kuti

Framsýn stéttarfélag færði Styrktarfélagi HSN í Þingeyjarsýslum kr. 15.000.000,- að gjöf til kaupa á tækjum og búnaði fyrir stofnunina og Hvamm heimili aldraðra. Þar munar mestu um kaup á hjartaómtæki sem gerir HSN kleift að hafa hjartalækni í hlutastarfi hjá stofnuninni. Aðalsteinn Árni Baldursson formaður félagsins fylgdi gjöfinni eftir en hún var afhent við hátíðlega athöfn í gær. Búnaðurinn samanstendur af fullkomnu hjartaómtæki, göngubretti, sturtustól-setdýnu, stólavog, eyrnaskoðunartæki,meðgöngumonitor, rannsóknartæki D-dimer og vökvadælu.

Daníel Borgþórsson formaður Styrktarfélags HSN og Bergur Elías Ágústsson stjórnarformaður Dvalarheimilisins Hvamms þökkuðu Framsýn fyrir höfðingja gjöf. Undir það tóku læknar og annað hjúkrunarfólk sem gerðu gestunum grein fyrir notagildi tækjana. Þar fór fremstur, Ásgeir Böðvarsson yfirlæknir á sjúkrahúsinu. Í máli þeirra kom fram mikil ánægja með velvild Framsýnar í garð Hvamms og HSN. Meðfylgjandi er ávarp formanns sem hann flutti við afhendinguna.

Ágætu gestir, verið velkomin

Við erum stödd á aðalfundi Verkakvennafélagsins Vonar, nú Framsýnar stéttarfélags, þann 20. febrúar 1959. Fyrir fundinum liggur tillaga frá félagskonum sem hlaut brautargengi:

„Fundurinn samþykkir að Verkakvennafélagið Von taki þátt í fjárframlögum til kaupa á sótthreinsunartæki fyrir Sjúkrahús Húsavíkur og leggi fram kr. 3.500“.

Á félagsfundi í Von tæpu ári síðar, eða 20. janúar 1960, kemur fram að tekist hafi að gera við gömlu sótthreinsitækin á  Sjúkrahúsinu og því ekki þörf á fjárframlagi frá félaginu til kaupa á nýju tæki.

Þess í stað væri unnið að því að kaupa tæki til að taka hjartalínurit og mörg félög í bænum hefðu lagt fram fé til þeirra kaupa. Lagði þáverandi formaður Vonar, Þorgerður Þórðardóttir til, að áðurnefnt fé, að viðbættum 1.500 krónum gengi til kaupa á hjartalínutæki, svo félagið gæfi Sjúkrahúsinu í heildina kr. 5.000 til þessara kaupa. Tillagan var samþykkt.

Af hverju nefni ég þetta hér?

Jú, stéttarfélögunum í Þingeyjarsýslum hefur frá fyrstu tíð verið umhugað um sitt nærsamfélag.

Liður í því hefur verið að koma að góðum málefnum sem miða að því að styrkja samfélagið og bæta búsetuskilyrði á félagssvæðinu, sem nær frá Raufarhöfn í austri að Vaðlaheiðargöngum í vestri. Í dag eru rúmlega þrjú þúsund félagsmenn í Framsýn stéttarfélagi.

Allt frá fyrstu tíð höfðu bæði Verkamannafélag Húsavíkur og Verkakvennafélagið Von á stefnuskrám sínum að sinna kaup- og réttindamálum félagsmanna. En þeim var jafnljóst að hagsbótina mátti einnig sækja í aðra staði, s.s. með samtryggingarsjóðum, öflugri heilbrigðisþjónustu, hagkvæmri verslun, samhjálpar- og menningarstarfi og afskiptum af málefnum bæjarfélagsins varðandi ekki síst gjaldskrár. Á slíkt lögðu félögin engu síðri áherslu en sjálfa kaupgjaldsbaráttuna. 

Við sem höldum um keflið í dag, höfum gert okkar besta, til að fylgja þessum göfugu markmiðum eftir. Þeirra sem mörkuðu sporin á sínum tíma í þágu íbúa í Þingeyjarsýslum.

Það má vel vera að við séum öðruvísi en önnur stéttarfélög sem er hið besta mál, enda fjölbreytileikinn af hinu góða.

Samhliða því að gera betur við okkar félagsmenn en almennt þekkist meðal sambærilega stéttarfélaga innan ASÍ, hvað þjónustu og styrki varðar, er okkur ekki síst mjög umhugað um okkar samfélag.

Það staðfestir gjöfin sem við ætlum að afhenda hér í dag til Styrktarfélags HSN í Þingeyjarsýslum sem er sú lang veglegasta sem við höfum gefið fram að þessu. Þá má nefna málinu til stuðnings, hvað varðar starfsemi félagsins, að í vikunni munu forsvarsmenn Framsýnar eiga fund með innviðaráðherra varðandi stuðning stjórnvalda við áframhaldandi áætlunarflug til Húsavíkur. Sá róður er vissulega þungur en við munum halda áfram að berjast fyrir betri samgöngum við Reykjavík á landi og í lofti.

Þá er á borðinu hjá okkur að Íbúðafélagið Bjarg, sem er í eigu verkalýðshreyfingarinnar, byggi sex íbúða raðhús á Húsavík í samstarfi við Norðurþing. Um er að ræða óhagnaðardrifnar leiguíbúðir fyrir tekjulága. Það mun ekki gerast nema Framsýn fylgi málinu eftir að fullu með stuðningi sveitarstjórnar Norðurþings sem liggur þegar fyrir enda sameiginlegt baráttumál.

Við megum aldrei missa sjónar að því að gera allt sem við getum til að efla okkar samfélag á öllum sviðum og benda á það sem betur má fara. Við sem þekkjum heilbrigðiskerfið, reyndar höfum við öll þurft á því að halda, vitum að það skiptir gríðarlega miklu máli takist okkur að bætta grunnþjónustuna í heimabyggð. Það eykur okkar öryggi, sparar peninga, dregur úr vinnutapi svo ekki sé talað um ferðakostnað sem er orðin óheyrilegur fyrir okkur á landsbyggðinni.

Á dögunum þurfti ég að fara suður til sérfræðings. Eftir stuttan akstur frá Húsavík var ég myndaður í Vaðlaheiðargöngum enda gert að greiða í göngin, stuttu síðar mæti mér önnur myndavél á Akureyrarflugvelli sem myndaði mig enda gert að greiða fyrir að geyma bílinn á flugvellinum meðan ég sinnti erindum í Reykjavík. Eftir 100.000,- króna flug til Reykjavíkur (reyndar fram og til baka) beið myndavél á Reykjavíkurflugvelli eftir því að ég yfirgæfi bílastæðið við völlinn á bíl sem ég hafði fengið lánaðan yfir daginn. Að sjálfsögðu slapp ég ekki við að greiða fyrir bílastæðið. Mér hefur reyndar aldrei leiðst að láta taka myndir af mér en þetta er nú „too much” fyrir mig, það er að vera myndaður átta sinnum sama daginn, bara fyrir það eitt að ferðast milli landshluta eftir þjónustu sem ekki er í boði í heimabyggð.

Þegar komið  var að heilbrigðisstofnuinni sem ég var að heimsækja í Reykjavík var mér boðið upp á að sækja app í símann svo ég gæti nú greitt fyrir bílastæðið meðan ég sótti þjónustuna, ég held að ég hafi sloppið við myndatöku en er samt ekki alveg viss. Töluverðar upphæðir fóru út af kortinu hjá mér þennan daginn, það er við að sækja sérfræðiþjónustu til Reykjavíkur.

Til viðbótar öllum þessum álögum/sköttum sem eru að stórum hluta bundnar þeim sem búa á landsbyggðinni og þurfa að sækja heilbrigðisþjónustu og aðra þjónustu til Reykjavíkur er ætlun stjórnvalda að bæta heldur á álögur hjá okkur, með því að taka upp aukna skatta um næstu ármót, en þá verður sérstakt kíló­metra­gjald lagt á bif­reiðar. 

Er þetta nú ekki að verða svolítið galin skattheimta?

Ég efast ekki um að framlag Framsýnar til kaupa á tækjum og búnaði fyrir HSN/Hvamm fyrir 15. milljónir á eftir að draga úr þessum óheyrilega kostnaði heimamanna og bæta um leið búsetu- og lífsskilyrði fólks í Þingeyjarsýslum. Við höfum lagt á það sérstaka áherslu að búnaðinum verði komið fyrir á starfsstöðum HSN á Húsavík, Raufarhöfn, Kópaskeri, Mývatnssveit og Reykjadal sem er okkar félagssvæði.

Okkar frábæra starfsfólk á HSN/Hvammi munu gera frekari grein fyrir þeim tækjum og búnaði sem ákveðið hefur verið að kaupa fyrir gjafaféð. Þar munar mestu um kaup á hjartaómtæki sem gerir HSN kleift að hafa hjartalækni í hlutastarfi hjá stofnuninni. Þá fengum við á dögunum fallega kveðju frá sjúkraþjálfurum á Hvammi sem sögðust afar ánægðir með nýja hlaupabrettið sem kæmi að góðum notum við endurhæfingu sjúklinga. Nánar um þetta hér á eftir en til viðbótar má geta þess að Framsýn mun niðurgreiða kostnað félagsmanna sem fara í skoðun í nýja hjartaómtækið.

Á aðalfundi Framsýnar þann 3. maí 2024 var eftirfarandi bókun gerð:

“Aðalfundur Framsýnar stéttarfélags samþykkir að færa Styrktarfélagi HSN í Þingeyjarsýslum að gjöf kr. 15.000.000,- til kaupa á tækjum og búnaði til að efla starfsemina enn frekar. HSN og Hvammur hafa á að skipa frábæru fagfólki í öllum stöðum. Svo starfsemin megi þrífast áfram um ókomna tíð er mikilvægt að heilbrigðisstarfsfólk hafi aðgengi að fullkomnustu tækjum á hverjum tíma til lækninga og þjálfunar. Með gjöfinni vill Framsýn stéttarfélag undirstrika mikilvægi þess, að íbúar í Þingeyjarsýslum og aðrir þeir sem þurfa á heilbrigðisþjónustu og endurhæfingu að halda á hverjum tíma, hafi aðgengi að öflugum heilbrigðisstofnunum. Þannig byggjum við upp sterkt samfélag öllum til hagsbóta.”

Ég vil biðja Daníel Borgþórsson, formann Styrktarfélags HSN í Þingeyjarsýslum og Berg Elías Ágústsson stjórnarformann Hvamms að koma hér upp og veita gjöfinni viðtöku um leið og ég óska okkur öllum til hamingju með tækin og búnaðinn, sem verður til staðar fyrir okkur til þæginda og öryggis um leið og starfsumhverfi okkar fagfólks verður miklu betra. Takk fyrir.

Opinn fræðslufundur um það sem mikilvægast er að hafa á hreinu við undirbúning starfsloka.

Meðal þess sem rætt verður um er:

• Hvenær og hvernig er best að sækja lífeyri og séreignarsparnað?
• Skattamál
• Skipting lífeyris með maka
• Greiðslur og skerðingar

Erindi flytja Magnea Gísladóttir, lífeyrisráðgjafi hjá Íslandsbanka og Haraldur Gunnarsson, viðskiptastjóri fyrirtækja og fjárfesta hjá Íslandsbanka.

Fundurinn sem er samstarfsverkefni Framsýnar sem er öllum opin verður haldinn fimmtudaginn 19. september kl. 16:00 til 17:30 í fundarsal stéttarfélaganna að Garðarsbraut 26 á Húsavík.

https://www.islandsbanki.is/is/vidburdur/fjarmal-vid-starfslok-husavik-19.09.2024

Framsýn stéttarfélag

Boðað hefur verið til fundar í stjórn og trúnaðarráði Framsýnar þriðjudaginn 17. september kl. 17:00. Stjórn Framsýnar-ung er einnig boðuð á fundinn.  Fundurinn verður í fundarsal stéttarfélaganna.

Dagskrá:

1. Fundargerð síðasta fundar
2. Inntaka nýrra félaga
3. Afhending gjafar til HSN
4. Fundur með Innviðaráðherra um flugsamgöngur
5. Bréf frá ASÍ varðandi lagabreytingar
6. Kvennaráðstefna ASÍ á AK
7. Framkvæmdir í Furulundi
8. Breytingar á húsnæði stéttarfélaganna
9. Hraunholt 26-28
10. Jólafundur félagsins
11. Bjarg íbúðafélag
12. Málefni ÞÞ
13. Kosning fulltrúa á þing
14. Formannafundur SSÍ
15. Önnur mál

Á fundinum verður  gengið frá fulltrúm á þing sem eru framundan á vegum verkalýðshreyfingarinnar. Hafi almennir félagsmenn áhuga á að sitja neðangreind þing eru þeir vinsamlegast beðnir um að senda einkaskilaboð á netfangið kuti@framsyn.is: Framsýn greiðir vinnutap, fæði, hótel og ferðakostnað fyrir þá sem fara á þingin á vegum félagsins.

Þing ASÍ verður haldið 16. til 18. október í Reykjavík. Framsýn á rétt á fjórum fulltrúm í gegnum Starfsgreinasamband Íslands og einum fulltrúa í gegnum Landsamband ísl. verslunarmanna. Samtals eru þetta því 5 fulltrúar og 5 til vara. Gæta þarf að kynjakvóta við val á fulltrúum á þingið.

Þing AN verður haldið á Illugastöðum 3-4. október. Gist verður á Illugastöðum. Framsýn á rétt 14 fulltrúum.  

Framhaldsaðalfundur Þekkingarnets Þingeyinga fór fram í morgun. Þau tíðindi urðu að Aðalsteinn Árni sem jafnframt er formaður Framsýnar gaf ekki kost á sér til áframhaldandi stjórnunarstarfa fyrir Þekkingarnetið en hann hefur lengi setið í stjórn setursins fyrir stéttarfélögin í Þingeyjarsýslum.

Aðalsteinn hefur verið formaður stjórnar ÞÞ frá stofnun þess árið 2003, áður var hann í stjórn Fræðslumiðstöðvar Þingeyinga. Hann var leystur út með gjöfum um leið og honum voru þökkuð vel unninn störf í þágu Þekkingarnets Þingeyinga af stjórnarmönnum og forstöðumanni Óla Halldórssyni. Aðalsteinn þakkaði fyrir sig og óskaði ÞÞ velfarnaðar í störfum sínum í þágu samfélagsins.

Þekkingarnet Þingeyinga er símenntunar-, háskólanáms- og rannsóknasetur sem starfar á grunni tveggja stofnana er sameinaðar voru árið 2006. Annars vegar er um að ræða símenntunarmiðstöðina Fræðslumiðstöð Þingeyinga og hins vegar háskólanáms- og rannsóknasetur sem starfaði undir nafni Þekkingarseturs Þingeyinga fram að sameiningunni. Símenntunarstarfsemin hófst árið 1999 um svipað leyti og aðrar símenntunarstöðvar á landinu hófu starfsemi. Háskólanáms- og rannsóknahlutinn fór hins vegar af stað árið 2003 samhliða Náttúrustofu Norðausturlands, sem starfar undir sama þaki og höfuðstöðvar Þekkingarnetsins á Húsavík við höfnina.

Í síðustu viku komu fyrstu gestir í íbúð Framsýnar að Hraunholti 26 á Húsavík. Fyrstur til að taka íbúðina var Dawid Jan Grzyb sem starfar hjá PCC á Bakka. Við það tækifæri færði formaður Framsýnar, Aðalsteinn Árni, honum blóm og konfekt frá félaginu. Hann var í búðinni ásamt foreldum og systur sem komu til hans í heimsókn til Íslands. Þau voru afar ánægð með íbúðina sem stendur nú félagsmönnum til boða. Þá er íbúð Þingiðnar að verða klár, það er um næstu helgi.

Forseti ASÍ ásamt fylgdarliði funduðu með fulltrúm Framsýnar fyrir helgina á Húsavík. Umræðuefnið var væntanlegt þing sambandsins í október. Fulltrúar frá Þingiðn, Framsýn og Verkalýðsfélagi Þórshafnar sátu fundinn með gestunum frá Alþýðusambandinu. Á fundinum var Finnbjörn A. Hermannsson forseti ASÍ spurður út í það hvort hann ætlaði að gefa kost á sér sem forseti sambandsins. Hann var ekki klár að svara þeirri spurningu á þessari stundu. Hann væri að íhuga það hvað hann gerði varðandi það hvort hann gæfi kost á sér eða ekki.

Undanfarið hefur verið unnið að því að laga hitalagnir í orlofsíbúð Framsýnar í Furulundi á Akureyri. Verkið hefur gengið vel og nú þegar eru komnir leigjendur í íbúðina eftir breytingarnar. Gömlu lagnirnar voru löngu komnar á tíma og því var ekki hægt að bíða með það lengur að skipta þeim út.

Í kjarasamningi SGS og SA, sem undirritaður var í mars síðastliðnum, var samið um svokallaðan ræstingarauka fyrir starfsfólk í ræstingum. Þetta þýðir að ræstingarfólk fær sérstaka viðbótargreiðslu með launum fyrir ágúst sem greidd verða út um næstu mánaðamót. 

Ræstingaraukinn skal greiddur út mánaðarlega og reiknast hann í hlutfalli við starfshlutfall, en fyrir fullt starf er hann 19.500 kr. á mánuði. Hafa ber í huga að ræstingaraukinn er ekki hluti af grunnlaunum og myndar þar af leiðandi ekki stofn fyrir yfirvinnu og aðrar álagsgreiðslur. Í reiknivél SGS geta félagsmenn séð hvernig ræstingaraukinn sem og aðrar kjarasamningsbundar hækkanir í kjarasamningi SGS og SA koma til með að líta út m.v. sínar forsendur.

Félagsmenn í aðildarfélögum SGS sem starfa við ræstingar á almennum vinnumarkaði eru hvattir til að skoða launaseðla sína vel um næstu mánaðarmót og ganga úr skugga um að greiðslan hafi skilað sér.

Samtök atvinnulífsins og aðildarfélög Alþýðusambands Íslands tóku höndum saman fyrr á árinu þegar gerðir voru langtímakjarasamningar, samningar sem auka fyrirsjáanleika og stöðugleika í efnahagslífinu.

Samningsaðilar voru sammála um að meginmarkmið samninganna væru að ná niður mikilli verðbólgu og háu vaxtastigi sem komið hefur hart niður á bæði heimilum og fyrirtækjum.    

Ársverðbólga fyrir ári síðan mældist 7,7% og án húsnæðisliðarins 7,6% – í síðustu mælingu Hagstofu Íslands mældist ársverðbólgan 6,3% og án húsnæðisliðarins 4,2%.

Mikilvægum árangri hefur verið náð en báðir aðilar árétta að allir aðilar vinnumarkaðarins, fyrirtæki landsins, ríki og sveitafélög þurfi áfram að leggjast á eitt til þess að ná áðurnefndum markmiðum.

Um þessar mundir eru augljós merki í atvinnulífinu um að hagkerfið sé að kólna og útlit er fyrir að hagvöxtur verði undir 1% á árinu.  Háir raunvextir eru íþyngjandi fyrir skuldsett heimili, standa fjárfestingu í framtíðar verðmætasköpun fyrir þrifum og draga úr þrótti á íslenskum hlutabréfamarkaði.  Það er því mikilvægt að Seðlabankinn sé framsýnn í sínum ákvörðunum þegar kemur að ákvörðun um stýrivexti. 

Samtök atvinnulífsins og Alþýðusamband Íslands leggja auk þess áherslu á mikilvægi þess að sveitarfélög tryggi nægt framboð af fjölbreyttum og hagkvæmum lóðum, svo tryggt verði að framboð á húsnæðismarkaði sé í takt við eftirspurn. Jafnvægi á húsnæðismarkaði er forsenda efnahagslegs stöðugleika. 

Mikið átak þurfti til að tryggja fjögurra ára kjarasamninga á almennum vinnumarkaði í því augnamiði að stuðla að stöðugleika og fyrirsjáanleika fyrir fyrirtæki og heimili. Í ljósi þess að loforð yfirvalda um aðgerðir í tengslum við gerð kjarasamninga á almennum vinnumarkaði eru hluti forsenduákvæða samninganna leggja samningsaðilar áherslu á að staðið sé við gefin loforð.

Fundur var haldinn í Samráðsnefnd Sambands íslenskra sveitarfélaga og bæjarstarfsmannafélaga innan BSRB þann 17. júlí 2024.

Samráðsnefndin er sammála um að gr. 13.10 í kjarasamningi aðila breytist svo frá 1. apríl 2024.

Félagsmannasjóður:

Launagreiðandi greiðir mánaðarlega framlag í Félagsmannasjóð sem nemur 2,2% af heildarlaunum starfsmanna. Úthlutun úr sjóðnum skal fara fram 1. febrúar ár hvert samkvæmt stofnskrá sjóðsins.

Greinin gildir ekki um þá starfsmenn er njóta styrkja samkvæmt gr. 13.6.1. í kjarasamningi aðila.

Breyting þessi nær m.a. til félagsmanna Starfsmannafélags Húsavíkur.

Framsýn hefur látið útbúa bæklinga á ensku og íslensku með helstu réttindum félagsmanna sem starfa í ferðaþjónustu. Bæklingarnir hafa verið uppfærðir og eru komnir úr prentun. Hægt að er nálgast þá á Skrifstofu stéttarfélaganna.

Að gefnu tilefni vill Framsýn stéttarfélag minna sveitarstjórnarfólk á félagssvæðinu á yfirlýsingu um stuðning ríkisstjórnarinnar og Sambands íslenskra sveitarfélaga vegna kjarasamninga sem undirritaðir voru í mars sl.

Í yfirlýsingu er skýrt kveðið á um að sveitarfélögin lýsa yfir fullum vilja til að hækka ekki gjaldskrár fyrir árið 2024 umfram 3,5% og þær verði endurskoðar hafi þær hækkað meira. Sérstaklega verði horft til gjaldskráa er varða barnafjölskyldur og fólk í viðkvæmri stöðu. Þá verði gjaldskrárhækkunum stillt í hóf eins og nokkur kostur er á samningstímanum.

Skýrara verður það ekki og Framsýn trúir því ekki að sveitafélögin, sem aðild eiga að kjarasamningi Starfsgreinasambands Íslands og Sambands ísl. sveitarfélaga, vogi sér að svíkja launafólk með því að standa ekki við gefin loforð.

Þá er rétt að geta þess að kjarasamningurinn gekk út á að semja til langstíma með hófstilltum hætti til ná niður verðbólgunni og skapa skilyrði fyrir vaxtalækkun. Þessi leið sparar sveitarfélögum landsins marga milljarða í launakostnað og því lágmark að sveitarfélögin standi við sín loforð um aðhald í gjaldskrárhækkunum.

Af óviðráðanlegum ástæðum verður ekki hægt að greiða bætur og styrki úr sjúkrasjóði Framsýnar og Þingiðnar í lok mánaðarins. Það verður hins vegar gert mánudaginn 2. september. Beðist er velvirðingar á því.

Frá og með 1. september 2024 geta félagsmenn bókað íbúðir Framsýnar og Þingiðnar í Hraunholtinu á Húsavík. Um er að ræða tvær rúmlega 100 fm2  glæsilegar íbúðir með öllum nútíma þægindum. Sjá frekar inn á orlofsvef stéttarfélaganna; framsyn.is. Varðandi frekari upplýsingar er velkomið að hafa samband við Skrifstofu stéttarfélaganna.

Stjórn Framsýnar mun koma saman til fundar næstkomandi þriðjudag kl. 17:00, til fyrsta fundar eftir sumarleyfi. Helstu málefni fundarins verða kjara- og atvinnumál auk þess sem komandi þing í haust á vegum verkalýðshreyfingarinnar verða til umræðu. Alls sitja 13 félagsmenn í stjórn og varastjórn félagsins. Auk þeirra er stjórn Framsýnar ung að venju boðið að sitja fundinn en 4 félagsmenn eru í stjórn Framsýnar ung.

Við gerð síðustu kjarasamninga á almenna vinnumarkaðinum voru orlofsréttindi félagsfólks aukin. Það er í kjarasamningi Starfsgreinasambands Íslands og Samtaka atvinnulífsins.

Frá og með 1. maí 2024 breytist ávinnsla orlofs, þ.e. orlof sem kemur til töku á orlofsárinu sem hefst 1. maí 2025. Eftir 22 ára aldur og 6 mánuði í fyrirtæki er orlof 25 dagar og orlofslaun 10,64%. Eftir 5 ár í fyrirtæki er orlof 26 dagar og orlofslaun 11,11%.

Frá og með 1. maí 2025 breytist ávinnsla orlofs, þ.e. orlof sem kemur til töku á orlofsárinu sem hefst 1. maí 2026. Eftir 5 ár í fyrirtæki er orlof 28 dagar og orlofslaun 12,07%

Síðan gildir eldri reglan áfram, það er starfsmenn sem starfað hafa í sama fyrirtæki í 10 ár eiga 30 daga orlofsrétt og 13,04% orlofslaun.

Hér má sjá nánari upplýsingar um breytingar á áður gildandi kjarasamningi er varðar orlofið og önnur atriði samningsins.

www.sgs.is/media/2052/glaerukynning-sgs-um-nyjan-kjarasamning-sgs-og-sa.pdf

Fyrir nokkrum dögum var þetta reiðhjól skilið eftir við Skrifstofu stéttarfélaganna. Ef þú átt hjólið, væri ekki úr vegi að nálgast það hjá okkur sem fyrst.

Heimasíða stéttarfélaganna óskar landsmönnum öllum gleðilegra Mærudaga sem eru við það að hefjast á Húsavík, bara gaman. Bein útsetning frá Mærudögum verður í kvöldfréttum Ríkissjónvarpsins, það er í kvöld.

Við gerum betur og betur við okkar félagsmenn. Aðild Framsýnar að fræðslusjóðum í gegnum kjarasamninga, Landsmennt, Sjómennt, Sveitamennt, Ríkismennt og fræðslusjóði verslunarmanna gerir félaginu þetta kleift.

Þannig er leitast við að mæta þörfum þeirra félagsmanna sem vilja bæta þekkingu, ná í aukin réttindi og mæta morgundeginum með þá hæfni sem nauðsynleg er.

Félagsmenn sem ekki hafa nýtt sér rétt sinn síðustu tvö ár eiga rétt á styrk allt að kr. 260.000,-  eða síðustu þrjú ár eiga rétt á allt að kr. 390.000,-  fyrir eitt samfellt nám eða námskeið samkvæmt nánari reglum sjóðanna sem eru reyndar aðeins mismunandi. Tveggja ára reglan kom ný inn um síðustu áramót. Uppsafnaður réttur skerðist ekki hafi félagsmaður fengið styrk undir kr. 50.000,- á tíma uppsöfnunar. Sá styrkur kemur þó til frádráttar fullum rétti.

Almennt er endurgreiðsluhlutfallið 90% af námskeiðsgjaldinu, þó að hámarki kr. 130.000.- á ári. Til viðbótar má geta þess að fullgildir félagsmenn Framsýnar eiga rétt á extra styrk kr. 130.000,-. stundi þeir kostnaðarsamt nám. Já, það er best að vera í Framsýn sem veitir hærri námsstyrki en önnur sambærileg stéttarfélög.

Um þessar mundir eru í byggingu tvær glæsilegar orlofs- og sjúkraíbúðir á vegum Framsýnar og Þingiðnar á Húsavík. Áætlað er að þær verði klárar í byrjun næsta mánaðar og fari í útleigu til félagsmanna í síðasta lagi 1. september. Fyrirspurnir eru þegar byrjaðir að berast varðandi íbúðirnar, það er hvenær þær verði klárar í útleigu en eins og fram kemur í fréttinni er áætlað að svo verði 1. september 2024. Um er að ræða góða viðbót við orlofseignir félaganna í Reykjavík, Kópavogi og Akureyri. Þá á Framsýn tvö orlofshús, annars vegar í Dranghólaskógi í Öxarfirði og hins vegar á Illugastöðum í Fnjóskadal.