Eitt af hlutverkum Starfsgreinasambandsins er að gefa út þá kjarasamninga sem sambandið á aðild að, bæði á prenti og á stafrænu formi (PDF).
Sambandið hefur á undanförnum mánuðum unnið að svokölluðum heildarútgáfum á þeim samningum sem undirritaðir voru 2024 og hefur sú vinna m.a. falið í sér nýja uppsetningu og breytt útlit. Allt umbrot er nú orðið stílhreinna og staðlaðra sem gerir samningana mun læsilegri fyrir vikið. Þá er komin skýrari litapalletta sem hjálpar til við aðgreiningu samninganna og mun sambandið koma til með að nota viðkomandi liti í auknum mæli á öðrum miðlum, s.s. nýrri vefsíðu sem fer senn í loftið.
Þessari heildarútgáfu er nú lokið og eru vefútgáfur samninganna orðnar aðgengilegar á vef sambandsins. Prentuð eintök verða aðgengileg félagsmönnum á skrifstofum aðildarfélaga SGS um miðja næstu viku.
Um er að ræða útgáfur á eftirtöldum samningum:
- Heildarkjarasamningur SGS og Samtaka atvinnulífsins vegna starfa á almennum vinnumarkaði
- Kjarasamningur SGS og Samtaka atvinnulífsins vegna veitinga-, gisti-, þjónustu- og greiðasölustaða, afþreyingarfyrirtækja og hliðstæðrar starfsemi
- Kjarasamningur SGS og Sambands íslenskra sveitarfélaga
- Kjarasamningur SGS og fjármála- og efnahagsráðherra f.h. ríkissjóðs
- Kjarasamningur SGS og Bændasamtaka Íslands um kaup og kjör starfsmanna sem vinna almenn landbúnaðarstörf á bændabýlum
- Kjarasamningur SGS annars vegar og Landsambands smábátaeigenda og Samtaka smærri útgerða hins vegar
- Kjarasamningur SGS og Eflingar annars vegar og NPA miðstöðvarinnar hins vegar vegna aðstoðarfólks fatlaðs fólks í NPA
- Kjarasamningur SGS og Landsvirkjunar (heildarútgáfa væntanleg innan skamms)
Þá eru enskar og pólskar þýðingar á núgildandi kjarasamningum SGS og SA einnig orðnar aðgengilegar á vef sambandsins.