Stéttarfélögin, Framsýn, Þingiðn, Verkalýðsfélag Þórshafnar og Starfsmannafélag Húsavíkur hafa ákveðið að bjóða félagsmönnum upp á sama góða verðið á flugmiðum á vegum félaganna milli Húsavíkur og Reykjavíkur með flugfélaginu Erni á árinu 2018. Verðið verður áfram kr. 8.900,- per flugferð.

Á síðasta ári seldu félögin um 4000 flugmiða til félagsmanna en í heildina er ekki ólíklegt að um 20 þúsund farþegar hafi farið um flugvöllinn á árinu 2017. Staðfestar tölur liggja ekki fyrir.

Ljóst er að þetta er ein besta kjarabót sem félögin geta boðið upp á enda hafa fjölmargir félagsmenn lýst yfir mikilli ánægju sinni  með framtak félaganna að bjóða þeim upp á ódýrt flug milli Húsavíkur og Reykjavíkur. „Þetta eru aukin lífsgæði eins og einn eldi félagsmaður orðaði það, nú get ég farið suður og heimsótt börn og barnabörn án þess að það kosti augun úr.“

Félagsmenn Framsýnar geta farið jákvæðir inn í nýtt ár þar sem ákveðið hefur verið að hækka verulega námsstyrki til félagsmanna.

Um er að ræða breytingar á hámarki einstaklingsstyrkja sem taka gildi hjá öllum sjóðunum fjórum, Landsmennt, Sveitamennt, Ríkismennt og Sjómennt sem Framsýn á aðild að fyrir sína félagsmenn.

Hámarksgreiðsla á ári fer úr kr. 75.000,- fyrir almennt nám í kr. 100.000,-

Þriggja ára uppsafnaður styrkur hækkar úr kr. 225.000,- í kr. 300.000,- fyrir eitt samfellt nám

Hámarksstyrkur vegna námskeiða sem falla undir frístunda/tómstundanámskeið munu hækka í kr. 30.000,- á ári og dregst jafnframt af heildarupphæð einstaklingsstyrks þess árs

Þá er athygli vakin á því að sérstakur styrkur vegna meiraprófs fellur undir almenna einstaklingsstyrki og verður því áfram kr. 100.000.-

ATH: Um er að ræða breytingar sem taka gildi f.o.m. 1. janúar 2018 og þá gagnvart því námi sem hefst frá og með þeim tíma.

Aðrar reglur verða óbreyttar og gilda samhliða fyrrgreindum breytingum.

Aðalfundur Sjómannadeildar Framsýnar var haldinn í gær og var vel sóttur. Að venju urðu líflegar umræður um málefni sjómanna ekki síst kjaramál. Fram kom á fundinum að sjómenn eru mjög óánægðir með síðasta kjarasamning Sjómannasambands Íslands og Samtaka fyrirtækja í sjávarútvegi. Eða eins og einn fundarmaðurinn orðaði það „kjarasamningurinn er ömurlegur“. Jafnframt urðu umræður um félagsaðild að sjómannafélögum og verkfallsbætur. Menn lýstu yfir ánægju sinni með sterkan verkfallssjóð Framsýnar sem hefði komið sér vel fyrir sjómenn innan félagsins í verkfallinu í byrjun árs sem fengu um 12 milljónir úr sjóðnum meðan dæmi væru um að félög innan Sjómannasambandsins hefðu átt í erfiðleikum með að greiða sjómönnum út verkfallsbætur í 10 vikna verkfalli sjómanna. Mikilvægt væri að félögin huguðu að því að byggja upp sterka verkfallssjóði innan félaganna.

Ljóst er að sjómenn innan Framsýnar eru ekki sérstaklega ánægðir með núverandi lífeyrissjóðakerfi og kom fram hörð gagnrýni á kerfið og hvernig sjóðirnir hafa verið ávaxtaðir á undanförnum árum. Mikilvægt væri að fækka lífeyrissjóðum með sameiningum og þá ættu sjóðsfélagar að hafa meira val um í hvaða lífeyrissjóði þeir greiddu. Fundurinn samþykkti að senda frá sér svohljóðandi ályktun:

„Aðalfundur Sjómannadeildar Framsýnar telur mikilvægt að fækka lífeyrissjóðum með hagsmuni  sjóðsfélaga að leiðarljósi. Núverandi fyrirkomulag er allt of dýrt að mati sjómanna innan Framsýnar og kallar á frekari hagræðingu. Þá telur fundurinn að auka eigi frelsi sjómanna til að velja sér lífeyrissjóð.„

Á fundinum var einnig gengið frá kjöri á stjórn deildarinnar en hún var endurkjörin, hana skipa fyrir næsta starfsár:

Jakob Gunnar Hjaltalín formaður

Heiðar Valur Hafliðason varaformaður

Björn Viðar ritari

Kristján Hjaltalín meðstjórnandi

Reynir Hilmarsson meðstjórnandi

Formaður og varaformaður deildarinnar voru ánægðir með fundinn sem var mjög vel sóttur. Þetta eru þeir Jakob Gunnar Hjaltalín formaður og Heiðar Valur Hafliðason varaformaður.

Ofurhetjurnar, Brynjar og Hilmar þungt hugsi á fundinum.

Björn Viðar, Heiðar og Gunnar Sævars hafa skoðanir á flestum hlutum, ekki síst málefnum sjómanna.

Skýrsla stjórnar tekin til umræðu sem er hér meðfylgjandi.

Ársskýrsla stjórnar Sjómannadeildar Framsýnar

 Ágætu sjómenn!

Ég vil fyrir  hönd stjórnar Sjómannadeildar Framsýnar bjóða ykkur velkomna til fundarins um leið og ég óska sjómönnum og fjölskyldum þeirra gleðilegrar hátíðar og farsældar á komandi ári.

Fjöldi sjómanna í deildinni:

Alls eru 88 sjómenn skráðir í deildina í árslok 2017, það eru starfandi sjómenn og þeir sjómenn sem hætt hafa sjómennsku vegna aldurs eða örorku.  Af þessum 88 sjómönnum greiddu 74 sjómenn félagsgjald til félagsins á árinu sem er að líða.

Stjórnarmenn og fundir:

Stjórn deildarinnar var þannig skipuð á síðasta starfsári: Jakob G. Hjaltalín formaður, Heiðar Valur Hafliðason varaformaður, Björn Viðar ritari, Reynir Hilmarsson og Kristján Hjaltalín meðstjórnendur.

Stjórnin hélt einn formlegan stjórnarfund á árinu auk þess sem stjórnarmenn voru í símasambandi þegar á þurfti að halda. Formaður deildarinnar situr í stjórn Framsýnar sem fundar reglulega. Þar hefur hann fylgt eftir málefnum sjómanna og átt gott samstarf við stjórn og starfsmenn Framsýnar.

 

Deildin stóð fyrir tveimur félagsfundum með sjómönnum annars vegar 20 janúar og hins vegar 18. febrúar. Báðir fundirnir tengdust verkfalli sjómanna sem stóð fram í febrúar 2017.

Sjómannadeild Framsýnar og reyndar aðalstjórn félagsins kom jafnframt að ýmsum málum er varða sjómenn á starfsárinu. Formaður deildarinnar hefur einnig sótt fundi á vegum Sjómannasambandsins á hverjum tíma. Í haust var haldinn formannafundur SSÍ á Siglufirði þar sem málefni sjómanna voru til umræðu.

Heiðrun sjómanna og sjómannadagurinn:

Sjómannadeildin heiðraði tvo sjómenn á Sjómannadaginn á Húsavík. Árið 2017 voru sjómennirnir Viðar Sigurðsson og Ingvar Hólmgeirsson heiðraðir. Athöfnin fór fram á veitingastaðnum Naustinu og tókst að venju mjög vel.

Sjómannadeildin kom að því að styrkja hátíðarhöld sjómannadagsins á Húsavík og á Raufarhöfn með fjárstuðningi auk þess að standa fyrir sumarkaffi á Raufarhöfn á föstudeginum fyrir sjómannadaginn. Deildin hefur gert það í nokkur ár, en kaffiboðið hefur notið mikilla vinsælda meðal bæjarbúa og gesta sem átt hafa leið um Raufarhöfn.

 

Kjaramál:

Sjómenn fóru inn í nýtt ár í kjaradeilu við útgerðarmenn. Áður höfðu samtök sjómanna gengið frá kjarasamningi við SFS sem var felldur af sjómönnum, það er í lok árs 2016.

Svo fór að lokum að skrifað var undir nýjan kjarasamning 18. febrúar 2017. Atkvæðagreiðsla um kjarasamninginn hófst á vegum Sjómannadeildar Framsýnar kl. 17:00 laugardaginn 18. febrúar og lauk kl. 17:00 sunnudaginn 19. febrúar. Strax í kjölfarið var talið á Skrifstofu stéttarfélaganna þar sem ekki tókst að koma kjörgögnum suður í tæka tíð en talið var sameiginlega meðal aðildarfélaga Sjómannasambandsins sem áttu aðild að samningnum hjá Ríkissáttasemjara. Lögreglan á Húsavík var fengin til að telja. Viðstaddir talninguna voru: Ingvar Berg Dagbjartsson varðstjóri og Guðmundur Helgi Bjarnason lögregluþjónn hjá embætti Lögreglustjórans á Norðurlandi eystra og Aðalsteinn Árni Baldursson formaður Framsýnar.

Á kjörskrá voru 31 félagsmaður í Sjómannadeild Framsýnar. Alls greiddu 21 atkvæði eða 68% þeirra sem voru á kjörskrá. Niðurstöðunni var komið til Ríkissáttasemjara strax um kvöldið, þann 19. febrúar með rafrænum hætti. Þar sem um sameiginlega atkvæðagreiðslu var um að ræða meðal aðildarfélaga Sjómannasambandsins liggur ekki fyrir hvernig sjómenn í Sjómannadeild Framsýnar greiddu atkvæði.

Svo fór að kjarasamningur Sjómannasambands Íslands og Samtaka fyrirtækja í sjávarútvegi var samþykktur með naumum meirihluta eftir 10 vikna verkfall. Á landsvísu var samningurinn samþykktur með ríflega 52% atkvæða.

Þá ber að geta að enn er ósamið er við Landssamband smábátaeigenda vegna sjómanna á smábátum.  Ekki er að sjá að samið verði í bráð þar sem töluvert ber í milli í þeim viðræðum.

Verkfallsbætur

Meðan á verkfalli sjómanna stóð greiddi Vinnudeilusjóður Framsýnar sjómönnum rúmlega 12 milljónir króna í verkfallsbætur til 32 tveggja sjómanna innan félagsins. Sjóðurinn er fjármagnaður m.a. með hlutfalli af félagsgjöldum sjómanna. Sjóðurinn kom að góðum notum fyrir sjómenn í verkfallinu og gerði félaginu kleift að greiða hærri verkfallsbætur en önnur sjómannafélög treystu sér til að gera. Dæmi eru um að félög sjómanna standi afar illa fjárhagslega eftir verkfallið sem er mikið áhyggjuefni.

 Fræðslumál:

Sjómannadeildin minnir sjómenn reglulega á Sjómennt. Sjómennt er fræðslusjóður sjómanna og útgerðarfyrirtækja. Markmið sjóðsins er að treysta stöðu sjómanna á vinnumarkaði með því að gefa þeim kost á að efla og endurnýja þekkingu sína og gera þá hæfari til að takast á við ný og breytt verkefni. Helstu verkefni Sjómenntar eru m.a. að styrkja starfstengt nám og námskeið fyrir sjómenn. Það er von okkar að þessi sjóður verði vel nýttur jafnt af útgerðarfyrirtækjum sem og sjómönnum sjálfum. Þá er rétt að taka fram að Fræðslusjóður Framsýnar hefur auk þess komið að því að styðja við bakið á sjómönnum í kostnaðarsömu námi. Þeir sem vilja fræðast frekar um úthlutunarreglur sjóðina er bent á að hafa samband við Skrifstofu stéttarfélaganna sem veitir frekari upplýsingar.

Skrifstofa stéttarfélaganna:

Rekstur skrifstofu stéttarfélaganna gekk vel á síðasta starfsári. Í dag starfa 6 starfsmenn á skrifstofunni í fullu starfi, reyndar er einn af þeim í 90% starfi  og einn starfsmaður er í hlutastarfi við almenn þrif og ræstingar. Til viðbótar eru þrír starfsmenn í 0,4% stöðugildum við umsjón á orlofsíbúðum/húsum sem eru í eigu félagsins og við þjónustu við félagsmenn Framsýnar á Raufarhöfn. Af þeim 6 starfsmönnum sem starfa á skrifstofunni er einn kostaður af VIRK starfsendurhæfingarsjóði og einn að hluta af öðrum stéttarfélögum/samböndum og verkkaupum er tengist framkvæmdunum á Bakka og Þeistareykjum. En eins og kunnugt er réð Framsýn sérstakan starfsmann í vinnustaðaeftirlit á árinu 2016 sem kostaður er að hluta af Landsvirkjun, Landsneti, Rafiðnaðarsambandi Íslands, VM og Samiðn þar sem þessir aðilar eiga mikið undir því að framkvæmdirnar gangi vel á svæðinu. Fjárhagslegur stuðningur þessara aðila við rekstur á eftirlitsfulltrúanum er að renna út um þessar mundir. Framtíð hans hjá stéttarfélögunum er til skoðunar.

Öflugt starf og upplýsingamál:

Almennt hefur starfsemi Framsýnar gengið vel á árinu, starfið hefur verið öflugt á flestum sviðum enda mikið lagt upp úr því að tryggja félagsmönnum góða þjónustu og aðgengi að öflugum sjóðum s.s. sjúkra- og starfsmenntasjóðum. Þá undirritaði félagið á dögunum nýjan samning við Flugfélagið Erni sem tryggir félagsmönnum áframhaldandi afsláttarkjör á flugi milli Húsavíkur og Reykjavíkur á árinu 2018. Verðið verður áfram kr. 8.900,- per flugferð.

Hér  að framan hefur verið gerð grein fyrir helstu störfum deildarinnar á umliðnu starfsári. Það er von stjórnar að þið séuð nokkuð vísari um starfsemi hennar á því starfsári sem hér er til umræðu. Einnig er ástæða til að minna á heimasíðu stéttarfélaganna framsyn.is sem er mjög virk og flytur reglulega fréttir af starfsemi félagsins svo ekki sé talað um Fréttabréf stéttarfélaganna sem gefið er út á hverju ári.

Í lokin vil ég þakka sjómönnum, meðstjórnendum og starfsmönnum Framsýnar fyrir samstarfið á liðnu ári sem verið hefur með miklum ágætum.

Jakob Gunnar Hjaltalín

 

 

 

Aðalfundur Sjómannadeildar Framsýnar verður haldinn í dag klukkan 17:00.

Dagskrá:

1. Venjuleg aðalfundarstörf
2. Önnur mál

Undanfarin tvö ár hefur verið unnið að því að gera við húsnæði stéttarfélagana  á Húsavík en húsnæðið var komið á verulegt viðhald. Búið er að mála húsið gera við loftinntök  við þak og nú fyrir jólin hafa iðnaðarmenn unnið að því að gera við þak á sólstofu sem hefur ekki haldið vatni. Þá stendur til að skipta um járn á öllu þakinu næsta sumar enda komið á mikið viðhald og nánast ónýtt. Eftir að þeim framkvæmdum lýkur verður húsnæðið orðið eins og nýtt. Á myndinni eru Jónmundur Aðalsteinsson og Vigfús Þór Leifsson við störf en þeir starfa hjá Norðurvík.

Framsýn boðar til fundar með framleiðslustarfsmönnum og öðrum starfsmönnum PCC sem greiða til félagsins mánudaginn 8. janúar kl. 15:00 til 16:00, það er á vinnutíma starfsmanna. Fundurinn verður haldinn í fundarsal stéttarfélaganna að Garðarsbraut 26 á Húsavík.

Tilefni fundarins er að kjósa tvo trúnaðarmenn úr hópi starfsmanna auk þess að fara almennt yfir málefni starfsmanna er viðkemur kjörum og réttindum starfsmanna.

Fundurinn er haldinn í samráði við stjórnendur PCC Bakki Silicon.

 

Framsýn, stéttarfélag

Þingiðn og Rafiðnaðarsamband Íslands boða til fundar með rafvirkjum og vélvirkjum og öðrum þeim sem greiða til þessara stéttarfélaga föstudaginn 12. janúar kl. 15:00 til 16:00, það er á vinnutíma starfsmanna. Fundurinn verður haldinn í fundarsal stéttarfélaganna að Garðarsbraut 26 á Húsavík.

Tilefni fundarins er að kjósa tvo trúnaðarmenn úr hópi starfsmanna, það er einn fyrir rafvirkja og annan fyrir vélvirkja. Auk þess verður almennt farið yfir málefni starfsmanna er viðkemur kjörum og réttindum starfsmanna.

Fundurinn er haldinn í samráði við stjórnendur PCC Bakki Silicon.

Þingiðn, félag iðnaðarmanna

Rafiðnaðarsamband Íslands

 

Í gær afhendi Minningarsjóður Aðalsteins Árna Baldurssonar björgunarsveitinni Garðari á Húsavík að gjöf kr. 641.913,- til eflingar á sjóbjörgunardeild sveitarinnar.

Minningarsjóðurinn var stofnaður árið 1963 í kjölfar þess að vélbáturinn Maí TH 194 fórst í línuróðri við Mánareyjar 21. október 1959.   Með Maí fórust tveir sjómenn, þeir Kristján Stefán Jónsson og Aðalsteinn Árni Baldursson. Þess má geta að í kjölfar slyssins var Björgunarsveitin Garðar stofnuð.

Frá afhendingu gjafarinnar, Leifur Vilhelm Baldursson og Eiður Árnason stjórnarmenn í minningarsjóðnum og Birgir Mikaelsson, Fanney Óskarsdóttir og Vilhjálmur Pálsson frá Björgunarsveitinni Garðari.

Nú í hádeginu komu fjölskyldur starfsmanna Skrifstofu stéttarfélaganna í heimsókn og borðuðu með þeim hangikjöt og meðlæti af bestu gerð. Stundin var afar ánægjuleg. Skrifstofan lokar síðan kl. 16:00 í dag um leið og starfsmenn halda heim á leið í jólafrí.

Stjórn Þingiðnar kom saman til fundar í gær sem var um leið síðasti fundur ársins. Mörg mál voru á dagskrá fundarins. Gengið var á kjöri fulltrúa félagsins í sambandsstjórn Samiðnar, samþykkt var að styrkja starfsemi Blakdeildar Völsungs og þá var aðgerðaráætlun um einelti og kynbundið ofbeldi tekin til umræðu. Jafnframt urðu umræður um samningamál við PCC á Bakka, komandi aðalfund og viðbrögð Laganefndar ASÍ við breytingum á lögum félagsins sem samþykktar voru á síðasta aðalfundi. Síðast en ekki síst, þá tók stjórnin ákvörðun um að leggja fyrir næsta aðalfund félagsins tillögu um að stofnaður verði fræðslusjóður innan þess sem hafi það markmið að styðja við bakið á félagsmönnum sem stunda nám eða sækja námskeið. Stjórn Þingiðnar er vel skipuð mönnum innan félagsins, þeim Jónasi formanni, Vigfúsi, Þórði, Kidda og Hólmgeiri.

Samkomulag um launaþróunartryggingu til starfsmanna ríkis var undirritað í fjármála- og efnahagsráðuneytinu í morgun. Laun félagsmanna í aðildarfélögum ASÍ sem starfa hjá ríkinu munu hækka um að meðaltali 1,6 prósent vegna samkomulagsins og laun félaga í BSRB sem starfa hjá ríkinu um 1,3 prósent. Launaþróunartryggingin er afturvirk og gildir frá 1. janúar 2017.
Samkomulagið sem undirritað var í dag er gert í kjölfar rammasamkomulags aðila vinnumarkaðarins frá október 2015. Aðild að samkomulaginu eiga íslenska ríkið, Samband íslenskra sveitarfélaga, Reykjavíkurborg, Alþýðusamband Íslands, BSRB og Samtök atvinnulífsins.
Í rammasamkomulaginu er kveðið á um að launaþróun þeirra sem starfa hjá ríki og sveitarfélögum verði ekki lakari en á almennum vinnumarkaði. Með því er ætlunin að tryggja að laun opinberra starfsmanna sitji ekki eftir í almennri launaþróun.
Horft er til þróunar launa á almenna markaðinum annars vegar og hjá þeim félagmönnum sem starfa hjá ríkinu hins vegar á tímabilinu nóvember 2013 til nóvember 2016. Eins og fram kemur í rammasamkomulaginu verður launaþróunin mæld áfram og leiðrétt vegna áranna 2017 og 2018, ef tilefni er til, þegar þær tölur liggja fyrir.
Laun félagsmanna ASÍ og BSRB sem starfa hjá sveitarfélögum hafa hækkað meira en laun á almenna markaðinum á tímabilinu og hækka því ekki að þessu sinni. Launaþróun þessara hópa verður mæld áfram og borin saman við launaþróun á almennum vinnumarkaði út gildistíma rammasamkomulagsins í árslok 2018.
Alþýðusambandið telur þetta samkomulag mikilvægt gagnvart félagsmönnum sínum hjá ríki og sveitarfélögum til að tryggja að launaþróun þeirra verði ekki lakari en á almennum vinnumarkaði. ASÍ telur jafnframt að það skjóti skökku við að á sama tíma og ríkið semur við fulltrúa tekjulægstu starfsmanna sinna um 1,6% launaþróunartryggingu til að mæta mun á launaþróun á almennum og opinberum vinnumarkaði skuli kjararáð ítrekað úrskurða um hækkanir sem nema tugum prósentna til hæst launuðu starfsmanna ríkisins. Það er miður að ákvæði rammasamkomulagsins nái ekki til úrskurða kjararáðs og undirstrikar það enn frekar það óréttlæti sem viðgengst gagnvart þessum félögum okkar sem starfa hjá ríkinu og öðru launafólki.

On Monday 12th of January there will be a meeting held for members of Þingiðn and Rafiðnaðarsamband Íslands, working in PCC Bakki. The meeting is between 15:00 and 16:00, that is during employees working hours. The meeting is at the Unions office, Garðarsbraut 26 in Húsavík.

The meetings agenda is the election of two shop stewards from the ranks of the employees. One for mechanics and one for electricians. Also to review in general terms the rights and salary of the employees.

The meeting is held in consultation with PCC Bakki supervisors.

Þingiðn, the craftsmen union

Rafiðnaðarsamband Íslands, the electricians union

Starfsgreinasamband Íslands stóð fyrir samlestri á kjarasamningum í Reykjavík á dögunum. Til fundarins voru boðaðir formenn og starfsmenn stéttarfélaga enda mikilvægt að þessi hópur sé með eina skýra línu er varðar túlkun kjarasamninga og þær breytingar sem þarf að gera á innihaldi kjarasamninganna svo forðast megi mistúlkanir. Fulltrúar frá Framsýn og Verkalýðsfélagi Akraness sátu saman á borði á fundinum, hér má sjá Jónínu Hermanns og Lindu Baldurs með Vilhjálmi Birgissyni formanni VA. Það fór vel á með þeim á fundinum eins og sjá má á myndinni.

 

Góð mæting var á fund Starfsgreinasambands Íslands. Tilefni fundarins var að lesa sameiginlega yfir kjarasamninga sem sambandið er með við Samtök atvinnulífsins.

On Monday 8th of January there will be a meeting held for Framsýn members working in PCC Bakki. The meeting is between 15:00 and 16:00, that is during employees working hours. The meeting is at The Unions office, Garðarsbraut 26 in Húsavík.

The meetings agenda is the election of two shop stewards from the ranks of the employees. Also to review in general terms the rights and salary of the employees.

The meeting is held in consultation with PCC Bakki supervisors.

Framsýn labour union

 

Af og til fáum við fyrirspurnir um fæðingarorlof hingað til okkar á Skrifstofu stéttarfélaganna. Það á sérstaklega við ef um einhverskonar undantekningar er að ræða eins og ef meðganga er erfið og verðandi móðir neyðist til þess að hætta að vinna fyrr en áætlað er. Í slíkum tilfellum er möguleiki á að fá greiðslur úr fæðingarorlofssjóði fyrir fæðingu. Um þessi tilfelli segir á heimasíðu Fæðingarorlofssjóðs:

„Sé þungaðri konu nauðsynlegt af heilsufarsástæðum að mati sérfræðilæknis að leggja niður launuð störf eða hætta þátttöku á vinnumarkaði skv. b-lið 2. mgr. 13. gr. a. (þungaðar konur sem eru að fá greiddar atvinnuleysisbætur) meira en mánuði fyrir áætlaðan fæðingardag barns skal hún eiga rétt á greiðslum í fæðingarorlofi þann tíma en þó aldrei lengur en tvo mánuði. Beri fæðingu að fyrir áætlaðan fæðingardag barns fellur heimild til lengingar niður frá þeim tíma og hefst þá hið eiginlega fæðingarorlof. Með umsókn um lengingu fæðingarorlofs þarf að fylgja læknisvottorð sérfræðilæknis sem rökstyðja skal þörf fyrir framlengingu og staðfesting vinnuveitanda og/eða Vinnumálastofnunar, eftir því sem við á, þar sem fram kemur hvenær umsækjandi hætti störfum, hvenær launagreiðslur féllu niður og hvenær veikindaréttur var fullnýttur‟.

Fyrir helgina var haldinn síðasti stjórnarfundurinn á árinu í Fræðslusjóðnum Landsmennt sem Framsýn á aðild að líkt og 15 önnur stéttarfélög innan Starfsgreinasambands Íslands. Stjórnarformaður sjóðsins er Aðalsteinn Árni Baldursson.  Á fundinum var m.a. samþykkt að gera breytingar á styrkjum til félagsmanna sjóðsins, það er til hækkunar, frá og með næstu áramótum. Það er afar gleðilegt að sterk staða sjóðsins skuli leiða til þess að auka réttindi félagsmanna varðandi endurgreiðslur vegna náms- eða námskeiða sem þeir sækja. Heimasíða stéttarfélaganna mun fjalla sérstaklega um breytingarnar þegar búið verður að útfæra þær frekar.  Í stjórn sjóðsins eru sex fulltrúar, þrír frá aðildarfélögum Starfsgreinasambandsins sem aðild eiga að sjóðnum og þrír frá Samtökum atvinnulífsins. Guðrún Eyjólfsdóttir sem setið hefur í stjórn sjóðsins undanfarin ár lét af störfum á fundinum eftir farsælt og gott starf fyrir sjóðinn. Í hennar stað kemur Bergþóra Halldórsdóttir lögfræðingur hjá Samtökum atvinnulífsins.  Um leið og Guðrúnu eru þökkuð vel unnin störf í þágu Landsmenntar er Bergþóra boðin velkomin til starfa í stjórn sjóðsins.

 

 

Tvær magnaðar, Kristín Njálsdóttir hefur verið forstöðumaður Fræðslusjóðsins Landsmenntar  frá stofnun hans árið 2000. Með henni er sú frábæra kona ,Guðrún Eyjólfsdóttir,  sem hætti í stjórn sjóðsins í síðustu viku eftir farsælt starf.

Framsýn og Starfsmannafélag Húsavíkur hafa gengið frá nýjum stofnanasamningum við Framhaldsskólanna á Laugum. Samningurinn var undirritaður í vikunni og nær til félagsmanna þessara tveggja félaga.

Stjórn og trúnaðarráð Framsýnar auk starfsmanna félagsins, trúnaðarmanna á vinnustöðum og stjórna deilda innan félagsins komu saman til fundar á föstudaginn. Auk venjulegra fundarstarfa var boðið upp á heimatilbúin skemmtiatriði og kvöldhressingu frá Fosshótel Húsavík. Fundurinn fór vel fram og var mikið hlegið þegar leið á kvöldið enda gaman saman, sérstaklega þegar félagsmenn Framsýnar eiga í hlut. Sjá myndir frá fundinum:

Innan Framsýnar hefur verið unnið að því síðustu vikurnar að ljúka vinnu við gerð aðgerðaráætlunar gegn einelti og kynbundnu áreiti. Áætlunin nær til starfsmanna  Framsýnar og allra þeirra sem starfa á vegum félagsins að málefnum sem heyra undir starfsemi Framsýnar. Að vinnunni hafa komið fjölmargir, það er stjórn félagsins, trúnaðarráð, trúnaðarmenn á vinnustöðum og starfsmenn stéttarfélaganna. Fyrirmyndin sem unnið hefur verið eftir er skjal sem Starfsgreinasamband Íslands vann um þetta mikilvæga mál. Sambandið ætlast til þess að stéttarfélögin innan sambandsins sem eru 19 taki upp þessa áætlun sem Framsýn hefur nú samþykkt að gera, það var gert á vinnufundi síðasta föstudag. Aðgerðaráætlunin er meðfylgjandi þessari frétt en verður í framhaldinu aðgengileg á heimasíðu stéttarfélaganna:

Aðgerðaráætlun gegn einelti og kynbundnu áreiti

Stefna 

Öllum einstaklingum sem starfa hjá Framsýn, stéttarfélagi eða taka
með öðrum hætti þátt í starfi þess skal tryggt öruggt umhverfi og virðing. Í
því felst að þurfa ekki að þola einelti eða annars konar ofbeldi. Ábyrgð á öryggi
starfsfólks og þátttakenda í starfinu, aðgerðaráætlun og viðbrögð við málum
er á ábyrgð stjórnenda Framsýnar, stéttarfélags.

Skilgreining á einelti og kynbundnu ofbeldi 

Einelti er síendurtekin hegðun sem almennt er til þess fallin að valda vanlíðan
hjá þeim sem fyrir henni verður, svo sem að gera lítið úr, móðga, særa eða ógna viðkomandi eða að valda honum ótta. Skoðanaágreiningur eða ágreiningur vegna ólíkra hagsmuna fellur ekki hér undir.

Kynbundin áreitni er hegðun sem tengist kyni þess sem fyrir henni verður, er í óþökk viðkomandi og hefur þann tilgang eða þau áhrif að misbjóða virðingu viðkomandi og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi fyrir viðkomandi.

Kynferðisleg áreitni er hvers kyns kynferðisleg hegðun sem er í óþökk þess sem fyrir henni verður og hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, táknræn og/eða líkamleg.

Í þessari aðgerðaráætlun er kynbundin áreitni og kynferðisleg áreitni nefnt einu nafni kynbundið ofbeldi.

Samþykkt á fundi stjórnar og trúnaðarráðs 8. desember 2017.

Einelti:

Birtingamyndir eineltis

Einelti er niðurlægjandi og særandi. Það getur bæði falist í því sem gert er og því sem látið

er ógert. Einelti getur tekið á sig ýmsar myndir t.d:

• Að starf, hæfni og verk starfsmanns/þátttakanda í starfi eru lítilsvirt.
• Að draga að ástæðulausu úr ábyrgð og verkefnum.
• Að gefa ekki nauðsynlegar upplýsingar.
• Særandi athugasemdir.
• Rógur eða útilokun frá félagslegum samskiptum.
• Árásir á starfsmann/þátttakanda í starfi eða gagnrýni á einkalíf hans.
• Að skamma starfsmann/þátttakanda í starfi eða gera hann að athlægi.
• Líkamlegar árásir eða hótanir um slíkt.
• Fjandskapur eða þögn þegar spurt er eða fitjað upp á samtali.
• Móðgandi símtöl.
• Lítilsvirðandi texti í tölvupósti eða öðrum skriflegum sendingum.
• Óþægileg stríðni.
• Niðurlæging eða auðmýking, t.d. vegna aldurs, kynferðis eða þjóðernis.
• Þöggun.

Ef þú verður fyrir einelti 

• Segðu einhverjum sem þú treystir frá reynslunni.
• Skráðu niður atburðarrásina, tímasetningar, hugsanleg vitni, hvað var sagt og gert, hvernig þú brást við og hver upplifun þín var.
• Hafðu samband við formann Framsýnar, trúnaðarmann félagsins á Skrifstofu stéttarfélaganna eða varaformann Framsýnar allt eftir því hvað þér líður best með og greindu frá því sem gerðist. Sé framkvæmdastjóri félagsins annar en formaður Framsýnar er einnig hægt að tilkynna einelti til hans.
• Gerðu grein fyrir því hvernig þú óskar eftir því að brugðist verði við.

Ef þú verður vitni að einelti 

• Ef þú treystir þér til; talaðu við gerandann eða gerendurna og láttu þá vita að þér finnist hegðun hans/þeirra vera einelti eða óviðeigandi.
• Segðu formanni Framsýnar, trúnaðarmanni félagsins á Skrifstofu stéttarfélaganna eða varaformanni Framsýnar frá því. Sé framkvæmdastjóri félagsins annar en formaður Framsýnar er einnig hægt að tilkynna einelti til hans.
• Trúnaðarmanni sem fær upplýsingar um einelti ber að tilkynna það til formanns Framsýnar eða framkvæmdastjóra félagsins sé hann annar en formaður félagsins.Velji hann að gera það ekki getur hann vísað málinu til stjórnar Framsýnar, stéttarfélags. 

Trúnaðarmanni, formanni Framsýnar eða varaformanni ber að: 

• Tala einslega og í trúnaði við þann sem hefur orðið fyrir einelti, viðkomandi þarf að hafa fulla stjórn á því hvernig framhaldið verður.
• Meta stöðuna í samráði við þolandann, hversu alvarlegt er eineltið, er ástæða til að kalla til ráðgjafa úr hópi samstarfsmanna/félaga sem viðkomandi treystir eða fagaðila sem Framsýn, stéttarfélag hefur tryggt sér aðgang að.
• Gera gerandanum/gerendunum grein fyrir því að um einelti sé að ræða og breyttrar hegðunar sé krafist.
• Ef gerandi og þolandi sættast á það má kalla þau saman í ráðgjöf, helst með fagaðila, og ákvarða hvernig samskiptum verður háttað í framhaldinu.
• Til að koma í veg fyrir slúður og slæman starfsanda ber að bjóða upp á samtal við félaga sem eru í návígi við geranda og þolanda og setja þau inn í málin. Eins og aðrar aðgerðir ber að gera þetta í samráði við þolanda.

Kynbundið ofbeldi: 

Birtingamyndir kynbundins ofbeldis 

Kynbundið ofbeldi getur birst sem óvelkomið áreiti, andlegt ofbeldi eða hreinlega líkamlegt ofbeldi. Upplifun þess sem fyrir ofbeldi verður getur verið mjög misjöfn og er hún mælikvarðinn á alvarleika ofbeldisins.

Kynbundið ofbeldi einkennist oft af misnotkun á valdi eða stöðu, andlegri kúgun og að sjálfsvirðingu sé misboðið, framkomu sem ætlað er að knýja einstaklinga til undirgefni og gera lítið úr þeim, endurtekinni áreitni og niðurlægingu fyrir þann sem fyrir áreitninni verður og hefur neikvæð áhrif á andlega og líkamlega heilsu hans.

Kynbundið ofbeldi getur tekið á sig ýmsar myndir t.d: 

• Dónalegum bröndurum og kynferðislegum athugasemdum í máli, myndum eða skriflegum athugasemdum.
• Óviðeigandi spurningum um kynferðisleg málefni.
• Snertingu sem ekki er óskað eftir.
• Endurteknum beiðnum um kynferðislegt samband sem mæta áhugaleysi eða er hafnað.
• Hótun um nauðgun.
• Nauðgun.

Ef þú verður fyrir áreiti eða ofbeldi 

• Mótmæltu og gefðu skýr skilaboð um að hegðunin sé óæskileg
• Ef þú átt erfitt með að mótmæla hegðuninni munnlega þá má skrifa bréf. Skráðu niður hvað gerðist og hver upplifun þín var.
• Skráðu niður atburðarrásina, tímasetningar, hugsanleg vitni, hvað var sagt og gert, hvernig þú brást við og hver upplifun þín var.
• Ræddu málið við fólk sem þú treystir, mögulega hafa fleiri sömu reynslu eða hafa lent í svipuðum aðstæðum.
• Hafðu samband við formann Framsýnar, trúnaðarmann félagsins á Skrifstofu stéttarfélaganna eða varaformann Framsýnar allt eftir því hvað þér líður best með og greindu frá því sem gerðist. Sé framkvæmdastjóri félagsins annar en formaður Framsýnar er einnig hægt að tilkynna áreiti eða ofbeldi til hans.

Trúnaðarmanni, yfirmanni á staðnum eða formanni Framsýnar ber að: 

• Tala einslega og í trúnaði við þann sem hefur orðið fyrir áreiti eða ofbeldi, viðkomandi þarf að hafa fulla stjórn á því hvernig framhaldið verður.
• Afla gagna um málsatvik, smáskilaboð, tölvupóstar og vitnisburður annarra o.fl..
• Meta stöðuna í samráði við þolandann, hversu alvarlegt var atvikið og er ástæða til að kalla til ráðgjafa frá fagaðila eða Framsýn.
• Tala við gerandann og fá hans útgáfu af því sem gerðist.
• Ef gerandi og þolandi sættast á það má kalla þau saman í ráðgjöf, helst með fagaðila og ákvarða hvernig samskiptum verður háttað í framhaldinu.
• Til að koma í veg fyrir slúður og slæman starfsanda ber að bjóða upp á samtal við félaga sem eru í návígi við geranda og þolanda og setja þau inn í málin. Eins og aðrar aðgerðir ber að gera þetta í samráði við þolanda.
• Ef um alvarlegt ofbeldi er að ræða ber að styðja þolandann í að leggja fram kæru.
• Gera öllu starfsfólki/félögum grein fyrir því að kynbundið ofbeldi, áreitni og kynferðisleg áreitni er ekki liðin á vinnustaðnum/í félaginu.
• Gera öllu starfsfólki grein fyrir aðgerðaáætluninni og birta hana á vef félagsins.

 

Fjölmargir hafa komið að því að ganga frá aðgerðaráætlun Framsýnar gegn einelti og kynbundnu einelti sem samþykkt var á fundi félagsins síðasta föstudag.

 

 

Þegar stjórnarmyndunarviðræðurnar stóðu yfir milli Framsóknar, Sjálfstæðisflokksins og VG kom stjórn Framsýnar skoðunum félagsins á framfæri við formenn flokkanna með netpósti og bað þá að taka tillit til mikilvægra réttindamála verkafólks og stöðu þeirra á íslenskum vinnumarkaði. Einnig var komið inn á mikilvægi þess að halda landinu öllu í byggð ekki síst með öflugri heilbrigðisþjónustu og fjölbreyttu atvinnulífi.
Félagið fylgdi þessum áherslum eftir með ályktunum og auglýsingum í fjölmiðlum fyrir kosningarnar. Þar voru nokkur atriði áréttuð s.s. afnám verðtryggingar, mikilvægi keðjuábyrgðar, efling framhaldsskóla, umhverfismál, vegmál, ljósleiðaravæðing, lækkun tekjuskatts hjá þeim tekjulægstu, hækkun á frítekjumarki atvinnutekna aldraðra og síðast enn ekki síst að tekið yrði á þeim mikla dvalar- og ferðakostnaði sem fólk verður fyrir sem þarf að leita sér læknis- eða sérfræðiþjónustu fjarri heimabyggð.
Þegar stjórnarsáttmálinn er skoðaður er ekki annað að sjá en að stjórnarflokkarnir hafi tekið ábendingum Framsýnar vel og komið þeim fyrir í sáttmálanum sem er til fyrirmyndar.
Í sáttmálanum eru sett fram markmið um velferð, mannréttindi og loftslagsmál, eflingu Alþingis og aukið þverpólitískt samráð, stórsókn í uppbyggingu á innviðum um allt land og eflingu heilbrigðis- og menntakerfa. Um 100 aðgerðir og áherslumál er að finna í sáttmálanum í þágu þessara markmiða og annarra verkefna.
Framsýn mun að sjálfsögðu fylgja því eftir að ríkistjórnin standi við stjórnarsáttmálann er viðkemur ekki síst velferð og málefnum verkafólks í landinu.
Áherslur og aðgerðir í stjórnarsáttmálanum eru meðal annars þessar og snerta skoðanir Framsýnar:

• Gerð verður úttekt á kjörum tekjulægstu hópanna í íslensku samfélagi, tillögur til úrbóta settar fram og þeim fylgt eftir.

• Unnið verður með aðilum vinnumarkaðarins að ábyrgum vinnumarkaði. Innleidd verða ákvæði um keðjuábyrgð í ólíkum atvinnugreinum, unnið gegn kynbundnum launamun, félagslegum undirboðum, mansali og kennitöluflakki og vinnueftirlit eflt.

• Frítekjumark atvinnutekna aldraðra verður hækkað í hundrað þúsund krónur strax um næstu áramót. Gjaldskrá vegna tannlækninga aldraðra og örorkulífeyrisþega verður uppfærð til að lækka kostnað þessara hópa. Samráð verður haft við heildarsamtök örorkulífeyrisþega um umbætur á almannatryggingakerfinu í þeirra þágu.

• Markviss skref verða tekin á kjörtímabilinu til afnáms verðtryggingar á lánum og samhliða hugað að mótvægisaðgerðum í þágu ungs fólks og tekjulágra.

• Lögð verður áhersla á ábyrg ríkisfjármál og efnahagslegan stöðugleika. Til að styðja við farsæla niðurstöðu kjarasamninga hyggst ríkisstjórnin leggja áherslu á lækkun tekjuskatts í neðra skattþrepi. Þá er það einnig forgangsmál á kjörtímabilinu að lækka tryggingagjald.

• Heilbrigðiskerfið á að standast samanburð við það sem best gerist í heiminum og allir landsmenn eiga að fá notið góðrar þjónustu, óháð efnahag og búsetu. Átak verður gert í uppbyggingu hjúkrunarrýma, heilbrigðisstefna fyrir Ísland fullunnin, dregið úr greiðsluþátttöku sjúklinga og geðheilbrigðisáætlun hrint í framkvæmd.

• Hafin verður stórsókn í menntamálum. Stefnt verður að því að fjármögnun háskólastigsins nái meðaltali OECD-ríkjanna fyrir árið 2020. Iðnnám og verk- og starfsnám verður eflt. Framhaldsskólum verður tryggt fjármagn og frelsi til eigin stefnumótunar innan ramma framhaldsskólalaganna. Brugðist verður við yfirvofandi kennaraskorti í samstarfi við sveitarfélögin.

• Uppbyggingu í vegamálum verður hraðað, bæði nýframkvæmdum og viðhaldi. Ljósleiðaravæðingu landsins verður lokið 2020, afhendingaröryggi raforku aukið og átak gert í fráveitumálum í samstarfi við sveitarfélög. Sóknaráætlanir landshlutanna verða styrktar.

• Stuðlað verður að bættu aðgengi landsmanna að öruggu húsnæði með eflingu stuðningskerfa, samræmdri stefnumörkun í uppbyggingu félagslegs húsnæðis og auknu gagnsæi á leigumarkaði. Þröskuldur ungs fólks og tekjulágra inn á húsnæðismarkaðinn verður lækkaður. Skoðaðir verða möguleikar á að nýta lífeyrissparnað til þessa.

• Ísland á að vera leiðandi í framleiðslu á heilnæmum landbúnaðarafurðum. Lögð verður áhersla á nýsköpun og vöruþróun í landbúnaði til að stuðla að byggðafestu, auka verðmætasköpun og nýta tækifæri sem felast í áhuga á matarmenningu með sjálfbærni og gæði að leiðarljósi. Innleiddir verða sérstakir aðlögunarsamningar um nýja starfsemi til sveita.

• Tryggja þarf samkeppnishæfni sjávarútvegs, leggja þarf áfram áherslu á sjálfbæra auðlindanýtingu og efla hafrannsóknir. Veiðigjald á að tryggja þjóðinni réttlátan hlut í arðinum af auðlindinni ásamt því að endurspegla afkomu greinarinnar. Fiskeldi er vaxandi atvinnugrein sem felur í sér tækifæri til atvinnuuppbyggingar en þarf að byggja upp með ýtrustu varúð í samræmi við ráðgjöf vísindamanna.

Smelltu hér til að lesa stjórnarsáttmálann í heild sinni