kuti

Það var staðfest í vikunni að hagvaxtaraukinn sem samið var um 2019 komi til framkvæmda frá 1. apríl og verði greiddur út í fyrsta sinn þann fyrsta maí. Launataxtar munu hækka um 10.500 kr. og almenn laun um 7.875 kr. þar sem hagvöxtur mældist á síðasta ári. Það er mikilvægt að þessar hækkanir komi núna ekki síst vegna hækkandi verðlags og dýrtíðar í kjölfar heimsfaraldurs og stríðsins í Úkraínu. Atvinnurekendur fóru fram á að þetta ákvæði myndi ekki virkjast en samninganefnd ASÍ tók þá ákvörðun sem fyrr að verja samningana alla leið. Það hefur reynst farsælt.

Í vikunni kom út mánaðaryfirlit Alþýðusambandsins þar sem kemur í fyrsta sinn skýrt fram að húsnæðisstuðningur hins opinbera hefur færst frá því að vera í formi vaxtabóta til fólks úr öllum tekjuhópum yfir í að vera helst stuðningur til þeirra tekjuhæstu í gegnum skattafrádrátt lífeyrissparnaðar. Ójöfnuður getur leynst víða og úrræði sem ætluð eru til að létta fólki lífið geta haft þveröfug áhrif. Í þessu tilviki má gefa sér að þetta úrræði hafi hækkað húsnæðisverð og á sama tíma dregið úr stuðningi við þá sem mest þurfa. Nú er því nánast ógerningur fyrir tekjulágt fólk að komast inn á eignamarkaðinn. Einmitt þess vegna skipta tilfærslukerfin svona miklu máli. Barnabætur, húsaleigubætur og vaxtabætur, ásamt skattkerfinu eru  öflugustu kerfin sem við eigum til að búa til jöfnuð og  veita liðsinni þar sem þess er þörf. Þannig skapast jafnvægi. Ég fagna ályktun ASÍ-UNG sem var samþykkt í fyrradag þar sem þess er krafist að húsnæðisstuðningur stjórnvalda beinist að ungu og tekjulágu fólki og ég tek undir þessa kröfu.

Samfélög þar sem jöfnuður ríkir eru farsælustu samfélögin, fyrir einstaklinga og fyrir heildina. Framleiðnin er meiri, nýsköpun, listir blómstra og velmegun er almennt meiri. Forsenda jöfnuðar er sterk verkalýðshreyfing sem vinnur fyrir launafólk og beitir sér fyrir bæði sanngjörnu endurgjaldi fyrir vinnu en ekki síður fyrir því að stjórnvöld nýti sín tæki til jöfnuðar og almennrar velmegunar. Það er skýr fylgni á milli sterkra verkalýðshreyfinga á vesturlöndum og jöfnuðar og farsældar.

Við skulum aldrei gleyma því.

Góða helgi,

Drífa forseti ASÍ

Þingi Starfsgreinasambands Íslands er að ljúka eftir þriggja daga þing. Nú standa yfir kosningar. Fyrr í morgun var Vilhjálmur Birgisson kosinn formaður sanbandsins og rétt í þessu var Aðalsteinn Árni Baldursson formaður Framsýnar endurkjörinn í framkvæmdastjórn sambandsins.

81% svarenda telja að VIRK Starfsendurhæfingarsjóður hafi mikla þýðingu fyrir íslenskt samfélag samkvæmt viðhorfskönnun Maskínu sem gerð var í febrúar.

Í sömu könnun kom fram að 26% aðspurðra þekkja vel til VIRK, 39% þekkja í meðallagi til VIRK en 35% þekkja illa til starfsemi starfsendurhæfingarsjóðsins.

Sjá nánar í frétt á vef VIRK.

Forsendunefnd ASÍ og SA sem starfar samkvæmt kjarasamningum hefur hist og rætt hagvaxtarauka kjarasamninga. Líkt og greint var frá nýverið (https://www.asi.is/frettir-og-utgafa/frettir/almennar-frettir/nytt-manadaryfirlit-hagvaxtaraukinn-virkjast/) jókst landsframleiðsla á mann um 2,53% á síðasta ári. Þetta hefur þá þýðingu að hagvaxtarauki kjarasamninga hefur virkjast í fjórða þrepi.

Forsendunefnd ASÍ og SA hefur ákveðið að hagvaxtaraukinn komi til greiðslu 1. maí líkt og kveðið er á um í samningum. Launataxtar munu hækka um 10.500 kr. og almenn laun um 7.875 kr. frá 1. apríl og koma til greiðslu 1. maí.

Lífskjarasamningur var undirritaður í apríl 2019 þegar fyrirséð var að gjaldþrot lággjaldaflugfélagsins WOWair myndi hafa neikvæð áhrif á efnahagslíf. Samningurinn studdi við verðstöðugleika og skapaði forsendur fyrir lækkun vaxta. Greining Alþýðusambands Íslands á launahlutfalli hefur leitt í ljós að launahlutfall í hagkerfinu hefur verið stöðugt á samningstímabilinu.

Fulltrúar Framsýnar hafa fundað reglulega með Samtökum atvinnulífsins vegna endurnýjunar á sérkjarasamningi fyrir starfsmenn við hvalaskoðun á Húsavík. Nú þegar Covid er á niðurleið eru miklar lýkur á því að ferðamenn fari að flykkjast aftur til Húsavíkur í hvalaskoðun enda staðurinn heimsfrægur fyrir sínar hvala- og fuglaskoðunarferðir um Skjálfanda. Miðað við stöðuna í dag reiknar formaður Framsýnar að skrifað verði undir nýjan samning upp úr næstu helgi. Starfsmenn hvalaskoðunarfyrirtækjanna hafa krafist þess að nýr samningur liggi fyrir þegar vertíðin fer á fullt með vorinu.

Framhaldsskólin á Laugum hefur haldið úti öflugu skóla- og félagslífi. Hvað félagslífið varðar hafa nemendur skólans staðið fyrir Tónkvíslinni undanfarin ár sem í ár verður haldinn í íþróttahúsinu á Laugum þann 19. mars. Full ástæða er til að hvetja fólk til að mæta á svæðið og upplifa stemninguna. Keppninni verður steymt inn á youtube síðu skólans. Samkvæmt upplýsingum frá Nemendafélaginu verða tólf atriði úr Framhaldskólanum á Laugum og fimm atriði úr grunnskólum á svæðinu.  Verðlaun fyrir að vinna í framhaldsskólakeppninni er tími í upptökustúdíói, gjafabréf og gjafir frá ýmsum fyrirtækjum. Einnig verða verðlaun fyrir annað og þriðja sæti og fyrsta sæti í grunnskólakeppninni. Gjafabréfin eru mörg og vegleg. Þess má geta að Framsýn kemur að því styrkja samkomuna í ár.

 

Stjórn Framsýnar styður Vilhjálm Birgisson formann Verkalýðsfélags Akraness heilshugar til forystu í Starfsgreinasambandi Íslands. Þetta var samþykkt á fundi stjórnar í gær. Þing sambandins verður haldið á Akureyri síðar í mars. Framsýn hefur lengi barist fyrir róttækari verkalýðsbaráttu, reyndar farið fyrir þeirri baráttu til fjölda ára. Liður í því er að Vilhjálmur taki við forystu innan Starfsgreinasambandsins  og framkvæmdastjórn sambandsins verði skipuð fólki sem er tilbúið að vinna 24/7 að bættum kjörum og réttindum verkafólks sem býr við óviðunandi kjör í dag. Að mati stjórnar Framsýnar verða sigrar í verkalýðsbaráttu ekki bara unnir í dagvinnu, sólarhringsvakt þurfi til.

Stjórn Framsýnar hefur ákveðið að taka eina íbúð félagsins í Reykjavík úr umferð með það að  markmiði að lána hana endurgjaldslaust til flóttafólks frá Úkraínu sem á um sárt að binda og flúið hefur til Íslands í leit að öryggi. Þá samþykkti stjórnin að opna á frekara aðgengi flóttafólks að íbúðum félagsins Reykjavík/Kópavogi þurfi þess með á þessum ömurlegu tímum.

 

Stjórn Framsýnar telur sig ekki getað setið hjá hvað varðar þær hörmungar sem eiga sér stað í Úkraínu. Félagið hefur þegar ákveðið að leggja til eina íbúð undir flóttafólk frá Úkraínu og fleiri  komi til þess að þörfin verði meiri fyrir íbúðir auk þess að styrkja hjálparstarf vegna flóttafólks frá Úkraínu um eina evru fyrir hvern félagsmann eða um kr. 300.000,-.

Stjórn Framsýnar skorar jafnframt á önnur stéttarfélög  að koma líkt og félagið að verkefninu með fjárstuðningi og láni á orlofsíbúðum. Að mati stjórnar er það ekki í boði að stéttarfélög eða önnur hagsmunasamtök sitji hjá á ófriðartímum sem þessum.

 

Á stjórnarfundi Framsýnar í gær var samþykkt að beina þeim tilmælum til íslenskra stjórnvalda að þau opni fyrir aðgengi flóttamanna frá Úkraínu að íslenskum vinnumarkaði, það er með því að veita þeim atvinnuleyfi á Íslandi. Fyrir liggur að illa hefur gengið að manna fjölmörg störf svo ekki sé talað um störf í ferðaþjónustunni þar sem því er spáð að heimsóknir ferðamanna til Íslands verði yfir milljón nú þegar Covid er á undanhaldi. Ísland hefur því mikla þörf fyrir erlend vinnuafl. Framsýn hvetur til þess að flóttamenn frá Úkraínu hafi forgang til starfa á Íslandi á tímum ömurlegra aðstæðna í Úkraínu sem eru á ábyrgð Pútíns sem þegar hefur skráð sig í sögubækurnar sem einn mesti glæpamaður sögunnar.

Stéttarfélögin hafa ákveðið að gera vel við félagsmenn sem sækja um orlofshús eða olofsíbúðir sumarið 2022. Sama leiguverð verður milli ára, það er kr. 29.000,- per viku. Tjaldstæðisstyrkir til félagsmanna sumarið 2022 verða kr. 25.000,- og þá verður ferðaávísun til félagsmanna hækkuð úr kr. 15.000,- í kr. 18.000,-. Ferðaávísunina geta félagsmenn notað til að niðurgreiða dvöl á hótelum og gistiheimilum sem finna má á orlofsvef stéttarfélaganna. Niðurgreiðslan/ferðaávísunin kemur til viðbótar þeim afslætti sem stéttarfélögin hafa þegar samið um við fjölmörg hótel, gistiheimili og aðra ferðaþjónustuaðila víða um land.

Eftir helgina verður hægt að sækja um orlofshús og íbúðir á vegum stéttarfélaganna sem eru Framsýn, Þingiðn, Verkalýðsfélag Þórshafnar og Starfsmannafélag Húsavíkur.

Umsóknarfresturinn er til 18. apríl. Fljótlega upp úr því verður orlofskostunum úthlutað til félagsmanna sem sóttu um. Komi til þess að einhverjar vikur standi eftir, verða þær auglýstar aftur.

Stéttarfélögin hafa jafnframt ákveðið að standa fyrir sumarferð, það er gönguferð í Bárðardal um miðjan ágúst.  Ferðin og orlofskostirnir verða auglýstir nánar í Fréttabréfi stéttarfélaganna sem kemur út síðar í mars. Frekari upplýsingar eru í boði á Skrifstofu stéttarfélaganna.  Stéttarfélögin hvetja félagsmenn til að ferðast innanlands í sumar og njóta þess að vera til.

 

Heimasíða Stéttarfélaganna í Þingeyjarsýslum, www.framsyn.is, opnaði fyrst formlega árið 2001. Frá þeim tíma hafa reglulega verið gerðar breytingar á síðunni. Hvað það varðar má geta þess að undanfarið hefur verið unnið að því að gera gagngerar breytingar á vefnum sem opnaði eftir breytingar í dag. Samið var við hugbúnaðarfyrirtækið AP Media um að framkvæma breytingarnar í samráði við starfsmenn stéttarfélaganna. Samstarfið gekk afar vel og er afraksturinn eftir því.

Á sínum tíma var gerð vefsins í höndum Arngríms Arnarsonar sem sá alfarið um alla forritun, uppsetningu og grafíska hönnun hans í samstarfi við starfsmenn stéttarfélaganna

Uppfærsla á vefnum verður í höndum starfsmanna stéttarfélaganna og munu þeir sjá um að bæta við upplýsingum til félagsmanna, fréttum og tilkynningum inn á vefinn með reglulegu millibili. Þannig mun vefur stéttarfélaganna í Þingeyjarsýslum verða áfram öflugur upplýsingamiðill til mikilla hagsbóta fyrir félagsmenn og aðra þá sem áhuga hafa á málefnum félaganna. Óhætt er að segja að góð heimasíða með helstu upplýsingum fyrir félagsmenn, auðveldi bæði félagsmönnum og starfsmönnum stéttarfélaganna lífið og spari þeim auk þess töluverða vinnu.

Þá er ánægjulegt til þess að vita að fjölmargir félagsmenn og gestir heimsækja síðuna daglega enda afar vinsæl. Allar ábendingar og athugasemdir varðandi vefinn eru vel þegnar og skulu þær sendar til Aðalsteins Árna netfangið kuti@framsyn.is sem jafnframt er ábyrgðarmaður vefsins.

 

Um ára­mót taka gildi ýms­ar skatta­breyt­ing­ar sem snerta bæði heim­ili og fyr­ir­tæki í land­inu. Fjár­málaráðuneytið fjall­ar um helstu efn­is­atriði breyt­ing­anna en nán­ari upp­lýs­ing­ar um ein­stak­ar breyt­ing­ar má finna í grein­ar­gerðum viðkom­andi laga­frum­varpa á vef Alþing­is.

Fram kem­ur í til­kynn­ingu frá ráðuneyt­inu, að um ára­mót­in muni nýtt viðmið um þróun þrepa- og skatt­leys­is­marka tekju­skatts ein­stak­linga taka gildi. Breyt­ing­in sé síðasti áfangi skatt­kerf­is­breyt­inga fyr­ir ein­stak­linga síðustu ár, þar sem tekju­skatt­ur hafi lækkað tals­vert – mest hjá tekju­lægri hóp­um.

„Þrepa- og skatt­leys­is­mörk munu þá þró­ast í takt við vísi­tölu neyslu­verðs að viðbættu mati á lang­tíma­fram­leiðni. Miðað verður við 1% fram­leiðni­vöxt á ári sem tekið verður til end­ur­skoðunar á fimm ára fresti, næst vegna staðgreiðslu­árs­ins 2027. Skatt­leys­is­mörk munu því hækka um­fram það sem þau gerðu þegar einnig verður tekið mið af fram­leiðniaukn­ingu. Sama viðmið verður hér eft­ir notað við upp­færslu skatt­leys­is- og þrepa­marka þannig að skatt­byrði mis­mun­andi tekju­hópa þró­ist ekki með ólík­um hætti til lengri tíma litið. Áður fylgdu þrepa­mörk efsta þreps­ins launa­vísi­tölu en skatt­leys­is­mörk fylgdu vísi­tölu neyslu­verðs. Mis­mik­il hækk­un skatt­leys­is- og þrepa­marka hef­ur leitt til þess að hlut­falls­leg skatt­byrði ein­stak­linga í neðri hluta tekju­dreif­ing­ar­inn­ar hef­ur hækkað meira en hjá ein­stak­ling­um í efri hluta tekju­dreif­ing­ar­inn­ar án þess að sér­stök ákvörðun liggi fyr­ir þar um. Sam­tals hækka viðmiðun­ar­fjár­hæðir tekju­skatts um 6,1%. Skatt­hlut­föll tekju­skatts til rík­is­ins verður óbreytt ásamt meðal­útsvari,“ seg­ir í til­kynn­ingu fjár­málaráðuneyt­is­ins. 

Barna­bæt­ur

Þríþætt­ar breyt­ing­ar á barna­bót­um eru boðaðar um ára­mót­in. Fjár­hæðir barna­bóta munu hækka á bil­inu 5,5% til 5,8%. Þá munu neðri skerðing­ar­mörk tekju­stofns barna­bóta hækka um 8,0% og efri skerðing­ar­mörk um 12%.

Trygg­inga­gjald

Í árs­byrj­un 2022 mun tíma­bund­in lækk­un á al­menna trygg­inga­gjald­inu, sem var hluti af aðgerðapakka stjórn­valda vegna efna­hags­áhrifa kór­ónu­veirunn­ar, renna sitt skeið á enda. Skatt­hlut­fall al­menns trygg­inga­gjalds mun því fara úr 4,65% í 4,9%. Trygg­inga­gjald í heild breyt­ist þannig úr 6,1% í 6,35%.

Erfðafjárskatt­ur

Skatt­frels­is­mark erfðafjárskatts tek­ur ár­legri breyt­ingu miðað við þróun vísi­tölu neyslu­verðs og hækk­ar úr 5.000.000 kr. í 5.255.000  árs­byrj­un 2022. Er það í sam­ræmi við samþykkt­ar breyt­ing­ar við af­greiðslu fjár­laga 2021 þar sem skatt­frels­is­markið var hækkað úr 1,5 m.kr. í 5 m.kr. og skyldi fram­veg­is taka ár­lega breyt­ingu miðað við þróun vísi­tölu neyslu­verðs. Skatt­hlut­fallið helst óbreytt.

Nán­ar hér. 

(Þessi frétt er tekin af mbl.is)

Forsvarsmenn Framsýnar komu við í verslun Samkaupa í Mývatnssveit rétt fyrir jólin. Þar voru þau Helgi Aðalsteinn, Helgi James Price og Malina Luca að störfum. Þau voru ánægð með lífið og tilveruna, enda mikið að gera í versluninni fyrir jólin og því ekki yfir neinu að kvarta.

Þess var krafist á aðalfundi Sjómannadeildar Framsýnar fyrir áramótin að þegar í stað verði gengið frá kjarasamningi fyrir sjómenn á hvalaskoðunarbátum. Ályktað var um málið.

Ályktun um áhugaleysi hvalaskoðunarfyrirtækja fyrir kjörum starfsmanna

Aðalfundur Sjómannadeildar Framsýnar stéttarfélags, haldinn 29. desember skorar á hvalaskoðunarfyrirtækin á Húsavík að klára samningagerð við félagið sem fyrst.

Framsýn hefur átt í viðræðum við Samtök atvinnulífsins um endurnýjun á samningi við fyrirtækin. Kjarasamningnum er ætlað að tryggja starfsmönnum á sjó ákveðin kjör fyrir þeirra störf og að þeir séu tryggðir með sambærilegum hætti og aðrir sjómenn sem gegna hliðstæðum störfum hjá öðrum hvalaskoðunarfyrirtækjum.  Annað er ólíðandi með öllu.

Aðalfundurinn telur það vera algjört virðingarleysi við starfsmenn hvalaskoðunarfyrirtækja að þeir séu samningslausir á sjó. Framsýn hefur ítrekað krafist þess að viðræðurnar yrðu kláraðar með samningi, en þrátt fyrir það hefur það ekki gengið eftir. Þess vegna ekki síst er mikilvægt að samningsaðilar setjist niður og klári viðræðurnar með samningi á næstu vikum.

Stéttarfélögin í Þingeyjarsýslum hafa samið við Sókn lögmannstofu á Egilsstöðum um að þjónusta félögin frá og með næstu áramótum. Lögfræðiþjónustan fellst í því að lögmannsstofan mun veita ráðgjöf til starfsmanna stéttarfélaganna í daglegum störfum þeirra er varða hagsmuni félagsmanna, kjarasamningsbundin réttindi, innheimtumál og slysamál og eftir atvikum á málum á öllum sviðum lögfræðinnar er starfsmenn stéttarfélaganna ákveða að vísa til lögfræðistofunnar. Sókn lögmannsstofa var stofnuð haustið 2010 af þremur lögmönnum, Hilmari Gunnlaugssyni, Jón Jónsson og Evu Dís Pálmadóttir. Áður höfðu þau starfað saman í lögmennsku um árabil. Öll hafa þau leyfi til málflutnings fyrir héraðsdómstólum, Landsrétti og Hæstarétti Íslands.  Hjá Sókn lögmannsstofu  er að finna breiða þekkingu á ýmsum sviðum lögfræðinnar. Framkvæmdastjóri Sóknar lögmannsstofu er Eva Dís Pálmadóttir sem jafnframt verður aðallögmaður stéttarfélaganna sem aðild eiga að Skrifstofu stéttarfélaganna á Húsavík. Það eru; Framsýn stéttarfélag, Starfsmannafélag Húsavíkur, Þingiðn félag iðnaðarmanna í Þingeyjarsýslum og Verkalýðsfélag Þórshafnar.