10. þing Starfsgreinasambands Íslands fór fram fyrir helgina en það var haldið á Akureyri. Þing sambandsins eru haldin á tveggja ára fresti. Samþykktar voru sjö ályktanir um byggðamál, starfsemi PCC á Bakka, húsnæðismál, kjaramál, leikskólamál, lífeyrismál og starfsemi erlenda vörsluaðila lífeyrissparnaðar hér á landi. Allar ályktanir og afgreidd mál þingsins má nálgast á þingvef SGS.
Vilhjálmur Birgisson (Verkalýðsfélagi Akraness) var einn í framboði til formanns SGS og var hann sjálfkjörin í embættið til næstu tveggja ára.
Vilhjálmur þakkaði í ræðu sinni kærlega fyrir það traust sem honum var sýnt til að leiða sambandið til næstu tveggja ára. Þá sagði hann: „hvorki stjórnvöld né atvinnurekendur geta hunsað okkur ef við stöndum saman sem eitt afl. Ég hef setið mörg þingin í áranna rás og hef í raun aldrei fundið fyrir jafnmikilli samstöðu og nú, en samt krafti og það skiptir öllu máli“.
Guðbjörg Kristmundsdóttir (VSFK) var einnig ein í framboði til varaformanns og var sömuleiðis sjálfkjörin. Þá voru sjö í framboði sem aðalmenn í framkvæmdastjórn til tveggja ára og voru eftirtaldir kosnir:
Aðalsteinn Árni Baldursson, Framsýn stéttarfélag
Tryggvi Jóhannsson, Eining-Iðja
Silja Eyrún Steingrímsdóttir, Stéttafélagi Vesturlands
Hjördís Þóra Sigurþórsdóttir, AFL starfsgreinafélag
Guðrún Elín Pálsdóttir, Verkalýðsfélagi Suðurlands
Eyþór Þ Árnason, Hlíf
Þórarinn Sverrisson, Aldan
Sem varamenn í framkvæmdastjórn hlutu eftirtaldir kosningu:
Birkir Snær Guðjónsson, AFL starfsgreinafélag
Hörður Guðbrandsson, Verkalýðsfélagi Grindavíkur
Hrund Karlsdóttir, Verkalýðs og sjómannafélag Bolungarvíkur
Sigurey A. Ólafsdóttir, Stéttarfélagið Samstaða
Alma Pálmadóttir, Hlíf
Umræður um byggðamál og lífeyrismál voru áberandi á þinginu. Hvað lífeyrissjóðsmálin varðar eru gríðarlegir miklir hagsmunir í húfi fyrir verkafólk í landinu, þá sérstaklega niðurfelling á opinberu jöfnunarframlagi sem bitnar helst á verkamannasjóðum sem hafa mun hærri örorkubyrði en aðrir lífeyrissjóðir.