Veðurfræðingar Heimasíðu stéttarfélaganna hafa gefið út langtímaspá eftir hundleiðinlegan vetur. Spáin tekur mið af hegðun og atferli fólks á Húsavík. Í gær mátti sjá garðyrkjustjóra bæjarins á ferð ásamt aðstoðarfólki við að snyrta tré og runna sem loksins eru komnir upp úr snjónum, það er sumstaðar. Þá mátti sjá brottflutta Húsvíkinga spóka sig á Húsavík í gær, þannig að fyrstu vorboðarnir eru komnir sem er vísbending um betra veður og gott sumar.
Jan garðyrkjustjóri Norðurþings ásamt aðstoðarmanni voru að laga til á Húsavík í gær. Þeir voru hressir eins og sjá má.
Vorboðinn, Hanna Björk, var ásamt öðrum starfsmönnum Norðurþings að snyrta bæinn í gær.
Vorboðarnir að sunnan, Elín Þórhallsdóttir og Rut Káradóttir eru hér ásamt frænku Elínar frá Húsavík, Sif Heiðarsdóttir. Sagan segir að Elín hafi verið á Húsavík í gær til að fjárfesta í ferðaþjónustu sem eru að sjálfsögðu ánægjulegar fréttir. Þá er mjög líklegt að Rut hafi verið með henni til að taka út húsnæðið þar sem hún er einn fremsti innanhússarkitekt landsins.