Þingeyinga, Húsavík, tvær milljónir til tækjakaupa til minningar um Kristján Ásgeirsson fyrrverandi formann Verkalýðsfélags Húsavíkur, nú Framsýnar stéttarfélags. Ákörðun þess efnis var tekin á stjórnarfundi í gærkvöldi. Undanfarna mánuði hefur staðið yfir söfnun fyrir nýjum hjartaeftirlitstækjum á sjúkradeild stofnunarinnar á Húsavík. Ætlunin er að kaupa eftirlitstæki sem samanstendur af nettengdum tækjum; vöktunartæki á vaktherbergi, tveimur veggföstum skjám til að hafa eftirlit með rúmliggjandi sjúklingum og tæki til að fylgjast með sjúklingi sem ekki er rúmliggjandi. Með tækjunum er hægt að mæla blóðþrýsting, öndum, súrefnismettun, púls og sjá hjartasláttarrit. Gömlu tækin eru löngu komin á tíma og ekki lengur hægt að fá varahluti í þau ef þau bila. Nýju tækin kosta um 8 milljónir. Framsýn vill nota tækifærið og skora á velunnara stofnunarinnar að leggja til fjármagn til kaupa á þessu mikilvæga tæki fyrir HSN á Húsavík.
Stjórn Framsýnar samþykkti í gær að senda frá sér meðfylgjandi ályktun varðandi stöðuna í kjaraviðræðum Starfsgreinasambandsins sem Framsýn á aðild að og samninganefndar Sambands íslenskra sveitarfélaga. Mikil reiði er meðal starfsmanna sveitarfélaga sem tilheyra þessum samningi vegna ákvörðunar samningarnefndar sveitarfélaganna að undanskilja starfsmenn sem eru innan Starfsgreinasambandsins frá því að fá sambærilega eingreiðslu/innágreiðslu í ágúst og starfsmenn annarra stéttarfélaga/sambanda sem eru með lausa samninga eiga að fá í ágúst. Reyndar er þessi ákvörðun sveitarfélaganna með miklum ólíkindum og þeim til mikillar skammar gangi hún eftir. Umræður eru nú innan aðildarfélaga SGS að boða til verkfalls í haust hjá starfsmönnum sveitarfélaga standi samninganefndin við boðaða mismunun á hækkunum til starfsmanna sveitarfélaga í ágúst. Það er von Framsýnar að sveitarfélög í Þingeyjarsýslum virði starfsmenn sína jafnt og greiði öllum sínum starfsmönnum þessa hækkun í ágúst sem eru með lausa samninga, ekki bara þeim sem staðið hafa á kantinum meðan aðildarfélög Starfsgreinasambandsins hafa unnið að því að ganga frá kjarasamningi við SNS. Því miður hefur sú vinna ekki skilað árangri.
Ályktun
Um kjaraviðræður SNS og SGS
„Undanfarna mánuði hefur Starfsgreinasamband Íslands (SGS) sem Framsýn á aðild að, átt í kjarasamningsviðræðum við samninganefnd Sambands íslenskra sveitarfélaga (SNS) vegna félagsmanna sem starfa hjá sveitarfélögum.
Því miður hafa viðræðurnar ekki skilað tilætluðum árangri. Í ljósi stöðunnar var ekkert annað í boði fyrir aðildarfélög SGS en að vísa kjaradeilunni til ríkissáttasemjara, enda gert ráð fyrir því í lögum takist viðsemjendum ekki að ná fram kjarasamningi, að deilunni sé vísað til ríkissáttasemjara til úrlausnar.
Samninganefnd Sambands íslenskra sveitarfélaga hefur nú þegar samið við einstök sambönd og stéttarfélög um að þeirra félagsmenn sem starfa hjá sveitarfélögunum fái greiddar kr. 105.000 eingreiðslu miðað við fullt starf þann 1. ágúst 2019 sem greiðslu inn á væntanlegan kjarasamning. Það er til þeirra félaga og sambanda sem beðið hafa á kantinum meðan aðildarfélög SGS hafa barist um á hæl og hnakka við að reyna að landa nýjum kjarasamningi en án árangurs.
Þegar aðildarfélög SGS kröfðust þess að félagsmenn þeirra sem starfa hjá sveitarfélögunum fengju sömuleiðis umrædda eingreiðslu var því alfarið hafnað af hálfu samninganefndar sveitarfélaga með þeim rökum að Starfsgreinasambandið hefði vísað kjaradeilunni til ríkissáttasemjara.
Það er með öllu ólíðandi og samninganefnd SNS til vansa að skilja sína lægst launuðu starfsmenn eina eftir úti í kuldanum, það er þá sem starfa eftir kjarasamningi sveitarfélaga og Starfsgreinasambands Íslands. Framsýn trúir því ekki fyrr en á reynir, að sveitarstjórnarmenn í Þingeyjarsýslum hyggist koma fram við sitt frábæra starfsfólk með þessum hætti.
Framsýn stéttarfélag skorar á samninganefnd SNS að endurskoða sína afstöðu. Það verður einfaldlega ekki liðið að sveitarfélögin í landinu sýni starfsmönnum sem búa við það ömurlega hlutskipti að vera á lægstu kauptöxtunum slíka lítilsvirðingu.
Framsýn stéttarfélag skorar á aðildarfélög Starfsgreinasambands Íslands að slíta viðræðum við SNS og hefja undirbúning að sameiginlegum verkfallsaðgerðum í haust með það að markmiði að lama meðal annars allt skólastarf í leik- og grunnskólum landsins.
Það er einfaldlega ekki hægt að aðildarfélög SGS standi aðgerðarlaus á kantinum á sama tíma og samninganefnd Sambands íslenskra sveitarfélaga ætlar kinnroðalaust að mismuna starfsmönnum sveitarfélaga. Skammist ykkar!“
Stjórn Framsýnar kemur saman til fundar miðvikudaginn 10. júlí kl. 17:00 í fundarsal félagsins. Að venju er stjórn Framsýnar-ung boðið að taka þátt í fundinum. Dagskrá fundarins er eftirfarandi:
1. Fundargerð síðasta fundar
2. Inntaka nýrra félaga
3. Aðalfundur félagsins
4. Kaup á Furulundi 11 E, Akureyri
5. Heimild formanns til styrkja
6. Kjaramál- ríki og sveitarfélög
7. Starfsemi Vinnumálastofnunar á félagssvæðinu
8. Bréf frá SA v/ óska starfsmanna Íslandspósts um inngöngu í Framsýn
9. Samningur við Hvalaskoðunarfyrirtækin
10. Málefni Orlofsbyggðarinnar á Illugastöðum
11. Styrkir vegna Mæru- og Hrútadaga
12. Málefni trúnaðarráðs
13. Fundur með fulltrúum Íslandsbanka
14. Önnur mál
Aðalfundur Starfsmannafélags Húsavíkur fer fram mánudaginn 8. júlí kl. 20:00 í fundarsal stéttarfélaganna. Áríðandi er að félagsmenn fjölmenni á fundinn.
Aðalfundur Framsýnar fór fram í gærkvöldi, húsfyllir var á fundinum sem fór vel fram. Fjölmörg mál voru á dagskrá fundarins sem fjallað verður sérstaklega um á heimasíðunni á næstu dögum og í Fréttabréfi sem kemur út um miðjan mánuðinn. Ánægjulegt var að sjá hvað ungt fólk var áberandi á fundinum og voru þau virk í umræðum um einstaka liði.
Í sumar er starfandi Vinnuskóli Norðurþings fyrir ungmenni fædd árin 2004, 2005 og 2006 þ.e. þeir sem í vor ljúka 7., 8. og 9. bekk. Vinnuskólinn er opin ungmennum sem eru með skráð lögheimili í sveitarfélaginu eða eiga foreldra/foreldri sem er með lögheimili í sveitarfélaginu. Helstu verkefni Vinnuskólans varða snyrtingu og fegrun sveitarfélagsins, í þéttbýli og í dreifbýli. Unglingarnir vinna að skemmtilegum og uppbyggilegum hliðarverkefnum. Í morgun var komið að því að heimsækja stéttarfélögin og fræðast um starfsemi stéttarfélaga. Um 30 ungmenni með flokkstjórum komu við hjá stéttarfélögunum og fengu fræðslu um starfsemina. Ungmennin voru hress og spurðu út í ýmislegt sem þau vildu fræðast um. Stéttarfélögin þakka þeim fyrir komuna.
Aðalfundur Framsýnar stéttarfélags verður haldinn fimmtudaginn 4. júlí kl. 20:00 í fundarsal stéttarfélaganna að Garðarsbraut 26 á Húsavík. Til fundarins er boðað samkvæmt lögum félagsins.
Dagskrá:
1.Venjuleg aðalfundarstörf ◦Félagaskrá
◦Skýrsla stjórnar
◦Ársreikningar
◦Umræður um skýrslu stjórnar og ársreikninga
◦Kjör í stjórnir, nefndir og ráð
◦Kosning löggilts endurskoðana/endurskoðunarskrifstofu
◦Lagabreytingar
◦Ákvörðun árgjalda
◦Laun aðalstjórnar, trúnaðarmannaráðs, nefnda og stjórna innan félagsins
2. Önnur mál
Tillögur sem liggja fyrir aðalfundinum frá stjórn og trúnaðarráði félagsins eru aðgengilegar inn á heimasíðu félagsins, framsyn.is
Athygli er vakin á 32. grein laga félagsins – Ráðstöfun úr sjóðum félagsins:
„Tillögur stjórnar, trúnaðarmannaráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.“
Í lok fundar verður boðið upp á kaffiveitingar og smá glaðning. Skorað er á félagsmenn að fjölmenna á fundinn og taka þátt í umræðu um starfsemi félagsins og komandi verkefni á næstu árum.
Undanfarna mánuði hefur Starfsgreinasamband Íslands (SGS), ásamt Eflingu stéttarfélagi, átt í kjarasamningsviðræðum við Samband íslenskra sveitarfélaga vegna félagsmanna sinna sem vinna hjá sveitarfélögum, öðrum en Reykjavíkurborg. Framsýn á aðild að þessum viðræðum fyrir félagsmenn sem starfa hjá sveitarfélögum í Þingeyjarsýslum.
Það er skemmst frá því að segja að viðræðurnar hafa gengið bæði hægt og illa. Sérstaklega steytir á í lífeyrismálum en sveitarfélögin hafa ekki staðið við fyrirheit um að jafna lífeyrisréttindi milli félagsmanna BSRB og félagsmanna SGS og Eflingar innan ASÍ.
Samninganefnd Sambands íslenskra sveitarfélaga hefur nú þegar samið við einstök sambönd og stéttarfélög um að þeir félagsmenn sem starfa hjá sveitarfélögunum, skuli fá greiddar 105.000 kr., m.v. fullt starf, þann 1. ágúst nk. sem greiðslu inn á væntanlegan samning. Þegar SGS og Efling kröfðust þess að félagsmenn þeirra hjá sveitafélögunum fengju líka umrædda greiðslu var því alfarið hafnað af hálfu samninganefndar sveitafélaga með þeim rökum að SGS og Efling væru búin að vísa kjaradeilunni til ríkissáttasemjara.
Það er með öllu ólíðandi. Það er samninganefnd Sambands íslenskra sveitarfélaga til vansa að skilja sína lægst launuðu starfsmenn eftir eina úti í kuldanum. Starfsgreinasamband Íslands, Efling og Framsýn trúa því ekki fyrr en á reynir, að sveitarstjórnarmenn hyggist koma svona fram við sitt frábæra starfsfólk.
Starfsgreinasambandið, Efling og Framsýn skora á sveitarfélögin að semja við SGS og Eflingu um sömu greiðslur og aðrir munu fá þann 1. ágúst nk. eða taka að öðrum kosti sjálfstæða ákvörðun um að greiða sínu fólki inn á væntanlegan kjarasamning, til jafns við annað starfsfólk.
Framsýn skorar á sveitarfélög að greiða starfsmönnum eingreiðslu meðan samningar hafa ekki tekist. Í því sambandi hefur Framsýn skrifað öllum sveitarfélögum á félagssvæðinu og stjórn Hvamms heimili aldraðra bréf þar sem þess er krafist að sveitarfélögin mismuni ekki starfsmönnum eftir aðild að stéttarfélögum, slíkt sé siðlaust og ólíðandi með öllu.
Samskonar bréf og þetta sem fór á Norðurþing fór einnig til Skútustaðahrepps, Þingeyjarsveitar, Tjörneshrepps og stjórnar Hvamms, heimili aldraðra.
Norðurþing
Hr. Kristján Þór Magnússon
Ketilsbraut 7-9
640 Húsavík
Húsavík 2. júlí 2019
Varðar stöðuna í kjaraviðræðum SGS og Sambands íslenskra sveitarfélaga
Framsýn stéttarfélag vill vekja athygli á þeirri stöðu sem nú ríkir í samningamálum félagsmanna sem starfa hjá sveitarfélögum í Þingeyjarsýslum.
Viðræður hafa staðið yfir við Samband íslenskra sveitarfélaga frá því í febrúar 2019, án árangurs.
Mikið ber á milli og vísaði Starfsgreinasamband Íslands, sem fer með samningsumboð Framsýnar, deilunni til ríkissáttasemjara þann 28. maí sl. Frá þeim tíma hafa verið haldnir tveir samningafundir sem ekki hafa skilað tilætluðum árangri, deilan er því í hörðum hnút. Næsti fundur í deilunni hefur verið boðaður hjá ríkissáttasemjara þann 21. ágúst nk.
Samninganefnd Sambands íslenskra sveitarfélaga hefur að undanförnu samið við önnur sambönd og stéttarfélög um frestun viðræðna og friðarskyldu til 15. september. Samið hefur verið við þessa aðila um eingreiðslu/innágreiðslu upp á kr. 105.000 miðað við fullt starf. Ríkissáttasemjari hafði milligöngu fyrir Starfsgreinasambandið, hvort slíkt tilboð stæði ekki félagsmönnum aðildarfélaga sambandsins einnig til boða. Formaður samninganefndar sveitarfélaganna neitaði því þar sem Starfsgreinasambandið væri búið að vísa deilunni til Ríkissáttasemjara.
Miðað við þessa undarlegu afstöðu er ljóst að félagsmenn innan aðildarfélaga Starfsgreina-sambandsins verða þeir einu af starfsmönnum sveitarfélaga sem ekki fá þessa umræddu eingreiðslu meðan ósamið er. Það mun kalla á megna óánægju starfsmanna.
Það er von Framsýnar að forráðamenn sveitarfélaga í Þingeyjarsýslum sjái hag í því að hafa starfsmenn sína ánægða, ekki síst þar sem mismunun sem þessi er sveitarfélögunum ekki til framdráttar og mun einungis efla barráttuandann í þeirri kjarabaráttu sem fram undan er.
Því fer Framsýn þess á leit við sveitarfélögin á félagssvæðinu og Hvamm heimili aldraðra að þau greiði starfsmönnum sem starfa eftir kjarasamningi Starfsgreinasambands Íslands slíka innágreiðslu þann 1. ágúst nk. það er að upphæð kr. 105.000 m.v. fullt starf þann 1. júní 2019 og hlutfallslega fyrir lægra starfshlutfall.
Þess er óskað að erindi þessu verði svarað fyrir 11. júlí 2019.
Frekari upplýsingar gefur undirritaður.
Virðingarfyllst
Fh. Framsýnar stéttarfélags
____________________________________
Aðalsteinn Árni Baldursson
Samrit:
Sveitarfélög á félagssvæði Framsýnar stéttarfélags
Stjórn Hvamms heimili aldraðra
Nú rétt í þessu var að losna vikan 5. júlí – 12. júlí í Bjarkarseli á Flúðum. Þannig að ef einhver hefur áhuga á því að skella sér skyndilega í sólina á suðurlandi þá er hér á ferðinni einstakt tækifæri.
Starfsgreinasamband Íslands sem Framsýn á aðild að og Efling stéttarfélag samþykktu rétt í þessu að senda frá sér eftirfarandi fréttilkynningu:
„Undanfarna mánuði hefur Starfsgreinasamband Íslands (SGS), ásamt Eflingu stéttarfélagi, átt í kjarasamningsviðræðum við Samband íslenskra sveitarfélaga vegna félagsmanna sinna sem vinna hjá sveitarfélögum, öðrum en Reykjavíkurborg.
Það er skemmst frá því að segja að viðræðurnar hafa gengið bæði hægt og illa. Sérstaklega steytir á í lífeyrismálum en sveitarfélögin hafa ekki staðið við fyrirheit um að jafna lífeyrisréttindi milli félagsmanna BSRB og félagsmanna SGS og Eflingar innan ASÍ.
Samninganefnd Sambands íslenskra sveitarfélaga hefur nú þegar samið við einstök sambönd og stéttarfélög um að þeir félagsmenn sem starfa hjá sveitarfélögunum, skuli fá greiddar 105.000 kr., m.v. fullt starf, þann 1. ágúst nk. sem greiðslu inn á væntanlegan samning. Þegar SGS og Efling kröfðust þess að félagsmenn þeirra hjá sveitafélögunum fengju líka umrædda greiðslu var því alfarið hafnað af hálfu samninganefndar sveitafélaga með þeim rökum að SGS og Efling væru búin að vísa kjaradeilunni til ríkissáttasemjara.
Það er með öllu ólíðandi. Það er samninganefnd Sambands íslenskra sveitarfélaga til vansa að skilja sína lægst launuðu starfsmenn eftir eina úti í kuldanum. Starfsgreinasamband Íslands og Efling trúa því ekki fyrr en á reynir, að sveitarstjórnarmenn hyggist koma svona fram við sitt frábæra starfsfólk.
Starfsgreinasambandið og Efling skora á sveitarfélögin að semja við SGS og Eflingu um sömu greiðslur og aðrir munu fá þann 1. ágúst nk. eða taka að öðrum kosti sjálfstæða ákvörðun um að greiða sínu fólki inn á væntanlegan kjarasamning, til jafns við annað starfsfólk.“
Til viðbótar má geta þess að Framsýn skorar á sveitarfélögin á félagssvæðinu, Norðurþing, Tjörneshrepp, Þingeyjarsveit og Skútustaðahrepp að fara að óskum stéttarfélaganna og greiða starfsmönnum sem aðild eiga að Framsýn kr. 105.000 mv. fullt starf þann 1. ágúst sem greiðslu inn á væntanlegar launahækkanir sem koma til þegar gengið verður frá nýjum kjarasamningi samningsaðila en kjarasamningurinn rann út 31. mars 2019.
Aðalfundur Þingiðnar fór fram í gærkvöldi í fundarsal stéttarfélaganna. Á fundinum kom fram ánægja með starfsemi og rekstur félagsins. Hér má lesa skýrslu stjórnar og gögn sem lögð voru fram á fundinum.
Fundir
Fundir í stjórnum og nefndum sem fulltrúar Þingiðnar hafa setið frá síðasta aðalfundi sem haldinn var 16. maí 2018 eru eftirfarandi:
Stjórnarfundir 4
Félagsfundir 1
Fundir í sameiginlegri Orlofsnefnd stéttarfélaganna 1
Fundir í fulltrúaráði stéttarfélaganna 1
Sameiginlegur fundur stéttarfélaga um Atvinnuþróunarfélagið 1
Fundir í 1. maí nefnd 1
Fundir skoðunarmanna reikninga 1
Fundir í stjórn sjúkrasjóðs 12
Samtals fundir 22
Formaður félagsins hefur verið virkur í starfi og sótt fundi á vegum félagsins s.s á vegum Lsj. Stapa, Alþýðusambands Íslands, Alþýðusambands Norðurlands og Samiðnar.
Þá er samkomulag um að starfsmenn félagsins sjái um úthlutanir úr sjúkrasjóði í umboði stjórnar Þingiðnar.
Góð tenging er milli formanns félagsins og forstöðumanns Skrifstofu stéttarfélaganna sem funda reglulega um starfsemina og rekstur félagsins.
Eftirtaldir hafa setið í stjórn félagsins: Jónas Kristjánsson, Vigfús Þór Leifsson, Hólmgeir Rúnar Hreinsson, Þórður Aðalsteinsson og Kristinn Gunnlaugsson. Kjörtímabilið er frá 2018 til 2020.
Félagatal Fullgildir félagsmenn í Þingiðn 31. desember 2018 voru 126, það er greiðandi félagar, öryrkjar og aldraðir sem áður greiddu til félagsins. Greiðandi einstaklingar voru 110 á árinu samkvæmt ársreikningum félagsins. Karlar voru 108 og konur 2.
Þess ber að geta að nú er aftur komið jafnvægi á fjölda félagsmanna eftir stórframkvæmdirnar á Bakka og á Þeistareykjum. Félagsmönnum fjölgaði verulega meðan á framkvæmdunum stóð en hefur heldur fækkað frá þeim tíma sem á sínar eðlilegu skýringar enda framkvæmdum að mestu lokið í dag.
Fjármál
Félagsgjöld og iðgjöld ársins námu kr. 12.352.510 sem er 21,6% hækkun frá fyrra ári. Bætur og styrkir á árinu 2018 námu kr. 4.986.577, þar af úr sjúkrasjóði kr. 3.922.164 sem er umtalsverð hækkun frá fyrra ári sem skýrist að mestu af greiðslu sjúkradagpeninga.
Á árinu 2018 fengu samtals 43 félagsmenn greidda sjúkradagpeninga eða aðra styrki úr sjúkrasjóði.
Samkvæmt sameinuðum rekstrar- og efnahagsreikningi nam hreinn tekjuafgangur félagsins kr. 4.686.899 og eigið fé í árslok 2018 nam kr. 233.390.406 og hefur það aukist um 2,0% frá fyrra ári.
Rekstur skrifstofunnar gekk vel á síðasta ári. Þátttaka Þingiðnar í rekstrarkostnaði nam kr. 4.062.308.
Innheimta félagsgjalda var með svipuðu sniði og árið á undan. Almennt eru launagreiðendur samviskusamir að skila félagsgjöldum og mótframlögum á réttum tíma að undanskildum örfáum tilvikum þar sem ítreka þarf skil á iðgjöldum til félagsins.
Orlofsmál
Í gegnum tíðina hafa aðildarfélög Skrifstofu stéttarfélaganna átt mjög gott samstarf um orlofsmál. Í því sambandi eru þau með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið.
Þingiðn á eina íbúð í Þorrasölum í Kópavogi.
Á síðasta ári dvaldi fjöldi félagsmanna ásamt fjölskyldum sínum í orlofshúsum, orlofsíbúðum, á tjaldsvæðum og hótelum á vegum stéttarfélaganna. Veruleg ásókn er í orlofshúsin en félagið niðurgreiðir orlofsdvöl félagsmanna í orlofsíbúðum/húsum sem auðveldar fólki að njóta orlofsdvalar með fjölskyldum sínum á Íslandi. Ekki er óalgengt að niðurgreiðslurnar séu um kr. 50.000 fyrir viku dvöl.
Þá fengu 16 félagsmenn endurgreiðslur vegna dvalar á tjaldsvæðum eða alls kr. 329.199,-.
Til stóð að stéttarfélögin stæðu fyrir gönguferð um Mývatnssveit síðasta sumar en vegna þátttökuleysis var hætt við ferðina. Í sumar stendur til að fara í dagsferð í Flateyjardal laugardaginn 17. ágúst.
Félagsmönnum stéttarfélaganna hefur staðið til boða að kaupa gistimiða og ódýr flugfargjöld með Flugfélaginu Erni. Með upptöku á nýjum orlofsvef á síðasta ári opnaðist á frekari möguleika fyrir félagsmenn varðandi afþreyingu og afsláttarkjör. Kerfinu er jafnframt ætlað að auðvelda félagsmönnum að panta flug og fleira í gegnum netið.
Þorrasalir 1-3
Útleiga á íbúð félagsins í Kópavogi hefur gengið vel og hefur nýtingin verið mjög góð. Það sama á við um þau orlofshús sem félagið hefur haft á leigu í samstarfi með öðrum aðildarfélögum skrifstofu stéttarfélaganna. Þess ber að geta að íbúð félagsins í Þorrasölum var máluð á síðasta ári og er í góðu standi.
Fræðslumál
Ekki voru haldinn námskeið á vegum félagsins á síðasta starfsári. Hafi félagsmenn óskir um námskeið eru þeir vinsamlegast beðnir um að koma þeim til stjórnar eða starfsmanna félagsins. Þá eru dæmi um að félagsmenn fari á eigin vegum á námskeið. Í þeim tilfellum hefur Þingiðn komið að því að niðurgreiða námskeiðin fyrir félagsmenn í gegnum nýja fræðslusjóðinn sem félagið stofnaði til á síðasta aðalfundi félagsins. Á síðasta ári fengu 8 félagsmenn styrki til náms/námskeiða samtals kr. 364.000.
Málefni sjúkrasjóðs
Eins og fram kemur í ársreikningum félagins voru greiðslur til félagsmanna úr sjúkrasjóði félagsins samtals kr. 3.922.164 á árinu 2018 sem er veruleg hækkun milli ára. Árið 2017 voru greiddar kr. 1.538.644 í styrki til félagsmanna.
Greiðslur til 43 félagsmanna árið 2018 skiptast þannig:
Almennir sjúkrastyrkir kr. 1.386.519,-
Sjúkradagpeningar og fæðingastyrkir kr. 2.535.645,-.
Kjaramál
Skrifað var undir nýjan kjarasamning milli Samtaka atvinnulífsins og Samiðnar 3. maí 2019 með gildistíma til 1. nóvember 2022.
Megin áherslur iðnaðarmanna í þessum samningum voru að tryggja þann árangur sem náðst hefur á síðustu árum og tryggja forsendur fyrir áframhaldandi kaupmætti á samningstímanum, uppfæra kauptaxtakerfið og stytta vinnuvikuna.
Varðandi almennar hækkanir tekur samningurinn mið af þeim samningum sem gerðir voru 3. apríl s.l. á vegum Starfsgreinasambands Íslands og Samtaka atvinnulífsins. Áherslur Samiðnar nú voru að lyfta þeim sem eru á lægstu laununum upp og með nýju launakerfi í gegnum fyrirtækjasamninga á seinnihluta samningstímans, verði horft til heildarinnar.
Varðandi kauptaxtakerfið þá náðist samkomulag um að stokka það upp og skera neðstu taxtana af og í framtíðinni verði launaákvarðanir meira teknar út í fyrirtækjunum í gegnum nýtt launakerfi. Samiðn bindur vonir við innleiðingu nýs launakerfis og að það geti skilað góðum árangri þegar frammi sækir. Ef vel til tekst ætti það að skila sér til allra bæði í stórum og minni fyrirtækjum en það ræðst að miklu leyti á því hvernig stéttarfélögin fylgja málinu eftir. Stjórn Þingiðnar hefur almennt áhyggjur af því hvernig menn ætla sér að láta þessar breytingar ganga eftir, það verður ekki auðvelt fyrir starfsmenn einstakra fyrirtækja að ná fram bættum kjörum í vinnustaðasamningi.
Á næstu mánuðum verður lögð vinna í á vegum Samiðnar að útfæra launakerfið en í kjarasamningum eru lagðar megin línurnar sem eftir er að útfæra betur. Í framhaldinu verður launakerfið kynnt ekki síst fyrir trúnaðarmönnum á vinnustöðum og þegar kemur fram á næsta ár hefst innleiðingin á vinnustöðum.
Kjarasamningurinn tryggir að stigin verða áþreifanleg skref í styttingu vinnuvikunnar að mati Samiðnar. Í fyrsta lagi verður tekinn upp virkur vinnutími sem þýðir að virkur vinnutími verður 37 vinnustundir á viku frá 1. apríl 2020 sem hækkar tímavinnu einingu í dagvinnu um 8,33% en heildarlaun verða óbreytt miðað við 40 vinnustundir. Frá sama tíma verður breyting á yfirvinnu og verður hún tvískipt. Yfirvinna eitt, sem er fyrir 16 yfirvinnustundir á fjögra vikna launatímabili, og yfirvinna tvö, sem greiðist fyrir vinnutíma umfram 41 virka klst. á viku að meðaltali á launatímabili /mánuði. Yfirvinna tvö er einnig greidd fyrir vinnu á nóttu á tímabilinu frá kl. 00.00-06.00. En og aftur á stjórn Þingiðnar eftir að sjá að þessar breytingar gangi hreinlega upp. Tíminn einn mun leiða það í ljós.
Þann 1. janúar 2021 er gert ráð fyrir að stigið verði skref tvö en þá opnast möguleiki á að semja um styttingu vinnuvikunnar í 36 vinnustundir. Takist ekki að útfæra vinnutímastyttingu í fyrirtækjasamningum styttist vinnuvikan 1. janúar 2022 í 36 stundir og 15 mínútur. Margt fleira er í samningnum s.s. breyting á flutningi orlofsréttar og bakvaktarkafla.
Þingiðn stóð fyrir kynningarfundi um samninginn 14. maí þar sem félagsmönnum gafst kostur á að kynna sér samninginn. Því miður sáu sér ekki margir fært að koma á fundinn. Í því sambandi er rétt að hvetja félagsmenn til að vera virka í starfsemi félagsins. Það á að þykja sjálfsagt og eðlilegt mál að menn mæti á fundi til að hafa áhrif á kröfugerð félagsins, það er jafn eðlilegt að menn mæti á kynningarfundi um kjarasamninga og greiði atkvæði um þá. Almennt er það áhyggjuefni hvað menn eru áhugalausir um sín mál innan verkalýðshreyfingarinnar. Því þurfum við að breyta.
Samningur SA og Samiðnar fór í atkvæðagreiðslu meðal félagsmanna sem samþykktu hann líkt og félagsmenn annarra aðildarfélaga Samiðnar fyrir utan eitt iðnaðarmannafélag á Ísafirði.
Niðurstaðan:
Á kjörskrá voru 76 félagsmenn Þingiðnar, atkvæði greiddu 31 eða 40,79%
Já sögðu 20 eða 64,5%
Nei sögðu 10 eða 32,3%
Tek ekki afstöðu 1 eða 3,2%
Undir þessum lið er rétt að geta þess að félagið gekk frá sérkjarasamningi við PCC um launakjör iðnaðarmanna í verksmiðju fyrirtækisins á Bakka. Skrifað var undir samninginn 5. júní 2019 í samstarfi við Framsýn stéttarfélag en félögin tvö stóðu að þessum samningi. Gildistími samningsins er til 1. nóvember 2022 og verður þá endurnýjaður. Að mati stjórna félaganna er um að ræða góðan samning fyrir bæði iðnaðarmenn og framleiðslustarfsmenn þar sem í samningnum fellst mikil kjarabót fyrir starfsmenn PCC. Eftir kynningar með starfsmönnum var hann samþykktur samhljóða.
Atvinnumál og vinnustaðaeftirlit
Atvinnuástandið hjá iðnaðarmönnum er almennt mjög gott um þessar mundir og mikið að gera hjá flestum ef ekki öllum iðnaðarmönnum enda hafa töluverðar framkvæmdir verið í gangi á svæðinu.
Heilt yfir er ástand vinnumarkaðarins á starfssvæðinu gott. Vitaskuld koma annað slagið upp mál sem krefjast viðbragða, við það verður ekki sloppið. Enn fremur er ljóst að gott ástand vinnumarkaðarins gerist ekki að sjálfu sér. Enginn vafi er á því að ef eftirlit og aðhald stéttarfélaganna væri ekki til staðar, myndi ástandið versna til muna. Það sést til dæmis á því að forsvarsmenn fyrirtækja sem koma með starfsemi inn á svæðið leita mikið eftir aðstoð og þjónustu stéttarfélaganna. Í dag eru stéttarfélögin með starfsmann í hálfu starfi við vinnustaðaeftirlit.
Hátíðarhöldin 1. maí
Stéttarfélögin stóðu fyrir hátíðarhöldum í Íþróttahöllinni á Húsavík 1. maí 2019. Hátíðarhöldin tókust að venju frábærlega en um 600 gestir lögðu leið sína í höllina. Um er að ræða fjölmennustu samkomu sem haldin er í Þingeyjarsýslum á hverju ári sem er áhugavert og mikil viðurkenning á starfsemi stéttarfélaganna í Þingeyjarsýslum sem leggja mikið upp úr þessum degi. Hátíðarhöldin voru tileinkuð baráttu eldri borgara fyrir bættum kjörum. Aðalræðumaður dagsins var Ásdís Skúladóttir frá Gráa hernum.
Starfsemi félagsins
Þingiðn hefur komið að mörgum málum frá síðasta aðalfundi. Ástæða er til að gera aðeins grein fyrir nokkrum þeirra:
• Félagið hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn.
• Aðildarfélög skrifstofu stéttarfélaganna stóðu fyrir opnu húsi á aðventunni í desember líkt og undanfarin ár. Boðið var upp á kaffi, tertur og tónlistaratriði. Fjölmargir lögðu leið sína til stéttarfélaganna og þáðu veitingar.
• Félagið kom að því að styðja aðeins við bakið á íþróttastarfi Völsungs með ýmsum hætti í gegnum styrki.
• Félagið niðurgreiddi leikhúsmiða til félagsmanna á leiksýningar á vegum Leikfélags Húsavíkur og Leikdeildar Eflingar. Leikritin voru til sýningar eftir áramótin 2019.
• Félagið hefur komið að kynningum á starfsemi stéttarfélaga í grunnskólum á félagssvæðinu með Framsýn stéttarfélagi.
• Félagsmönnum stóð til boða að fá félagsjakka á síðasta ári sem flestir notfærðu sér.
Starfsemi Virk – starfsendurhæfingarsjóðs
Markmið Virk – starfsendurhæfingarsjóðs er að draga úr líkum á því að einstaklingar hverfi af vinnumarkaði vegna heilsubrests. Þjónusta við einstaklinga felst í persónulegri ráðgjöf og hvatningu, samvinnu um áætlun um eflingu starfsgetu og endurkomu á vinnumarkað, vali á endurhæfingarúrræðum í samvinnu við einstakling og fagfólk og leiðbeiningum um réttindi, framfærslu og þjónustu á svæðinu. Góð reynsla er af starfsemi Virk – starfsendurhæfingarsjóðs á svæðinu s.l. ár. Stöðugleiki er í starfseminni og góð samvinna er við heilbrigðis- og félagsþjónustu, úrræðaaðila s.s. Sjúkraþjálfun Húsavíkur og fyrirtæki og stofnanir eru virk í samvinnu um málefni starfsmanna sinna sem glíma við heilsubrest. Mikið er lagt upp úr að þjónustan sé sýnileg og aðgengileg, hvort heldur til almennrar ráðgjafar fyrir félagsmenn, formlegrar samvinnu við einstaklinga í starfsendurhæfingu eða samstarf við úrræðaaðila og launagreiðendur.
Eitt stöðugildi er á Skrifstofu stéttarfélaganna sem Virk greiðir kostnað við. Núverandi starfsmaður er Ágúst S. Óskarsson.
Samkomulag við Flugfélagið Erni
Félagið kom að samningi með Framsýn stéttarfélagi við Flugfélagið Erni um kaup á flugmiðum um síðustu áramót, alls 4800 miðum á ákveðnu verði. Félagsmenn geta flogið fyrir kr. 10.300 sem er vel innan við 50% frá fullu verði. Um er að ræða töluverða kjarabót fyrir félagsmenn sem tryggir um leið að flug haldist milli Húsavíkur og Reykjavíkur en rekstur flugfélaga er um þessar mundir mjög erfiður.
Félagsmönnum stéttarfélaganna stendur til boða að kaupa gistimiða og ódýr flugfargjöld sem skiptast þannig fyrir árið 2018:
Seldir flugmiðar 5.545 Sparnaður fyrir félagsmenn kr. 66.540.000,-
Seldir gistimiðar 854 Sparnaður fyrir félagsmenn kr. 1.964.200,-
Samtals sparnaður fyrir félagsmenn kr. 68.504.200,-
Sambærilegar tölur fyrir 2017 eru eftirfarandi:
Seldir flugmiðar 4.470 Sparnaður fyrir félagsmenn kr. 49.617.000,-
Seldir gistimiðar 739 Sparnaður fyrir félagsmenn kr. 1.625.800,-
Samtals sparnaður fyrir félagsmenn kr. 52.302.250,-
Þess má geta að árið 2018 flugu 14.332 farþegar um Húsavíkurflugvöll. Eins og sjá má var hlutfall félagsmanna stéttarfélaganna sem notfærðu sér flugið því verulega hátt eða 39% af heildar farþegafjöldanum. Flug um Húsavíkurflugvöll fór mest í 20.199 farþega árið 2016 þegar framkvæmdirnar á svæðinu vegna Bakka og Þeistareykja stóðu hvað hæst.
Húsnæði stéttarfélaganna
Rekstur á sameiginlegum eignum stéttarfélaganna hefur gengið vel. Félögin eiga í sameiningu skrifstofuhúsnæðið að Garðarsbraut 26 á Húsavík. Þá eiga Framsýn og Þingiðn efri hæðina í sömu byggingu sem ber nafnið Hrunabúð sf. Eins og kunnugt er sagði VÍS um rýminu sem þau höfðu á leigu á neðri hæðinni. Í kjölfarið tók Sparisjóður Suður Þingeyinga rýmið á leigu.
Rekstur Hrunabúðar hefur gengið vel. Öll leigurými eru í notkun. Eignarhluturinn á efri hæðinni skiptist þannig: Framsýn á 84% og Þingiðn 16%. Ráðast var í lagfæringar á þakinu síðastliðið sumar þar sem það var einfaldlega ónýtt. Norðurvík sá um framkvæmdina.
Málefni skrifstofunnar Rekstur skrifstofu stéttarfélaganna gekk að venju vel á síðasta starfsári. Í dag starfa 5 starfsmenn á skrifstofunni í fullu starfi og tveir starfsmenn eru í hlutastarfi við vinnustaðaeftirlit og þrif/ræstingar. Til viðbótar eru fjórir starfsmenn í 0,5% stöðugildum við umsjón á orlofsíbúðum/húsum sem eru í eigu stéttarfélaganna.
Stéttarfélögin halda úti öflugri heimasíðu og Fréttabréfi sem tengir hinn almenna félagsmann við stjórn félagsins, starfsmenn og félagið í heild sinni.
Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar, auk þess sem stórum hluta starfsins er sinnt í gegnum síma og með heimsóknum á vinnustaði og í skóla. Ekki eru fyrirsjáanlegar frekari breytingar á rekstri skrifstofunnar.
Góð nýting er á félagsaðstöðunni enda mikil starfsemi í gangi á vegum stéttarfélaganna.
Til viðbótar má geta þess að Framsýn fékk Rannsóknarmiðstöð Háskólans á Akureyri til að gera könnun á ákveðnum þáttum í starfsemi félagsins og stéttarfélaganna. Útkoman er glæsileg. Helstu niðurstöður úr könnuninni eru aftar í skýrslunni. Það á einnig við um tölfræðilegar upplýsingar um fjölda félagsmanna, iðgjöld til Þingiðnar og styrki úr sjúkra- og fræðslusjóðum félagsins.
Lokaorð
Skýrslan er að venju ekki tæmandi um starfsemi félagsins því hér hefur aðeins verið farið yfir helstu málaflokka og málefni sem félagið hefur komið að milli aðalfunda. Það er von stjórnarinnar að skýrsla þessi gefi lauslegt yfirlit yfir það helsta í fjölbreyttu félagsstarfi, um leið og hún þakkar félagsmönnum, þeim sem hafa haft trúnaðarstörf fyrir félagið á hendi og starfsmönnum félagsins fyrir gott samstarf og vel unnin störf á árinu.
Stjórn og trúnaðarráð Framsýnar hefur samþykkt að leggja fram tillögu á aðalfundi félagsins þess efnis að félagið skoði kaup á íbúð á Akureyri fyrir félagsmenn. Þannig verði komið til móts við þá félagsmenn sem þurfa að dvelja á Akureyri vegna læknisferða, einkaerinda eða orlofs. Samþykki aðalfundurinn tillöguna verður hafin leit að íbúð fyrir félagsmenn.
Framsýn tók þátt í spurningavagni Rannsóknarmiðstöðvar Háskólans á Akureyri þar sem lagðar voru fyrir nokkrar spurningar um félagið í formi netkönnunar og fór könnunin fram dagana 7. – 25. mars 2019 í Eyjafirði og í Þingeyjarsýslum. Alls svöruðu 1552 manns könnuninni, þar af 451 þátttakendur í Þingeyjarsýslum og var svarhlutfall 69.5%, af þeim voru 216 í Framsýn. Niðurstaðan er glæsileg fyrir starfsemi Framsýnar eins og meðfylgjandi samantekt, súlurit og kökurit bera með sér. Félagsmenn eru mjög ánægðir með alla þá þætti sem spurt var út í sem eru helstu viðfangsefni félagsins. Það er stefnu Framsýnar í kjaramálum, sýnileika félagsins, viðmót starfsmanna, niðurgreiðslu flugs, orlofskosti og heimasíðu félagsins. Ánægjan er á bilinu frá 96,5% upp í 100% þegar horft er til þeirra sem sögðust ánægðir eða óánægðir með starfsemi félagsins.
Við viljum vekja athygli á lausum vikum í Flókalundi á Barðaströnd. Annarsvegar frá deginum í dag til 5. júlí og hinsvegar frá 5. júlí til 12. júlí.
Elín Hólmfríður Gunnlaugsdóttir hefur verið tilnefnd sem trúnaðarmaður starfsmanna í Dalakofanum í Reykjadal og bætist hún í hóp yfir 30 trúnaðarmanna á félagssvæði Framsýnar. Formaður Framsýnar heilsaði upp á hana í vikunni ásamt því að eiga samtal við rekstraraðila Dalakofans. Það var að sjálfsögðu létt yfir öllum enda veðrið búið að vera ágætt síðustu daga og töluverð umferð ferðamanna um svæðið.
Við sögðum nýlega frá því að skógarþröstur hefði búið sér til hreiður í fundarsal stéttarfélaganna, frá þeim tíma hafa fundarhöld nánast legið niðri á vegum stéttarfélaganna til að gefa þrestinum frið til að koma ungum á legg. Meðfylgjandi mynd var tekin í morgun af 5 fallegum ungum sem njóta þess að þroskast í skjóli stéttarfélaganna, það er í hlýjunni.
Framsýn gerði athugasemdir við leikskólagjöld í Norðurþingi sem eru með þeim hæstu á landinu samkvæmt skoðunarkönnun ASÍ. Svarbréf fjölskyldudeildar Norðurþings hefur borist, þar sem Framsýn er þakkað bréfið og það aðhald sem felst í þeirri frumkvæðisvinnu að leitast við að spyrja spurninga sem hafa áhrif á kostnað íbúa sveitarfélagsins af þjónustu þess. Fjölskylduráð bendir á það í bréfinu að tölur sem liggja fyrir hjá ASÍ séu ekki nýjar og þar sé ekki tekið tillit til góðrar þjónustu sem krefst meiri manafla, þ.m.t. vegna rýmri vistunartíma. Bent er á að engir biðlistar séu hjá leikskólum Norðurþings, börn séu innrituð frá 1 árs aldri og innritað sé þrisvar til fjórum sinnum á ári. Á það beri því að líta að þjónustustig leikskóla í Norðurþingi sé hátt, en kostnaður við reksturinn lendi aðeins að litu leit á foreldrum, eða um 12%. Sveitarfélag Norðurþings og fjölskylduráð mun hins vegar leita leiða til að lækka þennan kostnað, án þess að það komi niður á þjónustustiginu og lítur á erindi Framsýnar sem brýningu í þeim efni.
Bréf fjölskylduráðs Norðurþings var tekið fyrir á stjórnar- og trúnaðarráðsfundi Framsýnar á þriðjudaginn. Það er von Framsýnar að leikskólagjöldin verði endurskoðuð og lækkuð til samræmis við önnur sveitarfélög. Hins vegar er ekki auðvelt að bera saman þjónustu leikskólanna með tilliti til leikskólagjalda.
Aðalfundur Starfsmannafélags Húsavíkur verður haldinn mánudaginn 8. júlí 2019 kl. 20:00 í fundasal stéttarfélaganna.
Dagskrá:
Skorað er á félagsmenn til að mæta á fundinn og taka þátt í störfum félagsins. Boðið verður upp á kaffi, meðlæti og skemmtiatriði. Koma svo!
Stjórn STH
Ef marka má kynningarfundi sem stéttarfélögin Þingiðn og Framsýn hafa staðið fyrir með starfsmönnum PCC BakkiSilicon hf. og atkvæðagreiðslu um kjarasamninginn sem lauk kl. 16:00 í dag er mikil ánægja með samninginn. Alls höfðu 103 starfsmenn atkvæðisrétt. Rúmlega 32% greiddu atkvæði um samninginn, þar af samþykktu 94% starfsmanna samninginn meðan 6% sögðu nei við samningnum. Sérkjarasamningurinn skoðast því samþykktur og tekur gildi frá og með 1. apríl sl. Ástæða er til að þakka trúnaðarmönnum starfsmanna og forsvarsmönnum PCC fyrir samstarfið en fullur vilji er meðal samstarfsaðila að innleiða ýmsar breytingar á samningstímanum starfsmönnum og fyrirtækinu til hagsbóta.
Hermann Aðalsteinsson er einn af trúnaðarmönnum starfsmanna PCC á Bakka. Hann hefur staðið sig vel líkt og aðrir trúnaðarmenn starfsmanna á Bakka.