12. þings ASÍ-UNG verður haldið dagana 5.–6. nóvember nk. á Hótel Reykjavík Öskju. Yfirskrift þingsins er „Hvað situr eftir? – Kjör, skattar og framtíðartækifæri ungs fólks“. Framsýn mun að sjálfsögðu senda fulltrúa á þingið enda öflugt ungliðastarf innan félagsins. Ungliðastarfið miðast við þá sem eru innan við 35 ára aldur á vinnumarkaði.
Þegar kjarasamningar voru undirritaðir tók launafólk mikla áhættu með því að fallast á lágar launahækkanir á verðbólgutímum. Á móti ætluðu fyrirtæki að halda aftur af verðhækkunum til að ná niður verðbólgu og vöxtum. En verð hefur hækkað látlaust og vextir eru svimandi háir. Forsendur kjarasamninga eru brostnar og þeir gætu losnað 8. október nk.
LÍV, VR og Fagfélögin hafa sent verðmótandi fyrirtækjum bréf og óskað svara um hvað þau ætli að leggja af mörkum svo að kjarasamningar geti haldið gildi sínu. Óbreytt ástand er ekki valkostur. Hér fyrir neðan er listi yfir þau fyrirtæki sem fengu bréfið sent og afrit af bréfinu. Til fróðleiks má geta þess að Framsýn er aðili að málinu í gegnum LÍV.
Stjórn og trúnaðarráð Framsýnar kom saman til fundar síðasta mánudag. Þar kom fram megn óánægja með fjárlagafrumvarpið er viðkemur sérstaklega auknum álögum á alþýðu landsins og ætlun stjórnvalda að selja byggingar á Húsavíkurflugvelli og veikja þar með stöðu flugvallarins. Eftir góðar og málefnalegar umræður var eftirfarandi ályktun samþykkt samhljóða:
„Stjórn og trúnaðarráð Framsýnar skorar á ríki og sveitarfélög að axla ábyrgð á gjaldahækkunum langt umfram verðbólguviðmið, þvert á loforð við undirritun síðustu kjarasamninga árið 2024. Ábyrgðin hvílir hjá þeim sem hafa svikið loforð sín um að halda aftur af gjaldskrár- og verðhækkunum og hafa þess í stað kosið að velta byrðinni yfir á almenning með þeim afleiðingum að forsendur kjarasamninga eru brostnar.
Meginmarkmið kjarasamninga sem undirritaðir voru 2024 var lækkun verðbólgu með samstilltu átaki verkalýðshreyfingarinnar, atvinnurekenda, ríkis og sveitarfélaga. Aðilar vinnumarkaðarins gengu frá fjögurra ára kjarasamningi með hófstilltum launahækkunum. Ríki, sveitarfélög, fyrirtæki, verslun og þjónusta gáfu loforð um að ætla að leggja sitt af mörkum og halda aftur af gjaldskrár- og verðhækkunum. Nú er svo komið að forsendur kjarasamninga eru brostnar vegna vanefnda og verðbólgan fer vaxandi milli ára sem kemur sér afar illa fyrir heimilin í landinu, ekki síst verkafólk og þeirra sem minna mega sín í þjóðfélaginu.
Í stað þess að bregðast við vandanum velja stjórnvöld að auka enn frekar álögur á almenning sem þarf t.d. á heilbrigðisþjónustu að halda með hækkun á komugjöldum. Fyrr í sumar tilkynnti heilbrigðisráðherra 100% hækkun á komugjöldum sjúklinga á heilsugæslu, sem tækju gildi 1. ágúst. Auk þess var boðað að frá og með 1. september yrði komið á sérstöku komugjaldi fyrir sjúkraþjálfun, iðjuþjálfun og talþjálfun sem verður utan við greiðsluþátttökukerfi heilbrigðisþjónustunnar og kemur því til viðbótar þeirri hámarksupphæð sem sjúklingar greiða fyrir þá heilbrigðisþjónustu sem fellur innan kerfisins. Það er sorglegt til þess að vita að kostnaður vegna heilbrigðisþjónustu er mun hærri hér á landi en í nágrannalöndunum.
Ekki er að sjá annað en að stjórnvöld ætli áfram að ná markmiðum um hallalaus fjárlög með gjaldtöku- og niðurskurði. Nú síðast í vikunni eru boðaðar frekari hækkanir, m.a. 5,2% hækkun á krónutölugjöldum í fjárlagafrumvarpi og 15,9% hækkun kílómetragjalds. Jafnframt er gert ráð fyrir frekari rýrnun á barna- og húsaleigubótum.
Nú þegar forsendur kjarasamninga eru brostnar er afar mikilvægt að verkalýðshreyfingin standi saman og bregðist við vanefndum þeirra sem lofuðu við gerð síðustu kjarasamninga að leggja sitt af mörkum að halda aftur af gjaldskrár- og verðhækkunum. Við annað verður ekki unað.“
Í fjárlagafrumvarpi ríkisstjórnarinnar fyrir árið 2027 er að finna heimild til sölu á flugstöð Húsavíkurflugvallar í Aðaldal. Áformin hafa vakið hörð viðbrögð á svæðinu og segjast bæði forsvarsmenn Framsýnar og Norðurþings ætla að bregðast við málinu.
Aðalsteinn Árni Baldursson, formaður Framsýnar stéttarfélags, segir í samtali við Húsavík.com að félagið hafa þegar brugðist við málinu.
„Ég er búinn að setja mig í samband við alla þingmenn kjördæmisins og vildi fá það staðfest hvort þeir ætluðu virkilega að standa að því að selja flugstöðina á Húsavíkurflugvelli,“ segir Aðalsteinn. Hann segir fyrstu viðbrögð þingmanna benda til þess að málið hafi komið mörgum þeirra á óvart. Sjá frekar umfjöllun husavik.com:
Frá 1. september 2026 geta sjómenn nálgast upplýsingar um sig inn á Mínar síður á Island.is undir “Starfsleyfi” – “Starfsleyfi sjómanna”
Undir “Próf, nám og frestir” má nálgast upplýsingar um nám, námskeið, verkleg próf vegna skemmtibátaskírteina, sveinspróf, gilda fresti vegna öryggisfræðslunámskeiða, fjarskiptaréttindi, gild alþjóðleg sjómannalæknisvottorð og staðfestingar til erlends fánaríkis um gildi alþjóðlegra atvinnuskírteina.
Undir “Atvinnuskírteini” birtast gild atvinnuskírteini, hæfnisskírteini, skemmtibátaskírteini, þar á meðal skírteinistegund, réttindaflokkur og gildislokadagsetning, áritanir erlends sjómanns til starfa á íslenskum skipum. Auks þess gild atvinnuskírteini sem leiðsögumaður skipa, hafnsögumaður skipa, réttindi á björgunarskip og atvinnukafaraskírteini. Á síðunni eru réttindaflokkar útlistaðir: “Nánar um réttindaflokka skírteina”
Undir “Lögskráningar” birtast heildarlögskráningardagar, siglingatími eftir stöðu og skipaflokkum, auk upplýsinga um gildar undanþágur og gildar sjóferðabækur.
Samgöngustofa vill hvetja sjómenn að kynna sér þessar upplýsingar og fylgjast vel með gildistíma sinna atvinnuskírteina, læknisvottorða og öryggisnámskeiða og annarra réttinda. Mikilvægt er að sækja tímanlega um endurnýjanir atvinnuskírteina hjá Samgöngustofu og skrá sig á tímanlega á öryggisnámskeið hjá Slysavarnaskóla sjómanna svo lögskráning geti gengið snurðulaust fyrir sig.
Ef upplýsingar eru rangar eða vantar eru sjómenn hvattir til að senda Samgöngustofu tölvupóst og viðeigandi gögn á sigling@samgongustofa.is
Upplýsingar þessar eru byggðar á lögskráningarkerfi sjómanna, eða Skútunni, sem tekin var í notkun í maí 2023: https://island.is/s/samgongustofa/frett/ny-skipaskra-og-loegskraning-sjomanna
Verðbólga mældist 5,6% í ágúst og hefur hún ekki mælst hærri í tvö ár. Verðbólgan er því komin yfir 4,7% viðmið kjarasamninganna og þar með er ljóst að verðlagsforsendur þeirra eru brostnar. Formenn aðildarfélaga SGS komu saman til upplýsinga- og samráðsfundar á dögunum til að ræða meðal annars forsenduákvæði kjarasamninga og stöðuna sem nú blasir við launafólki. Ljóst er að kjaramálin verða í brennidepli á næsta formannafundi SGS, sem boðaður hefur verið 10. september nk., þar sem farið verður yfir stöðuna og næstu skref metin. Til viðbótar má geta þess að stjórn og trúnaðarráð Framsýnar mun funda næsta mánudag um stöðuna sem komin er upp varðandi forsendur gildandi kjarasamninga.
Miðvikudaginn 2. september skrifuðu Framsýn og Fjallalamb undir samkomulag um kaup og kjör starfsfólks í sláturhúsi fyrirtækisins á Kópaskeri. Eins og fram hefur komið í fjölmiðlum hafa fjársterkir aðilar samþykkt að koma að rekstri fyrirtækisins með auknu hlutafé. Um er að ræða afskaplega ánægjuleg tíðindi. Hefð er fyrir því að fulltrúar frá Framsýn og Fjallalambi setjist niður á haustin og semji um kaup og kjör starfsmanna fyrirtækisins við sauðfjárslátrun það haustið. Töluverð óvissa hefur verið með áframhaldandi rekstur Fjallalambs og margir hafa haft áhyggjur af því að reksturinn legðist af í haust, en svo verður ekki, þökk sé fjársterkum aðilum sem ákveðið hafa að veðja á frekari rekstur Fjallalambs. Björn Víkingur Björnsson framkvæmdastjóri Fjallalambs og Aðalsteinn Árni Baldursson formaður Framsýnar undirrituðu samninginn en slátrun hjá Fjallalambi hefst á næstu dögum. Búið er að ráða starfsfólk í flestar stöður. Reiknað er með að slátrað verði fleira fé í ár á sláturhúsinnu en á síðasta ári.
Stjórn og trúnaðarráð Framsýnar ásamt stjórn Framsýnar- ung koma saman til fundar mánudaginn 7. september kl. 17:00 í fundarsal félagsins. Að venju eru fjölmörg mál á dagskrá fundarins:
Dagskrá:
1. Fundargerð síðasta fundar
2. Inntaka nýrra félaga
3. Þing ASÍ
4. Undirbúningsfundur ASÍ
5. Þing AN
5. Ungliðafundur SGS
6. Kjaramál – umboð SGS/LÍV
7. Erindi sem borist hafa félaginu
8. Styrkur til Tónkvíslarinnar
9. Styrkur- Rokkað gegn Sjálfsvígum
10. Fundargerðarbækur félagsins
11. Formannafundur LÍV
12. Samkomulag við Fjallalamb
13. Sumarferð stéttarfélaganna
14. Atvinnumál á félagssvæðinu
15. Sameining stéttarfélaga
16. Starfsmannamál-umsjónarmaður fasteigna
17. Formannafundur SGS
18. Önnur mál
Viðræður eru hafnar milli Framsýnar og Fjallalambs hf. varðandi kjör starfsfólks í sláturhúsi fyrirtækisins á Kópaskeri í haust. Eins og fram hefur komið í fjölmiðlum hafa fjársterkir aðilar samþykkt að koma að rekstri fyrirtækisins með auknu hlutafé. Um er að ræða afskaplega ánægjulega frétt. Hefð er fyrir því að fulltrúar frá Framsýn og Fjallalambi setjist niður á haustin og semji um kaup og kjör starfsmanna fyrirtækisins við sauðfjárslátrun það haustið. Fulltrúar samningsaðila stefna að því að klára viðræðurnar áður en sláturtíðin hefst í byrjun september. Töluverð óvissa hefur verið með áframhaldandi rekstur Fjallalambs og margir hafa haft áhyggjur af því að reksturinn legðist af í haust, en svo verður ekki, þökk sé fjársterkum aðilum sem ákveðið hafa að veðja á frekari rekstur Fjallalambs.
Starfsmannafélag Húsavíkur í samráði við Norðurþing hefur samþykkt að færa Borgarhólsskóla á Húsavík ákveðið fjármagn til kaupa á búnaði til að efla þroska og færni barna við leik og störf í grunnskólanum. Tilgangurinn með gjöfinni er ekki síst að efla enn frekar allt skólastarf í Borgarhólsskóla. Félagið hafði áður fært Grunnskólanum í Lundi og Leikskólanum Grænuvöllum sambærilega gjöf.
Fjármagnið kemur úr Starfsmenntasjóði Starfsmannafélags Húsavíkur sem fjármagnaður er með framlögum frá sveitarfélaginu Norðurþingi. Á meðfylgjandi mynd er Hermína Hreiðarsdóttir formaður STH og Þórgunnur Reykjalín Vigfúsdóttir skólastjóri Borgarhólsskóla. Myndin var tekin við afhendinguna í dag.
Því miður virðist sem stjórnvöld og fjármálaöflin í landinu hafi ekki áhyggjur af því að kjarasamningar séu í fullkomu uppnámi. Hvar er ábyrgðin?
Meðfylgjandi þessari frétt er grein sem verkalýðsforingjarnir, Halla Gunnarsdóttir, Jakob Tryggvason, Andri Reyr Haraldsson, Eiður Stefánsson, Gunnar Sigurðsson og Óskar Hafnfjörð Gunnarsson skrifuðu nýlega inn á visi.is.
„Á meðan athygli stjórnmálamanna og kjósenda beinist að þjóðaratkvæðagreiðslu um ESB tikkar klukkan á vinnumarkaði. Þann 27. ágúst nk. verður vísitala neysluverðs birt og ársverðbólga mun mælast svo há að forsendur kjarasamninga bresta. Mánuðum saman hefur verkalýðshreyfingin kallað eftir aðgerðum og viðbrögðum frá bæði stjórnvöldum og fyrirtækjum, en án árangurs.“ https://www.visir.is/g/20262919059d/sumar-an-adgerda
Jarðböðin í Mývatnssveit eru orðin afar glæsileg eftir breytingarnar sem unnið hefur verið að síðustu mánuði og ár. Samkvæmt samkomulagi við Jarðböðin eiga félagsmenn stéttarfélaganna í Þingeyjarsýslum rétt á 15% afslætti fari þeir í böðin. Biðja þarf um afsláttinn þegar greitt er í Jarðböðin. Sé þess óskað þurfa félagsmenn að framvísa launaseðli sem staðfestir að þeir séu að greiða í Framsýn eða aðildarfélög Skrifstofu stéttarfélaganna. Þá er alltaf hægt, það er á opnunartíma, að koma við á skrifstofunni og fá staðfestingu um að viðkomandi aðili sé félagsmaður í stéttarfélögunum áður en haldið er í böðin.
Á Þeistareykjum er fjölnýtingarhús að rísa en þar verða nokkur sérhönnuð rými sem falla vel að starfsemi á sviði fjölnýtingar jarðhita. GeoSilica verður fyrsti leigjandinn. (Frétt fengin frá Landsvirkjun, meðfylgjandi mynd tengist ekki fréttinni beint þrátt fyrir að vera tekin á Þeistareykjum)
Því miður náðist ekki næg þátttaka í sumarferð stéttarfélaganna í Fjörður laugardaginn 15. ágúst. Ferðinni hefur því verið aflýst.
Mbl segir frá því í dag og reyndar Morgunblaðið líka að fjölmargir tilvonandi og nýbakaðir foreldrar hafi að undanförnu vakið athygli á örðugum samskiptum sínum við Fæðingarorlofssjóð og lýsa margir reynslu sinni sem vonlausri baráttu við ópersónulegt kerfi þar sem lítill skilningur ríki. Sjá fréttina á mbl.is https://www.mbl.is/frettir/innlent/2026/07/27/vonlaus_baratta_vid_faedingarorlofssjod/
Skrifstofa stéttarfélaganna á Húsavík tekur heilshugar undir með þeim fjölmörgu sem gert hafa athugasemdir við afgreiðslu Fæðingarorlofssjóðs og getið er um í frétt mbl.is. Dæmi eru um að félagskonur sem hafi veikst á meðgöngu hafi leitað aðstoðar hjá starfsmönnum skrifstofunnar vegna samskipta þeirra við Fæðingarorlofsjóðs þar sem þær telja sig mæta miklu skilningsleysi.
Háskólinn á Bifröst kynnir nýtt örnám í frumkvöðlastarfi sem kennt er á ensku og er sérhannað fyrir þá sem hafa ekki íslensku að móðurmáli, en vilja taka fyrstu skrefin í háskólanámi. Námsleiðin Frumkvöðlastarf (e. Entrepreneurship) samanstendur af þremur samtengdum fjarnámskeiðum: Frumkvöðlastarf og nýsköpun, Frumkvöðlastarf á Íslandi – að koma rekstri á fót og hagnýt hönnunarhugsun (samtals 18 ECTS), sem kennd verða haustið 2026. Kennsla hefst 24. ágúst og stendur til 4. desember 2026.
Í náminu öðlast þátttakendur innsýn í íslenska nýsköpunar- og sprotaumhverfið og fá að kynnast verkfærum sem stuðla að eigin frumkvöðlavirkni. Félagsmenn Framsýnar sem sækja námið eiga rétt á styrkjum hjá félaginu.
Námsleiðinni er stjórnað af frumkvöðlum sem búa yfir mikilli reynslu af nýsköpun og rekstri. Þau eru Fida Abu Libdeh stofnandi GeoSilica Iceland, Arnar Sigurðsson sérfræðingur í skapandi nýsköpun og Michael Hendrix stofnandi Huldunótna á Íslandi og fyrrverandi yfirmaður IDEO, USA.
Markmið námsleiðarinnar er að auðvelda þeim sem eru ekki íslenskumælandi að hefja háskólanám og tengjast íslensku samfélagi. Námskeiðin veita nemendum tækifæri til að þróa eigin viðskiptahugmyndir, nýta hönnunarhugsun í nýsköpun, kynnast íslensku sprotaumhverfi og stuðningsúrræðum og öðlast innsýn í fjármögnun og rekstur eigin fyrirtækis. Þannig styrkja þátttakendur færni sína til þátttöku á íslenskum vinnumarkaði.
Skráning er opin til 9. ágúst 2026. Nánari upplýsingar og skráning er að finna á vefsíðu Háskólans á Bifröst (íslenskri og enskri útgáfu).
Allar frekari upplýsingar um námsleiðina veitir Anna Hildur Hildibrandsdóttir, fagstjóri skapandi greina (annah@bifrost.is).
https://www.bifrost.is/namid/felagsvisindadeild/entrepreneurship
English Version: New micro-credential in entrepreneurship
Bifröst University announces a new micro-credential in entrepreneurship taught in English, specifically designed for immigrants and other students who do not speak Icelandic as a first language. This program helps participants take their first steps toward higher education while exploring Iceland’s startup and innovation ecosystem. The “Entrepreneurship in Iceland” micro-credential consists of three connected online courses, totaling 18 ECTS, offered during the autumn 2026 semester. It is led by experienced practitioners: Fida Abu Libdeh (founder of GeoSilica Iceland), Arnar Sigurðsson (innovation expert), and Michael Hendrix (former IDEO executive and founder of Huldunótna in Iceland).
In this program, students develop key entrepreneurial skills and networks. They will learn to develop and validate business ideas, apply design thinking to innovation, learn about Iceland’s startup support structures, and gain insight into financing and operating their own business. The aim is to make higher education accessible to those without Icelandic language skills, thus bridging them into university studies.
The micro-credential is taught through three courses during the autumn semester of the 2026-2027 school year:
Registration is open until August 9, 2026. More information and application details are available on Bifröst University’s website (Icelandic and English).
Media inquiries can be directed to Anna Hildur Hildibrandsdóttir, (annah@bifrost.is).
Further information: https://www.bifrost.is/namid/felagsvisindadeild/entrepreneurship
| | Anna Hildur Hildibrandsdóttir Fagstjóri skapandi greina // Programme Leader for Creative Industries |
| Tölvupóstur // E-mail. annah@bifrost.is |
Um síðustu helgi kom formaður Verkalýðsfélags Suðurlands, Guðrún Elín Pálsdóttir, í heimsókn ásamt fylgdarliði í höfuðstöðvar stéttarfélaganna í Þingeyjarsýslum á Húsavík. Fengu þau góða kynningu á starfi Framsýnar auk þess sem þau spurðu mikið út í atvinnulífið á svæðinu. Virkilega fróðleiksfús hópur og reyndar vel inn í málefnum svæðisins. Það er alltaf ánægjulegt að taka á móti góðum gestum og samstarfsfólki úr verkalýðshreyfingunni.
Verkalýðsfélag Þórshafnar stóð fyrir glæsilegri afmælishátíð í gær á afmælisdegi félagsins, en félagið varð 100 ára í gær, 16. júlí. Boðið var upp á hátíðardagskrá í félagsheimilinu á Þórshöfn auk þess sem nokkrir gestir fluttu stutt ávörp í tilefni tímamótana. Boðið var upp á kvöldverð og tertu auk þess sem skemmtidagskrá stóð yfir fram eftir kvöldi.
Í dag, 16. júlí, fagnar Verkalýðsfélag Þórshafnar 100 ára afmæli sínu. Aldarafmæli félagsins hefur verður fagnað á ýmsan hátt og í dag, á sjálfan afmælisdaginn, býður félagið upp á fjölskyldusýningar í íþróttahúsinu kl. 14:00 og 16:00, veitingar í Holtinu kl. 18:30 og tónleika með Hundi í óskilum kl. 21:00. Nánari dagskrá má sjá hér. Fulltrúar frá aðildarfélögum Skrifstofu stéttarfélaganna á Húsavík eru komnir austur til að gleðjast með heimamönnum enda mjög gott samstarf milli félaganna í Þingeyjarsýslum. Það verður eitthvað.
Framsýn, Þingiðn og Starfsmannafélag Húsavíkur óska félagsmönnum, stjórn og starfsfólki Verkalýðsfélags Þórshafnar innilega til hamingju með þennan merka áfanga. Megi félagið halda áfram að vaxa og dafna um ókomin ár.