kuti

Skrifstofa stéttarfélaganna Garðarsbraut 26 Húsavík verður lokuð frá kl. 13:00 föstudaginn 6. desember vegna árshátíðar starfsmanna.

The Union office Garðarsbraut 26 Húsavík will be closed from 13:00 on 6th December due to the annual staff festival.

 

 

Framsýn stéttarfélag stóð fyrir upplýsingafundi um málefni sjóðfélaga innan Lsj. Stapa í gær, mánudag. Fundurinn var mjög góður en vissulega má gagnrýna að fólk fylgist ekki almennt betur með sínum málum og mæti á fund sem þennan sem ætlað er að miðla upplýsingum til sjóðfélaga og svara fyrirspurnum um málefni sjóðsins. Á fundinum fóru forsvarsmenn Lsj. Stapa yfir réttindakerfi Stapa, lykiltölur úr rekstri og framvindu fjárfestingarstefnu auk þess sem komið var inn á aukið hlutverk fulltrúaráðs sjóðsins. Eins og segir í upphafi var fundurinn góður og lögðu fundarmenn fjölmargar spurningar fyrir frummælendur fundarins.

Lokafundur stjórnar og trúnaðarráðs Framsýnar á árinu fór fram síðasta föstudag. Trúnaðarmönnum á vinnustöðum, starfsmönnum stéttarfélaganna og stjórn Framsýnar-ung var einnig boðið að sitja fundinn. Fundurinn hófst með venjubundnum hætti með dagskrá. Þegar hún var tæmd tók skemmtinefnd kvöldsins við „Gimbrarnar sjö“ við stjórnun fundarins með skemmtidagskrá sem stóð fram eftir kvöldi. Boðið var upp á heimatilbúin skemmtiatriði og að lokum spilaði Hrútabandið fyrir dansi. Veitingarstaðurinn Salka sá um veitingar kvöldsins sem voru í alla stað til mikillar fyrirmyndar. Fundurinn fór í alla staða vel fram en hefð er fyrir því innan Framsýnar að ljúka starfsárinu með góðum jólafundi þar sem blandað er saman gaman og alvöru. Hér koma nokkrar myndir frá lokafundi ársins hjá stjórn og trúnaðarráði Framsýnar ásamt góðum gestum sem starfað hafa fyrir félagið á árinu.

Snæbjörn Sigurðarson hefur verið ráðinn í tímabundin verkefni á vegum stéttarfélaganna. Miklar annir hafa verið á skrifstofunni, ekki síst þar sem þetta er samningaár, þar sem flestir kjarasamningar sem stéttarfélögin eiga aðild að voru lausir á þessu ári. Sem dæmi má nefna, þá er enn ósamið við ríki og sveitarfélög vegna kjarasamninga fyrir starfsfólk sem starfar hjá þessum opinberu aðilum. Þá er líka ósamið við Landsvirkjun. Mikill tími hefur því farið í samningagerð á árinu sem enn er ekki séð fyrir endann á. Snæbjörn sem lengi starfaði hjá stéttarfélögunum áður en hann hóf störf hjá Norðurþingi mun fyrst og fremst einbeita sér að bókhaldi og skráningu þess í tölvukerfi stéttarfélaganna. Stéttarfélögin bjóða Snæbjörn velkominn til starfa.

Framsýn stéttarfélag stendur fyrir upplýsingafundi um málefni sjóðfélaga innan Lsj. Stapa mánudaginn 2. desember kl. 17:00 í fundarsal Framsýnar.

Dagskrá.

1. Réttindakerfi Stapa
2. Lykiltölur úr rekstri og framvinda fjárfestingarstefnu
3. Aukið hlutverk fulltrúaráðs

Fundurinn er opinn öllum sjóðfélögum Lsj. Stapa. Starfsmenn sjóðsins verða frummælendur á fundinum og svara fyrirspurnum fundarmanna. Mikilvægt er að sjóðfélagar fjölmenni á fundinn og kynni sér málefni sjóðsins og/eða komi ábendingum á framfæri við stjórnendur sjóðsins varðandi s.s. réttindakerfið. Það gerist ekkert með því að sitja heima.

Framsýn- stéttarfélag

Á fundi stjórnar og trúnaðarráðs Framsýnar á föstudaginn voru umræður um slæma stöðu öryrkja og aldraðra til umræðu. Samþykkt var samhljóða að félagið ályktaði um stöðuna sem væri mjög alvarleg:

„Framsýn stéttarfélag styður heilshugar undirskriftarsöfnun þess efnis að enginn eigi að þurfa að lifa af lægri innkomu en kjarasamningsbundnum lágmarkslaunum og krefst breytinga þegar í stað.

Framsýn segir NEI við því að stjórnvöld ætli að hlunnfara öryrkja og eldra fólk.

Samkvæmt fjárlagafrumvarpi ríkistjórnarinnar hækka lægstu eftirlaun um 3,5% um áramótin og verða eftir hækkun tæplega 80.000 krónum lægri en núgildandi lágmarslaun í landinu sem tóku gildi 1. apríl 2019. Örorkulífeyrir verður sömuleiðis töluvert lægri en lágmarkslaun eftir hækkun.

Framsýn mótmælir þeim ráðagerðum ríkisstjórnarinnar að eftirlaun dragist enn frekar aftur úr lægstu launum og krefst þess að lægstu eftirlaun og örorkulífeyrir hækki afturvirkt frá 1. apríl 2019 upp í kr. 317.000 á mánuði.

Framsýn fordæmir skilningsleysi stjórnvalda og kallar eftir þjóðarsátt um mannsæmandi kjör og framfærslu fyrir aldraðra og öryrkja. Tryggjum öllum áhyggjulaust ævikvöld, ekki bara sumum!“

 

Saga Verkalýðsfélags Húsavíkur „Fyrir neðan bakka og ofan“ er á sérstöku tilboði núna fyrir jólin. Um er að ræða þrjár bækur sem fjalla um sögu verkalýðshreyfingarinnar, atvinnulífs og stjórnmála á Húsavík í 100 ár. Sögusviðið er frá 1885 til 1985. Ritverkið hefur fengið einstaklega góða dóma. Tilboðsverðið er kr. 3.000,-Bókin er til sölu á Skrifstofu stéttarfélaganna.

Hefð er fyrir því að formaður eða varaformaður Framsýnar fari yfir starfsemi félagsins á jólafundi þess á hverju ári. Til fundarins er boðuð; stjórn félagsins, varastjórn, trúnaðarmenn á vinnustöðum, stjórn Framsýnar-ung og starfsmenn félagsins. Jólafundurinn stendur nú yfir og var formaður félagsins, Aðalsteinn Árni, að ljúka við að rifja upp það helsta úr starfi félagsins á umliðnu ári.  Hér má lesa ávarp formannsins:

Ágætu félagar

Við höfum lengi haldið okkur við það að halda sérstakan jólafund stjórnar og trúnaðarráðs Framsýnar í desember ár hvert. Starfsmönnum og öðrum þeim sem starfa fyrir félagið í stjórnum, ráðum og nefndum hefur einnig verið boðið að sitja fundinn.

Tilefnið er ekki síst að gera upp árið í starfsemi félagsins, taka fyrir fyrirliggjandi mál og eiga saman ánægjulega kvöldstund.

Árið 2019 hefur verið annasamt í okkar starfi, ekki síst þar sem það hefur einkennst af kjaraviðræðum og kjarasamningsgerð sem ekki er séð fyrir endann á enda enn nokkrir kjarasamningar lausir. Undirbúningur félagsins við kjarasamningsgerð hófst í október 2018 og þeirri vinnu er ekki enn lokið, þar sem ósamið er við ríki, sveitarfélög og Landsvirkjun.

Árið hófst með því að skipuleggja orlofskosti fyrir félagsmenn sumarið 2019. Ákveðið var að bjóða félagsmönnum upp á sambærilega kosti og verið hafa undanfarin ár á góðum kjörum. Ekki er annað að heyra en að félagsmenn séu ánægðir með það framboð sem aðildarfélög skrifstofu stéttarfélaganna hafa boðið upp á í gegnum tíðina.

Samkvæmt 3.mgr. 49. gr. laga ASÍ skulu stjórnir sjúkrasjóða aðildarfélaga ASÍ fá tryggingafræðing eða löggiltan endurskoðanda til þess að meta framtíðarstöðu sjóðsins og semja skýrslu til stjórnar um athugun sína. Á umliðnu starfsári lét Framsýn framkvæma þessa athugun og sá PWC um skoðunina.

Niðurstaðan er skýr: „ekkert bendi til annars en að sjóðurinn geti staðið við skuldbindingar sínar á allra næstu árum sé litið til eiginfjárstöðu í árslok 2017, afkomu sjóðsins á undanförnum árum og þess að bótagreiðslur úr sjóðnum og iðgjöld til sjóðsins verði áfram með líkum hætti og verið hefur.“ Þá kemur fram í fylgisjali að staðan sé í raun öfundsverð.

Þessi niðurstaða sýnir og sannar að við erum á réttri leið í rekstri félagsins, félagsmönnum til hagsbóta.

Deild verslunar- og skrifstofufólks boðaði til aðalfundar 11. febrúar. Jóna Matthíasdóttir gaf ekki kost á sér til áframhaldandi formennsku. Jónína Hermannsdóttir tók við stöðu formanns og gegnir því hlutverki í dag. Full ástæða er til að þakka Jónu fyrir vel unninn störf í þágu félagsins.

Framsýn stóð fyrir félagsfundi um kjaramál í fundarsal stéttarfélaganna í lok febrúar. Fundurinn var sérstaklega boðaður til kjörinna fulltrúa stjórnar og trúnaðarráðs, til trúnaðarmanna á vinnustöðum og Framsýnar – ung. Tæplega 30 manns tóku þátt í fundinum.

Í mars stóðu stéttarfélögin sem aðild eiga að skrifstofu stéttarfélaganna fyrir sameiginlegum fundi með stjórnendum Atvinnuþróunarfélags Þingeyinga um hugmyndir sem verið hafa til skoðunar um sameiningu Atvinnuþróunarfélagsins við Atvinnuþróunarfélag Eyjafjarðar og Eyþing. Framsýn hefur átt aðild að Atvinnuþróunarfélagi Þingeyinga og átt mann í stjórn félagsins. Ljóst er að Framsýn hugnast ekki þessi sameining og telur hana koma til með að veikja samstöðu sveitarfélaga í Þingeyjarsýslum varðandi frekari atvinnuþróun í héraðinu. Skoðunum félagsins hefur verið komið vel á framfæri.

Framsýn tók þátt í spurningavagni Rannsóknarmiðstöðvar Háskólans á Akureyri. Lagðar voru fyrir nokkrar spurningar um félagið í formi netkönnunar og fór könnunin fram dagana 7. – 25 mars 2019 í Eyjafirði og í Þingeyjarsýslum. Alls svöruðu 1552 manns könnuninni, þar af 451 þátttakendur í Þingeyjarsýslum og var svarhlutfall 69.5%. Könnunin kom afar vel út fyrir félagið. Samkvæmt niðurstöðum könnunarinnar er mikil ánægja meðal félagsmanna með starfsemi Framsýnar og staðfestir fyrri kannanir sem sýna sömu niðurstöðu. Stjórnendur Framsýnar eru greinilega á réttri leið með starfsemi félagsins.

Kjarasamningar SGS/LÍV og SA voru undirritaðir 3. apríl. Langur aðdragandi var að þessum kjarasamningum og ýmislegt gekk á meðan á viðræðum stóð milli aðila. Bandalag Eflingar, VR, LÍV, VLFA, VG og Framsýnar afstýrði stórslysi sem hefði orðið hefðu hugmyndir SA varðandi vinnutímabreytingarnar náð fram að ganga. Á lokasprettinum komu önnur félög innan SGS að borðinu og lauk þeirri vinnu með undirritun kjarasamnings. Um er að ræða ágæta samninga sem byggja á þríhliða samkomulagi verkalýðshreyfingarinnar, Samtaka atvinnulífsins og ríkisstjórnarinnar. Samningurinn byggir á krónutöluhækkunum sem Framsýn hefur lengi talað fyrir. Útspil ríkisstjórnarinnar spilaði stóra rullu á lokasprettinum þar sem inn komu skattalækkanir og fleiri atriði. Gildistími samningsins sem kallaður er Lífskjarasamningurinn er til þriggja ára og átta mánaða, það er til 1. nóvember 2022. Í atkvæðagreiðslu um samninginn/samninganna voru þeir samþykktir meðal félagsmanna Framsýnar og annarra stéttarfélaga innan LÍV og SGS. Þess ber að geta að félagið stóð fyrir nokkrum kynningarfundum um kjarasamningana, það er á íslensku og ensku. Fundirnir hefðu mátt vera betur sóttir af félagsmönnum.

Félagið stóð fyrir tveggja daga trúnaðarmannanámskeiði í apríl í samstarfi við fræðsludeild ASÍ. Trúnaðarmannakerfið hefur aldrei verið eins öflugt og er um þessar mundir, tæplega 30 trúnaðarmenn eru starfandi á félagssvæðinu. Að þessu sinni tóku 17 trúnaðarmenn þátt í námskeiðinu í vor. Markmið Framsýnar er að trúnaðarmenn séu á öllum vinnustöðum.

Félagið kom að því að niðurgreiða leikhúsmiða fyrir félagsmenn sem fóru á sýningar hjá Leikfélagi Húsavíkur og Eflingar í Reykjadal. Töluverður hópur félagsmanna nýtti sér þessi sérkjör félagsmanna og skelltu sér í leikhús.

Félagi, Aðalbjörn Jóhannsson, gegndi um tíma formennsku í ASÍ – UNG. Hann lét af þeim störfum á árinu.

Hátíðarhöld stéttarfélaganna í Íþróttahöllinni á Húsavík 1. maí gengu vel fyrir sig og mikið fjölmenni tók þátt í hátíðarhöldunum. Hátíðarhöldin í ár voru tileinkuð baráttu eldri borgara og var Ásdís Skúladóttir frá Gráa hernum aðalræðumaður dagsins.

Ungliðafundur SGS var haldinn á Hallormsstað 22 – 23 maí. Fulltrúar Framsýnar á fundinum voru Sunna Torfadóttir og Guðmunda Jósepsdóttir.

Kristján Ásgeirsson sem lengi var formaður Verkalýðsfélags Húsavíkur andaðist í vor. Kristján sem var mikill verkalýðssinni setti sterkan svip á uppbyggingu félagsins og lagði grunn að því góða starfi sem síðar var viðhaldið. Hans var minnst sérstaklega með gjöf til HSN. Um var að ræða 2 milljónir upp í kaup á fullkomnum hjartaeftirlitstækjum á sjúkradeild Heilbrigðisstofnunar Norðurlands á Húsavík, tækin kosta um 8 milljónir króna.

Þann 5. júní var undirritaður nýr sérkjarasamningur við PCC BakkiSilicon hf. Samningurinn er með sama gildistíma og Lífskjarasamningurinn. Samningurinn var samþykktur, nánast samhljóða, í atkvæðagreiðslu meðal starfsmanna. Um 94% starfsmanna samþykkti samninginn. Með samningnum tókst að tryggja starfsmönnum viðunandi kjör. Markmiðið er að laun starfsmanna PCC verði sambærileg við laun annarra starfsmanna í sambærilegum verksmiðjum á Íslandi.

Sjómannadeild Framsýnar sá um heiðrun sjómanna á Sjómannadaginn á Húsavík. Í ár voru Hermann Ragnarsson og Jakob G. Hjaltalín heiðraðir. Þá stóð Framsýn að venju fyrir „útifundi“ á Raufarhöfn föstudaginn 31. maí, það er fyrir sjómannadagshelgina líkt og síðustu ár. Kvenfélagskonur á Raufarhöfn lögðu til hnallþórur líkt og undanfarin ár, sem Framsýn kostaði. Góð mæting var í kaffið.

Aðalfundur félagsins var haldinn í byrjun júlí og var mæting á fundinn góð en um 40 manns tóku þátt í fundinum. Því miður dróst að halda fundinn í ár en samkvæmt lögum félagsins ber að halda hann í síðasta lagi fyrir lok maímánaðar ár hvert. Að sjálfsögðu eigum við að virða lög félagsins nema utanaðkomandi aðstæður verði þess valdandi að það gangi ekki upp. Við munum gera allt til þess að hægt verði að halda aðalfundinn á næsta ári innan marka.

Á aðalfundinum kom fram að fjárhagsleg afkoma félagsins var mjög góð á árinu 2018. Félagsgjöld og iðgjöld hækkuðu um 3,8% milli rekstrarára.  Rekstrartekjur félagsins námu kr. 273.526.627,- sem er aukning um 3% milli ára. Heildareignir félagsins námu kr. 2.017.426.041,- í árslok 2018 samanborið við kr. 1.895.352.623,- í árslok 2017. Þá fengu félagsmenn tugi milljóna í styrki í gegnum sjóði félagsins á árinu 2018. Í því sambandi er rétt að minna á að félagsmenn Framsýnar halda fullum rétti í félaginu þrátt fyrir að þeir hætti á vinnumarkaði vegna aldurs eða örorku.

36. Þing Alþýðusambands Norðurlands var haldið að Illugastöðum dagana 27 – 28 september. Framsýn átti góða sveit fulltrúa á þinginu. Guðný I. Grímsdóttir var kjörin í stjórn sambandsins. Ósk Helgadóttir var áður í stjórn sem fulltrúi félagsins og eru henni þökkuð góð störf á vetfangi AN.

Að venju stóðu stéttarfélögin fyrir sumarferð. Farið var í dagsferð á Flateyjardal um miðjan september og var þátttaka í ferðinni mjög góð. Ósk Helgadóttir varaformaður skipulagði ferðina sem tókst í alla staði mjög vel enda ekki við öðru að búast þegar hún á í hlut.

7. Þing SGS var haldið í Reykjavík 24 og 25 október. Framsýn átti rétt á 5 fulltrúum. Aðalsteinn Árni Baldursson, Ósk Helgadóttir, Jakob G. Hjaltalín, Sigurveig Arnardóttir og Guðmunda Jósefsdóttir voru fulltrúar félagsins á þinginu. Aðalsteinn Árni hlut áframhaldandi kjör í framkvæmdastjórn sambandsins. Að öðru leiti fór þingið vel fram en skjálfti var í kringum kosningar á þinginu, en þau mál leystust farsællega.

Þá má geta þess að Nína skutlaðist inn á Akureyri á 31. þing LIV sem haldið var dagana 18 – 19 október. Nína fór ekki tómhent heim þar sem hún var kjörin í varastjórn LÍV.

Í lok síðasta árs var gengið frá samningum við Flugfélagið Erni um kaup á 4.800 flugmiðum fyrir félagsmenn. Heildargreiðsla fyrir þá var um 50. 000.000 sem var greidd í tvennu lagi. Þannig tryggðum við félagsmönnum flugmiðann á kr. 10.300. Um þessar mundir erum við að ganga frá samningi við Erni um áframhaldandi samning. Við teljum okkur vera búin að tryggja félagsmönnum áfram sama góða verðið fram á árið en í haust liggur fyrir að miðarnir fara úr kr. 10.300 upp í kr. 10.900. Samningsdrög sem liggja fyrir byggja á því. Gríðarleg ánægja er meðal félagsmanna með þessi afsláttarkjör.

Á árinu kom félagið að því með Norðurþingi að hvetja Vinnumálastofnun til að efla þjónustu við atvinnuleitendur á svæðinu. Fundað var með stjórnendum VMST. Því miður hefur lítið breyst hvað þjónustuna varðar. Framsýn mun standa vaktina áfram enda núverandi fyrirkomulag ekki boðlegt.

Starfsfólk Íslandspósts á Húsavík hefur viljað ganga í Framsýn. Eigi það að ganga upp þarf samþykki stjórnenda Íslandspósts. Það samþykki liggur ekki fyrir, það er að Íslandspóstur geri kjarasamning við Framsýn. Málið er í höndum SA.

Formanni félagsins bauðst að fara til Palestínu í lok október. Ferðin var áhugaverð í alla staði. Fundað var með stjórnvöldum, verkalýðssamtökum og góðgerðarfélögum í Palestínu. Formaður þakkar fyrir stuðninginn sem hann fékk frá félaginu vegna ferðarinnar.

Mikilvægur þáttur í starfsemi Framsýnar er að halda úti öflugri heimasíðu og Fréttabréfi til að miðla upplýsingum til félagsmanna. Þá voru starfsmenn félagsins nokkuð duglegir að heimsækja vinnustaði á svæðinu á árinu. Vonandi tekst okkur að efla það starf frekar á næsta ári.

Félagið kom að því að styrkja nokkur mikilvæg verkefni á félagssvæðinu á árinu með fjárframlögum.

Félagið stóð fyrir ljósmyndasýningu á Mærudögum sem tókst afar vel og fjöldi fólks leit við og skoðaði myndirnar sem teknar voru saman í tilefni af 100 afmæli Verkakvennafélagsins Vonar 2018 af félagskonum við störf. Myndirnar voru til sýnis í Hrunabúð.

Félagið keypti íbúð á Akureyri fyrir félagsmenn á árinu sem tekin var formlega í notkun um miðjan nóvember sl. Íbúðin er ætluð félagsmönnum sem þurfa að dvelja á Akureyri vegna veikinda, orlofs eða vegna einkaerinda. Íbúðin er í Furulundi 11 E og er kaupverðið kr. 40.500.000. Íbúðin sem er 106m2 er í 5 íbúða raðhúsi, sem byggt er árið 1973. Aðrar íbúðir í raðhúsinu eru í eigu annarra stéttarfélaga á höfuðborgarsvæðinu. Það var við hæfi að Svava Árnadóttir vígði íbúðina formlega enda hefur hún lengi talað fyrir því innan stjórnar Framsýnar að félagið fjárfesti í íbúð á Akureyri fyrir félagsmenn.

Þó nokkur hópur félagsmanna tók þátt í fundum eða þingum sem verkalýðshreyfingin stóð fyrir á árinu sem fulltrúar félagsins. Þá eru fulltrúar Framsýnar reglulega beðnir um að flytja erindi eða annan fróðleik á fundum og/eða ráðstefnum. Jafnframt hafa fulltrúar stéttarfélaganna farið með fróðleik um starfsemi stéttarfélaga inn í grunn- og framhaldsskóla á félagssvæðinu. Það á reyndar líka við um Vinnuskóla á svæðinu.

Að venju vorum við dugleg að álykta á árinu um kjara- atvinnu og önnur mál sem varða velferð okkar félagsmanna. Hugsanlega eigum við Íslandsmet í ályktunum.

Starfsárinu er samt sem áður ekki lokið, framundan er aðalfundur Sjómannadeildar Framsýnar í lok desember og jólaboð stéttarfélaganna laugardaginn 14. desember. Þá vorum við að klára viðbótarsamning við PCC varðandi hæfnismat sem tryggir starfsmönnum viðbótarlaunahækkun upp á 2,5%. Þá munum við áfram taka þátt í viðræðum við ríkið, sveitarfélög og Landsvirkjun um nýja kjarasamninga fyrir okkar félagsmenn sem starfa hjá þessum aðilum. Eins og skynja má, þá stöndum við vaktina 24-7 hjá Framsýn.

Að lokum vil ég þakka öllum þeim sem komið hafa að störfum fyrir félagið fyrir þeirra ómetanlegu og óeigingjörnu störf í þágu félagsmanna sem og þeim sem skipa landslið starfsmanna á skrifstofu stéttarfélaganna. Þau hafa staðið vaktina og gert sitt besta til að halda skútunni á floti með góðu viðhaldi. Fyrir það ber að þakka.

Ég tel við hæfi að við rísum úr sætum og heiðrum minningu félaga okkar sem látist hafa á árinu og þeirra sem starfað hafa fyrir félagið eins og Kristjáns Ásgeirssonar og Jónu Jónsdóttur sem létust fyrr á árinu.

Megi guð gefa okkur og fjölskyldum sem og öðrum gleðileg jól og farsælt komandi ár. Takk fyrir frábært samstarf á árinu sem er að líða.

 

 

Skipulags- og framkvæmdaráð Norðurþings hefur svarað erindi Framsýnar vegna fyrirspurnar félagsins um þjóðveg 85 sem liggur frá Húsavík út á Tjörnes fram hjá PCC á Bakka. Framsýn hefur lýst yfir miklum áhyggjum vegna umferðar gangandi vegfarenda um veginn milli Húsavíkur og Bakka enda vegurinn óupplýstur og töluverð bílaumferð um þjóðveginn. Mikil hætta getur því skapast á veginum. Svar skipulags- og framkvæmdaráðs Norðurþings má lesa hér að neðan.

Eftirfarandi var bókað á 52. fundi skipulags- og framkvæmdaráðs Norðurþings;

„Búið er að senda umsókn til Vegagerðar vegna styrks hvað varðar uppbyggingu göngustígs út að Bakka. Hinsvegar er ljóst að sá styrkur mun aldrei koma fyrr en í fyrsta lagi 2021. Því er mikilvægt að skoða leiðir til að bæta núverandi stíg. Skipulags- og framkvæmdaráð felur framkvæmda- og þjónustufulltrúa að skoða leiðir til þess.“

 

Formanni Framsýnar var boðið á starfsmannafund í Borgarhólsskóla í vikunni. Þar gafst yfirmönnum og starfsmönnum skólans, sem starfa eftir kjarasamningum Framsýnar og Starfsmannafélags Húsavíkur, tækifæri á að spyrja Aðalstein Árna út í ýmislegt varðandi kjara- og réttindamál. Hópur starfsmanna vinnur eftir kjarasamningum þessara tveggja félaga í skólanum. Starfsmenn lögðu fjölmargar spurningar fyrir formanninn. Fundurinn var mjög góður og málefnalegur enda frábært starfsfólk í Borgarhólsskóla á Húsavík. (Meðfylgjandi mynd er úr myndsafni stéttarfélaganna, tekin í Borgarhólsskóla)

 

 

 

 

Í gær gengu stéttarfélögin Framsýn og Þingiðn frá samkomulagi við PCC BakkiSilicon hf. sem byggir á ákvæði í sérkjarasamningi aðila um hæfniálag. Aðalsteinn Árni Baldursson og Rúnar Sigurpálsson undirrituðu samkomulagið fyrir hönd PCC og stéttarfélaganna. Samkvæmt samkomulaginu koma laun starfsmanna til með að taka mið af tveimur þáttum, það er starfsaldri og hæfni. Það er, nú geta starfsmenn sótt sér frekari launahækkanir með því að standast gefnar hæfnikröfur. Hæfnisþrepin verða tvö sem starfsmönnum stendur til boða standist þeir þær kröfur sem gerðar eru til hæfniþrepanna. Hæfnisþrep I gefur 2,5% launahækkun og hæfniþrep II gefur 5% launahækkun á grunnflokk viðkomandi starfsmanns. Við það er miðað að starfsmenn geti náð hæfniþrepunum innan 5 ára frá því að þeir hófu störf hjá fyrirtækinu. Samkomulagið nær til starfsmanna við framleiðslu og viðhald í verksmiðju PCC á Bakka. Mikil vilji er meðal stéttarfélaganna og forsvarsmanna PCC að gera verksmiðjuna á Bakka að góðum vinnustað, liður í því er að huga vel að öryggi, velferð og kjörum starfsmanna.

 

Stjórn og trúnaðarráð Framsýnar auk starfsmanna félagsins, stjórnar Framsýnar-ung og trúnaðarmanna Framsýnar á vinnustöðum á félagssvæðinu hafa verið boðuð saman til fundar á föstudaginn í fundarsal stéttarfélaganna. Mörg mál eru á dagskrá fundarins.

Dagskrá:

1. Fundargerð síðasta fundar
2. Annál ársins 2019
3. Samningur við Flugfélagið Erni
4. Kjör á trúnaðarmanni í Miðjunni
5. Ályktun um málefni aldraðra og öryrkja
6. Staðan í kjaramálum-ríki-sveitarfélög-Landsvirkjum
7. Formannafundur SGS
8. Málefni PCC-samkomulag um frammistöðumat
9. Fulltrúi í Vinnumarkaðsráð N-eystra
10. Önnur mál

Stéttarfélögin í Þingeyjarsýslum hafa lengi komið að starfsemi Atvinnuþróunarfélags Þingeyinga ásamt sveitarfélögum og atvinnurekendum í héraðinu. Fyrrgreindir aðilar voru hluthafar í Atvinnuþróunarfélaginu áður en því var breytt í sjálfseignarstofnun ses. Á hverjum tíma hefur stjórnin verið skipuð fulltrúum frá sveitarfélögum og atvinnulífinu, það er stéttarfélögum og atvinnurekendum. Frá fyrstu tíð hefur samstarf þessara aðila verið til mikillar fyrirmyndar og starfsemi Atvinnuþróunarfélagsins verið öflug, svo eftir hefur verið tekið. Markmið félagsins hefur verið að efla byggð og atvinnu í Þingeyjarsýslum í samstarfi við heimamenn.

Nú ber svo við að ákveðið hefur verið að sameina Eyþing, Atvinnuþróunarfélag Eyjarfjarðar og Atvinnuþróunarfélag Þingeyinga í ný landshlutasamtök sem ganga undir vinnuheitinu Norðurbrú. Um þetta urðu sveitarstjórnarmenn á félagssvæði Eyþings sammála, fyrir utan Tjörneshrepp sem stóð í lappirnar og lagðist gegn þessari sameiningu. Sama á við um Framsýn stéttarfélag sem lagðist eindregið gegn sameiningunni. Að mati Framsýnar er það ekki heillaspor fyrir Þingeyinga að færa atvinnuþróun og uppbyggingarstarf atvinnumála í nýtt félag á svæðinu til Akureyrar miðað við samsetningu stjórnar. Samkvæmt nýja skipulaginu verða 7 fulltrúar kjörnir í stjórn fyrir nýtt sameinað félag. Fjórir stjórnarmenn koma frá Akureyri/Eyjafirði og þrír úr Þingeyjarsýslum. Þingeyingar verða því í minnihluta auk þess sem Akureyringar kröfðust þess að fá stjórnarformanninn vegna stærðar sveitarfélagsins. Eðlilegast hefði verið að stjórnin skipti sjálf með sér verkum enda um samstarfsvetfang að ræða sem á ekki að byggjast á því hver sé stærstur og mestur.

Til samanburðar má geta þess að Norðurþing beitti aldrei þessu valdi í stjórn Atvinnuþróunarfélags Þingeyinga þrátt fyrir að greiða mest til félagsins, heldur var horft til þeirra sem völdust í stjórn á hverjum tíma og stöðu atvinnu- og byggðamála í héraðinu. Í ljósi þess þarf engum að koma á óvart að í flestum tilvikum féll stjórnarformennskan í hlut sveitarstjórnarmanna austan Húsavíkur enda hefur það svæði til fjölda ára fallið undir brothættar byggðir í skilningi Byggðastofnunnar. Að þeim sökum hefur töluverður tími farið í það á vegum Atvinnuþróunarfélags Þingeyinga að sinna austursvæðinu umfram önnur svæði í Þingeyjarsýslum, ekki síst í samstarfi með Byggðastofnun.

Til málamynda er talað um að lögheimili nýrrar stofnunar verði á Húsavík. Athyglisvert er að ekki er talað um að höfuðstöðvarnar verði á Húsavík í samþykktunum heldur lögheimilið eða bréfalúgan eins og einn ágætur maður orðaði það. Nú mun reyna á að sveitarstjórnarmenn í Þingeyjarsýslum fylgi því eftir að Höfuðstöðvarnar verði á Húsavík og þar verði utanumhald um reksturinn, starfsmannahald og framkvæmdastjórinn staðsettur. Það er, meini menn eitthvað með því að svokallað lögheimili verði á Húsavík sem er miðsvæðis á starfssvæði Norðurbrúar. Til viðbótar þarf að tryggja starfseminni rekstrargrundvöll þar sem talað er um að efla starfsemina frekar með sameinuðu félagi með fjórum starfsstöðvum á starfssvæði Eyþings/Norðurbrúar.

Eins og fram kemur í þessari samantekt lagðist Framsýn alfarið gegn sameininguni enda hugmyndin ekki á vetur setjandi að mati félagsins. Framsýn stóð fyrir fundi í stjórn og trúnaðarráði félagsins sem skipað er félagsmönnum úr flestum sveitarfélögum í Þingeyjarsýslum. Þar kom fram mjög hörð gagnrýni á sameininguna og samþykkti fundurinn að senda frá sér meðfylgjandi yfirlýsingu sem skýrir afstöðu félagsins til þessarar sameiningar. Formaður fylgdi henni eftir á fulltrúaráðsfundi Atvinnuþróunarfélags Þingeyinga sem haldinn var í Skúlagarði 19. nóvember þar sem sameining þessara þriggja stofnanna var tekin fyrir og samþykkt formlega með meirihluta greiddra atkvæða.

Yfirlýsing
-Vegna fyrirhugaðra breytinga á starfsemi Atvinnuþróunarfélags Þingeyinga-

 „Framsýn stéttarfélag leggst alfarið gegn sameiningu Atvinnuþróunarfélags Þingeyinga, Atvinnuþróunarfélags Eyfirðinga og Eyþings.

 Fram að þessu hefur verið breið samstaða meðal sveitarfélaga, samtaka atvinnurekanda og stéttarfélaga í Þingeyjarsýslum um að veita samræmda og þverfaglega ráðgjafaþjónustu tengda atvinnulífi, samfélags- og byggðaþróun í gegnum Atvinnuþróunarfélag Þingeyinga.

 Atvinnuþróunarfélagið hefur þurft að takast á við mörg krefjandi verkefni ekki síst vegna þess að hluti af starfssvæðinu er skilgreint sem brothættar byggðir.

 Að mati Framsýnar hefur Atvinnuþróunarfélag Þingeyinga skilað góðu starfi í þágu samfélagsins. Stjórn félagsins hefur verið skipuð fulltrúum frá sveitarfélögum af öllu svæðinu auk fulltrúum frá atvinnulífinu í Þingeyjarsýslum.

Miðað við fyrirliggjandi tillögur verða verulegar breytingar á starfsemi atvinnuþróunar á starfssvæði Eyþings og aðgengi sveitarfélaga og atvinnulífsins í Þingeyjarsýslum að stjórnun félagsins verður ekki með sama hætti og verið hefur.

 Framsýn stéttarfélag getur því ekki sætt sig við boðaðar breytingar og leggst því alfarið gegn þeim.“

 

 

 

 

 

 

 

 

Foreldrar ungbarna á Húsavík hafa verið í sambandi við Framsýn vegna hugmynda/tillagna Fjölskylduráðs Norðurþings um að aðlögunum á leikskólanum Grænuvöllum verði fækkað niður í tvær á ári í stað fjögurra. Þá hafa foreldrar einnig áhyggjur af því að leikskólagjöldin verði hækkuð enn frekar. Fyrir eru þau verulega há miðað við önnur sveitarfélög á Íslandi.

Varðandi stöðuna er rétt að rifja upp eftirfarandi úr svari Fjölskylduráðs til Framsýnar vegna athugasemda félagsins vegna stöðu leikskólamála á Húsavík fyrr á þessu ári, það er vegna innritunar barna og leikskólagjalda.

„Lögð hefur verið á það mikil áhersla hjá sveitarstjórnarfulltrúum sl. ár að boðið sé upp á að foreldrar geti innritað börn sín í leikskóla 12 mánaða og að skólaganga ungbarna hefjist sem næst þeim degi er börnin verða ársgömul. Þessi þjónusta hefur gengið vel og innritun barna í leikskólum sveitarfélagsins hefur haldist frá 12 mánaða aldri, þrisvar til fjórum sinnum á ári. Engir biðlistar eru á leikskólum Norðurþings.“

„Því er ljóst að fjölskylduráð sem og sveitarstjórn mun yfirfara gjaldskrána gaumgæfilega í haust og velta því fyrir sér hvort hægt sé að finna leiðir til lækkunar álaga á barnafólk með lækkun leikskólagjaldanna án þess að það hafi áhrif á þjónustustig skólanna okkar og það frábæra starf sem leikskólabörnum í sveitarfélaginu er boðið uppá. Verður horft til þessa erindis sem brýningu í þessum efnum því vitanlega vill sveitarstjórn Norðurþings áfram tryggja góða þjónustu en jafnframt að hún sé ekki úr hófi fram kostnaðarsöm fyrir foreldra ungra barna. Það er verðugt markmið.“

 Til viðbótar er tekið fram í sáttmála meirihlutans: „Tryggja úrræði fyrir börn eftir að fæðingarorlofi foreldra lýkur og halda okkur við að inntökualdur leikskólabarna í Norðurþingi verði 12 mánuðir.“

 Það sem veldur foreldrum miklum áhyggjum er að koma ekki börnunum inn á leikskóla við 12 mánaða aldur, í flestum tilfellum er um að ræða einstaklinga sem eru í ráðningarsambandi og ber því að mæta til vinnu eftir að töku fæðingarorlofs lýkur. Dæmi eru um að ungt fólk horfi til þess að þurfa að endurskoða ráðningarsambandið við núverandi atvinnurekendur verði aðgengi að leikskólanum skert frá því sem nú er. Það er mat Framsýnar að sveitarfélagið Norðurþing verði að bregðast við þessum „jákvæða“ vanda þegar í stað, það er að auðvelda foreldrum að koma sínum börnum á leikskóla.

Með bréfi til Norðurþings hefur Framsýn óskað eftir fundi með forsvarsmönnum sveitarfélagsins til að ræða stöðu mála. Með á fundinum verði fulltrúar frá foreldrum ungbarna á Húsavík sem óskuðu formlega eftir aðkomu Framsýnar að málinu.

 

Soroptimistaklúbbur Húsavíkur og nágrennis stóð fyrir samkomu þann 25. nóvember sem markaði upphaf 16 daga baráttu gegn kynbundnu ofbeldi á konum og stúlkum um víða veröld. Ræðumaður dagsins var Ósk Helgadóttir varaformaður Framsýnar stéttarfélags. Ræðuna má lesa hér í framhaldinu en hún vakti töluverða athygli:

Kæru systur og bræður.

Dagurinn í dag, 25. nóvember er alþjóðlegur dagur gegn kynbundnu ofbeldi. Ofbeldi sem er ein útbreiddasta, þrálátasta og mest tortímandi ógnun við mannréttindi í heiminum og jafnframt skýrasta form mismununar. Víða um heim skipuleggja stjórnvöld og alþjóðleg samtök viðburði á þessum degi í þeim tilgangi að vekja athygli almennings á vandamálinu og þess vegna erum við hér saman komnar.

Hluti af þeirri mannréttindabaráttu sem staðið hefur um aldir er barátta kvenna um allan heim fyrir kvenfrelsi og góðum lífsskilyrðum kvenna og barna. Þótt mannréttindasáttmálar og stjórnarskrár flestra ríkja kveði á um að konur og stúlkur eigi að njóta sömu réttinda og karlmenn, þá er það staðreynd að konur standa hvergi í heiminum alveg jafnfætis karlmönnum.

Daglega heyrum við fréttir af konum sem stíga fram og segja frá því áreiti og ofbeldi sem þær hafa orðið fyrir. Það á sér stað alla daga og getur tekið á sig ólíkar myndir. Ofbeldi af því tagi er ekki bundið við stéttir, heldur beinist það að konum í öllum lögum samfélagsins.

Rannsóknir hafa sýnt að í samfélögum þar sem konur og stúlkur hafa greiðan aðgang að heilsugæslu, menntun, stjórnmálum og atvinnu ríkir meiri friður, það dregur úr fátækt og ofbeldi og hagvöxtur eykst. Berum við okkur saman við lönd sem við köllum gjarnan „vanþróuð“erum við sennilega að skora nokkuð hátt og ofbeldi er ekki lengur viðurkennd karlmennskuhegðun í þeim löndum sem við berum okkur saman við. Víst geta íslenskar konur verið þakklátar fyrir það að umskurður kvenna sé ekki viðtekin venja hér á landi, við ekki notaðar sem skiptimynt í þrælasölu, eða okkur haldið á mottunni með því að skvetta sýru í andlit okkar. Hræðilegt athæfi sem við vitum að tíðkast í sumum löndum og fjölmiðlar bera okkur daglegar fréttir af. En það samt ekki þannig að íslenskt samfélag geti fríað sig af ofbeldishegðun. Væri svo, væri til dæmis ekki þörf á starfsemi Kvennaathverfsins og Stígamóta, en starfsemi þeirra dregur ofbeldi karla fram í dagsljósið og styður konur sem hafa orðið fyrir því. Árið 2018 komu 135 konur og 70 börn í Kvennaathvarfið í Reykjavík, auk þess sem 240 konur nýttu sér viðtöl, án þess að dvelja þar. Tölurnar segja samt ekki allt, þetta eru einungis þær konur sem leita sér aðstoðar. Hinar þegja þunnu hljóði. Af hverju ?

Jú, það er skömmin, sektartilfinningin og misbrestir í íslensku réttarfari sem hindra konur í að segja frá glæpum af þessu tagi, sem flestir koma ekki fram í dagsljósið. Það er gert lítið úr veruleika kvennanna og reynslu, myndin skekkt og með því hylmt yfir gerendanum, en ábyrgðin sett yfir á þolandann. Skömmin bítur. 65 prósent nauðgunarmála eru felld niður af ríkissaksóknara.

Við búum við meðvirkt réttarkerfi sem með þessum hætti gefur ákveðið samþykki fyrir því að kynbundið ofbeldi sé órjúfanlegur þáttur í menningu okkar og við konur verðum bara að gera okkar besta til að lifa með því. Við lærum þessa meðvirkni strax í æsku, tileinkum okkur afneitun til að þurfa ekki að takast á við það, þurfa ekki að tala um það. Haltu kjafti, hlýddu og vertu sæt. Þú baðst um þetta! Konur ættu hins vegar að finna sig öruggar í því að segja frá og fordæma þá sem brjóta á rétti þeirra.

Síðustu ár hefur hver kvenfrelsisaldan af annari skollið á ströndum landsins og fært okkur ferska strauma mannréttindabaráttu í öðrum vestrænum löndum. Hreyfingar eins og #Me to, druslugangan, #höfum hátt og fleiri slíkar hafa skekið heiminn og eflt samstöðu kvenna. Það hefur opnað augu kvenna og karla, dregið fram í dagsljósið þann veruleika að konur eru undirskipaðar í valdakerfi þar sem karllæg viðhorf ráða ríkum. Orðið þess valdandi að æ fleiri konur segja frá, þær opna ormagryfjur og afhjúpa „skrýmsli“ í öllum lögum samfélagsins. Jafnt í koti karls sem konungshöllu eru menn sem með hegðun sinni og gerðum hafa eyðilagt líf fjölda kvenna. Í krafti valdsins.

Konur sem ögra ríkjandi valdakerfi mega eiga von á árásum sem einkennast af karlrembu og þær standa frammi fyrir ýmsum hindrunum vilji þær komst til áhrifa. Ein ástæðan fyrir því hversu fáar konur eru leiðtogar og í forystusætum er það sem kallast „skaðleg karlmennska.” Sú hugmyndafræði felur m.a. í sér athugasemdir um útlit og klæðaburð, hundsun, þöggun, launamismunun, hótanir, kynbundið og kynferðislegt ofbeldi. Sem er óþolandi, því konur og karlar eru jafn hæf til að leiða og vera í forystuhlutverki.

Skaðleg karlmennska byggir tilveru sína á kvenfyrirlitningu. Gott dæmi um slíkt birtist okkur fyrir nákvæmlega ári síðan þegar nokkrir áhrifamenn í þjóðfélaginu sátu á bar á Austurvelli og viðhöfðu þar ósmekkleg ummæli um konur og fatlað fólk. Slík ummæli dæma sig sjálf, segja mest um viðkomandi aðila og verða þeim jafnframt til ævarandi skammar.

Kæru systur. Klaustur er víða. Við erum ekki „húrrandi klikkaðar kuntur”, við erum „hot.“ Það er kannski kominn tími til að hlusta, horfast í augu við ofbeldið sem þrífst í samfélaginu og bregðast við því.

Það er ástæða fyrir því að á íslenskum vinnumarkaði telja 45% kvenna sig hafa orðið fyrir ofbeldi af einhverju tagi og það hlutfall minnkar ekki meðan samfélagið gefur samþykki sitt fyrir því, með því að bregðast ekki við því. Við þurfum að berjast á móti rótgrónu kynjamisrétti sem orsakast af gamaldags viðhorfum og tengdum félagslegum normum og leggja meiri áherslu á forvarnir.

Á meðan kynbundið ofbeldi viðgengst og refsingar eru vægar munu frekari framfarir í jafnréttisbaráttu ekki eiga sér stað. Vöndum okkur, sérstaklega við uppeldi drengjanna okkar. Með því að stuðla að vitundarvakningu öðlumst við skilning á eðli og afleiðingum ofbeldis og með því móti eigum við möguleika á að uppræta það.

Ofbeldi er valdbeiting og kúgun! Við viljum ekki ó – menningu þar sem valdi er misbeitt í þeim tilgangi að niðurlægja og brjóta niður sjálfstraust fólks. Við segjum nei við ofbeldi og bætum þannig samfélagið fyrir okkur öll.

(Meðfylgjandi mynd af Ósk tók Hörður Jónasson)

 

 

 

 

 

 

Á stjórnar- og trúnaðarráðsfundi Framsýnar stéttarfélags mánudaginn 18. nóvember 2019 var samþykkt að skrifa Norðurþingi bréf og koma eftirfarandi ábendingum á framfæri við sveitarfélagið:

Í aðalskipulagi Norðurþings er gert ráð fyrir skipulögðu svæði undir iðnað og aðra atvinnustarfsemi á Bakka við Húsavík. Fyrirtækið PCC BakkiSilicon hf. rekur þar í dag öfluga starfsemi með um 150 starfsmönnum. Það er von Framsýnar að heimamönnum takist að laða að frekari atvinnustarfsemi inn á svæðið í sátt og samlyndi við sveitarfélagið og íbúa í Norðurþingi.

Það sem veldur félaginu hins vegar verulegum áhyggjum er að vegna húsnæðiseklu á Húsavík býr þó nokkur hluti starfsmanna í verbúðum/starfsmannabústöðum á Bakka. Oft er um að ræða fólk sem hefur ekki aðgang að bifreiðum. Starfsmenn PCC sem búa við þessar aðstæður þurfa því oft að fara fótgangandi til og frá Bakka, eftir illa upplýstum vegi, til að sækja verslun og þjónustu til Húsavíkur sem skapar töluverða slysahættu.

Framsýn hefur talað fyrir því að PCC komi sér upp ferðum/strætó milli Húsavíkur og Bakka til að tryggja öryggi starfsmanna sem búa í húsnæði á þeirra vegum á Bakka. Því miður hefur fyrirtækið ekki talið sig geta komið til móts við þær kröfur.

Framsýn vill með bréfi þessu vekja athygli Norðurþings á málinu og fara þess á leit við sveitarfélagið að það taki málið upp til umræðu með hagsmunaaðilum, það er að skoðað verði að byggja upplýsta göngubraut frá Húsavík að Bakka eða komið verði á skipulögðum ferðum milli Húsavíkur við iðnaðarsvæðið á Bakka. Fleiri kostir eru einnig í boði sem rétt er að skoða til að tryggja öryggi vegfarenda.

Round Table er alþjóðlegur félagsskapur ungra manna á aldrinum 20 – 45 ára. Félagar eru úr hinum ýmsu starfsstéttum þjóðfélagsins. Tilgangur Round Table er að sameina unga menn úr mismunandi starfsgreinum til að öðlast betri skilning á þjóðfélaginu og stöðu einstaklingsins innan þess. Að lifa eftir einkunnarorðunum “Í vináttu og samvinnu”. Að auka alþjóðaskilning og vináttu með aðild að Round Table International. Einkunnarorð Round Table eru: Tileinka – Aðlaga – Bæta.

Fundir á vegum RT eru mismunandi en þeim er ýmist blandað saman við skemmtun, heimsóknir, kynningar og í raun allt það sem félögum dettur í hug á hverjum tíma. Á dögunum óskuðu félagar í RT-4 á Húsavík eftir kynningu á starfsemi Framsýnar. Að sjálfsögðu var orðið við þeirri ósk og tók formaður Framsýnar á móti hópnum og gerði líflegum gestum grein fyrir starfsemi stéttarfélaga og svaraði fjölmörgum spurningum. Eftir kynninguna fékk Aðalsteinn Árni fána RT-4 að gjöf. Það var formaður RT-4 á Húsavík, Sveinn Veigar Hreinsson sem afhendi Aðalsteini fánann frá félaginu um leið og hann þakkaði fyrir kynninguna og móttökurnar. Tæplega 30 manns tóku þátt í fundinum.

 

Samningaviðræður Framsýnar og Flugfélagsins Ernis sem fram fóru á föstudaginn voru vinsamlegar og fullur vilji er til þess meðal aðila að semja áfram um sérkjör á flugmiðum fyrir félagsmenn Framsýnar og þeirra stéttarfélaga sem aðild eiga að Skrifstofu stéttarfélaganna. Viðræðum verður fram haldið í vikunni  eftir að Framsýn hefur yfirfarið tilboð Ernis. Þess má geta að Framsýn er stærsti viðskiptavinur flugfélagsins á Íslandi er viðkemur samningum stéttarfélaga við flugfélagið en stéttarfélögin í þingeyjarsýslum hafa verið að selja um 5000 flugmiða á ári til félagsmanna.

 

 

Dagatöl stéttarfélaganna vegna ársins 2020 eru komin út. Hægt er að nálgast þau á skrifstofu stéttarfélaganna á Húsavík. Þá er einnig í boði að senda þau til félagsmanna leiti þeir eftir því. Að þessu sinni lánaði Gaukur Hjartarson stéttarfélögunum glæsilegar myndir á dagatölin. Dagbækur stéttarfélaganna eru svo væntanlegar í hús rétt fyrir jólin.

Dagatölin komin í hús.