Á aðalfundinum stóð Jónas A. Sævarsson upp undir liðnum „Önnur mál“ og þakkaði starfsmönnum og forsvarsmönnum félagsins fyrir vel unninn störf í þágu Framsýnar. Undir það tóku aðrir fundarmenn. Guðný I. Grímsdóttir notaði einnig tækifærið og sagði afar mikilvægt fyrir félag eins og Framsýn að hafa öflugan varaformann, Ósk Helgadóttir. Fundarmenn stóðu upp og klöppuðu fyrir starfsmönnum og forsvarsmönnum félagsins um leið og Ósk kallaði starfsmenn stéttarfélaganna upp og færði þeim blóm frá félagsmönnum fyrir vel unninn störf í þágu félagsins. Formaður þakkaði hlýhug fundarmanna í garð starfsmanna sem þau kynnu vel að meta enda krefjandi að starfa að verkalýðsmálum. Við látum þar með lokið umfjöllun um aðalfund félagsins fyrir árið 2025.
Nei, þessar tvær eru ekki úr tungunum. Þær eru hins vegar báðar búsettar í og við Raufarhöfn. Þetta eru þær Nanna Steina Höskuldsdóttir og Guðný Hrund Karlsdóttir sem báðar starfa í þágu Framsýnar stéttarfélags. Nanna Steina er í aðalstjórn Framsýnar og Guðný Hrund situr í stjórn Lsj. Stapa fyrir hönd Framsýnar og þeirra stéttarfélaga sem aðild eiga að sjóðnum í Þingeyjarsýslum sem eru Þingiðn og Verkalýðsfélag Þórshafnar. Frábærar og kraftmiklar konur í alla staði. Myndin er tekin á dögunum þegar forystumenn Framsýnar voru á ferðinni á Raufarhöfn.
Stjórnarfundur verður haldinn í Framsýn stéttarfélagi miðvikudaginn 16. júní kl. 17:00. Stjórn Framsýnar-ung er boðið að sitja fundinn. Um er að ræða fyrsta fund stjórnar eftir aðalfund félagsins í maí. Dagskrá fundarins er eftirfarandi:
Starfsmannafélag Húsavíkur kom færandi hendi og færði Leikskólanum Grænuvöllum veglega gjöf sem ætlað er að styðja fjölbreytt nám hjá börnum á leikskólaaldri. Þess má geta að Leikskólinn Grænuvellir vann innleiðingaráætlun í STEM kennslu leikskólabarna í þróunarverkefni í samvinnu við STEM Húsavík. STEM-leikur með kubbum (byggingarkubbum, segulkubbum, LEGO o.fl.) styður mjög fjölbreytt nám hjá börnum á leikskólaaldri, eins til sex ára. Í heild sinni er STEM-kubbaleikur ein af fjölbreyttustu námsaðferðum leikskólaaldursins þar sem börn þróa samtímis vísindalega hugsun, stærðfræðiskilning, verkfræðilega færni, málþroska, félagsfærni og skapandi hugsun í gegnum leik. Auk upptalinna þátta styður leikur með kubbana alhliðaþroska barnanna.
Gjöf Starfsmannafélags Húsavíkur fellst í kaupum á þessum þroskandi kubbum sem styður við innleiðingaráætlun í STEM kennslu leikskólabarna. Fjármagnið kemur úr Starfsmenntasjóði Starfsmannafélags Húsavíkur sem sveitarfélagið Norðurþing greiðir í af starfsmönnum sveitarfélagsins. Sigríður Valdís Sæbjörnsdóttir skólastjóri Grænuvalla tók við gjöfinni og þakkaði vel fyrir hlýhug STH í garð skólans. Velvilji sem þessi frá félagasamtökum skipti verulega miklu máli fyrir skólastarfið. Með henni á myndinni er Hermína Hreiðarsdóttir formaður Starfsmannafélags Húsavíkur.
Eins og fram kemur í ársskýrslu Framsýnar sem lögð var fyrir aðalfundinn stendur stéttarfélagið Framsýn mjög sterkt og hefur reyndar gert til fjölda ára. Styrkur félagsins kemur ekki síst fram í góðri þjónustu við félagsmenn, góðu aðgengi að sjóðum félagsins, öflugum starfsmenntastyrkjum og öðru því sem er í boði á vegum félagsins á hverjum tíma s.s. orlofshúsum og orlofsíbúðum. Aðkoma félagsmanna að þessari þjónustu og styrkjum færir félagsmönnum á hverju ári milljóna tugi. Það er góð kjarabót að vera félagsmaður í stéttarfélagi eins og Framsýn. Því fylgir einnig mikið öryggi. Í starfi stéttarfélaga er mikilvægt að sinna góðu upplýsingastreymi til félagsmanna. Framsýn verður ekki sakað um að sinna því ekki. Félagið heldur úti heimasíðu og gefur reglulega út Fréttabréf stéttarfélaganna sem ætlað er að miðla upplýsingum til félagsmanna um réttindi þeirra og fréttir af starfseminni sem sjaldan eða aldrei hefur verið eins öflug og um þessar mundir. Þá hefur félagið gefið út bæklinga um kjör og réttindi einstakra starfshópa innan félagsins s.s. fyrir starfsmenn í ferðaþjónustu og hvað varðar almenn réttindi félagsmanna úr sjóðum félagsins. Hvernig byggja menn upp öflugt stéttarfélag til að ná fram þessum markmiðum? Það gera menn með virkum félagsmönnum, hæfu starfsfólki og öflugri stjórn, trúnaðarráði, trúnaðarmönnum á vinnustöðum og ungliðastarfi í gegnum Framsýn-ung. Fólki sem er tilbúið að takast á við krefjandi störf félagsins á hverjum tíma og gefa allt í starfið. Það er ekki dagvinna að reka stéttarfélag svo vel fari. Þess í stað verða menn að standa vaktina í 24 tíma á sólarhring. Höfum í huga að það er ekki sjálfgefið að eiga aðild að öflugu stéttarfélagi, einu öflugasta stéttarfélagi innan Starfsgreinasambands Íslands svo vitnað sé í kannanir sem gerðar hafa verið um viðhorf fólks til stéttarfélaga.
Ársfundur fræðslusjóðsins Landsmenntar fór fram fimmtudaginn 4. júní í Reykjavík. Þar var farið yfir rekstur sjóðsins og ársreikninga auk þess sem nokkur fróðleg erindi voru flutt á fundinum. Nægir þar að nefna erindi sem Ingimar Atli Knútsson trúnaðarmaður starfsmanna PCC á Húsavík flutti og sneri að mikilvægi þess fyrir almenna félagsmenn stéttarfélaga að hafa aðild að fræðslusjóði eins og Landsmennt. Hér má lesa ræðuna hans sem vakti jákvæða athygli. Þá er hægt að lesa frekar um ársfundinn inn á heimasíðu Samtaka atvinnulífsins. https://www.sa.is/frettatengt/frettir/arsfundur-landsmenntar-mikilv%C3%A6gi-si–og-endurmenntunar-i-brennidepli Sjá einning frétt inn á heimasíðu Framsýnar, https://framsyn.is/2026/06/05/kvedja-med-soknudi/
Ágætu fundargestir.
Ingimar Knútsson heiti ég og mig langar að byrja á að þakka fyrir að vera boðið hingað á þennan fund.
Ég starfa sem verkefnastjóri hjá PCC BakkiSilicon og hef verið þar síðan ég lauk sveinsprófi í rafvirkjun árið 2019. Þar hef ég jafnframt verið trúnaðarmaður nánast frá upphafi og sit einnig í trúnaðarráði Framsýnar.
Ég hef verið iðinn styrkþegi hjá Landsmennt síðan ég kom út á vinnumarkað. Aðallega hefur það verið vegna starfstengds náms, framanaf aðallega til námskeiða á vegum Rafmenntar í áttina að Meistararéttindum í rafvirkjun en hef síðan fært mig yfir í rafiðnfræði við Háskólann í Reykjavík. Inn á milli hafa svo slæðst með ýmis konar námskeið til gagns og gamans.
Ég komst í kynni við fræðslusjóð Landsmenntar í gegnum verkalýðsfélagið mitt, Framsýn, líklega fyrst þegar fulltrúar þess komu í grunnskólann minn og kynntu starfsemi félagsins og þá möguleika sem standa félagsmönnum til boða. Þessi sjóður hefur reynst mér afar vel og hefur gert það að verkum að kostnaður við nám hefur ekki verið jafn mikil hindrun þegar mig hefur langað að bæta við mig menntun, réttindum eða nýrri þekkingu.
Vegna styrkjanna hef ég átt auðveldara með að koma námi fyrir í heimilisbókhaldinu. Það hefur svo skilað sér í því að ég hef getað aukið við þekkingu mína og orðið hæfari í starfi.
Ég má líka til með að nefna eins og ég lofaði Kúta mínum, formanni Framsýnar, að ég myndi nefna að Framsýn býður einnig upp á starfsmenntastyrk úr sínum eigin fræðslusjóð sem ég hef getað nýtt mér líka þar sem námið við Háskólann kostar töluvert meira en hægt er að sækja til Landsmenntar.
Styrkirnir skipta ekki síst máli þar sem ég þarf yfirleitt að sækja nám og námskeið langt frá heimili mínu, hvort sem það eru lotur í háskólanum eða námskeið á vegum Rafmenntar, með tilheyrandi kostnaði, sem eins og Aðalsteinn Árni kom inn á áðan er kostnaðarliður sem er oft á tíðum töluverður fyrir fólk sem býr úti á landi og sækir sér nám til höfuðborgarsvæðisins.
Það má líka segja að ég hafi verið nokkuð duglegur að auglýsa þessa möguleika. Ég geng jafnvel svo langt að segja að enginn í kringum mig komist á námskeið eða skrái sig í nám án þess að ég minni fyrst á að kanna hvort hægt sé að fá styrk fyrir því í gegnum viðeigandi fræðslusjóði.
Aukin menntun fólks á vinnumarkaði styrkir samfélagið til muna og fræðslusjóðir sem þessi skipta sköpum þegar kemur að aðgengi að námi, þar sem eðlilega er kostnaðurinn við nám og menntun þungur liður oft á tíðum, ekki síst í því efnahagsumhverfi sem við búum við í dag.
Mig langar að lokum að þakka fyrir það mikilvæga starf sem Landsmennt og tengdir fræðslusjóðir standa að. Ég lýt á sjálfan mig sem dæmi um það hvernig þessir styrkir geta skipt sköpum og opnað dyr að námi sem annars hefði verið erfiðara að sækja. Ég vona því að sjóðurinn fái áfram að eflast og styðja við fólk sem vill bæta við sig þekkingu og menntun.
Maj-Britt Hjördís Briem stjórnarkona í Landsmennt flutti erindi um mikilvægi starfs, sí- og endurmenntunar á íslenskum vinnumarkaði.
Arnar Sigurmundsson varaformaður stjórnar Landsmenntar bar saman lykiltölur helstu starfsmenntasjóða sem Samtök atvinnulífsins eiga aðild að í gegnum kjarasamninga við SGS, Eflingu og LÍV.
Á aðalfundi Framsýnar var Jakob Gunnar Hjaltalín hylltur fyrir vel unninn störf í þágu félagsins, sem formaður Sjómannadeildar félagsins og sem stjórnarmaður í aðalstjórn félagsins. Hann hætti sem formaður deildarinnar í lok síðasta árs og í aðalstjórn Framsýnar á aðalfundinum. Jakob þakkaði vel fyrir sig, það hefði verið mjög svo gefandi að starfa fyrir félagið í tæpa fjóra áratugi með frábæru fólki. Hann endurtók þakklæti sitt til félagsins og stjórnenda þess. Klappað var vel og lengi fyrir Jakobi enda þjónað Framsýn í nokkra áratugi, geri aðrir betur.
Formaður Framsýnar, Aðalsteinn Árni, fór fögrum orðum um störf Jakobs G. Hjaltalín í þágu félagsins í gegnum tíðina. Kobbi fékk blóm og smá þakklætisgjöf frá Framsýn.
Á síðasta aðalfundi Starfsmannafélags Húsavíkur sem fram fór í byrjun júní var samþykkt að styrkja leik- og grunnskóla í Norðurþingi með fjárframlögum til kaupa á búnaði fyrir nemendur. Félagið hefur þegar afhent Öxarfjarðarskóla 12 hljóðnema/míkrafón nælur. Tilgangurinn með gjöfinni er að efla enn frekar allt skólastarf í leik og grunnskóladeildum Öxarfjarðarskóla. Fjármagnið kemur úr Starfsmenntasjóði Starfsmannafélags Húsavíkur sem sveitarfélagið Norðurþing greiðir í af starfsmönnum sveitarfélagsins og er því skilgreint í verkefni er tengjast námi og þroska barna á grunn- og leikskólaaldri. Almennt er starfsmenntasjóðnum ætlað, samkvæmt starfsreglum sjóðsins, að styrkja félagsmenn Starfsmannafélags Húsavíkur til náms. Á síðasta ári voru greiddir samtals kr. 1.470.400,- í námsstyrki til 19 félagsmanna. Þar sem sjóðurinn stendur vel var ákveðið að styrkja góð verkefni á vegum leik- og grunnskóla í Norðurþingi. Á meðfylgjandi mynd er Hermína Hreiðarsdóttir formaður STH og Hrund Ásgeirsdóttir skólastjóri Öxarfjarðar sem þakkaði afar vel fyrir gjöfina sem kæmi að góðum notum í skólastarfinu. Afhendingin fór fram í fundarsal stéttarfélaganna.
Að venju stóð Framsýn fyrir sumarkaffi á Raufarhöfn síðasta föstudag fyrir Sjómannadaginn. Tæplega 100 gestir komu við í félagsheimilinu þar sem biðu þeirra veglegar tertur frá Kvenfélagi Raufarhafnar. Forsvarsmenn Framsýnar voru á staðnum og tóku vel á móti öllum þeim sem lögðu leið sína í kaffiboðið auk þess sem gestunum gafst tækifæri á að ræða við forsvarsmenn Framsýnar um allt milli himins og jarðar. Það voru þau Aðalsteinn Árni, Ósk, Aga og Nanna Steina sem sáu til þess að allt færi vel fram. Meðfylgjandi eru myndir frá kaffiboðinu sem var ánægjulegt í alla staði. Kvenfélag Raufarhafnar fær sérstakar þakkir fyrir terturnar sem og forsvarsmenn Hnitbjarga fyrir lánið á félagsheimilinu.
Á meðfylgjandi mynd eru fulltrúar Framsýnar, Aðalsteinn Árni Baldursson, Ósk Helgadóttir og Nanna Steina Höskuldsdóttir sem öll sitja í stjórn félagsins ásamt formanni Austra, Birnu Björnsdóttur þegar gjöfin var afhent síðasta föstudag í sumarkaffi Framsýnar í Félagsheimilinu Hnitbjörg.
Framsýn er umhugað um starfsmenntun félagsmanna. Á árinu 2025 fengu 358 félagsmenn greiddar kr. 28.508.350,- í einstaklingsstyrki frá fræðslusjóðum í endurgreiðslur vegna náms eða námskeiða. Námsstyrkir árið 2025 skiptast þannig milli fræðslusjóða sem Framsýn á aðild að:
Alls fengu 203 félagsmenn styrki frá Landsmennt kr. 16.349.020,-
Alls fengu 6 félagsmenn styrki frá Sjómennt kr. 753.752,-
Alls fengu 48 félagsmenn styrki frá Sveitamennt kr. 3.540.860,-
Alls fengu 44 félagsmenn styrki frá Ríkismennt kr. 3.151.562,-
Alls fengu 42 félagsmenn styrki frá SVS-Fræðslusjóður kr. 3.866.426,-
Alls fengu 15 félagsmenn styrki frá Fræðslusjóði Framsýnar kr. 846.730,-
Samtals fengu félagsmenn því greiddar kr. 28.508.350,- í námsstyrki á árinu 2025. Fræðslusjóðirnir eru fjármagnaðir með framlögum frá fyrirtækjum, sveitarfélögum og ríkisstofnunum sbr. ákvæði þar um í kjarasamningum. Það á þó ekki við um Fræðslusjóð Framsýnar sem hefur ekki fastan tekjustofn.
Nemendur í Vinnuskóla Húsavíkur hófu sumarið á því að koma við hjá Framsýn í morgun kl. 08:30 ásamt flokkstjórum til að fræðast um vinnumarkaðinn og starfsemi stéttarfélaga. Virkilega vel staðið að málum hjá stjórnendum Vinnuskólans að byrja á því að bjóða nemendum upp á þessa mikilvægu fræðslu þegar þau eru að stiga sín fyrstu skref á vinnumarkaði. Eftir yfirferð forsvarsmanna Framsýnar gekk unga fólkið út til góðra verka, það er að fegra Húsavík með hirðingu og öðrum verkum sem miða að því að hafa bæinn okkar sem snyrtilegan í sumar. Nokkra vikna vinna er í boði fyrir ungmenni í Vinnuskólanum í sumar.
Rekstur Skrifstofu stéttarfélaganna gekk að venju vel á síðasta starfsári. Félagið er aðili að Skrifstofu stéttarfélaganna á Húsavík ásamt Starfsmannafélagi Húsavíkur og Þingiðn. Þar starfa í dag 6 starfsmenn í 4,8 stöðugildum. Að auki hafa 4 starfsmenn verið í hlutastörfum hjá Framsýn við að þjónusta orlofsíbúðir í Kópavogi, Akureyri og í Öxarfirði. Starfshlutfall þeirra er um 30% að meðaltali.
Skrifstofa stéttarfélaganna er opin átta tíma á dag. Starfsfólk skrifstofunnar er í góðu sambandi við félagsmenn og eru heimsóknir á skrifstofuna mjög tíðar. Auk þess er stórum hluta starfsins sinnt í gegnum síma, tölvur og með heimsóknum á vinnustaði og í skóla. Ekki eru fyrirsjáanlegar breytingar á rekstri skrifstofunnar. Þó er full ástæða til að fylgjast með framvindu mála og atvinnuástandinu þar sem búast má við lækkun á iðgjöldum til Framsýnar vegna samdráttar í atvinnulífinu nú þegar starfsemi PCC á Bakka liggur niðri. Lokun PCC hefur einnig áhrif á starfsemi annarra fyrirtækja s.s. undirverktaka sem hafa verið í viðskiptum við fyrirtækið. Góð nýting er á félagsaðstöðunni enda mikil starfsemi í gangi á vegum stéttarfélaganna. Ráðist var í breytingar á húsnæði stéttarfélaganna. Húsnæðið var málað að utanverðu auk þess sem skipt var um glugga á efri hæðinni, það er á norðurhliðinni þar gluggarnir voru orðnir ónýtir. Fulltrúaráð stéttarfélaganna gekk frá fjárhagsáætlun og rekstraráætlun fyrir skrifstofuna vegna ársins 2026. Reiknað er með sambærilegum rekstri milli ára. Áhugi er fyrir því að ráðast í breytingar á gluggum í fundarsalnum. Það er að stækka þá svo bjartara verði í fundarsalnum. Samþykkt liggur fyrir að ráðast í framkvæmdina um leið og færi gefst til þess.
Á aðalfundi Framsýnar var samþykkt að félagið nýti sér forkaupsrétt á kaupum á auknu stofnfé í Sparisjóði Þingeyinga. Tillaga þess efnis lág fyrir fundinum. Samþykkt var samhljóða með öllum atkvæðum að kaupa fyrir kr. 3,3 milljónir enda um að ræða góða fjárfestingu að mati fundarins sem styður jafnframt við samfélagið í Þingeyjarsýslum sem veitir ekki af um þessar mundir. Ganga þurfti frá kaupunum fyrir 3. júní vegna ákvæða um forkaupsrétt sem aðalfundur Sparisjóðsins setti nýverið. Formanni og fjármálastjóra var falið að ganga frá kaupunum fyrir tilsettan frest. Áður hafði Þingiðn samþykkt að kaupa aukið stofnfé upp á kr. 700.000,-.
Ársfundur Landsmenntar fór fram í gær í höfuðstöðvum SA í Borgartúni. Dagskrá fundarins var afar metnaðarfull og fjölbreytt. Farið var yfir starfsemi sjóðsins, ársreikninga, samanburð á rekstrartölum milli sambærilega fræðslusjóða og fróðleg erindi voru flutt um mikilvægi starfsmenntunar fyrir fyrirtæki og einstaklinga. Þá fengu notendur sjóðsins tækifæri á að segja frá sinni upplifun á mikilvægi Landsmenntar, það er stjórnendur Jarðborana og trúnaðarmaður PCC á Bakka, Ingimar Knútsson, sem hefur líkt og fjölmargir aðrir notfært sér sjóðinn til að sækja sér aukna starfsmenntun. Í máli Jarðborana og Ingimars kom fram mikil ánægja með að fyrirtæki og einstaklingar hafi aðgengi að jafn öflugum fræðslusjóði og Landsmennt. Líflegar umræður sköpuðust um efni fundarins. Á fundinum gengu tvö úr stjórn að eigin ósk, einstaklingar sem hafa skilað mjög góðu starfi fyrir sjóðsinn. Þetta eru þau Arnar Sigurmundsson og Sigríður Margrét Guðmundsdóttir sem bæði hafa setið í stjórn fyrir Samtök atvinnulífsins. Voru þeim þökkuð vel unnin störf í þágu Landsmenntar. Þau brugðust við og þökkuðu sömuleiðis vel fyrir sig og sögðust kveðja sjóðinn með miklum söknuði.
Stjórn Landsmenntar er hér með þeim Sigríði og Arnari sem gengu úr stjórn Landsmenntar í gær á ársfundi sjóðsins.Ingimar Knútsson, trúnaðarmaður starfsmanna hjá PCC á Bakka flutti áhugavert erindi um mikilvægi fræðslusjóða atvinnulífsins fyrir starfsmenn fyrirtækja sem vildu sækja sér frekara nám með fjárhagslegum stuðningi frá fræðslusjóðum.Formaður Framsýnar var á svæðinu og flutti erindi um tilurð Landsmenntar og rakti sögu sjóðsins og hlutverk, allt frá stofnun hans árið 2000 en Landsmennt fagnaði 25 ára starfsafmæli á síðasta ári. Aðalsteinn Árni er jafnframt stjórnarformaður Landsmenntar.
Aðildarfélög Skrifstofu stéttarfélaganna ásamt Verkalýðsfélagi Þórshafnar hafa í gegnum tíðina átt mjög gott samstarf um orlofsmál. Stéttarfélögin eru með sameiginlega orlofsnefnd sem vinnur að því að bjóða félagsmönnum upp á marga góða kosti varðandi orlofsdvöl og sífellt er unnið að því að auka framboðið. Í því sambandi má nefna að framboð félagsmanna í gegnum orlofsvef stéttarfélaganna hefur verið aukið á liðnum árum með samningum við ferðaþjónustuaðila víða um land. Þannig vilja félögin stuðla að því að félagsmenn geti notið þess að fara í frí innanlands. Framsýn á tvö orlofshús, á Illugastöðum og í Dranghólaskógi og fimm íbúðir í Kópavogi og eina á Akureyri og Húsavík. Orlofshúsið í Dranghólaskógi hefur verið notað í leiguskiptum á sumrin fyrir annað orlofshús í Svignaskarði í Borgarfirði sem er í eigu Eflingar. Leiguskiptin hafa komið vel út. Þá eiga Þingiðn og Framsýn saman íbúð í gegnum Hrunabúð sf. að Garðarsbraut 26, efri hæð sem hefur verið í fastri útleigu. Á síðasta ári dvaldi fjöldi félagsmanna ásamt fjölskyldum sínum í orlofshúsum, orlofsíbúðum, á tjaldsvæðum og hótelum á vegum félagsins. Veruleg ásókn er í orlofshúsin en félagið niðurgreiðir orlofsdvöl félagsmanna í orlofsíbúðum/húsum sem auðveldar fólki að njóta orlofsdvalar með fjölskyldum sínum á Íslandi. Ekki er óalgengt að niðurgreiðslurnar séu um kr. 60.000,- fyrir viku dvöl í þeim húsum sem félagið er með á leigu hjá öðrum aðilum. Þá fengu 68 félagsmenn endurgreiðslur vegna dvalar á tjaldsvæðum 2025 eða alls kr. 1.535.126,-. Árið áður fengu 55 félagsmenn tjaldstæðisstyrki, samtals kr. 1.185.697,-. Boðið var upp á sumarferð á vegum stéttarfélaganna 2025. Farið var í Flateyjardal og tókst ferðin í alla staði mjög vel. Ósk Helgadóttir varaformaður skipulagði ferðina með starfsmönnum félaganna. Til viðbótar gafst félagsmönnum kostur á að kaupa gistimiða á hótelum/gistiheimilum víða um land. Framsýn hefur ekki gefist upp við að berjast fyrir frekara áætlunarflugi til Húsavíkur. Hvað það varðar hefur félagið verið í góðu sambandi við forsvarsmenn Norðurþings og fyrirtækja í ferðaþjónustu á Húsavík. Skrifstofa stéttarfélaganna er með samning við Icelandair um afsláttarkjör fyrir félagsmenn sem ferðast milli landa með flugfélaginu. Samningurinn felur í sér að Icelandair veitir stéttarfélögunum 10 til 20% afslátt frá fullu verði. Á móti niðurgreiða félögin flugmiðana til félagsmanna. Það er, félagsmenn geta verslað gjafabréf í gegnum orlofsvef stéttarfélaganna sem gefur þeim góð afsláttarkjör upp í fullt fargjald hjá flugfélaginu. Þessar upplýsingar eru aðgengilegar í ársskýrslu Framsýnar.
Noti starfsmaður eigin bifreið í þágu atvinnurekanda ber að greiða fyrir notkun samkvæmt kílómetragjaldi sé ekki samið um annað endurgjald. Ferðakostnaðarnefnd hefur ákveðið akstursgjald í aksturssamningum ríkisstarfsmanna og ríkisstofnana frá 1. júní 2026 sem hér segir:
Fyrstu 10.000 km, kr. 150,00 pr. km
Frá 10.000 til 20.000 km, kr. 135,00 pr. km
Umfram 20.000 km, kr. 120,00 pr. km
Við útreikning á sérstöku gjaldi skal bæta 15% álagi á almenna gjaldið og við útreikning á torfærugjaldi skal bæta 45% álagi á almenna gjaldið. Akstursgjald þetta gildir frá og með 1. júní 2026. Jafnframt fellur úr gildi auglýsing nr. 1/2025.
Dagpeningar:
Ferðakostnaðarnefnd hefur ákveðið dagpeninga til greiðslu gisti- og fæðiskostnaðar ríkisstarfsmanna á ferðalögum innanlands á vegum ríkisins frá 1. júní 2026 sem hér segir:
Gisting og fæði í einn sólarhring – kr. 56.400
Gisting í einn sólarhring – kr. 38.300
Fæði hvern heilan dag, minnst 10 tíma ferðalag – kr. 18.100
Fæði í hálfan dag, minnst 6 tíma ferðalag – kr. 9.050
Dagpeningar þessir gilda frá og með 1. júní 2026. Jafnframt fellur úr gildi auglýsing nr. 2/2025.
Athygli er vakin á að meginreglan er að greiða skal kostnað vegna ferðalaga innanlands, s.s. fargjöld, fæði og gistingu, eftir reikningi. Fæðiskostnaður er uppreiknaður miðað við breytingar á viðeigandi vísitölu sem útgefin er af Hagstofu Íslands.
Ferðakostnaður innanlands er reiknaður út frá verðkönnun þar sem kannað er vænt verð á algengum gististöðum, á höfuðborgarsvæðinu og utan þess. Almennt er ferðakostnaði innanlands breytt tvisvar sinnum á ári, að vori og að hausti, til þess að endurspegla árstíðarsveiflu í kostnaði gistingar.
Á árinu 2025 voru 1.414 styrkir greiddir úr sjúkrasjóði Framsýnar til félagsmanna. Samtals námu greiðslur vegna sjúkradagpeninga, annarra bóta og styrkja kr. 134.265.030,-. Sama upphæð fyrir árið á undan var kr. 133.651.922,-. Samkvæmt þessari niðurstöðu eru útgreiðslurnar svipaðar milli ára en þær hafa hækkað verulega á síðustu árum sem er ákveðið áhyggjuefni enda endurspeglast greiðslan af heilsufari félagsmanna.
Aðalfundur Þingiðnar í maí samþykkti að auka hlut félagsins í Sparisjóði Þingeyinga með kaupum á auknu stofnfé í sjóðnum. Reynist það góð fjárfesting hafi stjórn félagsins fulla heimild fundarins til að auka við stofnfé félagsins í Sparisjóði Þingeyinga um allt að kr. 700.000,-.
Tryggvi Jóhannsson er tekinn við sem formaður Einingar-Iðju. Hann er fullur tilhlökkunar að taka við félaginu eins og getið er um á heimasíðu félagsins. „Ég hlakka til samstarfsins við félagsmenn við að gera okkar góða félag enn betra.“
Síðasti starfsdagur fráfarandi formanns Önnu Júlíusdóttur var síðasti föstudagur en dagana á undan sat hún formannafund Starfsgreinasambands Íslands sem haldinn var við Höfn í Hornafirði, nánar tiltekið við Jökulsárlón. Anna tilkynnti á aðalfundi félagsins í apríl að hún hefði tekið þá ákvörðun að láta af störfum hjá félaginu frá og með 1. júní, bæði sem starfsmaður sem og formaður.
Á fyrsta fundi nýrrar stjórnar sem fram fór nýlega var samþykkt samhljóða að Elsa Hrönn Gray Auðunsdóttir myndi taka að sér hlutverk varaformanns og hefur hún þegar hafið störf hjá félaginu.
Tryggvi var kjörinn varaformaður félagsins 2024 en hafði setið sem starfandi varaformaður frá árinu 2023. Hann hefur setið í stjórn félagsins frá 2017, en þá kom hann inn í hana sem nýr formaður Matvæla- og þjónustudeildar. Áður en hann tók við sem formaður deildarinnar hafði hann setið sem varaformaður hennar frá árinu 2014, ritari frá árinu 2012 og meðstjórnandi frá árinu 2008.
Um leið og Framsýn stéttarfélag þakkar Önnu Júl fyrir ánægjulegt samstarf í gegnum tíðina óskar félagið eftir góðu samstarfi við nýkjörinn formann Einingar- Iðju, Tryggva Jóhannsson um leið og honum er óskað til hamingju með formennskuna í öflugu stéttarfélagi við Eyjafjörð.
Fráfarandi formaður Einingar- Iðju, Anna Júlíusdóttir og formaður Framsýnar, Aðalsteinn Árni Baldursson, hafa lengi unnið saman að verkalýðsmálum en áður störfuðu þau í fiskvinnslu. Anna kom nýlega í heimsókn til Framsýnar með starfsmönnum og stjórn Einingar- Iðju. Þannig vildu forsvarsmenn félaganna efla tengsl félaganna inn í framtíðina. Við þökkum Önnu fyrir framlag hennar til réttindabaráttu verkafólks.
