kuti

Stéttarfélögin sjá ástæðu til þess að minna á mikilvægi þess að koma í veg fyrir svarta atvinnustarfsemi og undirboð á atvinnumarkaði. Nú þegar stærstu framkvæmdir í sögu Norðurlands standa yfir og ferðaþjónustan vex mikið á milli ára hafa þessi skilaboð aldrei verið mikilvægari. Því miður ber enn á brotum sem þessum, sérstaklega varðandi erlenda sjálfboðaliða.

Verkefnið „Einn réttur – ekkert svindl” er haldið úti af Alþýðusambandi Íslands ásamt aðilarfélögum þess. Verkefnið beinist sérstaklega gegn fyrirtækjum sem misnota erlent vinnuafl og ungt fólk sem er að stíga sín fyrstu skref á vinnumarkaði. Við hvetjum alla til að kynna sér verkefnið og senda ábendingu ef grunur leikur á að ekki sé verið virða réttindi vinnandi fólks. Hægt er að senda ábendingu á framsyn@framsyn.is eða í síma 8646602.

Nú er stutt í að ljúki framkvæmdum við neðri hæð gamla sjúkrahússins á Húsavík. Áður var búið að taka húsið í gegn að utan og stóran hluta hússins að innan. Kjallarinn var þangið til í vetur óuppgerður. Nú er hinsvegar stutt í að framkvæmdir verið kláraðar í honum en hér eftir verður þar aðstaða fyrir starfsfólk Heilbrigðisstofnunnar Norðurlands á Húsavík.

Á dögunum fóru fulltrúar stéttarfélaganna í heimsókn upp á Þeistareyki. Þar voru framkvæmdir í fullum gangi og margt um manninn. Enn á þó eftir að fjölga starfsfólki á svæðinu mikið og mun það ná hápunkti í sumar.
Blíðskaparveður var á Þeistareykjum og afar bjart yfir. Þrátt fyrir það mátti hafa verulega efasemdir um að hitamælirinn á svæðinu væri að sýna réttar niðurstöður.

Stéttarfélögin munu standa fyrir reglulegum eftirlitsferðum á Þeistareyki á meðan framkvæmdum stendur.

Tímaskráningarappið Klukk er sniðugur valkostur fyrir þá sem vilja halda utan um vinnutíma sína með einföldum hætti. Það stuðlar að því að fá greitt rétt frá laungreiðanda. Launþegar geta skráð vinnu sína hjá fleiri en einum laungreiðanda ef þörf er á. Það er líka hægt að skrá vinnu á hjá fleiri en einum laungreiðanda á sama degi. Klukk hefur marga fleiri kosti.

Nánar er hægt að lesa um og nálgast Klukk hér.

Að venju standa stéttarfélögin í Þingeyjarsýslum fyrir veglegri hátíðardagskrá í Íþróttahöllinni á Húsavík 1. maí 2016 kl. 14:00 í tilefni af baráttudegi verkafólks. Ræðumaður dagsins verður Halldór Grönvold aðstoðarframkvæmdastjóri ASÍ. Dagskráin er í bland byggð upp á listamönnum úr héraðinu og landsþekktum skemmtikröftum.

Dagskráin er eftirfarandi:

• Ávarp: Aðalsteinn Árni Baldursson formaður Framsýnar, stéttarfélags

• Söngur: Karlakórinn Hreimur. Stjórnandi Steinþór Þráinsson. Undirleikari Steinunn Halldórsdóttir

• Hátíðarræða: Halldór Grönvold aðstoðarframkvæmdastjóri ASÍ

• Söngur og grín: Stefán Jakobsson ásamt Andra Ívarssyni flytja nokkur lög og grínast milli laga.

• Gamanmál: Gísli Einarsson sjónvarpsmaður og skemmtikraftur

• Söngur: Friðrik Ómar Hjörleifsson og Jógvan Hansen syngja nokkur þekkt dægurlög eins og þeim einum er lagið

Steingrímur Hallgrímsson spilar Internasjónalinn/alþjóðasöng verkalýðsins í upphafi samkomunnar og Jóna Matthíasdóttir stjórnar samkomunni með stæl.
Meðan á hátíðarhöldunum stendur verður gestum boðið upp á kaffi og meðlæti í boði stéttarfélaganna.

Þingeyingar og landsmenn allir, fjölmennum í höllina og drögum fána að hún á hátíðar- og baráttudegi verkafólks 1. maí 2016.

Framsýn, stéttarfélag
Starfsmannafélag Húsavíkur
Þingiðn, félag iðnaðarmanna

Bændablaðið sem gefið er út í 32.000 eintökum er án efa eitt vinsælasta blað landsins. Nýjasta blaðið kom út í vikunni. Í blaðinu er m.a. fjallað um aukna flugumferð um Húsavíkurflugvöll og að félagsmenn Framsýnar hafi sparað sér um 50 milljónir króna á samningi félagsins við Flugfélagið Erni frá árslokum 2013 þegar aðilar gerðu með sér samkomulag um afsláttarkjörin. Nánar má lesa fréttina í Bændablaðinu.

Samiðn, félag iðnfélaga hefur ákveðið að taka þátt í vinnustaðaeftirliti stéttarfélaganna í Þingeyjarsýslum sem aðild eiga að Skrifstofu stéttarfélaganna. Fyrir liggur að fjöldi iðnaðarmanna sérstaklega frá höfuðborgarsvæðinu og Eyjafjarðarsvæðinu eru og verða starfandi á stór Húsavíkursvæðinu meðan á framkvæmdunum stendur er tengjast uppbyggingunni á Bakka. Verkalýðsfélag Þórshafnar hafði áður óskað eftir aðkomu að eftirlitinu sem orðið var við að sjálfsögðu.

Stéttarfélögin halda uppi öflugu vinnustaðaeftirliti á félagssvæðinu

Eins og fram hefur komið í fréttum síðustu daga hallar verulega á kynjaskiptinguna í stjórn Samtaka atvinnulífsins. Stjórnina skipa sextán karlar en einungis fjórar konur. Auk þess er karl formaður stjórnar. Stjórnin var kjörin á aðalfundi samtakanna sem fram fór þann 7. apríl síðastliðinn. Konum í stjórninni fækkaði um eina milli ára. Þetta eru vissulega merkileg staðreynt í ljósi umræðunnar sem verið hefur um jafna kynjaskiptingu í stjórnum fyrirtækja á Íslandi, ekki síst á vegum Samtaka atvinnulífsins. Til fróðleiks má geta þess að í stjórn stéttarfélagsins Framsýnar eru þrír karlar og fjórar konur, jafnara getur það ekki orðið m.v. sjö manna stjórn.

Jafnrétti er virt hjá Framsýn í stjórnunarstörfum og öðru starfi félagsins. Það sama verður ekki sagt um Samtök atvinnulífsins þar sem konur eru ekki vinsælar í æðstu embættum samtakanna. Það er algjör misskilingur að konur geti ekki stjórnað eða unnið til verðlauna líkt og karlar eins og meðfylgjandi mynd staðfestir og tekin var á landsmóti á Húsavík fyrir nokkrum árum.

Miðstjórn Alþýðusambands Íslands fundar á Húsavík í maí, nánar tiltekið dagana 18.-19. maí. Fundurinn verður í húsnæði stéttarfélaganna á Húsavík. Auk þess að funda um málefni sambandsins verður miðstjórnarmönnum boðið upp á kynnisferð um stór Húsavíkursvæðið með áherslu á að skoða framkvæmdirnar sem tengjast uppbyggingu PCC á Bakka.

Aðalfundur Atvinnuþróunarfélags Þingeyinga var haldinn í dag í Skúlagarði. Auk venjulegra aðalfundarstarfa stóð Atvinnuþróunarfélagið fyrir málþingi um jarðhitaauðlindir við Öxarfjörð og fjölnýtingu jarðhita sem tókst með miklum ágætum. Frá árinu 2002 hefur verið hefð fyrir því að veita hvatningarverðlaun á aðalfundi félagsins. Markmiðið með verðlaununum er að hvetja einstaklinga, fyrirtæki og stofnanir í héraðinu til nýsköpunar og árangurs í rekstri með því að verðlauna það sem vel er gert á þessu sviði. Í dag var komið að því að veita Sælusápum viðurkenningu fyrir frumkvöðlastarf og vandaða uppbyggingu framleiðslufyrirtækis sem eykur verðmæti hráefna af svæðinu. Fyrirtækið Sælusápur – Lón 2 ehf var stofnað á vordögum 2008 af Guðríði Baldvinsdóttur og eiginmanni hennar Einari Ófeigi Björnssyni. Guðríður hefur stundað sápugerð til heimanota um nokkurra ára skeið og langaði að kynna handgerðar sápur fyrir fleiri en vinum og ættingjum. Hún tók því þátt í Vaxtarsprotum á vegum Impru-nýsköpunarmiðstöðvar og Framleiðnisjóðs landbúnaðarins og stofnaði Sælusápur- Lón 2 ehf í kjölfarið. Það er staðsett við heimili hennar í Lóni í Kelduhverfi.

Stofnandinn, Guðríður (Gugga ) er sauðfjárbóndi og skógfræðingur í Lóni í Kelduhverfi. Hún og eiginmaður hennar, Einar Ófeigur Björnsson, búa með á fimmta hundrað fjár í Lóni. Í Lóni er einnig æðarvarp, skóg- og skjólbeltarækt ásamt ýmiskonar verktakavinnu. Hér er hún með Reinhard framkvæmdastjóra og Sif stjórnarformanni Atvinnuþróunarfélags Þingeyinga.

Ársfundur Lsj. Stapa verður haldinn miðvikudaginn 4. maí nk. í Menningarhúsinu Hofi á Akureyri og hefst kl. 14:00. Framsýn, stéttarfélag á rétt á 11 fulltrúum á fundinn. Hafir þú áhuga fyrir því að vera fulltrúi félagsins á fundinum er þér velkomið að hafa samband við formann Framsýnar á Skrifstofu stéttarfélaganna fyrir 20. apríl. Skilyrði er að viðkomandi félagsmaður sé greiðandi til Lsj. Stapa.
Þá er rétt að taka fram að ársfundurinn er opinn öllum sjóðfélögum með málfrelsi og tillögurétti.

Þann 7. apríl var stjórnarfundur hjá Framsýn. 13 mál voru á dagskrá og eins og oftast áður talsverðar umræður á fundinum.
Meðal annars greindi Aðalsteinn Á. frá samskiptum við verktaka á svæðinu frá því að framkvæmdir hófust á Bakka og Þeistareykjum. Þau hafa að mestu gengið vel og ágæt bjartsýni á að áframhald verði á því, enda virkt eftirlit í gangi af hálfu stéttarfélaganna. Nýr starfsmaður, Aðalsteinn J. Halldórsson hefur hafið störf við vinnustaðaeftirlit og mun hann verða í miklum samskiptum við vertaka á svæðinu á komandi mánuðum.
Undirbúingur fyrir 1. maí hátíðarhöldin er í fullum gangi en reiknað er með því að hátíðin verði með svipuðu sniði og venjulega. Endanleg dagskrá er ekki fullmótuð en búist er við því að hún verði orðin ljós á næstu dögum.
Fram undan eru aðalfundir félaga sem Framsýn mun sækja. 11. apríl verður aðalfundur Atvinnuþróunarfélags Þingeyinga í Skúlagarði og mun Framsýn senda fulltrúa þangað. Framsýn mun áfram eiga fulltrúar í stjórn Atvinnuþróunarfélagsins. Framundan er sömuleiðis aðalfundur Lífeyrissjóðsins Stapa, en hann verður haldin 4. maí. Framsýn á rétt á 11 fulltrúum á fundinn.
Aðalfundur Framsýnar er fyrirhugaður seinni hluta maí. Nánari tímasetning verður auglýst síðar.
Ennfremur kom fram að Framsýn hefði áhuga á að koma að lausn þess íbúðarvanda sem blasir við á Húsavík. Dæmi eru um að fólk sé að flytja burt af svæðinu vegna húsnæðisskorts sem er auðvitað óásættanlegt. Ýmsar leiðir eru ræddar af hálfu hins opinbera sem og einkaaðila til lausnar á vandamálinu og er Framsýn tilbúið til að koma að þeim viðræðum.

Það er mikið fundað á vegum stéttarfélaganna um þessar mundir, flestir fundirnir tengjast framkvæmdunum á stór Húsavíkursvæðinu. Í morgun kom fulltrúi frá LNS Saga til fundar við forsvarsmenn Framsýnar til að ræða stöðu framkvæmda á Bakka við byggingu verksmiðjunnar. Í kjölfarið kom síðan annar góður fulltrúi frá Jarðborunum til að ræða boranir fyrirtækisins á Þeistareykjum. Boraðar verða sjö til tíu holur á svæðinu á næstu tveimur árum og koma tveir öflugir borir að verkinu sem hefst eftir nokkrar vikur. Fyrirtækið reiknar með að um 30 starfsmenn komi að verkinu. Að sjálfsögðu fóru fundirnir vel fram enda mikil vilji hjá aðilum að eiga gott samstarf varðandi uppbygginguna á svæðinu.

Fulltrúar stéttarfélaganna heimsóttu Fosshótel Húsavík á dögunum og skoðuðu framkvæmdir við viðbyggingu hótelsins. Framkvæmdir hafa staðið yfir í um eitt og hálft ár. Óhætt er að segja að um mikla breytingu sé að ræða. Framkvæmdin mun auk þess hafa í för með sér talsvert aukna þjónustu fyrir svæðið þar sem aðstaða til ráðstefnu- og fundarhalda verður fyrsta flokks eftir að breytingum er lokið. Ólafur Sæmundsson er byggingarstjóri verksins en hann kynnti framkvæmdirnar fyrir hönd verktakans. Ólafur segir að stefnt sé að opnun hótelsins um eða eftir miðjan maí.

Ekki er laust við að sérstakt hafi verið að labba um þessa byggingu, sérstaklega þann hluta hússins sem eldri er, svo sem gamla borðsalinn sem nú er gjörbreyttur og að sjálfsögðu „Rauða torgið″ sem fáir munu kannast við í núverandi mynd. Þá var hægt að upplifa útsýni frá sjónarhorni sem jafnvel rótgrónustu Húsavíkingar munu ekki kannast við.

Starfsgreinasamband Íslands sem Framsýn á aðild að boðar til fundar í byrjun sumars þar sem ungu fólki innan hreyfingarinnar verður gefið færi á að hittast, fræðast og skemmta sér saman í þeim tilgangi að efla ungt fólk félagslega.

Staðsetning: Fundurinn verður haldinn í húsnæði Verkalýðsfélags Grindavíkur að Víkurbraut 46. Búið er að panta gistingu fyrir hópinn að Geo Hotel Grindavík, Víkurbraut 58.
Tímasetning: Fundurinn er haldinn dagana 1. og 2. júní. Dagskráin hefst með hádegisverði kl. 12 miðvikudaginn 1. júní. Fundi unga fólksins lýkur formlega klukkan 12 fimmtudaginn 2. júní en þá verður boðið uppá hádegismat með formönnum og varaformönnum aðildarfélaga SGS og síðan er óskað eftir því að fulltrúar úr hópi unga fólksins kynni afrakstur fundarins í upphafi formannafundar SGS sem hefst kl. 13:30.
Fulltrúar á fundinum: Hvert aðildarfélag má senda tvo fulltrúa, einn af hvoru kyni, 30 ára eða yngri.
Kostnaður: Kostnaður við ferðir og uppihald er greitt af hverju félagi fyrir sig en Starfsgreinasambandið kostar fyrirlesara og kvöldmat.
Tilgangur og markmið: Tilgangurinn er að ungt fólk kynnist hvert öðru og hreyfingunni betur, njóti þess að vera saman og verði áhugasöm um áframhaldandi starf innan hreyfingarinnar. Ef vel gengur verður leikurinn endurtekinn.
Dagskrá: Dagskráin verður sambland af kynningu á hverjum þátttakanda, námskeið í samningatækni, fundasköpum, að koma sér á framfæri og hvernig hægt er að hafa áhrif innan hreyfingarinnar. Þá er gert ráð fyrir að fundurinn komi sér saman um skilaboð til forystu SGS um áherslur ungs fólks.
Fulltrúar Framsýnar: Framsýn mun senda tvo fullrúa á fundinn og greiða vinnutap og allan kostnað sem fulltrúar félagsins verða fyrir er tengist fundinum. Áhugasamir eru beðnir um að hafa samband við Skrifstofu stéttarfélaganna hafi þeir áhuga fyrir því að vera fulltrúar Framsýnar á fundinum. Hægt er að senda skilaboð á kuti@framsyn.is

Benedikt Jóhannesson, tryggingastærðfræðingur tók saman ávinning af starfsemi VIRK fyrir árið 2015. Í ljós kom að tæplega 14 milljarða ávinningur var af starfseminni árið 2015. Þetta er enn meiri ávinningur en var af starfseminni árin á undan. Nánar má lesa um úttekt Benedikts hér.

Ágúst Óskarsson starfar fyrir VIRK starfsendurhæfingarsjóð á Húsavík.

Aðalsteinn Á. og Aðalsteinn J. áttu fund með pólskum starfsmönnum LNS Saga á Bakka föstudaginn 1. apríl. Agnieszka Szczodrowska sá um að túlka fyrir hópinn. Margt var rætt á fundinum og almenn ánægja með þessa heimsókn.
Vinnubúðir, vinnuaðstaða og mötuneyti eru að taka á sig mynd og fyrr en varir verður uppbyggingin kominn á fullt skrið. Heimsóknir eins og þessar munu verða farnar reglulega á meðan á uppbyggingarferlinu stendur.

Eðvarð var búinn að vera í basli undanfarna daga á flestum vígstöðum. Heima fyrir var hann að klára páskana með tilheyrandi kjöt- og sykurneyslu. Jenever lagerinn hans var tómur en þetta niðurlenska undrameðal var stundum það eina sem hélt honum gangandi. Hvað reksturinn varðar gekk hótelið ekki sem skyldi. Spjátrungurinn sem hann réð til að sjá um tölvumálin sagði að það væri út af slæmum umsögnum á vef sem nefndist „Trip Advisor“. Eðvarð hafði margsagt honum að laga það hið snarasta, hann væri jú einu sinni tölvusérfræðingurinn, Eðvarð sæi um reksturinn og hann kæmi tölvumálum ekkert við. Eðvarð vissi að flestir útlendingar koma bara einu sinni á ævinni í hreppinn til hans og þá væri auðvitað lag að ná sem mestu úr þeim. En nú var internetið komið í stríð við hann. „Farið til fjandans, tölvunirðir þessa heims“, hugsaði Eðvarð á meðan hann setti hangikjötssalatið á mjólkurkexið. Vandamálin í félagslífinu voru þó stærst. Eðvarð var endanlega orðinn að athlægi í Rótarý. Stress-niðurgangurinn um páskana hafði að hluta skýrst af ótta Eðvarðs við lista sem einhverjir kommúnistar hótuðu nú að birta um eignir Íslendinga á breskum paradísareyjum karabíska hafsins. Jakkafataklæddi maðurinn, hjá ráðgjafarfyrirtækinu með erlendu skammstöfuninni, hafði lýst fyrir honum einhverri „hókus-pókus leið“ sem átti að þýða að Eðvarð þyrfti ekki að borga skatt af þessum litla hluta reksturs síns sem ekki tilheyri hinu dásamlega svarta hagkerfi. Miðað við það sem Eðvarð hafði borgað jakkafataklædda manninum dró hann þá ályktun að í þjónustunni hlyti að hafa falist a.m.k. þrjár hringferðir með peningana hans um hnöttinn. Annað
kom þó heldur betur á daginn! Á fyrsta fundi eftir páska var Eðvarð hafður að háði og spotti enda eini meðlimurinn í hreppnum sem var ekki á listanum. Félagar hans hlógu framan í hann og þökkuðu honum fyrir vegina, spítalana og ellilífeyrinn. Eðvarð bar að sjálfsögðu fyrir sig ráðgjöf jakkafatamannsins. Hann hafi öfugt við flesta aðra í raun talið að peningarnir væru í karabíska hafinu en nú vissi hann ekkert hvar þeir voru niðurkomnir. Og það sem verra var að jakkafataklæddi maðurinn hjá fyrirtækinu með erlendu skammstöfunina svaraði ekki í símann.

Tuttugu og tvö stéttarfélög um allt land á almenna markaðnum og hjá hinu opinbera hafa skorað á heilbrigðisráðherra að löggilda starfsheitið félagsliði, þar á meðal stéttarfélagið Framsýn. Félagsliðar hafa barist fyrir því að verða löggilt heilbrigðisstétt um árabil en lítið hefur gengið. Löggilding félagsliða er ekki bara mikilvæg fyrir framgang stéttarinnar heldur ekki síst fyrir gæði þjónustu við þann vaxandi hóp sem þarf á aðstoð að halda. Fulltrúar félagsliða gengu á fund heilbrigðisráðherra í nóvember síðastliðnum til að tala fyrir löggildingu en engar fréttir hafa borist af framgangi málsins. Á fræðsludegi félagsliða sem haldinn var nýverið er ljóst að krafan um löggildingu er sterk innan stéttarinnar enda ólíðandi að félagsliðar sitji ekki við saman borð og sambærilegar stéttir. Framsýn átti tvo öfluga fulltrúa á fundinun, þær Ósk Helgadóttir og Kristbjörgu Sigurðardóttir.
Áskorunina má sjá hér.

Starfsfólk skrifstofu stéttarfélaganna tók þátt í 1. apríl eins og þorri þjóðarinnar. Eins og sjá má í fyrri frétt var ókeypis páskaeggjum lofað fyrir gesti skrifstofunnar í dag, vegna breyttra reglna um meðferð afgangs páskaeggja. Nokkrir féllu fyrir gabbinu en urðu að snúa tómhentir heim. Starfsfólk skrifstofunnar vilja koma á framfæri þökkum til þeirra sem tóku þátt.