Fækkun á komum skemmtiferðaskipa blasir við næstu ár að öllu óbreyttu en bókunum skipa næstu tvö árin til hafna á Íslandi hefur fækkað stórlega frá metárinu 2024. Segja má að hrun hafi orðið á bókunum hjá nokkrum minni höfnum landsins. Þetta kemur fram í minnisblaði Sigurðar Jökuls Ólafssonar, framkvæmdastjóra Cruise Iceland og Morgunblaðiði/mbl.is greinir frá en þessi miðlar hafa fjallað um stöðuna. Skemmtiferðaskip heimsækja tæplega 40 hafnir og áfangastaði á landinu öllu. Örar og skyndilegar breytingar á rekstrarumhverfi skemmtiferðaskipa á Íslandi, allt frá haustmánuðum 2023, hafi valdið óvissu meðal útgerða þeirra skipa sem sækja landið heim. Meðal minni hafna megi segja að fækkun í bókunum fyrir árið 2027 sé hrun. Það megi rekja til afnáms tollfrelsis, nýs innviðagjalds, stutts fyrirvara á gjaldtöku og almennrar óvissu með fyrirkomulag á rekstri farþegaskipa. Hafnir eins og á Siglufirði, Borgarfirði eystri, Djúpavogi og Húsavík sjá fram á allt að 95% fækkun skipakoma.
Eins og fram kemur í fréttinni munu þessar breytingar á gjaldtöku og innviðagjalds hafa veruleg áhrif á skipakomur til Húsavíkur sem er í dag vinsæll áningarstaður skemmtiferðaskipa. Þá hefur Raufarhöfn einnig verið í sókn á félagssvæði Framsýnar en nokkur skemmtiferðaskip komu við á Raufarhöfn í sumar. Full ástæða er til að hafa áhyggjur af þessari þróun sem tengist ekki síst auknum álögum stjórnvalda á komur skemmtiferðaskipa til landsins. Vitað er að hagsmunaaðilar á Húsavík eru með málið til skoðunar og hvernig best sé að bregðast við aðstæðum sem stefnir í sumarið 2026 er varðar komur skemmtiferðaskipta til Húsavíkur og Raufarhafnar.