Þar sem jólamánuðurinn nálgast vill Framsýn vekja athygli á því að samkvæmt kjarasamningum ber atvinnurekendum að greiða starfsfólki sínu desemberuppbót í desemberbyrjun ár hvert. Uppbótin er háð ákveðnum skilyrðum sem varða t.a.m. starfstíma og starfshlutfall á yfirstandandi ári. Desemberuppbót skal greiða í einu lagi og ofan á hana reiknast ekki orlof. Um er að ræða fasta krónutölu sem tekur ekki hækkunum skv. öðrum ákvæðum kjarasamninga. Áunnar uppbætur skal gera upp samhliða starfslokum.
Almennur vinnumarkaður
Desemberuppbót er 110.000 kr. miðað við fullt starf og greiðist eigi síðar en 15. desember. Þeir sem eru í starfi fyrstu vikuna í desember eða hafa verið samfellt í starfi hjá atvinnurekanda í 12 vikur á síðustu 12 mánuðum eiga rétt á uppbót. Fullt ársstarf miðast við 45 vikur eða 1.800 klst. á tímabilinu 1. janúar til 31. desember. Nálgast má reiknivél hér.
Ríki
Desemberuppbót (persónuuppbót) er 110.000 kr. miðað við fullt starf og greiðist 1. desember. Þeir sem eru við störf fyrstu viku nóvember eða hafa starfað í 13 vikur samfellt á árinu skulu fá greidda desemberuppbót. Full uppbót miðast við fullt starf tímabilið 1. janúar til 31. október. Nálgast má reiknivél hér.
Sveitarfélög
Desemberuppbót (persónuuppbót) er 140.000 kr. miðað við fullt starf og greiðist 1. desember. Greitt skal hlutfallslega miðað við starfshlutfall og starfstíma síðustu 12 mánuði fyrir greiðsludag. Nálgast má reiknivél hér.
Sjá nánar í kjarasamningum viðkomandi aðila.
Félagsmenn Þingiðnar og Starfsmannafélags Húsavíkur eiga jafnframt rétt á sambærilegum desemberuppbótum og getið er um í kjarasamningum.
STH: https://www.kjolur.is/is/kjarasamningar/kjarasamningar-vid-samband-isl-sveitarfelaga/desemberuppbot