Stjórn Framsýnar telur mikilvægt að unnið verði að því að bæta aðflugstæki á Húsavíkurflugvelli sem þarfnast endurnýjunar auk þess sem skoðað verði hagkvæmni þess að gera flugvöllinn að millilandaflugvelli enda völlurinn vel staðsettur hvað það varðar. Ályktunin er svohljóðandi:
Ályktun
Um Húsavíkurflugvöll
„Framsýn, stéttarfélag skorar á flugmálayfirvöld að tryggja flugöryggi um Húsavíkurflugvöll með því að bæta aðflugstækin á vellinum auk þess að huga að uppbyggingu flugvallarins sem millilandaflugvallar.
Eins og kunnugt er fjölgar ferðamönnum til landsins verulega og allar spár benda til þess að svo verði áfram á komandi árum. Þingeyingar hafa orðið varir við þessa þróun enda Þingeyjarsýslur annálaðar fyrir fegurð og fallegar náttúruperlur.
Í ljósi þessa er mikilvægt að hugað verði að því að byggja Húsavíkurflugvöll upp sem alþjóðlegan flugvöll enda aðstæður til flugs á svæðinu ákjósanlegar. Landfræðilega er auðvelt að byggja upp og markaðssetja millilandaflug um Húsavíkurflugvöll á ársgrundvelli.“
Framsýn telur mikilvægt að efla Húsavíkurflugvöll en farþegum um völlinn hefur fjölgað jafnt og þétt undanfarið.