kuti

Framsýn stéttarfélag mun halda áfram að berjast fyrir flugsamgöngum milli Húsavíkur og Reykjavíkur. Því miður hafa samtöl við þingmenn kjördæmisins skilað litlum árangri, reyndar virðast þeir vera gjörsamlega áhugalausir. Vegagerðin hefur þó hlustað og nú stendur til að bjóða út flugleiðina Reykjavík – Húsavík – Reykjavík eftir því sem best er vitað í þrjá mánuði á ári í þrjú ár. Það er yfir vetrarmánuðina, des-jan-feb. Vegagerðin hefur gefið út að skila þurfi inn tilboðum rafrænt í þessa flugleið fyrir kl. 14:00 þriðjudaginn 2. júlí 2024 og að útboðið verði auglýst á Evrópska efnahagssvæðinu. Framsýn hefur þegar sett sig í samband við Innviðaráðuneytið og óskað eftir fundi með ráðherra um málið með það að markmiði að tryggja flugsamgöngur milli Húsavíkur og Reykjavíkur. Jafnframt hefur Framsýn verið í góðu sambandi við forsvarsmenn Norðurþings um aðkomu þeirra að málinu. Þeir hafa tekið því mjög vel og stefna að sameiginlegum fundi um málið með ráðherra.

Sumarferð stéttarfélaganna um komandi helgi á Langanesið er hér með aflýst þar sem þátttakan var ekki nægjanlega góð auk þess sem veðurspáin er ekki spennandi fyrir helgina. Við reynum bara síðar að gera eitthvað skemmtilegt saman.

Eins og fram hefur komið á heimasíðunni standa yfir rafrænar kosningar um kjarasamninga Starfsmannafélags Húsavíkur við ríkið og sveitarfélögin. Hér má nálgast upplýsingar um innihald kjarasamningana. Sjá slóðir hér að neðan:

Kjarasamningur Starfsmannafélags Húsavíkur við Ríkissjóðs
Slóð: https://kannanir.is/kosning/vidhengi/starfshusariki2024.pdf

Kjarasamningur Starfsmannafélags Húsavíkur við Samband íslenskra sveitarfélaga
Slóð: https://kannanir.is/kosning/vidhengi/sishus2024.pdf

Hótel Goðafoss stendur rétt við Skjálfandafljót, það er á einum af fjölsóttustu ferðamannastöðum landsins. Á dögunum óskuðu eigendur og starfsmenn eftir kynningu frá Framsýn á réttindum og skyldum starfsmanna í ferðaþjónustu. Að sjálfsögðu mættu fulltrúar Framsýnar á staðinn og spjölluðu við starfsmenn sem voru mjög fróðleiksfúsir. Eins og áður hefur komið fram er það til mikillar fyrirmyndar þegar stjórnendur fyrirtækja, ekki síst í ferðaþjónustu, biðja um fræðslu sem þessa fyrir starfsmenn.

Nú í hádeginu hófst rafræn kosning um nýjan kjarasamning sem Starfsmannafélag Húsavíkur ásamt tíu öðrum aðildarfélögum BSRB skrifuðu undir þann 13. júní sl. við Samband íslenskra sveitarfélaga. Varðandi atkvæðagreiðsluna um sveitarfélagasamninginn þá hófst hún í hádeginu í dag. Atkvæðagreiðslan um samninginn endar miðvikudaginn 26. júní 10:00.

Slóðin á kosningu um samninginn er Slóðin á kosninguna er sú sama framsyn.is/kjosa

Nú í hádeginu hófst rafræn kosning um nýjan kjarasamning sem Starfsmannafélag Húsavíkur ásamt tíu öðrum aðildarfélögum BSRB skrifuðu undir þann 13. júní sl. við Samband íslenskra sveitarfélaga og ríkið. Varðandi atkvæðagreiðsluna um ríkissamninginn þá hófst hún í hádeginu í dag. Atkvæðagreiðslan um Ríkissamninginn endar mánudaginn 24. júní kl. 10:00.

Slóðin til að kjósa er eftirfarandi: framsyn.is/kjosa

Skorað er á félagsmenn að greiða atkvæði um samninginn.

Stjórn STH

Rétt í þessu náðist samkomulag milli PCC og Framsýnar/Þingiðnar um kjaraamning fh. starfsmanna fyrirtækisins til næstu fjögurra ára. Um þessar mundir eru um 150 starfsmenn á launaskrá hjá fyrirtækinu sem er eitt mikilvægasta fyrirtækið á félagssvæði Framsýnar og Þingiðnar hvað launakjör félagsmanna varðar. Samningurinn felur í sér sambærilegar launahækkanir og samið var um á almenna vinnumarkaðinum fyrr á árinu. Samningurinn gildi frá 1. febrúar 2024 til 1. febrúar 2028. Samningur þessi felur í sér nánara samkomulag um framkvæmd þeirra samninga fyrir félagsfólk Framsýnar og Þingiðnar sem starfar hjá PCC BakkiSilicon hf. Hópur starfsmanna var viðstaddur undirskriftina nú síðdegis. Ekki var annað að heyra en að þeir væru mjög ánægðir með samninginn. Það voru þau Aðalsteinn Árni frá Framsýn, Jónas Kristjáns frá Þingiðn, Tomasz Mayewski og Ingimar Knútsson trúnaðarmenn starfsmanna og Gestur Pétursson forstjóri og Marella Steinsdóttir mannauðsstjóri PCC sem skrifuðu undir samninginn. Ragnar Árnason forstöðumaður vinnumarkaðssviðs Samtaka atvinnulífsins átti ekki heimagengt og var því ekki á svæðinu þegar skrifað var undir samninginn. Hann kom að gerð samningsins.

Stjórn og trúnaðarráð Framsýnar mun koma saman til fundar fimmtudaginn 19. júní kl. 17:00 í fundarsal stéttarfélaganna. Um er að ræða fyrsta fundinn eftir aðalfund félagsins sem haldinn var 3. maí. Þá urðu verulegar breytingar á félagsmönnum í stjórnunarstöðum innan félagsins. Dagskrá fundarins er eftirvarandi:

Dagskrá:

1. Fundargerð síðasta fundar

2. Inntaka nýrra félaga

3. Starfsemi Framsýnar

4. Kjaramál

5. Kjarasamningur við PCC

6. Þing AN á Illugastöðum

7. Hraunholt 26-28

8. Skrifstofa stéttarfélaganna

9. Sparisjóður S-þing

10. Stuðningsyfirlýsing við FA

11. Erindi: Orlofsbyggðin Illugastöðum

12. Kjör á trúnaðarmönnum

• Ágúst S. Óskarsson, Slökkvilið Norðurþings
• Sigtryggur Ellertsson, Skógarbrekka
• Örn Heimir Björnsson Mývatn-Berjaya Iceland hotels

13. Önnur mál

Framsýn stóð í gær fyrir fjölmennum kynningarfundi um hvalaskoðunarsamning félagsins við Samtök atvinnulífsins. Fundurinn var haldinn í samráði við trúnaðarmann starfsmanna hjá Norðursiglingu, Alberto Delmalo. Skrifað var undir samninginn 24. mars 2024 en hann nær til starfsmanna við hvalaskoðun, það er til þeirra starfsmanna sem vinna hjá hvalaskoðunarfyrirtækjunum á Húsavík. Vitað er að áhugi er fyrir því hjá öðrum stéttarfélögum að taka samning Framsýnar upp á þeirra landssvæðum en hvalaskoðun er víða orðin vinsæl afþreying frá sjávarplássum á Íslandi.

Samninganefndir 11 aðildarfélaga BSRB og Sambands íslenskra sveitarfélaga undirrituðu nýjan kjarasamning á öðrum tímanum í nótt. Starfsmannafélag Húsavíkur á aðild að samningnum fyrir sína félagsmenn. Gildistími samningsins er frá 1. apríl 2024 til 31. mars 2028. Samið var sambærilegum nótum og á almennum markaði í vor.

Félögin sem kjarasamningurinn nær til eru:

• Kjölur – stéttarfélag starfsmanna í almannaþjónustu
• Félag opinbera starfsmanna á Austurlandi
• FOSS – stéttarfélag í almannaþjónustu
• Sameyki – stéttarfélag í almannaþjónustu
• Starfsmannafélag Garðabæjar
• Starfsmannafélag Húsavíkur
• Starfsmannafélag Hafnarfjarðar
• Starfsmannafélag Mosfellsbæjar
• Starfsmannafélag Kópavogs
• Starfsmannafélag Suðurnesja
• Starfsmannafélag Vestmannaeyjabæjar

Nýr kjarasamningur verður kynntur félagsfólki viðkomandi félaga á næstu dögum.

Nú þegar fyrstu kjarasamningar á opinberum markaði hafa verið undirritaðir standa vonir til að lokið verði við gerð fleiri kjarasamninga á næstu dögum. Kjarasamningar hjá meginþorra félagsfólks aðildarfélaga BSRB hafa verið lausir frá 1. apríl 2024.

Á árinu 2023 fengu 382 félagsmenn Framsýnr greiddar kr. 24.194.125,- í einstaklingsstyrki frá fræðslusjóðum í endurgreiðslur vegna náms eða námskeiða. Þá má geta þess að félagið leggur mikið upp úr heimsóknum í skóla með fræðslu um starfsemi stéttarfélaga og vinnumarkaðinn, það er í vinnuskóla, grunnskóla og framhaldsskóla á félagssvæðinu. Þó nokkuð er um að fyrirtæki og stofnanir leiti til Framsýnar eftir fræðslu fyrir starfsmenn sem tengist réttindum og skyldum þeirra á vinnumarkaði sem er afar ánægjulegt.  Þá eru starfsmenn stéttarfélaganna reglulega beðnir um að kenna á námskeiðum er tengjast vinnurétti.

Nemendur Vinnuskólans á Húsavík litu við á Skrifstofu stéttarfélaganna í morgun ásamt flokkstjórum til að fræðast um starfsemi stéttarfélaga. Unglingarnir voru mjög áhugasamir og spurðu töluvert út í starfsemina. Von er á fleiri heimsóknum í sumar frá nemendum í Vinnuskólum á félagssvæðinu.  Arnar Páll Matthíasson, Jakob Gunnar Sigurðsson og Guðrún Birna Örvarsdóttir fóru fyrir hópnum.

Fjárhagsleg afkoma Framsýnar var góð á árinu 2023. Rekstrarafgangur var af öllum sjóðum félagsins nema fræðslusjóði sem þarf ekki að koma á óvart enda ekki með fastann tekjustofn. Rekstrartekjur félagsins námu kr. 417,2 milljónum sem er hækkun um 21% milli ára.  Þessi hækkun skýrist af hærri iðgjaldatekjum og að auki leiðréttingu á sjúkrasjóði frá 2020. Félagsgjöld og iðgjöld námu kr. 359,8 milljónum 2023 á móti kr. 295,1 milljónum á árinu 2022 sem er hækkun upp á um 22%. Rekstrargjöld hækka um 8,54% á milli ára en þau námu kr. 269,4 milljónum 2023. Bætur og styrkir úr sjúkrasjóði er stærsti einstaki útgjaldaliður Framsýnar ásamt launum og launatengdum gjöldum. Fjármagnstekjur námu kr. 152,5 milljónum en voru 128 milljónir á árinu 2022. Heildareignir félagsins námu kr. 2.970 milljónum í árslok 2023 samanborið við kr. 2.659 milljónir í árslok 2022. Útistandandi iðgjöld í lok árs 2023 voru kr. 64,1 milljón samanborið við kr. 37,1 milljón  í árslok 2022. Þessi hækkun skýrist fyrst og fremst af leiðréttingu á iðgjöldum sjúkrasjóðs frá 2020 sem var útistandandi um áramót.

Sveitarfélagið Norðurþing greiddi mest allra atvinnurekenda  í iðgjöld til Framsýnar árið 2023. Árið 2022 greiddi PCC BakkiSilicon hf. hins vegar mest allra fyrirtækja til Framsýnar. Innifalið í upphæðinni eru félagsgjöld starfsmanna og lögbundin iðgjöld atvinnurekenda í sjóði Framsýnar og í starfsmenntasjóði atvinnulífsins. Stærstu greiðendur iðgjalda til Framsýnar 2023 eftir röð:

Sveitarfélagið Norðurþing

PCC BakkiSilicon hf.

Þingeyjarsveit

GPG. Seafood ehf.

Ríkissjóður Íslands

Íslandshótel hf.

Norðlenska matarborðið ehf.

Samherji fiskeldi ehf.

Eimskip ehf.

Norðursigling hf.

Til að öðlast full félagsréttindi þarf að greiða mánaðarlegt félagsgjald samkvæmt ákvörðun aðalfundar á hverjum tíma, nú 1% af heildarlaunum.

Lágmarksfélagsgjaldið er 0,3% byrjunarlaunum 18 ára afgreiðslufólks, samkvæmt launataxta LÍV-SA sem Framsýn á aðild að á hverjum tíma. Nú kr. 15.514,- á ársgrundvelli.

Félagsgjaldið tekur breytingum í samræmi við umsamdar breytingar á launataxta LÍV-SA. Þegar rætt er um lágmarksfélagsgjald er miðað við gjald samtals í eitt ár, eða undangengna 12 mánuði.

Félagsmenn sem ekki hafa náð lágmarksfélagsgjaldi eiga rétt á aðstoð við kjaramál og réttindi í sjóðum félagsins í hlutfalli við greiðslur. Til þess að viðhalda fullgildum félagsrétti í Framsýn þurfa félagsgjaldsgreiðslur að berast reglulega. Ef ekkert félagsgjald er greitt í sex mánuði samfellt fellur viðkomandi af félagsskrá. Hægt er að ná aftur fullgildingu frá þeim mánuði sem næsta félagsgjaldsgreiðsla berst, ef lágmarksfélagsgjaldi er náð undangengna 12 mánuði.

Allt frá 14. maí hafa staðið yfir umfangsmiklar vinnustöðvanir í Færeyjum þar sem stór hluti vinnandi fólks hefur lagt niður störf til að krefjast betri kjara. Framsýn stéttarfélag lýsir yfir fullum stuðningi við vinnustöðvun félagsmanna í Foroya arbeiðarafélagi, Havnar arbeiðarafelagi, Klaksvíkar arbeiðskvinnufelagi og Klaksvíkar arbeiðsmannafelagi.

Jafnframt hvetur Framsýn til þess að félagsmenn aðildarfélaga Alþýðusambands Íslands gangi hvorki beint né óbeint í störf félagsmanna framangreindra samtaka meðan á vinnustöðvun stendur.

Félagsmenn Framsýnar eiga aðild að öflugum fræðslusjóðum í gegnum þá kjarasamninga sem félagið á aðild að. Þessar greiðslur geta verið allt að kr. 170.000 á ári. Uppsafnaður þriggja ára réttur getur orðið mest kr. 510.000,-. Til viðbótar þessum góða rétti stendur félagsmönnum Framsýnar til boða að fá sérstakan styrk úr Fræðslusjóði Framsýnar kr. 130.000,-. Sumir segja að það sé best að búa í Kópavogi meðan aðrir segja að það sé best að vera félagsmaður í Framsýn. Að sjálfsögðu tökum við heilshugar undir það.

Þar sem rekstur Framsýnar gekk mjög vel á síðasta ári var ákveðið á aðalfundi félagsins að hækka bætur og styrki til félagsmanna úr sjúkrasjóði félagsins. Á síðasta ári fengu félagsmenn greiddar tæpar 100 milljónir í sjúkradagpeninga og aðra styrki er tengjast heilsueflingu eða veikindum þeirra. Styrkupphæðir til félagsmanna Framsýnar úr sjúkrasjóði og reyndar fræðslusjóði líka eru með þeim bestu sem þekkjast hjá sambærilegum stéttarfélögum á Íslandi.

Breytingarnar sem taka gildi 1. maí 2024 eru eftirfarandi:

• Útfararstyrkur til aðstandenda eldri félagsmanna hækki úr kr. 150.000,- í kr. 160.000,-.
• Styrkur til félagsmanna vegna dvalar á heilsuhælum/Hveragerði hækki úr kr. 110.000,- í kr. 120.000,-.
• Fæðingarstyrkur til félagsmanna hækki úr kr. 160.000,- í kr. 200.000,-.
• Ættleiðingastyrkur til félagsmanna hækki úr kr. 160.000,- í kr. 200.000,-.
• Þurfi félagsmenn að gangast undir tæknifrjóvgun hækki styrkurinn úr kr. 160.000,- í kr. 200.000,-.
• Krabbabeinsskoðun taki smávægilegum breytingum. Áfram greitt fyrir hefðbundna skoðun að fullu. Heildarstyrkurinn verði kr. 40.000,- á ári til félagsmanna.
• Styrkur vegna heilsueflingar félagsmanna hækki úr kr. 40.000,- í kr. 45.000,-. 
• Þátttaka í ferðakostnaði félagsmanna vegna veikinda, það er þurfi þeir að ferðast til Akureyrar eða Reykjavíkur til lækna eða sérfræðinga, verði aukin um eina ferð. Fari úr þremur ferðum í fjórar.
• Þátttaka í göngugreiningu félagsmanna verði aukin úr kr. 6.000,- í kr. 10.000,-.
• Þátttaka vegna Laser eða augnsteinaaðgerða hækki úr kr. 60.000,- í kr. 80.000,- per auga.
• Gleraugnastyrkur til félagsmanna hækki úr kr. 70.000,- í kr. 90.000,-.
• Heyrnatækjastyrkir til félagsmanna hækki úr kr. 100.000,- í kr. 125.000,- per eyra.   

Reglur varðandi úthlutun styrkja úr sjúkrasjóði halda sér áfram sem taka m.a. mið af greiddu félagsgjaldi síðustu mánuði fyrir umsókn.

Við minnum á Sveitarfélag ársins, starfsumhverfiskönnun bæjarstarfsmannafélaganna innan BSRB, við þurfum á þinni skoðun að halda. Könnunin klárast 10. júní. Könnunin var send í tölvupósti frá kannanir@kannanir.gallup.is

Ef þú hefur ekki fengið könnun, vinsamlega hafðu samband við fyrirmyndar@gallup.is

Á næstu dögum munum við fjalla um helstu málefni og samþykktir aðalfundar Framsýnar sem var haldinn 3. maí. Því miður hefur ekki gefist tími til að fjalla um aðalfundinn fyrr en núna vegna mikilla anna á Skrifstofu stéttarfélaganna. Aðalfundurinn samþykkti með lófaklappi að færa HSN/Hvammi að gjöf til kaupa á tækjum fyrir stofnanirnar. Mestu munar um hjartatæki sem gerir HSN kleift að hafa hjartalækni í hlutastarfi hjá stofnunninni á Húsavík. Nánar verður fjallað um málið síðar en til stendur að afhenda gjöfina síðar í júní. Eftirfarandi samþykkt var gerð á fundinum:

“Aðalfundur Framsýnar stéttarfélags samþykkir að færa Styrktarfélagi HSN í Þingeyjarsýslum að gjöf kr. 15.000.000,- til kaupa á tækjum og búnaði til að efla starfsemina enn frekar.

HSN og Hvammur hafa á að skipa frábæru fagfólki í öllum stöðum. Svo starfsemin megi þrífast áfram um ókomna tíð er mikilvægt að heilbrigðis starfsfólk hafi aðgengi að fullkomnustu tækjum á hverjum tíma til lækninga og þjálfunar.

Með gjöfinni vill Framsýn stéttarfélag undirstrika mikilvægi þess, að íbúar í Þingeyjarsýslum og aðrir þeir sem þurfa á heilbrigðisþjónustu og endurhæfingu að halda á hverjum tíma, hafi aðgengi að öflugum heilbrigðisstofnunum.

Þannig byggjum við upp sterkt samfélag öllum til hagsbóta.”