Á aðalfundinum stóð Jónas A. Sævarsson upp undir liðnum „Önnur mál“ og þakkaði starfsmönnum og forsvarsmönnum félagsins fyrir vel unninn störf í þágu Framsýnar. Undir það tóku aðrir fundarmenn. Guðný I. Grímsdóttir notaði einnig tækifærið og sagði afar mikilvægt fyrir félag eins og Framsýn að hafa öflugan varaformann, Ósk Helgadóttir. Fundarmenn stóðu upp og klöppuðu fyrir starfsmönnum og forsvarsmönnum félagsins um leið og Ósk kallaði starfsmenn stéttarfélaganna upp og færði þeim blóm frá félagsmönnum fyrir framlag þeirra í þágu félagsins. Formaður þakkaði hlýhug fundarmanna í garð starfsmanna sem þau kynnu vel að meta enda krefjandi að starfa að verkalýðsmálum sem væri ekki alltaf auðvelt.

Aðalfundur Framsýnar samþykkti að hefja viðræður við Þingiðn og Starfsmannafélag Húsavíkur um sameiningu félaganna en þau hafa um árabil tekið sameiginlega skrifstofu á Húsavík. Reynist vilji til þess að sameina félögin og sé það framkvæmanlegt, verði stjórnum þeirra falið að  meta niðurstöðuna og bera hana undir félagsfundi í hverju félagi fyrir sig. Markmiðið verði að endanleg niðurstaða, hvað sameininguna varðar, liggi fyrir á aðalfundum félaganna vorið 2027. Formanni og varaformanni var falið að fylgja málinu eftir fh. félagsins.

Sjálfkjörið var í stjórnir, ráð og nefndir á vegum Framsýnar fyrir komandi kjörtímabil sem er til tveggja ára, það er frá aðalfundinum 2026 til aðalfundarins 2028. Á fundinum komu ekki fram aðrar tillögur um félagsmenn í trúnaðarstöður fyrir félagið og var því listi fráfarandi stjórnar og trúnaðarráðs sjálfkjörinn. Tveir nýir og öflugir stjórnarmenn koma inn í aðal- og varastjórn. Nanna Steina Höskuldsdóttir frá  Raufarhöfn kemur ný inn í aðalstjórn en hún hefur ekki starfað áður fyrir félagið og Sólveig Mikaelsdóttir kemur inn í varastjórn en hún hefur setið í trúnaðarráði félagsins. Magnaðar konur á ferð. Eru þær boðnar velkomnar til starfa. Á meðfylgjandi mynd er Nanna Steina með fundarstjóra aðalfundarins sem jafnframt er varaformaður Framsýnar.

Fjármálastjóri Framsýnar, Elísabet Gunnarsdóttir, fór yfir ársreikning félagsins á aðalfundinum. Ársreikingurinn er endurskoðaður af PWC sem gerir ekki athugasemdir við rekstur félagsins. Þess í stað fara þeir mjög fögrum orðum um rekstur og starfsemi félagsins.

Fjárhagsleg afkoma félagsins var góð á árinu 2025. Félagsmönnum fækkaði lítillega á milli ára úr 3.048 iðgjaldagreiðendum í 3.034 eða um 14 félagsmenn. Rekstrarafgangur var af öllum sjóðum félagsins nema fræðslusjóði. Þess ber að geta að Fræðslusjóður Framsýnar hefur ekki fastar tekjur, aðrar en fjármagnstekjur, en veitir félagsmönnum viðbótarstyrki til starfsmenntunar þegar rétti þeirra er lokið úr kjarasamningsbundnum fræðslusjóðum s.s. Landsmennt, Ríkismennt, Sveitamennt, Sjómennt og Fræðslusjóði verslunarmanna. Ekki er lagt upp með að Skrifstofa stéttarfélaganna skili hagnaði enda skal rekstur hennar skiptast á deildir Framsýnar, Þingiðnar og STH. Rekstrartekjur félagsins námu kr. 469,8 milljónum sem er hækkun um 11,7% milli ára. Skýrist að mestu af söluhagnaði. Félagsgjöld og iðgjöld námu kr. 381 milljón 2025 á móti kr. 369,2 milljónum á árinu 2024 sem er hækkun upp á um 3,25%. Rekstrargjöld hækka óverulega á milli ára en þau námu kr. 324 milljónum 2025 samanborið við 323 milljónir árið á undan. Bætur og styrkir úr sjúkrasjóði er stærsti einstaki útgjaldaliður Framsýnar. Rekstur skrifstofunnar gekk vel á síðasta ári. Þátttaka Framsýnar í rekstri nam kr. 78 milljónum. Þingiðn og Starfsmannafélag Húsavíkur greiddu saman kr. 6,5 milljónir til rekstursins. Fjármagnstekjur námu kr. 134 milljónum en voru 144,2 milljónir á árinu 2024. Í árslok 2025 var tekjuafgangur félagsins kr. 267,7 milljónir en var kr. 232,9 milljónir árið 2024. Heildareignir félagsins námu kr. 3.496 milljónum í árslok 2025 samanborið við kr. 3.208 milljónir í árslok 2024. Útistandandi iðgjöld í lok árs eru kr. 41,6 milljónir í árslok 2025 samanborið við kr. 44 milljónir í árslok 2024. Skammtímaskuldir lækka á milli ára og fara úr kr. 86,2 milljónum í 70,4 milljónir. Leiðrétting var gerð á eigin fé frá fyrri árum, samtals að fjárhæð 36,2 milljónir. Þessi leiðrétting er vegna ótekjufærðra iðgjalda frá árunum 2017 og fyrr.

Á næstu dögum munum við fjalla um aðalfund Framsýnar sem fram fór 20. maí í máli og myndum. Að venju fór fundurinn vel fram og miklar og góðar umræður urðu um starfsemi félagsins. Fram kom mikil ánægja með starfsemina og stöðu félagsins. Fundarmenn sáu ástæðu til að klappa fyrir starfinu. Alls greiddu 3.034 félagsmenn til Framsýnar stéttarfélags á árinu 2025 en greiðandi félagar voru 3.043 árið 2024. Af þeim sem greiddu félagsgjald til Framsýnar á síðasta ári voru 1.881 karlar og 1.153 konur, sem skiptist þannig að konur eru 38% og karlar 62% félagsmanna. Á undanförnum árum hefur karlmönnum heldur fjölgað umfram konur í félaginu ekki síst vegna tilkomu PCC. Um síðustu áramót voru gjaldfrjálsir félagsmenn samtals 303, það eru aldraðir og öryrkjar sem ekki eru á vinnumarkaði. Á hverjum tíma falla um 10% félagsmanna undir þessa skilgreiningu. Fjölmennustu hóparnir innan Framsýnar starfa við matvælaframleiðslu, ferðaþjónustu, almenn verslunarstörf, iðnað og hjá ríki og sveitarfélögum. Félagsmenn Framsýnar stéttarfélags voru samtals 3.337 þann 31. desember 2025, það er greiðandi og gjaldfrjálsir félagsmenn. Stærstu greiðendur iðgjalda samkvæmt ákvæðum kjarasamninga til Framsýnar 2025 eru eftir röð:

Sveitarfélagið Norðurþing

PCC BakkiSilicon hf.

Ríkissjóður Íslands

GPG. Seafood ehf.

Kjarnafæði-Norðlenska hf.

Þingeyjarsveit

Íslandshótel hf.

Jarðboranir hf.

Kaldvík hf.

Húsheild ehf.

Samherji fiskeldi ehf.

Hermína Hreiðarsdóttir formaður Starfsmannafélags Húsavíkur fór yfir starfsemi félagsins á aðalfundinum og Elísabet Gunnarsdóttir fjármálastjóri félagsins gerði grein fyrir ársreikningum félagsins. Fundurinn fór fram í fundarsal stéttarfélaganna. Hér verður stiklað á stóru hvað varðar yfirferð formanns og fjármálastjóra:

Fjöldi virkra félagsmanna STH sem greiddu að meðaltali í félagssjóð árið 2025 skv. félagatali í DK voru 77 en voru 73 á sama tíma í fyrra. Félagsmönnum hefur því fjölgað aðeins milli ára. Samkvæmt lögum BSRB skal tala fulltrúa miðast við félagatölu eins og hún reyndist í janúar það ár sem halda skal þing BSRB. Til viðbótar þessum fullgildu félagsmönnum bætast við gjaldfrjálsir félagsmenn. Áætlaður fjöldi þeirra er um 10% af greiðandi félögum á hverjum tíma.

Félagsgjöld og iðgjöld ársins 2025 námu kr. 13.511.584,-  en voru kr. 12.304.624,- árið á undan. Rekstrargjöld voru kr. 15.812.685,- og hækkuðu því milli ára úr kr. 11.259.269,-. 

Fjármunatekjur voru kr. 3.001.400,- samanborið við kr. 3.348.824,- árið á undan.  

Samkvæmt sameinuðum rekstrar- og efnahagsreikningi nam tekjuafgangur félagsins kr. 64.668.433,- samanborið við kr. 7.202.865,- tekjuafgang frá fyrra ári. Þar af er söluhagnaður kr. 60.959.599. Heildareignir í árslok voru kr. 155.333.172,- og eigið fé nam kr. 152.417.023,-. Hefur það aukist um 74% frá fyrra ári. Rekstur Skrifstofu stéttarfélaganna gekk vel á síðasta ári. Þátttaka Starfsmannafélagsins í rekstrarkostnaði nam kr. 2.449.754,-.

Félagið gekk frá endurnýjuðum stofnanasamningi við Framhaldsskólann á Húsavík. Þá var jafnframt gengið frá endurnýjuðum stofnanasamningi við HSN á vegum starfsmannafélaga innan BSRB á Norðurlandi sem aðild eiga að samningnum.

Aðildarfélög Skrifstofu stéttarfélaganna eiga mjög gott samstarf um orlofsmál. Í því sambandi eru þau með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands.

5 félagsmenn fengu greidda tjaldstæðisstyrki á árinu 2025, samtals kr. 124.930,-.

Á síðasta starfsári seldi félagið orlofsíbúðina í Sólheimum í Reykjavík. Söluverðið var kr. 66.000.000,-. Í stað íbúðarinnar í Sólheimum var nýlega gengið frá kaupum á íbúð í Þorrasölum 1-3 í Kópavogi. Kaupverðið er kr. 67.900.000,-. Það er í sama fjölbýlishúsi og Þingiðn og Framsýn eiga orlofsíbúðir. Íbúðin ætti að komast í leigu til félagsmanna síðar í sumar. Með kaupum félagsins á íbúð í Þorrasölum verða allar orlofseignir stéttarfélaganna komnar í sama fjölbýlishús sem er af hinu góða og auðveldar auk þess allt eftirlit með íbúðum félaganna. Auk íbúðarinnar í Þorrasölum á félagið eitt orlofshús á Eiðum, líkt og var með íbúð félagsins í Sólheimum gekk rekstur orlofshússins vel á starfsárinu. Starfsfólk Skrifstofu stéttarfélaganna sér um að halda utan um úthlutun og rekstur á eignunum.

Á síðasta ári voru greiddir samtals kr. 1.470.400,- í námsstyrki til 19 félagsmanna. Þá fengu félagsmenn greiddar kr. 150.000,- í heilsustyrki frá félaginu.

Atvinnuástandið hjá félagsmönnum hefur almennt verið með miklum ágætum. Ekki er að sjá að sveitarfélögin á svæðinu muni draga úr starfsemi á komandi árum. Því ætti atvinnuástandið að haldast áfram gott hjá félagsmönnum.

Stéttarfélögin stóðu að venju fyrir hátíðarhöldum á Fosshótel Húsavík 1. maí. Boðið var upp á veglega hátíð þar sem heimamenn voru í aðalhlutverki ásamt góðum gestum. Þá var boðið upp á veglegt kaffihlaðborð. Hátíðarhöldin á Fosshótel Húsavík voru vel sótt og öllum til mikils sóma.

STH hefur komið að nokkrum málum frá síðasta aðalfundi. Ástæða er til að gera aðeins grein fyrir nokkrum þeirra: Aðildarfélög Skrifstofu stéttarfélaganna hafa komið upp góðu samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn.  

Félagið hefur komið að kynningum á starfsemi stéttarfélaga í grunnskólum á félagssvæðinu með öðrum aðildarfélögum Skrifstofu stéttarfélagsanna. Samþykkt var að styrkja Mærudagshátíðina á Húsavík sumarið 2025 um kr. 50.000,-. Félagið kom að því að niðurgreiða leikhúsferðir félagsmanna á leikrit á vegum Leikdeildar Eflingar sem var til sýnis eftir áramótin 2026.

Hlutverk trúnaðarmanna á vinnustað er mjög mikilvægt, bæði fyrir félagsmenn og ekki síst fyrir stjórn stéttarfélagsins og starfsfólk þess. Hlutverk og staða trúnaðarmanna er ákveðin bæði í lögum og í kjarasamningum. STH hefur lagt mikið upp úr því að hafa öfluga trúnaðarmenn á vinnustöðum. Til að efla þekkingu trúnaðarmanna eru reglulega haldin trúnaðarmannanámskeið fyrir trúnaðarmenn stéttarfélaganna sem aðild eiga að Skrifstofu stéttarfélaganna, nú síðast í mars 2026.

Verkalýðsfélag Þórshafnar hefur undanfarin ár verið með þjónustusamning við Skrifstofu stéttarfélaganna varðandi þjónustu við félagsmenn. Samstarf aðila hefur verið með miklum ágætum.    

Aðildarfélög Skrifstofu stéttarfélaganna mynda með sér Fulltrúaráð sem skipað er formönnum þessara félaga. Fulltrúaráðinu er ætlað að fylgjast með sameiginlegri starfsemi félaganna, ekki síst sem viðkemur rekstri skrifstofunnar. Fulltrúaráðið kemur saman til fundar eftir þörfum.

Rekstur á sameiginlegum eignum stéttarfélaganna hefur gengið vel. Félögin eiga í sameiningu skrifstofuhúsnæðið að Garðarsbraut 26 á Húsavík. Þá eiga Framsýn og Þingiðn efri hæðina í sömu byggingu sem ber nafnið Hrunabúð sf. Húsnæðið var málað að utan í sumar auk þess sem skipt var um glugga á efri hæðinni, það er á norðurhliðinni.

Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Framsýn og Þingiðn. Þar starfa í dag 6 starfsmenn í 4,8 stöðugildum. Að auki hafa 4 starfsmenn verið í hlutastörfum hjá stéttarfélögunum við að þjónusta orlofsíbúðir í Kópavogi, Akureyri og í Öxarfirði. Starfshlutfall þeirra er um 30% að meðaltali. Eftir sölu félagsins á íbúð félagsins í Sólheimum var gengið frá starfslokum við Halldór Guðnason sem starfað hefur sem húsvörður fyrir Starfsmannafélagið í Sólheimum í tæp 20 ár. Full ástæða er til að þakka Halldóri fyrir hans störf í þágu félagsins í tvo áratugi. Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla.  Ekki eru fyrirsjáanlegar breytingar á rekstri skrifstofunnar.

Á aðalfundi Starfsmannafélags Húsavíkur í gær var ákveðið að færa skólastofnunum í sveitarfélaginu Norðurþingi gjafir til að efla nemendur í leik og starfi. Það á bæði við um grunn- og leikskóladeildir. Starfsmennasjóður STH mun bera kostnað að verkefinu en sjóðurinn er í eigu Norðurþings og Starfsmannafélags Húsavíkur sem jafnframt tilnefna fólk í stjórn sjóðsins. Norðurþing hefur í gegnum tíðina greitt ákveðið gjald í sjóðinn af starfsmönnum sveitarfélagsins. Formanni STH var falið að fylgja málinu eftir með samtölum við skólastjórnendur í Norðurþingi en sveitarfélagið hafði áður samþykkt beiðni félagsins um að heimila því að færa stofnunum gjafir til að efla skólastarfið en sjóðnum er almennt ætlað að styðja við bakið á félagsmönnum sem fara í nám eða sækja námskeið sem gerir þá hæfari í starfi.

Á aðalfundi Starfsmannafélags Húsavíkur kom fram sterkur vilji til að sameinast Þingiðn og Framsýn enda félögin átt mjög gott samstarf um verkalýðsmál til margra ára. Aðalfundurinn fór fram í gær. Eftirfarandi yfirlýsing var samþykkt samhljóða:

Yfirlýsing
-Sameining stéttarfélaga í Þingeyjarsýslum-

„Fulltrúaráð stéttarfélaganna, Framsýnar, Þingiðnar og Starfsmannafélags Húsavíkur, skorar á aðalfundi félaganna 2026 að samþykkja að stéttarfélögin hefji viðræður um sameiningu félaganna. Viðræðum verði lokið fyrir 31. desember 2026.

Reynist vilji til þess að sameina félögin og sé það framkvæmanlegt, verði stjórnum þeirra falið að  meta niðurstöðuna og bera hana undir félagsfundi í hverju félagi fyrir sig. Markmiðið verði að endanleg niðurstaða, hvað sameininguna varðar, liggi fyrir á aðalfundum félaganna vorið 2027.

Þannig samþykkt á fundi í Fulltrúaráði stéttarfélaganna 18. maí 2026.“

Þess má geta að bæði Framsýn og Þingiðn hafa samþykkt að hefja viðræður um sameiningu félaganna, helst með Starfsmannafélagi Húsavíkur.

Hugtakið „hlaðinn starfsreynslu“ lýsir einstaklingi sem býr yfir mikilli, víðtækri og dýrmætri reynslu af vinnumarkaðinum. Það á svo sannarlega við um Kristbjörn Óskarsson sem hóf störf hjá Húsavíkurbæ fyrir 45 árum, sem sendill á bæjarskrifstofunni. Kiddi eins og hann er ávallt kallaður hóf störf hjá sveitarfélaginu þann 1. júní 1981. Frá árinu 2006 hefur Kiddi svo starfað fyrir Norðurþing eftir sameiningu sveitarfélaganna hér á svæðinu.

Í samtali við husavik.com kemur fram að hann hafi starfað með 7 sveitarstjórum, sá fyrsti var Bjarni Aðalgeirsson, þá Bjarni Þór Einarsson, næst Einar Njálsson, svo Reinhard Reynisson. Hjá Norðurþingi kom svo fyrstur Bergur Elías Ágústsson, svo Kristján Þór Magnússon og svo núna Katrín Sigurjónsdóttir. Þetta er allt hið vænsta fólk og hefur reynst mér vel segir Kiddi.

Þá segist hann í sama viðtali að hann ætli sér að ná 50 ára starfsafmælinu eftir 5 ár og jafnvel fjórum árum betur, því þá verði hann búinn að ná Ásu Gísla í starfsaldri, en hún var í 53 ár hjá bænum og hætti í febrúar á þessu ári.

Þrátt fyrir áfangann í gær var Kristbjörn mætur á aðalfund Starfsmannafélags Húsavíkur sem fram fór í gær. Hann hefur í gegnum tíðina ekki látið sig vanta á fundi í félaginu sem er honum afar kært enda lengi verið félagsmaður.

Á aðalfundi Þingiðnar sem fram fór í maí var Jónas Kristjánsson endurkjörinn sem formaður félagsins til næstu tveggja ára að telja. Á meðfylgjandi mynd er Jónas með tveimur fulltrúum úr stjórn þeim Þórði Aðalsteins og Hólmgeri R. Hreinssyni. Með þeim á myndinni er Kristinn sem var hér á árum áður í stjórn félagsins um árabil. Jónas Hallgrímsson var endurkjörinn sem varaformaður félagsins og Hermann Sigursson sem meðstjórnandi. Sjá nánar hér https://framsyn.is/thingidn/stjorn-og-nefndir/ um þá sem kjörnir voru í stjórnir, ráð og nefndir á vegum Þingiðnar á næsta kjörtímabili sem eru tvö ár.

Ekki gleyma aðalfundi Starfsmannafélags Húsavíkur mánudaginn 1. júní kl. 17:00. Mörg áhugaverð mál verða tekin til umræðu. Að sjálfsögðu verða góðar veitingar í boði. Stjórn STH

Framsýn stéttarfélag stendur fyrir árlegu kaffiboði á Raufarhöfn næstkomandi föstudag 5. júní kl. 15:00-17:00 í Félagsheimilinu Hnitbjörgum. Forsvarsmenn Framsýnar verða á staðnum.

Boðið verður upp á heimsins bestu tertur frá Kvenfélagi Raufarhafnar.

Öll velkomin!

Framsýn stéttarfélag

Framkvæmdir við byggingu nýs fjölnýtingarhúss við Þeistareyki eru hafnar. Húsið verður leigt til GeoSilica og standa vonir til að starfsemi geti hafist sumarið 2026. Það er reyndar margt fleira í gangi á Þeistareykjum, s.s. bygging nýrrar toppvélar og stækkun virkjunarinnar. Allt um það á framkvæmdavef Þeistareykja.

Aðalfundur Þingiðnar samþykkti að skýra betur reglugerð sjúkrasjóðs félagsins. Það er hvenær atvinnulausir félagsmenn eiga rétt á greiðslum úr sjóðnum og hvernig fara skuli með félagsmenn, það er konur á meðgöngu, það er réttarstaða þeirra í sjóðnum verði þær af atvinnutekjum á meðgöngu vegna veikinda. Breytingarnar eru feitletraðar.

Falli félagsmaður sem greitt hefur félagsgjald af atvinnuleysisbótum til félagsins út af atvinnuleysisbótum vegna eigin veikinda skal hann eiga rétt á sjúkradagpeningum í samræmi við reglugerð sjúkrasjóðs. „Falli réttur til atvinnuleysisbóta niður af öðrum ástæðum s.s. vegna þess að viðkomandi hafi klárað bótaréttinn hjá Atvinnuleysistryggingasjóði er dagpeningaréttur eigi til staðar.

Konur á meðgöngu sem klára veikindaréttinn hjá sínum atvinnurekendum, og eru í ráðningarsambandi, eiga rétt á sjúkradagpeningum. Þó ekki lengur en tveimur mánuðum fyrir fæðingu barns enda eigi viðkomandi aðili rétt á lengingu fæðingarorlofs vegna eigin veikinda á meðgöngu. Sama á við um ef viðkomandi fellur út af atvinnuleysisbótum vegna veikinda á meðgöngu.“

Framsýn stéttarfélag tekur heilshugar undir með VR, LÍV og Fagfélögunum sem fordæma vaxtahækkanir viðskiptabankanna sem tilkynntar voru fyrir helgi. Viðskiptabankarnir skiluðu hátt í 100 milljarða króna hagnaði á síðasta ári eftir skatta. Það samsvarar yfir 320 þúsund krónum á hvern fullorðinn landsmann. Þarna er svigrúm og þarna liggur samfélagsleg ábyrgð bankanna. Bankarnir eiga að taka á sig hluta af byrðum efnahagsástandsins.

Arðsemi eiginfjár allra bankanna hefur aukist jafnt og þétt og vaxtamunur eykst sömuleiðis. Bankarnir hagnast á stöðunni en á sama tíma þrengir enn frekar að heimilum landsins. Nú er svo komið að fjórir af hverjum tíu foreldrum á vinnumarkaði eiga erfitt með að ná endum saman og geta ekki mætt óvæntum útgjöldum upp á 100 þúsund krónur. Með öðrum orðum er fullvinnandi fólk í þeirri stöðu að ef þvottavélin bilar nær það ekki endum saman um mánaðamótin og jafnvel ekki þau næstu heldur.

Bankarnir eru stórir aðilar innan atvinnulífsins sem lofaði að við værum öll á sama báti þegar kæmi að baráttunni við verðbólgu. Launafólk mun ekki sætta sig við að bankarnir eða atvinnulífið hlaupist undan merkjum. Við krefjumst þess að vaxtahækkanir síðustu daga verði dregnar til baka, með það að markmiði að kjarasamningar haldi. Stjórnendur bankanna þurfa að sýna almenningi að þeir ætli að axla ábyrgð á ástandinu með launafólki.

Á aðalfundi Þingiðnar í maí urðu umræður um sameiningu stéttarfélaga í Þingeyjarsýslum. Áður hafði Fulltrúaráð stéttarfélaganna, sem skipað er fulltrúum frá Þingiðn, Framsýn og Starfsmannafélagi Húsavíkur samþykkt að skora á félögin að taka málið upp með eftirfarandi yfirlýsingu:

„Fulltrúaráð stéttarfélaganna, Framsýnar, Þingiðnar og Starfsmannafélags Húsavíkur, skorar á aðalfundi félaganna 2026 að samþykkja að stéttarfélögin hefji viðræður um sameiningu félaganna. Viðræðum verði lokið fyrir 31. desember 2026. Reynist vilji til þess að sameina félögin og sé það framkvæmanlegt, verði stjórnum þeirra falið að  meta niðurstöðuna og bera hana undir félagsfundi í hverju félagi fyrir sig. Markmiðið verði að endanleg niðurstaða, hvað sameininguna varðar, liggi fyrir á aðalfundum félaganna vorið 2027. Þannig samþykkt á fundi í Fulltrúaráði stéttarfélaganna 18. maí 2026.“

Eftir góðar umræður var samþykkt að taka vel í hugmyndina um að hefja viðræður við Framsýn og STH um að sameina félögin í eitt öflugt stéttarfélag, það er að skoða kosti þess og galla.

Aðalfundur Þingiðnar var haldinn í fundarsal stéttarfélaganna þann 19. maí 2026. Hér má lesa umfjöllun um fundinn:

Félagsmenn í Þingiðn voru samtals 95 þann 31. desember 2025, það er greiðandi félagar, öryrkjar og aldraðir sem áður greiddu til félagsins.  Greiðandi fullgildir félagsmenn eru samtals 86.

Félagsgjöld og iðgjöld ársins 2025 námu kr. 16.699.439 en námu kr. 18.311.634 árið á undan, sem er lækkun um 8,8%. Heildartekjur námu kr. 22.430.244 en námu kr. 22.545.500 árið á undan. Rekstrargjöld voru kr. 27.169.992 árið 2025 en voru kr. 33.857.501 árið á undan og lækkuðu því um 19,8% á milli ára. Tap  var af rekstri fyrir fjármagnsliði. Stærsti einstaki útgjaldaliður félagsins er sem fyrr bætur og styrkir úr sjúkrasjóði. Árið 2025 voru alls greiddir úr sjúkrasjóði styrkir eða sjúkradagpeningar til félagsmanna kr. 8.382.098, en voru árið á undan kr. 15.308.038. Fjármagnstekjur lækkuðu úr kr. 12.131.127 árið 2024 í kr. 7.728.317 árið 2025 sem gerir um 36,29% lækkun milli ára. Tekjuafgangur félagsins nam kr. 2.988.569 en hann var kr. 819.126 árið áður. 

Útistandandi iðgjöld standa í kr. 6.344.697 um áramót og hækkuðu um rúma milljón milli ára. 

Heildareignir í árslok voru kr. 293.120.732 og eigið fé nam kr. 284.015.397, hefur það aukist um 1% frá fyrra ári. Rekstur Skrifstofu stéttarfélaganna gekk vel á síðasta ári. Þátttaka Þingiðnar í rekstrarkostnaði nam kr. 4.018.396.

Aðildarfélög Skrifstofu stéttarfélaganna ásamt Verkalýðsfélagi Þórshafnar hafa í gegnum tíðina átt mjög gott samstarf um orlofsmál. Stéttarfélögin eru með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið stóraukið á liðnum árum með samningum við ferðaþjónustuaðila víða um land og Icelandair um afsláttarkjör fyrir félagsmenn milli landa. Þannig vilja félögin stuðla að því að félagsmenn geti notið þess að fara í frí innanlands. Þingiðn á eina íbúð í Þorrasölum 1-3 og aðra í Hraunholtinu á Húsavík. Þá eiga Þingiðn og Framsýn saman íbúð í gegnum Hrunabúð sf. að Garðarsbraut 26, efri hæð sem hefur verið í fastri útleigu. Á síðasta ári dvaldi fjöldi félagsmanna ásamt fjölskyldum sínum í orlofshúsum, orlofsíbúðum, á tjaldsvæðum og hótelum á vegum félagsins. Veruleg ásókn er í orlofshúsin en félagið niðurgreiðir orlofsdvöl félagsmanna í orlofsíbúðum/húsum  sem auðveldar fólki að njóta orlofsdvalar með fjölskyldum sínum á Íslandi. Ekki er óalgengt að niðurgreiðslurnar séu um kr. 50.000,- fyrir viku dvöl í þeim húsum sem félagið er með á leigu hjá öðrum aðilum. Þá fengu 11 félagsmenn endurgreiðslur á árinu 2025 vegna dvalar á tjaldsvæðum eða alls kr. 284.230,-. Árið á undan fengu 12 félagsmenn endurgreiðslur vegna dvalar á tjaldsvæðum eða alls kr. 269.365,-. Boðið var upp á sumarferð á vegum stéttarfélaganna 2025. Farið var í Flateyjardal og tókst ferðin í alla staði mjög vel. Ósk Helgadóttir varaformaður skipulagði ferðina með starfsmönnum  félaganna.

Á síðasta ári fengu 4 félagsmenn styrki úr fræðslusjóði félagsins til náms/námskeiða samtals kr. 544.303,-.

Tillaga stjórnar um að félagsgjaldið verði óbreytt milli ára, það er 0,7% af launum var samþykkt samhljóða. Tillaga stjórnar um að lágmarksfélagsgjaldið verði 0,3% af mánaðarlaunum iðnaðarmanna samkvæmt kjarasamningi Samiðnar og Samtaka atvinnulífsins var samþykkt samhljóða.  Tillaga stjórnar um að fræðslusjóðsgjaldið verði óbreytt milli ára, það er 0,3% af launum var samþykkt samhljóða.

Eins og fram kemur í ársreikningum félagins voru greiðslur til félagsmanna úr sjúkrasjóði félagsins samtals kr. 8.382.098,- á árinu 2025. Árið 2024 voru greiddar kr. 15.308.038,- í styrki til félagsmanna. Greiðslur til félagsmanna lækkuðu því verulega milli ára eða um 45%. Samkomulag er um það innan stjórnar félagsins að starfsmenn Skrifstofu stéttarfélaganna sjái um úthlutanir úr sjúkrasjóði í umboði stjórnar Þingiðnar. Almennt eru umsóknir úr sjóðnum teknar fyrir einu sinni í mánuði.

Atvinnuástandið hjá iðnaðarmönnum er almennt mjög gott um þessar mundir og mikið að gera hjá flestum ef ekki öllum iðnaðarmönnum enda hafa töluverðar framkvæmdir verið  í gangi á svæðinu.

Stéttarfélögin, Þingiðn og Framsýn, hafa frá árinu 2016 rekið öflugt vinnustaðaeftirlit á félagssvæðinu. Fullur vilji er til þess að halda áfram úti öflugu vinnustaðaeftirliti í fullu samráði við Alþýðusamband Íslands og helstu eftirlitsaðila í Þingeyjarsýslum. Heilt yfir er ástand vinnumarkaðarins á starfssvæðinu gott varðandi réttindi og kjör félagsmanna. Vitaskuld hafa annað slagið komið upp mál sem krefjast viðbragða, hjá því verður ekki komist.

Stéttarfélögin stóðu fyrir hátíðarhöldum 1. maí á Fosshótel Húsavík sem tókust afar vel en um 300 manns tóku þátt í hátíðarhöldunum.

Þingiðn hefur komið að mörgum málum frá síðasta aðalfundi. Ástæða er til að gera aðeins grein fyrir nokkrum þeirra: Félagið hefur komið upp samstarfi við Íslandsbanka þar sem aðilar frá stéttarfélögunum og útibúi bankans á Húsavík hittast reglulega og fara yfir þróun vaxtamála á reikningum stéttarfélaganna á hverjum tíma. Afar mikilvægt er að fylgst sé reglulega með þróun vaxtamála enda hefur ávöxtun félaganna á bankainnistæðum bein áhrif á starfsemi þeirra og getu til að gera vel við félagsmenn. Formaður félagsins sat fund með starfshóp forsætisráðherra um málefni PCC það sem skýrsla um viðbrögð hins opinbera voru kynnt. Það helsta í viðbrögðunum er að ráðinn verði verkefnastjóri til þess að hjálpa til við að koma fleiri fyrirtækjum á Bakka og nágrenni sem þegar hefur tekið til starfa. Um er að ræða tveggja ára verkefni sem er kostað af ríkinu 80% og sveitarfélaginu Norðurþingi 20%. Félagið hefur komið að kynningum á starfsemi stéttarfélaga í grunnskólum á félagssvæðinu með Framsýn stéttarfélagi. Félagið kom að því að halda tveggja daga trúnaðarmannanámskeið í mars 2026, það er með öðrum aðildarfélögum Skrifstofu stéttarfélaganna. Námskeiðið var vel sótt. Þriðjudaginn 30. september stóð Framsýn fyrir félagsfundi um atvinnu- og lífeyrismál. Gestir fundarins voru Kári Marís Guðmundsson framkvæmdastjóri PCC og Jóhann Steinar Jóhannsson framkvæmdastjóri Lsj. Stapa. Um 30 fundarmenn sóttu fundinn sem var bæði upplýsandi og góður. Fundurinn ályktaði um atvinnu- og lífeyrismál. Fundurinn var opinn félagsmönnum Þingiðnar.  Þann 21. janúar sl. stóð Framsýn fyrir opnum fundi um lífeyrismál og töku lífeyris fyrir félagsmenn í samráði við starfsmenn Lsj. Stapa. Gestir fundarins voru, Jóna Finndís Jónsdóttir, forstöðumaður réttindasviðs sjóðsins og Kristín Hilmarsdóttir sem sér um kynningar og vefmál sjóðsins. Félagsmönnum Þingiðnar var boðið að sitja fundinn sem var mjög fróðlegur. Samþykkt var að styrkja Mærudagshátíðina á Húsavík sumarið 2025 um kr. 100.000,-. Félagið kom að því að niðurgreiða leikhúsferðir félagsmanna á leikrit á vegum Leikdeildar Eflingar sem var til sýnis eftir áramótin 2026. Ráðist var í framkvæmdir við húsnæði stéttarfélaganna að Garðarsbraut 26 á Húsavík. Skipt var um alla glugga á norðurhlið hússins haustið 2025, efri hæð. Þá var húsið málað að utan sumarið 2025. Ástandið er því gott á húsnæðinu.

Rekstur Hrunabúðar sf. sem er í eigu Framsýnar og Þingiðnar hefur almennt gengið vel. Eignarhluturinn á efri hæðinni að Garðarsbraut 26 skiptist þannig: Framsýn á 84% og Þingiðn 16%. Félagið var stofnað á árinu 2017 utan um sameiginlegt eignarhald og sameiginlegan rekstur á efri hæð Garðarsbrautar 26. Heildarvelta félagsins árið 2025 var kr. 12,96 milljónir samanborið við kr. 12,88 milljóna veltu árið 2024. Tekjuafgangur ársins nam kr. 2,8 milljónum samanborið við kr. 3,5 milljón árið 2024. Einn starfsmaður starfaði hjá félaginu á árinu í hlutastarfi við ræstingar. Þess utan eru reiknuð stjórnunarlaun á rekstur Hrunabúðar og fram koma í ársreikningi félagsins.

Aðalfundur Framsýnar stéttarfélags fór fram í kvöld, miklar og heitar umræður urðu um kjaramál og yfirlýsingar Seðlabankastjóra fyrr í dag eftir stýrivaxtahækkun bankans. Svo virðist sem það sé mat bankans að verðbólgan og hátt vaxtastig í þjóðfélaginu sé verkalýðshreyfingunni einni að kenna. Ákveðið var að álykta um málið og senda út skýr skilaboð frá fundinum um stöðuna í efnahagsmálum. Að mati fundarmanna eru núverandi kjarasamningar í fullkomnu uppnámi vegna aðgerðarleysis stjórnvalda. Ekki þarf að taka fram að ályktunin var samþykkt samhljóða með lófaklappi. 

Ályktun fundarins:

„Aðalfundur Framsýnar stéttarfélags lýsir yfir þungum áhyggjum af þeirri stöðu sem er að teiknast upp í efnahagsmálum og atvinnumálum á landsbyggðinni. Stjórnvöldum hefur ekki tekist að ná böndum á verðbólgu og hátt vaxtastig leggur þungar byrðar á launafólk og atvinnulíf. Raunveruleg hætta er á frekari kólnun í hagkerfinu og að forsendur kjarasamninga aðila vinnumarkaðarins bresti þegar þeir koma til endurskoðunar í september 2026.

Framsýn stéttarfélag gagnrýnir harðlega forgangsröðun fjármála ríkis og sveitarfélaga. Stjórnvöld hafa ekki stutt við þau markmið sem sett voru við gerð kjarasamninga og í mörgum tilfellum ýtt undir verðbólgu með gjaldtöku og skattlagningu sem hefur bein áhrif á útgjöld heimila. Aðgerðir stjórnvalda hafa einnig neikvæð áhrif á atvinnulíf á óvissutímum og ógna heilsársstörfum í viðkvæmum byggðum, nú síðast með boðaðri skattahækkun á sjó- og baðlón víða um land.

Framsýn stéttarfélag mun áfram sem hingað til berjast fyrir bættum kjörum félagsmanna fyrir mannsæmandi launum, öruggu starfsumhverfi og velferð sem stendur undir nafni. Því miður hefur borið á því að lagasetningar og boðaðar breytingar á velferðarkerfinu séu settar fram án nægilegs samráðs við verkalýðshreyfinguna og stundum með þeim hætti að þær bitni harðast á þeim sem hafa minnst milli handanna, ekki síst á landsbyggðinni. 

Aðalfundurinn krefst þess að ríkistjórn sem kennir sig við jöfnuð og réttlæti virði skoðanir heildarsamtaka launafólks, ekki síst með góðu samstarfi á jafnréttisgrundvelli.“ 

Aðalfundur Þingiðnar verður haldinn þriðjudaginn 19. maí kl. 20:00 í fundarsal stéttarfélaganna.  

Dagskrá:

1.   Venjuleg aðalfundarstörf
a) Kjör á starfsmönnum fundarins
b) Skýrsla stjórnar
c) Ársreikningar
d) Umræður um skýrslu stjórnar og ársreikninga
e) Lýst kjöri í trúnaðarstöður í félaginu
f) Kosning löggilts endurskoðanda/endurskoðunarskrifstofu
g) Lagabreytingar
h) Ákvörðun árgjalda
i) Laun aðalstjórnar, trúnaðarráðs, nefnda og stjórna innan félagsins

2. Önnur mál

Athygli er vakin á 24. grein laga félagsins – Ráðstöfun úr sjóðum félagsins:
Tillögur stjórnar, trúnaðarráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

Tillögur stjórnar og trúnaðarráðs sem liggja fyrir aðalfundinum eru aðgengilegar félagsmönnum á Skrifstofu stéttarfélaganna.

Að venju er skorað á félagsmenn að fjölmenna á fundinn, enda þátttaka félagsmanna í starfinu forsendan fyrir öflugu starfi félagsins. Á fundinum verður boðið upp á hefðbundnar kaffiveitingar og skemmtilegar samræður.

Þingiðn félag iðnaðarmanna

Aðalfundur Framsýnar stéttarfélags verður haldinn miðvikudaginn 20. maí 2026 kl. 20:00 í fundarsal stéttarfélaganna.  

Dagskrá:
1.   Venjuleg aðalfundarstörf
a) Félagaskrá
b) Skýrsla stjórnar
c) Ársreikningar
d) Umræður um skýrslu stjórnar og ársreikninga
e) Kjör í stjórnir, nefndir og ráð
f) Kosning löggilts endurskoðanda/endurskoðunarskrifstofu
g) Lagabreytingar
h) Ákvörðun árgjalda
i) Laun aðalstjórnar, trúnaðarráðs, nefnda og stjórna innan félagsins

2. Önnur mál
a) Ályktun um kjaramál
b) Tillaga um kaup á stofnfé í Sparisjóði Þingeyinga
c) Sameining stéttarfélaga í Þingeyjarsýslum

Athygli er vakin á 32. grein laga félagsins – Ráðstöfun úr sjóðum félagsins:
Tillögur stjórnar, trúnaðarráðs og félagsmanna um meiriháttar ráðstöfun úr sjóðum félagsins sem bornar eru upp á aðal- eða félagsfundi til samþykktar, skal lýst í fundarboði. Berist slík tillaga eftir fundarboð, er hún tæk fyrir fundinn hafi hún borist stjórn félagsins með skriflegum hætti eigi síðar en 10 dögum fyrir boðaðan fund. Skal þá stjórn félagsins fjalla um tillöguna og láta hana liggja frammi á skrifstofu félagsins til kynningar fyrir félagsmenn í a.m.k. 5 virka daga.

Tillögur stjórnar og trúnaðarráðs sem liggja fyrir aðalfundinum eru aðgengilegar félagsmönnum á Skrifstofu stéttarfélaganna.

Að venju er skorað á félagsmenn að fjölmenna á fundinn, enda þátttaka félagsmanna í starfinu forsendan fyrir öflugu starfi félagsins. Á fundinum verður boðið upp á hefðbundnar kaffiveitingar og þá fá allir fundargestir glaðning frá félaginu. Sjáum hress.

Framsýn stéttarfélag