Skráð atvinnuleysi á landsvísu í desember var 4,4% og jókst um 0,1% frá síðasta mánuði. Í desember 2024 var atvinnuleysið hins vegar 3,8%.
Að meðaltali voru 9.043 atvinnulausir í desember, 5.428 karlar og 3.616 konur. Meðalfjöldi atvinnulausra fjölgaði um 294 manns milli mánaða. Atvinnuleysi var mest á Suðurnesjum í desember eða 8,9% og hækkaði úr 8,6% frá fyrri mánuði. Á Norðurlandi eystra var atvinnuleysið um 3,6%. Best er atvinnuástandið á Norðurlandi vestra eða 1,6%. Vinnumálastofnun spáir því að atvinnuleysi fari hækkandi í janúar og verði um 4,6-4,7% á landsvísu sem er verulega slæm þróun.
Hvað atvinnuleysið varðar í Þingeyjarsýslum þá hefur það stóraukist milli ára. Á meðfylgjandi myndum má sjá að í ársbyrjun 2025 voru 65 einstaklingar á atvinnuleysisskrá í sveitarfélaginu Norðurþingi en voru 161 um síðustu áramót. Hvað Þingeyjarsveit varðar, þá voru 47 einstaklingar án atvinnu í ársbyrjun 2025 en voru 68 í árslok. Hér að neðan má sjá frekari upplýsingar um þróunina hvað atvinnuleysið varðar milli sveitarfélaga og landshluta, sem er því miður, ekki gæfuleg.
