kuti

Nú klukkan 17:00 hefst stjórnarfundur hjá Framsýn. Gestur fundarins verður Kristján Þór Magnússon bæjarstjóri Norðurþings. Nokkur stór mál eru til umræðu s.s. aðkoma félagsins að Sparisjóði Þingeyinga, húsnæðismál á Húsavík, útgáfumál félagsins, launakjör aðila vinnumarkaðarins, fundir með lögreglu og verktökum á svæðinu og þá hefur verkalýðsfélagið Eining- Iðja óskað eftir auknu samstarfi félaganna. Reikna má með að fundurinn standi fram eftir kvöldi.

 

 

 

 

 

 

 

 

Það verður víða komið við á fundinum í kvöld enda mörg mál á dagskrá fundarins. Gestur fundarins verður Kristján Þór Magnússon bæjarstóri Norðurþings. Tilefnið er að ræða stöðu húsnæðismála á Húsavík og hugsanlegt samstarf Norðurþings og Framsýnar hvað það varðar.

Að frumkvæði Framsýnar var haldinn fundur með lögreglunni til að fara yfir mál sem komið hafa inn á borð félagsins og varða alvarleg brot á vinnumarkaði á félagsvæðinu. Fundurinn var haldinn í vikunni. Framsýn hefur einnig talið ástæðu til að funda með ákveðnum verkkaupum og verktökum á svæðinu til að gera þeim sömuleiðis grein fyrir nokkrum málum sem félagið hefur verið að vinna að og mun taka föstum tökum svo farið sé að lögum og eftir ákvæðum kjarasamninga. Því miður hafa komið upp nokkur alvarleg mál í eftirlitsferðum Framsýnar um félagssvæðið á undanförnum vikum.

Það verður lítið um sumarfrí hjá stjórnendum Framsýnar í sumar. Boðað hefur verið til fundar á miðvikudaginn til að fara yfir nokkur mál sem bíða afgreiðslu félagsins. Sjá dagskrá fundarins:

1. Fundargerð síðasta fundar
2. Inntaka nýrra félaga
3. Erindi frá Einingu-Iðju um samstarf
4. Fundur með lögreglunni
5. Aðkoma félagsins að Sparisjóði Þingeyinga
6. Erindi varðandi kaup á íbúð
7. Erindi varðandi uppbyggingu á Raufarhöfn
8. Leiga á íbúð fyrir félagsmenn á Spáni
9. Launakjör aðila vinnumarkaðarins
10. Framsýn-ung: Fundargerð
11. Samkomulag við RSÍ
12. Útgáfa bæklinga
13. Samstarf félagsins við VÞ
14. Þing ASÍ í haust
15. Önnur mál

Innan Framsýnar er starfandi Ungliðaráð Framsýnar sem skipað er til eins árs í senn af stjórn- og trúnaðarmannaráði félagsins. Ungliðaráðið skal skipað fjórum félagsmönnum á aldrinum 16-35 ára. Stjórnin skiptir sjálf með sér verkum formanns, ritara og tveggja meðstjórnenda. Leitast skal við að kynjaskiptingin sé jöfn í ráðinu. Ungliðaráðið skal starfa á vettvangi Framsýnar undir heitinu FRAMSÝN-UNG. Hlutverk ungliðaráðsins er að starfa náið með stjórn og trúnaðarráði Framsýnar að þeim málefnum sem aðilar ákveða að vinna að hverju sinni með sérstaka áherslu á málefni ungs fólks. Það er að tryggja að hugað sé að stöðu og hagsmunum ungs launafólks í stefnu verkalýðshreyfingarinnar og að rödd unga fólksins heyrist í starfi og stefnumótun Framsýnar- stéttarfélags.Þá skal ungliðaráðið vera tengiliður Framsýnar við starf ungliða á vettvangi ASÍ á hverjum tíma. Kristín Eva Benediktsdóttir, Sigurbjörg Stefánsdóttir, Aðalbjörn Jóhannsson og Eva Sól Pétursdóttir sitja í stjórn FRMASÝN-UNG. Þau komu saman til stjórnarfundar fyrir helgina þar sem þau fóru yfir verkefnin sem eru framundan á vegum ráðsins. Aðalbjörn er formaður og Eva Sól ritari. Á myndina vantar Kristínu Evu sem komst ekki á fundinn.

Atkvæðagreiðsla um nýgerðan kjarasamning Sjómannasambands Íslands og Samtaka fyrirtækja í sjávarútvegi er hafin. Sjómenn innan Framsýnar sem starfa eftir samningnum við fiskveiðar eiga að hafa fengið kjörgögn í hendur. Þeir sem telja sig hafa rétt til að kjósa en hafa ekki fengið kjörgögn í hendur eru vinsamlegast beðnir um að hafa samband við Skrifstofu stéttarfélaganna á Húsavík. Rétt er að taka fram að samningurinn nær ekki til sjómanna á smábátum.  Sjómannadeild Framsýnar

Skrifstofa stéttarfélaganna hefur nú tekið við útleigu á Sólheimum, orlofsíbúð STH í Reykjavík og er væntum leigutökum bent á að hafa samband við starfsfólk skrifstofunnar sem gefur fúslega frekari upplýsingar. Upplýsingar um íbúðina má finna inn á heimasíðu skrifstofunnar www.framsyn.is.

Í kjarasamningi milli aðildarfélaga ASÍ o.fl. og SA frá 21. janúar 2016 var kveðið á um hækkað mótframlag launagreiðenda í lífeyrissjóði, f.o.m. 1. júlí 2016. Í kjarasamningnum var kveðið á um þrepaskipta hækkun mótframlags launagreiðenda í lífeyrissjóð og tekur fyrsta breytingin gildi 1. júlí nk. Hækkunin gildir um þá sem eru aðilar að framangreindum kjarasamningi. Framlag launagreiðenda í lífeyrissjóð hækkar og verður eftirfarandi:
2016: Framlag launagreiðenda hækkar 1. júlí 2016 um 0,5% og verður 8,5%.
2017: Framlag launagreiðenda hækkar 1. júlí 2017 um 1,5% og verður 10%.
2018: Framlag launagreiðenda hækkar 1. júlí 2018 um 1,5% og verður 11,5%.
Frá og með 1. júlí 2016 hækkar því mótframlag launagreiðenda, vegna starfsmanna, í samtryggingarsjóð úr 8% í 8,5%. Eru launagreiðendur hvattir til að gera viðeigandi breytingar í launakerfum sínum hið fyrsta.

Nokkrir góðir gestir komu í heimsókn á Skrifstofu stéttarfélaganna í dag. Meðal þeirra sem komu voru Oddný G. Harðardóttir formaður Samfylkingarinnar og Logi Már Einarsson, bæjarfulltrúi á Akureyri og varaformaður Samfylkingarinnar. Þá má geta þess að Ragnar Árnason lögfræðingur Samtaka atvinnulífsins kom einnig við og fékk sér kaffi með starfsmönnum.

Oddný og Logi komu til Húsavíkur í dag til að kynna sér uppbygginguna á svæðinu. Þau fengu formann Framsýnar til að leiða sig í gegnum framkvæmdirnar og þau áhrif sem þær hafa á samfélagið.

Þessir heiðursmenn frá SMS sem stjórna framkvæmdunum á Bakka heilsuðu upp á gestina, þetta eru þeir Ruud M. Smit og Frank Schneider.

 

 

 

 

 

 

 

 

 

Á Þeystareykjum tók Guðmundur Þórðarson verkefnastjóri á móti gestunum sem fengu áhugaverða kynningu hjá honum á stöðu framkvæmda á Þeistareykjum. Guðmundur starfar hjá verktakanum LNS Saga.

Sjómannasamtökin hafa gengið frá nýjum kjarasamningi við Samstök fyrirtækja í sjávarútvegi með gildistíma til 31. desember 2018. Verði samningurinn samþykktur gildir hann frá 1. júní 2016. Sjómannadeild Framsýnar á aðild að samningnum. Á næstu dögum munu sjómenn innan deildarinnar fá kjörgögn í hendur. Væntanlega strax eftir helgina en unnið er að því að ganga frá gögnunum í póst.
Þar með hefst atkvæðagreiðsla um samninginn. Félagsmenn Sjómannadeildar Framsýnar geta kosið á Skrifstofu stéttarfélaganna til kl. 16:00, mánudaginn 8. ágúst. Opið verður alla virka daga frá kl. 08:00 til 16:00.
Rétt er að taka fram að atkvæði verða talin sameiginlega hjá öllum aðildarfélögum Sjómannasambands Íslands sem að samningnum standa.
Félagsmenn Sjómannadeildar Framsýnar sem búa utan Húsavíkur geta fengið kjörgögn í pósti komist þeir ekki til Húsavíkur að kjósa. Í þeim tilfellum eru félagsmenn beðnir um að hafa samband við Skrifstofu stéttarfélaganna.
Vakni upp spurningar við lesturinn er velkomið að hafa samband við Skrifstofu stéttarfélaganna. Skorað er á sjómenn sem samningurinn nær til að greiða atkvæði um kjarasamninginn.

Eins og fram hefur komið í fjölmiðlum hefur árangur Íslands í Evrópumótinu í fótbolta vakið mikla athygli víða um heim. Það er að smáþjóð skuli ná þessum merkilega árangri í knattspyrnuvellinum. Verkalýðsforingjar og starfsmenn stéttarfélaga á Norðurlöndum hafa verið duglegir við að senda starfsmönnum Framsýnar baráttukveðjur, það er fulltrúar frá öllum Norðurlöndunum. Hér má smá eitt af þessum bréfum sem barst formanni Framsýnar í gærkvöldi frá Ingeborg Vinther sem lengi var í forystu verkafólks í Færeyjum en hefur nú látið af störfum. Full ástæða er til að þakka félögum okkar á Norðurlöndunum fyrir magnaðar kveðjur.
Góði Aðalsteinn,
Nú er langt síðan je havi haft samband við teg.
Fyrst hjartans kvæðir til allir Íslendingar við tí
Flotta úrslitið frá Landsliðinum je var so stolt av ìslandi
og tað sama vóru øll her heima hjá okkum hald áfram Ísland
flott flott eitt spennandi kvøld.
Je og maðurin hava tað gott,nok at gera eru frísk og røsk.
Ì kvøld hava allir Íslendingar tað gott,,fantastisk sum Ìslendska liði
kláraði seg gott.
Hevur tú tað gott og hvussu gongur tað?
Vóni tú skilir tað eg havi skriva,heilsa teimum eg kenni.
Kærar kveðir
Ingeborg Vinther.

 

Stéttarfélögin í Þingeyjarsýslum halda uppi öflugu vinnustaðaeftirliti sem skilað hefur góðum árangri ekki síst í ferðaþjónustu og byggingariðnaði. Almennt er ástandið því gott á félagssvæðinu með nokkrum undantekningum. Dæmi er um að bæði innlend og eins erlend fyrirtæki hafi ætlað sér að greiða laun undir lágmarkslaunum á Íslandi. Framsýn hefur verið í sambandi við tvö fyrirtæki í vikunni sem eiga í hlut. Búið er að ná samkomulagi við annað fyrirtækið sem mun virða kjarasamninga og lög á vinnumarkaði. Viðræður standa yfir við hitt fyrirtækið um að laga kjör svo ekki komi til þess að Framsýn kæri fyrirtækið til hlutaðeigandi stjórnsýslustofnana. Góðar líkur eru á að það mál klárist á allra næstu dögum, jafnvel um helgina.

Dæmi eru um að menn fái um kr. 160.000 á mánuði í föst laun eins og þessi launaseðill ber með sér á sama tíma og lágmarkslaun á Íslandi eru um kr. 260.000,-. Það sem er alvarlegra í þessu tiltekna máli er að starfsmenn sem eiga í hlut vinna auk þess töluverða yfirvinnu sem skilar sér ekki inn í launin. Samtals er þessi launaseðill upp á kr. 185.000 með orlofi og ökutækjastyrk vegna kostnaðar sem hann varð fyrir.

Sjómannasamband Íslands ásamt Farmanna og fiskimannasambandinu hafa skrifað undir nýjan kjarasamning við Samtök fyrirtækja í sjávarútvegi. Samningurinn var undirritaður fyrr í dag, 24. júní. Sjómenn hafa verið kjarasamningslausir í fimm ár. Viðræður hafa staðið allan þann tíma, með hléum. Samningurinn, sem nú fer í kynningu og atkvæðagreiðslu, gildir til ársloka 2018.

Veiði í Fnjóská fer vel af stað þetta sumarið. Áin var opnuð þann 14. júní og lofar byrjunin góðu, en það er Stangaveiðifélagið Flúðir sem hefur leigt ánna síðustu áratugi af Veiðifélagi Fnjóskár. Í Fnjóská veiðist lax, sjóbleikja og stöku urriði og er veiðin best í neðri hluta árinnar snemmsumars, en um og upp úr miðjum júlí er að jafnaði farið að veiðast á öllum svæðum. Þessa dagana er því aðeins veitt er með 2 stöngum á neðsta svæðinu, meðalþyngdin er mjög góð og stendur nú í 5,6 kg og stærsti laxinn sem komið hefur á land úr Fnjóská þetta árið er 9,6 kg hængur.

Veiðifélag Fnjóskár hefur undanfarna mánuði verið með í smíðum 5 ný veiðihús og verða þau tekin í notkun á næstunni. Húsin standa við Flúðasel sem er rétt sunnan við Böðvarsnes í Fnjóskadal. Aðstaða í nýju húsunum er hin besta, en svefpláss er fyrir fjóra í hverju húsi.

Það er gaman að veiða í Fnjóská segja veiðimenn, en áin ekki allra þar sem hún er oft straumhörð og vatnsmikil. Umhverfi árinnar er afskaplega fallegt og margbreytilegt, og umferð meðfram henni er lítil.

Mikið blíðskaparveður hefur verið í Fnjóskadalnum undanfarnar vikur. Tíðindamaður fréttasíðunnar rakst á ánægjulega veiðimenn í Dalsmynninu á dögunum. Létu þeir vel af sér og nutu góða veðursins og ekki spillti deginum að taka smá baráttu við þann stóra og hafa betur.

Á dögunum fóru starfsmenn stéttarfélaganna í eftirlitsferð á Þeistareyki eins og gert er með reglulegu millibili. Auk þess áttu þeir fund með Jónatan Smára Svavarssyni, yfirmanni hjá LNS sögu en hann óskaði eftir fundi til að ræða mál tengd Þeistareykjaverkefninu.
Á Þeistareykjum er mikið um að vera um þessar mundir. Vel á þriðja hundrað manns eru við störf á svæðinu, langflestir starfsmenn ýmissa verktaka á vegum Landsvirkjunar en líka nokkrir starfsmenn á vegum Landsnets. Enn er verið að reysa vinnubúðir fyrir starfsfólkið en reiknað er með því að í júlí næstkomandi verði starfsmannafjöldinn í hámarki.
Eins og annarsstaðar hér norðanlands var með eindæmum gott veður á Þeistareykjum og smelltu starfsmenn stéttarfélaganna nokkrum myndum eins og sjá má hér.

 

Framsýn hefur samþykkt að senda frá sér svohljóðandi ályktun um lokun neyðarbrautar á Reykjavíkurflugvelli. Á fundi stjórnar Framsýnar, þar sem málið var til umræðu, kom fram mikil reiði út í Borgarstjórn Reykjavíkur sem virðist upplifa sig sem eyland á Íslandi. Þeim komi velferð fólks ekkert við er viðkemur aðgengi fólks á landsbyggðinni að hátækisjúkrahúsum sem byggð hafa verið í Reykjavík fyrir skattfé landsmanna:

Ályktun um lokun neyðarbrautar í Vatnsmýrinni
„Framsýn, stéttarfélag harmar þá ákvörðun Borgarstjórnar Reykjavíkur að loka eigi NA/SV flugbraut á Reykjavíkurflugvelli, svokallaðri neyðarbraut og bendir á að sú ákvörðun muni hafa grafalvarlegar afleiðingar og stefni almannaheill í voða.

Lending á neyðarbrautinni hefur skipt sköpum varðandi sjúkraflug utan af landi, oft í erfiðum tilfellum þar sem um líf eða dauða er að tefla.

Framkvæmd þessi er skerðing á þjónustu við íbúa landsins en Reykjavíkurflugvöllur hefur ávallt gegnt mikilvægu hlutverki í samgöngumálum þjóðarinnar og skapað betra aðgengi að hátæknisjúkrahúsum.

Lokun flugbrautarinnar er ekki einkamál Borgarstjórnar Reykjavíkur. Flugvöllurinn í Vatnsmýrinni er mikilvægasta samgöngumannvirki þjóðarinnar sem viðhaldið er með almannafé til handa öllum íbúum þessa lands.“

Á aðalfundi Framsýnar gengu fjórir félagar úr stjórn og trúnaðarmannaráði félagsins. Það voru þau Olga Gísladóttir, Páll Helgason, Kristrún Sigtryggsdóttir og Einar Magnús Einarsson. Við það tækifæri var þeim færð blóm og kærar þakkir fyrir þeirra framlag til félagsins. Olga, Páll og Kristrún hafa um áratugaskeið starfað í þágu stéttarfélaganna í Þingeyjarsýslum.

Olga og Páll voru á aðalfundinum og fengu blóm frá félaginu fyrir vel unninn störf í þágu Framsýnar. Fundarmenn klöppuðu fyrir þeim enda verið góðir samstarfsmenn í gegnum tíðina.

Fulltrúar ungliða innan Framsýnar kynntu fund ungs fólks sem haldinn var á vegum Starfsgreinasambandsins í tengslum við útvíkkaðan formannafund SGS í Grindavík 1.-2. júní 2016. Aðildarfélög SGS voru hvött til þess að senda tvo ungliða af sitt hvoru kyni til setu á fundinum en fulltrúar Framsýnar voru Aðalbjörn Jóhannsson og Sigurbjörg Arna Stefánsdóttir.

Tilgangur fundarins var annarsvegar að uppfræða og þjálfa ungliða en hinsvegar að útbúa vettvang ungs fólks innan SGS til þess að ræða hlutverk og stöðu sína innan verkalýðshreyfingarinnar. Á fundinum fengu ungliðar þjálfun í samningatækni og menningarvitund, fjölmiðlafærni og almannatengslum, fundarsköpum og fundasiðferði.
Á fundinum var slæm staða ungs fólks innan verkalýðshreyfingarinnar rædd og hvernig mætti bæta þar úr. Mikilvægi var lagt á nýjar leiðir til þess að ná til ungs fólks og þá sérstaklega í ljósi þess að aldursbundinn launamismunur er að aukast. Formenn aðildarfélaga voru minntir á að ungt fólk hefði ekki gleymt því hvernig gengið var á þeirra rétt og virðingu við gerð síðustu kjarasamninga og bentu á að ekkert samráð hefði verið haft við ungliða í þeirri vinnu. Úr því þyrfti að bæta og forystu verkalýðshreyfingarinnar treyst til þess að setja málefni ungs fólks í forgang við gerð næstu samninga.

Fulltrúar Framsýnar bentu á að Framsýn stæði framarlega meðal stéttarfélaga þegar aðgengi og félagsstolt ungs fólks væri rætt. Það væri þó alvarlegt misvægi á milli fjölda félagsmanna á aldrinum 16-30 ára annarsvegar og virkrar þátttöku þessa sama hóps í starfi félagsins hinsvegar. Það er mjög slæmt fyrir félagið enda má gera ráð fyrir að þessi aldur telji að minnsta kosti fjórðung félagsmanna. Það mátti ekki sjá á aðalfundi þar sem hlutfall ungs fólks var innan við 5%. Þessu vill félagið breyta og ræddu fulltrúar um nýja nálgun í tengslum við ungt fólk þar sem áhersla yrði lögð á jafningjavirkni í fræðslu og starfi, nútíma margmiðlun yrði beitt af auknum mæli, félagsstarf yrði aukið og ungliðastarf eflt. Ekki væri hægt að draga úr mikilvægi þess að ungt fólk upplifi kjarabaráttu sem persónulega enda yrði hún þá fyrst almenn meðal ungs fólk. Þá skipti einmitt máli að virkja ungt fólk á meðan það væri hluti af félaginu því þrátt fyrir að margt þeirra hverfi síðar meir í önnur félög þá væri ómetanlegur sá skilningur á kjarabaráttu launþega sem sæti eftir. Framsýn var einnig hvatt til þess að efla þátttöku sinna félagsmanna innan ASÍung.

Að lokum hvöttu fulltrúar ungliða innan Framsýnar félagið áfram í sínu hlutverki sem stoltur málsvari ungs fólks á vinnumarkaði. Framsýn ætti að vera í fararbroddi þegar kemur að réttindum og þátttöku ungs fólks, frumkvöðull og leiðandi og tryggja þannig stöðu félagsins sem ein sterkasta hreyfing launþega á landinu næstu ár og áratugi.

Aðabjörn og Sigurbjörg fóru yfir sýn ungs fólks á verkalýðsbaráttu.

Mótframlag atvinnurekenda í lífeyrissjóði starfsmanna hækkar um 3,5% í þremur áföngum til 2018, það er þeirra starfsmanna sem starfa eftir kjarasamningi Samtaka atvinnulífsins og aðildarfélaga Alþýðusambands Íslands:

• 1. júlí 2016 hækkar mótframlag atvinnurekenda um 0,5% stig
• 1. júlí 2017 hækkar mótframlag atvinnurekenda um 1,5% stig
• 1. júlí 2018 hækkar mótframlag atvinnurekenda um 1,5% stig
• Hækkun um 0,5% þann 1. júlí nk. mun renna í samtryggingu sjóðsfélaga
• Frá 1. júlí 2017 getur fólk ráðstafað allt að 2% stigum í bundinn séreignarsparnað
• Frá 1. júlí 2018 getur fólk ráðstafað allt að 3,5% stigum í bundinn séreignarsparnað

Samkvæmt kjarasamningi aðildarfélaga Alþýðusambands Íslands og Samtaka atvinnulífsins sem undirritaður var 21. janúar 2016 hækkar mótframlag atvinnurekenda í lífeyrissjóð um samtals 3,5% stig á samningstímanum. Hækkunin kemur til framkvæmda í þremur áföngum, 0,5% stig þann 1. júlí 2016, 1,5% stig þann 1. júlí 2017 og um 1,5% stig þann 1. júlí 2018 og nær til þeirra lífeyrissjóða sem starfa á grundvelli kjarasamnings þessara aðila um lífeyrismál frá árinu 1969 og 1995. Skylduiðgjald til lífeyrissjóðs samkvæmt samningi þessum verður þá samtals 15,5% frá 1. júlí 2018, sem skiptist í 4% iðgjald launamanns og 11,5% mótframlag atvinnurekanda.
Samkvæmt samningi aðila frá 21. janúar 2016 verður einstaklingum heimilt að ráðstafa, að hluta eða fullu, auknu framlagi launagreiðanda í bundinn séreignasparnað í stað samtryggingar til að auðvelda launafólki starfslok og auka sveigjanleika.
Atvinnurekendum verður áfram skylt að skila öllu skyldutryggingariðgjaldinu til lífeyrissjóðs viðkomandi launamanns. Sjóðfélagar munu því snúa sér beint til viðkomandi lífeyrissjóðs ef þeir óska eftir því að nýta sér þennan rétt, en lífeyrissjóðir sem starfa á grundvelli kjarasamninga ASÍ og SA munu setja upp sérstakar deildir um þessa bundnu séreign.
Ljóst er að núverandi löggjöf um starfsemi lífeyrissjóða hefur ekki að geyma ákvæði sem heimilar sjóðsfélögum eða lífeyrissjóðum að ráðstafa hluta af skylduiðgjaldi í bundna séreign. Einnig er ljóst að tíminn fram til 1. júlí 2016 er ekki nægur til að lífeyrissjóðirnir geti sett upp gagnsætt og skilvirkt kerfi svo sjóðsfélagar geti tekið upplýsta ákvörðun um að ráðstafa hluta skyldutryggingariðgjalds í bundna séreign og áhrif þeirrar ákvörðunar á samsetningu réttinda sinna.
Því er óhjákvæmilegt annað en að fresta gildistöku heimildar til ráðstöfunar í bundna séreign til 1. júlí 2017 en þá verði launamanni heimilt að ráðstafa allt að 2% stigum í bundna séreign. Frá og með 1. júlí 2018 verði launamanni heimilt að ráðstafa til viðbótar allt að 1,5% stigum til bundinnar séreignar eða samtals allt að 3,5% stigum.
Hækkun framlags atvinnurekenda til lífeyrissjóðs um 0,5% frá og með 1. júlí 2016 verður fyrst um sinn ráðstafað í samtryggingu viðkomandi lífeyrissjóðs þar til valrétturinn tekur gildi frá og með 1. júlí 2017.

Samkomulag ASÍ og SA um framkvæmd á hækkun framlags atvinnurekenda í lífeyrissjóði á grundvelli samnings aðila frá 21. janúar 2016 – dags. 15.6.2016

Starfsmenn Framsýnar áttu ánægjulegan vinnustaðafund með starfsfólki Garðvíkur á dögunum. Eigandi Garðvíkur, Guðmundur Vilhjálmsson, óskaði eftir fundi með fulltrúum Framsýnar til þess að kynna starfsmönnum sínum þau réttindi og skyldur sem þau hafa.

Þetta er gott framtak og þökkum við fyrir okkur. Við bendum eigendum fyrirtækja á starfssvæði Framsýnar að hægt er að bóka fundi sem þennann með því að hafa samband á Skrifstofu stéttarfélaganna.

Ákveðið hefur verið að hækka endurgreiðslur til félagsmanna úr Fræðslusjóðnum Landsmennt frá 1. júlí 2016. Hámark endurgreiðslna til félagsmanna á ári hækkar úr kr. 70.000,- í kr. 75.000.-. Þeir félagsmenn sem nýtta sér ekki réttinn í þrjú ár eiga rétt á þreföldum styrk sem nemur allt að kr. 225.000.-. Breytingin gildir gagnvart námi/námskeiði sem hefst eftir 1.júlí 2016. Með þessari breytingu verður hámark einstaklingsstyrkja Landsmenntar eins og hjá Starfsafli, Sveitamennt, Ríkismennt, Flóamennt og fleiri sambærilegum sjóðum.