kuti

47. þingi Alþýðusambands Íslands fór fram í Reykjavík fyrir helgina, þingið stóð yfir frá miðvikudegi til föstudags undir yfirskriftinni „Framtíð vinnu og verkalýðsbaráttu“. Um 300 þingfulltrúar sóttu viðburðinn, þar af sex frá Framsýn og Þingiðn. Þingið samþykkti nokkrar ályktanir s.s.um efnahagslegt og félagslegt réttlæti, um góð störf, réttindi og öryggi launafólks á breyttum vinnumarkaði og um færni, þekkingu og menntun. Í ályktununum krefst þingið þess að ávinningur nýrrar tækni og grænna umskipta skili sér til almennings en ekki fárra, hafnar því að efnahagslegum áskorunum sé mætt með auknum byrðum á launafólk og skorar á stjórnvöld og sveitarfélög að tryggja örari uppbyggingu viðráðanlegs húsnæðis um allt land. Allar upplýsingar um störf þingsins og ályktanir má finna á heimsíðu ASÍ https://asi.is/

Aðalsteinn Árni Baldursson, formaður Framsýnar stéttarfélags, var kjörinn í miðstjórn Alþýðusambands Íslands á 47. þingi sambandsins sem lauk síðdegis á föstudaginn. Þingið sem haldið var í Reykjavík stóð yfir í þrjá daga. Þetta er í fyrsta sinn sem Aðalsteinn tekur sæti í miðstjórn ASÍ. „Hlotnaðist sá heiður að vera kjörinn í miðstjórn sambandsins í fyrsta skiptið á mínum ferli sem forsvarsmaður í stéttarfélagi,“ segir Aðalsteinn í samtali við husavik.com, sem lýsir þinginu jafnframt sem stormasömu. https://www.husavik.com/2026/10/adalsteinn-arni-baldursson-kjorinn-i-midstjorn-asi-stormasomu-thingi-lokid/ Tæplega 300 þingfulltrúar sóttu þingið. Aðalsteinn segir að félagi hans, Vilhjálmur Birgisson formaður Verkalýðsfélags Akraness, hafi lagt fram tillögu um kjör hans í miðstjórn í gegnum Starfsgreinasamband Íslands sem hafði heimild til að tilnefna þrjá fulltrúa í miðstjórn en alls sitja 15 einstaklingar í miðstjórn sambandsins frá aðildarfélögum og samböndum innan Alþýðusambands Íslands.

Talsverðar breytingar urðu á forystu ASÍ á þinginu. Georg Páll Skúlason, formaður Grafíu, var kjörinn nýr forseti sambandsins og Halla Gunnarsdóttir, formaður VR, 1. varaforseti. Guðbjörg Kristmundsdóttir, formaður Verkalýðs- og sjómannafélags Keflavíkur og nágrennis, var kjörin 2. varaforseti og Berglind Kristófersdóttir, formaður Flugfreyjufélags Íslands, 3. varaforseti. Georg Páll sagði í viðtali við Reykjavík síðdegis á Bylgjunni að hann vildi stuðla að aukinni einingu innan ASÍ og bera klæði á vopnin eftir átök innan verkalýðshreyfingarinnar. Undir þau orð tekur nýkjörinn miðstjórnarmaður, Aðalsteinn Árni Baldursson.

Formanni Framsýnar, Aðalsteini Árna, var á dögunum boðið að heimsækja húsvíska fyrirtækið Belkod. Fyrirtækið er til heimils að Garðarsbraut 62. Auk þess að vera með starfsemi á Húsavík er Belkod með útibú bæði á Akureyri og Reykjavík enda hefur starfsemi fyrirtækisins vaxið umtalsvert frá stofnun þess árið 2017. Upphaflega planið var að bjóða upp á raflagnahönnun og mögulega innflutning á ljósum og öðrum rafmagnsvörum til Íslands. Síðan þróaðist starfsemin í innflutning og hönnun á vönduðum sænskum einingahúsum og ýmsum öðrum byggingavörum og lausnum. Félagið flytur einnig inn ýmsan tæknibúnað eða eins og stendur á Facebook síðu fyrirtækisins, „Belkod er innflytjandi að hágæða byggingarefni frá Skandinavíu, m.a. vönduðum einingahúsum frá Svíþjóð. Við sérhæfum okkur í einingahúsum, krosslímdum timbureiningum, sökkulkerfum og lýsingu. Ásamt því bjóðum við upp á hönnun og teikningar.“ Það voru þeir Höskuldur Skúli Hallgrímsson framkvæmdastjóri og Bjarki Baldvinsson viðskiptastjóri Belkod sem tóku á móti formanni Framsýnar. Í máli þeirra kom fram að sjö starfsmenn starfa hjá fyrirtækinu. Óskuðu þeir eftir góðu samstarfi við stéttarfélögin í Þingeyjarsýslum ekki síst hvað varðar uppbyggingu á nýju húsnæði á svæðinu. Því var mjög vel tekið af formanni Framsýnar.

Sjá frekar um starfsemi fyrirtækisins: https://www.belkod.se/

Barnaborg og Krílabær leita að áhugasömum starfsmanni í afleysingar með góðum möguleikum á föstu stöðuhlutfalli. Barnaborg og Krílabær eru hluti af Þingeyjarskóla sem er samrekinn leik- og grunnskóli. Lögð er áhersla á samvinnu og sameiginlega ábyrgð starfsmanna á verkefnum skólans. Barnaborg er til húsa í suðurenda Þingeyjarskóla í Aðaldal. Krílabær er staðsettur á Laugum í Reykjadal.

–              Um er að ræða aðstoð við umönnun barnanna undir leiðsögn leikskólakennara og leikskólastjóra

–              Æskilegt að viðkomandi geti hafið störf sem fyrst

–              Húsnæði í boði í nágrenni skólans.

–              Umsóknarfrestur er til 2. nóvember 2026

Við leitum að starfsmanni sem:

–              Ber virðingu fyrir börnum og hefur áhuga á að starfa með þeim

–              Er mjög hæfur í mannlegum samskiptum

–              Er stundvís og samviskusamur

–              Hefur reynslu af umönnun barna á leikskólaaldri

–              Talar góða íslensku, samsvarandi þrepi C1.

Nánari upplýsingar um starfið og vinnufyrirkomlag gefur Nanna Marteinsdóttir leikskólastjóri í síma 464-3590 og 898-0790 eða í netfangið: nanna@thingeyjarskoli.is

Umsóknir skulu jafnframt sendar til leikskólastjóra á sama netfang. Gerð er krafa um hreint sakavottorð.

Á meðfylgjandi mynd sem tekin var 11. október má sjá nýja fjölnýtingarhúsið á Þeistareykjum sem er langt komið. Til stendur að klæða húsið í sama lit og önnur mannvirki á svæðinu. Síðan verður tönkum komið fyrir norðan við húsið og gengið endanlega frá lóðinni og aðkomuleið að húsinu. Í framhaldinu mun svo skýrast hvenær GeoSilica flytur inn með sína starfsemi. Frekari framkvæmdir eru einnig í gangi á svæðinu er tengist starfseminni á Þeistareykjum. Það er alltaf ánægjulegt þegar atvinnuuppbygging er í gangi enda eflir úr samfélagið í Þingeyjarsýslum.

Fyrir helgina lauk tveggja daga málþingi NU-HRCT í Reykjavík. NU-HRCT er norrænn samstarfsvettvangur stéttarfélaga starfsfólks á hótelum, kaffihúsum, skyndibitastöðum og veitingahúsum, auk annarra starfa í ferðaþjónustu. Bæði Starfsgreinasamband Íslands og Matvís eiga aðild að samtökunum og komu að undirbúningi og skipulagningu málþingsins. Málþingið sóttu 20 fulltrúar frá öllum Norðurlöndunum,  þar á meðal formaður Framsýnar, Aðalsteinn Árni Baldursson, sem jafnframt situr í framkvæmdastjórn SGS. Fundurinn var staðfundinn auk þess sem fundarmönnum bauðst að vera á teams frá Norðurlöndunum.

Markmið málþingsins var að auka skilning á kjarasamningum í hótel- og veitingagreinum á Norðurlöndunum, greina hvað er líkt og ólíkt milli landa og miðla reynslu milli þátttakenda.

Meðal umræðuefna voru verklag við gerð kjarasamninga, launastig og launaþróun í greininni, vinnutími og fyrirkomulag hans, hlutastörf og helstu áskoranir sem blasa við í hverju landi.

Að málþinginu loknu fór hópurinn í skoðunarferð um Grindavík til að skoða ummerki eldsumbrotanna. Hörður Guðbrandsson, formaður Verkalýðsfélags Grindavíkur, tók á móti hópnum og fór ásamt leiðsögumanni yfir það sem gerst hefur í Grindavík.

Það er ávallt gagnlegt að ræða sameiginleg viðfangsefni við félaga okkar á Norðurlöndunum, bera saman reynslu og læra hvert af öðru. Málþingið gaf okkur hjá SGS ýmsar gagnlegar hugmyndir og áherslur sem við tökum með okkur inn í áframhaldandi starf.

Stjórn og trúnaðarráð Framsýnar, sem jafnframt er samninganefnd félagsins, kom saman til fundar í gærkvöldi. Algjör samstaða var meðal nefndarmanna að leita allra leiða til að ná samkomulagi við SA og stjórnvöld um að samningarnir héldu í stað þess að þeim yrði sagt upp þann 8. október. Svo fór í kjölfarið að Breiðfylkingin á íslenskum vinnumarkaði sem Starfsgreinasamband Íslands, Efling stéttarfélag og Samiðn – Samband iðnfélaga mynda, skrifaði undir framlengingu kjarasamninga við Samtök atvinnulífisins (SA) í gærkvöldi. Launafólk innan breiðfylkingarinnar telur um 60% af félagsmönnum Alþýðusambands Íslands.

Vilhjálmur Birgisson, formaður Starfsgreinasambandsins, segir í samtali við mbl.is að það sem kom samkomulagi yfir línuna hafi verið heildstætt mat á þeirri vinnu sem staðið hafi yfir undanfarið.

„Það er ekki vitglóra í öðru en að bjarga þessum kjarasamningum – bjarga því að launafólk fái þær launahækkanir sem það á að fá núna eftir áramót.“ Vilhjálmur segir að sem dæmi muni lægsti taxti verkafólks í fyrsta skipti, fara yfir 500 þúsund krónur. „Það hefði verið galið að fara að stefna slíkum launahækkunum í hættu á sama tíma og atvinnuleysið er að aukast.“ SGS hefur boðað til formannafundar um tíðindin kl. 11:00 í dag. Sjá frekar frétt mbl.is https://www.mbl.is/frettir/innlent/2026/10/06/breidfylkingin_skrifadi_undir_framlengingu_vid_sa/

Fimmtán aðildarfélög Alþýðusambands Íslands gerðu 1.209 launakröfur fyrir hönd félagsfólks síns árið 2025, samtals að fjárhæð um 1,4 milljarða króna. Þetta kemur fram í nýrri skýrslu ASÍ, Brotastarfsemi á vinnumarkaði — Greining á launakröfum aðildarfélaga ASÍ 2025. Skýrslan er sú þriðja sem ASÍ gefur út um launaþjófnað, en sambærilegar úttektir komu út árin 2019 og 2023. Niðurstaðan er sú sama og áður: kjarasamningsbrot og launaþjófnaður eru viðvarandi vandamál og ekkert bendir til þess að dregið hafi úr alvarleika þeirra. Helstu niðurstöður má lesa  inn á asi.is: https://asi.is/launakrofur-stettarfelaga-namu-14-milljordum-krona-a-sidasta-ari/

Æfingagjöld geta numið yfir hálfri milljón á ári fyrir tvö börn sem iðka knattspyrnu og körfubolta eftir að frístundastyrkir sveitarfélags hafa verið nýttir. Samanburður ASÍ sýnir að aldur barna, val á íþróttafélagi og búseta geta skipt verulegu máli fyrir útgjöld fjölskyldna. Ný samantekt á fimleikagjöldum sýnir að kostnaður getur verið mikill þótt barn stundi aðeins eina íþrótt.  Þá er töluverður munur á gjöldunum milli félaga. Lægsta mánaðargjaldið er hjá Völsungi, 3.750 kr., en hæst hjá Björk, 21.064 kr. Sjá samantekt ASÍ. https://asi.is/kostnadur-vid-ithrottir-getur-hlaupid-a-hundrudum-thusunda-fristundastyrkir-duga-skammt/

Stjórn og trúnaðarráð Framsýnar sem jafnframt er samninganefnd félagsins hefur verið boðuð á fund á morgun þriðjudag kl. 17:00 til að fara yfir stöðuna í kjaramálum, nú þegar forsendur kjarasamninga eru brostnar. Taka þarf ákvörðun í síðasta lagi þann 8. október nk. verði niðurstaðan sú hjá aðildarfélögum/samböndunum innan ASÍ að segja upp gildandi kjarasamningum. Um 30 félagsmenn sitja í samninganefnd Framsýnar. Bæði Starfsgreinasamband Íslands og Landssamband ísl. verslunarmanna hafa boðað til formannafunda í dag til að fara yfir stöðuna sem er grafalvarleg. Framsýn á aðild að báðum þessum landssamböndum og munu því taka þátt í þessum fundum.     

Fréttabréf stéttarfélaganna er komið út. Að venju er bréfið fullt af fréttum af starfi stéttarfélaganna. Fjallað er lauslega um þau mál sem félögin hafa unnið að síðustu mánuðina. Jafnframt er fjallað um aðalfundi félaganna frá því í vor. Hægt er að nálgast Fréttabréfið í matvörubúðum á félagssvæðinu og á Skrifstofu stéttarfélaganna.

Þingmenn Miðflokksins í Norðausturkjördæmi, þeir Þorgrímur og  Sigmundur Davíð, litu við hjá formanni Framsýnar í dag ásamt forystufólki innan flokksins. Þau gáfu sér góðan tíma til að spjalla um stöðuna í efnahagsmálum, vinnumarkaðinn og byggða- og atvinnumál. Þau fóru vel nestuð af fundinum hvað varðar áherslur Framsýnar í málefnum landsbyggðarinnar.

Töluverðar umræður eiga sér nú stað í fjölmiðlum enda hanga kjarasamningar í lausu lofti. Þann 8. október mun koma í ljós hvort samningum verði sagt upp þar sem stjórnvöld hafa ekki staðið við sitt. Meginmarkmið kjarasamninga sem undirritaðir voru 2024 var lækkun verðbólgu með samstilltu átaki verkalýðshreyfingarinnar, atvinnurekenda, ríkis og sveitarfélaga. Aðilar vinnumarkaðarins gengu frá fjögurra ára kjarasamningi með hófstilltum launahækkunum. Ríki, sveitarfélög, fyrirtæki, verslun og þjónusta gáfu loforð um að ætla að leggja sitt af mörkum og halda aftur af gjaldskrár- og verðhækkunum.  Nú er svo komið að forsendur kjarasamninga eru brostnar vegna vanefnda og verðbólgan fer vaxandi milli ára sem kemur sér afar illa fyrir heimilin í landinu, ekki síst verkafólk og þeirra sem minna mega sín í þjóðfélaginu. Í stað þess að bregðast við vandanum velja stjórnvöld að auka enn frekar álögur á almenning sem þarf t.d. á heilbrigðisþjónustu að halda með hækkun á komugjöldum. Fyrr í sumar tilkynnti heilbrigðisráðherra 100% hækkun á komugjöldum sjúklinga á heilsugæslu, sem tækju gildi 1. ágúst. Auk þess var boðað að frá og með 1. september yrði komið á sérstöku komugjaldi fyrir sjúkraþjálfun, iðjuþjálfun og talþjálfun sem verður utan við greiðsluþátttökukerfi heilbrigðisþjónustunnar og kemur því til viðbótar þeirri hámarksupphæð sem sjúklingar greiða fyrir þá heilbrigðisþjónustu sem fellur innan kerfisins. Ekki er að sjá annað en að stjórnvöld ætli áfram að ná markmiðum um hallalaus fjárlög með gjaldtöku- og niðurskurði. Auk þessa voru nýlegar boðaðar frekari hækkanir, m.a. 5,2% hækkun á krónutölugjöldum í fjárlagafrumvarpi og 15,9% hækkun kílómetragjalds. Jafnframt er gert ráð fyrir frekari rýrnun á barna- og húsaleigubótum. Formaður Framsýnar, Aðalsteinn Árni, var í viðtali á Bylgjunni í morgun þar sem staðan í efnahagsmálum var til umræðu. Viðtalið hefur vakið töluverða athygli og fengið mikla hlustun. https://www.visir.is/g/20262941729d/-eg-er-ogedslega-reidur-

Þessir miklu höfðingjar komu við á Skrifstofu stéttarfélaganna í dag til að taka stöðuna með formanni Framsýnar, Aðalsteini Árna. Þetta voru þingmennirnir Jens Garðar og Ingvar en þessa vikuna  stendur yfir kjördæmavika. Þá gera þingmenn sitt besta til að heimsækja fyrirtæki, félagasamtök, sveitarstjórnir og íbúa  í viðkomandi kjördæmum.  

Aðalsteinn Árni Baldursson formaður Framsýnar var í viðtali á Rás 1 í gærmorgun á Morgunvaktinni þar sem staðan í kjaramálum var til umræðu sem og staðan í efnahagsmálum. Viðbrögð við viðtalinu hafa verið mjög góð ef marka má póstana og símtölin sem borist hafa Skrifstofu stéttarfélaganna. Hvað stöðuna varðar, þá verður kjarasamningum sagt upp þann 8. október komi stjórnvöld ekki að borðinu með einhverjum aðgerðum. Hægt er hlusta á viðtalið hér: https://www.ruv.is/utvarp/spila/morgunvaktin/23614/ave1da

Rétt í þessu var Georg Páll Skúlason formaður GRAFÍU – stéttarfélags í prent- og miðlunargreinum, að senda frá sér yfirlýsingu þess efnis að hann hafi ákveðið að gefa kost á sér sem næsti forseti Alþýðusambands Íslands.

GRAFÍA er eitt af aðildarfélögum Rafiðnaðarsambands Íslands og hluti af Fagfélögunum. Tvö þeirra félaga sem mynda GRAFÍU í dag, Hið íslenska prentarafélag og Bókbindarafélag Íslands. Georg hefur áratuga reynslu af störfum fyrir verkalýðshreyfinguna.

Arnaldur Grétarsson sem er fyrrverandi starfsmaður Alþýðusambands Íslands hefur ákveðið að gefa  kost á sér sem næsti forseti Alþýðusambandsins. Þing sambandsins fer fram í Reykjavík um miðjan október. Arnaldur heilsaði upp á formenn Framsýnar og Þingiðnar í morgun og fór yfir sín helstu áherslumál komi til þess að hann nái kjöri sem forseti Alþýðusambands Íslands. Fundurinn var vinsamlegur og skiptust menn á  skoðunum um málefni verkalýðshreyfingarinnar.

Skrifstofa stéttarfélaganna á Húsavík leitar að öflugum og hressum liðsmanni til starfa í fullt starf. Starfsmanninnum er ætlað að sinna almennum störfum á skrifstofunni, sjá frekari lýsingu í meðfylgjandi auglýsingu. Aðalsteinn Árni Baldursson veitir frekari upplýsingar, kuti@framsyn.is

Þingi Alþýðusambandi Íslands lauk um hádegið í dag en það hófst í gærmorgun. Að venju var þingið haldið á Illugastöðum. Á meðfylgjandi mynd er nýkjörin stjórn. Hana skipa Trausti Jörundarson Sjómannafélagi Eyjafjarðar sem var kjörinn formaður, aðrir í stjórn eru Eydís Bjarnadóttir FSVA, Álfheiður Ösp Haraldsdóttir Samstöðu, Atli Hjartarson Öldunni og Ingimar Atli Knútsson Framsýn. Á myndina vantar Nönnu Steinu Höskuldsdóttur frá Framsýn sem var kjörin í varastjórn.

Um 70 fulltrúar frá níu af ellefu aðildarfélögum Alþýðusambands Norðurlands tóku þátt í 39. þingi sambandsins sem staðið hefur yfir síðustu tvo daga á Illugastöðum í Fnjóskadal. Þingið fór vel fram og voru mörg fróðleg erindi flutt á þinginu auk þess sem ályktað var um byggða- og atvinnumál. Þar er sölu á flugstöðvarbyggingunni á Húsavíkurflugvelli m.a. harðlega mótmælt. Framsýn átti níu fulltrúa á þinginu. Ingimar Atli Knútsson sem var fulltrúi Framsýnar á þinginu var kjörinn í stjórn sambandsins og Nanna Steina Höskuldsdóttir sem jafnframt er félagsmaður í Framsýn í varastjórn. Þá má geta þess að Ósk Helgadóttir hefur verið formaður AN síðustu tvö árin. Nú var komið að því að Trausti Jörundarson frá Sjómannafélagi Eyjafjaráðar tæki við keflinu til næstu tveggja ára sem formaður sambandsins. Ósk hefur staðið sig afskaplega vel sem formaður, því er full ástæða til að þakka henni kærlega fyrir vel unnin störf í þágu Alþýðusambands Norðurlands.

Ályktun um byggða- og atvinnumál
-Stjórnvöldum ber að standa vörð um landsbyggðina-

39. þing Alþýðusambands Norðurlands skorar á stjórnvöld að standa vörð um landsbyggðina, sem er ein af hornsteinum íslensks efnahagslífs.

Fyrir liggur að hinar dreifðu byggðir landsins skapa stóran hluta gjaldeyristekna þjóðarinnar, ekki síst með framleiðslu og útflutningi. Gjaldeyristekjur, sem þannig verða til, standa að mestu undir velferðarkerfi Íslendinga.

39. þing Alþýðusambands Norðurlands krefst þess að eðlilegur hlutur af þeim verðmætum sem landsbyggðin skapar skili sér aftur heim í hérað. Sambandið telur óásættanlegt með öllu að á sama tíma og mikil verðmætasköpun verður til á landsbyggðinni blæði henni út.

Áherslur þingsins eru eftirfarandi:

• AN bendir á að heilbrigðisþjónusta á Íslandi á að vera öllum aðgengileg og óháð búsetu. Gera þarf íbúum landsbyggðarinnar betur kleift að sækja heilbrigðisþjónustu í heimabyggð með því að styrkja rekstrargrundvöll heilbrigðisstofnana með öllum tiltækum ráðum.
• AN vill jafna aðgengi að heilbrigðisþjónustu óháð búsetu og efnahag með stórauknum framlögum vegna ferða- og dvalarkostnaðar sjúklinga sem þurfa á heilbrigðisþjónustu að halda fjarri heimabyggð. Jafnframt verði komið til móts við aðstandendur sem þurfa að fylgja sjúklingum með þátttöku í kostnaði þeirra. Þá er brýnt að tryggja aðgengilegt húsnæði fyrir sjúklinga og aðstandendur þeirra sem þurfa að dvelja í nánd við heilbrigðisstofnanir af heilsufarslegum ástæðum, fjarri heimabyggð.
• AN telur mikilvægt að staðið verði við viðhald og uppbyggingu samgöngu-mannvirkja s.s. vega, flugvalla og annarra samgangna á sjó og á landi. Góðar samgöngur eru forsendur þess að byggð og gott mannlíf þrífist sem víðast um landið.
• AN hafnar með öllu áformum stjórnvalda um að selja flugstöðina á Húsavíkurflugvelli til að bjarga fjárlagagatinu. Þess í stað verði staðið við fjárveitingar til venjulegs viðhalds flugvallarins sem skorið hefur verið niður markvist á undanförnum árum. Í dag liggja húseignir á flugvellinum undir miklum skemmdum vegna aðgerðarleysis stjórnvalda.
• AN hvetur til þess að aukið fjármagn verði sett til eflingar félagslegrar þjónustu og atvinnuuppbyggingar í hinum dreifðu byggðum landsins.
• AN leggur mikið upp úr því að aðgengi fólks að menntun verði jafnað, ekki síst á framhalds- og háskólastigi.
• AN vill tryggja aðgengi landsbyggðarinnar að verslun, opinberri þjónustu, fjarskiptum og raforku á viðráðanlegu verði til húshitunar á köldum svæðum sem og til atvinnurekstrar. Kallað er eftir því að allir landsmenn sitji við sama borð hvað auðlindirnar varðar og greiði sambærilegt verð fyrir rafmagn, heitt og kalt vatn sem og aðra orkugjafa.
• AN kallar eftir því að hvatar verði innleiddir til að fyrirtæki staðsetji starfsemi, nýsköpun og framleiðslu á landsbyggðinni, t.d. með breytingu á tryggingagjaldi, flutningskostnaði, kílómetragjaldi eða félagslegum tilfærslum eftir svæðum.
• AN hvetur til þess að ríkisstofnunum verði fjölgað enn frekar á landsbyggðinni með flutningi frá höfuðborgarsvæðinu út á land.

39. þing Alþýðusambands Norðurlands telur það vera grundvallaratriði að íbúar landsbyggðarinnar njóti sömu lífsgæða og tækifæra og íbúar á höfuðborgarsvæðinu. Jafnvægi í byggðaþróun er forsenda samstöðu og samfélagslegrar sáttar í landinu. Hvað það varðar verða stjórnvöld á hverjum tíma að hafa í huga að almennar skattkerfisbreytingar og álögur mega ekki bitna sérstaklega á íbúum landsbyggðarinnar umfram þá sem búa á höfuðborgarsvæðinu.

39. þing Alþýðusambands Norðurlands minnir á að án sterkrar landsbyggðar veikist bæði efnahagslegt og menningarlegt sjálfstæði þjóðarinnar. Stjórnvöld verða því að tryggja að arðurinn af auðlindum og útflutningi nýtist öllum landsmönnum, ekki síst þeim samfélögum sem skapa verðmætin í byggðalögum víða um land. Við annað verður aldrei unað enda markmið AN að tryggja að áherslur sambandsins nái fram að ganga, þjóðarbúinu og þeim sem byggja Ísland til hagsældar, burt séð frá búsetu og/eða efnahag.

Kallað er eftir byggðastefnu frá stjórnvöldum sem endurspegli áherslur 39. þings Alþýðusambands Norðurlands.

(Forsíðumynd: Eining-Iðja)