Leikfélag Húsavíkur mun fljótlega hefja sýningar á leikritinu Sjóræningjaprinsessunni. Stéttarfélögin niðurgreiða leikhúsmiðana fyrir félagsmenn. Forsendan fyrir því er að félagsmenn hafi samband við Skrifstofu Stéttarfélaganna áður en þeir fara í leikhúsið og fái afsláttarmiða hjá félögunum. Hér má fræðast betur um leikritið.
Stéttarfélögin í Þingeyjarsýslum standa fyrir tveggja daga trúnaðarmannanámskeiði í næstu viku, það er fimmtudag og föstudag. Námskeiðið er haldið í samstarfi við Félagsmálaskóla alþýðu. Mjög góð þátttaka er á námskeiðið en um 25 trúnaðarmenn eru skráðir á námskeiðið.
Forsendur kjarasamninga eru brostnar að mati ASÍ en samkvæmt ákvæði í samningunum koma þeir til endurskoðunar fyrir lok þessa mánaðar.
Það er mat ASÍ, að óbreyttu, að forsendur um að launastefna kjarasamninganna hafi verið stefnumarkandi hafi ekki gengið eftir. Því er heimild til uppsagnar þeirra fyrir lok febrúar enn í gildi.
Vegna þessarar stöðu hefur miðstjórn ASÍ ákveðið að boða til formannafundar aðildarfélaga ASÍ miðvikudaginn 28. febrúar þar sem farið verður yfir málið og ákvörðun tekin um viðbrögð verkalýðshreyfingarinnar.
Þess má geta að Framsýn hafði áður ályktað um málið og sagt forsendur kjarasamninga vera brostnar. Með yfirlýsingu miðstjórnar ASÍ er tekið undir skoðanir félagsins.
Leikdeild Eflingar sýnir leikritið Stöngin inn eftir Guðmund Ólafsson. Leikstjóri er Vala Fannel og tónlistarstjóri Jaan Alavere. Verkið er gamansöngleikur með ABBAtónlist. Það gerist í litlu sjávarþorpi þar sem konur bæjarins ákveða að setja eiginmenn sína í kynlífsbann nema þeir hætti að horfa á enska boltann og við fylgjumst með afleiðingum þess. Stéttarfélögin niðurgreiða leikhúsmiðana fyrir félagsmenn. Forsendan fyrir því er að félagsmenn hafi samband við Skrifsofu Stéttarfélaganna áður en þeir fara í leikhúsið og fái afsláttarmiða hjá félögunum.
Sýningaplan
Frumsýning – föstudagur 23. febrúar kl. 20:30
Dalakofinn verður með leikhúsmatseðil fyrir hópa (lágmark 6 manns) lambasteik, kaffi og kaka í eftirrétt á 3900.- Einnig bíður Dalakofinn 15% afslátt af matseðli fyrir leikhúsgesti.
Að venju verður Kvenfélag Reykdæla með kaffi- og vöfflusölu á sýningum.
Miðapantanir eru í síma 618-3945 eða á leikdeild@leikdeild.is
Formaður Framsýnar, Aðalsteinn Árni Baldursson, var í viðtali í útvarpsfréttum Bylgjunnar í hádeginu þann 15. febrúar síðastliðinn.
Umræðuefnið voru núgildandi kjarasamningar og hvort skuli segja þeim um núna í febrúar eins og heimild er fyrir. Deildar meiningar eru innan verkalýðshreyfingarinnar í landinu hvort segja skuli upp samningunum. Stjórn og trúnaðarráð Framsýnar áliktaði um málið nú í vikunni og var eining um að segja upp samningunum eins og lesa má um hér.
Að ofan má sjá forsíðu héraðsfréttablaðsins Skarps en þar er einmitt fjallað um þessi mál.
Hlusta má á viðtalið á vefsíðu Bylgjunnar.
Laun þeirra ríkisstarfsmanna sem eru í aðildarfélögum Starfsgreinasambands Íslands fá nú í fyrsta sinn svokallaða launaskriðstryggingu sem gefur að meðaltali 1,8% hækkun á laun afturvirkt frá 1. janúar 2017.
Nánar má lesa um málið á heimasíðu Starfsgreinasambands Íslands.
Einnig munu laun félagsmanna Starfsmannafélags Húsavíkur hækka um 1,3% afturvirkt á sama tímabili eins og lesa má um á heimasíðu BSRB.
Eins og venja er komu uppáklædd börn og sungu fyrir starfsfólk Skrifstofu stéttarfélaganna á öskudaginn núna í vikunni. Miðað við veittar veitingar voru þetta í kringum 200 börn sem komu. Við leyfum myndunum að tala sínu máli.
Það lá við að borg væri á hafi úti í morgun þegar fólk var á leið til vinnu. Óvenjulega margri bátar og skip eru á Skjálfanda þennan daginn. Ljósmyndari framsyn.is gerði sitt besta til að ná góðum myndum af ljósunum í flóanum.
Þau sjást ekki nærri öll á myndunum. Hér fylgir því mynd af vefnum marinetraffic.com sem sýnir vel fjöldann. 
Kjörnefnd Framsýnar kom saman til fundar í dag kl. 13:30. Tilefni fundarins var að telja atkvæði úr atkvæðagreiðslu starfsmanna Jarðborana og fyrirtækisins sem starfa eftir samkomulagi aðila um störf pallmanna/öryggisfulltrúa,karmanna/mastursmanna/ aðstoðarborara og vaktformanna. Samkomulagið var undirritað 11. janúar 2018.
Framsýn tók að sér að sjá um atkvæðagreiðsluna. Viðhöfð var póstatkvæðagreiðsla. Samtals voru 45 starfsmenn Jarðborana á kjörskrá. Atkvæði greiddu 25 eða 56% þeirra sem voru á kjörskrá.
Já sögðu 16 starfsmenn (73% hlutfall af gildum atkvæðum)
Nei sögðu 6 starfsmenn (27% hlutfall af gildum atkvæðum)
Ógild atkvæði voru 3 þar sem starfsmenn skráðu ekki nafn sitt á umslagið með atkvæðaseðlinum.
Samkomulagið sem byggir á ákvæðum 5. kafla í kjarasamningi Samtaka atvinnulífsins og Starfsgreinasambands Íslands skoðast því samþykkt.
Atkvæði talin, María Jónsdóttir og Jóna Matthíasdóttir ásamt formanni Framsýnar, Aðalsteini Árna Baldurssyni skipa kjörnefnd félagsins. Þau sáu um að telja atkvæðin í dag.
Stjórn og trúnaðarráð Framsýnar kom saman til fundar í vikunni. Á fundinum var samþykkt að álykta um stöðuna á vinnumarkaði. Framsýn kallar eftir uppsögn samninga verði ekki orðið við kröfum verkalýðshreyfingarinnar um leiðréttingu launa og að ríkisstjórnin komi til móts við áherslur hreyfingarinnar í velferðarmálum, sjá ályktun:
„Stjórn og trúnaðarráð Framsýnar stéttarfélags hvetur verkalýðshreyfinguna til að nýta sér ákvæði í kjarasamningum aðildarfélaga Alþýðusambands Íslands og Samtaka atvinnulífsins með því að segja upp gildandi kjarasamningum í febrúar.
Það er ef Samtök atvinnulífsins fallast ekki á að leiðrétta forsendubrest og þá misskiptingu sem endurspeglast í launahækkunum til annarra hópa launafólks umfram félagsmenn ASÍ. Svo ekki sé talað um góðvild Kjararáðs í garð embættismanna og þjóðkjörinna alþingismanna sem reglulega úrskurðar þeim ofur starfskjör sem vart eiga sér hliðstæðu á íslenskum vinnumarkaði.
Á sama tíma þykir sjálfsagt að auka skattbyrði á látekjufólki umfram þá sem þiggja hærri laun. Þetta er að sjálfsögðu ekki í lagi og kallar á leiðréttingu þegar í stað. Samhliða skattkerfisbreytingum þarf að huga að félagslegum úrbótum eins og húsnæðismálum, aðgengi fólks að heilbrigðisþjónustu, keðjuábyrgð, lengingu fæðingarorlofs og atvinnuleysisbótum sem eru í sögulegu lágmarki. Grunnbætur atvinnuleysistrygginga nema nú um 76% af lágmarkslaunum sem er vafasamur minnisvarði fyrir núverandi ríkistjórn.
Það vekur sérstaka athygli að á meðan staða Atvinnuleysistryggingasjóðs er með miklum ágætum skuli atvinnuleysisbótum vera haldið markvist niðri af ráðamönnum þjóðarinnar. Atvinnuleysistryggingasjóður sem er fjármagnaður að mestu leiti í gegnum tryggingagjald skilaði nokkrum milljörðum í hagnað árið 2017. Í stað þess að nýtta stöðuna til að hækka atvinnuleysisbæturnar eins og eðlilegt hlýtur að teljast rann hagnaðurinn í ríkisjóð í lok árs. Vinnubrögð sem þessi eru ólíðandi, samkvæmt 33. grein laga nr. 54/2006 um atvinnuleysisbætur skulu fjárhæðir atvinnuleysisbóta endurskoðaðar árlega með tilliti til þróunar launa, verðlags og efnahagsmála.
Framsýn stéttarfélag telur að vaxandi misskipting í samfélaginu sé mein sem þurfi að uppræta þegar í stað. Að mati félagsins hefur verkafólk sýnt alltof mikla biðlund en nú sé komið að síðustu stoppistöð. Laun verða að duga fyrir framfærslu, annað er ekki í boði árið 2018.“
Stjórn og trúnaðarráð Framsýnar kom saman til fundar í gær og gekk frá tillögum um félagsmenn í stjórnir, ráð og nefndir á vegum félagsins fyrir næsta kjörtímabil sem eru tvö ár. Áður hafði Kjörnefnd félagsins komið með tillögu um félagsmenn í þessar stöður sem kynntar voru á fundinum. Eftir umræður um tillögur Kjörnefndar var samþykkt að leggja þær fram nánast óbreyttar og auglýsa þær á heimasíðu félagsins, Fréttabréfi stéttarfélaganna og Skarpi.
AÐALSTJÓRN: Vinnustaður:
Aðalsteinn Árni Baldursson Formaður Skrifstofa stéttarfélaganna
Ósk Helgadóttir Varaformaður Þingeyjarsveit – Stórutjarnaskóli
Jóna Matthíasdóttir Ritari M+W Germany,útibú á Íslandi
Jakob G. Hjaltalín Gjaldkeri ÚA – Þurkun
Sigurveig Arnardóttir Meðstjórnandi Hvammur, heimili aldraðra
Svava Árnadóttir Meðstjórnandi Norðurþing – Raufarhöfn
Torfi Aðalsteinsson Meðstjórnandi Jarðboranir hf.
VARASTJÓRN:
Aðalsteinn Gíslason Fiskeldið Haukamýri
Agnes Einarsdóttir Hótel Laxá ehf.
María Jónsdóttir Fatahreinsun Húsavíkur sf.
Þórir Stefánsson Vegagerðin
Gunnþórunn Þórgrímsdóttir Norðurþing – Leiksk.Grænuvellir
Börkur Kjartansson HB Grandi
TRÚNAÐARRÁÐ:
Þráinn Þráinsson Víkurraf
Brynjar Smárason Rifós
Ölver Þráinsson Norðlenska
Valgeir Páll Guðmundsson Sjóvá Almennar
Magnea D. Arnardóttir Norðurþing – Borgarhólsskóli Read more „Auglýsing um kjör í stjórnir, ráð og nefndir á vegum Framsýnar kjörtímabilið 2018-2020 „
Þrátt fyrir að atvinnuástand hafi verið einkar gott að undanförnu í sögulegu samhengi þá er það yfirleitt ekki svo að ekki séu til skráningar á atvinnuleysisskrá.
Hér á starfssvæði Framsýnar, Þingiðnar, Starfsmannafélags Húsavíkur auk Verkalýðsfélags Þórshafnar voru 88 skráðir atvinnulausir í lok árs 2017. Þar af voru 34 í Langanesbyggð, 35 í Norðurþingi og tíu í Skútustaðahreppi. Þá hafði fjögað um 20 manns á skránni síðan í nóvember þegar 68 voru skráðir á þessu sama svæði.
Að meðaltali voru 63 einstaklingar á skrá á þessu svæði árið 2017. Það voru því greinilega fleiri á skrá um áramót en til gengur og gerist yfir árið. Til dæmis voru 41 á atvinnuleysisskrá í ágúst.
Stjórn og trúnaðarráð Framsýnar ásamt ungliðum innan félagsins koma saman til fundar á mánudaginn. Að venju eru mörg mál á dagskrá fundarins. Um 30 félagsmenn sitja í stjórn, varastjórn, trúnaðarráði og Framsýn-ung. Þessi hópur á seturétt á fundinum.
Dagskrá:
Við gerð síðustu kjarasamninga Starfsgreinasambands Ísland og Samband íslenskra sveitarfélaga var samþykkt að veita 2% persónuálag vegna starfsþróunarnámskeiða skv. grein 10.2.1 sem gildir frá 1. janúar 2018. Nánar má lesa um málið hér.
Ljósmyndari stéttarfélaganna átti leið um hafnarsvæðið á Húsavík rétt í þessu. Aðstæður til myndatöku voru með besta móti enda veður bjart og fallegt.
Gaman er að sjá nýja og glæsilega byggingu rísa á þeim grunni sem Flókahúsið stóð áður, en þar er Gentle giants að reisa sínar höfuðstöðvar. Eins og sjá má á myndinni að ofan er um gjörbreytingu á húsinu að ræða miðað við fyrra útlit. Verkið er komið vel á veg og verður spennandi að skoða húsið þegar það verður klárað.
Þriðjudaginn 6. febrúar kl. 20:00 var haldinn aðalfundur Deildar verslunar- og skrifstofufólks innan Framsýnar. Fundurinn var að venju málefnalegur og skemmtilegur. Reyndar var ekki fullt hús en þeir sem komu nutu þess að taka þátt í góðum fundi.
Formaður deildar DVS, Jóna Matthíasdóttir flutti skýrslu stjórnar vegna síðasta starfsárs, góðar umræður spruttu upp í kjölfarið. Skýrslan er meðfylgjandi þessari frétt. Stjórnin var endurkjörin enda skilað miklu og góðu starfi á liðnu starfsári. Hana skipa; Jóna Matthíasdóttir formaður, Jónína Hermannsdóttir og Dómhildur Antonsdóttir og í varastjórn Anna Brynjarsdóttir og Karl Hreiðarsson.
Auk venjulegra aðalfundarstarfa gerði Aðalsteinn Árni stuttlega grein fyrir hækkun styrkja til félagsmanna til náms og tengdrar þátttöku. Með nýjum reglum hækkar hámarksstyrkur í upphæð 130.000- á ári eða að hámarki 90% námskostnaðar. Ef réttur er ekki nýttur safnast hann á milli ára og getur mest orðið 390.000 krónur, það er þriggja ára réttur. Þá eiga félagsmenn einnig auka réttindi í Fræðslusjóði Framsýnar sem kemur félagsmönnum sem eru í dýru námi sérstaklega vel.
Hann minnti á að upplýsingar um styrkina eru fáanlegar á skrifstofu félagsins auk þess má þær finna á vefsíðunni www.starfsmennt.is
Í fundarboði var þess getið að flutt yrðu erindi um þróun verslunar og þjónustu í heimabyggð „ Hvernig get ég aðstoðað?“
Jóna Matthíasdóttir og Aðalsteinn Árni fluttu sitt hvort erindið um verslun og þjónustu á Húsavík og hvaða tækifæri geta legið með aukinni vefverslun. Tækifærin geta verið til staðar hjá verslunum á svæðinu. Tilgangur erindanna var að kalla fram umræður og viðbrögð og vekja fólk til umhugsunar um hvað hægt er að gera og hvernig skal bregðast við breyttum verslunarháttum. Erindunum var vel tekið og urðu töluverðar umræður um stöðu verslunar og þjónustu í Þingeyjarsýslum.
Undir liðnum önnur mál urðu umræður um atvinnumál og kjarasamninga, eftirfarandi var bókað í fundargerð:
Það eru ekki margar stjórnir stéttarfélaga á Íslandi eins vel mannaðar og stjórn Deildar verslunar- og skrifstofufólks innan Framsýnar. Hér er stjórnin í miklu stuði eftir að kjör þeirra lá fyrir á aðalfundi deildarinnar.
Hér má lesa skýrslu stjórnar sem formaður deildarinnar, Jóna Matthíasdóttir, flutti á fundinum:
Fyrir hönd stjórnar Deildar verslunar- og skrifstofufólks býð ég ykkur velkomin til aðalfundar deildarinnar. Eins og þið þekkið eru innan raða Framsýnar stéttarfélags tvær sjálfstæðar deildir, sjómannadeild og Deild verslunar- og skrifstofufólks. Á síðasta starfsári var stjórn deildarinnar þannig skipuð; Jóna Matthíasdóttir formaður, Jónína Hermannsdóttir varaformaður, Dómhildur Antonsdóttir ritari og í varastjórn sátu Anna Brynjarsdóttir og Karl Hreiðarsson. Lítið fór um formleg fundarhöld hjá stjórn á síðasta ári heldur var tekið á málefnum í formi tölvupósta og símtala, hluti stjórnar tók þátt í jólafundi stjórnar og trúnaðarráði Framsýnar. Samkvæmt lögum félagsins er formaður deildarinnar einnig sjálfskipaður í stjórn Framsýnar sem fundar reglulega. Formaður er starfandi ritari í stjórn Framsýnar og aðrir fulltrúar aðalstjórnar sitja einnig í stjórnum og ráðum innan Framsýnar.
Við viljum þakka starfsmönnum og formanni félagsins fyrir gott og árangursríkt samstarf auk veittrar þjónustu til stjórnar og félagsmanna. Eðli málsins samkvæmt leita félagsmenn beint til skrifstofu félagsins og formaður upplýstur um. Formaður deildarinnar tók þátt í formannafund LÍV í lok janúar á sl. ár þar sem helsta umræðuefni voru kjarasamningar og starfsmenntunarmál auk húsnæðismála.
Dagana 13. – 14. . október var 30. þing LÍV haldið á Akureyri og var formaður einn 80 þingfulltrúa. Jóna var annar tveggja ritara þingsins auk þess að sitja í kjörnefnd LÍV og var endurkjörin til næstu tveggja ára. Þá var hún kosin annar varamaður í stjórn LÍV til nætu tveggja ára. Þingið bar keim af því að það var afmælisár, erindi voru flutt um húsnæðismál og yfirlit og horfur í efnahagsmálum auk þess sem unnið var í nefnudm, Einnig var farið í kynningar- og fræðsluferð til Siglufjarðar og Ársskógsstrandar. Til kosninga kom um formann LÍV en að lokinni kosningu hlaut Guðbrandur Einarsson meirihluta greiddra atkvæða og situr sem formaður til næstu tveggja ára. Einn þingfulltrúi var heiðraður og hlaut gullmerki LÍV fyrir farsælt og óeigingjarnt starf í þágu verkalýðshreyfingarinnar.
Félagatal
Á árinu 2017 greiddu 249 manns til félagsins, þar af eru konur í miklum meirihluta eða 170 á móti 79 karlmanni. Félagsmönnum hefur fjölgað töluvert, eða um 38 manns, 20 konur og 18 karla.
Fjármál
Skrifstofa stéttarfélaganna er rekin sameiginlega af stéttarfélögunum í Þingeyjarsýslum, auk þess sem Verkalýðsfélag Þórshafnar er með þjónustusamning við hana. Rekstur skrifstofunnar gekk vel á sl. ári. Innheimta og innkoma félags- og iðgjalda hefur aukist töluvert. Almennt eru launagreiðendur samviskusamir að skila félagsgjöldum og mótframlögum á réttum tíma. Með auknum fjölda starfsmanna á svæðinu hefur fjöldi félagsmanna og greiðenda aukist með auknum tekjum til félagsins en þýðir einnig aukna vinnu og kostnað fyrir félagið. Endurskoðaður ársreikningur félagsins verður lagður fram á aðalfundi þess sem haldinn verður með vorinu. Stjórn Framsýnar og starfsmenn kappkosta að gæta hagsmuna félagsins og þar með félagsmanna með því að standa vörð um fjármuni þess hér eftir sem hingað til.
Kjara og samningamál
Kjarasamningar voru samþykkir á árinu 2015 og við endurskoðun 2016 var samningur framlengdur út árið 2018 með viðbótum við þær hækkanir sem áður hafði verið samið um. Í febrúar 2017 kom endurskoðunarnefndin aftur saman og niðurstaða þá var að segja ekki upp samningi. Forsendur núverandi kjarasamnings eru til skoðunar nú í febrúar en ekki hefur verið tekin ákvörðun um hvort samningi verði sagt upp eða ekki. Verði það gert, mun það gerast á næstum vikum en ef ekki gildir samningur út árið 2018. Fulltrúar sambandanna innan ASÍ hafa átt fundi með fulltrúum ríkisstjórnar þar sem almennt er verið að fara yfir stöðuna í þjóðfélaginu, lausa kjarasamninga framundan stöðuna almennt.
Orlofsmál
Líkt og fyrri ár hafa aðildarfélög Skrifstofu stéttarfélaganna með sér gott samstarf í orlofsmálum sem eru sem fyrr mikilvægur þáttur í starfi félagsins. Boðið er upp á fjölmarga kosti; m.a. orlofshús, gistiávísanir á hótelum og farfuglaheimilum auk endurgreiðslu á gistikostnaði á tjaldsvæðum og vegna kaupa á útilegukortum. Helstu samstarfsaðilar eru Foss- og Edduhótelin, Hótel Keflavík, Hótel KEA, Hótel Norðurland, Hótel Reykjavík Lights, Gistihús Keflavíkur og Icelandair hótelin t.d. á Akureyri og Hotel Natura í Reykjavík. Félagsmenn hafa aðgang að íbúð á Spáni sem þeir geta bókað beint hjá eiganda. Allar upplýsingar eru veittar á skrifstofunni.
Jöfn og góð nýting er á íbúðum okkar á höfuðborgarsvæðinu og er það vel. Leitast er við að sem flestir félagsmenn sem sækja um orlofshús fái úthlutun en eins og þið vitið er ekkert punktakerfi við lýði hjá stéttarfélögunum okkar. Okkur til mikillar ánægju var enn og aftur skrifað undir áframhaldandi samning milli Skrifstofu Stéttarfélaganna í Þingeyjarsýslu og flugfélagsins Ernis um kaup á flugmiðum fyrir félagsmenn Framsýnar og tengdra aðila. Um er að ræða eina bestu kjarabót sem okkur félagsmönnum stendur til boða. Nýr samningur er áætlaður að tryggja okkur verð á flugmiða aðra leið milli Húsavíkur og Reykjavíkur fyrir kr. 8.900 út árið 2018 og er það vel. Óhætt er að segja að með samningi þessu séu Stéttarfélögin í Þingeyjarsýslu að styrkja við og stuðla að frekari flugsamgöngum um Húsavíkurflugvöll. Þjónusta Ernis er til fyrirmyndar, boðið er upp á áætlunarflug sjö daga vikunnar, alls 13 ferðir á viku og mikið um aukaflug á álagsdögum. Á síðasta ári má ætla að tæplega 4000 miðar hafi verið seldir en uppgjör síðasta árs liggur ekki fyrir hjá félaginu.
Fræðslu- og kynningarmál
Félagið er aðili að Starfsmenntunarsjóði verslunar og skrifstofufólks. Nokkur fækkun var milli ára á fjölda félagsmanna og lægri styrkupphæð heldur árinu áður. Á síðasta ári fengu 25 félagsmenn starfsmenntastyrki, alls að upphæð kr. 1.142.506.– Upphæð ársins 2016 var 1.553.355- krónur og bak við þá fjárhæð 35 félagsmenn. Í ársbyrjun 2016 tók í gildi nýjar reglur í Starfmenntasjóði verslunar- og skrifstofufólks sem hafði m.a. áhrif á aukin réttindi þeirra sem eru í lægri tekjuhóp. Við viljum minna félagsmenn á að kynna sér fjölmörg önnur réttindi sem eru einnig í boði og nýta það sem til staðar. Starfmenn skrifstofu félagsins liðsinna ykkur með þær upplýsingar og þær má einnig finna á vefsíðu og í kynningarbæklingi Framsýnar sem er uppfærður reglulega. Deild verslunar – og skrifstofufólks hefur ekki almennt staðið fyrir sérstökum fundum fyrir félagsmenn sína, heldur eru haldnir opnir almennir félagsfundir Framsýnar um margvísleg málefni, m.a. kjarasamninga sem og annað fræðsluefni.
Fréttabréf og heimasíðan www.framsyn.is
Stöðugt birtast fréttir á vefsíðu Framsýnar www.framsyn.is úr starfi Félagsins og aðila Skrifstofu stéttarfélagana auk þess sem fréttir um málefni líðandi stundar í samfélaginu slæðist stundum með. Á tveggja mánaða fresti er gefið út Fréttabréf stéttarfélaganna sem dreift er frítt til allra heimila á félagssvæðinu. Fréttabréfið tekur á helstu málefnum úr starfi stéttarfélaganna. Þar koma m.a. fram upplýsingar til félagsmanna varðandi kjör og starfsemi stéttarfélaganna auk úrdráttur helstu frétta sem birtast á heimasíðunni. Fréttabréfinu er dreift frítt á öll heimili á félagssvæðinu og kemur út á tveggja mánaða fresti.
Málefni skrifstofunnar
Rekstur skrifstofu stéttarfélaganna gekk vel á síðasta starfsári sem fyrr. Þar eru starfandi 5 starfsmenn í fullu starfi á skrifstofu og einn starfsmaður er í hlutastarfi við ræstingar. Til viðbótar eru þrír starfsmenn í 0,4% stöðugildum við umsjón á orlofsíbúðum/húsum sem eru í eigu félagsins og við þjónustu við félagsmenn Framsýnar á Raufarhöfn. Mikið álag er á skrifstofu félagsins í tengslum við uppbyggingu á orkufrekum iðnaði á svæðinu auk þess sem talsvert umfang er af sölu flugmiða til félagsmanna eins og má skilja. Tveggja ára samningur við Aðalstein J. Halldórsson, sem gegnir starfi eftirlitsfulltrúa í iðnaði og ferðaþjónustu auk annarra starfa rennur út nú í mars mánuð og er framhald starfsins til skoðunar. Enn sem fyrr sinnir Ágúst Óskarsson þjónustu VIRK-Starfsendurhæfingarsjóðs í Þingeyjarsýslum, með jákvæðum árangri. Á síðasta ári tókum við í notkun glæsilega og endurbætta skrifstofuaðtöðu á efri hæð hússins. Þar voru sett upp átta ný skrifstofurými auk fundarsalar og starfsmannaaðstöðu. Þegar eru sjö rými í útleigu, leigutakar eru mjög ánægðir með þann aðbúnað og aðstöðu sem boðið er upp á og sambúð fjölbreyttra fyrirtækja gengur vel.
Lokaorð
Með þessari stuttu samantekt hef ég gert grein fyrir því helsta úr starfsemi deildarinnar frá síðasta aðalfundi. Starf deildarinnar sem slíkt, er ekki kraftmikið eða viðburðaríkt en við erum ómissandi í starfi félagsins. Ég vil hvetja ykkur öll til þess að taka þátt í þeim viðburðum sem í boði eru, láta ykkur umræðu um kjaramál og velferð í starfi máli skipta og koma tillögum og hugmyndum um úrbætur eða fræðslu á framfæri. Stjórn deildarinnar vill þakka öllum þeim félagsmönnum sem hafa gengt trúnaðarstörfum fyrir félagið, félagsmönnum okkar og starfsmönnum skrifstofu fyrir vel unnin störf og gott samstarf á árinu.
Trausti Aðalsteins var á fundinum og tók þátt í líflegum umræðum um málefni fundarins.
Rétt er að minna á línuppbót sem er í kjarasamning sjómanna sem undirritaðir voru fyrir rétt um ári.
Nánar má lesa um þetta á vef Sjómannasambands Íslands.
Nemendur 10. bekkjar Borgarhólsskóla komu í heimsókn á Skrifstofu stéttarfélaganna í dag, 5. febrúar. Þeir fengu fræðslu um starf stéttarfélaganna og hlutverk. Hópurinn var í tvennu lagi. Myndirnar sem hér fylgja með eru af fyrri hópnum.
Mikil þörf hefur verið á vinnuafli hér á svæðinu undanfarin ár. Enda kom það í ljós að drjúgur hluti nemenda voru þegar komin á vinnumarkaðinn.
Á dögunum var eftirlitsmaður stéttarfélaganna á ferðinni í Mývatnssveit. Meðal annars kom hann við í Hótel Reynihlíð þar sem framkvæmdir standa yfir við stækkun og breytingu hótelsins. Á fjórða tug starfsmanna að vinna við framkvæmdirnar sem munu ljúka í sumar. Flestir þeirra starfa hjá byggingaverktakanum Húsheild frá Hafnarfirði.
Eftir breytingu mun herbergjum hótelsins fjölga nokkuð og allt annað endurnýjað eins og kostur er. Þetta verður því ein alsherjar andlitslyfting fyrir hótelið.
Á myndinni er Aðalsteinn, starfsmaður stéttarfélaganna ásamt Einari verkstjóra og Ólafi framkvæmdarstjóra hjá Húsheild.
Á efri hæð Garðarsbrautar 26 voru nýlega hengdar upp stækkaðar myndir eftir Hafþór Hreiðarsson. Þær eru afar vel heppnaðar og taka sig vel út á veggjunum.
Í dag kom Hafþór sjálfur við til að taka verkið út og ekki er að sjá annað en að honum hafi líkað vel.