Formaður Framsýnar kom víða við í dag, hann var beðinn um að sitja fund með landvörðum Náttúruverndarstofnunnar í Mývatnssveit sem eru með aðstöðu í Gíg, gestastofu. Hann fór yfir réttindi og skyldur starfsmanna og stofnanasamninginn sem gildir fyrir starfsmenn við landvörslu. Þaðan var síðan brunað austur í Gljúfrastofu í Ásbyrgi í sömu erindagjörðum til að hitta landverði líkt og í Mývatnssveit sem starfa við landvörslu á vegum Náttúruverndarstofnunnar. Þar var nýbakað brauð á borðum. Góðar umræður urðu í ferðinni um málefni landsvarða og þá var hugur í landvörðum í Gljúfrastofu að kjósa sér trúnaðarmann. Meðal landvarða í Mývatnssveit er Sigurður Erlingsson trúnaðarmaður starfsmanna en hann er jafnframt félagsmaður í Framsýn. Auk þessa tveggja stóru vinnustaða var ferðin notuð til að koma við á nokkrum smærri vinnustöðum við þjóðveginn.
